تراجــيـديا بلـــد النّكـــد .. مأسـاة ( ســت النّسَاء ) دار السّــلام !!

08:20 PM January, 07 2022

سودانيز اون لاين
awad hassan-USA
مكتبتى
رابط مختصر

تراجــيديا بلـــد النّكـــد .. مأسـاة ( ســتْ النّسَاء ) دار السّــلام !!
..........................................................................................

الإسم .. دار السّلام أدم العِبيد
اللّقب .. ست النّساء
دار السّلام .. ست النساء .. إمرأة كبيرة في السّن ، في أواخر عمرها الذي كان حافلاً بالفقرِ وشظف العيش والمعاناة الدائمة بسببِ أوضاعِ السّودان البائسة في ظلِّ بؤس ووضاعة الحكومات المتعاقبة . دار السّلام تعيش وحيدة في بيتِ طينِ قديم آيل للسِقوط ، حالها يغني عن سؤالها كإنعكاس لحال هذا البلد التّعيس . أنعكس حال دار السّلام أيضاً على ديكها العجوز الزّعور( أمعط الرّيش ) وكديسها الأعور الجّربان اللّذين يقاسمانها ضيق السّكن وشقاء وعنت ظروف الحياة . كان الديك والكديس في صراعٍ مستمرٍ دائم بينهما ( مُفصّل في القصيدة ) بسبب غريزة البقاء ، حيث كان الحال مشتعلاً بالعداء والأنانية والغيرة والأستحواذ بدل المشاركة فى القليل من الطعام الذي لم يكفل لهما حالة من التعايش السّلمي . أشتهرت دار السّلام بأقوال حكيمة ( باكر ببين الزّيف .. ينكشف الغُطا وينقدّ كل رهيف .. العود بنكسر من وين سَرِيحو ضعيف )( المرض البِعقب الكَي .. شن المعنى في زولاً حي قلبو ميت وعقلو ني )( وين اليقين .. في بلد أسياد مُلاك ومُلك يمين ؟) ...ألخ
كل ذلك وغيره في هذه القصيدة الطّويلة التي سوف يتم إنزالها في مقاطع متتالية ..
ملحوظة :- القصيدة نشرت بعنوان مختلف في في ديوان ( نوستالجيا بحروفٍ من رماد ) الذي صدر مؤخراً بالخرطوم ...
..................................................................................................................
( مابَابَا المِسِــكِين والفقـــــير بِفقـــرُو
ماعـواس قُـــوُالَة ومارفيـــقي بَعقــــرُو
بَنــزِل لُجــة الوادي البِتيتِب صقــرُو
قلبي مكجّن النّاس السّوا وبِتنَقرُو)
( شاعر مجهول)
.........................................
النّص :-
ست النّســا .. دار السّـــلام
كوّعــــَت تــــــال اليمـــــين ...
خَمشتْ طَرف توب الزّراق
مسحت تَعب عَرَق السّنــين
السايلة فوق شَــرف الجّبين
حُـــوقـَلتْ وإستغــــفرت .....
غمغــمت بكــــلام دفـــــين ..
" يوم إعصار ويوم فيضان
يــوم زلـزال يــوم بركــــان
يــوم عربيّـــــه منســــــوفه
يـــوم طيـــّاره مخطــــوفه
حــــروب عرقــيّة عـدمــيّة
حــــروب دينــــيّة عبثــــيّة
صراع وقـــتال بإسـم الدّين
مصــايب الدّنـيــا مقــرونة
جاتــنا كـــرونا مجنـــــونة
زادت حـالــنا ( بِلـّة طــين)
صــارت روحـنا مـرهونة
بِقــــينا نشــــــيل ونِــــــدّرق
ورا وقِــدام شمال ويمـــين
مُصـيبة بُكــرَه وبعد بُكرَه
ما معروف تجيك من وين !؟
زمـن عجيب زمـن مُهـِين !
الغُصّــة تطعــن في الحَــلِق
مرات تغوص في الدّمـوع
جُـــوّه الشــــرايين تِنغــلق /
زمـــن ضـــــنين ..!
.......................
نواصل

دار الســـّلام .. ست النّســا
همهَمتْ بي كلام حصـيف :
" سِر عوج الكلام تحريف !
مادام الصّيف بعقبو خريف
باكر ببين الزّيــف
ينكَشـــف الغُطَــــا
وينقدَّ كلَ رهــيف
والعود بنكــــــسر
من وين سريحو ضعيف !"
ست النّسا ..
نظرتْ بعيد واتشَـــهّدَت
سرحــت تعيد تاريخ بلد
حفظت مصايبو عدد عدد ..
حكــــم التُرُك واللِنقلِـــيز
الجِبايات .. الحِكـــــايات
المشايخ ... العمد
المجاعات الحُروبات
العساكر ... المــــناكر
عدد الحـكومات النّكــــد !

