الاخ مصطفى نور....مطلوب تفسير

09:27 PM September, 18 2022

سودانيز اون لاين
Ahmed Yassin-
مكتبتى
رابط مختصر

كتب الاخ مصطفى نور... التعليق التالي في سؤال عن الاخوة البورداب بالمملكة في بوست مجاور: كتب:-
(اولا استجابه الناس ليك زيرو لان اغلب الناس بتاعت برنامج فارغه
الان لو قلت عندك محاضره ومعاك اى قونه بتغنى فاصل فى البرنامج بتاعك
ده كان لقيت الاعمي شايل المكسر والله)
انتهى كلامه

والله انا لي كم يوم متالم ومنزعج من اساءتك دي وحاولت اتغافل واتجاوز لكن ما قدرت.
التوضيح فقط في التعليق الفوق وليس اي شىء اخر لا محاضرة ولا اي شىء
طالما انت حلفت وطلعتتا بتاعين فارغة وقونات... ارجو ان تثبت لنا ذلك.
هل انت ادرى بظروف الناس والسفر من مدينة لاخرى... وهل انت اعلم بنفوس الناس اكثر منهم؟
خليك من محاضرة ولا درس ولا حتى اي مناسبة ما.

بأي حق او بأي مشيئة توجه كلام زي دا للناس
اصلا الواحد ما يحب يتكلم عن نفسه..... بس للتوضيح
انا شخصيا بتلقى طلبات للمشاركة في حفلات تنظيما ومشاركة لفنانات
وانا ارفض...مع انك بتقول العكس ونحن العمايا والمكسرين

عملنا ليك شنو نحن عشان توصفنا بالوصف دا؟
وانت من وين جبت الاساءة دي وتكتبها بكل تاكيد؟

احمد يس يا فنان

انا قريتو لي كم يوم في بوست توفيق

و قلت اعلق .. بعدين غيرت رايي ..

مصطفى نور بحب ينقل و يكتب و بكثره و بقع في غلطات زي دي ..

في نظري هو انسان كويس .. لكن مرات مستعجل ..

يحي يا هندسة
انا متلك جيت اعلق وغيرت الرأي في اخر لحظة...
ورجعت للبوست المعني اكثر من مرة قلت يمكن ما انتبه للكتبه
او اتراجع عن فكرته وانطباعه السيء جدا عن الاخوة والاخوات الافاضل في المملكة

الاخ الغالى احمد يسن
تحيه طيبه
اخى انا عندما قلت الكلام ده
(اولا استجابه الناس ليك زيرو لان اغلب الناس بتاعت برنامج فارغه
الان لو قلت عندك محاضره ومعاك اى قونه بتغنى فاصل فى البرنامج بتاعك
ده كان لقيت الاعمي شايل المكسر والله)
انتهى كلامه
زالله الذى لا اله الاهو لا اقصد ناس الرياض ولا السعوديه ولا اى بلد بعينه انا اقصد فى كل مكان من العالم اوانا عشت فى 8 دول 45 عام والله وبكتب حقائق
انو الجاليات السودانيه فى كل مكان ان كان هناك اى برنامج مافيهو غناء وحفله تجد الحضور ضعيف جدا جدا ولكن ان خلط البرنامج مع غناء وحفله تجد الاف الناس حتى يضيق بيهم
مرات بيكون فى عزاء مثال فى نادى من النوداى السودانيه او محاضره او ليله ثقافيه وتجد الحضور زيرو او ينعدم الحضور ولكن فى نفس النادى اعمل حفله باى فنان كان
واعمل التذكره باى سعر ووشوف الناس بتجى كيف
ونفس الناس القلت انت عندهم ظروف مابيجوا لى شى خيرى او شى ثقافى تجدهم جضور للحفلات
انا شحصييا فى امريكا مثال كان بيكون فى عزاء او ماتم لى ناس معروفين من الجاليه وناس خدموا الجاليه واقوم بالاتصال على كل من اعرف وواخبرهم بان قلان الفلانى توفى واليوم
فى المكان الفلانى الماتم وتجد حوالى اشخاص بالعدد
وفى نفس الوقت بيكون فى حفلات اتذكر ابراهيم عوض سيد حليفه عبدالعزيز المبارك وردى محمد الامين حفلات كابلى عاصم البنا تجد الاف من كل ولايه
اخر شى فى مصر التى فيها 9 مليون سودانى
عندما توفى المرحوم السر قدور واعلنت الوفاء فى كل من القنوات والتفلزيون والصحف والشوشال مديا وكان الجميع عارفين انو الصلاه فى مسجد الحصرى والدفن فى مقابر اكتوبر
والله من صلى عليه وذهب الى المقابر فقط 25 شخص من افراد الجاليه ال 9 مليون نسمه ولكن لو كان السر قدور حييي وعمل حلقه لايف فى استاد القاهره البشيل 100 الف متنفرج كان تجد التاس تقتل بعض عشان الحصول على تذكره
معليش والله انا لم اقصد اى شخص ولا اى جاليه ولا اى مكان بل اتحدث بالجمع
واخى احمد يسن
ياريت نحن نكون صادقين مع انفسننا ونعترف بانو نحن فينا والكثير منا يهتم بسفاسف الامور وانت رديت على البوست وقلت انت مابتمشى الحفلات ولكن شوف حليك البتعرفهم او بتسمع
عن نجاح الحفلات والحفله الفلانيه كانت كيف
وحتى هنا فى المنبر العام وفى سودانيز اون لابن شوف البوستات الجاده مدى القبوول عليها ووشوف البوستات الما جاده شوف القبول عليها
وانا جربت بنفسى كتبت عشرات البوستات ذات الفائده ولم اجد اى قبول ونزلت بوستات نكات مثال وشقت الاف المشاهدات
انا فى الاخير اتاسف جدا ان كنت قد تضايق منى احد والله انا لا اقصد بورداب السعوديه ولا امريكا ولا اى مكان انا اتحدث عامه عن الجاليات السودانيه فى كل مكان
ومتاسف جدا جدا ولكم العتبى حتى ترضوا

