مشروع قانون لسحب الجنسية البريطانية من المسلمين سرا!!!!

03:33 PM November, 23 2021

سودانيز اون لاين
بسمات الشيخ-USA
مكتبتى
رابط مختصر

قدمت وزيرة داخلية بريطانيا بريتي باتل مشروع قانون للبرلمان البريطاني يقضي بسحب الجنسية البريطانية من اي
شخص وبدون ابداء الاسباب...كما يقضي القانون بعدم السماح باستئناف القرار امام اي محكمة بريطانية لمن نزعت منه
الجنسية ...
ويقول المراقبون ان الهدف الاساسي من هذا القرار هو سحب الجنسية البريطانية من المسلمين وخاصة الذين لهم سوابق
في الارهاب او الجرائم الاخرى..
والمعروف ان وزيرة الداخلية بريتي باتل هندية من طائفة السيخ وتكن كراهية شديدة للمسلمين وهي التي قدمت
كذلك قانون اعتبار حركة حماس الفلسطينية كمنظمة ارهابية ..
ونواصل ...بعد مشوار قصير

هلا بت الشيخ

Quote: ويقول المراقبون ان الهدف الاساسي من هذا القرار هو سحب الجنسية البريطانية من المسلمين وخاصة الذين لهم سوابق في الارهاب او الجرائم الاخرى.

كيف يكون قرار سرى ويعرض على الجبانة الهايصة فى مجلس العموم البريطانى. بعدين سحب الجنسية من الإرهابيين موجود حتى فى أمريكا.. أى زول ما مولود فى أمريكا ومجنس
فإن الجنسية ممكن ان تسحب منه فى أى لحظة لو ارتكب جرائم كبرى ومتكررة. لا تحتاج الى قانون خاص.

كم انت عظيم يا ابوالريش

القرار ما سري با ابو الريش
القرار علني ..والملكة وافقت على تقديم المشروع للبرلمان
لكن الحاجة السرية هو استهداف المسلمين ..القرار في ظاهره يشمل
كل البريطانيين. حتى الناس العيونهم زرق ومن احفاد هتري الرابع ..لكن
في باطنه يستهدف المسلمين للتخلص منهم...

Quote: كم انت عظيم يا ابوالريش

كنت عاوز أقول ليك انت الأعظم يا صديق، لكن تذكرت ان الأعظم هو الله.. خلاص شوف حتة فى النص وأنصب فيها خيمتك.

وعلى حسب ما جاء في الاخبار ان الملكة اعترضت في البداية على مضمون مشروع
القرار ولكن مستشاريها اقنعوها بان خطر المسلمين سيزداد بزيادة اعدادهم وان معظمهم
متطرفين ...ووافقت في النهاية ..وهذا يعني ان الملكة نفسها عارفة ما وراء القرار....
ووزيرة الداخلية هذه عنصريتها موجه فقط نحو المسلمين ...
يعني يا ابو الريش القرار ما قالوا بس اسحبو الجنسية من المسلمين ولكن مضمون
القرار يقول ان لوزارة الداخلية الحق في سحب الجنسية البريطانية من اي شخص بدون ابداء
الاسباب لان الجنسية البريطانية منحة وليست حق كما انه لا يجوز استئناف القرار بعد سحب
الجنسية...
طبعا وزيرة الداخلية سوف لن تطبق هذا القرار على البريطانيين المولودين في بريطانيا واحفاد هنري
الرابع وهنري الخامس ..ولكن سوف تطبق القرار على المسلمين بوجه خاص...
..
اها ودي نصيحتي لناس خضر واي واحد حاصل على جواز بريطاني وما مولود في بريطانيا..
تعالوا امريكا قبال ما يطبقوا عليكم القرار ...وقدموا للاقامة الامريكية ...وقولوا في قضيتكم
ان الحكم في السودان اصبح حكم دكتاتوري وان حياتكم في خطر لان الجنجويد يقتلون من طرف
.....
اها شفتو عظمة امريكا وين؟؟!!! لا يمكن لامريكا ان تطبق مثل هذا القرار المجحف ..لان
امريكا بتحكمها مؤسسات وليس فرد ...
وطبعا حتقولوا ان بريطانيا ايضا تحكمها مؤسسات..
لا ..بريطانيا تحكمها الملكة ...وكلامها وكانه منزل من السماء....وما تقولوا
ان السلطة في يد رئيس الوزراء .....لان ده في الورق بس ...وبريطانيا ما عندها
دستور .....والملكة هي الدستور وهي كل شئ...
اها يا ناس خضر عرفتو ليه امريكا اقوى دولة في العالم ؟؟!!!
لان فيها عدالة وسلام ، وهي الشعارات البتنادي بيها الثورة السودانية
لكن البرهان وحميدتي وأدوا هذه الشعارات بانقلابهم العسكري ...

