لماذا يطنطن السودانيين ويستعجلون قراءة الفاتحة على الميت؟؟؟؟؟؟

فى السودان عندنا عادة جميلة جداً ، ألا وهى قراءة (الفاتحة) على روح الميت سراً ، وقراءة (الفاتحة) هذه عادة يختص بها السودانيون دون سائر العرب والمسلمين ، وتقرأ (الفاتحة) عندما يذهب الشخص إلى بيت العزاء ليقابل أهل الميت ، ويرفع يديه قارئاً (الفاتحة) فى سره ، وعند الإنتهاء تجد كلا القارئان (المعزى وقريب الميت) يقلبان ايديهما إتجاه الأرض ، كدليل على أن (الفاتحة) مهداة لروح الميت فى تربته ، وهذه بلا شك عادة وخصلة جميلة جداً ف (الفاتحة) هى السبع المثانى وفيها كل مفاتيح الخير ، وعادة تستغرق قراءة (الفاتحة) (سراً) وقتاً قصيراً جداً قد يكون أقل من نصف دقيقة ، ولكن ما أنا بصدده الآن أن الناس فى الآونة الأخيرة ، أصبحت تقرأها فى ثوانى معدودة ، وهذا أعزيه لسببين إما أن قارىء (الفاتحة) قرأها بسرعة كبيرة جداً حتى وصلت ثوانى معدودة أو أنه (يغش) فى قراءة (الفاتحة) ، أى لم يكملها كاملة أو فطها أو سكت ساكت ، فترى الشخص يدخل بيت العزاء ، ويرفع صوته عالياً (رافعا) يديه قائلاً (الفاتحة) ، ثم يطنطن سريعاً ويقلب يديه على عجل متخذاً لنفسه مكاناً للجلوس ، فبالله عليكم أفتونى فى هذه (الفاتحة) ، هل هى صادقة وكاملة أم (مكلفته) و (مستعجلة)؟ فقد اصبحت مؤخراً محتاراً جداً لقراءة هذا النوع من (الفاتحة) ، وراقبت ذلك الأمر طويلاً ، حتى أنى صرت أقرأ (الفاتحة) سراً مع القارئيين وأحاول قراءة (الفاتحة) بسرعة لزوم التأكد والمقارنة ، ولكن رغم ذلك أحس أن هذه (الفاتحة) التى قرأها المعزى وقريب الميت قد قرأوا (الفاتحة) ناقصة أو قلبوا أيديهم قبل الإنتهاء من قراءة (الفاتحة)

Quote: وراقبت ذلك الأمر طويلاً ، حتى أنى صرت أقرأ (الفاتحة) سراً مع القارئيين وأحاول قراءة (الفاتحة) بسرعة لزوم التأكد والمقارنة ، ولكن رغم ذلك أحس أن هذه (الفاتحة) التى قرأها المعزى وقريب الميت قد قرأوا (الفاتحة) ناقصة أو قلبوا أيديهم قبل الإنتهاء من قراءة (الفاتحة)

يعنى كمان الموضوع فيه غش

تعرف كمان امكن السبب اهل الميت امامهم جحافل من المعزين لذلك تصبح مسالة القراية بأمانة صعبة ، لان عليهم مع متابعة التكاليف الاخري من ضيافة( يا ولد جيب شاى هنا) الفاتحة
( والله ما تمشوا قبال العشاء ) الفاتحة يا ولد ابريق المويه لعمك

وهكذا
شكراً على هذا البوست المميز
الفاتحة

هو كذلك يا عبدالعزيز ،

نعم قد يكون أهل الميت مشغولون بأشياء أخرى ، ولكن لماذا (يغشون) فى قراءة السبع المثانى ، و(الفاتحة) فيها آيات عظيمة لا ينبغى التلاعب فيها

تحياتى

سلام
أحياناً يحل التعليق محل السبع المثانى
جاء أحدهم لرفع الفاتحة مع قوم جلسوا تحت راكوبة خلينا نفول ليست بالعالية وعندما هم بالدخول رافعاً يديه ضرب راسه بعود برز من سقف الراكوبة فما كان منه إلا أن صاح بهم:
"الفاتحة الله يفتح راسكم"

