خطرفات يازول بعد طول غياب

يا جماعة إزيكم ، وكل سنة وإنتو طيبين وربنا يعيدو علينا وعليكم بكل الخير والسعادة والبركات ، وإن شاء الله البركة فيكم فى وفاة عضو المنبر عصام ، وهكذا حال الدنيا كما لخصها حميد عندما قال ( وإيه الدنيا غير لمة ناس فى خير أو ساعة حزن ) وإن شاء الله تكون آخر الأحزان ،

واحدين قالوا لى (غاتس وين؟) ، قلت ليهم فى نص رمضان ، ويا سلام على رمضان الشهر الذى نفرح لقدومه ونحزن لفراقه ونشتاق للقائه عاما بعد عام ، شهر التوبة والغفران ، وجا بعدو العيد ، وكان أحلى عيد ، حيث قضيناه بين جبل الرماة ومسجد قبا والقبلتين ومقام سيد الشهداء حمزة ونظرنا وتحسسنا مكان موقعة الخندق وموقعة أحد وراجعنا سويا خطة خالد بن الوليد وكرفنا النسيم العليل الذى يأتى من صوب القبة الخضراء ورأينا الصحابة ليلا فى منامنا وهو يطوفون بأرواحهم الزكية على كل أهل المدينة ، وزرنا بقيع الغردق ، ويا له من بقيع ، ونظرنا جبل أحد ويا له من جبل يحبنا ونحبه ، وكنا من المحظوظين الذين أدوا العمرة وهم يطوفون البيت العتيق تحت زخات المطر ويسجدون لله فى مقام إبراهيم بين الحطيم وزمزم والماء يسيل فى جباههم ووجوهم طاعة لله فى عصر يوم 29 رمضان ويشهد على ذلك أخوكم إسماعيل وراق الذى نهل هو ايضا من ذاك المنهل وزوجتى التى كنت أحميها من الخلف بكلتا يدى رأفة بها من ذاك الجمال

وعدنا للمدينة التى أعشقها (جدة) فأغريناها السلام ودخلنا حرمها آمنين ، فهى مدينة عريقة تجمع بين الدنيا والآخرة فى آن ، تجد فيها كل جميل فى حين يتوارى قبيحها بين الأزقة والحوارى مثلها مثل سائر البلدان ، إلا أنها تختلف عن باقى المدن بدفئها الساحر وبشجنها الأخاذ ، وبتلكم الخلطة البشرية العجيبة التى لا تجد مثلها فى البلاد وببحرها المقدس يقبع فى خلفية المدينة العجوز وبقبر أمنا (حواء) تلكم الجدة المهيبة التى توسطت البلدة بل توسطت الدنيا بأسرها فصارت نقطة المرتكز فى موازنة عجيبة مع البيت العتيق ، ولعل قبر جدنا (آدم) يكمل تلكم المعادلة الإلهية الغريبة ، فجدة مدينة الأسرار الخفية شديدة السرية ، عاش فيها أنبياء وصعاليك وعرب وعجم وكثير من ملوك الجن والمردة ، وكثير من البشر والشواطين ، تمتلىء شواطئها بكنوز مخفية ومحلات عطارتها تحدث عن أعرق العطارات والعطارين ، عقيقها منقوش ، هواءها عليل ، أشجارها ظليلة ، بناتها يشبهن بنات الحور ، رجالها فرسان ، غلمانها متقين ، علمائها أشاوس ، أطفالها حلوين ، أسواقها تحاكى أسواق التاريخ رغم أنف العولمة ، أغنائها هم أغنى رجال المملكة ، وفقرائها متعففون ، أعيادها ترنيمة ، ومساجدها مستنيرة ، برحاتها فسيحة ، وكراماتها عديدة ، أهلها طيبون ومتفيقهون ومتفلسفون وطيبون وحنونون لأقل شىء يبكون ، من شدة الرقة والحنين ، فى حين صعاليكها متأبطون ، للشر هم مالكون ، وغيدها راتعون وهم فى غيهم يعمهون ، ولسمار جدة تجد كل الفنون ، فى كورنيشها المزخرف بكل فن تليد ، أو شاليهاتها الفنجرية التى تمارس فيها كل شىء بحرية دون أن يضايقك المضايقون ، وإن لم تستح فافعل ما شئت ، فهنالك تختبر النزوات ويكون محك الميزان الكبير إن شئت ملأته حسنات ، أو إنزلقت فى السيئات ، فطاش الميزان بكل جميل زان ، فمجالسها ديمقراطية الدنيا والآخرة ، ومحك التسيير والتخيير فيا لها من مدينة لا يمكن أن تصفها الكلمات ويا لقلبى من أن يسع حبك يا جدة يا مدينة الجمال والسلام والتاريخ والأديان

