النشاليين ،،،،،

Post: #1
Title: النشاليين ،،،،،
Author: علوبه
Date: 04-13-2022, 06:58 PM

05:58 PM April, 13 2022
سودانيز اون لاين
علوبه-KSA - Sudan
مكتبتى
رابط مختصر

*بي📝 الحنين،،،،،*
*د. علي الشيخ ،،،،،،،*

*النشالين ،،،،،،*
بخططوا صاح ،،،،، ومنهم تعلم الآخرون،،،
ترجع بيتك تلقى روحك اتنشلت،،، كيف🤔،،،، ومتين⏰،،،،
دي خليها ما شغلتك،،،
زمان النشل في السوق،،، في الزحمه،،، في المواصلات،،،،
دي حتات متفق عليها،،،،
وشويه شويه بقى في المقابر،،،، و المساجد،،،
سرقه و قوة عين،،،
مع السخانه المنطلقه فينا الايام دي *سخانة جو،،،، و سخانة جيب،،،،* و الجهجه الحاصله ،،،،، القصه بقت قلع عديل،،،، و فيها دق كمان،،،
هسه عيني👁️ عينك👁️،،،، لا خوف،،، من المنشول و لا خوف من الحكومه،،،،
الحكومه الفيها مكفيها،،، فارشه ليها بيت بكاء،،، ولي هسه الجنازه ما اتلقت،،،
نشالين زمان محترمين جدا،،،، بس بنشلك،،، اكعب حاجه ممكن يعملها يشرط ليك جيبك ،،،، بي موس،،،، حرفنه و خفة يد 🤞 رهيبه،،،،، تقول بديك بنج💉،،،
تتخيل معاي،،،،
وتبقى وسم وعلامه،،،، للجلابيه ولا البنطلون و تبقى ذكرى،،، ان شاء الله يوم نشلكم ما يجي،،،،
من الأدب و الاحترام بعد تتنشل،،، النشال بشيل القروش و بجدع ليك الجزلان ،،،،،
مش ملاحظين و مركزين معاي انه البتنشلوا زمان بس رجال،،،، حصل سمعتوا انه في مرأة اتنشلت،،، انا بقصد *زمااااااااان،،،،* قبل ما يتنفذ فينا المشروع الحضاري،،،، لأنه بعده اتنشلت بلد و اتسرقت امه كامله،،،،
هسه النظريه اتطورت،،، و فنياتها اتجددت بقى فيها خبت و قلع،،،، و كتل عديل،،،،
هسه انت مارق من البيت،،، تشتغل زي المدرب اللاعب النهائي و الكأس بره🏆،،،، ترجع تقفل باب الشارع،،، و توصي ناس البيت و تتلفت زي الزايق من بوليس الحركه،،،، ديل كمان بنشولك بي قانون عديل كده،،،،
وتركب عربيتك تقفل القزاز و تأمن الأبواب و تفتح الطبلون تتأكد من المسدس🔫 و تعاين تحت كرعينك تشوف العكاز ولا السيخه،،، حتين تنقر السويتش،،،، والله حرب البسوس مابدخلوها كده،،،، وحالتوا الكلام ده العين بتشوف و الناس ماشيين ،،، وجاييين،،،،
كان ضلمت،،، ارجي الراجيك،،، كرعينك و الجري ده ما حقي،،،،
لا بنفع كلب🦮 يهوهو و لا بنفع سلك شايك،،، و لا بنفع طواف بالليل،،، كان قبضوك بغنوا ليك،،، بالليل ده ماشي وين،،، و السطر البعده،،،
*الجوال و الجزلان،،،* واتفكفك ،،،،،
ده النشل و القلع المتفق عليه،،،،
الناس هسه بتتنشل وهي قاعده في بيوتها،،،، مرخمه و جنبها كباية قهوة،،،،
تفتح جوالك،،،،📲
*يجيك خبر مفبرك و مفتشب،،،* تقعد تباريهو و ترسل فيهو ،،،،
كده اتنشلت يا حريف،،، بي جوالك و بي قروشك،،،،
نشلت القروش و سرقة الموبايل بتتحله،،،
كعب ينشلوا زمنك،،، و يسرقوا تفكيرك،،،، وانت راقد في سريرك،،،، مرخم ،،،،
النشال و لا الحرامي كان قبضوه بدقوهو و بتعرف ،،،،
المشكله في الزول النشلك و سرقك،،،، و بعلمك تنشل وتسرق غيرك،،،، وانت مابتعرفوا،،، بقينا زي الدراويش في الحلقه،،، لافين بينا،،،، عكس النوبه،،،،
من ما تصبح،،،،
*عاجلا،،،،،*
*رابط فيس بوك،،،،*
*تسجيل صوتي،،،،*
*فيديو حايم*
و هاك يا بهارات،،،،
وانت يا الحبيب تفتح و ترسل،،،، حار،،،، حار،،،،
لو ركزنا و مسكنا اي خبر،،، حايم و مكرر،،، بنلقي وراهوا،،،، موضوع،،،، مقصود،،،، منه تشتيت و جهجه،،،،
و ده عند ناس الكوره اسمه اللاعب الحريف البتحرك بدون كوره⚽،،، يشغل التيم الخصم،،،، وغيره يجيب القوووووون،،،

*لحدي هسه دخلت فينا جنس اقوان كلها سارق،،،*

*الحكم قابض،،،، و الكهرباء قاطعه،،،*

*و الخوف يا عَالي تسرح طوالي،،، ،،،،،*

*د. علي الشيخ*
*الحنين*
*امدرمان*
*١٣ أبريل ٢٠٢٢*

Post: #2
Title: Re: النشاليين ،،،،،
Author: ABUHUSSEIN
Date: 04-13-2022, 07:16 PM
Parent: #1

د. علي الشيخ
المسالمة و المظاهر و مدرسة محمد حسين
يا زول انت ما معتق عديييييل كدا
كتابة زول ظريف و لطيف و معتق فعلا
موضوع النشالين موضوع شيق جدا خاصة لي زول من امدر
رمضان جاري و نحن جارين معاه لكن بنضاير لينا وقت نشارك و نستمتع بي كتابتك الظريفة دي

تحياتي و رمضان كريم

Post: #3
Title: Re: النشاليين ،،،،،
Author: صديق مهدى على
Date: 04-13-2022, 09:00 PM
Parent: #2

رمضان كريم

Post: #4
Title: Re: النشاليين ،،،،،
Author: ABUHUSSEIN
Date: 04-17-2022, 11:42 PM
Parent: #3

.