قصيدة في مشهد بت البمبان

03:00 PM January, 14 2022

سودانيز اون لاين
Osman Musa-
مكتبتى
رابط مختصر

بت تعجبك
بت تعجبك .. كف لقفت البمبان لقف
كف ختفت البمبان ختف
ثورية واقفة مع الرجال .
ثورية بتحازي الكتف .
بت جدعة حد الجدعنة
ودا هو الصمود
صدق الشوارع الما بتخون
من الألف
من الألف
بت تعجبك .
برهان كفاك
برهان كفاك
يا برهة ياخ شيك الكضب ما بنصرف.
عاين سمح .. كيف لقفت البمبان لقف .
.. ع musa

https://www.0zz0.com

تعرف يا عثمان،
أيام انتفاضة مارس\ابريل البمبان ما كان قوي كدا.

نحن كنا في الفتيحاب والبمبان كان بفكّوا الاحتياطي المركزي.

الاحتياطي المركزي ما كان عنيف زي الاجهزة الامنية هسع.

والبمبان كان استعمالو ما كتير.
الظاهر كانوا مفلسين في الوقت داك.

البمبان بتستعملوا الانظمة القمعية لقهر الشعوب.
لكن هيهات .
بس الظاهر اكتشفوا انو بمبان زمان محتاج الى تطوير واشياء من هذا القبيل،
عشان كدا يمكن قاموا اخترعوا القنابل الصوتية.
في زمن مارس ابريل ما كان في قنابل صوتية.
....إلخ .....

بعدين البمبان البتستعملوا الاجهزة الامنية،
هل هو من مخازن اجهزة عمر البشير الامنية؟
وهل الدعم السريع عندو بمبان؟
وكذلك حركات الكفاح المسلح؟

وماهي الدول التي يستورد منها السودان البمبان؟
وهل الطرق القديمة في معالجة البمبان مثل استعمال قطع ملابس مبلولة بالماء،
بتنفع مع بمبان الايام دي؟
وهل الثوار عرفوا طرق جديدة للتعامل مع البمبان ؟
ونحنا كيف ممكن نساعدوهم في مواجهة البمبان؟
...إلخ .....

الثوار وخاصة البنات يملكون شجاعة نادرة في مواجهة البمبان.

الشعوب لن تهزم طالما انها تواجه البمبان بصلابة ...

...إلخ ..........

في واحد قريبنا حكى لي كيف لجان المقاومة ناقشت كيفية مواجهة البمبان.

وكيف انهم انتصروا على الاجهزة الامنية وخاصة في الازقة التي يستخدم فيها البمبان...

نشيد بمواقف الثوار في النضال والصمود.

ونعلن تضامننا معهم ضد استخدام البمبان.

وياريت الناس لو قدروا يلقوا طريقة يخاطبوا المجتمع الدولي بخصوص استخدام البمبان في السودان.

....إلخ ....

الأخ استاذ الخواض .
سلامات .
والف شكر على المشاركات في بوست بت البمبان.
السودان يمر بفترة عصيبة يا أخ الخواض .
تخيل ثوار شباب يعانوا من الصرع من تأثير البمبان في لحظات دربكة الكر والفر . تخيل مصابين بكتمة النفس والصرع والرعاف في شارع الأربعين اسعافهم ركشة و موتر سايكل وياريت يسمحولوا ليهم بالمرور بدون عكازين تلاتة. المبمان مصيبة .

Quote: وهل الثوار عرفوا طرق جديدة للتعامل مع البمبان ؟ ونحنا كيف ممكن نساعدوهم في مواجهة البمبان؟ ...إلخ .....

