Post: #1
Title: الصيدلى الهلفوت (قصة واقعية لا تحدث إلا فى السودان)
Author: يازولyazoalيازول
Date: 06-27-2006, 09:27 AM
عندى بت أخوى يا جماعة صغيرة وحنكوشة ومتربية فى السعودية ، مشت السودان إجازة برفقة أمها ، وهناك كعادة أطفالنا عندما يعودون إلى الوطن يصابون بالأمراض نتيجة تغيير الجو ونتيجة عدم التعود على المأكل والمشرب فى السودان ، فمرضت الحنكوشة مرضاً شديداً ولما كانت الدنيا ليل والمستشفى بعيدة فقد آثرت أمها أخذها إلى الصيدلية القريبة لتشترى لها دواء بإستشارة الصيدلى الموجود ، بإعتبار أن الصيدلى متعود على مثل هذه الأشياء وبالتالى سيصف لها العلاج المناسب ، فأخذت البنت وذهبت للصيدلية
وكانت المفاجأة
الصيدلى ، نائم بداخل الصيدلية ، (قلنا معليش الدنيا ليل وما فى زبائن) ، والمفاجأة الثانية (الصيدلى لابس عراقى) ، فتحدثت إليه الأم بأدب وأعطاها الأدوية المناسبة ، وأخذت البنت وذهبت بها إلى البيت ، وعندما أرادت أن تعطى البنت الدواء حلفت برأس أبوها أن لا تتناول الدواء الذى أعطاه إياها (العريبى) ، (فى صيدلى كده يا ماما؟؟؟؟) (ماما ده عريبى ساى) (ماما إنت أى زول يديك حاجة تشيليها منو وتشربينى ليها؟) (ماما قلت ليك ما أبغى)
ولم تستطع الأم إقناع البنت أن هذا الرجل (دكتور صيدلى)
فماذا تقولون بالله عليكم؟
|
Post: #2
Title: Re: الصيدلى الهلفوت (قصة واقعية لا تحدث إلا فى السودان)
Author: Alshafea Ibrahim
Date: 06-27-2006, 10:21 AM
Parent: #1
الأخ هشام
قالت ((ماما قلت ليك ما أبغى)
قول ليها كويس ما شفتي الممرض/ه والفحيص/ه والدكتور/ه وماشفتي قاعدين وين ؟؟ والله تاني ما تمشي السودان خليك من المستشفيات والصيادليات
كان الله في العون
مودتي
الشفيع
|
Post: #3
Title: Re: الصيدلى الهلفوت (قصة واقعية لا تحدث إلا فى السودان)
Author: يازولyazoalيازول
Date: 06-28-2006, 02:15 AM
Parent: #2
الشفيع أبراهيم
لكن يا أخى ألم يكن جزء من دراستهم الإلتزام بزى معين لمعاينة الجمهور مثل الصيدلى أو الفحيص أو حتى الطبيب المعالج ، لماذا يتركون ما درسوه ليظهروا بهذا المنظر (البايخ) فى مواقع عملهم ، ألم ترى بقية الأخوة العرب وكيف يهتمون بالمظهر والذى أظنه جزء من العلاج ، المصريين مثلاً ، لم أرى فى حياتى صيدلى مصرى لا يرتدى (كرفتة) ، فلماذا نرتدى نحن (العراقى) وكأنما نحن جالسين فى بيوتنا ، (العراقى) يا جماعة يقابل (البيجامة) أو ملابس البيت أو زى صيفى خفيف لزوم حرنا الشديد يلبس داخل المنزل ولا يجوز الخروج به من المنزل للعمل
تحياتى يا شفيع
|
Post: #4
Title: Re: الصيدلى الهلفوت (قصة واقعية لا تحدث إلا فى السودان)
Author: خالد عبد الله محمود
Date: 06-28-2006, 02:40 AM
Parent: #3
و الله يا خال بت أخوك برضو ما قصرت على الأقل عندها سبب
مازي بت أختي...
