جولة فى شوارع اديس اببا...قارن بشوارع الخرطوم

06:07 PM May, 07 2022

سودانيز اون لاين
Hassan Farah-جمهورية استونيا
مكتبتى
رابط مختصر

يا سلام يا دكتور حسن فرح .
يا اخي أديس أبابا دي مدينتي المحبوبة والمفضلة وشكرا لنقل هذا الفيديو الرائع الذي يعكس جمال الزهرة الجديدة واحياءها القديمة الجميلة حي بياسا وكاشانشس بطرازها الإيطالي بمقاهيها وهاي هوليت وبولي مكاييل سوق الصوماليين ولحم الجمال ولبن الجمال وشعلة ماركت وميركاتو وصنداي ماركت وسدس كيلو وارات كيلو جامعة أديس أبابا و ساحة ميسكل اسكوير ومتحف أديس أبابا وكاليدي كافيه وايرو شاك وفنادقها الجميلة .
يا لجمال أديس أبابا وناسها

نحن بس لسانا طوييييييل وكمان ما عندنا أي وطنية

نحن بس لسانا طوييييييل وكمان ما عندنا أي وطنية
----------------------------------------------------
الاخ ترهاقا صباحاتك بالخير
صدقت يا اخى فى وصف حالنا
نحن ناس ملعون ابوكى بلد وكل واحد مقدم مصلحته الشخصية على مصلحة البلد وهو لا يدرى ان هذا المسعى لن حقق مبتغاهو مهما فعل
نهاية الامر سيفشل البلد بمن فيه

Quote: واحد مقدم مصلحته الشخصية على مصلحة البلد وهو لا يدرى ان هذا المسعى لن حقق مبتغاهو مهما فعل نهاية الامر سيفشل البلد بمن فيه

سلام
كلام جميل
وُدوورد

الاخ محمد نور عودو ما اسعدك يا رجل الظاهر عليك تمكنت من زيارة بلاد افريقية كثيرة فلقد تحدثت لى عن زيارتك للجزائر فى بوست آخر وها انت تتحدث عن اديس اببا حديث شخص ذى خبرة يا ليتك تتكرم علينا بتفاصيل اكثر عن جيراننا واخواننا الاثيوبيين
انا معلوماتى متواضعة وقديمة زرت اثيوبيا فى صيف 1979 عابرا من اليمن الديمقراطى فى طريقى للوطن فى العطلة الصيفية كان ذلك فى عهد منقستو وكانت حالة اديس صعبة والان ارى كيف طوروا عاصمتهم نظام ونظافة وابراج وحدايق ما شاء الله

اديس بنوها ابناءها مش ملايكة من السماء

انت تعال راجع ابني وطنك

قال اثيوبيا قال

تعديل مع اعتذار كامل للاخ حسن فرح ( ياخي مفتكرك من جيل الهروب لقيتك من جيل السراي السراي الجافو النوم و عقدو الراي ) --- اكرر اعتذاري

الزبير الختمي

تعال راجع ابني وطنك
====================
الزبير الختمى شكار نفسو ابليس
انا القدرت عليهو سويتو
والقصة ما شغل افراد بناء الوطن عمل جماعى مخطط
فى نهاية الستينات طرحت فكرة الخطة الخمسية ووصل للبلد خبراء اجانب فانضممنا اليهم وبدأنا فى جمع المعلومات عن المشاريع السودانية وسبل تطويرها
تجولنا فى كل انحاء السودان وزرنا كل المشاريع الكبرى
للاسف كل ما جمعناه ضاع سدا لان الحاكم قلب بوصلته
لعلمك كنا نعمل بدون مقابل....متطوعون
لكما الرحمة يا برير الانصارى وفاروق كدودة
الصحة والعافية لمن لازال على قيد الحياة

start at 0:23

سلامات دكتور ..