استاذنا الخواض سلام عليكم
كقافه الاستخدام وظهور انوع من البمبان الملون
واستمرار تلوث المنطقه المستهدفه لاكثر من24ساعه احيانا بل حتى الملابس تتلوث وتحمل اثار البمبان
فعلا القصه محتاجه اعلام داخلى توعوى واعلام خارجى يفضح التجاوز فى حقوق الانسان واستهداف اعمقباحداث اثار مزمنه واثار حادة قد يقود الى الوفاه
البمبان مرة اخرى - تساؤلاتالبمبان مرة اخرى - تساؤلات

مرحبا اخونا عاصم
وربك يبعد البلاد من الشرور

كل مداخلاتي كما هو واضح هي سيناريوهات محتملة،
لما يمكن ان يحدث من ثرثرات وقصص وحكاوي على "هامش النص"،
ربما تحت شعار "المواجبة"..

هذه "مواجبة" قاتلة .

ومهينة لكاتب النص وللشعر عموما.

الصمت ، رغم انه من عوامل قتل النص،
أفضل بكثير من "مواجبة" تهين الشاعر والشعر،
بأن تتجاهل ما كتبه وتغرق في السرديات والحكاوي...

Quote: لأخ استاذ الخواض سلامات والف شكر انك جلبتلينا صورة فارسة البمبان. السودان يمر بفترة عصيبة يا أخ الخواض .

اهلا عثمان
خضر هو من جلب الصورة.

سيناريوهات المخترعة هي لتنبيه الزملاء لايقاف الثرثرة على هامش النص الشعري .

لا أملك سلطة الإيقاف بالتاكيد،
لكن مجرد استمرار لنهجي وفكرتي كما جاءت في بوست:
مائدة الشواء الآدمي.

عندنا مثل بقول :
الراجل هينو ،
وما تهين كلاموّ.

وهناك نسخة أخرى من المثل ، لا يمكن نشرها هنا

*ممكن تحوير المثل هكذا:
الكاتب هينو،
وما تهين كتابتو..

Quote: Quote: وهل الثوار عرفوا طرق جديدة للتعامل مع البمبان ؟ ونحنا كيف ممكن نساعدوهم في مواجهة البمبان؟ ...إلخ ..... استاذنا الخواض سلام عليكم كقافه الاستخدام وظهور انوع من البمبان الملون واستمرار تلوث المنطقه المستهدفه لاكثر من24ساعه احيانا بل حتى الملابس تتلوث وتحمل اثار البمبان

اهلا باشمهندس
كل مداخلاتي السابقة هي "اختراع لغوي" من باب السخرية من التعامل المهين غير المقصود مع الشعر والكتابة عموما.

كنت اسخر،
ويبدو انني اجدت الدور تماماً.

يا جماعة الخير:
لا تهينوا الكتّاب بدون قصد !!
دموع تنهمر بغزارة !!

آسف شديد اخي خضر
بعد التحية .
كلنا البمبان إثر على تركيزنا ونحنا في قلب أمدرمان.
ياخ الف شكر يا فنان على جلب صورة الفارسة .
بت ابوها .
ليها القومة .

بت تعجبك
بت تعجبك .. كف لقفت البمبان لقف
كف ختفت البمبان ختف
ثورية واقفة مع الرجال .
ثورية بتحازي الكتف .
بت جدعة حد الجدعنة
ودا هو الصمود
صدق الشوارع الما بتخون
من الألف
من الألف
بت تعجبك .
برهان كفاك
برهان كفاك
يا برهة ياخ شيك الكضب ما بنصرف.
عاين سمح .. كيف لقفت البمبان لقف .
.. ع musa

سلام عثمان موسى فعلت خيرا باشادتك بهذه الكنداكة التى ترد البمبان لكن هناك امثال البرهان داخل هذا المنبر يعملون على النقد الهدام وهم لايفعلون شيئا ود الخواد مثلا ههههه اسأل الله له الهداية فهو رجل مريض فالنظم الذى اتيت به عن تلك الكنداكة نظم جميل والمثل يقول عيب الزاد ولا عيب سيدو ياريت ود الخواد ينظم كلمات فى حق هذه الكنداكة لكيلا ينطبق عليه المثل
عاجز الراى مضياع للوقت ههه
شكرا
اخى عثمان كفيت ووفيت فى حق هذه الكنداكة

