الله يستر منك يا ياسر دلو 🤓 ،،،، و هيبة الوقفة ،،،

Post: #1
Title: الله يستر منك يا ياسر دلو 🤓 ،،،، و هيبة الوقفة ،،،
Author: عزالدين عباس الفحل
Date: 08-04-2023, 09:08 AM

09:08 AM August, 04 2023
سودانيز اون لاين
عزالدين عباس الفحل-ابوظبــــــــي
مكتبتى
رابط مختصر

Quote:

الله يستر منك يا ياسر دلو 🤓

البي العصر مرورو ….!!
عندي صاحبي كدا إسمو ( ياسر ) بنقول ليهو الجيو مستهبل شديد …
!لكن كمان ظريف شديد …..!!
لما ألاقيهو بتبسط جداً ….!!
مسلط وبتاع درامات مافي أي حاجه بتغلبو ….!!
هو أصلاً شغال في العقارات قبل كدا عارض ليهو أرض في ( غزة ) لجماعة كدا
الزول دا بتقمص أي شخصية ….!!
وثقتو في نفسو لا تحدها حدود … بعمل أي حاجه دايرا ….!! وبخش أي حتة
وأنا صراحة معجب جداً بدرجه التقمص العالية دي 😌
يعني لو ما بعرفو مستحيل أكذبو ….
قبل كم يوم لاقيتو في السوق وبعد التحايا والسلامات
قلت ليهو يا ياسر ياخ أبو ( مبارك ) صاحبنا دا
راقد في المستشفي ولازم نزورو … وإنتا عارف مبارك دا ما قاعد يقصر ….!!
الزيارة العصر الساعة خمسة ….!!
فإذا ما عندك حاجه خلينا نمشي عليهم الليلة …!!
لأنو واضح إنو الزيارة والمواعيد دي مقدسة هناك
قلتا ليهو جيت ماري قبيل بالمستشفى قلتا أشوف الحاصل
لقيت ( الغفير ) القاعد بره دا يمتلك من السلطه والنفوذ ما يفوق ( حلف الناتو ) …. !!
وهو ذاتو عارف كدا ….!!
يمين النسوان بتوسلن ليهو زي الفكي …..
وحافظات إسمو…..التقول خالن..
إسمو (الطاهر ) بقولو ليهو ( أب شنب )
والشنب ذاتو عادي يعني ما ( السافنا الغنية )
( لكن واضح إنو هيبة الوقفة تركت أثرها عليه فبدا كثيفاً )
الشفتات فيهن ولا بقولن ليهو ( الطاهر )
شابكاتنو ليك هي يا ( الحاج ) …..!!🤚
هي يا ( صباح الخير ) 🤩
ليحن قلبه ويعطف ….!!
( واعطف علي يا كريم )
شوفو الرد ..
صباح الخبر ولا مساء الخير .مافي دخول قبل المواعيد …!!
غايتو عمك دا محتاجين ليهو في الحكومة والله
قطع أخدر …..! عارفن كضابات ….

،،،،

***
للعلم فقط :-
لي مداخلة واحدة في اليوم.
منذ اكثر من 3 سنوات تقريبا

عزالدين عباس الفحل
ابوظبي

Post: #2
Title: Re: الله يستر منك يا ياسر دلو 🤓 ،،،، و هيب
Author: عزالدين عباس الفحل
Date: 08-05-2023, 08:51 AM
Parent: #1

Quote:

المهم ( ياسر) قال لي نمشي ليهو هسا طوالي المشكلة وين …
قلت ليهو ياخ أنا بقول ليك في شنو ….!!!
عاين لي بي تهكم كدا 😏
وقال لي أهنتني والله ……
أنا الدكتور ( ياسر ) إستشاري العظام …
تقول لي مواعيد وزيارة ….!!!!
والله يا أخوانا الثقة الحكي لي بيها دي قربت أقول ليهو
عندنا قريبنا كدا عندو مشكله في رجلو أجيبو ليك متين
رهيب ياخ …….!!
قال لي أنا بس طالب منك حاجه وااااحدة ….
أداني ظرف كدا …..✉️
قال لي شايف الظرف دا …. !ا
قلت ليهو شايفو ….!!
قال لي لما نكون بالظبط قدام الباب تعال أديني ليهو ….!!
( أنا طبعاً مغمت بتابع الزول دا واثق في قدراته )،
فعلا شلت الظرف ✉️
قال لي أول ما أتلفت عليك تعال جاري 🏃🏻‍♂️🏃🏻‍♂️
وقول لي بي لهفة كدا …..
يا دكتور … يادكتور …الصوره طلعت … !!
وأديني الظرف
بس دا ياهو دورك …!!! ……
إتفقنا …!! ✋
قلت ليهو ظابت ….!!👌

