Post: #1 Title: شابان سودانيان يحملان العروس على الأكتاف حسب الأعراف السائدة Author: يازولyazoalيازول Date: 04-15-2007, 02:42 PM
فى واحدة من قرى السودان الجميلة ، وكعادة الكثير من هذه القرى ، وحتى فى المدن ، أن يقوم الشباب (بحمل) العريس أبان حفل زواجه ، فيحملونه على أكتافهم كرمز لمحبتهم ومشاركتهم له فرحه ، حتى صار تقليدا مميزا لهذه الأعراس
وقد تخصص شابان قويان فى تلكم القرية لحمل العريس ، وعرف عنهما أنهما لا يقومان بهذا العمل إلا بعد أن (يضبطا) رؤوسهما بشراب مسكر لذيذ من نوع (عرقى العيش) أو ما شابه ذلك
وفى يوم من الأيام وصل الشابان لمقر الحفل وذلك لحمل (العريس) ، فتصدى لهما بقية أقرانهم من أولاد الحلة ، وقالوا لهم يا شباب الليلة ما فى شيل ، العريس غريب ما من الحلة ، إنما (العروس) بنت حلتهم وقريبتهم
وعلى حسب السكرة ، كان ردهم:
مافى مشكلة ، نشيل العروس
مش حقتنا؟؟؟؟
Post: #2 Title: Re: شابان سودانيان يحملان العروس على الأكتاف حسب الأعراف السائدة Author: Alshafea Ibrahim Date: 04-15-2007, 03:33 PM Parent: #1
هشام إزيك والله عندنا في الحله شاب في منتصف الثلاثنيات ، لكن مافي عريس ما شالو في رقبتو ووهتضو تب ويلف بيهو وسط رقيص البنات والأولاد ، وما ينزلوا إلا يقولوا دي أغنية العريس والعروس ؟؟ لكن الزول بكون مصلح على مزاجو ومتعشي على حساب العريس ؟ والله عادة حلوة ياهشام مودتي
تصدق ده نفس عينة الجماعة ديل ، المشكلة هم (لاطين) لحدى ما عايزين يشيلو العروس
شكرا للمشاركة
Post: #4 Title: Re: شابان سودانيان يحملان العروس على الأكتاف حسب الأعراف السائدة Author: يازولyazoalيازول Date: 04-16-2007, 08:47 AM Parent: #3
يرفع البوست كما يرفع العريس فى الحفلات
Post: #42 Title: Re: شابان سودانيان يحملان العروس على الأكتاف حسب الأعراف السائدة Author: SAMIR IBRAHIM Date: 04-21-2007, 09:52 AM Parent: #3
تصدق ده نفس عينة الجماعة ديل ، المشكلة هم (لاطين) لحدى ما عايزين يشيلو العروس
الانسان الراقي يا زول يا زول ..
وبمناسبة شيل العروس .....
Post: #43 Title: Re: شابان سودانيان يحملان العروس على الأكتاف حسب الأعراف السائدة Author: يازولyazoalيازول Date: 04-21-2007, 10:14 AM Parent: #42
SAMIR IBRAHIM
تسلم يا راقى على الإضافة الحلوة
تحياتى
Post: #5 Title: Re: شابان سودانيان يحملان العروس على الأكتاف حسب الأعراف السائدة Author: محجوب البيلي Date: 04-16-2007, 09:17 AM Parent: #1
Quote: ... بشراب مسكر لذيذ
اشرب... عفواً: اشرح ... ما تحته خط
Post: #6 Title: Re: شابان سودانيان يحملان العروس على الأكتاف حسب الأعراف السائدة Author: يازولyazoalيازول Date: 04-16-2007, 09:22 AM Parent: #5
هو مثل ما أورده السيوطى فى شرح شراب السفن اب
(يا لزيز يا رايق)
Post: #7 Title: Re: شابان سودانيان يحملان العروس على الأكتاف حسب الأعراف السائدة Author: محمد زمراوي عبدالعزيز Date: 04-16-2007, 11:45 AM Parent: #6
ياخوانا شيل العروس اكان بقى زي شيل العريس الحكاية حتتطور وبعدين كيفن العروس تنشال على كتاف الشباب دا محال وبعدين جسم العروس اللادن لا يستقيم وحملها على الاكتاف (عاملة زي الجلي) وطيب فستان الزفاف ما بيغطي وش العنتر الشايلا وتخيل الشاب القوي ذوي العضلات التبش شعوره شنو هل يتحمل ثقل المحمولة ويعمل فيها راجل ولا كيف؟؟ واللا الحكاية فيها.... يا زولyazoal. عموما الحمدلله فتنا مرحلة شيل العرسان ولا نقوى على حمل المخدة كمان الله يستر على بناتنا من شيل الشباب.. ودي حتكون الكارثة والنهاية الحتمية لعفاف العروس قبل تسليمها للعريس الولهان..