عثمان ود موسى
ماعارف ليه انا ربطت بين البت الجدعة وبين(سعاد)
في قصيدة الدوش لمن قال
(أصلي عارف جنها في زولاً بيركز و ينستر )
والفرحة المسكت الدوش او (علي ود سكينة) لمن سعاد بعد الحفلة قالتلو (تعال) نفس الفرحة مسكتنا
ونحن بنعاين في صورة البت الجدعة والبمبان حالنا زي الدوش
( كبرت كراعي من الفرح نص في الأرض نص في النعال)
وشوفتنا يا عثمان ود موسى للبت دي...حصل لينا زي ما حصل للدوش
(وأنا يا سعاد وكتين أشوفك ببقى زول فرشولو فرش الموت وعاش )
طبعا(سعاد) هي الوطن

اخي استاذ أحمد
الموسيقار الجميل والمهتم بجميع الفنون
ليك التحية ياخ.
استاذنا الدوش كان فتح جديد للشعر في السودان .
و ساحة الشعر بعد رحيلو افتقدت أضخم وافخم الشعراء .
انا والله حزين لفقد الدوش .
وبرجع اكلمك عن سعاد .
وعن الحزن القديم القصيدة المبالغة.
وعن الدوش طالب الخلوة في خلوة الدوش بقرية السيال.
الخلوة الفي ما بعد اتحولت لمدارس الدوش .
رحم الله الدوش الشاعر الفلتة.
ومشكور على المرور ببوست بت البمبان الجدعة.

بت يا سلام
بت تسندك
بت تسندك ..
ساعة الزلط يوقد لهب
بت أصلها هي عيار تقيل توزن دهب
بت فتحت عين الشوارع للصمود..
في عركة الزمن الصعب.
بت تفتديها وتعجبك.. ثورية تديك العجب.
بت تسندك .

سلام عثمان موسى وضيوفك الأكارم وشكرا خضر الطيب لوضع الصور التي ألهمت عثمان هذا النص

دور المرأة السودانية في الثورة يشعر الإنسان بالفخر. أعجبتني كلمات مها الجويني من تونس في حق المرأة السودانية.

بت يا سلام
بت تعجبك
نيلية عز
بت خلت الشارع العرض مايج يهز
ما اتلكلكت وكتين تحر
ما اتجهجهت قالت تفز
دي بنية من طين الجروف
دي تخلي جبهة ابوها بالرضيان تنز.
بت يا سلام
...
نتابع

Quote: (وأنا يا سعاد وكتين أشوفك ببقى زول فرشولو فرش الموت وعاش ) طبعا(سعاد) هي الوطن(وأنا يا سعاد وكتين أشوفك ببقى زول فرشولو فرش الموت وعاش ) طبعا(سعاد) هي الوطن

يا سلام عليك يا أحمد يس

اب عفان،
دي ســـــتهن!

بل ســــــــتهم، اي نوع الذكور الزينا، "ناقصي العقل والدين"!!!!

او بعد ده، نسوي "رجالة" لاحظ!!!

عشان كده قدماء الاغارقيق رمشو او جرو واطي!!!

اما حمبرات الرومان، الطيور جو دافرين، دون ادني المام، انطلاقا من انو الكنداكا دي، "حرمة" كما في ثقافتم او كده!!!

امنا اماني نزلت الميدان بي نفسها او قادت جيشا من الامام!!

او لما اصيبت في العين، او طلعوها للعلاج، تاني جات صادة كان لم يكن او قادت جيشا للنصر!!!

العصر الذكوري الحالي تبقت له 19 رغيفة فقط!!

زخم العصر الاموي، قمة هرم البشرية قادم ياضكور، يا ناقصي العقل والدين!!
صعب السوداني يقع ليهو كيف مايسمي دين وضعت اساسو المراة، السودانية، وليس نوع الضكور، المتخلفين!!!

