كتبت كتير هنا في سودانيزاونلاين وفي أماكن ومواقع تانية عن الهادي حامد الجبل او ود الجبل لا يهم اي الاسمين أصح فابن الجبل بالضرورة هو برضو جبل ولا شنو
يكفي انك تقول الهادي حامد بس ما محتاج تاني اي سوابق او لواحق القاب او تشريفات زي لما تقول كرومة او بادي او ابو عفان ما بتكون محتاج اي Prefixes and Suffixes
الهادي حالة فنية إبداعية تطريبية وتلحينية خاصة جدا
ما عارف شنو علاقة فن الغناء الحقيقي ب فن مهنة الخياطة
عثمان حسين، في نظري انا شخصيا، أعظم ملحن في الدنيا
والهادي حامد كمان ملحن غير عادي
قبل كدا اتكلمنا عن الهادي المطرب صاحب الصوت المتفرد وعن الهادي المؤدي صاحب الأداء العجيب
المرة دي في حضرة الهادي الملحن
ولو لحن اغنيته "المدينة" بس
لكفاه
بالله اي زول interested انه يعرف شنو يغني الهادي الملحن، يدي نفسه فرصة بس يسمع الأغنية دي وخلاص
بالمناسبة المدينة دي من كلمات واشعار حسن السر ودا كمان عالم تاني حسن السر شاعر اغنية بخاف حقت عركي
يتبع
كان الله هون
Post: #2 Title: Re: الهادي حامد - جبل الاكسير العالي Author: Haytham Ghaly Date: 02-22-2022, 04:22 AM Parent: #1
سلام وعوافي ابا ذر
ود الجبل مبدع وصاحب بصمة فنية خاصة وفوق كل ذلك انسان بحق
كانت لنا ايام مع اغنيته الجميلة ما اتعودت اخاف من قبلك
Post: #3 Title: Re: الهادي حامد - جبل الاكسير العالي Author: أبوذر بابكر Date: 02-22-2022, 05:45 AM Parent: #2
صباحاتك خير وعافية وطرب يا هيثم
الهادي حامد حالة استثنائية في غنانا السمح في كل شي وأي شي
اغنية ما اتعودت اخاف من قبلك واحدة من اعماله الساهمت في تكريس حضور الهادي وورت الناس انه في ابداع من نوع وطعم مختلف وجديد
الأغنية كلمات النوبي البديع عزمي أحمد خليل بنفس طريقة خليل فرح في فهمه وتمكنه من العامية السودانية
شكرا ياخ علي تجميل المكان بالهادي وبيك
Post: #4 Title: Re: الهادي حامد - جبل الاكسير العالي Author: اسماعيل عبد الله محمد Date: 02-23-2022, 10:25 AM Parent: #3
ابو ذر سلام
الهادي الجبل مدرسة متميزة في فن الغناء السوداني صوت فخيم ولحن يأسر القلوب وكلمة مختارة بعناية لم يلقى حظه من الاهتمام المطلوب من الاوساط الفنية والثقافية والاعلامية يعتبر التجربة الفنية والارث الغنائي الذي انطلق منه فنان الشباب الراحل محمود عبد العزيز بل يعتبر الهادي الجبل ملهم جيل الشباب من المطربين تجد كل واحد منهم فيه نبرة ولمحة وطريقة من طرائق الهادي اعتقد الغربة خصمت منه كثيراً
Post: #5 Title: Re: الهادي حامد - جبل الاكسير العالي Author: علي عبدالوهاب عثمان Date: 02-23-2022, 11:21 AM Parent: #4
الحبيب أبوذر تحياتي يا جميل يا سلام يوم أمس كنت أقرأ مقال بعنوان :
(( سراج الدين مصطفى يكتب.. أحمد ربشة يسرق طريقة الهادي الجبل!!))