Post: #8 Title: Re: شابان سودانيان يحملان العروس على الأكتاف حسب الأعراف السائدة Author: يازولyazoalيازول Date: 04-16-2007, 11:52 AM Parent: #7
محمد زمراوى عبدالعزيز
لا يقوى على شيل (العروس) فى هذا الزمان ، ولا حتى من (الحمار) العرسها فالأوزان أصبحت ثقيلة والهمم ضعيفة
Post: #9 Title: Re: شابان سودانيان يحملان العروس على الأكتاف حسب الأعراف السائدة Author: محمد عادل Date: 04-16-2007, 03:06 PM Parent: #8
غايتو ياعم هشام العريس دا شكلو كدة نص نص حرم لو دا انا موش يكونو سكارة سكينى الا اسلها فيهو لكن ضحكتنى شديد لم شالو العروس ليهم حق العروس حقتهم العريس دا شكلو كدة دبيب جى لى اهل العوض ديل
Post: #30 Title: Re: شابان سودانيان يحملان العروس على الأكتاف حسب الأعراف السائدة Author: شهاب الفاتح عثمان Date: 04-17-2007, 03:52 PM Parent: #29
peace builder
بيان بالعمل ... هيبه و قدله و الله ...
زواج سعيد باذن الله
Post: #31 Title: Re: شابان سودانيان يحملان العروس على الأكتاف حسب الأعراف السائدة Author: صلاح الأحمر Date: 04-17-2007, 09:05 PM Parent: #30
والله يازوول انت زول لذيذ وبوستك دمو خفيف، والله يستر من المعنقداتية الماعندهـــم شغل غير تبويظ الحفلات.علا بس انا ياأخوي هشام عاوز لي شوية شرح ، أصلو أخوك بعيد عنك مخو شويه تقيل..
Quote: جاكم المسخوت
أهلنا في المغرب بنطقوها (مصخوط).والمصاخيط كتااااار.وإذاجاءكم مصخوط بنبأ فلا تسيئوا به الظن.ومعليش بس الكلام ده معناهو شنو..
Quote: يرفع البوست كما يرفع العريس فى الحفلات
فحسب علمنا المتواضع أن العريس لايرفع، وكان حصل يبقى العروس سجم خشمها. وبعدين ياهشام حددوا المفاهيم الحكاية شيل ولا رفع؟غايتو انحنا اللي اتزوجنا في المغرب شالونا بس( والله العظيم) وفوق حاجه اسمها العمارية تشبه الهودج. وبعدين بعض المغاربة يسمون العريس( العروس) والعروس( العروسة). مع مودتي أيها الرجل المهذب.
Post: #32 Title: Re: شابان سودانيان يحملان العروس على الأكتاف حسب الأعراف السائدة Author: أيمن الطيب Date: 04-18-2007, 07:25 AM Parent: #31
هشام شيخ الدين يا زول يا لذيذ يا رايق,
ليت الموضوع كان شيلة بريئة كما يعتقد الكثيرين!!!,ولكن
المشكلة الكبيرة لا تكمن فى مسألة شيل العريس نفسها!!!!!!
و إنما فى أولاد الحلة و الأصحاب المنتظرين الفرصة دى من يوم
سمعو بى خبر العرس !!!!!!!!!و كما جرى العرف فإن هذه المسألة
تصبح صعبة جدا جدا فى حالة شيل العروس بدل العريس و تضيع فرصة
عظيمة كان ينتظرها ناس كتاااااااااااااار !! و أظنكم تعرفونها
ولمن لا يعرف فهى فرصة أن يكون العريس معلقا بين السماء و الأرض لا
حول له ولا قوة و الجميع يتفرج و يصفق و صاحبنا تفعل به الأفاعيل وليس
مما يمكن فعله غير الضحك و الإبتسام .