مع تحياتى

مصطفى نور

الاخ الغالى
يحي قباني
تحيه طيبه اخى الكريم
والله انا بقول للمره الثانيه انو لا اقصد جاليه اوبورداب اى بلد انا اتحدث عامه والله
والحصل انو التعليق جاء فى اليوست ده
والله الذى لا اله الاهو لا اقصد اى شخص ولا اى بورداب بل اتحدث عامه
عن الجاليات السوداتيه فى كل مكان
ولكم العتبى اخى قبانى وانا ما اظن اكون مستعجل فى شى لانو انا انسان عاقل وبالغ وراشد وعمرى 65 سنه
لما اكتب شى بكون قرات البوست وفكرت فى الاجابه لو انت رجعت للبوست الانا كتبت فبهو التعليق
بتشوف مدى المعاناه والالم والرجاء من كاتب البوست انو يلتقى مع افراد الجاليه والبورداب وانا رديت عليه
بانه الجاليه ولا اقصد انسان بعينه ولا البورداب والله ولا اقصد جاليه السعوديه او غيرها بل اتحدث عامه عن الجاليات السودانيه حول العالم

الاخوه الافاضل
تحيه طيبه
ياريت الناس ترجع للبوست
وتشوف اخر الردود عن الموضوع
حتى لا اكون انا من رميت بحجر وحدى وتانى بكرر انا لم اقصد اى بورداب ولا جاليه انا تحدث عامه
ارجعوا للبوست عليكم الله

https://sudaneseonline.com/board/510/msg/1662759352.html

الاحباب احمد وقبة
كتابات صاحب البوست كانت تستحق الاستيضاح برضو ، غايتو ابو الريش ما قصر :

Quote: أساسا هم 95% ناس ضهاري يفتقدون بعض ذرات اللياقة والزوق لا أكثر

Quote: زيارتي القادمة لابني البطل أحمد توفيق في دبي قبل ما أفكر أصلهم متين البرنامج جاهز لأنه 95% من ناس دبي هم ناسنا ناس العاصمة ده الفرق

Quote: إخواننا في المملكة طبعا بالتجربة كنت عارف حالكم دي المرة التالتة أو الرابعة أهو حالكم ما بتغير

Quote: الناس الفارغة وما عندها لا وطنية لا موضوع هم الببجلوا القونات ويرجوها في المطارات ويعملوا ليهم حفلات في محيط الحرم السودانيين خته رجلي في مصر وقفوا معاي اكتر من وقفة السودانيين لما كنت في السودان والدليل أهو حا اطلع على نايل سات والدعم اللقيتو منهم عشان السودان وطنا الجميل إن شاء الله في ميزان حسناتهم وأي جالية غير مهتمة إلا بالفارغة إن شاء الله ربنا يذيد في البيسووا ده نحن الإيمان صليبنا طالع عشان ننهض بالسودان لينا الله بس وكل سوداني أصيل مأصل عشان السوداني الأصيل سيد واجب ودايما هاش باش مرحب بالزوار قلتو وما خايف من زول الحق في زول بخاف يقولوا

Quote: ناس الضهاري الوهم ديل اقول ليهم السلام عليكم رد ما يردوا

Quote: يا بتاعين القونات

محمد الزبير محمود
اخى الغالى
تحيه طيبه
بارك الله فيك
انا عللت ماقلت انو والله الذى لا اله الاهو هو لا اقصد اى بورداب ولا اى جاليه والكلام القلتوا يتطبق على كل الجاليات اين ماكانوا
والله نصرتنى اخى الغالى

شكرا الحبيب أحمد يس

مثلك استئنا مما كتبه الأخ مصطفي في حق اخوتنا المغتربين الكرام ‘ شكرا أن قمت نيابة عنا بفرض الكفاية.