لقيت الفيديو ده برضو

باشمهندس يحى قبانى سلام
يا اخى انا لم اقل ان اديس اببا قد طفرت الى الاعالى وصارت تنافس تورونتو و منريال,,,,,, اديس اببا عاصمة لدولة افريقية فقيرة يفوق عدد سكانها المائة وعشرة مليون شخص وثرواتها متواضعة لا نفط لا غاز لا ذهب حتى امكنياتها الزراعية محدودة لان معظم اراضها جبلية وبالرغم من ذلك منطلقا من مشاهداتى فى اديس عام 1979 وما عرض فى فديو اديس 2022 استطيع ان اقول ان الاثيوبيين نجحوا نجاحا باهرا فى تطوير عاصمتهم رقم الفقر والمجاعات والحروب
لا اقول ان جميع مشاكلهم قد حلت ابدا هناك الكثير الذى يحتاج العلاج
وخير دليل الفديو الذى رفعته انت....لكن يا اخى حتى هذا الفديو يعطى صورة لا بأس بها مقارنة بسوق امدرمان او حتى الخرطوم
هل توافقنى؟

باشمهندس يحى قبانى رايك لو سمحت فى هذا الفديو

مفارقة كبيرة جدا بين شوارع الخرطوم وشوارع أديس أبابا
وفرق شاسع في المقارنة بين الشوارع في الخرطوم والعاصمة المثلثة عموما وشوارع أديس أبابا والشوارع الطرق السريع في إثيوبيا والسودان .
اديس أبابا عاصمة إفريقيا واعتقد تالت عاصمة في العالم بعد نيويورك مقر الأمم المتحدة وبروكسل الاتحاد الأوروبي واثيوبيا دولة سياحية لذلك تجد الاهتمام من قبل الدولة باعتبار أديس أبابا واجهة الدولة ولابد ان تظهر بمظهر جميل وأعتقد كان هناك خطة واضحة من قبل حكومة الرئيس الراحل ملز زيناوي بعد نجاح الثورة وتنصيبه رئيسا لاثيوبيا لتعمير وترميم عاصمة البلاد وقام بضخ أموال كبيرة لوزارة البنية التحية والطرق والجسور والنتيجة ما نراه اليوم من تطور وتنمية .
شوارع أديس أبابا شوارع كبيرة وواسعة ونظيفة وما فيها حفر واديس أبابا فيها شوارع دائرية كباري بتصميم جيد جدا وشوارع أديس ويتم تنظيفها يوميا شوارع أديس أبابا شوراع منظمة بالاستوبات وخطوط عبور المشاه في معظم الشوارع لكن ايضا هناك شوارع تعبانة ووسخانة في ألاحياء الطرفية لكنها احسن من شوارع الخرطوم بالف مرة الفيديو الذي انزله حسن فرح قبل فيديو يحي قباني هذا الفيديو في (شارع بولي دلتي) (ومعناها كيري بولي بالامهرية ) وشارع يمر بغرب المطار في الصينية بتفرع الي اتجاهين الاتجاه الغربي يقودك الي داخل المدينة والاتجاه الجنوبي يقودك الي بولي مكاييل.
البنية التحتية والعمرانية في أديس والطرق والجسور قايمين بعمل كبير وبلا توقف والبلد ماشة في تنمية وتطور بشكل ممتاز وبسرعة.
المبني الأبيض الظاهر في الفيديو دا فندق ومكاتب الخطوط الإثيوبية تم افتتاحه عام الفين وعشرين فندق ضخم وفخم جدا.
اما الفيديو التاني انزله يحي قباني اعتقد من الأحياء الطرفية وغالبا من ضواحي حي قوترة .
وبالنسبة للطرق السريع برضو مافي مقارنة من حيث المساحة والتخطيط والجودة برغم من الجبال والوديان للطرق السريع في إثيوبيا.

