Post: #1
Title: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-05-2006, 03:55 AM
Parent: #0
برغم المشغولية الشديدة أحب أحياناً أن أكسر الروتين وأطل عليكم بشىء من الدردشة الشبكية العنكبوتية (al internet teea) فخطر بذهنى خاطر عجيب ، وهو ظاهرة الناس التى يهبط عليها (الغِنى) (بكسر العين) وكسر النحس وكسر الفقر ، ويكون ذلك الهبوط ، هبوطاً مفاجئاً وعجيباً ، وعندى أمثلة كثيرة أسرد منها حكايتان قريبتان منى ، خفيفتان على اللسان ، حدثت خلال العامان المنصرمان أو لعله عاماً واحداً أوبعض عام ،
الحكاية الأولى صاحبها (مجيد) ، شاب فى متوسط العمر ، إغترب للمملكة منذ حوالى العشرة سنوات ، وأتاها شاباً صغيراً فى العشرينات من العمر ، وتلقفه (أولاد الحلة) سريعاً ، فتكاتُف (أولاد الحلة) هنا فى المملكة لم أجد له مثيلاً ، ورتبوا أمر إقامته وعمله ومصاريف تمباكه وريال جريدته وريالين حافلته وخمسة ريال إفطاره ، وظل على هذا المنوال حتى إنقضى الشهر ، فصار عضواً فاعلاً فى المنزل المؤجر مثله مثل الآخرين ، ودفع (حق الميز) وساهم معهم فى الإيجار وإشترى مرتبة وبطانية ودولاب بلاستيك (أبو سستة) ، لينتظروا جميعهم (علاّن) أو (فلان) جديد آتٍ من خلف الوادى. 
ومرت الأيام والسنين ، وصار مجيد يذهب سنوياً إلى أهله ، وفتح الله عليه فتحاً جميلاً وتزوج بفتاة من (الحلة) ، وله منها ولد وبنتان ، وحاله ميسوراً مثل الآخرين ، بمتوسط دخل شهرى يعادل الألف دولار أمريكى أو يزيد قليلاً ، وهو حال الأغلبية العظمى لشريحة العمال المغتربين بالمملكة منذ آلاف السنين ، وصاروا يرتبون أحوالهم بهذا النذر اليسير ، وفتحوا بيوتاً ورعوا أيتاماً وعالجوا الكثيرين من الأهل والجيران والأمهات والآباء ، وزرعوا وتاجروا وساقوا الباصات والرقشات والأمجاد والهوندا ، وإشتروا منها الأراضى وبنوا الدور وزينوها بأجمل (العفش) ، فأناروا (الحلة) بفنون الكهرباء وأدخلوا الدشات والريسيفرات والموبايلات والدراجات ، والقلابات والتركترات ، ودعموا الصيدليات وفهموا الحاجة إلى المختبرات ، كما فهموا باقى الحاجات ، وكافحوا الحشرات ، وجلبوا الملآت (يعنى ملايات) ، والكمبيوترات ودخلوا (الكافيهات) وتعارفوا بالإيميل وعبر (الشات) ،
وحتى لا نخرج من الموضوع ...
مجيد شاب لطيف ممتلىء الجسم وبه طيبة وسمرة لا تملك إلا أن تعجبك ، تعليم ثانوى عادى وتصرفات شخصية راقية ، وهندام نظيف ومرتب ، وجسم به بعض لمعة نتيجة الإهتمام بالشخصنة عند الزيارات ، ولكنه ذو غبرة فى الدوام والأسواق وعند قضاء الحاجات ، متوسط دخله السنوى يبلغ حوالى ال 12 ألف دولار ، وهو رجل متدين ، عرف عنه الصدق ودماثة الأخلاق ، ويشهد له (أولاد الحلة) بذلك ومدحوه كثيراً ،
وفجأة ، ولا تسألونى كيف ، ذهب مجيد إلى السودان ، وإشترى البيوت والعمارات وأحضر معه اللاندكروزرات وأجمل أنواع العربات وفى رواية السيارات ، وقد حسب له بعض (الحساد) والأحباب ، أن إجمالى ما إشتراه فى هذه الفترة الهباب ، بلغت مليونان من الريالات السعوديات التى يسيل لها اللعاب .
هذه الحكاية الأولى إنتهت ،
أما الحكاية الثانية فهى قصة (حسام) ، فحسام تربطنى به صلة قرابة ، شاب لطيف مهذب ، هاجر إلى الأمارات منذ حوالى العشرون عاماً أو تزيد ، وسمعته طيبة وتواصله مع أهله مدعاة للإعجاب ، وهو أيضاً صاحب دخل شهرى متوسط يبلغ زهاء الخمسة أو ستة ألف درهم إماراتى ، أى قرابة الألف وخمسمائة دولار أمريكى ، وتعليم ثانوى عادى ، وأتتنا عنه الروايات أنه دخل إلى السودان مؤخراً وبحوزته زهاء الإثنين مليون درهم ، وإشترى كصاحبه ذاك ، العمارات وجلب القلابات إلى آخر تلك الآهات ، ويفكر الآن فى بناء مستوصف أو مستشفيات كما جاءت عن صاحب الروايات.