وإبتسمت لى جدة حين صافحت (محمد السنى دفع الله) فاختطفته إختطافا وذهبت به إلى (عراب) جدة ، مهلب على مالك ، فتعانقوا بالدموع بين دهشة الحضور ، وبللت دموع السنى أرض جدة ، فصار منها

وإبتسمت لى كذلك عندما هاتفنى (إسماعيل وراق) ولكنى لم ألتقيه بسبب سفرى إلى المدينة وفى القلب حسرة ، وإبتسمت لى كذلك عندما قابلت (صديق الموج) فى حفل القنصلية للترحيب بأول وزير من الحركة الشعبية يعتلى منبر القنصلية فكانت لحظات خالدة لكل من حضر ورأينا وزير الزراعة الثروة الحيوانية بحكومة الوحدة الوطنية بجنوب دارفور ، وكان أصدق من حدثنا عن مشكلة دارفور ، وأنقل للوزير الشاب الهمام المتواضع عمر من هذا المقام ، وأقول له هنئيا لنا بلقائك يا عمر

كتبت ما كتبت محييا جمعكم الكريم ومعتذرا لجمهور قرائى عن إنقطاعى ، ومباركا لكم العيد السعيد

صديقي الحبيب هشام

كل سنة وانت طيب وقبلاتي لاطفالك الحلوين

مشتاقين والله

ياخي دي خطرفات والا سياحة وسباحة في عالم يازول

الغريبة المرة دي ما جبت سيرة بني مالك

فجعتنى هذه الصورة التى تضعها فى البروفايل حتى أنستنى أصل الموضوع يا قرجة

لا حول ولا قوة إلا بالله ، هذه صورة أليمة للغاية يا قرجة ، لعن الله الحروب والقتال الذى يؤدى لمثل هذه الفاجعة

تحياتى وإعتذارى عن الخروج من النص الأصلى

وبنى مالك حى جميل ياقرجة ، وأيضا به أسرار عديدة ، والجن الذى يقطن بنى مالك شبيه بجن (مدائن الفهد) بل لعلهم أبناء عمومة ، وطبعا يا قرجة قد يستغرب الكثيرون مثل هذا الحديث ، ولكنى أقول أن لكل منطقة (عمارها) الذين لا يستطيع الإنسيون من رؤيتهم رأى العين ، وهم يا قرجة يتفرجون عليك وأنت تشترى (الكسرة) و (العيش) السودانى من مخبز الطيبات ، أو عندما تأكل الكمونية فى (مطعم السودة) بين يدى (كرار)

الأخ هشام
كل سنة وأنتم بألف خير
وشكرا على الخطرفة الحلوه ليتك تطيل أكثر فأنت في الوصف والسرد بليغ ومتمكن
لك التقدير يازول
خوكم
الشفيع
الدمام

شكرا أخوى الشفيع ، وسوف أفعل كلما أتيحت الفرصة

تحياتى

هشام شيخ الدين

كل سنة وانت طيب القابلة علي امانيك

والله يا اخي الحبيب انت عايش في عالم الروحانيات شديد

ربي يزيدك وام الوليدات خير

والله رمضانك هذا كله احياء للسيرة النبوية انت صحابي يازول تب

رضي الله عنك وارضاك

بس انا احد ومقام سيدي حمزة كنت اخرمرة فيها سنة 97 والشيخ حاج حمد الجعلي

رجع الزمن وره وعجاجة حرب احد قامت فينا والله الازمة عملت فينا جنس واحد
البخاخ اشتغل يومو داك
يا سلام علي نسيم القبة الخضراء حاجة سمحة شديد

عليك الله ادعو لاخوك معاك
ربي يفرج كربته ويخفف عنا البلاء

التعبان ودعوج الدرب

إذا كنت تصف نفسك بالتعبان فماذا أبقيت لنا يا سيف ؟

يا لهذا التواضع يا رجل

لك كل تحياتى ودعائى وحبى وتهنئتى لكم ولأسرتكم الكريمة بالعيد السعيد ، وأبشرك يا سيف (أن المرء مع من أحب) ، فمقامك بيننا (مقدس) يا سيف

ألف ألف تحية أرسلها من عروس البحر الأحمر

العم الحبيب هشام شيخ الدين
كل عام وانت بالف صحة وعافية
سبحت فى هذة البقاع الطاهرة
ونلتم من البركات مانلتو
ياهنى لك وانت والاسرة الكريمة
بهذة السياحة الروحنية الجميلةالتى ذهبتو بها الى احلى البقاع لرسول صلى الله علية وسلم
واديتك مناسك العمرة
وجاورت قبر النبى وصحبة الكرام
تقبل الله منك الصيام والقيام
وعمرة مباركة وسعى مشكور

المحترم اخو تمضور..