المقال كان في موقع النيلين الاخباري أول مرة أقرأ لسراج الدين مصطفى ربما من الكتاب الشباب ولكن عجبني المقال جداً .. لا أظن أن المقال سيكون موجود في الموقع المهم يحتوي على كلام رائع عن الهادي الجبل
تحياتي الحبيب أبوذر
Post: #7 Title: Re: الهادي حامد - جبل الاكسير العالي Author: أبوذر بابكر Date: 02-23-2022, 12:11 PM Parent: #5
حياك الله يا حبيبنا علي
الهادي يستحق الكتابة عنه ويستاهل تكتب عنه دراسات وابحاث متعمقة من المتخصصين والأكاديميين تدرس كل نواحي ابداعه ومدرستة الفنية الغنائية
نحن في الأول والآخر بنكتب مجرد آراء نابعة من انطباعاتنا الشخصية من منطلق التذوق
ومؤكد بكون في كتابات كتيرة وشاملة عن الهادي لأنه فعلا جدير بالاحتفاء والكتابة عنه
Post: #6 Title: Re: الهادي حامد - جبل الاكسير العالي Author: أبوذر بابكر Date: 02-23-2022, 12:07 PM Parent: #4
تحياتي يا اسماعيل
فعلا ممكن نقول عن الهادي حامد انه صاحب مدرسة خاصة في غنانا
كل شي عنده مميز ومختلف وسمح
يمكن ما لقى حظه في الشهرة والذيوع بالشكل التقليدي الرسمي عندنا في وسائل الاعلام الرسمية لكن مؤكد ليه مكانة عالية عند محبيه وعشاق الطرب الحقيقي والذوق والتذوق العالي
اغتراب الهادي في ليبيا في فترة ماضية اكيد اثر على حضوره الفني وطبيعي ده يحصل لأنه الفنان بكون بعيد عن التفاعل والخلق والانتاج وهو بعيد عن وطنه
Post: #8 Title: Re: الهادي حامد - جبل الاكسير العالي Author: Ahmed Yassin Date: 02-23-2022, 01:14 PM Parent: #6
ضحكة .. وانا فوق نيلك شوفي كيف بغرق ألف نهر ونيل دي بس عينة من كلام سمح... عجيب كتبه قاسم ابوزيد و لحنه الهادي لنانسي عجاج ودا يثبت اننا لسع ما اكتشفنا الهادي حامد الملحن... ولا ١٪ ونوعية الحانه و عنده طريقة مغايرة في الالحان زي ادائه والبوست عن الهادي (الملحن)
Post: #9 Title: Re: الهادي حامد - جبل الاكسير العالي Author: Ahmed Yassin Date: 02-23-2022, 01:41 PM Parent: #8
لحن اغنية ( فاتت) للشاعر الرقيق جدا جدا الطيب برير ما عارف وكيف واي الهام واي احساس عجيب وغير عادي تملك الهادي وخلاهو يلحن القصيدة دي بهذا اللحن البنزل على احساسك ودواخلك كأنه نسمة هواء جنب النيل.... ويخليك نعيش القصيدة بكل جمالها وتفاصيلها .... في الحتة دي: ومن حزني العلي غنيت ضحك في صحوي حزن رؤاها فـــــــاتت يا شوق الولف في غنايا ويا حزن الرحيل في غناها ولو يسعد خطي الترحال بيوسع في مداي اساها مهما يتوه الترحال يهّوم بالغياب جواها فـــــــــاتت اكيد كلام زي دا عايز فنان وملحن بمواصفات الهادي حتن يلحنو ..... ابوذر.... ( يا قهوتك) على وزن( يا قهوتها) حقت قاسم ابو يد ولحنها وغناها الهادي؛ المناسبة ،ان نوعية بوستاتك بقت مزاج .....والهادي حامد يا ابوذر .شيخ الطريقة في غنا محمود عبدالعزيز واستلهام احمد ربشة
Post: #13 Title: Re: الهادي حامد - جبل الاكسير العالي Author: أبوذر بابكر Date: 02-23-2022, 08:16 PM Parent: #9