،،،،

***
للعلم فقط :-
لي مداخلة واحدة في اليوم.
منذ اكثر من 3 سنوات تقريبا

عزالدين عباس الفحل
ابوظبي

Post: #3
Title: Re: الله يستر منك يا ياسر دلو 🤓 ،،،، و هيب
Author: عزالدين عباس الفحل
Date: 08-06-2023, 05:26 AM
Parent: #2

Quote:

فعلا وصلنا باب المستشفى أول ما اتلفت عاين لي …👀
جيتو جاري
وشبكتو ليك ( يا دكتور يا دكتور … الصوره طلعت …
والله يا أخوانا كأنو زول تاني …!!😳
أول حاجة عاين لي من فوق لي تحت نظرة حمارية كدا 😒
قال لي إنتو أصلو مافي ذوق ولا تقدير ولا إحساس …
.😳😳
مافي شعور !!!!
أنا هسا في العيادة …!!؟؟؟🩺
ولا نحن بس يعني قاعدين قصادكم كدا في الدنيا دي ما عندنا شغله غيركم ….!!
أيه الفوضي وقلة الذوق دي 😤
يمين أنا لما شكيت إني عيان 😱
بقيت قدامو زي الطالب الما حافظ النشيد
😰
قال لي جيب الزفت دا …!!
طوالي أديتو الظرف الأداني ليهو ….!!
يازول طلع ليك منو صورة أشعة تلمع …!! 🌌
( حاوي بس )
ورفعا ليك كدا قدام الناس ديل كلهم وبدا يكشف فيها …
والمنظر دا كلو عمك ( الطاهر ) متابعنا بي شغف التقول نائب أخصائي….!!
المشكله ماعمك …!!
ترا في صلة( بوابة )
المشكلة في النسوان الواقفات البقن يشيلن ويعاينن في الصورة دي .!! 😳😳
واحدات ورا شوية بتشابن كمان
قربت أقول ليهن دي ما صورة زفاف ….!!
أشعة …أشعة ..
الضحك كاتلني ….😂😂
المهم زولك عاين لي كداااا ….!!
قال لي وإهمال كمان ما شاء الله ….!! كتفك مخلوع ولافي بيهو ……👻😳😳
خش خش إنجرا قدامي …..!!
والله يا أخوانا الساعة الفتحو لينا الباب دا و( أب شنب ) بي نفسو مشرف على العملية ….!!
دفر ليهو خمسه كدا لتوسعة الطريق …
واتفضل يا دكتور دي سمعت القريب والبعيد ….!!
وأنا طبعاً في خطراتو ….🚥
متكيف كيف ….!
بس عكر مزاجي عمك ( الطاهر ) دا ….
بعد ما دخل ( ياسر ) إتلفت على.. قال لي إنتو الواحد فيكم يهمل في نفسو ويترمد ويجي يتعب الدكاتره معاهو مش كدا ….!!!
خش الله لا جاب عقابكم 😳…..!!

،،،،

***
للعلم فقط :-
لي مداخلة واحدة في اليوم.
منذ اكثر من 3 سنوات تقريبا

عزالدين عباس الفحل
ابوظبي

Post: #4
Title: Re: الله يستر منك يا ياسر دلو 🤓 ،،،، و هيب
Author: عزالدين عباس الفحل
Date: 08-07-2023, 05:23 AM
Parent: #3

Quote:

( الدكاترة ديل ( الجيو )
غايتو زعلت زعل 😥 😤
عاينت ليهو قلتا أرد عليهو ….!!
تاني إتذكرت إني ( جوكي )
استغفرت وأكلتها في حناني …..ومشيت 😧
يمين الداير يخش ( كندا ) 🇨🇦 ما بتعرض للإساءة دي يازووول ودكتور ياسر واثق الخطوة يمشي ملكاً دفر بعيد وأنا وراهو 🏃🏻‍♂️🏃🏻‍♂️
( ولم أخف سعادتي بهذا الأداء المبهر ) …
دخلنا على أبو مبارك في العنبر هو ذاتو مستغرب في الزيارة المفاجئة دي …
الكارثة لما جا الدكتور الجد جد
قام ( ياسر ) سألوا سؤال كدا ….أنا ذاتي ما فهمتو
قال ليهو
(( هاف يو done زا ( MRI ) فور بيشن …أور ويتنغ فور زا رزلت اوف زا بلود تيست ))
صدقو داك ردا عليهو …😳
( آمنت بالله العظيم )
غايتو كان كدا الناس دي ضيعت زمنا ساكت في قراية الطب دا …..!؟
( هو في ( طب ) يا أخوانا أكتر من كدا ) 🥰
المهم الدكاتره حيو بعض وضحكو بالانجليزي كدا وداك
فَحط ….!!
يازول أخدنا قعدتنا ديك ومبارك رغم مرض أبوهو ميت من الضحك …
قال لي ( ياسر ) لو طلعونا عليك الله تعال تابع مع الحاج دا في البيت 😂
انا بشرب لي في موية لما بخيتا من الضحك 🤧😂😂
،،،،،،،،،