مبالغة يا أسماء



تحياتى

ولذلك لم يتمكن من قراءة (الفاتحة) من أثر الضربة

ويتثاءبون عند قرأءة الفاتحة
فى صلاة الفجر

غايتو عندي عمي كده قال لي انو بعد (غالبا اقل من عشرة)

وانو لا قعد يقرأ فاتحة ولا يحزنون

شرنوبى
ويحى الشريف

شكرا للاضافة ، وعمك كان صريح معاك يا يحى

ألف ألف تحية لكما ولجميع أعمامكما

للإخوة والأخوات الذين لا يرغبون فى المشاركة فى هذا الموضوع الضغط هنا (الفاتحة) لتغيير الموضوع

الأخ يا هشام يا زول تحياتي

بمناسبة الفاتحة دي .. عندما واحد نقناق خالص بالذات في محل الفاتحة وجاء نبأ لي ناس الحلة بوفاة شخص في حلة تانية فما كان من جماعتنا قالوا يلا يا جماعة الدنيا خريف ونحن مشغولين لكن الواجب لازم نعملوا بس يا فلان نحن غير الفاتحة وكباية الشاي ما عايزين أي كلام كتير ورانا مشغوليات وذهبوا لمحل الحساسة ممتطئيين جمالهم وبدون مؤاخذة حيمرهم وطوالي محل العزاء نزلوا وربطوا الزاملة بعيد وجاؤوا مشاين علي الراكوبة بتاعة العزاء أول حاجة تقدم ليهم بتاع الكلام الكتير والذي تم تحذيرة بعدم النقنقة يعني الفاتحة وكباية الشاي وطوالي مارقين ... فما كان من صاحبنا إلا أن صاح وفتح كلتا يدية يا جماعة الشاي . يعني لا قال فاتحة ولا حاجة ؟؟؟


بحيراوي

الاخ يا زول يا زول

عارف انا واحدة من الناس لما امشي لي عزاء ، حقيقي فكرة رفع الفاتحة دي بتربكني ، لانه ترفع يدك وتقول الفاتحة ، المفروض تجتهد تقرا الفاتحة تقوم تلقى ست العزاء سرييع نزلت يدها في اقل من ثانية قرت متين قالت شنو ما تفهم ولسه الزول رافع يده فتضطر انه تقطع الفاتحة وخلاص
ناس بتقول انه الفاتحة يقروا فيها الاخلاص !! معقولة بس !! يعني طيب ما اقرا سورة الكوثر ؟؟
لذلك قراية الفاتحة دي بتجهجه الزول وتغير اتجاه رفعة اليد

البحيراوى ومايا

أشكركم على إضافاتكم الجميلة للبوست

تسلموا

Quote: الفاتحة الله يفتح راسكم"

الضربة حرقته شديد
والله دى قوية بشكل

لكن صراحة أنا قصة الفاتحة دى ما معاها لانو كما ذكرت فى ناس
كتار ما بيقروا اصلا وانا بفتكر إنو البركة فيكم كفاية بعد داك لو عايز
تقرا فاتحة للمرحوم انت حر ، وانا ما عارف قصة نقرا الفاتحة دى جبناها من ويين
يعنى شفنا المسلمين بأشكالهم ما شفناهم بيقروا فاتحة .

يا جماعة أعزرونى
عايز أدلو بي دلوى

وإنشاءالله مايكون عندكم

يازول

أنا جاري و هو شيخ كبير سألته عن قصة سرعة قراية الفاتحة

قال بكل بساطة ترفع إيدك وتقول (ألهم أرحمه وأغفر له)
والفاتحة واصلة

كان لميت فى واحد بقراها جد جد
تفضل تكرر فى الدعوة لمن ينزل يده

إيه رأيك في الفتوة دى من نصرانى

مع تحياتى

رأفت
كلامك ده صحيح لانى سمعت من الكبار أن الفاتحة ما هى إلا دعاء للميت وتشتمل على
اللهم أرحمه واغفر له واسكنه فسيح الجنات ... إلخ. وعندما سمع احد جيرانا الأقباط بذلك كان يرفع الفاتحة فى أى فراش ولانه مسيحى كانت فاتحته تخفف كثيراً من الحزن إذ ما تنهى حتى تبدأ المداعبات ودعوته إلى الإسلام.التى يقابلها ب "لا أفتكر احسن تجو إنتو علينا"

