لماذا تستصرخ تسييرية المحامين المشبوهة لجان المقاومة ؟؟؟

06:44 PM November, 03 2022

سودانيز اون لاين
Elhadi-
مكتبتى
رابط مختصر

لماذا تستصرخ تسييرية المحامين المشبوهة لجان المقاومة ؟؟؟

انتو كنتو ناديتوهم وقت قاعدين تطبخوا دستوركم المشبوه ؟؟

وبعدين لماذا لجان المقاومة ؟؟

لي ما تنادوا حليفكم حميدتي يحميكم ؟؟

خلي طه عثمان يشد السلك لحميدتي يرسل ليكم تاتشرين تلاتة يحرسوكم !!

موش الدعم السريع عودو راكب في الدستور ده ؟؟

وطيب :)

وبعدين انتو موش كتار وأغلبية زي ما بتقولوا ؟؟

كيف يعني شوية كيزان يحبسوكم جوة الدار ؟؟

لحدي ما في النهاية يجي البوليس ويحرسكم ويفصل بينكم وبين الكيزان

غايتو يا الهادى خسارة تضيع وقتك فى الكتابة فى السوشيال ميديا
كان احسن ليك تشيل عكازك وتنضم لجموع الكيزان الهاجموا مقر المحامين الماعاجبنك ديل

أنا أتحدث عن هذا الجسم المشبوه الذي ظهر من المجهول

و أخذ على عاتقه لعب دور سياسي ـ أو "محللاتي" التسوية السياسية بين العسكر والمليشيات وبين جماعات المصالح في قحت

لوبي المصالح من انتهازية قحت

أصلا ما وقع ليك إنك بتدعم ولو من طرف خفي في عنف وبلطجة لحسم شأن نقابي ؟؟؟؟؟؟
والبخلي نقابة عملتها ديكتاتورية الإنقاذ قانونية ولجنة تيسيرية عملوها جموع المحامين ما قانونية شنو؟؟؟؟
ولا القانون هو ما يريده الكيزان ؟؟؟
زي ما شرعنت البلطجة ودايرين الثوار من المحامين يماشوهم معا بنفس طريقتهم
وحميدتي ذاتو العمل منه حاجة منو غير الديكتاتورية الكيزانية ؟؟؟؟؟؟

Quote: والبخلي نقابة عملتها ديكتاتورية الإنقاذ قانونية ولجنة تيسيرية عملوها جموع المحامين ما قانونية شنو؟؟؟؟

والقال ليك عملوها جموع المحاميين منو ؟؟

ولا هو كلام والسلام ؟؟

Quote: أصلا ما وقع ليك إنك بتدعم ولو من طرف خفي في عنف وبلطجة لحسم شأن نقابي ؟؟؟؟؟؟

لا لا خالص خالص

الكيزان دي فزاعة ما بتشتغل معاي أنا يا نصر

استهلكتوا القصة دي زاتو بزيادة يعني، كيزان شنو، الكيزان تركوا الحكم سنة 2019

والبلد بعد داك أصبحت محكومة بتحالف العسكر والمليشيات مع ثلة من جماعات المصالح والانتهازية في قحت

انت لسة ماسك في قصة الكيزان دي ؟؟

((أنا أتحدث عن هذا الجسم المشبوه الذي ظهر من المجهول

و أخذ على عاتقه لعب دور سياسي ـ أو "محللاتي" التسوية السياسية بين العسكر والمليشيات وبين جماعات المصالح في قحت

لوبي المصالح من انتهازية قحت))
كلامك دا يا الهادى معلق فى الهواء ولافحاهو الرياح
شنويعنى جسم مشوه ظهر من المجهول؟؟؟
عايز تقول الجماعة ديل ليسو محامين ونقابتهم غير قانونية؟
طيب ما دا نفس طرح فلول الكيزان
الفرق بينك وبينهم شنو؟
بطل الشماتة يا هادى الشماتة مرض

((الكيزان تركوا الحكم سنة 2019))

تفضل يا هادى تابع هذا الرابط للاخ كمال عباس لتعرف هل فعلا هناك كيزان اليوم فى الحكم ام لا


لم يتبقي لهم سوي إعادة البشير ودستوره الإنقاذ!ليسو بقضاةبل نشطاءبروب القضاء!

https://sudaneseonline.com/board/510/msg/1667398115.html

الكيزان الفي الحكم هم الكانوا متحالفين مع انتهازي قحت

والذين يسعى انتهازيو قحت لإعادة التحالف معهم من أول وجديد

أما الكيزان الذين تتحدث عنهم انت هنا فهؤلاء أصبحوا لا يهشوا ولا ينشوا

هل الحقيقة البسيطة دي لسة لازالت غائبة عن وعي البعض ؟؟

Quote: شنويعنى جسم مشوه ظهر من المجهول؟؟؟ عايز تقول الجماعة ديل ليسو محامين ونقابتهم غير قانونية؟

وطيب ما دي حقيقة يا حسن فرح

ما يسمى بتسييرية المحامين هي مجرد واجهة سياسية أخرى لانتهازي قحت، وربما كذلك واجهة أخرى من واجهات الجنجويد السياسي

وقد تم تكوينها بواسطة لجنة مشبوهة أخرى من لجان قحت وهي لجنة التمكين المزعومة ولا دور ولا علاقة للمحامين بهذه اللجنة السياسية المحضة والمشبوهة

كل ما اتيت به يا هادى كلام عام معلق فى الهواء
لو عندك ادلة تؤكد ما تقوله فتكرم علينا بها وبالاسماء والادوار

Quote: عايز تقول الجماعة ديل ليسو محامين ونقابتهم غير قانونية؟

غايتو فولكر عشان ما يحرج نفسو في موضوع قانونية لجنة التسيير دي قال إنها بتلعب دور سياسي مهم بغض النظر عن وضعها القانوني.
عن نفسي أجد صعوبة بالغة في الدفاع عن لجنة تسيير نقابة المحامين والتي تكونت بقرار من لجنة ازالة التمكين في ديسمبر 2019 بغرض الإعداد للجمعية العمومية وإجراء إنتخابات لنقابة ديقراطية مستقلة.
خلال 3 سنين اللجنة فشلت في إرساء ممارسة ديمقراطية داخل حدود مهامها ورغم ذلك مشت تكابس ليها في دور ريادي عن ديمقراطية ودستور للدولة بكاملها.