وإنتهت الحكاية الثانية ،
ومن غير ليه ، وكيف يا أخوانا ،
أليس الذى أعطى صلاح إدريس ومجيد وحسام بقادر على أن يعطي عبده هشام؟؟؟
قالوا
بلى.
أسماء أبطال الحكايتين ، أسماء مستعارة حفاظاً على الخصوصية.
|
Post: #2
Title: Re: القروش التمام الجات لى مجيد وحسام ويتمناها أخوكم هشام
Author: saif massad ali
Date: 12-05-2006, 04:17 AM
Parent: #1
هشام شيخ الدين
يرزق من لا حيلة له حتي يحتار صاحب الحيلة
والله والله يا هشام شيخ عبدالله ودالعجوز الشيخ المكاشفي اقسم لي بجلال الله انو اصلو في المنارة يغنني دنيا واخري لكني فضلت فلسي علي الدنيا يا هشام
كسرة
عندي عم من النفيديه زول مروق شديد قروشو كتر شديد لمن غلبو الحساب اها انفطع في بيتو الجماعة فكوها شيخ فلان فلس جاهم مارق بعد شهر قال ليهم سمعت كلامكم فلست كيفن يعني عندي 11 عربية وخمسة الف من البقر ديل ما قروش ولا شنو لكن اقول ليكم حاجة انا واولادي الحساب غلبنا عشان كده ابيت المرقة
|
Post: #4
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-05-2006, 04:27 AM
Parent: #2
الشيخ سيف ود مساعد ود على ود عوج الدرب
إسمك هذا فقط يعتبر (حجاب) من العين والحسد وشر الخلق ، ويجلب السعادة والسرور ويدخل صاحبه الجنة بغير حساب
عشان كده يا سيف ، إنت القروش داير بيها شنو؟؟؟؟ ياخ دى وسخ الدنيا ،
بس ، بى ده كلو ، أنا دايرها ، ودينى لى شيخك ده ، عشان الحالة بقت صعبة شديد ، دايره ليها دفره
وقديما قالوا (ياسين ساعدوها بى الجكة)
|
Post: #19
Title: Re: القروش التمام الجات لى مجيد وحسام ويتمناها أخوكم هشام
Author: garjah
Date: 12-05-2006, 11:14 AM
Parent: #4
Quote: عشان كده يا سيف ، إنت القروش داير بيها شنو؟؟؟؟ ياخ دى وسخ الدنيا ،
|
الــــــجاك
ومعناها
يا كضبك يا هشااااااااااام
|
Post: #3
Title: Re: القروش التمام الجات لى مجيد وحسام ويتمناها أخوكم هشام
Author: الصادق صديق سلمان
Date: 12-05-2006, 04:25 AM
Parent: #1
الحبيب هشام يازول
Quote: أليس الذى أعطى صلاح إدريس ومجيد وحسام بقادر على أن يعطي عبده هشام؟؟؟
|
بلى قادر وعزته وجلاله ولكن أن تكون المعادلة كالتالي
(أليس الذي أعطى صلاح إدريس ومجيد وحسام بقادر على أن يعطي عبده هشام والصادق)
أبوفتحية
|
Post: #5
Title: Re: القروش التمام الجات لى مجيد وحسام ويتمناها أخوكم هشام
Author: saif massad ali
Date: 12-05-2006, 04:28 AM
Parent: #3
الصادق صديق سليمان
وانا مرقتني ساكت يعني
من اسمك ده حزب امه وانصاري ما عندك حاجة مفلس زي هشام شيخ الدين
اي زول يلم فيك يشيل منك
|
Post: #7
Title: Re: القروش التمام الجات لى مجيد وحسام ويتمناها أخوكم هشام
Author: abuguta
Date: 12-05-2006, 05:09 AM
Parent: #5
هشام زحو لى انا جتكم فوق سكة مجيد وحسام
جيت قطع للسعودية بحار ..من ارض المهراجا.ومناسبة مجىء..كنت حايم فى محمد على روود -بومبى ..عشان اشترى لاخواتى قوائش بلاستيك ولاخوانى فنايل كط...قابلنى فى ذلك الشارع سعودى شغال فى السفارة..سالنى من محل للصندلية.فاجبته وانا العارف .فسالته هلى فتحتو العمرة للطلاب ..فقال لى مازالت ممنوعة ..لكن انت عاوز تمشى متين قلت ليه بكرة..قال لى امشى احجز على السعودية وتعال لى ,رجعت الهتش والفنايل لصاحبها بحجة انها صغيرة..عشان اتم بسعرها تذكرة السعودية المرتفعة قليلا ..وقمت صوف على السفارة السعودية وفى 15 دفيفة اخذت التاشيرة..مكتوب عليها مجانا بالاحمر..ومنها لبونا حيث تودبع الشباب واعينهم تفيض بالدمع..