كل سنة وانت طيب..

سألت منك ود اخوك محمد عادل

في البوست بتاعي بتاع تهنئة العيد ,ولم اجد جوابا..!

فقدناك كتير وفقدنا كتابتك الرشيقة ..

وانت سابح في بحور الجمال الرباني..!

ربنا يذيدكم من نعيمه ويبلغنا المقاصد..

الدكتورة العزيزة رشا سالم

شكرا جزيلا على السؤال وأبعث اليك من هنا تهانى العيد وكل الأمنيات الجميلة وفرحت جدا بانضمام شقيقك للمنبر فصارت لنا عائلة كبيرة هنا تضم كل ألوان الطيف

تحياتى

محمد عادل

أشكرك من كل قلبى وأنت تتابعنى برسائل الموبايل وبالمكالمات عند كل مناسبة فهذا من اصلك الطيب ، وكتر خيرك كتير

يازول
سلام
كل عام وانت بخير
يا اخي ما داير تعيد
رمضان تاني معنا انت
والموج خلاص تعال في
الضحية وليك علي
خروف تاني بعد العيد
في رحلة سلامي
لي ناس جدة سلامى

يا مهندس الحروف والجمال والعواطف أخى عثمان الجميل لك كل الأمنيات الطيبة بمناسبة العيد السعيد والتهانى الجميلة تصلكم وأنتم ترفلون فى بحور سعادة الخرطوم يا أجمل ناس الخرطوم ، لكم الحب كله والود المتصل

الحبيب هشام

كل الأمنيات الطيبة لك ولأسرتك بمناسبة عيد الفطر المبارك
واسأل الله أن يعيده علينا وعليكم بالخير والبركات والطيبات
وأن يتقبل الله صيامنا وصيامكم والعمرة والزيارة.

الشوق بحر يا سيدي, طولت الغيبة جداً.

طبعاً انت عارف اني مقيم بالدمام ولكني أشاركك حب مدينة جدة
حبيبة جداً إلى قلبي وخصوصاً كباية شاي المغرب في بني مالك باللقيمات
وكيس التمباك بعدها.

أتمنى لك طيب العيش بها يا سيدي.

أخوك

أبوفتحية

ود الشيخ ادى العمرة
وزار مدينة الهجرة
دموعه جرت منهمرة
فى رحاب القبة الخضراء


كل سنة وانت طيب..وفى اثناء تفقدك لحوارى جدة
شوف لينا وين غاطس اساسى

أبقوته الشاعر الملهم تحياتى العطرة وتهانى العيد تصلكم وتجدكم فى أحسن الأحوال وأساسى غاطس غطسة عدوك لم نره حتى فى العيد السعيد

تحياتى وحبى لكم متجدد

أبو فتحية الصادق صديق سليمان يا ابن الدمام البار لك من جدة كل الأمانى الطيبة وليك وحشة يا ملك

الحبيب هشام شيخ الدين

البوست ده انقلوا معاك طوالي

لانو ملئ بالخير والفوائد

قضيت ليلتي كلها ابحث في امهات

كتب شعر المتصوفه فوجدت لك ابيات

تبين لنا ايامك ياسيدي
الابيات الاولي تخصك يا حبيب الابرار والاخيرة لي

يا من يسافر في البلاد منقبا اني الي البلد الحرام مسافر

فان هاجر الانسان عن اوطانه فالله اولي من الــــــيه يهاجر
وتجارة الابرار دين ومن يبع بالدين دنياه نـــــعم التاجر

واحق ما يشكو ابن ادم ذنبه واحق من يشكي اليه الغــــافر

فعسي المليك بفضله وبطوله يكسو لباس البر من هو فــــاجر

عدل لغط في الكتابة

حاشاك الفجور يا ابن الكرام يا مدرسة قائمة بذاتها فى فنون التصوف والزهد والأدب ونحن بأمثالكم نقتدى

