زمان الناس

زمان الناس:

اهداء لحاتم صديق بلندن:

زمان الناس:
القصّة دي حصلت بعد خمس وعشرين سنة من حدوثها.
أعتقد أجمل منطقتين في السودان هما مدني وشمبات.
أنا مولود بمدني وعشت أربعطاشر سنة بشمبات.
الشجر في المنطقتين ديل بقوم ساكت وخضرتو مختلفة
يعني لمان حنان بلولو غنت؛
مدني الجمال وأنا ما لي
الخدار مرق لي وداري
البت دي ما كانت بتكضب ولا دايرة بس ترقص.
ولمان طلبة البطري راكبين البص وبغنوا:
شمبات شمال الكبرى
صلاة النبي فوقو
كلية الطب البطري
صلاة الني فوقو
إن شاء الله أبقى كديسة
صلاة النبي فوقو
تكشف عليّ نفيسة
صلاة النبي فوقو
أصلاً أصلاً الطلبة ديل ما كانوا بكضبوا
الحتتين ديل مدني وشمبات، الما عاش فوقن يمشي يقع من الكبرى.
قبل قيام كبري شمبات البربط بحري بأم درمان؛
الناس كانت بتعدي من المرسى بشمبات جنب كلية الزراعة والبطري لأمدرمان عند أبروف وأبروف دي فيها رحاب العاقب الكتبت فيها رائعتي جك الفول.

المرسى دا كلو جناين منقة وهو الغنى ليهو ود مدني إبراهيم الكاشف ليس مصادفة كما يعتقد العابرون، غنى الجمعة في شمبات:
كلما العصفور يغرد
والنسيم يهفو ويبرد
تزدهى الأقمار تورد
واحدة صاحية
وواحدة وسنى
أها واحدة وسنى دي بين صاحية ونائمة ووسنى دي موضوعي، وزي ما قال وردي:
لو لحظة من وسن تغسل عني الحزن
تحملني
ترجعني لربوع وطني يا وطني
المرسى دا غير جناين الكاشف أم خدرة تودر، فيهو حاجة مهمة جداً
ستات العرقي صاحبات الذوق والفرح المعبأ
والجماعة أول ما ينبسطوا بعد الكاس الرابع يغنوا ليها؛
يا سكينة،
كبي لينا
من قزازة الزفت دا
بشيلوا مع بعض وبغنوها بلحن
هسّ أكتب اللحن دا كيف؟
كل زول يشيل ليهو كاس وهو بقرأ، اللحن بجيهو.

الإسلام بالغ في موضوع الخمرة دا، كان يعمل التحريم زي نسبة ناس الشرطة في أمريكا لمان يلقوك سايق عربية،
وزي ما قال المسيح عليه السلام؛
قليل من الخمر يشفي البدن

الكبري وليس الكبرى

بكري المغاس

شنو انت عامل زي البرهان ، ينتقدوهو في الانقلاب

يجيب الكيزان ، ويقولوا رجع لينا العهد البائد

يعمل لجنة مراجعة التمكين ويعيد الاموال الي الكيزان

وكلما يسمع كلمة يزيد زيادة

هسي في ناس لغاية الان زعلانين من كلمة مستنير دي

اها يعملوا شنو مع زميل الطيب صالح

ويعملوا شنو مع المفكر الكبير

ــــــــــــ
اقترح تعمل تسوية وترجع مستنير ساي

مقابل مايتعرضو ليك باي كلمة ....

وماعندهم خيار غير يقبلوا

لانو عارف المرة الجاية بتجيبها (وارمة) بلغة الشباب ههههه

اما بالنسبة لنفيسة الاعجبت ناس شمبات

افتكر دي مجانية اللغة الادبية

ترفع الشئ لمصاف الخيالي من اجل الخيالي ذاته

يعني جمال نفيسة مجرد حالة يتوسل بها الكاتب ليتجاوز

بها نفيسة العابرة في خياله

طلعت من داخلية أم بنين والزمن داك كنت شغال بالكلية، وداخلية أم بنين دي آخر داخلية شمال مجمع شمبات مجاورة للجناين والمرئي والكلية،
اتجهت شرقاً وكنت ماشي الكلية، لكن لفيت شمال بزقاق وسط الجناين يعرفه الذين عندهم علم من الكتاب، في جدول أبو عشرين قعدت فيه،
قدامك شرقاً في مساحة كبيرة مزروعة برسيم وغرباً أيضا وبرضو غرب بتشوف نخل عالي قايم على ضفة النيل،
قعدت متجه شرقاً لأنو تخيلت زول يوم يجي يصورني وداير منظر غروب الشمس وسط النخل يعمل لي خلفية.