كانت برضو حنكوشة و جاية من السعودية يادوب
و مرضت في السودان و جابو ليها الدكتور يكشف عليها في البيت
و هي جنها و جن الدكاترة
الدكتور دخل الغرفة و هي حلفت الراجل دة ما يخت يدو فيها
قالت لأمها ( يا ماما دة و الله ما دكتور)
أمها قالت ليها عرفتي كيف يا فصيحة؟
قالت ليها يا ماما عايني ليهو (شين) كيف؟
ما بالغت؟
الغريبة أنو هذه الطفلة الآن تدرس في رابعة طب!!
|
Post: #6
Title: Re: الصيدلى الهلفوت (قصة واقعية لا تحدث إلا فى السودان)
Author: يازولyazoalيازول
Date: 06-28-2006, 03:07 AM
Parent: #4
خالد عبدالله محمود
اضحكتنى البنية (الدكتورة) ووجهة نظرها العجيبة 
بس أوع يكون الدكتور سمعها؟؟؟ تبقى فضيحة
تحياتى
|
Post: #8
Title: Re: الصيدلى الهلفوت (قصة واقعية لا تحدث إلا فى السودان)
Author: خالد عبد الله محمود
Date: 06-28-2006, 03:52 AM
Parent: #6
| Quote: بس أوع يكون الدكتور سمعها؟؟؟ تبقى فضيحة |
و الله قدامو و كمان بتأشر عليهو!!!!
و الأسوأ من كدة إنو راجل قريبنا ..
|
Post: #11
Title: Re: الصيدلى الهلفوت (قصة واقعية لا تحدث إلا فى السودان)
Author: معتصم الطاهر
Date: 06-28-2006, 05:00 AM
Parent: #8
| Quote: و الأسوأ من كدة إنو راجل قريبنا .. |
بس ..
|
Post: #18
Title: Re: الصيدلى الهلفوت (قصة واقعية لا تحدث إلا فى السودان)
Author: خالد عبد الله محمود
Date: 06-28-2006, 09:19 AM
Parent: #11
الف شكر ليك
ياراجل يا ذوق
|
Post: #5
Title: Re: الصيدلى الهلفوت (قصة واقعية لا تحدث إلا فى السودان)
Author: قرشـــو
Date: 06-28-2006, 02:48 AM
Parent: #1
حبيبنا هشام
لك التحية
ياخى انا بحي الصيدلى النايم فى الصيدلية ده ياخى
والله زمان الصيدلية من الساعة تسعة تقفل وكل واحد لاحق برامجه
جميل ان تجد الان صيدلى نائم كمان فى الصيدلية فهذه تحمد له
اما لبسه فهذا موضوع آخر ...
الاخ خالد
قلت لى بت اختك قالت : | Quote: قالت ليها يا ماما عايني ليهو (شين) كيف؟ |
والله معاها حق ياخى
ياخى منو الما بدور السماحة وما بدور الجمال
وبصراحة الزول الشين ( رغم عدم اعتراضنا على خلق الله ) ما بسُر ياخى
وان الله جميل يحب الجمال ياخى
طالما هى فى الطب فارجو ان تكون جميلة حتى لا تعدم الزبون ....
|
Post: #7
Title: Re: الصيدلى الهلفوت (قصة واقعية لا تحدث إلا فى السودان)
Author: يازولyazoalيازول
Date: 06-28-2006, 03:09 AM
Parent: #5
قرشو ، صحيح كتر خيرو ، بس ما تنسى الشغلة بقت (تجارة) وعلى الأقل التاجر مفروض يكون (حسن المظهر) عشان خاطر الزبون ، فما بالك لما التاجر يكون صيدلى؟
شكرا أخى قرشو ، على الإضافة الثرية
تحياتى
|
Post: #9
Title: Re: الصيدلى الهلفوت (قصة واقعية لا تحدث إلا فى السودان)
Author: ابوحراز
Date: 06-28-2006, 03:57 AM
Parent: #7
أكاد أجزم بان المظهر يشكل جزءاً كبيراً من العلاج
بل من الراحة النفسية
لكن والله نعاني كثيراً في هذا الموضوع
كثير من السودانيين شنافين
لو لبست أوووووووووب
ولو ما لبست أوبيييييييييين !!!