لك أجدد الحب والتحية والتقدير

إزيك يا حاج والعيد مبارك عليك

كان الود والله أجيك وأعيد عليك، لكين المرض غلاب

والله يا هشام طبعا ده أول عيد أنا أقضيهو هنا وما أمشى السودان

ووين، بين أربعة حيطان وما معاى غير المرض والزهج والقلق

بالله محمد السنى جا هنا؟

قول لى هو إنت جايب خبر حاجة

وكل سنة وإنت أطيب واسعد

وتحياتى للعيال

أبوذر الحبيب كفارة ليك يا زول والمرض ما بكتلو زول

نعم محمد السنى جا وسأل عنك سؤال (الضهبان) إلا أن زمنه كان ضيق جدا وكان حريص كل الحرص أنو يشوفك وهو يبلغك تحياته العطرة والباقى بقولو ليك فى التلفون

تحياتى

وما زلت أترقب تلفونك يا أبا ذر

تحياتى

ياهشوم اخوى مالك قطعت الحومة

مشتهيين خباراتك شمارا وتوما

رمضان الكريم ايامو تمت صوما

والعيد هلّ فى واشنطنا وخرطوما

وات ما جيت "خبارك؟"يا عديم اللومه

ان شاء الله الكريم ما كنت بس محموما

وان شا الله العيال طيبين وآخر نومة

وان شالله المصاريف ما بقت معدومة

وان شا الله المزاج رايق وما مزحوما

يابركة قبايل الباشة فى كل يوما

تفرح وتنبسط خيراتو ليك بالكوما

ومسعاك يالهميم .. بحرا تعوم فيو عوما

وذريتك موفقة فى القسم وعلوما

و(دريتك) مكملة فى الخلق ، فى قوما

ياود الكرام ..واحشنا يا هشومه




دى كنت كتبتها ليك هناك فى بوست تمضورختى ..لكن ما بعرف ما نزلت ليه

تَمَضُورَخْتِى

تماضر

ياسلام عليك يا الحبيبة

كلماتك حلوة ومعبرة وصادقة

حليل ود الام المنو البطن ما بطم

انتي كمان ربي يسعدك بي اولادك ويحفظك من كل شر

ويحقق ليك امانيك الخاصة والفنية كلها


الحبيب هشام


البوست ده يبقي فوق

يا تماضر اللزيزة وأحلى من لكوما
يا منقة وعسل شربات مكوم كوما
شاكر للسؤال ملكة جمال خرطوما
حارسك بالشمار مع دكوة كترو توما
والروح كان تفر بى غادى بشعر توما
يا صافية بناتنا الشاهده ليك التومه
بى أخلاق صفاتك اليوم بقت معدومة
وبى الفن الأصيل داعماهو كل علوما
يغروك السؤال ناس بيتنا سوو حكومة
بى وزراء وعساكر وكل قعدة وقوما
شايلين البيان حامين عيونى النومة
عشان يوصل إليك من غير عتاب أو لوما
يلقاك فى العسل مغتوسة حد العوما
ودولارك كتير لمن يسوى حكومة
والعافية إن بقت ياها التسوى جضوما
ما تفوت منكم وما تصحى يوم من نوما
شوفتكم تبل الشوق زى بلعة الحلقوما
وراحتكم هى راحتنا البقت معدومة
ورغم فراقنا طوّل ما فينا زول مهزوما
أو عايش نكد أو مرة بقى محروما
طول ما حبكم فى قلوبنا بقى مردوما

كل سنة وأنت طيب يا قريبي ..
وكل الأماني الطيبة ..

المرة دي الظروف حرمتنا من شوفتكم ..
الجايات أحلى ..

تسلم يا معتصم ، وكل سنة وإنت طيب ياقريبى

أشكرك للمشاركة هنا

الأخ الفاضل .. هشام

طلة بهية يا عمدة .. و سعداء لرؤيتك متألقا من جديد ..
حفظنا ليك حقك من السينيرية في بوست " هنا فداسي "
و يا ريت لو تشرفنا بظرفك المعهود

رب اجعل هذا بلدا آمنا وارزق أهله من الثمرات

مكسب

الحبيب مكسب

حقيقة إنت مكسب ، وأنا من دربى ده ماشى هناك على بوست فداسى

وكل سنة وإنت بألف خير

تحياتى

تمضورختى
سامحينى على خطرفتى
إنتى أبوى ما أوفيتى
وكل ما قلتى ولخصتى
قليل فى حقو يا أختى
كان العالم والمفتى
كان بيصيب وما بيختى
كان أستاذ عادل مفتى
كان ما بشيل بس كان يعطى
ها أنذا طالع بختى
أهتف أقول تمضورختى
ما بتقبل قول متغتى
يا حلاتك يا كابيتل (تى)
يا فاهمة كل خطرفتى
ماشة أمام ما إتلفتى
عملك يوم ما كلفتى
وأصلو عدوك كا صاحبتى
يخزأ عدوك ، دوسى وفوتى
يا قابعة فى نص كبدى
يا أكبر كل أخواتى
أحب الفن الحتحتى
والمسرح يوم فى طلعتى
كولن باول كلمتى
مسلسل دارفور وريتى
يوم ولدوك جيدن جيتى
عمّة نبراس دكتورتى
صاحبة مريم بت خالتى
أستاذة جيل رهيب عاتى
ما اتخلعت يوم من بعاتى
ما ضيعت الساعاتى
ما خلفت يوم ميعادى
ما سكتت وقالت ، عادى
وكل ما أزيد من خطرفتى
أفرح أقول
تمضورختى