Quote: سلام عثمان موسى فعلت خيرا باشادتك بهذه الكنداكة التى ترد البمبان لكن هناك امثال البرهان داخل هذا المنبر يعملون على النقد الهدام وهم لايفعلون شيئا ود الخواد مثلا ههههه اسأل الله له الهداية فهو رجل مريض فالنظم الذى اتيت به عن تلك الكنداكة نظم جميل والمثل يقول عيب الزاد ولا عيب سيدو ياريت ود الخواد ينظم كلمات فى حق هذه الكنداكة لكيلا ينطبق عليه المثل عاجز الراى مضياع للوقت ههه شكرا اخى عثمان كفيت ووفيت فى حق هذه الكنداكة

اهلا صدّيق

عثمان صديقي اولا وقبل ذلك شاعر.

أنا أدافع عن ابداعه، وأقف ضد الونسات على هامش النص.

وكل ما قمت به كان "اختراعا لغويا" لسيناريوهات الونسات الخارجة عن النص.
وفعلا كاد البوست ان يتحول الى نقاش عن البمبان ولجان المقاومة؟؟؟

معقولة دي !!!

إهمال إبداع الشعراء وغيرهم هو بقصد او بدون قصد إهانة للشاعر .

ومن هنا أشكر احمد يس على المداخلة .

أها شوف بشاشة جاك عشان يتكلم عن المركزية الافريقية ...

وكأن عثمان لم يفعل شيئا ولم ينحت نصا شعريا.

حيجيك واحد تاني يتكلم عن الاتحاد النسائي وفاطمة احمد ابراهيم،
وتاريخ الحركة النسائية في السودان،
ودور بابكر بدري في تعليم المرأة ...

معقولة ؟؟؟

لو كنا لا نعرف الحديث عن النص الشعري او الابداعي،
على الاقل علينا ان نساهم في عدم حرف البوست ،
وإغراقه بمواضيع كثيرة ،
ليس من ضمنها النص الشعري الاساس..

ليست لدي سلطة لمنع الناس من الونسات الجانبية على هامش النص،
كما يحدث في بيت البكا.

على الاقل ونسات بيت البكا، قد تكون لها وظيفة نفسية مهمة:
إعادة أهل العزاء الى الحياة اليومية العادية الخالية من الاحزان.

طيب ونسات البوستات الشعرية والقصصية والابداعية عموما:
ما هي وظيفتها؟؟

اغتيال الشاعر والمبدع بتجاهل ابداعه؟
"مواجبة" ؟

اقترح ان نشيد بابداعه كما ذكرت يا صديق حين قلت:
كفيت ووفيت.
رغم انها لا تقول شيئا عن النص ذا بال،
لكن على الاقل تكفينا شر حرف البوست وإغراقه بمواضيع هامشية.

أجر الجمع والمناولة

النص الشعري متسلسلاً كما كتبه عثمان حتى الآن:

بت تعجبك
بت تعجبك ..

كف لقفت البمبان لقف
كف ختفت البمبان ختف

ثورية واقفة مع الرجال
ثورية بتحازي الكتف

بت جدعة حد الجدعنة
ودا هو الصمود
صدق الشوارع الما بتخون

من الألف
من الألف
بت تعجبك

برهان كفاك
برهان كفاك

يا برهة ياخ شيك الكضب ما بنصرف
عاين سمح ..
كيف لقفت البمبان لقف

بت يا سلام
بت تسندك
بت تسندك ..

ساعة الزلط يوقد لهب
بت أصلها هي عيار تقيل توزن دهب

بت فتحت عين الشوارع للصمود..
في عركة الزمن الصعب

بت تفتديها وتعجبك..
ثورية تديك العجب
بت تسندك

بت يا سلام
بت تعجبك

نيلية عز
بت خلت الشارع العرض مايج يهز

ما اتلكلكت وكتين تحر
ما اتجهجهت قالت تفز

دي بنية من طين الجروف
دي تخلي جبهة ابوها بالرضيان تنز

بت يا سلام

دي صبية ما خافت من الدوشكا
ومواسيرها الكتار
ولا اتلخمت من الكاكي وعكاكيزو الكبار.
ولا الدخاخين والدم المسفوح نهار
دي بنية ردت للعدو.. عفن الظلم والاحتقار
دي بنية فرجت الشوارع
في البطولة لما تلقف ليها نار
دا درب طويل
ودا جيل ترعرع قلبو حار .
دي بنية من طين الظروف.