اديس أبابا عاصمة إفريقيا.......... الاخ محمد نور عودو شكرا جزيلا على مساهمتك فى إثراء هذا البوست وبما انك عشت فى اثيوبيا وتعرف الاثيوبيين فارجو ان تحكى لنا عن طباعهم وعلاقتهم بالسودانيين المقيمين فى بلادهم على وجه التحديد

اديس بنوها ابناءها مش ملايكة من السماء

انت تعال راجع ابني وطنك

قال اثيوبيا قال

تعديل مع اعتذار كامل للاخ حسن فرح ( ياخي مفتكرك من جيل الهروب لقيتك من جيل السراي السراي الجافو النوم و عقدو الراي ) --- اكرر اعتذاري

الزبير الختمي

اثيوبيا ...تعاني من مشكلة و هي : عدم التوزيع العادل للثروة و الخدمات ...لذا مصيرها الفشل
و ما حركة التمرد ضد الحكومة الإثيوبية في إقليم تيغراي الجبلي ببعيد ........

تعديل مع اعتذار كامل للاخ حسن فرح ( ياخي مفتكرك من جيل الهروب لقيتك من جيل السراي السراي الجافو النوم و عقدو الراي ) --- اكرر اعتذاري
---------------------------------------------------------------------------------------------------------------------------------------
اخى الزبير الختمى ما حصل شئ يستحق الاعتذار
شكرا لك على كل حال

اثيوبيا ...تعاني من مشكلة و هي : عدم التوزيع العادل للثروة و الخدمات ...لذا مصيرها الفشل
و ما حركة التمرد ضد الحكومة الإثيوبية في إقليم تيغراي الجبلي ببعيد ........
========================
الاخ مدثر صديق سلام
عدم التوزيع العادل مشكلة عامة فى افريقيا بل وفى كل بلاد العالم وقد رأيتها حتى فى اوروبا
اما فيما يخص التيجراى فمشكلتهم اخرى متعلقة بالسلطة
التيغراي كانوا يحكمون إثيوبيا على مدى أكثر من 20 عاما تحت راية تحالف يسيطرون على مفاصله، إضافة إلى أن مليس زناوي استطاع السيطرة على التناقضات داخل التحالف مما جعل حتى الذين يتذمرون من سيطرة التيغراي من المجموعات الأخرى يكتمون الأمر، ولم تطف الحالة الاحتجاجية على سيطرة التيغراي إلا بعد وفاة زناوي وانتخاب سلفه هايلي مريام ديسالين، والذي ينتمي لمجموعة تحالف شعوب جنوب إثيوبيا.
وكما يعلم الجميع انفجر تمرد التيجراى بعد صعود ابى احمد واحالته لبعض قادة الجيش التجرى للمعاش ولا يستبعد تدخل ايادى اجنبية فى اشعال الفتنة

سلام للجميع~
تحياتى يا دكتور حسن، وقت بلدهم سمحة جايين مضيقنها علينا فى السودان ليه؟
وبطريقة مختلفة عن أشكال حياة السودانين، وشايفين نفسهم من حقهم كمان.
يوم فى مطار الخرطوم مودعين ، أختى اشترت موية ماسكاها فى يدها وجوارنا أثيوبية واحد من أطفالها قال عايز موية، طوالى أشرت ليه يمشى يشيل الموية من أختى وفعلا جاء قلعها ومن غير إذن.
*طبعا دى حاجة بسيطة وعادى أختى لو عطشانة بتديها للطفل ، لكن الفهم إنه السودانين مساكين ساكت
وغشهم ساهل دى الزعلتنى. يغنوا الأغانى السودانية ويعملوها من تاليفهم مثال قصيدة محجوب شريف غناء محمد وردى يا بلدى يا حبوب
فيها حاجات لا تنطبق على الأثيوبين طوالى سحبوها مثال عبارة نيلك هيلك جرى قدامك، دى غيروها لأنه نهر النيل يتكون فى مقرن الخرطوم، ما بيجرى عندهم!
*إضافة لفرحتهم بإنفصال الجنوب!