عزيزي الأخ هشام،

كل عام أنت وعائلتك بخير
ودعواتنا لكم بأن يجعل الله أيامكم كلها سعادة وهناء
ويمتعكم بالصحة والعافية
وزيارتكم لمسجد المصطفى صلى الله عليه وسلم
مباركة بإذنه تعالى
أهل المدينة المنورة أناس طيبون الله يطراهم بالخير والبركة

حديثك عن جده ذو شجون وأعادني لأيام الماضي والحنين لهذه المدينة العريقة

الأحياء، حي بني مالك، حي مشرفة، حي غليل، حي النهضة، حي التحلية، حي عنيكش’
حي غليل، حي العزيزية، حي البغدادية، حي الخاسكية، حي الصفا، حي النعيم،
حي السلامة، حي الجامعة، الهنداوية،
وأهم منطقة حي الكرنتينة

بالله عليك يا هشام ما جربت شية الكرنينة؟

الحبيب عزيز عيسى

أشكرك على المداخلة الثرية ، وجدة تقبع فى قلوبنا ،

نعم جربت (شية) الكرنتينة مرارا وتكرارا ، وجلساتها الأرضية فى الحيشان التى تشبه حيشان السودان ودكوتها وشطتها وعلالها الذى يضرب عنان السماء فيسد رمق كل من أكل منها وتذوق حلاوة وطلاوة لحمتها الهشة السواكنية اللذيذة ن كما جربت قهوتها ونشترى منها كل المستلزمات الشعبية السودانية ، بل ونذهب لها أحيانا كثيرة فقط لتذوق الشية والقهوة ولمحاربة الإغتراب حيث تحس فيها أنك فى إحدى أحياء السودان الشعبية ، وسأفرد بوستا خاصا للكرنتينة فى القريب العاجل

تحياتى

هشام

سلام



مشاهد يرضي الله لثم ترابها ويوضع فيها الوزر عن كل وازري

وارض بها للهاشمي مآثر يعود علينا خير تلك المـــــاثري

ويازائرا روح الحبيب محمدا بنفسي واهلي من حبيب وزائــر

اذا مارات عيناك روضةاحمد فضاهي رياض الخلد فيها وفاخري

وقبل ثري ذاك الحبيب مسلما علي خير مقبور بخير المقابري

سلاما بعدي الرمل والحصي ونبت الفلا فلا حصر وقطر المواطري
وضاعف علي اعشاره وبعيره بسبعين الفا ثم ضاعف وكاــــثري
وقل يا ختام المرسلين اعانة لمن دعواه يرجو اغاثة عاثري
اتاك ينادي يا نجاشي محمد وانت جواد باعه لــيس بقاصري

وما الظن فيك يا مولاي بخائب ولا العائز اللاجي اليك بخاسري

فاني علي قربي وبعدي رفيقكم ومادحكم في كل ناد وسامـــري

اذا ضاق يوم الحشر بالناس جانب فق لاتخف عبدالرحيم المهاجر

وبرا واكرم من يليه لاجله اذا قيل قم فاشع لاهل الكبـــائر

عليك صلي الله ما حن راعد وما لاح برق في دجي الدياجـــــري

صلاة تفوق الشمس نورا ورفعة وتروي برياها عبير المـجامري

تخصك يا عين الوجود وتنثني علي الك الغر الكرام العناصري

يا سلام يا سيف ، وصلوات الله وسلامه لسيدنا رسول الله وعلى آله وصحبه الكرام

هنالك شاب صبوح يقدم برامج تلفزيونية ويقوم هو ايضا بالإنشاد وقد إستمعت إليه يوما ينشد هذه القصيدة فأعجبنى أيما إعجاب وقد فاق عبدالله الحبر وآخرين فى هذه القصيدة بالذات ، ويا ليتنى لو عرفت إسمه.

تحياتى يا رجل فقد فاضت بركاتك كل العالم الإسفيرى