فنزلت فى مطار جدة لا املك غير ريال واحد فقط..اتصلت به على قريبى الذى لم يخيب ظنى..
وبعدها تدافقت على الريالات التى ما كنت اطبها انما احشرها حشر فى جيبى..فاشتريت الاقامة
وسافرت بها السودان..وكان امى عيدها عيدين..صرفة وجراد على قول هبانى..رجعوع ابنها الغائب من ارض الواق واق..وكمان معاه اقامة...وبعدها جيت عشان الم القروش..وقلت سنتين بس والفقس ما يلحقنى....ومن اول شهر قلت احل اقامتى و الباقى كله ربح...بكون حقى براى...الشهر التانى اخوى دخل السجن..بشيك ياريتو لو كان اكلها..بس هو كان ضامن ليه زول تميسيح...ضرب ضربتو وهرب..
افو اخلى اخوى فى السجن لازم احلو...وبعدها الباقى كلو ربح...
هشام ناسك ديل ما بتلاحقو..احسن نفك دربهم
سلام
شكرا
|
Post: #8
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-05-2006, 05:28 AM
Parent: #7
أبقوته
أشكرك على الحكاية الظريفة ، ونصيحتى ليك ما تيأس ولا تحبط فالقصة كلها عايزة شوية (بلبصة) وكتير (صبر) وبعداك يا جاك الغنى يا جاتك حاجات تانية تودى التوج
تحياتى
|
Post: #6
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-05-2006, 04:44 AM
Parent: #3
الحبيب الصادق
أشكرك على المعادلة الجميلة ، وأرجو أن تضيف عليها (وسيف مساعد ولو كره الكافرون)
تحياتى يا جميل
|
Post: #9
Title: Re: القروش التمام الجات لى مجيد وحسام ويتمناها أخوكم هشام
Author: المسافر
Date: 12-05-2006, 05:52 AM
الهشوم
العاطي حيَ
|
Post: #10
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-05-2006, 06:02 AM
Parent: #9
المسافر
ونعم بالله
تحياتى
|
Post: #11
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-05-2006, 06:04 AM
Parent: #1
يا زول
تحياتي
يا اخوي انت مالك اليومين ديل شابكني سيرة قروش ساااي !!
الا دخلني معاكم في الدعاء الجماعي دا ( علي وزن العرس الجماعي ) ..
أليس الذي أعطى صلاح إدريس ومجيد وحسام بقادر على أن يعطي عبده هشام والصادق وودمساعد
ومن لف لفهم !!
ملحوظة: انا مع لف لفهم
شنكل صغير :
علي الحرام سيف مساعد مفلس وما عنده المارك بتاع الشاي
منعم
|
Post: #12
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-05-2006, 06:21 AM
Parent: #11
عبدالمنعم سليمان:
ومن لف لفهم
حلوة شديد
ياخ تستاهل الغنى والقروش الكتيرة ، بس أدى معاك أخوك سيف (خمشة)
|
Post: #13
Title: Re: القروش التمام الجات لى مجيد وحسام ويتمناها أخوكم هشام
Author: الصادق صديق سلمان
Date: 12-05-2006, 07:55 AM
Parent: #1
الأخ سيف مساعد
لك التحية
Quote: الصادق صديق سليمان
وانا مرقتني ساكت يعني
من اسمك ده حزب امه وانصاري ما عندك حاجة مفلس زي هشام شيخ الدين
اي زول يلم فيك يشيل منك |
المعادلة تكون كما تريد يا سيدي ولكن أنت قلت في مداخلتك الأولى بأن الشيخ قال تعال وتغني لي الجنا الجنا ولكنك فضلت الفلس فقلت لنفس فلماذا اطلبها له أنا وهو رفضها من اسيادها.
أبوفتحية
|
Post: #14
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-05-2006, 08:14 AM
Parent: #1
Quote: ياخ تستاهل الغنى والقروش الكتيرة ، بس أدى معاك أخوك سيف (خمشة)
|
يازول
الخمشة اجيبها من وين
بتاع الايجار قال لي الصباح والله يا باشمهندس اصله الشقة الانت
ساكن فيها دي انا مجهزا لعرس البت الدكتوره وهسه شايف زي خطيبها
مستعجل وكدا اها انشاء الله الجماعه ديل قبضوكم الليله يوم 5 من الشهر !!