إضافة لفرحتهم بإنفصال الجنوب!
-------------------------------------------
بنتنا هدى ميرغنى سلام
قصة زجاجة الماء تصرف شخصى لا يمكن ان نعممه كظاهرة سلوكية لشعب باكمله... لم اعش فى اثيوبيا لفترة طويلة حتى استطيع الحديث بثقة عن اخلاقهم لكن طوال فترة الدراسة والعمل فى الخارج كانوا على علاقة طيبة معنا
عموما معظم معارفى الذين عاشوا فى اثيوبيا انطباعاتهم عن الشعب الاثيوبى ايجابية
فى موضوع الجنوب موقفهم مثل موقف معظم الدول الافريقية
حكومات الشمال اخطأت كثيرا بل اجرمت فى حق الجنوبيين
من الذى خرق اتفاق اديس اببا بين نظام نميرى والجنوبيين؟ اليس نميرى وخلفه الكيزان الذين دفعوا به لاعلان الشريعة؟؟ وماذا فعل الكيزان فى الجنوب بعد اغتصابهم للسلطة؟ هل نسينا مئات الالوف من القتلى هل نسينا كل الخراب الذى لحق بالاخوة الجنوبيين؟

Quote: إضافة لفرحتهم بإنفصال الجنوب! ------------------------------------------- بنتنا هدى ميرغنى سلام قصة زجاجة الماء تصرف شخصى لا يمكن ان نعممه كظاهرة سلوكية لشعب باكمله... لم اعش فى اثيوبيا لفترة طويلة حتى استطيع الحديث بثقة عن اخلاقهم لكن طوال فترة الدراسة والعمل فى الخارج كانوا على علاقة طيبة معنا عموما معظم معارفى الذين عاشوا فى اثيوبيا انطباعاتهم عن الشعب الاثيوبى ايجابية فى موضوع الجنوب موقفهم مثل موقف معظم الدول الافريقية حكومات الشمال اخطأت كثيرا بل اجرمت فى حق الجنوبيين من الذى خرق اتفاق اديس اببا بين نظام نميرى والجنوبيين؟ اليس نميرى وخلفه الكيزان الذين دفعوا به لاعلان الشريعة؟؟ وماذا فعل الكيزان فى الجنوب بعد اغتصابهم للسلطة؟ هل نسينا مئات الالوف من القتلى هل نسينا كل الخراب الذى لحق بالاخوة الجنوبيين؟

تحياتى يا دكتور حسن فرح (أختكم😀)
*لما الناس تمشى أثيوبيا بتكون زيارة سياحة او غيره يعنى بيصرفوا قروشهم عشان كدا المعاملة مشابهة لما تمشى سياحة فى بلد تانى.
مسألة الموية لأنها بخلفيات كاملة، وكانت مكملة لسلوك ما موقف واحد. وعندهم إحساس السودانين مغفلين ، وأنا شايفاها عدم إنتباه مننا.
#مسألة فرحتهم بإنفصال الجنوب، مسألة مصالح لا غير لأنهم هم أشد عنصرية من كثير من السودانين- الأثيوبين فى بعض البلاد مثلا لو هو شغال فى محل وجاء شخص ملون قبل الخواجة بيساعدوا الإنسان الأبيض أولا.
شفت فرحتهم أيام الإنفصال لانه فيه إضعاف وتشتيت للبلد ،وبعدها بدأوا الهجرة للسودان - المسيحين للجنوب والمسلمين للشمال .وما كانوا مبسوطين من ثورة ديسمبر.
*ما عارفة لو جيت السودان قريب يا دكتور حسن ، لكن فى بعض المناطق تلقى نفسك غريب. قصص كثيرة شبابهم بيكونوا شغالين ويعملوا فى القروش وتقريبا كل الرقشات فى السودان ملكهم.
الكيزان فى عهدهم (ما زال) عندهم منتزهات ترفيهية فى شارع النيل فرق الرقص - أثيوبية والغناء خرمجة لأغانى الفنانين السودانين!(شايفاك ما جبت سيرة اغنية يا بلدى يا حبوب😀)
# ولما شبابنا يطلعوا مظاهرات ومواجهة رصاص هم يختفوا.
كل القروش البيعملوها تمشى بلدهم وطبعا حتى فى غير السودان بيعملوا نفس الشئ، لكن بالتأكيد البلاد التانية ما سايبة زى السودان أقل شئ بيشيلوا منهم شوية ضرائب.
*ما عندى أى رأى متكامل سالب ضدهم - لكن انت بس أسأل الأهل فى السودان.