دار السّلام ...
أملاكا ديك أمعط عجوز
كديس أعور جربان
مترين قماش وحبة حنوط
داخراهو لي ود اللّحـــد /
دار السّلام
كان أمنياتها تعيش رغَدْ /
معذورة يا ســت النّساء
عملتي كل الكان عليك
في دنيتك أخلصتي جد/
إلا الرّغــد ما أُمنــَيات
وطبع الزّمن ما بحابي حد
في بلد غرقان يقابـض فـي الزّبـد !
نواصل

كل سنة وانت طيب ياحبيب
كلام جميل
واصل

تحياتي وتقديري الصديق العزيز/ صديق مهدي علي
كل عام وأنتم وجميع الأسرة بألف خير

دار السّــلام ...
سرحتْ بعــــيد واستغفرتْ
مسحتْ غلاوةَ الدّمعــــتين
عِينها وقــعت في الكديس
تِحِتْ حِبـــال العنــــقريب
راقـــــد حــــــــزين /
الدّيك عَقف رِجـلو اليمين
وقف علي ســاقو الشَمـَال
فــي خاطــــــرو جَـــال
قَرَأ في عيون دار السّلام
مليون ســــؤال ...
كركر ودَنقَر في الأرض
نقد التُّرَاب مرتين من غير عَمِدْ
كَأنّو ببحث عن يقـــــين
وين اليقــــــــين !؟
في بلد أسياد مُلاك ومُلك يمين ؟
وين اليقين ؟
في دنيا معدومَة حنين ؟
وين اليقين ؟ وين اليقين ؟

الحمدلله بخير الاخ الحبيب
ارمى لقدام
خليك مع دار سلام
دارا عامرة من غير كلام
لهامنى كامل الود
والاحترام
فوتك عافية
يا سلالة الكرام

إبداع يا ود الخال
دي ملحمة مسكين
في وطن مغبون

(إبداع يا ود الخال
دي ملحمة مسكين
في وطن مغبون ) quote
تحياتي وتقديري عزيزي عماد لكم ولجميع الأهل
كمية الحزن الدفين والمعاناة التي أحملها منذ خروجي من السودان ذلك ماينعكس في هذه القصيدة الحزينة وغيرها من إنشغالي
بماهو مأساوي في وطن مغبون ...

دار السّلام سرحتْ بعيد ..
همهمتْ بِكلام دفين :
" بحراً نكر أمواجو
شرّ رمالو تحت القَيِف
رقَد وسنان ده ماهو بحر !
شدراً مَلَخ فرَاعُو
لاعارف خريف من صيف
وقف نشفان ده ماهو شَدرْ !
قمراً مابيّض سواد الليل
متل شُخُب الحليب
كسا القيزان ده ماهو قمر !
مطراً برقو كفيف
دمعو طفيف ورعدو خفيف
لا دَودَو ولا كَركَر
روَىَ الوديان ده ماهو مطر !
المرض البِعقبْ الكَي
شِنْ المَعنَى في زولاً حَيْ
قلبو ميت وعقلو ني ؟
نواصل

دار السّلام
زجَرتْ عَنَتْ سيل الدِّموع
إتذكّرت حال الكديس والدّيك وألم الجّوع /
سَندتْ يسارها
عليِ كراع العنقريب
قاومتْ وجع المَفاصِل والضَّهر/
مع الحذر وضعف البصر
دار السّلام إتعتّرت فوق الككر !
شالت خطاها علي مهل
على عجل سبقا الكديس
قُبّال تصل باب التُّكل /
الديك بعيد غفلان يفلفل
في عَقَاب ريشو الفضل /
نواصل

