حكاية الطاهر.. بقلم الإعلامي الطيب عبد الماجد

12:34 PM December, 11 2021

سودانيز اون لاين
Yasir Elsharif-Germany
مكتبتى
رابط مختصر

من الفيسبوك:

Quote: كتب: الإعلامي الطيب عبدالماجد حكاية الطاهر …!! ( هذا البوست مأخوذ من قصة حقيقية ) في واحد كان ببيع الفول والدوم والنبق والحاجات دي وكانت منطقتنا من ضمن دوائر التسويق المستهدفة من قبله… مره لاقيتو في واحدة من إجازاتي قلتا ليهو أديني تسالي وفول ونبق قام أداني ما طلبت وقال لي وديل هدية مني …!! الهدية كانت مساوية لما قمت بشرائه واكتر شوية …!! إستغربتا أنا في هذه الهديه ( التقيلة ) قلت ليهو وليه يعني …!!؟؟ ضحك كدا قال لي كان يوم تجيبنا في التلفزيون .. ..!! ضحكت أنا… قلت ليهو إنتا بتشوفني في التلفزيون …!! قال كيف ياخ حضرتك في برنامج الأسئلة داك … عرفتو بقصد ( فكر أنت في الخرطوم ) قال لي ود حلتنا كان معاك وكسب خمسة وتلتين ألف وصفقنا ليهو …..!! لكن انت أديتو دفرة أنا طبعا كنت سعيد جداً بهذا الحوار قال لي إنتا وين هسا ….!!؟ قلت ليهو أنا في الإمارات … قال لي مرطبين ياخ الله يزيدك ….. ضحكت كدا وقلت ليهو الله يسلمك ويديك كمان …. قال لي هسا يا أستاذ الزينا دا ما بنلقى لينا شغل بهناك ماتشوفني كدا والله أنا قريت كنت حاخش الثانوي إلا ظروفنا صعبة شوية وانا الكبير من الزمن داك أهو لافين كدا من شغل لي شغل … عدلت من نظرتي اليه … ( التعليم سمح ) وزاد احترامى لهذا التجرد والعمل … قلت ليهو الزيك مالو …والله أحسن زي .. مالك ..!! راجل مكافح ومجتهد …. قلت ليهو إن شاءالله ياخ تشتغل هناك مالو …!! للأسف أنا قلتها كدا على سبيل الأمنيات والمجامله وجبر الخاطر وللأمانة لم أتوقف فيها كثيراً ومشيت بقينا لما نتلاقى نتبادل السلام والونسة والدوم …وهو زول لطيف كدا ونضيف خلاص بشكل ملفت حتى ( الدرداقة ) دي فيها رسومات كدا وعلم السودان 🇸🇩 ….. أها افترقنا وكل راح لحال سبيله وأنا رجعتا الامارات قبل فترة كدا جاتني رسالة في ( الفيس ) واحد قال لي أنا الطاهر بتاع التسالي اتذكرتني ..!!؟ طوالي عرفتو من الصورة ……!! انبسطا أكتر إنو عندو حساب في الفيس بس الرسالة مرات بتنزل عندي في صفحة تانية كدا وأنا ما بشوفها الا بعد فترة. massage requests يعني قريتا امكن بعد شهر المهم اتبسطا منو ومن طموحو وكاتب لي ما تنسي الموضوع يا استاذ ….!! ( وكنت قد نسيته بالفعل ) رديت عليهو قلت لي ياتو موضوع …؟؟ قال لي الشغل …معاه العلامات دي 😂😂 😂 ( أنا مش قلت ليكم الزول دا لطيف) قلت ليهو ايواااااا إن شاءلله خير وانا للأمانة ليس في ذهني له من تصور وظيفي محدد ولم أرد احراجه ولم أبد اهتمام كبير قياساً على ذلك رغم إنو ضحكتو دي أثرت فيني شديد ما عرفتو فرح بي ( أريحتو ) دي ولا حزن إني ما قادر أعمل ليهو حاجه …..!! لكن من المؤكد أنني لست أنا من يصنع ويدير الأمور انا أصغر كثيراً من ذلك …!! جاني يوم كدا مدير شركة كبيرة كدا بعرفو كويس واستضفتو اكتر من مره في قناتنا دي فجأة كدا من غير مناسبة قال لي ياخ ماعندك ( زول ) كدا بتعرفو …زول دي بقصد بيها سوداني تحديدا كل الماسودانيين بتخليو كلمة زول دي مرادفة لي كلمة سوداني المهم قال لي دايرين لينا (سكيورتي ) وانتو معروفين بالأمانة والنزاهة ( ملأني التوصيف ) ما حبيت اقول ليه في ( زيلان ) بقو يخونوها للأسف بس الشينة منكورة وعلى كل هذه اعداد لا تؤثر علينا لا أدري لماذا قفز فوراً إلى ذهني بائع ( التسالي والنبق ) والله ماعارف ليه لحدي هسا …!! طوالي قلتا ليهو أيوا عندي ….( الطاهر ) والراجل مندهش وكأنه يعرف الطاهر ….طبعا لم يتوقف إن كان الطاهر أو بابكر اوغيره المهم قال لي خلاص ابعتلي أوراقو … جري كتبت للطاهر دا رسالة قلت ليهو يرسل لي أي أوراق من عندو سررررررعة ….ولم يرد الطاهر يوم …يومين …..تلاتة …أسبوع والطاهر ما ردا وواضح إنو لم يقرأ رسالتي أصلًا … وانا لا أملك وسيلة إتصال أخري…. إتصلت بي ( مازن ) …..( مازن ) دا ود أختي قلت ليهو دايرك تتصيد لي الطاهر بتاع الدوم دام دايرو ضروووري أول ما تشوفو قول ليهو الطيب قال ليك رد ضروري على الفيس …وأديتو رقمي قلت لي خلى يتصل بي .. ( مازن ) دا لذيذ كدا ….قال لي ( هو الطاهر عندو فيس ) لو داير ( نبق ودوم ) ياخال رسل لي التذكرة والحاجات بجيبهم ليك انا ذاتي بي نفسي لحدي عندك ..😂😂😂😂 ومرت أيام …( مازن ) قال لي والله الطاهر قالو ليهو فترة ما قاعد يجي …!! قلتا ليه كدا ياخ ……!! زعلت الحقيقة ….( ياربي مالو ) لكن خلاص أعمل شنو … …! قنعت منو ….حظو كدا بعدها بي مدة كدا لقيت منو رسالة …. بعتذر شديد انو ماشاف رسالتي قلت ليه انت وييييين يا الطاهر …!! قال اي لي زمن والله برا الشبكة قال لي نحن في حتة اسمها ( مرزق ) في ليبيا دايرين نمشي أوروبا …!! انزعجتا شوية قلت ليهو كدي خليني من أوروبا دي هسا إنت ترسل لي بس صورة من جوازك سرييييييع … لقيت ليك شغل في الامارات …..!! ما جاني رد ….!!😳 أنا قلت الزول دا باع وضاع منى خلاص ….!' وجاء رده دا كان الرد (( 😭😭😭😭😭😭😭 الحمد لله يا استاذ والله انا حلمان بي الوالدة قالت لي ماتركب المركب بتصدق ….. رسلت ليك صورة من الجواز …..!! ماعندي حاجه غيرها وانا داخل من تلفون صاحبي هنا تلفوني داك بعتو هاك دا رقمو سجلو ….معليش اعفي لي ))) والله يا أخوانا أنا كنت سايق لما وقفت بالعربيه قلت دا شنو هسا دا …..