تقول لي ادي سيف خمشة انا مؤجر لي من زول ازرق طويل الباع مشلخ وحريف !!
والله يا زول هسه قاعد علي دعوتكم ال فوق ديك لو ظبطت سيف ذاتوو بكون صاحب خمشه !!
يااخ انا سوداني وعايش في السودان ومؤجر من سوداني !!
والله مفروض تعتذر لي عديييل كدا
خمشة قال
انا ذاتي بقيت خمشه الا ربع
منعم
|
Post: #15
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-05-2006, 10:04 AM
Parent: #14
عبدالمنعم أخوى
إن شاء الله ربنا يرزقك رزق واسع ويكفيك شر (الأزرق طويل الباع) ، وتقعد تتمتع فى أملاكك ، لأن الإيجار وما لف لفه لا يؤدى إلا للجنون والشلهتة طول العمر ،
طيب يا عبدالمنعم ، ما دام إنت فى السودان ، (تقسيم الثروات) ده ما مرّ عليكم
أبقى سياسى (محنك) أو شيل سلاحك وخش الغابة بكرة يجيبوك نائب رئيس
ده الشغل
تحياتى لك ولجميع نواب الرئيس الأشاوس
|
Post: #16
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-05-2006, 10:38 AM
Parent: #1
يا زول
ازييك
Quote: أبقى سياسى (محنك) أو شيل سلاحك وخش الغابة بكرة يجيبوك نائب رئيس
ده الشغل |
ابقى شنو انا عامل فيها سياسي ومحنك قبل تقسيم الثروه الحرام دي
الا اعمل شنو مؤمن بالديمقراطية الاجتماعية والعدالة وحق الانسان
بالبرنامج دا والله راكوبة ما يوزععوها لي معاهم !!
اها ابيع ذمتي وابقي زي صاحبك وولده المبغبغ وزوجته الحلبيه قريبة
مولانا عادل سمير واشرف ولا اقرض علي كدا !!
اها يا زول مقرض علي كدا لي فترة !!
عندي صحبي كان بقعد معاي زمن كنت بقعد هسه طبعا البلد كله
واقفة .. ما خوفا الا (spirit) ما تكلم زول !! المهم صحبي دا اسمه علي
وكل يوم (هانق اوفر) من الصباح اها الفين وخمشه الفاتت دي جاني وقال لي
عينوه معتمد جنب الدمازين !! يا علي دا كلام شنو انت لا عندك في السياسه ولا
حاجه هو (مثقفاتي) بقول كلام زي ود رملية وودالامير وفيصل عباس !! المهم علي
قال لي والله يا منعم اكتشفت ليك انه ابوي 3 زول في القبيلة مقاما وانا 1 زول
في القبيلة تعليما اها المنطقة عينته هو بالاجماع السكوتي !!
اها علي سافر وخلاني براي وقال لي اجي الكرمك يشغلني بالله الزول دا ما مجنون
هو انا لو وصلت الكرمك محتاج ليه ما باخد حقي براي بضراعي وبتمرد !!
اها مره علي زارني في نمره 3 محل ما انا مؤجر ومعاه عسكري وسواق اللاندكروزر
ونزلوا ليهم كرتونه وباغه .. انا قلت علي دا جاب بنقو ولا شنو وعاوز يورطني
عشان انا معارض !! المهم صرف الحرس والسواق وقال ليهم ما تنسوا البيت عشان تجوني
بكره وبس فتحت ليك الكرتونه القا ليك عسل مشيت للباغة القاها ليك ملآنه عرقي
ااامك يا ابوعلوه دا شنو !! انت عينوك معتمد ولا مقطر !! قال لي ما عارف اشرب
ساااي دا بنسيك عمايل الانقاذ للانتخابات الجايا !! لا حول الله دا شنو يا اخوانا !!
المهم علي وهو خريج اداب الخرطوم 2000 بداها لي ببيت شعر ما عارف وما حب الديار
شغفن قلبي وشنو كده قلت ليهو يا اخوي انا مالي ومال الديار الحكومه كيف هناك وانت
داخل تبع الشريك التاني !! ضحك لما اشهق قال لي حكومة شنو اصل الحكاية والرواية
بحكيها ليك كلها وتاني ما تسالني مدي الحياة قلت ليه موافق !! قال لي باختصار الحكومه
بدل ما تغير حياة الناس هناك وتدخلهم المدنية وقفت تعاين ومساعدها عدم احتياج الناس
او تخيلهم بعدم احتياجهم للتعليم والصحة والماء والكهرباء وبحمدوا سيدهم !! الا قال لي
انا اول قرار عملته لغيت التعامل النقدي ؟؟ اها قلت ليه يا اخوي وجبت الفيزا والماستر
والداينرز كلوب والامريكان اكسبريس من وين !!؟ قال لي اكسبريس والله لوري ما جبت خلي
اكسبريس !! كا العملتوا كراس وبقطع منه وبكتب علي الورقع اعطاء حاملة عدد كذا ...