طبعا قصة استهداف المسلمين دى ما حقيقة و القانون مقصود به مكافحة الارهاب و الكلام عن ان الوزيرة من طائفة السيخ و تحقد على المسلمين أيضاً لا يقف على قدمين لان القوانين و تنفيذها فى بريطانيا لا يخضع للمزاج و هذه العملية تمر عبر آليات معقدة و الدولة دولة مؤسسات و سيادة حكم القانون هى السمة الاساسية لها .. هى يكفى ان يكون الارهابى مسلم لكى نتعاطف معه و ننبرى للدفاع عنه و الا يكفى ما عانينا منه طوالى سنى الاسلاميين السوداء كسبب يجعلنا ننظر بعمق لكل ما يتدثر بالدين ؟! شخصيًا لم استطع شراء فكرة استهداف المسلمين هذى ففيها ابتسار و استغفال ربما انطلى على غير السودانيين من أؤلئك الذين لم يخوضوا مثل تجربتنا و التى كلفتنا الكثير من الدماء و الدموع .. تحياتى.

د. محمد بابكر
قبل صدور القرار ،نزعت الحكومة البريطانية الجنسية البريطانية من ١٠٠ مسلم خلال العامين
الماضيين ،،،،
اما الان فانتظر شوية واعمل اخصائية بعد ستة اشهر وشوف براك حيسحبوا الجنسية البريطانية
من كم مسلم ...وسوف تلاحظ بنفسك بان المنزوعين منهم الجنسية ما حيكون في اي واحد غير مسلم..
وعندئذ نعود لتعليقك ونعلق ونقول ليك : اها شفت براك يا د. محمد
بس ننتظر ونشوف ..

مرحب الكنداكة بسمات الشيخ

Quote: اها ودي نصيحتي لناس خضر واي واحد حاصل على جواز بريطاني وما مولود في بريطانيا.. تعالوا امريكا قبال ما يطبقوا عليكم القرار ...وقدموا للاقامة الامريكية ...وقولوا في قضيتكم ان الحكم في السودان اصبح حكم دكتاتوري وان حياتكم في خطر لان الجنجويد يقتلون من طرف