سلامات الأخت هدي ميرغني
مع كل احترامي لملاحاظاتك اتجاه الإثيوبيين قد اتفق معك في بعض ولا اتفق معك في الكثير والشعب الإثيوبي شعب فريد وشعب مضياف .
يا اختي الفاضلة الاثيبوبيين والاثيوبيات الموجودين في السودان هم عمال ياتون الي السودان للعمل لان إثيوبيا بلد سكانها تلاتة أضعاف سكان السودان تقريبا وبلد موادها اقلة من موارد السودان وهم شعب عملي جدا خاصة عنصر النساء
الشعب الإثيوبي الشعب الوحيد في العالم بحترم السوداني ويكن له الاحترام والتقدير لقد زرتا عدة بلاد أفريقية وأكثر دولة أفريقية بزورها وأقيم فيها فترات طويلة هي إثيوبية واديس أبابا بالتحديد لم اري اي نوع من انواع العنصرية أو التمييز بين الناس.هناك آلاف السودانيين عايشين في إثيوبيا يجدون معاملة جيدة من الاثيوبيين ويسهلون لهم مشاكل السكن و الامورالاداراية بدون أي تمييز أو عنصرية.
لجؤء الاثيوبيين او الاثيوبيات الي السودانيين في حالات الحاجة أو غبرها و التقدير والاحترام الكثير للسودانيين قد يعتبر البعض استغلال من الاثيوبيين للسودانيين وان السودانيين ناس سزج أو أغبياء وهذا في تقديري نظرة غير صحيحة الإثيوبي أو الإثيوبية يعتبر الإنسان السوداني جزء منه ويثق فيهو أكثر من اخوهو الإثيوبي .
ولاحظت الاثيوبيين في بلاد المهجر عندما يجدون شخص سوداني يفرحون أشد الفرح .
صحيح فرح الاثيوبيين يوم انفصل الجنوب عن الوطن والشعب الإثيوبي لم يكن الشعب الوحيد من دول الجوار فرح بانفصال الجنوب لكن كل دول منظمة الإيغاد فرحوا بانفصال الجنوب لأنهم وقفوا مع شعب دولة جنوب السودان طيلة فترة نضالهم ضد الانظمة الديكاتورية الشمولية في الخرطوم التي مارست ابشع انواع القتل والقمع وانتهاك حقوق الانسان وارتكبت الجرايم في حق الانسانية من تطهير عرقي وجرايم ضد الحرب ضد ابناء جنوب السودان لدوافع عنصرية بحتة . لكن رغم ذلك كان فرحتهم أقلة من فرحة ناس الخرطوم الذين ذبحو الثور الأسود فرحا ببتر جزء عزيز من الوطن.
فنان إفريقيا الأول الراحل محمد وردي له مكانة خاصة عند الاثيوبيين.
المكان الوحيد الشخص السوداني يلقي نفسه مقدر هو إثيوبيا.
ونتمني ليكي تزوري إثيوبيا وتحكمي.
تحياتي ودمتي بخير

الاخ محمد نور عودو شكرا لك اوفيت وكفيت ودى المحرية فيك
بعد كدا (اختنا) ولو انى اناديها ب (بنتنا)لانى عجوز وبنتى ليلى الكبيرة اصبحت حبوبة ...اقول بعد كدا هدى لازم تقوم بزيارة لاديس وتجى تحكى لنا عن انطباعاتها

Quote: وبنتى ليلى الكبيرة اصبحت حبوبة ...