* واحد أخونا إشتهر بطول لسانه و خاصة إذا سمع أن فلان أخته ستتزوج
فعلى هذا الفلان أن يشوف ليه بلد !!! يوم عرس واحدة من أخواته قام
صاحب تار قديم معه بإحضار غناية بدلوكه و أجزل لها العطاء و (النقطة)
والأمر حتى هنا طبيعيا!!!!!!!!غير الطبيعى يا صاحبى أن كل ذلك كان فى داخلية
أولاد!!!!!!!!!!! وكانت ليلة لا تنسى و لن تمحى من الذاكرة.
والله المسخوت منو نحن ما عرفنا لكن المودة صادقة وهذا هو المهم !
Post: #34 Title: Re: شابان سودانيان يحملان العروس على الأكتاف حسب الأعراف السائدة Author: يازولyazoalيازول Date: 04-18-2007, 10:36 AM Parent: #32
أيمن الطيب
أشكرك على المشاركة معنا فى هذا الموضوع وفعلا شيل العريس أصبح من العادات اللطيفة إذ يحاول الأصدقاء التعبير عن مشاعرهم نحو العريس بشيله فوق الأكتاف كناية على مكانته العلية عندهم وكنوع من التشجيع إذ ان العريس يومها يكون (بطل) الإحتفال وتكون العروس (النجمة)
تحياتى وربنا يكفينا شر (المصاخيت) كما قال صاحبى صلاح الأحمر ، بطريقة المغاربة
تسلم
Post: #33 Title: Re: شابان سودانيان يحملان العروس على الأكتاف حسب الأعراف السائدة Author: يازولyazoalيازول Date: 04-18-2007, 10:25 AM Parent: #31
صلاح الأحمر
ياخ والله كتر خيرك على هذا الرد الجميل ، وأرجو لك حياة سعيدة مع (عروسك) المغربية ، فالمغاربة ناس طيبين وحلوين ، حتى أنى أحب أن أسمع سيرتهم العطرة بحكم (تجانيتى) وتعلق قلبى فى (فاس) الجميلة ، وفى الرباط وفى الدار البيضاء ، وأمنية نفسى أن أزور المغرب فى يوم من الأيام ، فهنيئا لك يا صلاح
أما رفع العريس ، فهى تماما مثل رفع المبتدا بالضمة الظاهرة على آخره ، وهو المقصود هنا عندما (يشيله) أصحابه فوق الأكتاف
كنت أمنى نفسى أشوفك (مرفوع) فى (الهودج) ، والسؤال هو ، هل كلاكما يرفع فى نفس الهودج أم الرفع هنا يكون منفصلا للعريس ورفع آخر فى هودج آخر للعروس ، يا ليت تكلمنا عن هذا الأمر
أما تسمية العريس (العروس) و العروس (العروسة) فهى مدعاة للخبطة شديدة
تشكر يا (عروس)
شفت كيف ، دى فى السودان بضاربو فيها لحدى الموت
تحياتى
Post: #35 Title: Re: شابان سودانيان يحملان العروس على الأكتاف حسب الأعراف السائدة Author: abdulgafar mohd saeed Date: 04-18-2007, 10:56 AM Parent: #1
سلام ياود شيخ الدين: انا كنت بحضر في عرس عائلي الاسبوع الفات في الخرطوم بعدين قاموا الشباب شالو العريس فقلت لواحدة من الاخوات طيب انتو ما تقوموا تشيلو العروس ,, و اتخيلت الموضوع ده حيحصل قريب جدا .. طبعا الشغلة عايزة بنات معضلات و مااكثرهم في السودان
Post: #36 Title: Re: شابان سودانيان يحملان العروس على الأكتاف حسب الأعراف السائدة Author: يازولyazoalيازول Date: 04-18-2007, 11:15 AM Parent: #35
abdulgafar mohd saeed
هذا يسمى (تبادل خواطر) ، ولكن يا سيدى (شيل العروس) ستكون مشكلة حقيقية ، وين مع الفستان المنفوش ده ووين مع بناتنا الغير رياضيات ولا يتحملن أى خروج عن (الجاذبية)
مش كفاية يا عبدالقادر (شيلة العروس) التى تفقر العريس بكل (العواليق) الفيها
Post: #37 Title: Re: شابان سودانيان يحملان العروس على الأكتاف حسب الأعراف السائدة Author: صلاح الأحمر Date: 04-19-2007, 00:23 AM Parent: #36
أها ياهشام ٍرأيك شنو عريس ولاعروس؟
ليلة القبض على أخيك صلاح في المغرب. المكان/ مدينة الدار البيضاء، قاعة أفراح الحي الحسني(اصبحت أثرا بعد عين). الزمان/26/12/1987. هذه هي (الميده) أي المائدة ويحمل فيها العريس لليلة الزفاف.والصورة التالية للعمارية وتؤدي نفس الغرض وتحمل فيها أيضا العروس. طبعا أخوك عامل فيها قندف وكمان واقف، غايتو تلقى أصحابي الكانو شايلني سبو لي لمن الله غفر لي.