،،،،

***
للعلم فقط :-
لي مداخلة واحدة في اليوم.
منذ اكثر من 3 سنوات تقريبا

عزالدين عباس الفحل
ابوظبي

Post: #5
Title: Re: الله يستر منك يا ياسر دلو 🤓 ،،،، و هيب
Author: Hani Arabi Mohamed
Date: 08-07-2023, 06:32 AM
Parent: #1

Quote: للعلم فقط :-
لي مداخلة واحدة في اليوم.
منذ اكثر من 3 سنوات تقريبا

كتيرة

مداخلة كل شهر مناسبة

Post: #6
Title: Re: الله يستر منك يا ياسر دلو 🤓 ،،،، و هيب
Author: عزالدين عباس الفحل
Date: 08-08-2023, 05:41 AM
Parent: #5

Quote:

المهم كفرنا ليهم وبقينا مارقين …
ونحن طالعين كدا لمحنا لينا شاب راقد في العنبر معاهو أمو ….!!
تشيل وتعاين في ولدا دا بس وتهبب فيهو 🥵
كان حرك راسو هي تحرك راسا ….!!
ياحليلا 😍
الأم ياخ 🥰
طوالي زولك ( أبو اليا ) عرج عليهم
مسك ليك يد الولد دا وبدا بقيس في النبض.. 💪🏼
ويعاين في ساعتو
اخدنا لينا زي دقيقة كدا من الصمت النبيل 🧭
قال ليهو لا ..الحمد لله …..!!
كنا وين وبقينا وين 😳
أموركم طيبه ….!! واصل في العلاج …!!💊
والعيان فاتح خشمو ويعاين ….!!
ومعاها ابتسامة لذيذة كدا بعد الملاحظات الحنينة دي 🤓
وأمو دايرا تطير من الفرح ….!!
قالت ليهو الله يعدلا عليك محل ما تقبل يا دكتور ….!!
كلامك طمنا بالحيل والله …
أنا هنا داير اقع …..!!😧
وهو ماشي عاين لي بالجنبه كدا
قال لي تعرف ياعلوب مرات رفع المعنويات دا أهم من الدواء ….!!
( في دي صدقت يا ( بوص )
ومرقنا إتخارجنا بعد ماوراني كتاب 📕…!!
المفاجأة ما إنتهت …..!!!

،،،،،،

،،،،

***
للعلم فقط :-
لي مداخلة واحدة في اليوم.
منذ اكثر من 3 سنوات تقريبا

عزالدين عباس الفحل
ابوظبي

Post: #7
Title: Re: الله يستر منك يا ياسر دلو 🤓 ،،،، و هيب
Author: عزالدين عباس الفحل
Date: 08-09-2023, 07:08 AM
Parent: #6

Quote:

ونحن نازلين من السلم لاقانا عسكري طالع ..!!
شاف ليك ( ياسر ) دا قطع فيهو تحية بتاعة ( لواء )
أقل حاجة ….!!
ورد ياسر التحية ولم أستغرب أنا …
( أكيد كان خاشي في ( ضابط ) قبل كم يوم ) …….!!👨‍✈️
الغريبة العسكري سألو قال ليهو سعادتك الزول دا جبنا ….
نعمل ليهو شنو …!!؟
لم يتأخر ياسر في الرد ….
قال ليهو اعملو لي اورنيك 8 وتفتحو البلاغ طوالي …!!
العسكري لما إتكيف ….!!
تاتي قطع فيهو تحية ….✋
( أكبر من ديك شويه المره دي …)
قلت ليهو هسع عليك الله يا ياسر إنت عرفت الزول الكلمك عنو دا وحالتو كيف …!!؟؟
قال لي ياعلوب زول بجيبو البوليس المستشفي حيكون حالتو شنو ….!!؟؟
ما ياعكاز يا مطعون 🔪
شفت ليك بوليس جاب لي زول عندو ملاريا …..
ياهو اورنيك 8 دا ….!!
العسكري دا ذاتو شكلو جديد …!! انا لو ما مستعجل كان
عملت تحقيق ….😳😳
يمين أنا ذاتي حييتو….!!✋
عاين لي وضحك …..قال لي غايتو الله يعينا .