الناس
خرجت ضد نقابة واتحاد الكيزان
والتي. سقطت بسقوط. دستور وموسسات الانقاذ
وهي نقابة سلطوية. - مزيفة ومخجوجة ولاتعبر. عن ارادة المحامين
اما لجنة التيسير
فكان الاولي ان تشرف علي قيام انتخابات حرة ونزيهة
يختار المحامون فيها من يرونه
ولكنها لم تفعل.

يعني ممكن تصدق يا كمال إنه كيزان الدولة العميقة
في الجهاز التنفيذي وفي النيابة والقضائية
حيسمحوا يقيام نقابات مهنية لا تتبع لسلطتهم ؟؟؟؟
ما هو الصحفيين عملوا نقابة بطريقة قانونية ما تخرش المية
برضو ما مخلنها تشتغل
وبعثوا من الموت إتحاد الصحفيين الذين هو صنيعة كيزانية

كل في الأمر
إنه كيزان الدولة العميقة يمهدون الأرض
(بزعمهم)
لعودة سلطانهم
وفي سبيل ذلك يعلمون علي تخدير الشعب كله
بأنهم ذابو في الهواء وأن الكيزان خلاص إنتهوا
علي نهج أذهب للقصر حبيسا وأنت تذهب للقصر رئيسا
قدر ما حذرناكم من سطوة الدولة العميقة
ما إشتغلتوا بكلامنا
وإنشغلت عنهم بقضايا إنصرافية لا بتودي ولا بتجيب
وهم يسنون السكاكين للعودة

((قدر ما حذرناكم من سطوة الدولة العميقة
ما إشتغلتوا بكلامنا
وإنشغلت عنهم بقضايا إنصرافية لا بتودي ولا بتجيب ))
سلام الاخ نصر وشكرا لك هذه هى الحقيقة والاخ كمال يعلم ذلك
يا ليتهم يتركون العناد ويواجهون واقع البلد بحكمة و موضوعية
البلد تنهار امام انظارهم والبعض يتحدث عن بناء الاشتركية

Quote: غايتو فولكر عشان ما يحرج نفسو في موضوع قانونية لجنة التسيير دي قال إنها بتلعب دور سياسي مهم بغض النظر عن وضعها القانوني. عن نفسي أجد صعوبة بالغة في الدفاع عن لجنة تسيير نقابة المحامين والتي تكونت بقرار من لجنة ازالة التمكين في ديسمبر 2019 بغرض الإعداد للجمعية العمومية وإجراء إنتخابات لنقابة ديقراطية مستقلة. خلال 3 سنين اللجنة فشلت في إرساء ممارسة ديمقراطية داخل حدود مهامها ورغم ذلك مشت تكابس ليها في دور ريادي عن ديمقراطية ودستور للدولة بكاملها.

والله العظيم الناس لو أدركت خطورة ما تقوم به ما يسمى بتسييرية المحامين المشبوهة لا يسمحوا لهم بلعب دور سياسي ولو لدقيقة واحدة

يجب أن يكون واضح للجميع وبصورة لا لبس فيها أن الإطار الدستوري الذي تعمل عليه تيسييرية المحامين هو يمثل رأي فئة واحدة فقط،

لكنه لا يمثل الشارع ولا كل القوى السياسية والمدنية

ويجب أن يكون هذا الكلام واضح حتى في شعارات التظاهرات الضخمة التي تخرج حتى لا يتم تجييرها لصالح الإطار الدستوري المشبوه لتسييرية المحامين كما حدث في بيان لجنة العلاقات الخارجية بالكونغرس الامريكي الأخير والصادر في أعقاب تظاهرات الخامس والعشرين من أكتوبر المنصرم في تضليل واضح جداً وسرقة عيني عينك

لجان المقاومة التي حظيت بدعم الكونغرس الامريكي خلال المرحلة الفائتة يجب أن يكون رأيهم وصوتهم مسموع وواضح حيال موضوع الدستور المطروح

هذا الإطار الدستوري ـ لم نشارك فيه، ولا يعنينا ولا ندعمه

لأنو الآن قاعد يتم تجيير المظاهرات التي تخرجها لجان المقاومة لصالح هذا الإطار الدستوري المشبوه

ألا هل بلغت ؟؟

اللهم فأشهد

سلام أخ نصر

Quote: يعني ممكن تصدق يا كمال إنه كيزان الدولة العميقة في الجهاز التنفيذي وفي النيابة والقضائية حيسمحوا يقيام نقابات مهنية لا تتبع لسلطتهم ؟؟؟؟ ما هو الصحفيين عملوا نقابة بطريقة قانونية ما تخرش المية برضو ما مخلنها تشتغل وبعثوا من الموت إتحاد الصحفيين الذين هو صنيعة كيزانية

كان من المفترض حسم موضوع النقابات ـ قانونا وبناءالفترة الإنتقالية
-ومن باب أولي حسم الدولة العميقة ـ ـإستئصالا وبترا
والمدخل لذلك كان مفترض أن يبدأحسم وتحجيم الشريك العسكري