نادر جدا يا احمد تلقى مطرب مغني متمكن وفي نفس الوقت هو ملحن مبدع
كرومة وعثمان حسين واحمد المصطفى ووردي مثلا
ومن الناحية التانية ابو داود مثلا ما لحن ولا اغنية واحدة طبعا في وجود برعي بكون الحال زي اذا حضر الماء في المقولة السائرة المعروفة
وهنا تلقى الهادي حامد
جمع وفاز بالحسينية
الأداء من صوت وحضور وتطريب والتلحين من تميز وعبقرية وتفرد
Post: #10 Title: Re: الهادي حامد - جبل الاكسير العالي Author: أبوذر بابكر Date: 02-23-2022, 05:38 PM Parent: #8
ازيك يا موسيقار يا ذواق
حبيبنا احمد ياسين
انت جيت هبشت حتة تانية في مجرة إبداع الهادي وهي دقة وعلو اختيار النص الشعري عند الهادي ده موضوع كنت مخطط افرد ليه موضوع منفصل لانه فعلا شي لافت واكيد ما تم ولا حصل عشوائيا ولا بالصدفة
وقليل جدا هم المغنيين البختارو كلمات اغنياتهم وفق معايير معينة زي وردي وكابلي ومصطفى سيد احمد مثلا
زي ماقلت ليك ده محور تاني برضو في كتاب ابداع الهادي حامد
زول في الثمانينات يختار كلمات من حسن السر اكيد ما حيكون زول عادي
وزول يغني كلام قاسم ابو زيد قاسم سيد عباد الشمس اكيد ما زول عادي
وزي ما قال الإمام النفري
كلما اتسعت الرؤية ضاقت العبارة
Post: #11 Title: Re: الهادي حامد - جبل الاكسير العالي Author: Ahmed Yassin Date: 02-23-2022, 07:32 PM Parent: #10
عارف يا ابوذر يا ود بابكر بحكم انك خرطومي وبيتكم قريب من القسم الجنوبي حق البوليس يعني لامي كل الزينيين والسمحين يعني انت اتشبعت وارتويت من عثمان حسين ودا حالة لحنية استثنائية غير عادية يعتبر أعظم مؤلف موسيقي على مستوى القارات وجنبك استاذنا الله يرحمه حسن بابكر حي الزهور.. والقائمة طبعا طويلة وماليها حد اخونا الموسيقار محمد حامد جوار قام بالتوزيع لعدد من الفنانين كان بعزف جيتار في فرقة صلاح بن البادية وهو سبب من اسباب فوز اسرار بابكر بجائزة مهرجان الموسيقى العربية قام بتوزيع اغاني محمود عبدالعزيز وتوزيع اغنيات الهادي حامد وهو اكثر زول خبير وبعرف موسيقى كويس لدرجة انه جاء معهد ااموسيقى وما كمل المهم .. اذا ما كانت الحان الهادي هي قمة وفيها احساس طاغي .. ما كان حيستمتع بهذا التوزيع وهذا الجمال في (افتقدتك) او اي اغنية للهادي بتحس انه هو اكثر طربا من الهادي والاوركسترا البقودها ومن المستمع
Post: #14 Title: Re: الهادي حامد - جبل الاكسير العالي Author: أبوذر بابكر Date: 02-23-2022, 08:32 PM Parent: #11
المنطقة شمال القسم الجنوبي مباشرة في الخرطوم ٣ دي منطقة بيوت أهلنا من جهة الوالدة وكنا بنتواجد هناك بصفة شبه يومية خصوصا في إجازات المدرسة
نحن كنا في الحدود بين فريق الترس وحي المراسلات وتحديدا في المنطقة بين شارع السيد عبد الرحمن شمالا والسكة الحديد جنوب وشرق داخليات كلية الطب