يعني في القرى بالذات كثيراً مايستنكر المجتمع حينما يراك تهتم بمظهرك
وياويلك لو لبست بدلة
وياويلك كمان لو اهتميت بتنسيق ألوانك
كلها تعتبر جريمة
صدقني ما اقوله اليك حقيقة تامة
جئت لحد الأصدقاء بمستشفى الملك فيصل
ووجدت أحد الأخوة السودانيين في غير ميعاد الزيارة
وحاول المستحيل من أجل دخول المستشفى
ولكن شلهتة هدومه لفتت النظر اليه
ورفضوا تقديم المساعدة له
وكنت ارتدي لبسي الخاص بالعمل والذي يتطلب لبس معين
المهم حكى لي الحاصل
فدخلت المستشفى بكل ثقة دون أن يسألني اي أحد الى اين تذهب ؟؟
لكن للأسف لقيت الراجل المريض اتلحس !!!الله يرحمه ويغفر ليه !!
|
Post: #10
Title: Re: الصيدلى الهلفوت (قصة واقعية لا تحدث إلا فى السودان)
Author: يازولyazoalيازول
Date: 06-28-2006, 04:54 AM
Parent: #9
شكراً يا أبحراز لإضافتك الثمينة ، وهذا فعلا ما نعانى منه داخل وخارج السودان
السودانى تنقصه اللياقة والأناقة ولا يهتمون بالمظهر بتاتاً ، عيب كده يا جماعة ، فالدنيا إتغيرت (والحياة مظاهر) فاظهروا بصورة حسنة تشفع لكم اشياء كثيرة ، رغم وجود الكثيرين الذين قد يخالفوننى الرأى ويقولون أن المسألة تكمن فى الجوهر وليس المظهر ، ولكن فى هذه اليام لا يعبر الجوهر إلا من خلال المظهر فالدنيا إتغيرت ويحب أن نواكب التغيير
ولاّ أنا غلطان؟؟؟
|
Post: #12
Title: Re: الصيدلى الهلفوت (قصة واقعية لا تحدث إلا فى السودان)
Author: مهيرة
Date: 06-28-2006, 07:39 AM
Parent: #10
الاخ الكريم هشام وضيوفه العزاز
عارفأول لما كنت بدرس فى كلية الطب، يوم مشينا نزور جدا لينا فى امدرمان، أها بعد سلمنا وقاعدين نتونس معاه قال لى: انتى دخلتى كلية شنو يا بتى؟ قلت ليه : كلية الطب. قام عاين لى كدى فوق تحت وقال لى:
لكن يابتى الدكتور دة لازم يكون طويييل وعريييييض عشان المريض زاته يطمئن!!!
طبعا الوقت داك انا كنت ضعيييفة وصغييرونة ما زى حسع!!