حكاية الدّيك ... ؟
دايماً قرفــان عايش في مَلَل
دايماً زهجان وهمان مُتَجَهِّم
طـول اليوم مشغــول البال
ســارح مع نفســو يَهمْـهِم :
" كوني ديك أمعط عجوز وباقي عُمرْ
الجّوع والهمْ و الهَيْم* ضـوقني المُرْ "
إتلفت جِهةَ الكديس
تحت حبـال العنقـــريب راقـد تعيس
الدّيك نقنق في سرو ..
" المعنىَ شِنو ..
أنا الفيني مكفيني
الأعور يومي مِحملِق فيني
من راســي إلي كُرعِينِي ؟"
نظر تجـــاه دار السّلام
سرحانة بعيده و ساهِيَه ..
في الزّمـــن القـــــديم ؟
ولا في الحــال الأليم ؟
نواصل

مشكلة الدّيك والكدَيس ..
الكَديس أعور والدّيك زعور
تعيس شمتان في تعيس !
الكَديس متهم الدّيك
بالصّياح في كل حين
دون إعتبار لشعور الآخرين /
الدّيك زعلان شايف الكديس
حيوان كسلان
ملازم النّوم طول اليوم !
في يوم معلوم
الدّنيا نهاراً حار
حراً كالنَار يقلي الحِجَار
الزّعور جسّ رِجولتُو حسّ فِحولتُو
سلّ رقبتو طلق حنجَرتو :
" ككوعييا كوووك ككووعيييا كووك"
الكديس من صوت الدّيك وألم الجّوع
صحَا من نومو قام مخلوع
عَكَمْ الدّيك من عنقرتو !
الزّعور أتهدّ كيانو
تَنََىَ حنجَرتو، نسَىَ ضَكرنْتُو
بدل ما يعوعي قلب يكاكي
من الباص قَلبْ سُوبرانو !
إلا الزّعو كان محظوظ
لولا دار السّلام كانت صاحيَه
كان الزّعور راح في داهــيَه /
أتدخلتْ دار السّلام
نَجَدتْ الدّيك التّعيس
من مخالب الأعور الكديس !
نواصل

الكديس والدّيك
رغم أحقاد السّنين
حال الفَقُر والجّوع
وطَتدْ الحنين والإحساس
بعد العداوة والدُّواس
الكديس والدّيك
أصبحوا أخوان في الحس والحواس
...............................
دار السّلام سرحتْ بعيد
حيرانه في الحال اللّئيم
" معذورة يا ست النّسا
معذورة في الزّمن القسّا
عملتي كل الكان عليك
في دُنيتك أخلصتي جد
إلا الرّغــــد ما أمنيات
وطبع الزّمن ما بحابي حد
في بلد غرقان
يقابض في الزّبد !
نواصل

اللّيل نزل كَبتْ الدّيار..
الدّنيا سيل وغضب خريف
ضلام تقيل ومطر هميل !
البيت تراب طيناً قديم
شايل تعب جور السّنين
شاهد علي الحال الأليم
دار السّلام ، كديس أعور، وديك زعور
ثلاثه أرواح مقطوعين ضهر
في بيت قديم وزمن لئيم جمعم قدر /
دار السّلام إنسانة في أخر العمر
البيت بعيد طرف الفريق
شاهد علي البؤس الرّفيق !
عند الرّكن فانوس ضئيل
بالرّغــم من جازو القَليل
الباقي في قعــر الفـَـــتِيل
صابر يصارع ظَلمة اللّيل الطّويل !
نواصل

اخونا عوض شيخ ادريس
اتمنى اشوفك عريس
تبشر فى كنيسة القديس
جرجس
بحسك المرهف
بعيدا عن الكديس
ياريت تحكى لنا
عن ملكة سبأ
بلقيس
فى زمان لا شيخ
ولا قديس
بل ملوك انبياء
عاشوا اجمل ايامهم
دون ازعاج وتضريس
فهل حياتهم كانت تختلف
عن حياة مان دسيس

رغم أحقاد السنين ..
الدّيك رقد جنب الكديس
بكل عاطفة الحَنين آمن أمين /
ست النّسا دار السَلام
عقدتْ طِرِيف التّوب مَخدّة
ضَمّ باقي التّوب غُطَاها
إتكرفس الجّسد النّحيل
في نِصفْ نِصفْ العنقريب
في وحشةِ اللّيل الطّويل !
واللّيل بِصحِي الذّكريات
والآهة تطعن في الحلق
مرات تغوص خلف الدّموع
جوّ الشرايين تنغلق !!
دار السّلام سرحت بعيد ..
إتذكرتْ رِفقةْ زمان ..
من لِسّع في كنف الحياة
ومن رحل عدّاها فات ..
إتذكرت ماضي الحَنان
نواصل

