انت قايلو فريد شوقى ولا شنو؟؟؟

حدثت هذه الحكاية منذ عدة سنوات ومعظم أبطالها انتقلوا الى الدار الآخرة (عليهم الرحمة أجمعين)

خرج أحد أقاربنا من منزله ، وكان يعمل فى سوق امدرمان ، وله دكان صغير يقوم فيه بتنجيد المراتب القطنية ، ويدر عليه دخلا طيبا ، وله أسرة وزوجة وأطفال ، فذهب يوما منذ ما يقارب العشرون عاما ونيف الى دكانه فى السوق ، ولم يعد بعدها الى منزله أبدا

ويبدو أن فى الأمر جناية معقدة أو شىء من هذا القبيل ، المهم أن أهله قد (فرشوا) عليه ، واعتبروه فى عداد الأموات ، وكانت قصته عبارة عن لغز عجيب لم تفك طلاسمه حتى يومنا هذا

المهم فى الموضوع ، انه بعد أن طال غيابه ليومين أو شىء من هذا القبيل ، اجتمع كبار أهلنا بحضور والدى عليه الرحمة وجميع أخوانه واخوان الرجل المفقود وعشيرته

كان من ضمن الحضور ، عمى أحمد جبريل ، يرحمه الله ، وكان يعمل فى (البوليس) ، وله حس بوليسى عجيب ، فقام فى الاجتماع وطلب من الحضور أن يبحثوا فى (دولاب) المفقود، وعندما سألوه عن السبب ، قال لهم ستجدوا خطاب من الرجل ويشرح لكم فيه لماذا فعل ذلك ، وسينجلى أمر لغز اختفائه

فانبرى له أصغر أعمامنا (خالد جبريل) ، الله يرحمه وقال له:

انت قايلو فريد شوقى يا احمد ولا شنو؟؟؟؟

فضج الحضور بالضحك

وبحثوا فى الدولاب ولم يجدوا شئيا

Quote: وكان يعمل فى (البوليس) ،

هشام

زولكم دا كان بوليص سري؟........ما اظنو بوليص سري لانو البواليص السرين....اي حاجة قاعدين يلقوها...ولو ما لقوها يدوك اي حاجة بدلا.... اصلك ما بتمرق مهم ساكت

خرج ولم يعد
مشكور على الطرفة لكن نهاية الزول دا باقية لي زي الزول الرسم حاجة وما عمل ليها ضل وبقت طايرة في الهوا ساي ,,,, فلم بدون نهاية

نيوباى:

تشبيهك فعلا عجيب ، واختفاء مثل هذا الشخص بالجد محير ، وقد حدثت قصص مشابهة كثيرة لأناس عاديين يخرجون من منازلهم ولا يعودون أبدا

عجائب

يا سجيمان ذكرتنى الراجل بتاع الدويم المعلق يافطة فى بابو كتب عليها

ضيف الله عبد الرحمن على
بوليس سرى بالدويم

هشام
حمد لله على السلامة
ما قلت ليك الغربة كعبة..بركة الجيت راجع لديارك..مش انت من ناس جدة القديمة..وجدة مشى هى الثورات...خلاص
ما دام بتفتشو للرايحين...عندى ابن عمتى اسمه احمد الصديق الجزولى..كان ممرض فى السلاح الطبى اختفى مئذ عام 1992 لم يكن له نشاط سياسى ولا حزبى ..غير الدوبيت الكتير وعنده نمة زى نمة الشكرية....اها الزول دا قالو لى يوم انت سافرت الهند هو اختفى يكون سقته معاك هناك..زول جزيراوى...اسمر زى لون الطمى..قلبه ابيض زى قطن حواشة ابوه...متوسط القامة....لو شفته على طول تقول دا بشبه ابقوتة.....بسبب غيابه ابوه عمى وبقى يهضرب بيه لما مات...اخته الكبيرة كاضمة ليوم الليلة...اها فتشوه لينا معاكم....شوفو لى بوليص صرى من بتاعين سجيمان..الكاربين
لو لقاه انا بجيب ليه اقامة حرة تربية مواش...وممكن اضمن ليه شغل فى شبوك الجنادرية..والله قالو الشقل فيها سمح طب....ووبنسويوه امير على الرواعية...وبعفيه من الضرائب...بدون تاجيل
ولكم ودى

الله يسلمك يا ابقوته وربنا يجمعكم بى زولكم ده ، فعلا قصص غريبة اختفاء الناس بالشكل ده ، يكونوا بمشوا وين؟؟؟؟