جاء واحد فني صاحبي وسكران سكرة بتي كل_ب، وقف جنبي ولابس جلابية وسخانة وسخ برضو ود كل ب.
قلت ليهو وبعاين ليهو من تحت؛
العرقي دا ما شبعت منو؟
قال لي أنا بحب حاجتين؛ الله والعرقي
قلت ليهو علاقتم الاتنين مع بعض شنو؟

المرسى

طلّع من جيبو قروش كتيرة، سلمني ليها وقال لي أرح معاي المرسى وفي الشارع بوريك علاقة الله بالعرقي.
قلت ليهو ماشي المرسى لشنو؟
ما ياهو راسك فل!
قال لي ما داير أزيد، لكن ستات العرقي ديل طالباتني قروش وحسين جاب لي مرتبي هسّ.
قلت ليهو أرجع نوم وباكر نمشي نحل الدين،
رفض رفض الناس السكرانين الصعب داك وقال لي؛
أعطوا الأجير حقة قبل أن يجف عرقه
قلت ليهو عرقه ولّ عرقي؟

حكيت ليكم قبل كدا قصّة صاحبي من كوستي؟
وهو من عشاق العرقي زي صاحبي عُبد الواقف معاي هسّ في جناين شمبات دي.
قال لي لمان أسكر ببقى زول جميل جمال خرافي، وأنا صاحي زول ثقيل وبايخ وشين،
مرتي القصّة بقت واقعة ليها وخلت حق العرقي ضمن ميزانية البيت زيو وزي الكهرباء.
أها هي شغالة في البوليس،
أيام جلد نميري بتاعت العدالة الناجزة،
تكون واقفة في حوش الشرطة وبجيبوا السكارى يجلدوهم
قال لي تقول بحسرة للعسكري البجلد عليك الله براحة عليهم والله لو أنت عارف نعمة العرقي دا؛
ما بتهبش ليك واحد فيهم

قلت ليهو خلاص يا عُبد، نعمل اتفاق؛ أنا بشيل القروش دي بفك ليك الدين، وريني كل واحدة دايرة منك كم؟
وبغشي أجيب ليك أكل وبجيك.
وكنت في هذه اللحظات بكوم لي ليهو مع التقنت كوم تراب في شكل مخدة.
وأنت نوم في مخدتك دي.
قام طوالي اتكرفس ورقد بعد وراني تفاصيل الديون، وهو جسمو قليّل نام زي الطفل.

الحقيقة أنا عملت معاهو الحاجات دي بحضر عشان أغراني بعلاقة الله بالعرقي وما داير أخرب ليهو مزاجو ويرفض يقولها لي أو يقولها لي بدون مزاج.
مشيت لفلانة ولقيت المعمل ملان زبائن قلت ليها عُبد قال دايرة منو عشرين جنيه
قالت لي لا ما عشرين سبعطاشر
حق السكرة الأخيرة دي دفعوا ليهو حسان دا،
حسان سمع اسمو لكن هو خارج شبكتنا، عاين لي بتبلد وما فارز هي بتقول في شنو؟
أديتها عشرين رجعت لي خمسة جنيه قالت لي قول ليهو عملنا ليك خصم جنيهين
قلت ليها والكلام دا كان سنة ٩٢ والله لو مسكوك وزارة المالية أحسن لينا من جبريل دا

جيتو راجع معاي أكل وبيبسي وموية،
صحيتو، قام على الصحن أكل بطريقة السكارى ديك، والحقيقة طريقة أكلم دي لو هم ما سكارى بتشوفها مقرفة، لكن سكرانين بتبقى ليك فيها لحن كدا،
بعد شبعنا مديت ليهو البيبسي وأنا عارف السكارى ديل جنهم وجن المشروبات الغازية
رفض البيبسي بزعل وشال الموية.
قال لي بتعرف أينشتاين؟
لولحت رأسي لتحت
قال هو الوحيد البعرف الله وهو صاحي
والخمرة بتكبر البايتس بتاعت الدماغ.
قلت ليهو؛ لاحظ نحن سنة ٩٢
قال أيوة البايتس
شلتو بفرح طوالي في كتفي وراسه مدلدل بضهري وديتو غرفتو ونومتو في سريرو وقلت ليهو؛
فلتباركك الآلهة