الأخ الكاتب الكبير بشاشا
سلام
نعم دي ستهن.
الأخ محمد يقول كان ما بعيد من البنية . قال زي 40 دقيقة
والبت تجاهد من أجل حماية الثوار .
40 دقيقة وهي كل دقيقتين تقنص للقف البمبان الخطير.
40 دقيقة من التركيز
تضحية ما بعدها تضحية .

الأخ د. ياسر
وجودك في المنبر مهم في دي الفترة التاريخية .
انت انسان صاحب احساس عالي .
مشكور كتير على متابعة الغناء للفارسة.
وجد هي تستحق الاهتمام.

الأخ المحترم صديق مهدى
سلام
البنية ماشاءالله عليها .
شكلها عندها دراية جامدة بلعبة الباسكت بول .
وعندها توقيت مية المية.
بتعاين للسماء لحظة انطلاق البمبان وبتنتظر مهرولة في الميس الصاح.
تستلمها في الجو تفرفر وتفكها بالضبط مكان جات.
ربنا يحفظها واكيد هي في الفوكس.
بت مبالغة.

صديقنا عثمان متهرب ومتحفظ من الحديث عن دفاعي عن ابداعه.

لو انت تقبل ان يتحول النقاش في بوستك من النص الشعري الى العلاقة مثلا بين "البمبان" و"لجان المقاومة"،
فهذا خيارك رغم "غرابته"...

الصمت لا يجدي ،
لو أخطات ، قل لي وسأعتذر فورا،

لو كانت مسببات التخطئة معقولة.

قال صديقنا احمد يس:

Quote: ماعارف ليه انا ربطت بين البت الجدعة وبين(سعاد)

ثم قال:

Quote: طبعا(سعاد) هي الوطن

طبعا الاحساس لا يناقش،

لكن كونه توصل الى ان "سعاد" عند الدوش هي "الوطن"،
فهذه تحتاج الى دليل او ادلة من النص نفسه.

طيب لو جارينا احمد وقلنا سعاد تشبه متلقفة البمبان في نص عثمان،
وسعاد هي الوطن،
إذن : متلقفة البمبان ن هي "الوطن"..

فلا أعتقد ان النص الشعري لعثمان يحيل الى ذلك.
هذه بنت من لحم ودم.

وإحالتها الى رمز للوطن، لا تزيد من قيمتها شيئاً.

الأخ الشاعر والناقد الفذ الخواض
سلامات
ياخ انت بالنسبة لينا زول منبرجي نعتمد عليه في تصويبنا ونقدنا
زي ما قال لي قبل كده الأخ بروفيسور حيدر بدوي .
في نقاش معاي . بعد حديثك المفيد عن نص بتاعي .
ما تخليك حساس يا اخي العزيز .
والف شكر لجمعك لقصيدة بت البمبان .

الاخوان الكرام أستاذ الخواض والأستاذ أحمد
سلام
ما متأكد من قصة سعاد . لكن عارف قصة اغنية الحزن القديم.
الأغنية العميقة والجديدة و المختلفة عن شعر الغناء في السودان .
اذكر انو الدوش شرح لينا سبب ومناسبة القصيدة .
برجع احكيها ليكم .

نتابع مشاهد بت المبمان

نتابع وصف المشهد

اهلا بالصديق عثمان

قلت يا سيدي في دبلوماسية واضحة للعيان الاسفيري:

Quote: الأخ الشاعر والناقد الفذ الخواض سلامات ياخ انت بالنسبة لينا زول منبرجي نعتمد عليه في تصويبنا ونقدنا زي ما قال لي قبل كده الأخ بروفيسور حيدر بدوي .

هذا كلام عام. ولست "ابا" لاحد، ولا مفتشاً عمومياً ،
بقدر ما اقول رأيي الخاص باعتباره بالتاكيد قابلا للخطأ والتصويب .

يا صديق انا شلت وجه القباحة حتى لا ينجرف البوست الى نقاش عن لجان المقاومة وقضايا المراة السودانية، والمراة في الرسالة الثانية وحضارة كوش إلخ ...