في نفس الشارع الفيهو بيت ناس وليام اندريا وبيتهم كان علي بعد خمسة بيوت مننت ولسه بتذكر يوم استشهاده والله في نص النهار علي يد اوباش الأهبل الاسمو النميري
في الفترة ديك يا احمد في منتصف السبعينات كان في محلين لتسجيل ومحلات "منصفون" للموسيقى
واحد شمال سور الجامع الكبير مباشرة والتاني في عمارة فندق صحارى في الجهة البتفتح علي شارع الجمهورية
كنت بمشي في الاجازة للمحل الفي فندق صحارى بالصباح والنهار والأمسيات واقعد في العتبة القدام المحل عشان اسمع المزيكا الشغالة جوه المحل والمحل كان مخصص لتسجيلات الأغاني الغربية عكس التاني الكان مخصص للأغنيات السودانية الكلام دا مع بداية ظهور أشرطة الكاسيت
بقعد اسمع ولما تعجبني اغنية ونوع مزيكا معين بدخل واسأل الشاب الفي المحل عن اسم المغني او الفرقة
وهناك عرفت الكومودورز وتمبتيشنز وايزاك هيز وديانا روس وباري وايت ومارفن قاي وغيرهم من المبدعين اللسه ساكنين في حشايا الروح
وبرجع ليك تاني لغاية ما نصل للهادي الجبل العالي
Post: #12 Title: Re: الهادي حامد - جبل الاكسير العالي Author: أبوذر بابكر Date: 02-23-2022, 08:09 PM Parent: #8
اظن يا احمد الهادي لحن ل نهى عجاج مش نانسي
نهى عجاج من مدرسة الهادي تماما وبرضها حاجة مختلفة تماما
واتوقع يكون عندها وقع وحضور متفرد جدا في مقبل الزمن الجاي
Post: #15 Title: Re: الهادي حامد - جبل الاكسير العالي Author: Ahmed Yassin Date: 02-23-2022, 09:03 PM Parent: #12
Quote: اظن يا احمد الهادي لحن ل نهى عجاج مش نانسي
كيف يا ابوذر .. انا كتبت ليك فوق اغنيات لحنها الهادي لنانسي منها: ضحكة شمس شرقت اتنفست وردة
Post: #16 Title: Re: الهادي حامد - جبل الاكسير العالي Author: أبوذر بابكر Date: 02-24-2022, 04:28 AM Parent: #15
كيفك يا ابو حميد
يمكن عشان انا ما متابع أعمال وامنيات نانسي عجاج وشفت مرات كتيرة اهتمام الهادي حامد بتجربة نهى عجاج
عشان كدا اتخيلت انه يكون لحن شوية أغنيات ل نهى
Post: #17 Title: Re: الهادي حامد - جبل الاكسير العالي Author: Haytham Ghaly Date: 02-24-2022, 04:53 AM Parent: #8
Quote: وانا فوق نيلك شوفي كيف بغرق ألف نهر ونيل دي بس عينة من كلام سمح... عجيب كتبه قاسم ابوزيد و لحنه الهادي لنانسي عجاج
يا سلاااام ياخ بللاي دي الحان الهادي
الغريبة نكهة الهادي فيها وااضحة لكن نهائي ما خطر ببالي انو هو الملحن
كلمات جميلة ولحن جميل واداء نانسي قمة الابداع
Post: #18 Title: Re: الهادي حامد - جبل الاكسير العالي Author: أبوذر بابكر Date: 02-24-2022, 05:39 AM Parent: #17
ازيك يا هيثم كيف الحال
دا شغل جميل بالجد والله
اول مرة اسمع اغنية نانسي دي يمكن زي ما قلت لأحمد ياسين عشان أنا ما متابع شغل نانسي
كان عندي رأي في اعمالها ونوعية الأغنيات عندها
لكن اتمنى انها تواصل في نفس الطريق دا ومؤكد حيكون ليها حضور حقيقي مميز
ايقاع الريقي بديع جدا وطروب دائما وبدي الملحن براح واسع جدا في التنويع خصوصا في المقامات الخماسية بتاعتنا