و نصيحة للأخ توفيق أن "ما هكذا تورد الإبل " يا توفيق و لن أزيد.

ود ياسين تحياتي.
شوف التعليل الفطير لمصطفي دي ياها زاته
دق الاضينة واتعزر ليهو .
توفيق انداح بالاساءات لمغتربين السعودية بعد مداخلة المعني
والتي كانت بمثابة ضوء اخضر.

يا اخوانا البوست دا عن بوست توفيق واللا عن بوست ود رعية؟

Quote: يا اخوانا البوست دا عن بوست توفيق واللا عن بوست ود رعية؟

مقعول يا ابو الريش لسه ما وقع ليك ؟
عن مداخلة لود رعية في بوست توفيق طبعا

يا احمد ياسين
الفنانين عموما معروفين ب رهافه الحس والكلام المكتوب فعلا ما بتبلع لكن لو شفت عموم كتابات الاخ الفاضل مصطفى ستكتشف حسن النية المتوفر ولايعفى الاخ مصطفى من اعتذار واضح على اوصاف غير كريمة جرحت مشاعر الكثيرين
من رأى الناس عموما احرار فى اهتماماتهم ولفت النظر يكون ب اسلوب الطف ودون توبيخ وتشهير....مافى شئ يزعل لو الناس فى الغربة ما اهتمت ب الشأن العام بل التحدى يجب ان يكون كيف تلفت المجتمع المهاجر الى اهمية العمل الجماعى وربط الجالية ببعضها البعض وهناك بشر خصهم الله ب حب العمل العام والابداع فيه
صاحب البوست الاخ توفيق تداخلت معه من قبل وتوصلت ان لافائدة فى التحاور مع قلم عنصرى يشتم الناس ويعيرهم ب مناطق سكنهم ويلجأ الى مزاح ثقيل وفجاء يتحدث عن الاعلام ودور مهم يقوم به لدفع السودان الى الامام يعنى لا تستطيع ان تفهم ماذا يريد ثم اكتشفت ان حرفاء المنبر وشفوت الكتابه تعاملوا مع الرجل ب أريحية وسخرية افرغت الشر والعنصرية الى لغه مستساغه لكن وللامانه لا استطيع اقلد فى امر لا ارتاح له

Abdelrahim Mohmed Salih
اخى الغالى تحيه طيبه
اشكرك على الرد والله انا بعتذر من كل قلبى الى كل اخ جرحت مشاعرو ولكن والله كنت اتحدث عامه
ولا اكثر من ذلك اكرر اسفى للاخ الغالى احمد يسين والذى اكن له كل الاحترام
واتمنى ان يقبل عذرى وكل الاخوه فى البورد وبره البورد انا متاسف جدا
ولكل جواد كبوه وانا اعتذر
وواهدى الجميع

ما عدت قادر انتظر
سامحني غلطان بعتذر.
ما كنت قايل من عتاب تحكم علي ّ
بالوحدة والشوق والعذاب..
انت القبيل شلت الصعاب..
في دربو عديت ألف باب...
لو انت زهو الحسن في عيونك بدا
خليك أمين في العشرة لي آخر مدى..
كيف تنسى لهفة قلبي ليك..
تنسى الحنان الكان لديك..
لو مرّ اسمك في البعيد شايلو الصدى..
بلّ النسايم الحلوة بي قطر الندى..
تلقاني واقف مرتعش ضارع إليك....
عارف تمام ده المستحيل
الحُسن والطبع النبيل..
يغضب يجور..
لحظات خصامو المُره تتمدد شهور..
صدقني لو أغلط معاك دايماً أقول
انت الأصيل انت الوفي..
عن حبي ما ممكن يميل..
يضحك سلام الدنيا في عيونك دليل
من بعدو ما داير دليل
برضو غلطان وبعتذر.

والله يا مصطفى نور انت من الناس السمحين في هذا المنبر العام ...فثقافة الاعتذار معدومة
عندنا عندما نخطئ بدون قصد أو بقصد ..وأظنك قلت الحقيقة بأنك لم تقصد بكلامك جالية
بعينها وان كلامك كان كلام عام ...
وكل أملي ان يتقبل اخونا الفنان المرهف احمد ياسين هذا الاعتذار الجميل ويقول صافي يا لبن،،
لأني أجزم أن زميلنا مصطفى نور من الناس السمحين في المنبر ولم نقرأ له أبدا من قبل أية
إساءة او كلام جارح بل بالعكس كل بوستاته مفيدة ونقرأها مرتين للاستمتاع بالكلام الجميل ..
والله يديكم الصحة والعافية .

مرحب بجميع الشركاء بدون استثناء
وطبعا بالنسبة لاخونا مصطفى نور ...كلمة واحدة تكفي وتوفي وتسعد الروح و القلب المعنى