يا جماعة بتكوركو مالكم؟؟؟؟؟

ودنفاش ، نحن السودانيين والله معادننا نظيفة ، نتشاكل ونجوط ونكورك وصوتنا يعلى ، وفعلا نرجع نهدأ زى الحليب لما يفور وتطفى منو النار ، تلقاه براحة وبهدوء ينفس كل فقاعة ويرجع لى قوالبه الأصلية حليب أبيض نظيف ولذيذ شراب سائغ يشبع زول ، وتلقى القشطة درع تانى من الفوران ، ديل نحن السودانيين كده ، لكن أخوانا المثقفاتية ديل الله يهديهم ، عايزين يلغو حتى زعلنا وفورتنا ، يا جماعة نحن الله خلقنا كده ، تعالوا شوفو المناظر البتلاقينا هنا كل يوم من اخوانا السودانيين ، مع بتاعين المرور ومع بتاعين الكشة ومع السعوديين فى الشوارع ، والعجب مع الجنسيات الزيهم ، نيجيريا ، تشاد ، الصومال ، أرتريا ، ولا العجب العجيب السودانى لما يتشبك مع باكستانى ولا هندى ، تشوف محن يا زول ، والله لحدى ما بقوا معروفين ، وما فى زول بينشبك معاهم ، الله خلقنا كده ، نعمل شنو؟؟؟؟

عشان كده يا زول عافى ليك لله والرسول ، وعافى لى كل سودانى قاعد هسع يكورك فى أى شارع من شوارع الدنيا ، نحن يا دو نفاش الفينا بكفينا ، ما بنهدأ الا يعم السلام فى السودان ، ما بنهدأ الا نشبع ، وندقس حتى ولو فى الفصول ، يازول العفو

يا هشام

اريتو لو وقف علي الكوراك...

في اولي عتبات الطشيش استقريت في الناحية الشرقية من تالاكم
في منطقة لا تسمع فيها اصوات في الشوارع لا من الباعة والمارة ولا حتي اصوات البواري...هادئة...قلت اتمشي لاتعرف علي معالم البلد
وبعد شارعين قابلني...يا زول اركب..ماشي وين..اوصلك في طريقي
وبعد السلام وحق الله بق الله اصر انو يوصلني ..بالرغم من اني ما كنت قاصد وجهة معينة..هي كانت شقة بلد وبس..اتوكلت وركبت...ولاحظ انو كان واقف في الشارع الرئيسي...بس مجنب شوية ولما حاول يدخل تاني للمسار الصحيح ضايقو سايق آخر...الراجل ما كضب ونزل عليه

محطك محطك محطك بي حبل مريد اسود قلعو منو وفي نص الشارع والدنيا كلها شايفة..نزلت بقيت حجاز...ووصلني منو محطتين..وجنس كوراك هو..انت حيوان ما شايف في عربية خاشة قدامك هنا ما مؤشر ليك..
هسي الختري الكسرتو ده البصلحو منو...طبعا الناس هنا ما بحجزو ابدا
انا اخدت محطتين وفرتقت الشكلة ونزلت رجعت وكل واحد دور عربيتو ومشي..الممحوط والحجاز والماحط المكورك..الراجل تاني يوم سمعت بيه في الشرطة لكن المحطات الاخدتهن مرقنو واعتبروها مشاجرة عادية واتعافو في محلتهم ديك...

هذه اولي افادات الكوراك وبرضو انا عفيت ليه من محطاتي والله لكن كانن حارات حرة الاخيرة بكسر الحاء

Quote: كانن حارات حرة الاخيرة بكسر الحاء

بكسر الحاء ولا بكسر الضهر

لوووووووووووووووووووووووووووووووووووووووووول

والله جننتنى من الضحك زاتو يا نزار

Quote: محطك محطك محطك

هشام
زول الكلام التمام
وسيد الإلفة والإبتسام

ده سجع ساى اوعى تسويهو لى شعر وتقوم تعمل لى قصائد الهشامية ديك وتخلينى أقوم أعمل لى فيك معلقة بتاعة هجاء

والله يا هشام كلامك فعلا صاح، بالله أنا مش معاى حق لمن كنت بقول وبصر إنه انا بعرف لى تلاتة شوارع بس فى مدينتكم العجيبة دى

شارع من البيت للمكتب
شارع من المكتب للبيت
وشارع بودى باب شريف وبوصل بنى مالك "للكسرة"

ده كله عشان ما اقوم اكتل لى زول واتلتلكم ساى

بالله مش معاى حق

والأشواق والتحايا

ولبد من الإسكان ولو طال الأسفلت

أبوذر

لا كمان يا أبوذر المسكنة الكتيرة (متعبة) ، أمرق يازول وكورك ولفلف وحوم وأجر بى جاى وأجر بى هناك ، وأغشى فلان وامرق جاى وحوم بى هناك ، ولما خلاص تفتر تب ، اخد نفسك طويل ورزين ومرق آهة من قلبك وقول بى صوتك العالى (استغفر الله العظيم) ، واضرب فول يكون بى جبنة كاربة تمام يكون جايبنو من (بنى مالك الخرطوم) ، وارقد نوم

عفيت منك فى تلك الحال

أها رأيك شنو؟ بالله مش قصيدة؟؟؟؟؟