Post: #38 Title: Re: شابان سودانيان يحملان العروس على الأكتاف حسب الأعراف السائدة Author: صلاح الأحمر Date: 04-19-2007, 11:28 PM Parent: #37
شنو ياهشام،مالك مطنشنا؟ صورتنا نحست البوست ولا شنو؟ أها هاك دي الصورة التانية في العمارية.وإن شاء الله الماضاقو يضوقو.........مع مودتي ..أخوك ود اللحمر.
Post: #40 Title: Re: شابان سودانيان يحملان العروس على الأكتاف حسب الأعراف السائدة Author: يازولyazoalيازول Date: 04-21-2007, 08:44 AM Parent: #38
العريس الأنيق صلاح الأحمر
يا سلام يا صلاح ، والله صور فى غاية الأناقة والجمال ، وأشكرك كتير على إضافتها هنا فقد أعطت البوست حلاوة وطلاوة
آسف لتأخير الرد ، حيث تعودت أن لا أرد فى خلال إجازة نهاية الأسبوع بل أتفرغ (للخميسات)
أكرر شكرى وتقديرى اللا محدود
هشام
Post: #39 Title: Re: شابان سودانيان يحملان العروس على الأكتاف حسب الأعراف السائدة Author: Atif Makkawi Date: 04-20-2007, 04:50 AM Parent: #1
الأخ هشام الزاكيات لك
بحكم القراية أم دق خاصة لما تكون قراية كبر طول ما أنا في البيت بكون قدام الكمبيوتر طبعا مع زهج القراية بزوغ هنا وهناك لمعرفة الأخبار وغيرها طبعا هذا المنبر بياخدأغلب زمن الزوغان ببدأ بما هو سياسي ثم أدلف علي بعض الحرابات لزوم الشمشرة ومن ثم أبحث عن( يا زول) أشوف هل منزل بوست أم لا ومن المجادع الأساسي إذا كان منعم معناها أنا اليوم داك واطات قرايتي أصبحت هذا الإدمان أصبت به يوم مجنون الجبلين
Post: #41 Title: Re: شابان سودانيان يحملان العروس على الأكتاف حسب الأعراف السائدة Author: يازولyazoalيازول Date: 04-21-2007, 08:50 AM Parent: #39
Atif Makkawi
أشكرك على الإدمان الجميل
كما أشكرك على المشاركة هنا فى شيل العريس ، ولو كنت قريبا منى (لشلتك) على كتفى حبا ووفاء
ياخ لك تقديرى ونرجو أن نكون عند حسن الظن
هشام
Post: #44 Title: Re: شابان سودانيان يحملان العروس على الأكتاف حسب الأعراف السائدة Author: محمد زمراوي عبدالعزيز Date: 04-21-2007, 10:38 AM Parent: #41
وقبال ما العروس تنشال على كتوف الحرامي ونشال كان العريس ود ناس وود تربال ما يخلي العروس حتى لود الخال شان بعدين ما يكون حالتا حال يجي في غيابك ويونسا ويحتال وترجع من الشغل تقول كان هنا كمال يخوانا شيل البت فوق الرقبة دا محال اصلوا الكلام دا ما يجي على البال استرنا يا مثبت القلوب ومغير الاحوال
Post: #45 Title: Re: شابان سودانيان يحملان العروس على الأكتاف حسب الأعراف السائدة Author: يازولyazoalيازول Date: 04-21-2007, 10:48 AM Parent: #44