وبوقع واخر الشهر بجيب قروش المحلية مع المحاسب وبحاسب !!
اها تقول لي حكومة وثروة !!
بغشوا ليك الوهميين الجدد بمناطق وهمية ومحليات بخططوها تبع مخططهم وبقول ليهم اديناكم يا الشريك الحكومي الصديق وفقا للاتفاقية !!
الثروة يا الزول اخوي هنا في الخرطوم محل الطيارة بتقوم والرئيس بنوم والجكس بحووم
وحي انا من الجكس !!
شوتة ضفاري :
مصري جاتو ليلة القدر وقالت ليه عاوز شنو قال ليها عاوز ابقي غني ومفتري !!
انا يا اخوي خليني مع يرامجي وناسي الا داير ابقا غني !!
وحالي كحال الشاعر :
ولا صديق يكفلني بدش وازوغ
ولا حلبية تري مابي فانكفل
الله يدينا الخمشة وسمح الدش وكعب الغش .. اي دا الشغل يا زول !!
طولنا عليك
منعم
|
Post: #17
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-05-2006, 10:52 AM
Parent: #16
منعم اللذيذ
أفرحتنى بحكاويك اللزيزة (زيك) يا منقة
(أوع تكون إتعقدت)
بعدين ياخ أنا الظاهر لقيت لك حل
تعال لى عُمرة سريع .... أو حتى حج ... المهم
فى واحد صاحبنا كان معاى من يومين ، أدانى عرض (عجيب) خالس خالس ...
قال لى عندو زول معاهو كاش تقيل (حوالى 20 مليون ريال سعودى) وعايز (يغسلها)
وأنا والله ما بعرف للحاجات دى ، فقلت ليهو (أدينى فرصة أفكر)
أها أنا ما عارف القروش بغسلوها كيف؟؟؟ لأن الفكرة العندى أن الغسيل بيبوظ القروش وتقوم (تسيح) فى الغسالة أو الطشت
ما حصل نسيت ليك ورقة قروش مدنكلة فى جيبك وقاموا (غسلوها) ليك ؟؟؟؟ شفتها بتتفتفت فى الجيب كيف؟؟؟
أها دى عرفتى فى الغسيل ، فدحين يا منعم كان جيتنى سريع ، والله أخليك تغسل لمن الله يغفر ليك ، وديك الساعة يانا كلنا الخمشنا معاك ، إنت تجيب الطشت ، وأنا برمى ليك ، حبة فى الطشت ، وخُمشة فى الجيب ، وبعدين الشى ده كتير خلاص ، يعنى بالميت كده تكون محتج ليك فنطاز فنطازين موية
رأيك شنو؟؟؟؟
تجى؟
|
Post: #18
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-05-2006, 11:10 AM
Parent: #1
| Quote: أها دى عرفتى فى الغسيل ، فدحين يا منعم كان جيتنى سريع ، والله أخليك تغسل لمن الله يغفر ليك ، وديك الساعة يانا كلنا الخمشنا معاك ، إنت تجيب ال |
الزول شكرا
الا انا ما بعرف اغسل !!
ممكن تغسل انت وترسل لي للمكواة !!
شنكل قانوني : كنت في قطر القطريين بقولوا ( للصلب) مكواه !!
(اوع تكون اتضايقتا)
اها انا ما قاصد مكواة القطريين .. مكواه الله والرسول دي !!