أسماء عبدالحليم

شكراً للإضافة الجميلة

تحياتى

الأستاذ رأفت ميلاد

أحييك يا رأفت وأشكرك بحرارة على التفضل بدلوك فى هذا الموضوع رغم إختلاف ديانتك

يا سيدى يكفى أنك سودانى ، فالفاتحة وما شابهها أصبحت (عادة سودانية) وليست (مراسم دينية) ، وأعتقد أن هذا هو السبب الرئيسى للكلفتة الحاصلة فى قراءتها ، فقد يقول قائل (هذه بدعة) ما أنزل الله بها من سلطان فيكتفى بالدعوات أو (الطنطنة) أو السكوت ، لأن لا أحد يحاسبه على ما يقرأ سراً إلا الله

يا رافت أنا شخصياً رايت فى السودان مسيحيين كثيرين جداً يقرأون الفاتحة على الميت (المسلم) وهذا والله من عظمة السودان ، فهم يذهبون فعلاً للفواتح ويجلسون فى بيوت العزاء مثلهم ومثل بقية الناس ، بل سأذهب بك ابعد من ذلك فقد رأيت مسيحيين يدخلون المساجد ويصلون مع المصليين ، كنا نعرف أحدهم وكان صديقاً حميماً لسودانى مسلم ، وكانوا يتناقشون كثيراً فى الديانات وإتفقوا ذات يوم أن يذهب المسحى لصلاة الجمعة مع المسلم ويذهب المسلم مع المسيحى يوم الأحد إلى الكنيسة وقد كان ، فهذا لا يحدث إلا فى بلد متسامح وجميل مثل السودان ، ولعل هذا الوجه الجميل قد تم تشويهه كثيراً نظراً للمارسات السياسية الخاطئة التى أتت بها (الإنقاذ) ومشروعها الحضارى

رأفت ، أكرر الشكر والتقدير ، وقد إزدان البوست بحضورك الزاهى

أخوك هشام

ترهاقا

شكرا للإضافة الجميلة والمشاركة معنا فى هذا الموضوع

ومعاك حق لم نرى (الفاتحة) إلا فى السودان وباقى المسلمين لا يفعلون ذلك فى بيوت العزاء ولكن يدعون للميت ويعزون أهله بحضورهم ومشاركتهم أحزانهم وهذا وحده يكفى

تحياتى

فعلا الفاتحه ما هي الا دعاء لميت
لكن جبناها من وين لا اعلم و لكن هي متبعه من قبل العرب و لكن بصوره قليله
فنادرا ما يقرؤنها و لكن عند زيارتهم للقبور يقرؤنها
اما الفاتحه فسمعت انها توازي صوره الاخلاص و ليس عندي دليل سني او قراني على ذلك..
هي عاده من عادات السودانين,,بالعكس انا اؤيدها لان الميت بتجيهو دعوات من حيث لايعلم و لايحتسب..
حتي اتذكر ان هناك صديقه اباها توفي في بلاد الغربه و رفضت دفنه هنا قائله
حتى الفاتحه لن يقرؤنها عليه خلينا ندفنو في السودان لانو المار و الجاي من القبر بدون ما اعرف ده منو حيقرا ليهو الفاتحه و تخفف عليهو

لفحان الفاتحه عاده ماجميله ... وموضوع جميل يازول .. واللهم ارحم موتانا ..رائيكم ايه في زياره القبور ..اعرف انها غير مستحبه للنساء ..انا ناوي ازور احمد شرفي متئ ماشاء الله لي الذهاب للسودان ..

الحبيب محب

أعجبنى تعبير (لفحان الفاتحة) ويا ليتنى إخترته ليكون عنواناً للبوست

على العموم أشكرك للإضافة الجميلة ،

أما زيارة القبور فأرى أنها مستحبة ويصل دعاء الداعى فيها إلى أرواح الموتى وأظنها عادة جميلة وسنة حسنة فلنرى رأى الأحباب

تحياتى

زنجية

أشكرك على الحضور والمشاركة والإضافة الزاهية ، ولصاحبتك ألف ألف حق فى تصرفها بدفن أبوها فى السودان لتنعم بالدعوات الصالحات له وسط قبور أهله المسلمين

تحياتى