رحلت عنا الجميلة سيدة بباريس ومسؤلة الجمعية السودانيةللمراة

09:22 PM November, 29 2021

سودانيز اون لاين
زهير ابو الزهراء-السودان
مكتبتى
رابط مختصر

ورحلت بباريس صاحبة القصيدة المشهورة التي نظمها د. عمر محمود خالد قبل نصف قرن بجامعة الخرطوم
يا سيدة لاااااا
--------
انتقلت الي الرفيق الاعلي السيدة الدكتورة رئيسة جمعية المراة السودانية بباريس ( سيدة حسن علي كرار ) بعد معاناة ممتدة مع المرض اللعين .
نسال الله لها الرحمة والمغفرة والقبول الحسن .
احر التعازي لاسرتها بباريس والسودان ولجميع اصدقائها وصديقاتها من دفعتها بجامعة الخرطوم .
انا لله وانا اليه راجعون .

يا سيده لا

ياسيده لا فايتانا وين مستعجله
شرط امتحان ما انتي كملتي الحلا
لازم علوم ما بالسماحه مؤهله ياساحره نايره ومذهله
دار النشاط الليله صبحت قاحله
حزنت لياليها وصبيحاتها و تبٍكي أصائله
ما كنت نورها ونسيمها وبلبله
وكنت الضياء البرشح سناها مجمًله
وكنت الندي الحاضن زهورها مدلله
فايتانا وين مستعجله
فوتك منو العاد بقبله كل القلوب تخضع تجيك متوسله
تتبع خطاك في ابتهال ،وتزرع دروبها وتشتله
فايتانا وين مستعجله
السله ،تبكي مولوله الليله صبحت أرمله
جفت دروبها وبهجتها وبنت العناكب مدخله
ما كان عشانك ياملاك نحن بنجيبها وندخله
كنا بنصفق للجمال وكنا بنصفق للحلا
لكن يمين واقفين وراك لا نجيها يوم لا ندخلها
حادين عليك يا مذهله
فايتانا وين مستعجله
القمره وكتين خنقت، روحنا ليها بنسأله
قلنا ليها ايه سبب الغياب ساعات ظلامنا الطولا
قالت خلاص بي ارضكم مالي صله
انا كنت مشتاق للعيون البطبيعه مكحله
بفدي الديار واجمله،،
فايتانا وين مستعجله
غلطات كثيره الكمبيوتر بعمله، يمكن سهي ويمكن نسي
وجاط النمر بي اكملها، ماقالو بعرف كل شئ
ليه ماعرف ست الحلا
لوكان عرف كان النتائج عدله
وعشان عيونك يا قمركان خت اسمك اوله
الجامعه بعدك كوم رماد لاتنفع اداب لا اقتصاد
ولا فيها طب لا صيدله
وحقوق كمان حقوق شنو والله اكبر مهذله
مالو العميد مالو البليد،مالو لورفد المصحح والمعيد
لو خلا ست الناس تعيد
نومه الظهر تبقي له ضر ،الجاهله كيفن ما بتمر

عمر خالد
(ابوالورد)

ود النويله الكنزي الانصاري

الرحمة والمغفرة للمرحومة الاخت سيده حسن على كرار والعزاء للاسرة اجمعين

سيده رحمها الله كانت امراة عرفت بكلامها العذب الذى تنتقيه مما يجعلك تحس بانها تغسله قبل الحديث به كانت اختا للجميع وهى امتداد لطيبة ورقى وعذوبة كلام والدتها رحمة الله عليها حاجة نفيسة كامل رحمها الله وامتداد لوالدها ولعمها المرحوم احمد على كرار الذى يقدم لك رايه ويلخصه لك فى حديث مغلف بكثير من المرح والفكاهة مما يجعله مكان قبول من الجميع بنفس طيبه ومرحه

لايسعنى فى هذا المكان الا ان اترحم على الرجل الاشم المرحوم عبدالمنعم حسن على كرار الذى استشهد فى سبيل هذا الوطن مدافعا عن قيمه ورفضا لطيور الظلام ونظام الانقاذ القمىء الذى ركله الشعب السودانى لمزبلة التاريخ

سيده ليست جمال خلقه فهذا ليس كل من فيها من خير بل جمال خلق وضمير وقلب ابيض عامر بحب الخير للناس وتسخير وقتها فى العمل العام لمساعدة الاخرين ولوطنها فقد جعلت سيده سنين عمرها لعمل الخير ولجمعيات النفع العام ومساعدة المحتاجين نسال الله ان يجعله فى ميزان حسناتها وان يبارك له فى زريتها ويدخله فسيح جناته ويجعل قبرها روضة من رياض الجنة ويجعل الله ذلك اخر الاحزان لاسرتها