تحياتى
|
Post: #15
Title: Re: الصيدلى الهلفوت (قصة واقعية لا تحدث إلا فى السودان)
Author: يازولyazoalيازول
Date: 06-28-2006, 09:12 AM
Parent: #12
دكتورة مهيرة
بحضورك إزدان البوست
وجدك يتصور أن الدكتور أو الدكتوره لازم يكون أو تكون طويل/ة عريض/ة ، وده تصور الكثيرين ، وأكيد جدك لو عمّر كان حا يغير رأيو خصوصا والدكاترة فى هذا الزمن بيتخرجوا صغار مقارنة مع دكاترة زمان
تحياتى يا دكتورة
|
Post: #19
Title: Re: الصيدلى الهلفوت (قصة واقعية لا تحدث إلا فى السودان)
Author: خالد عبد الله محمود
Date: 06-28-2006, 09:23 AM
Parent: #5
| Quote: طالما هى فى الطب فارجو ان تكون جميلة حتى لا تعدم الزبون |
يا قرشوا أنت من زمن الزبائن بنتظروهم
بنات الزمن دة العرس بقي آخر أولوياتم
|
Post: #13
Title: Re: الصيدلى الهلفوت (قصة واقعية لا تحدث إلا فى السودان)
Author: أبوبكر حامد الأمين
Date: 06-28-2006, 07:59 AM
Parent: #1
الأدهى والأمر أن البهدلة لدى العوام تعنى التفوق والتميز المهنى ، أى أن هذا الشخص لفرط ولعه بالعلم لايجد متسعاً ليهندم نفسه ، وبالمقابل كل مهتم بمظهره غبى وربما ينسب للجنس الثالث ، مع الوضع فى الإعتبار أننا ندرج تحت قائمة العالم الثالث ، ترى ماسر الرقم ثلاثة ؟؟
|
Post: #16
Title: Re: الصيدلى الهلفوت (قصة واقعية لا تحدث إلا فى السودان)
Author: يازولyazoalيازول
Date: 06-28-2006, 09:14 AM
Parent: #13
كلامك صاح يا ابوبكر
ممكن نقبل الكلام ده من الفنانين والتشكيليين وخلافهم ، بس من الدكاترة لا
|
Post: #14
Title: Re: الصيدلى الهلفوت (قصة واقعية لا تحدث إلا فى السودان)
Author: Hafiz Bashir
Date: 06-28-2006, 09:01 AM
Parent: #1
الاخ يازول اس 3
كلامكم صاخ المظهر مهم.. لكين رايي انو الدكتور مفروض تكون فيهو شنا حبة كدا عشان يخوف المرض
زمان و نحن طلبة في الجامعة جابولينا في الوحدة الصحية دكتورة صغيرونة و حليونة.. الحمى و نقص فايتمين ح (الهايبوحنانيميا) بقوا كل يوم سبب بلا سبب يجونا..
|
Post: #17
Title: Re: الصيدلى الهلفوت (قصة واقعية لا تحدث إلا فى السودان)
Author: يازولyazoalيازول
Date: 06-28-2006, 09:16 AM
Parent: #14
حافظ بشير
عيادتها وين؟؟
أنا حاسس بى نفس الأعراض
تحياتى
|
Post: #20
Title: Re: الصيدلى الهلفوت (قصة واقعية لا تحدث إلا فى السودان)
Author: noha_g
Date: 06-28-2006, 04:30 PM
Parent: #1
سلامات
تحياتي
و الله ذكرتوني النكتة بتاعت " إحنا خلقة الله ما بنعرفها؟"
الصيدلي و عرفناه لابس عراقي
المسكين التاني دا شناته يعالجها كيف؟
و الله الحنكوشات بالغن
|
Post: #21
Title: Re: الصيدلى الهلفوت (قصة واقعية لا تحدث إلا فى السودان)
Author: يازولyazoalيازول
Date: 07-01-2006, 04:48 AM
Parent: #20
مش كده بالله يا نهى؟
|
Post: #22
Title: Re: الصيدلى الهلفوت (قصة واقعية لا تحدث إلا فى السودان)
Author: Salah Abdulla
Date: 07-01-2006, 01:24 PM
Parent: #1
هشام ..
إزيك ..
والله بت أختك عندها مليون حق ..
الشلهتة والبهدلة يقت علامة مميزة للسودانيين ، ومرات كتيرة الواحد بيخجل عديل كده ..
بهدلة تكتلك بالغيظ ، كان الناس الجوه السودان ، والا البره وعاملين فيها (ركبوا طيارات ديل ) ..
مرة وأنا راجع من واحدة من إجازاتي ، قابلت لي ضابط شرطة في المطار ، شكيت أنه تابع لوزارة داخلية جمهوريةالسودان (الديموغراطية) لأنه كان قيافة ونضيف ..