موسيقارنا احمد اكيد حيفتي احسن مني في الحتة دى
شكرا ياخ علي الأغنية السمحة
Post: #19 Title: Re: الهادي حامد - جبل الاكسير العالي Author: Ahmed Yassin Date: 02-24-2022, 05:47 AM Parent: #17
هيثم الغالي.... تمرالسوق
Quote: يا سلاااام ياخ بللاي دي الحان الهادي الغريبة نكهة الهادي فيها وااضحة لكن نهائي ما خطر ببالي انو هو الملحن كلمات جميلة ولحن جميل واداء نانسي قمة الابداع
انت جبت اهم نقطة ...هي (نكهة) الهادي في حوالي (٢٠) عمل بين الهادي حامد وقاسم ابوزيد.... طبعا قاسم مسرحي وقصائده مليانة صور حياتية وانسانية وتتميز ببساطة المفردة وسموها .. الهادي قال (الكلمات البسيطة لا أعطيها لحنا معقدا حتى لا تفقد شخصيتها ووزنها وبساطتها وقاسم ابوزيد استاذ في معهد اعداد المعلمات بالدامر. قاسم ابوزيد له مدرسة شعرية خاصة زي ما للهادي مدرسة ادائية خاصة تخرج منها محمود عبدالعزيز المدرسة هي رائدة في استحداث قالب ادائي جديد كليا غير مألوف. بامتياز..والناس ما عارفة ان الهادي ظهر قبل احمد ربشة الذي تاثر هو بالهادي وليس العكس زالهادي اول اغنية عملها (اقول انساك) غنوها البلابل وحيدر بورتسودان
Post: #20 Title: Re: الهادي حامد - جبل الاكسير العالي Author: mohmmed said ahmed Date: 02-24-2022, 08:03 AM Parent: #19
سلام ابو ذر الهادى صديق وود حلتنا استمتعنا معه فى عشرات الجلسات والقعدات الهادى زول مزاج لو طلبتا منو غنية وما استجاب تانى ما تسالو لو فى الحفلة بدا باغنية المدينة اعرف انو اليوم حيجضم الغنا فى الجلسات الخاصة مرات يدندن باغاني لام كلثوم واغنيات شعبية من النيل الازرق ومن غرب السودان اول الحان الهادى كانت اغنية عرفتك ثم اغنية شقة غريبة من كلمات الشاعر المظلوم عبد الرحمن السماني
الفنان ابراهيم موسي ابا برضو ترزى
Post: #21 Title: Re: الهادي حامد - جبل الاكسير العالي Author: أبوذر بابكر Date: 02-24-2022, 08:27 AM Parent: #20
كيف الحال يا محمد وعساك بخير
الهادي كمان في الجانب الانساني من اطيب خلق الله واحسنهم اخلاقا ومعشرا حسب ما عرفت من بعض اصدقائه القريبين
فعلا والله ذكرتني ابراهيم موسى ابا برضو ترزي
ابراهيم كمان حالة فنية غنائية تطريبية ما عادية
الله يرحمه ويتقبله
Post: #22 Title: Re: الهادي حامد - جبل الاكسير العالي Author: قسم الفضيل مضوي محمد Date: 02-24-2022, 09:45 PM Parent: #21
تحياتي استاذ ابا ذر الراجل الموسوعة والمرهف.. وانت برضك جبل اكسير البورد حقيقة والله و دائما قاعد تهبش حتات منسية في حنايا الذاكرة . اتذكر بداية التسعينات انه الهادي وشرحبيل كانوا من داعمي روابط الطلاب بالحفلات الخيرية النهارية في المكتبة القبطية. كان ايام يااااااا الله .. . ..
بعد تنتهي من الهادي حامد ... عليك الله يا ابا ذر عرج لينا على مبدع منسي عنده رائعة اسمها في المدائن الضائعة ضايع لي زمن .. ومعذرة على الإطالة..