على الاقل بنفس الدبلوماسية كان تقول مثلا:
يا ريت لو ركزنا على الكلام عن القصيدة لو كان في طريقة ...

المهم لو انطلقنا مثلا في قراءة النص بشكل سريع من " العنوان"،
ممكن نقول دي قصيدة عن "مشهد" ، والصور الشعرية المرتبطة به.

في "مشهد" اسفيري مثل هذا:
لا توجد منطقة وسطى ...نقطة.

لكن هناك إشكال "الكثرة" و"الشجاعة" المعروف .

فواضح جدا، وبشكل بيّن،
انه "الكثرة" غلبت "الشجاعة النقدية".
ولذلك آثر صديقنا عثمان الانحياز الى جانب الكثرة.

لست بكري ابوبكر، ولا " أدمن"، ولا استطيع منع احد.

من اراد ان يناقش قضايا البمبان وطرق التعامل معه ..إلخ ،

فليتفضلوا "رجالا وعلى كل ضامر اسفيري "....

ودا ذكّرني بالقصة المعروفة للجيل المخضرم حول امتحان التاريخ ،
و سياسة بسمارك الداخلية والخارجية.
فقبل ان نتحدث عن سياسة بسمارك الداخلية سنتحدث عن سياسته الخارجيه هههههه

فهنا :
قبل ان نتحدث عن قصيدة في مشهد البمبان،
دعونا نتحدث عن "البمبان" نفسه...

ههههههه

اخي الكريم الخواض
سلام
نعم لاتوجد منطقة وسطى .
لكن الكتابة في المنابر صعبة جدا .
..
هاك الحكاية دي .
في سنة 1974 اهلنا عملوا اجتماع جامع لتخفيض تكاليف الزواج .
كان اجتماع جامع من المتمة غرب شندي ولاحدي ام الطيور غرب عطبرة .
الاجتماع كان في ساحة مسجد واسعة في الزيداب .
كانت ملمة عظيمة وفي نص الاجتماع حضروا نفرين مشهورين بالفكاهة وكانوا
شاربين و واقفين لط .
والحديث حتي ديك اللحظة عن تخفيض التكاليف .
حديث كلو جاد .
اها واحد في الجماع رفع اصبعوا عشان يدوهو فرصة
للكلام .
قام قال ليهم يا جماعة اي مسجد في المنطقة عندو ميكرفون
الا مسجدنا دا .
وقعد .
اها في منبرنا الحر الجميل صعب تقول حاجة .
اكيد يكون أجمل وافيد لو الناس ما طلعت خارج الحديث عن المكتوب .
تحياتي اخي الخواض.

تحياتي يا عثمان
وكل الزملاء الحضور

دا نص بدخلك طوالي
وبعد ما يدخل جواك ببدا يتفاعل ويمتزج
وتطلع منه حاجات سمحة كتيرة
دي هي سطوة وسلطة وجمال الشعر

تعرف صور البنية دي مفروض تتعمل ملصقات وتنتشر في الدنيا كلها
ما اظن بكون في نص بصري اكتر تعبيرا من صورها
كل صورة قصيدة
وفي كل قصيدة الف ثورة

عندي سؤال لصديقنا أسامة

هل المفروض يكون التفاعل، سلبا او ايجابا، مدحا او قدحا، مع النص الشعري
من منطلق شعرية النص فقط ام من موضوع النص ام من الاتنين؟

وايهما أوجب؟

الأخ الكريم ابوذر
سلام من الشوارع المكندكة بالدخاخين وعطرابة اللساتك المشوية.
سلام من الميس المحرر تحت أقدام الفارسة .
البنية لفحت كل ملامح النيل السمحة زي ما بتلفح البمبان من الجو.
قالوا يا ابوذر واحد مرضان كورة سحر البنية قال ليها انتي ثوار ولا حامد بريمة؟
لكن طبعا مجاهدة زي دي العين ما بتمشي فيها .
اشكرك كتير على المرور الكريم على النص .
،