وقابلتو مرة تانية في البوابة المنها وصالة انتظار المسافرين ..
واقف هناك وبيعاين للمسافرين (معظمهم كانوا رعوية) ولابسين جلاليب ،،
والصراحة الجلاليب غفنات عفانة السنين ، وساخة مبالغة ..
أي زول (وسخان) أبى يدخلو ، وقفنا أنا وأصحابي نتفرج ، والله زولك رجع نص الطيارة ..
قال ليهم أمشو اتنضفو وتعالوا ،،، بي وساختكم دي ماشين وين ؟؟
والله الليلة شبر ما تطلعو من هنا..
يا جنانو والله نحن جايين من ما عارف وين كده .
والله الليلة كان جايين من القمر زاتو ما تطلعو
واحد منهم كان باقي ليهو آخر يوم في الاقامة.. زاهر صاحبي أداهو جلابيتو النظيفة ، ولبس جلابيتو (الما عرفنا ليها لون ) ..
الكلام ده يا هشام كان سنة 96 وصاحبك ده زاتو بيكون هسي لابس ليهو جلابية (وسخانة) ..
بلد تحير الفيل زاتو ...
|
Post: #23
Title: Re: الصيدلى الهلفوت (قصة واقعية لا تحدث إلا فى السودان)
Author: بكري اسماعيل
Date: 07-01-2006, 04:18 PM
Parent: #22
عمو هشام إزيك
كما تعلم عروبنا على سجاياهم وممكن تكون ملاحظ العراريق اللافة في بني مالك وباب شريف فما بالك في السودان فزولنا دة يكون ما زال متأثر بحياة الريف وما قادر يفتك منها حتى بعد إتعلم وبقى دكتور .. وبالمناسبة الناس في السودان بقت تهتم بالمظهر أكتر من إهتمامه بالمأكل يعني مسألة زمن ليس إلاً بس أديها كم سنة كدة ولمن ترجع تعرس لي ناس محمد حا تلقى الناس كلها لابسة بدل ...
تحياتي ،،
|
Post: #25
Title: Re: الصيدلى الهلفوت (قصة واقعية لا تحدث إلا فى السودان)
Author: يازولyazoalيازول
Date: 07-02-2006, 03:03 AM
Parent: #23
بكرى إسماعيل
أوافقك الرأى فالتغيير لا شك قادم
تحياتى
|
Post: #24
Title: Re: الصيدلى الهلفوت (قصة واقعية لا تحدث إلا فى السودان)
Author: يازولyazoalيازول
Date: 07-02-2006, 03:02 AM
Parent: #22
صلاح عبدالله
اشكرك على الإضافة الثرية ، وزولك الضابط النضيف ده ، الله يكتر من أمثالو
تحياتى
|
Post: #26
Title: Re: الصيدلى الهلفوت (قصة واقعية لا تحدث إلا فى السودان)
Author: صلاح الدين عبدالله محمد
Date: 07-02-2006, 04:24 AM
Parent: #24
احلى زول
نحن السودانيين (اغلبنا)يفشل فى المهن التى لها علاقه بالهندام. مهن مثل مندوب المبيعات والاستقبال او التى لها علاقه بالجمهور.
طلب منى احد المقاولين السعوديين ان ادبر له محاسب وفى نفس اللحظة قال لنفسة كيف اجد سكرتير جيد قلت له الاثنين جاهزين
قال لى اريد منك فقط زول محاسب اما شغله السكرتير مش شغلة سودانيين؟؟؟؟
|
Post: #27
Title: Re: الصيدلى الهلفوت (قصة واقعية لا تحدث إلا فى السودان)
Author: يازولyazoalيازول
Date: 07-02-2006, 05:22 AM
Parent: #26
كلامو صاح يا صلاح الدين ، فنحن الشعب الوحيد فى الدنيا الذى ينتعل (شبط) ، مع البنطلون والقميص
|
|