أي اقدار هذه وسماء رسلت صورة الجواز للراجل وكتبت ليهو ( CV ) كدا من عندي كتبت نفسي ( شخصيات يمكن الرجوع اليها ) إتصلو بي من الشركة لأنو وظيفة ( سيكيورتي ) دي تتطلب كثير من الاحترازات هنا يعني حتى بطلبو شهادة حسن سير وسلوك من البلد الجاي منو وكم حاجه كدا قالو لي الزول دا كاتبك مرجع بتعرف عنو شنو قلت ليهم كل خير مثابر …وخلوق… وبشتغل وبياكل من عرق جبينو …وكريم …وهذه صفات تجعلني أطمئن له وأثق فيهو ….!! قالو لي بتضمنو قلتا ليهم بضمنو اخيراً طلعت فيزا عمل للطاهر ….🥰🥰🥰✌️ فرحت ليهو فرح ….ربنا يوفقو ….. إتصلت عليهو في تلفون الزول المعاه دا قلت ليهو إنت بعد دا تبقي مارق تجي طوالي قال لي والله ما مصدق … قلت ليهو الراتب كبدايه كدا ما بطال زي تلاته الف درهم ًمع السكن لانو انت ماعندك خبرة وحيدربوك ….!! قال لي يعني ديل كم بالسوداني …!! قلت ليهو الرقم قال لي والله أنا خايف أمي تغمر عدييييل ….!! ضحكت ضحك 😂😂 قال لي والله يا استاذ ما عارفين ذاتو نقول ليك شنو قلت والله أنا ماعملت حاجه كان في قول قول لي ( أمك ) دي ….!! واضح جداً إنو ( الطاهر ) ضاخين ليهو من الكبانية الكبيرة ( من أمو ) …!! والله جد دا شغل أكبر منى وأكبر من الطاهر وأكبر من أي زول أنا طبعا في هذه القصة لا يتعدى دوري الوسيط ولم احكيها فخراً ولا إدعاء ولا يوجد مايدعو للفخر بقدر ما يدعو للتأمل فيها وأنا لم أفعل شيئ كما ترون ولم أبذل جهداً أشكر عليه فقط سخرني الله بفعل شيئ ما يريده …!! ورغم إنها حكايه خاصة لكن أنا حكيتها ليكم لأنو الدنيا والظروف قابلة للتغيير في أي لحظة عشان كدا لازم دايماً بكون عندنا أمل … أمل في أي حاجه …في حياتنا ..في بلدنا … في التغيير …في بكرة … في كل حاجه علينا أن نتمسك بأحلامنا وآمالنا ونسعى لتحقيقها . ونترك الأمور بعد ذلك للسماء …الله يرى ما لانراه ويفعل ما يريد …!! ماهو كدا كدا الناس دي عايشة أحسن تعيش فوق أمل لو حصل خير وبركة هو المطلوب وكان ما حصل أهو عشناها اللحظة والترقب وكلو ما خسارة ( تقدير ربنا ) … والله البلد فقدت زول …. هو أكثر من بائع تسالي وفول هو يبيع الفرح والأمنيات قال لي أجيب ليك شنو معاي …قلت ليهو سلامتك وشوية نبق …الأصلي بتاعك داك وتسالي والله الطاهر دا عندو نبق النبقابة يفلقوك بيها … ربنا يوفقو إن شاءالله …اجتهد والله الذا حاجه السودانيين المعاهو عاملين ليهو حفلة وداع وكل ماض إلى مصير لا يعرفه …!! أكثر ما حز في نفسي الزول الأنا بكلم ( الطاهر ) في تلفونو دا قال لي ما بتلقي لينا حاجه مع الطاهر دا يا استاذ ..!! لأول مره في حياتي أصمت ماقدرت أرد حزنت كدا والله حزنت شديد 😭😭 قلت ليهو ان شاءالله ياخ الجاب للطاهر بجيب ليك . بالله دا شعب يوقفوه في الشوارع والأصقاع….!! ربنا يحقق كل الأمنيات الله حي …!! - [ ]