انحنا يغسلنا رب العالمين انشاء الله
منعم
|
Post: #20
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-05-2006, 11:22 AM
Parent: #18
والله يا منعم فى طرق كتيرة للم القروش الكتيرة
آخر حكاية سمعتها أمبارح عن جدة وحكاويها العجيبة ، عن قصة المرأة السودانية التى كانت (فاتحة بيت) والعياذ بالله
بس البيت ، ماهو بيت نصاح
دى يا سيدى عبارة عن فيلا إيجارها السنوى 160 ألف ريال سعودى ، يعنى قصر عديل كده ومزوده بكاميرات تصور من الشارع ، والعتب على الراوى فقد جمعت هذه المرأة 8 مليون ريال سعودى بالتمام والكمال ، ووضعتها فى البنك السعودى الأمريكى ، ولما قررت الذهاب للسودان بثروتها ، لم يعطها الموظف المبلغ المطلوب بحجة أن لديه تعليمات بتجميد هذا الحساب ، وهاك يا سكلى وهاك يا كواريك فى البنك ، وقيل أنها أخرجت المطواة من شنطتها وطعنت الموظف فى يده ، وتم إستدعاء الشرطة ، وعينك ما تشوف إلا نور ،
خلاصة القصة أن الدولة صادرت المبالغ لعدم وجود إثبات عن شرعيتها ، وجاءت الروايات من السجن أن المرأة قد فقدت عقلها كما فقدت أشياءها الأخرى فى (الفيلا)
والمحن عندنا كثيرة ، تعال جدة ونوريك العجب العجاب ، تقول لى (مكوة)
|
Post: #21
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-05-2006, 11:39 AM
Parent: #1
| Quote: 8 مليون ريال سعودى بالتمام والكمال ، ووضعتها فى البنك السعودى الأمريكى ، ولما قررت الذهاب للسودان بثروتها ، لم يعطها الموظف المبلغ المطلوب بحجة أن لديه تعليمات بتجميد هذا الحساب ، وهاك يا سكلى وهاك يا كواريك فى البنك ، وقيل أنها أخرجت المطواة من شنطتها وطعنت الموظف فى يده ، وتم إستدعاء الشرطة ، وعينك ما تشوف إلا نور ، |
يازول لا حول الله انت البتاع بكم اصلا عندكم !!
يا اما البتاع غالي يا اما المره دي طولت
8 مليون لا حول ولا قوة الا بالله
المره دي شغاله في السعوديه من زمن ابي بن خلف ولا شنو !!
وليها حق تطعن الموظف مش هللاتا وبعرقها !!
| Quote: خلاصة القصة أن الدولة صادرت المبالغ لعدم وجود إثبات عن شرعيتها |
ما كان توريهم مكان جابت القروش وكان حيكون اثبات بجلاجل !!
| Quote: الروايات من السجن أن المرأة قد فقدت عقلها |
هو فقدت عقلها في السجن ما فاقده من زمااان
ياااخ هسه في وزل نصيح بتحمل تعب ال 8 مليون ديك الفتره الطويله دي !!
المره دي ما مسلمه ولا شنو !!
ولا شنو !!
يا الزول هسه اي حديث في ما يرشد اليه !!
هسه ما يرشد من حديثك لي في قصة المره دي شنو !!
اجيب محرم واجي ولا شنو
ولا شنو تااني
منعم
|
Post: #22
Title: Re: القروش التمام الجات لى مجيد وحسام ويتمناها أخوكم هشام
Author: محمد عادل
Date: 12-05-2006, 06:41 PM
Parent: #21
الادى مجيد وحسام
اشاءالله ادينى انا وعمى هشام وعمى سيف مساعد
|
Post: #23
Title: Re: القروش التمام الجات لى مجيد وحسام ويتمناها أخوكم هشام
Author: raheel
Date: 12-05-2006, 06:48 PM
Parent: #1
يازول يازول انت وينك ووين ايامك والله ليك وحشة
انا جيت داخلة البوست بس ما قريت فيهو ولا حاجة حبيت اسلم عليك فى الاول
بعدين اشوف الحاصل شنو
|
Post: #24
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-05-2006, 06:51 PM
Parent: #1
يا محمد عادل ان صاحب البوست ده وين !!
صغر الصوره دي شوية يا ابوحميد !!
تحياتي
منعم
|
Post: #25
Title: Re: القروش التمام الجات لى مجيد وحسام ويتمناها أخوكم هشام
Author: محمد عادل
Date: 12-05-2006, 07:12 PM
Parent: #24
العم عبدالمنعم
Quote: يا محمد عادل ان صاحب البوست ده وين !!
صغر الصوره دي شوية يا ابوحميد !!
تحياتي
منعم |
البوست دا شكلو فعلا حقك انت
شايفك محتليهو
اشاءالله تغنى ياعم عبدالمنعم وتغينا معاك
|
Post: #26
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-05-2006, 07:51 PM
Parent: #1
محمد عادل
تحياتي
ومال قايلني داير الجنا !!
بغنيك وبغني ليك
سوي صبر رفيق ..
تحياتيمنعم
|
Post: #27
Title: Re: القروش التمام الجات لى مجيد وحسام ويتمناها أخوكم هشام
Author: المسافر
Date: 12-06-2006, 01:03 AM
Parent: #26
Quote:
ما كان توريهم مكان جابت القروش وكان حيكون اثبات بجلاجل !!