Post: #23 Title: Re: الهادي حامد - جبل الاكسير العالي Author: Ahmed Yassin Date: 02-25-2022, 05:04 AM Parent: #22
وعثمان الشفيع ترزي بتاع جلاليب وعراريق ومحجوب عثمان ترزي ابراهيم حسين ترزي الشاعر الامي ترزي محمد حسنين كان بشتغل مع واحد اغريقي في الخرطوم لقاهو فنان في التفصيل قام رسلوا اليونان ليدرس الخياطة دراسة.. وفعلا كان عنده شهادة اوروبية مصدقة وموثقة.
Post: #24 Title: Re: الهادي حامد - جبل الاكسير العالي Author: أبوذر بابكر Date: 02-25-2022, 08:17 AM Parent: #22
العزيز قسم الفضيل صديقنا الجميل
كيف الحال ومشكور ياخ علي التقريظ الما بنستاهلو
انا في المدائن الضائعة ضائع لي زمن غريب عيون سرحان علي الأرض الغريبة وبسأل الشوق عن وطن
دي اغنية الزول البديع احمد شاويش الموسيقار والدارس والمطرب الحقيقي الما بشبه غيرو
برضو أنا كتبت عنه هنا في المنبر قبل كدا كان في واحد من المواضيع اسمه "الأحمدين" كتبته عن احمد ربشة وأحمد شاويش
أغنية بتذكرك دي كلمات الشاعر الجميل محمد نجيب محمد علي
ويمكن الناس ما عارفين انه محمد نجيب هو ابن اخت الشاعر العبقري التجاني سعيد شاعر قلت ارحل ومن غير ميعاد
لكن اوعدك نكتب عن شاويش برضو وشاويش يا قسم محتاج مجلدات والله عشان نوفيه حقه
وبالمناسبة أنا من فترة اديت شاويش خمسة نصوص شعرية عشان يحاول يلحنها المشكلة بس ما كل النصوص الشعرية ممكن تتلحن وتبقى اغنيات لأنه الشعر الغنائي غير الشعر التاني الما مكتوب اصلا عن يبقى اغنية
Post: #25 Title: Re: الهادي حامد - جبل الاكسير العالي Author: أبوذر بابكر Date: 02-25-2022, 08:20 AM Parent: #1
ابداع اكسيري جبلاوي
" target="_blank">
Post: #26 Title: Re: الهادي حامد - جبل الاكسير العالي Author: أبوذر بابكر Date: 02-25-2022, 08:23 AM Parent: #1
بتذكرك احمد شاويش
اهداء للجميل قسم الفضيل
" target="_blank">
Post: #27 Title: Re: الهادي حامد - جبل الاكسير العالي Author: عباس محمود Date: 02-25-2022, 09:08 AM Parent: #26
أبوذر يا جميل أستمتعت بكل ما كتبت بصدق عن حبيبنا الهادى حامد
لى رجاء قبل أن أعود للتعليق بى رواقة.. أرسل لى رقم واتساب على 00971555211942 عشان أرسل ليك لحن جميل وموزع كان عمله الهادى لبلدياتنا عافية حسن... فى الأنتظار. مصر أرسله ليك لأنه الهادى نفسه أتكلم لى بأعجاب شديد عن هذا العمل
Post: #28 Title: Re: الهادي حامد - جبل الاكسير العالي Author: أبوذر بابكر Date: 02-25-2022, 09:58 AM Parent: #27
تحياتي يا عباس وكل التقدير لحضورك السمح
للأسف والله ما شغال بتطبيق الواتس من فترة طويلة الجماعة كلهم بقو مركزين علي باقي تطبيقات المراسلة الثانية واجبرونا نهمل الواتس تماما
اكيد في علاقة جينية إبداعية خلفية . .. الأخ ابوذر نعم جد حاجة تحير. كتير من المبدعين الكبار من الشعراء والفنانين عندنا في السودان شغالين بمهنة الخياطة. وحتي في كتير من بلاد العالم نفس الشي. مع شوية اختلاف في تطور المهنة . عندك في أمريكا مثلا المبدع الضخم ابن نيويورك ( جيزي ) مغني الراب والموسيقى صاحب شركة ركاوير. الرجل من كبار مصممي الأزياء في أمريكا. ونفس الشي المغني شان جون ( باف دادي ) وكتير منهم مصممين ازياء ومبتكرين ماركات عالمية . وزي ما في أمريكا. يا ابوذر في ماركة حلاقة . تسريحة اسمها ( كارل لويس ) برضو عندنا تسريحة اسمها ( ابراهيم عوض ) الشعراء والفنانين في قلوب الناس في العالم كلو . لهم المحبة . وبرجع ليك المبدع المتمرد هادي الجبل . يا حليل شاعرنا خطاب عليه الرحمة كان من أشد المعجبين بهادي الجبل . ربنا يديه الصحة .
