قصيده حميدتي قال مصدوم !!!السر عثمان الطيب

03:08 AM July, 30 2022

سودانيز اون لاين
مصطفى نور-امريكا نيوجرسي
مكتبتى
رابط مختصر

حميدتي قال مصدوم !!!

السر عثمان الطيب
يوليو 2022م
*
وقال مصدوم؟؟؟
و رب العزة.. انا المصدوم
من الحاصل على الخرطوم
*
وقال مصدوم؟؟؟
و رب الكعبة..
انا المصدوم
من الحاصل علي الوطن الجريح.. مكلوم
*
وقال مصدوم؟؟؟؟
و رب العرش...
انا المصدوم
من الوقعت علي وطنًا بأشباه الرجال محكوم
اراذل القوم...
ناس التوم
و ديك العدة
الجاكوم
و كم دقلول
و أردأ زول
و كم برهوم
اب هاجات
مع البرطوم
كلاب السلطة
والموهوم
*
وقال مصدوم؟؟؟
وحات الفاطر السموات..
انا المصدوم
من الحاصل
على وطناً فسيح ومديد
براح و براح
وطن كان قبْلَكم مرتاح
نصيح وشديد
معافى
قوي و لضيض وحديد
يتاتي يتاتي
من عتراتو ناوي يقوم
لقى الرباطي قانص والطريق ملغوم
مليشياتكم ، شلل.. بالكوم
هلكتوهو
كتلتوهو
حقنتو عروقو
جرثومة وسموم وسموم
و فوق غيركم بترموا اللوم؟؟؟
*
وقال مصدوم؟؟
وحات اسم الله..
انا المصدوم
من الحاصل علي القمري الرحل اسراب
مرق بالباب
ورافقو يوم رحيلو بلوم
وما (مالت فروع البان)
(طرب وسرور)
وما عادت (بلابل الدوح
تغني تنوح على الاغصان)
تفر جنحينا... حرة ، تحوم
حِليلا.. حِليلا
جات نسفت قشيش أعشاشا
صقّار السجم والبوم
وبين حيطان بيوتنا الخالي
صاح ينعق غراب الشوم
*
وقال مصدوم؟؟؟
وحات الصوّر الانسان.. انا المصدوم
على (الغيمة)
المضت متسارعي.. نفس اليوم
و كم قبَّالا رحلت من سمانا غيوم
جفانا دعاش
و جفّ القاش
وفي مجراهو فايضي دموم
و راح (العلّمك يا فراش)
بقيت يا همبريبنا سَموم
*
وقال مصدوم؟؟؟
و رب القدرة..انا المصدوم
من الحاصل على البلد
الغناويها و زغاريدا
سماح عيدا
دليب ، جراري. ، والمردوَم
أهازيج (عشة فلاتية)
(يا حاجة لا) (الله ليّا)
(الليمون سقايتو عليّا)
(الله ليّا)
(ديك طيارة الفانتوم) ..
(الله ليّا)
(جات شايلة القنابل كوم) ..
(جات دار تضرب الخرطوم)
(الله ليًَّا)
(جات ضربت حمار كلتوم).
آهـ.... "ست اللبن" كلتوم
(يا حاجة لاااااا.. الله ليَّا)
*
و نقطة.
سطر أخير .. يا قوم
القول النجيض مختوم
فعل ما مبني للمجهول
مضارع ... و مبني للمعلوم
لا منصوب و لا مجزوم
والفاعل أنِحْنَ و بس
مؤكد (ننتصر).. ذات يوم
أكييييد ... والانقلاب مهزوم
أكيد... الانقلاب مهزوم
قسم باللهِ..
هذا الانقلاب مهزووووم