|
يا عبدو عيب
في الليلة ديك
القصة ذاتها بقت عليك
وأدوك الشريط
|
Post: #28
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-06-2006, 04:36 AM
Parent: #27
raheel
إنتى زاتك وين؟؟؟ والله مشتاقين وليك وحشة
محمد عادل
عبدالمنعم
المسافر
شكرا على إثراء البوست ، ويا عبدالمنعم الضحك شرطنا عديل من تعليقاتك الساخرة خصوصا من زمن أبى ابن خلف
|
Post: #29
Title: Re: القروش التمام الجات لى مجيد وحسام ويتمناها أخوكم هشام
Author: ابو جهينة
Date: 12-06-2006, 05:41 AM
Parent: #28
الحبيب هشام
تحياتي
Quote: ومن غير ليه ، وكيف يا أخوانا ،
أليس الذى أعطى صلاح إدريس ومجيد وحسام بقادر على أن يعطي عبده هشام؟؟؟
قالوا
بلى. |
تتذكر يا هشام نشيد القطار في الأولية :
لا جن و لا سحرة بقادرين أن يلحقوا أثره
أها في ناس في الغربة زى القطر .. يجيك ماشي زى قطر البخار و فجأة يبقى زى قطارات اليابان ديك ال بتمشي على شريط كهربائي ممغنط... سرعة جنونية
صاحبي الزاكي جا السعودية و هو يملك بيتاً ورثه من والده و عربة فلوكسواجن ( خنفسانة ) قديمة قرَّشها في البيت و جا هنا عشان يعمل البيت دورين و يشتري عربية سمحة و يجيب عفش و الذي منو ..
رجع للسودان بعد عدة سنوات و قد باع البيت القديم و الخنفسانة و مرتو حردانة عند أهلها ..
السبب شنو ؟ الله أعلم .. زول بطنو غريقة ..
حسع شغال سمسار أراضي ..
|
Post: #30
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-06-2006, 05:53 AM
Parent: #29
الحبيب الأديب أبو جهينة
أشكرك على المشاركة الحلوة
تحياتى
|
Post: #31
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-06-2006, 09:35 AM
Parent: #1
يا زول
صباح الخير
ما عندك لي قصة مره سودانية بقت غنية ومفترية من الغسيل !!
والله يا زول قصص النسوان والرجال ال بغنوا بالغسيل دي حلوة
وبتصبرني علي سيد البيت !!
كده اديني واحده اتصبر بيها لامن يجي سيد البيت المشلخ
والازرق طويل الباع ع ع ع داك ..
منعم
|
Post: #32
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-06-2006, 10:13 AM
Parent: #31
عبدالمنعم
فى راقداااااات
والعجب فى جدة يمحنوك عديل كده
شى (فتح بيوت) وشى (نقش) وشى (كسرة) وشى (البيجيبو ليك الجكس) وشى (الببيعو الحشيش) وشى (حقين الشربة) وشى (شيل حلاوة) وشى (حقات الشاى) وشى (زواج عرفى) وشى (زواج كضيب كضيب) وشى (جمعيات خيرية) وشى (معوقات) وشى (شحتة متسترة) وشى (حاجة إسمها الرباط) ، والرباط ده موال كبير حا أحكيه فى بوست منفصل ، وهى البيوت والشقق والعمارات التى (يربطها) أصحابها لوجه الله ، أى يعطونها بالمجان للفقراء والمساكين ، ويا الفقراء والمساكين عندهم بلاوى متلتلة ، بس النفضى ليكم
كده إتصبر بالفقرة الفوق دى لمن أجيك راجع
|
Post: #33
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-06-2006, 10:32 AM
Parent: #1
| Quote: والرباط ده موال كبير حا أحكيه فى بوست منفصل ، وهى البيوت والشقق والعمارات التى (يربطها) أصحابها لوجه الله |
يازول
الرباط دي برضه عندنا عمارات جامعة مخستكه كدا بتخرج ضباط بوليس
يعني زي الكلية واحد بس فرق خريجين الرباط من خريجي كلية الشرطة
انه بتاعين الرباط ديل بسمحوا بادخال (السجائر) للمتهم في السجن
وبتاعين الكلية بسمحوا بادخال( السعوط) .. اما عن عماراتهم فدي
حكاية ما حاقدر احكيها ليك ولا بوعدك لانه عبدالرحيم الوقع عماراتهم
لما كان وزير داخلية بقي وزير دفاع وانا زول كايس الايجار يجيني
باسلحتة الثقيله ديك !!
نص شنكل :
والله خايف من ريالتوا ما من اسلحته اصله انا جني وجن الرياله
عشان كده الاطفال الصغار ما بشيلهم !!
ماتقوم ترسل لي ريالات سعوديه وتفهمني غلط !!
منعم
|
Post: #34
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-06-2006, 10:46 AM
Parent: #33
عبدالمنعم
وكمان يا ما قابلت (مريلين) عديييييل كده ، وملانين جنس قروش
حاجة تمخول
|
Post: #35
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-06-2006, 10:57 AM
Parent: #1
يا زول
ما عندك لي مريله عاوزا ليها واحد تريل فيه !!