, ******

،،،،،،

،،،،

***
للعلم فقط :-
لي مداخلة واحدة في اليوم.
منذ اكثر من 3 سنوات تقريبا

عزالدين عباس الفحل
ابوظبي

Post: #8
Title: Re: الله يستر منك يا ياسر دلو 🤓 ،،،، و هيب
Author: عزالدين عباس الفحل
Date: 08-12-2023, 07:34 PM
Parent: #7

Quote:

البلد دي كلها على راسنا ….!!
صحيح في شوية تفلتات أمنيه
لكن حنحسما إن شاءالله …!!
قلت ليهو دا كلام يطمن …..!!
الأمن دا ما إحساس كمان قبل أي حاجه ….!!ا
مبروك
( واضح إنو أنا ذاتي اللحظة دي دخلت في
( عميد ) 👨‍✈️
يمرقنا الله الليلة 😂😂
المهم يازول جينا مارقين طوالي عمك
( الطاهر )
وقف علي حيلو تحية
لي دكتور ( ياسر )….!!
لما جيت أنا قعد …!!😥
( ما عافي ليك يا الطاهر ) …!!
أها بعد ما طلعنا من المستشفى
قال لي نغشى البقاله دي داير لي كم حاجه …..!!
يا زوووول بتاع البقاله داير يطير …
إحترامات تقيلة …!!
والولد المعاهو دا يشيل
ويرص في الأكياس ويودي في العربية …..
وقطعو فينا اتنين بارد
خارج الفرصة
وعايز يدفع …..
قال ليهو ما تخلي عنك ….😳
هيااااا الخلي عنك …😱
ياسر غايتو أصرا …
أداهو القروش …!!
زولك قال ليهو الحمد لله
ناسكم تاتي ما جونا …!!
ما قصرت والله يا مدير ….!!
ونحن في العربيه قلت ليهو ناسكم منو …..!!؟؟
قال لي ناس الضرايب ….!!
قلنا ليهو وإنتو منو …..!!؟؟
قال لي مدير التحصيل 😳😳😳
قربت أنزل ….😱

, ******

،،،،،،

،،،،

***
للعلم فقط :-
لي مداخلة واحدة في اليوم.
منذ اكثر من 3 سنوات تقريبا

عزالدين عباس الفحل
ابوظبي

Post: #9
Title: Re: الله يستر منك يا ياسر دلو 🤓 ،،،، و هيب
Author: عزالدين عباس الفحل
Date: 08-15-2023, 11:55 AM
Parent: #8

Quote:

قلت ليهو وأديتو قروشو …..!! ؟؟
قال لي أديتو القروش قبل إحتساب الضريبة ….!!
يعني لو خمسين بديهو تلتين …!!
ديل حراميه مستهبلين لازم يطبق فيهم القانوِن …!!
😳😳😳
والله أصفق وأعلق 👏👏
يا أخوانا دا نصاب شنو البعاتي الأنا متابعو دا …!!
قلت ليهو غايتو يا ( ياسر ) يوم اليقبضوك بتعرف الله واحد …!!
قال لي البقبضني منو ….؟؟؟؟؟؟؟
تعرف يا علوب لو مسكت الناس دي كلها بتلقي كميات منهم داخلين ليهم في شخصيات ما حقتم …!!
تلقي الواحد صلا ما بصلي ….!!
وبوستاتو كلها عن تارك الصلاة ….!!😔
وواحدة تبدي استيائها من النميمة والغيبة …!!
وهي وكيل معتمد لي توزيع ( القوالات ) …..!!
وزولك عاملين ليهو كرامة لأنو جا من العمرة ….
وهو نفسو ببيع الغاز سوق أسود…!!!!
قال لي هسع البقالة الغشيناها دي….إنت لاحظت إسمها شنو ..!!؟؟
قلت ليهو ما خليت بالي والله 🤔
قال لي إسمها بقالة ( الحرمين ) ….!!
يقبضو منو ويخلو منو ….!!!!!
أنا يا علوب حمتي دي خفيفة لأني ما بضر زول..!!
كعبين المعلمين الكبار البلعبو بالنار
خليها مستورة يا صاحبي ….!!!
قلت ليهو ودا المصبرني عليك …..!!!!!
خلاني أتلفت الزول دا ….!!
وسرحت أتأمل في هذه التجليات …!!😇
!!
قال لي غايتو الحمد لله أي وظيفة في الدنيا دي عملناها