ما شاء الله يا دكتور!
فى إحدى المرات قلت الناس تبطل يا عم والألقاب عشان تتناقش بعفوية.
عم خليل الياس (له التحية فى عليائه) رد على
والله يا بتى عم خليل ما برفضها وتناقشوا زى ما عايزين😀

بلد جميل وشعب مثقف ... كنت أزورها سنوياً لفترة من الزمن
تربطني بها ذكريات جميلة مع شعبها المضياف.
هيجته فينا الذكريات..
أعرفها شبر شبر، كما الخرطوم.
اولمبيا، ارات كيلو، قوطره، بياساه، ملكاتوا، مكرانجا، مداني ألم، بولي، الم قبي،

بلد جميل وشعب مثقف ... كنت أزورها سنوياً لفترة من الزمن
تربطني بها ذكريات جميلة مع شعبها المضياف.
هيجته فينا الذكريات..
أعرفها شبر شبر، كما الخرطوم.
اولمبيا، ارات كيلو، قوطره، بياساه، ملكاتوا، مكرانجا، مداني ألم، بولي، الم قبي،
----------------------------------------------------
يا مرحبا بك الاخ انس التوم احمد
وشكرا لك على تعليقك الراقى والصادق فى حق جارتنا اثيوبيا وشعبها الكريم
اها يا (اختنا) هدى ميرغنى...شن قولك؟

هم اضافة لنا ؛ هم اثراء لنا.
وضعوا بصماتهم علينا ؛ ووضعنا بصماتنا عليهم.
فى الاكل والشرب.
التحية لكل الجاليات فى بلدنا.
ويجب ان يكون هناك نضال قانونى لقانون جنسية سودانى مرن وانسانى ؛ يمنح الجنسية لكل الاجيال التى ولدت هنا ودرست هنا.
*
من هم الاوغاد الذين اخترعوا الحدود ؟ ؛ ومن هم الذين اخترعوا فكرة الدولة الوطنية السخيفة.
هذه ارض الله ؛ ونحن عياله ؛ نضع قبعاتنا فى المكان الذى نحبه.
قبل ملايين السنين لم يكن هناك سودان او اثيوبيا او ارتيريا ؛ وبعد ملايين السنين لن يكونوا ؛ لكن سيكون هناك انسان.
تسقط الدولة الوطنية ؛ وليحيا الناس.

حبيبنا حسن فرح تحياتي
نحن ضواحي الدنيا لم نعيش في المدن
لكن بعد الاغتراب في السعودية وجدت مدى محبة الاثيوبيين لنا
اصدقك القول أكثر محب للسودانيين هم الاثيوبيين
شعر ذلك من خلال الاحتكاك بهم
بعدين شعب متصالح مع نفسه ليس لهم أي شك في الهوية لا عربية لا افريقية
هم (اثيوبيين ، حيش ) تماما كما الفرس مثال

تحياتي الحبيب حسن

الحبيب على عبدالوهاب مرحبا بيك نورت الساحة
الاثيوبيون شعب ربنا اكرمهم بعزة النفس وحماهم من المستعمرين الاوربيين كلما حاول الاجانب غزو بلادهم باءت محاولاتهم بالفشل نفعهم تلاحمهم وقت الحارة وطبيعة بلادهم الجبلية القاسية
هذه الطبيعة الوعرة المسالك حمتهم ايضا من التأثيرات الاجنبية فنمت ثقافتهم حرة مستقلة معتدة بنفسها
اثيوبيا رغما عن المشاكل الناتجة عن الكثافة السكانية الضخمة وقلة الثروات الطبيعية والخلافات بين الاثنيات المختلفة فانها تشق طريقها بثبات وتتقدم