دار السّلام سرحتْ بعيد ..
جردتْ حساب الذكريات
من لِسّع في كنف الحياة
ومن رحل عدّاها فات
إتذكرت ماضي الحَنان
أتذكرت رِفقة زمان :
" رقية بت مصطفي
أم الخير بت الجّزار
النّعمة بت عبد الجّليل
أم الحسن أخت أبنعوف
حليمة الطّرشة بت مسعود
سروره بت الباشا
ست أبوها بت داود
سعديّة بت حمد النّيل
زينب الدّعيتر
أتذكرتْ ست الجّمال
ست اللِّسم السرّة بت محمود
مع إنو قالوا مَطرطشَه
إلا كانت زينة زي قمر العِشا "
دار السّلام إتحسبنت واستغفرت
معذورة يا ست النّسا
معذورة في الحال القِسا
طَبع الزّمن يدي ويشيل
في الحالتين مافيش بديل
نواصل

طلع الصّباح زي كل يوم
نفس الجّراح نفس الهموم !
دار السّلام
جَمعتْ حِطيباتاً صِغار
أشتعل دخان ونار
قِدرة سودَه من الفِخار
عليها بصلة وزيت قليل
مخلوطة بملحة وشمار /
كُشنَة الزّيت والبصل
شَحتَفتْ جوع الكديس
تحت حبال العنقريب
قام من رقادو نسي الكسل !
الديك وقف سرحان بعيد
محتار يفكر في الحصل !
في راسو جال ..
كم من سؤال ما لاقي حل ؟
نواصل

مشهد السِّكين وتقطيع البصل
الزّعور تبع الظّنون
عن مُلاَح دار السّلام بالو إنشغل !
" إمْكِنْ يكون .. إمكن يكون
إمْكِنْ يكون ..!
إمْكن يكون مُلاح عدس ؟
هل العدس محتاجلو زيت ؟
مع إنو مافيش عدس في البيت !
أمْكن يكون مُلاح ويكة ؟
وين الويكة وين حتي لو كان بالدَّين ؟
أمكن يكون .. إمكن يكون مُلاح شرموط ؟
وين الشرموط ..... وين ؟
من كم سنة في البيت هِنا
أنا وصاحبي الكديس
ما ضُقنَا لينا أكل سَمِح
غير كِسرَة بالزّيت والملح
إمكن يكون .. إمكن يكون مُلاح لحم ؟
لحم وين ؟ .. وين اللّحم غيري أنا
ديك السّجم ديك الهَنا ؟
نواصل

مع الهم وعدم الإرتياح
الزّعور ظنّ نفسو يكون ملاح
في خاترو جال كم من سؤال ؟
" معقولة يا دار السّلام
عشرة سنيني تهون عليك
بعد كل مشوار السّنين
أعوعي ليك مِسا وصباح
لامن كَبرتَ وصوتي راح ؟
معقولة يا ست النّسا ؟
يفرق كتير ..
لو كُنتَ فرَوُج لحمي هَش
أو كُنتَ عمري فريخ صغير
كوني ديك أمعط عجوز
مقطوع ضهر مكسور جناح
لا جدادة تكاكي لي
لا كتاكيت تبكي حالي تنوح علي !
هل جزاي أخر حياتي أكون ملاح ؟
إلتفت جهة الكديس
راقد كئيب تحت حبال العنقريب
" عالم وهم
من غير النّوم ما عندها هم ! "
نواصل

الزّعور سرَح بعيد ..
" مافيش حلل
غير الهروب قبل الأجل !
لاكنِي أهرب أمشي وين
من سطوةِ القَدر اللّعين ؟
ما فيش مكان مضمون أمين !
ملعون أبو اليوم الجّعلني
داجن أليف طيب حنين /
ياريتني لو بقدر أطير
ماكان رضيت أصبح رهين
ماكان حصل بئس المصير
إلا القدر جعلني ديك وكمان زعور
آخر مطاف زمني اللّعين
أكون طبيخ وملاح فطور ؟ "
الزّعور من زمان
كان عندو عقدة خوف دفينه
خوفو يوم يصبح مُلاح !
أخر الكلام ست النّسا دار السّلام
بالرّغمِ من عنت الظّروف
ما فكرت يوم في الزّعور يكون مُلاح
دار السّلام مُتيقِّنة طيبة وحنينه ..
كان المُلاح بصل وزيت مِلحة وبهار
علي قدر حال دار السلام
المُلاح كان سخينة ..
........................
أنتهى النص
عوض شيخ إدريس حسن

up