Post: #30 Title: Re: الهادي حامد - جبل الاكسير العالي Author: أبوذر بابكر Date: 02-25-2022, 05:27 PM Parent: #29
عزيزنا ابو عفان
تعرف انا كنت ناسي فعلا والله واحد من اساطين وعباقرة الغناء والطرب عندنا وانه كان برضو يمتهن حرفة الإبداع الحقيقي ابراهيم موسى أبا
ذكرني ليهو اخونا محمد سيد أحمد
وبرضو ما كنت عارف انه الشفيع بجلالة قدره العالي كان ترزي
وانت هسي بتزين قلادة الترزية بالكوكبة المنيرة دي من المبدعين
اذن فعلا وحقيقة الأمر ما صدفة ولا حصل ساي كدا زي ما بقولو
وبعيد عن عالم الفن والموسيقى والخلق الابداعي ما اظن في زول بعرف معنى وحقيقة الترزية غيري انا
قول لي ليه وكيف
لاني انا شخصيا ابن ترزي والوالد عليه رحمة وغفران الله كان من زعماء الترزية والخياطين في الخرطوم في السوق العربي مع ناس شبير قلة ومحجوب حسون وسيد عبد العاطي وعبد الله محمد صالح وحسن الشيخ
انا ذاتي ترزي والله وممكن افصل واخيط ليك ما تحب وتشتهي
عشان كدا ما غريب نخبة مطربينا يكونو ترزية
Post: #31 Title: Re: الهادي حامد - جبل الاكسير العالي Author: أبوذر بابكر Date: 02-28-2022, 05:38 AM Parent: #1
" target="_blank">http://
Post: #32 Title: Re: الهادي حامد - جبل الاكسير العالي Author: Ahmed Yassin Date: 02-28-2022, 10:16 AM Parent: #31
اغاني واغاني تقريبا في ٢٠١٣ استضافوا الهادي حامد وبدأ طه سليمان ب "إفتقدتك" بكل سلاسة واريحية في حضور المعلم ... وشارك صباحي وشوية دخل الصوت الرئيس و المجموعة كلها ... والاوركسترا كل العمل يديك احساس بالامل ونوع جديد من خط غنائي جميل مخالف حتى في اللحن والترديد والاداء.. استمتعت المجموعة كلها بالهادي حامد .. ....
Post: #33 Title: Re: الهادي حامد - جبل الاكسير العالي Author: Ahmed Yassin Date: 02-28-2022, 10:24 AM Parent: #32
الهادي حامد غنا لمختار دفع الله(وصوني ليك) قدر يطوع الكلمات ويختها في قالب لحني وكأن الهادي يحيط بيده برفق خصر سيمفونية رائعة الجمال واللحن يتهادىء خلال المعنى يخرج كما اشعة الشمس من بين الاغصان... والقماري الراجعة تسرح لى ديارة ولي صغارة .وصونى ليك. وقالو لي ابقا عشرة علي الاميرة خلي بالك لعيونا وابتساماتة المثيرة و كم سرح خاطر صباحك وعدا في ليل الضفيرة وابقا اكتب للوسامة ولى حلاوة الابتسامة وادعو ياالله السلامة تبقا ما الرحلة الاخيرة