تقف المتاريس وشواهد المقابر والشارع في الذكري العاشرة للشاعر حميد

06:06 AM March, 23 2022

سودانيز اون لاين
Osman Musa-
مكتبتى
رابط مختصر

ياحميد ودسالم كيفك

وكيف أحوالك بعد الغيبة

مشتاقين لك وربك عالم

مشتاقين وأشواقنا رهيبة

ليه مستعجل ماشى تسافر

ونحنا حقوقنا منو البيجيبا

نورى هناك خليتا براها

روحتا مشيت فارقتا دريبا

ست الدار مستغربى تحكى

نار الشوق الموقدى لهيبه

قاعدى تردد فى كلماتك

وتهدى غناك لكل حبيبه

وانت هناك فى الأخرة تبشر

وفى الجنات ضارب الترطيبة

ولسه نورا عليك مصدومة

تبكى تنوح فى حالة كئيبه

وحتى الزين ينشد من خبرك

ياحميد بقى حالتو صعيبه

ماأستنيت تديهو الخاطر

فوتا مشيت بى سرعة غريبه

أتارى الموت كان واقف جنبك

بينك وبينو مسافه قريبه

آلا وحاتك بس راجنك

تانى رويحتك لينا تجيبا

تصحى تفيق ترجع من سفرك

وسيرة الموت تنساها تسيبا

حوه يمين ماولدت زيك

انت إنسان مليان بالطيبه

إنت ملاك كلك حنيه

إنت صفاتك ذاتا عجيبه

ماب تتوصف ومهما نحكى

ماب نقدر نوفيها نصيبا

كنت تميل دايمآ للفقرا

وكانت روحك ديمه رحيبه

وياما صبرت عشان العازة

وعمرك كلو دفعتو ضريبة

انت أشعارك نبض الثورة

يقوى صفوفنا يعيد ترتيبا

وكلما الشارع يطلع يهتف

تلقى أشعارك هى الماشيبا

ياأخى تعال كلنا فاقدنك

والثوار فى حالة عصيبه

ماتستغرب لمن أقول لك

لسه العين ماجف نحيبه

حاصل الحاصل حاجة تحير

كل صباح نلقالنا مصيبة

جونا العسكر قلبو السلطة

وانت العسكر عارف عيبا

حكم العسكر مابتشكر

كيفن تانى نعيد تجريبا

يا برهان ارجع سكناتك

إنت خلاص طلعتا صليبا

نحنا خلاص يكفينا مهازل

وكم من أم قطعتا قليبا

نحنا خلاص دايرين مدنية

وانت مكاجر وماراضيبا

نحنا سلاحنا بس السلمية

وانت عساكر ألف كتيبة

اليوم يصادف الذكرى العاشرة لرحيل شاعر الوطن محمدالحسن حسن سالم ( حميد ) فى مثل هذا اليوم من شهر مارس فى العام ٢٠١٢ م
رحل عن دنيانا بجسده وبقي معنابذكراه الجميلة وكلماته الصادقة وقصائده ومواقفه النبيلة
كتب حميد عدد مقدر من الاشعارالذى إستطاع من خلالها أن يعبر عن حال الواقع المرير الذى ظل يعانى منه الشعب السودانى بسبب السياسات الخاطئة والاخفاقات المتكررة للحكومات التى تعاقبت على حكم البلاد والعباد
رحل حميد ولازال جرح الوطن عميقآ ويزداد نزفه بومآ بعد يوم
رحل حميدورحيله كان مفجعآ للجميع ولازالت نورا تحلم بى عوالم زي رؤى الأطفال حوالم لامظاليم لامظالم
ولازال عم عبدالرحيم والضو وحمتووست الدار وعيوشة قابضين على الجمروطال صبرهم
رحل حميد عندما كان الناس يستعدون للاحتفال بعيد الأم وذهب جسد أمة كاملة فى طريق شريان الشمال لكن بقيت الروح تحلق بيننا فدعاة الحق والفضية لايموتون
عشرة سنوات من الحضورفامثال حميدلايغيبون
هو واحد من الذين وهبوا حياتهم لصالح الشعب السودانى وقضاياه وتكريس القيم الجمالية والإبداعية فى الحياة العامة والنضال عبرالكلمة من أجل الحقوق كافة وفى مقدمتها العدالة الاجتماعية والحريات العامة وحقوق الإنسان
لذلك الموت لا يعرف لحميدسبيل فهو مازال يمشى بيننايمنحنا الثبات والصمود والسودانية الحقه فى أبهى صورها وتجلياتها
حميدالبينا وبينو من الالفة ما بين الارض وطورية
حميدالهباد لى غلب اخواتو الفراح عوان الحلى
حميد كان وناس وكان سواي ومو حداس
حميدكان لى ضهرالحبيب حراس ولى اتر البغيب قصاص
حميدكان لى حرد الحبيب حناس تقلتو تخفف البكيات وتتقل خفتو الاعراس لمينة بيت مرق رصاص
رحم الله حميد بقدرماقدم لهذا الوطن الوهيط وجعل قبره روضة من رياض الجنة وأسكنه الفردوس الاعلى من الجنة مع الصديقين والشهداء والصالحين وحسن أولئك رفيقا ٠٠٠
....
منقول .
ونتابع ذكري فاتح الشعر حميد .

المتاريس تنادي صناعها في ذكري الشاعر حميد