ود الشيخ العب

يا ود الشيخ استهدى بالله ، وخت الرحمن فى قلبك ، واتذكر أولن بالتبادى انك عب الله ، وكلنا عبيد الله ، يعنى حكاية انك عب زول دى ابدن ما وارده ، واتأكد تمامن يا ود الشيخ ، أنو الزمن ده ما فى عب وسيد ، زى ما كان بيحصل زمان عبر التاريخ والحقب السابقة ، وخت فى بالك انو السلام اتوقع ، يعنى دى كانت آخر استيكة فى طى مسلسل عب وسيدو.

يا ود الشيخ عاين لى قدام ما تعاين لى وراء ،عشان على الأقل تتحاشى مفاجآت الطريق ، مش تكون انت بتعاين لى وراء وقدامك منعطف خطير وانت ولاك داريبو

وضرورى يا ود الشيخ ، عامل عمتك الكبيرة دى ، ضرورى ما ترجع السودان ، واتخيل كده الظروف جمعتك فى مكتب واحد بى زول من الدينكا مثلا ، أو الشلك أو النوير أو الزغاوة ، ويكون زميلك فى العمل وبى نفس المؤهل ونفس الكفاءات ونفس الوظيفة ، برضك بتعاين ليه بالنظرة الفوقية السخيفة ديك؟؟؟

أو حتى قول تاجر معاك فى السوق أو مضارب معاك فى البورصة أو بتركبوا طيارات مع بعض تسافروا كتير سوى ، برضك حا تقول ليه قوم يا عب ونوم يا عب وتعال يا عب ،

ما ظنيت!

لأنو ممكن يقاضيك ويسجنك وهو يواصل تقدمو ويأخرك ، لأنك حا تكون فى السجن ، لأنك ارتكبت مخالفة واضحة فى قانون السلام ، وضروى من تكون فى بنود فى الاتفاق تناهض العنصرية يا ود الشيخ ، ولاّ مو كده؟؟؟؟

يا عب فكر فى كلامى ده سمح ، تلقانى ما قاصد أسىء لك بقدر ما بناصرك ، عشان ما تظلم نفسك من باب انصر اخاك ظالما أو مظلوما بالمفهوم النبوى الشريف ، يا ود بيت النبوة.

يلعب بشنو ود الشيخ؟

وما فهمنا شيء حسب قولة جو ود حقيبة جو في قناة ولدنا الطيب عبدالماجد الذي أضاع ملامحه في كريمات التفتيح، وفي شنو وعشان شنو؟.. صدقني ما فهمت شيء هنا ولا هناك في القديد ياودالشيخ.

يا بناديها اخوى أنا اقول ليك (عب) تقول لى (ألعب) من play

راجع كلامى تانى ، وده انا زاتى بكلم فى نفسى ، أنا مش (ودالشيخ)؟؟؟

Quote: صدقني ما فهمت شيء هنا ولا هناك في القديد ياودالشيخ.

عارف الراوي الضمني والمخاطب ياهم ذاتهم إنت ياهشام..لكن صدقني ما وصلتني الرسالة حتى الآن لإزدحام الشبكة في الساعة دي من النهار ومطيقة لملاح (شرموط) أخضر وعصيدة بن كربو.

خلاص بعد ما (تمطق) وخليتنا نحن زاتنا (نمطق) معاك ، تعال اقراهم تانى

شكلك متغدى بى (قديد)

وبرضو راجيك ياولد
شان نشوف خير البلد
ما فى عب بينا اتولد
نحن ربنالم يلد وماهواتولد

علي الحرام دي انا فهمتها ..
بس الظاهر حرقتك شديد .. !!!؟