والله القا لي واحده مريله من السعودية اتريل معاها مريله لمن تآمن ذاتوو!!
كعبله:
المريله من الريال يا زول ما تجيب لي واحده مبلبله ساي
|
Post: #36
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-09-2006, 04:26 AM
Parent: #35
|
Post: #37
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-09-2006, 08:11 PM
Parent: #1
يا هشي ويا بشي !!
مساء الخير
سووري ما دخلت لي يومين كنت بحنك بتاع الشقة !!
لكن فضيت ليك تب وبالله الحقني بغسلة كدا لاني مضغوط ..
كسره :
بمناسبة مضغوط دي مره جبنا واحد بتاع شاورما بمكنتة عشان
يعمل لينا الشاورما في البيت بالايجار واللحمه مننا
قام صحبي جاب عشرة كيلو لحم اداها للزول المعلم ومشينا نشوف
شغلنا داك مع الشله .. بعد شوية صحبي لاحظ انه اللحمه وهي في المكنة بقت
شوية جاء جاري مشعشع للمعلم وقال ليه يا معلم انا جايب 10 كيلو
دي ماله بقت لي شوية كدا ؟؟ المعلم قال ليه دي مضغوطة
صحبي رد بزهج كدا يعني مضغوطة اكتر مننا !!
ربنا يخارجنا من الضغطه يا هشام قول امييين ..
بكتب المداخلة دي في وقت متاخر ليلا
علي ساكني مكة مراعة فروق العقل !!
منعم
|
Post: #38
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-10-2006, 04:19 AM
Parent: #37
ياخ كمّل الشمار:
إن شاء الله بس الشاورما جاب همها؟
وعلى ذكر (المضغوط) فإن هنا فى المملكة توجد أكلة إسمها (المضغوط) وهى عبارة عن اللحم أو الدجاج عندما يتم نضجه فى الطنجرة (الحلة البرستو) فيصبح شهياً ليناً هيناً ولذيذا ،
عارف ليه؟؟
لأن الضغط (عاقبته) دائماً خير
فأبشر بالخير يا عبدالمنعم فكلنا فى (الطنجرة) سواء
|
Post: #39
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-10-2006, 10:40 AM
Parent: #1
(| Quote: المضغوط) وهى عبارة عن اللحم أو الدجاج عندما يتم نضجه فى الطنجرة (الحلة البرستو) فيصبح شهياً ليناً هيناً ولذيذا ، |
هشام تحياتي
احسن يا اخوي اللحم المضغوط .. مره اكلت في عمان لحم مدفون
بدفنوا تحت الارض !! يعني انا والناس العزموني بعد الاكل بنكون
دافننو سوا !!
اها تجي ولا نجي ..
منعم
|
Post: #40
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-10-2006, 10:51 AM
Parent: #39
أجى يا ود أمى
|
Post: #41
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-10-2006, 10:57 AM
Parent: #1
صبأت يا فتي
كان ما صبات تعال انصبااك
منعم
|
Post: #42
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-10-2006, 11:04 AM
Parent: #41
|
Post: #43
Title: Re: القروش التمام الجات لى مجيد وحسام ويتمناها أخوكم هشام
Author: عبد المنعم سليمان
Date: 12-10-2006, 11:25 AM
Parent: #1
والله يا هشام عندي ليك قصة بس ما بقدر اقولها هنا !!
اخطر من قصة المره بتاعة الغسيل والمكواه ديك !!
اكتب ليك في جواب ولا اعمل شنو !!
والله حارقاني حرقة .. شطة بس
منعم
|
Post: #44
Title: Re: القروش التمام الجات لى مجيد وحسام ويتمناها أخوكم هشام
Author: Salah Waspa
Date: 12-10-2006, 05:59 PM
Parent: #1
هشام المليونير القادم بقوة
لك التحية والأشواق
وسأرسل سيرتي الذاتية طالبا وحاجزا وظيفة مدير أعمالكم إختصارا للوقت وكده , وبعدها وبالقرب من مكتبكم العامر وخزنتكم الدفيانة نرسل دعوتنا
بأن نلحق بركب مالكي الأساطيل الأرضية والبنائية والمستشفياتية .
دوام التوفيق وأرجو الا تذهب السيرة الذاتية الى خور هشام الزول .
صلاح واسبة
|
Post: #45
Title: Re: القروش التمام الجات لى مجيد وحسام ويتمناها أخوكم هشام
Author: يازولyazoalيازول
Date: 12-11-2006, 07:01 AM
Parent: #44
صلاح واسبة
من خشمك ولى باب السماء
إنت مكانك (القلب) وليس (الخور)
تحياتى وأمنياتى القلبية ، واعتبر موضوع التعيين مفروغ منو
|
|