, ******

،،،،،،

،،،،

***
للعلم فقط :-
لي مداخلة واحدة في اليوم.
منذ اكثر من 3 سنوات تقريبا

عزالدين عباس الفحل
ابوظبي

Post: #10
Title: Re: الله يستر منك يا ياسر دلو 🤓 ،،،، و هيب
Author: عزالدين عباس الفحل
Date: 08-20-2023, 07:46 AM
Parent: #9

Quote:

وسرحت أتأمل
في هذه التجليات …!!😇
!!
قال لي غايتو الحمد لله
أي وظيفة في الدنيا دي عملناها
إلا وااااحدة بس ياعلوب غلبتني والله   ….!!
أنا بي لهفة كدا قلت ليهو …
ودي شنو دي …!!!!؟
قال لي رئيس وزراء...
( البرايمنستا ) شخصياً ……!!
😳😳😳
وانفقعنا ليك بالضحك أنا وهو ….
😂😂😂😂
( ضارب فوق الحنين )
قلت ليهو ما تنقصا لي ( منستر )
قال لي دايماً يا علوب أنفخ الحلم شديد
فعلى قدر أهل العزم تأتي العزائم
( تسمع العزايم تقول عمر المختار )
قلت ليهو إنتا بالذات ….
على قدر أهل النصب تأتي المصايب
يضحك ساااااي
( زولك داير ربطة المعلم   )
*شايفو أول امبارح حااايم
جنب مجلس السيادة * ….!!

الله يستر …!!

يا ربى داير يبقى    ❓

ياربي !!؟؟ 🤔

, ******

،،،،،،

،،،،

***
للعلم فقط :-
لي مداخلة واحدة في اليوم.
منذ اكثر من 3 سنوات تقريبا

عزالدين عباس الفحل
ابوظبي

Post: #11
Title: Re: الله يستر منك يا ياسر دلو 🤓 ،،،، و هيب
Author: عزالدين عباس الفحل
Date: 09-04-2023, 07:32 PM
Parent: #10

.

Post: #12
Title: Re: الله يستر منك يا ياسر دلو 🤓 ،،،، و هيب
Author: عزالدين عباس الفحل
Date: 09-07-2023, 03:37 AM
Parent: #11

عبقرية المسنجر 🤩
وسخرية الانبضاحة
زمن الصغر وطعم الجهل 🤔
زمااااااااان نحن كنا بنسلق شجرة النيم
ونأكل الحنبق😂😂😂
وشليل وينو اكلو الدودو
😂
وحسة نحن م قادرين نسلق البيض 😳
الطموح وقع الدلجة
والبلد اتمزقت   دلقان
واتمرمقت بالتراب
هو شنو الما وقع الدلجة ؟؟؟؟ …!!😇
قلت لصاحبي البرايممنستر
ضحك لمن غمض
وقال لي الشفقة تطييييير
مرة جيت جاري سداري 🏃🏻‍♂️🏃🏻‍♂️ 🏃🏻‍♂️🏃🏻‍♂️ 🏃🏻‍♂️🏃🏻‍♂️
نفسي قايم …!!😇
زي براق الهمبريب 😳😳😳
بالعجلة من محل النقل الميكانيكي
ببحري.
👆🏻👆🏻👆🏻
لحدي سعد قشرة.
اشوف ليك الناس الماعندها طايييوق
انا م قلت قحابة 😳
و م قلت شماسة 😂😂😂
جارية علي …👻
وغفلت علي الدرب
تب.. …!!😇
واتمرجحت العجلة يمين شمال   😰
فقدت التوازن. …!!😇 …!!😇
لقيت قدامي عربي مقطع
بيمضغ في ساندوتش بيرجر 😂😂
بيبيع البرسيم للبهايم. !!!!! …👻
زمن البهايم عظمة 😂😂😂
ووقعت تلب تلب فوق
هضبة البرسيم . …!!😇
وقفزت هتافات عاليات 😂
كصوت السكسفون
النبق النبق النبق ولا الزيتون …👻
النبق النبق النبق ولا الزيتون
😂😂😂
******

،،،،،،

***
للعلم فقط :-
لي مداخلة واحدة في اليوم.
منذ اكثر من 3 سنوات تقريبا

عزالدين عباس الفحل
ابوظبي