والله، يا أخوانا، قصتي ليكم دي كلفتني ١٢٠ دولار حق الشغل الكنت ماشي عليهو، لكن فجاءة تنزل عليّ والوحي وأنا واقف بالعربية جنب مطعم chick fil A
قمت تذكرت كتابة بديتها زمان وقام أبسن استفزاني بأنو قصصي زي بيت العنكبوت ما معروف بدايتها من نهايتها،
فغضبت غضبةً أضاعت عني مائة وعشرون دولاراً أمريكياً.
بالمناسبة الزول الفي المائة دولار المسرح لورا دا ما رئيس أمريكي دا بنجامين فرانكلين وهو عالم وسياسي ومن المؤسسين لأمريكا،
أما الزول الفي العشرين أب شعر منكوش دا فهو اندرو جاكسون الرئيس السابع للولايات المتحدة

أبسن استفزاني في الفيسبوك
باقي هنا بقيت
أجيب ليكم قصصي بايتة من الفيسبوك بعد أن غادر محمد طه الملك سودانيزاونلاين
ولم يبق إلا لطيف الكافر وإلهامه مادي شويّة

عليكم الله، يا أخوانا، موش لي حق كان أقعد في الجدول متجه شرق؟
وأكون جاهز للصورة بخلفية النخل؟
هسّ كم زول بكون أخد مني اللقطة دي؟
فلتباركني الآلهة

تغيير في العنوان

اها شمبات دي ..
نحن اتربينا فيها
وانت ماشي بشارع المرسى دا في حوش كبير
حق مولانا محمدعثمان الميرغني على شمالك

في بيت كان مأجرو مدير الKLM
لو دا بيتكم معناها أنت لورد ياسين

وما انفك ابوبكر يعصر لنا اعناب الادب والفكر
ويملأ بها دنان المنبر
وعلى نخب المحبة .. كل زول حبة حبة

جمال سرد واحداث …..

"أنا أكتب أنا أتعافى"

و "يتعافى القارئ"

تحيات

Quote: ولم يبق إلا لطيف الكافر وإلهامه مادي شويّة

ههههه اتا ما عارف انا مستمتع كيف لما تقول

(لاحظ نحن في 1992) وتحمل جبريل الان المسؤولية


وكمان الاخلاق الرفيعة لست العرقي وامانتها العالية

انها ما بتاكل (حق الحرام) واصرت ترجع الجنيهان ...

القصة مليانه بالبرادوكس الممتع لكن حبيت اتكلم عن بكري المغاس

يا لطيف،
انت لاحظت أنا خليت الكتابة المباشرة عن الدين،
الزول الخلاني أحل مشكلة الدين مع نفسي هو أنت
ما تقول لي كيف، لكن هديتني لطريقٍ ما
وقاعد أشعر بفضل ليك علي

مظفر النواب؛

مرينا بيكم حمد وأحنا بقطار الليل
وأسمعنا دق اقهوه وشميناريحة هيل
يا ريل صيح أبقهر صيحة عشق يا ريل

قصيدة مظفر دي مدياني شعور عجيب وقالت لي;
هكذا هو الشعر
أي زول ممكن يبقى شاعر بس يعرف الوزنة بتاعت إيقاعه

يا ريل
يعني بيها يا قطار
صيح أبقهر
كورك وصيّح صيحة مقهور
كوراك عاشق يا ريل

ميتينكم على قول شيخ اللمين في صفحة دينا خالد
وميتين دينا دي

أظن بكرة الخميس أو اليوم بالليل ح يحصل تغيير سياسي كبير

يا خالد، أنا ما متذكر شاكلتك متين؟
عليك الله ذكرني قلت ليك شنو؟ ووين؟

ههههه....شكلة شنو يا بكور...طبعا ما حصل...  انا بس شفت ابروف و حبيت اشاغلك شوية 🙂
لك اعتذارا غير مشروط.