اهلا ابوذر

قلت سيدي:

Quote: ندي سؤال لصديقنا أسامة هل المفروض يكون التفاعل، سلبا او ايجابا، مدحا او قدحا، مع النص الشعري من منطلق شعرية النص فقط ام من موضوع النص ام من الاتنين؟ وايهما أوجب؟

طيب خلينا نكون واضحين:
١-مستوى النقاشات في هذا المنبر بخصوص القضايا السياسية والعرقية والثقافية والدينية راق وممتاز جدا،
عندك بوست قباني عن الحلب.
فيه مستوى عال من الحوار الثقافي الرفيع ، نقطة.

لكن هنالك ضعف واضح في جبهة معينة.
ماهي ؟
*التعاطي مع الابداع عموما ، ما عدا الغناء"، يمكن يكون صفر كبير.
وهنالك شواهد كثيرة جدا جدا .

مرة طرحت على القراء والقارئات ان يتقدموا بسؤال للبرنس ، وانا امهد لحوار معه.
النتيجة :
صفر كبير.

هذا يدل على و يشير الى ان مناهجنا المدرسية فشلت فشلا ذريعا في تمليك الطلاب طرقاً لتذوق النصوص الابداعية،
وايضا لغة تمكنهم من التعبير عن ذلك التذوق.

لذلك يعاني الشعراء وكتاب القصة ورسامو الميم والكاريكاتير معاناة ضخمة في هذا المنبر .
والكثير منهم غادروا بدون رجعة.
ومن بقي ، بقي فقط لانه يحب ما يمارس ، و لا يهتم بمزاج القطيع أو قل بالعقل الجماعي الاسفيري اللاواعي.

ولاننا لا نعرف كيف نتذوّق الابداع،
وكيف نعبّر عن ذلك التذوق ،
أو في اسوأ السيناريوهات:
لا نعرف الاثنين معم "التذوق والتعبير"،
يكتفي المتداخلون في الغالب بالحوامة حول النص، او بلغة مناهج التاويل "استخدام النص"،
والونسات، والنقاشات وغيرها من المواضيع التي يمكن ان تجد نماذج واضحة لها في هذا البوست.

وحتى "السيناريو" الذي قمت ب"اختراعه" و"نجره" مشى على الناس وجاز عليهم.
ليه؟
لان هذه عاداتهم في التعاطي مع الابداع:
الونسة على هوامشه.

لا يمكن الكلام عن موضوع النص بدون الاحالة الى شكله.
وإلا فان الكلام عن النص الشعري مثلا سيتحول الى ونسات عن مواضيع ،وليس كيف حول النص الابداعي الموضوع المعروف لنا الى موضوع ابداعي.

طبعا ممكن عقد ترابط بين ما يسمى "خارج النص" و"داخل النص"،
لكن لاحظ ان "داخل النص" هو اساسي في تناول خارج النص.

لو اكتفينا فقط بخارج النص فسيتحول الامر كله الى نقاش في مواضيع أخرى مثل علم الاجتماع والسياسة والتاريخ وغيرها من العلوم.

أحسن البوست يكون خالي من الونسات، لكي يركز الناس على قراءته،
من ان يتم ب إغراقه بمواضيع اخرى،

عندك مثال واضح من هذا البوست:
"مساهمة" بشاشة هنا لا تختلف عن نقاشنا معه في بوست ما عن "المادونات السوداء"...
يدخل بالشعر ، ويمرق بالمركزية الافريقية ههههههههه

الأخ استاذ الخواض
عارفك شايل هم الدفاع عن الشعر واللغة العربية والكتابة.
ووجوب تقديرها .
ودي حاجة ممتازة جدا لو عمت جميع المنابر العربية .
وبقول المنابر العربية بعد متابعاتي القليلة لبعض

المنابر اليمنية والعراقية وكتابات الشعر فيها والمداخلات
المفيدة والملكلكة.
اظن يا اخ اسامة صعب العادة دي تتغير .
ومرات مرات في شتارة لطيفة زي ما قال الفنان اللطيف جورج وصوف.
وزي ما بشاتر الفنان الجميل عادل امام ويطلع ويطوح
خارج النص المكتوب .
في سنة 2003 كان في اتلانتك سيتي في أمريكا و عمل مسرحية. الزول دا
زي ربع ساعة وهو خارج النص والناس كانت مستمتعة .

Quote: اظن يا اخ اسامة صعب العادة دي تتغير . .

اهلا

ممكن تتغيّر.

ولو ما اتغيرت حيعرف الناس انو في شيئ غلط.
ما هو؟

انهم لا يعرفون التعاطي مع الابداع، وقد يكون لا يتذوقونه،
أو يتذوقونه، لكنهم يعدمون الندرة على التعبير*.

بس المهم انو نحن "الكتّاب"- أصحاب الوجعة الحقيقية،
ما نجامل،

ونوريهم ان هذا التعاطي مؤلم،
حتى ولو حسنت النوايا.

*ولو نحجت "ثورتنا" ندرّب ابناءنا وبناتنا على تذوق الابداع والتعبير عن ذلك.
يبدو لان مناهجنا تعتمد على التلقين، ترى في المنبر "نكسة " حقيقية في التعامل مع الابداع.

في حماية سلمية نهار 17 كان ستهن كانت حضور .
وكانت حرس
وظلت ترس
وظلت يبق بق من جمال سحنتها نور
وظلت تدافع صلبة في أول خطوط
رغم الدهس
رغم الخصومة المره
والجور والفجور
الزولة ما برحت تمد الايد
وتلقف . ومطرة النيران تدور
جد ستهن
كانت درق
جد ستهن البت دي حور
سموها مهرة دنقلا
وسموها نيل
وسموها كف
واتفقوا خلوها التنضف والتثور
يا ابوذر اخوي ياخ دي البنية
الاصبحت الليلة قايدنا الجسور
البت دي صبحت ثمبلة
في حشاها آلاف السنابل تتولد وتصير
قناديل للدرب وتصير بدور
صبحت دي في خانة الكبار
ناس دقنة.
ناس علي ود فضل .
والقرشي.
ناس ست النفور
البت بتحمي ضهرنا من فلس القوانيص الفنانيص والكجور
البت تقالد في الحريق زي البخور
صاح ستهن واريتها ياخ بت السرور .
اريتها جد بت السرور
ع musa
17

نتابعها لها التحية مربعة

في سلمية 17
كانت هي في
كانت حضور
كانت برد
كانت سلام للراكزات والراكزين
كانت سماحة وروح ودين
هدت فلول المفسدين
كانت غطاء شعب الشوارع المابتخون
و الله المعين.
دي بنية من طين الجروف
منكبة في فداية الشوارع
في النهار تحاحي قناصها اللعين
هي بنية ما بنية نصاح
ركزت هنا
وترت هناك
باقيالنا عين
باقيالنا عين.
..
ع musa
17

17
في دا النهار
كانت حضور
كانت قصاد الدوشكا
في الشارع تقيف
صبت حماية
من حماياتو الرصيف
كانت طمأنينة
وسلام
شعلة بتنور لا بتفتر لا بتقيف.
بت تسندك
وطنية والدم الخيف
نيلية في عمر الزهور
في الحارة باقيالهم صريف
ياخ دي القنابل ما بصدها
غير شجاع
وغير ممرن وغير حريف.
الشكر ليك يا بتنا
يا بانا يا الفرع الوريف.
...
ع musa
17

نتابع مشهد بت البمبان

بت تسندك

نتابع

بت تعجبك
بت تعجبك .. كف لقفت البمبان لقف
كف ختفت البمبان ختف
ثورية واقفة مع الرجال .
ثورية بتحازي الكتف .
بت جدعة حد الجدعنة
ودا هو الصمود
صدق الشوارع الما بتخون
من الألف
من الألف
بت تعجبك .
برهان كفاك
برهان كفاك
يا برهة ياخ شيك الكضب ما بنصرف.
عاين سمح .. كيف لقفت البمبان لقف .

نتابع