انا بعتبروني مواطن صالح يعني ولي عديييل من البيت للجامعة للشغل
ما حصل شفتا قسم شرطة من جوة عامل كيف
عموماً مستوى الجريمة في بريطانيا منخفض مقارنة مع دول تانية و نسبة الضوضاء و التلوث كمان منخفض
المشاكل بتتركز في لندن و مانشيستر و بيرمنغهام و برادفورد
ما حصل مشيت امريكا رغم الإغراءات من اصحابي بحس انو اميريكا صاخبة
مرة عندي تلاتة اصحاب سودانيين امريكان قرروا يجو يزوروني و كان وكت الكريسماس
اكتر حاجة لفتت انتباههم الهدوء و انا ساكن في غرب يوركاشير حيث الهدوء
كانوا مستغربين للهدوء , الحلة من الساعة خمسة مساء الناس بتقطع الحركة من الشوارع
الستي سنتر الساعة خمسة كل المحلات بتقفل بتكون فاتحة بعض البارات و المطاعم الصغيرة
في الويكند بتبدأ المطاعم الكبيرة و الديسكوهات بعد الساعة 12 منتصف الليل
لكن مستحيل تكون بنفس صخب امريكا و بعدين امريكا بعيدة
انا سفرية اكتر من 6 ساعات ما بتنفع معاي معقولة اكون معلق بين السماء و الارض 14 ساعة؟
الرحلات الماكوكية دي متخصص فيها الباشمهندس ابو الريش انا كنت عاوز اسألو كويس جات المناسبة
يعني ذي رحلة من نيويورك او واشنطون الى الصين تقريباً 14 ساعة بتقضيها داخل الطيارة في شنو؟
لو شاهدتا افلام و قريت كتب لسة بكون عندك وكت بالنسبة للنوم كمان حتى و هي مقسمة بتبقى القعدة صعبة

Quote: واحد حاصل على جواز بريطاني وما مولود في بريطانيا.

مسألة المواليد دي انتهت من التمانينات بعد قرار مارغريت تاتشر
عدم منح المواليد من أبوين أجانب الجنسية البريطانية
الآن كتير من العرب و الأفارقة بسافروا امريكا لولادة اطفالهم و بحصلوا على الجنسية
في بريطانيا الموضوع دا استحمى زمان
حتى اجراءات الهجرة لبريطانيا اصبحت معقدة جداً
واحد من الأسباب التي دفعت بريطانيا للخروج من الإتحاد الأوروبي هي مسألة المهاجرين
مع العلم انو بريطانيا ما حصل دخلت مع مجموعة الشينغن و هي تقريباً 26 دولة اوروبية
لو اخدتا فيزة الدخول من اي دولة ممكن تلفها كلها بنفس فيزة بلد الدخول و بشرط في الخروج تخرج من نفس دولة الفيزا
بالنسبة للبريطانيين عشان تزور امريكا بتقدم لي فيزا اونلاين اسمها ال (ويفا) ب 25 جنيه استيرلنج

Quote: يعني ذي رحلة من نيويورك او واشنطون الى الصين تقريباً 14 ساعة بتقضيها داخل الطيارة في شنو؟

You want me to brake my roof, huh!1

أستاذ خضــر،
عارف أنا فى نص الشغل فى كتاب جديد عن رحلاتى.. أدعو الله ان أكمله فى وقت قريب.. وكتابة الذكريات قد تكشف المعلومات قبل وقتها، ولكن لا بأس من الرد مختصراً..
لو جمعت السفريات للصين ما أقل من 50 أو 60 مرة.. ربما أكتر.. من 2006 الى أخر مرة من السودان للصين كانت عام 2018
لو سافرت كثير ستعرف ان الموضوع لم يعد سفر، وإنما اسلوب جديد للحياة. بعدين تتعود على ان المنطقة من مدخل مطار المغادرة وحتى مخرج مطار الوصول عبارة عن
المساحة دى كلها عبارة عن مجتمع صغير.. community بالجد. وهذه تبدأ بالحوامة فى المطار ثم صف العفش وصف الهجرة والمطاعم وستاربكس
والقهاوى وعربات الشنط وتحويل القروش، والتمشى بدون هدف فى صالة المغادرة النهائية (البوابة) ثم التوجه الى البوابة وإبتسامات المضيفات المزيفة وعبارات الترحيب المكرورة
التى صارت حتى بالنسبة للمضيفات مسيخة. ثم تبدأ رحلة البحث عن المقعد بتاعك.. يااااه دى بالذات تحتاج تاج السر الملك.. و can I see your ticket؟1 وأخيراً تجد مقعدك، ولو
غفلت وما قريت يس قبل ما تدخل الطائرة ستجد الذى يليك سمين (أو سمينة) محتل 25% من مقعدك.. فى هذه الحالة ما عليك إلا أن تحتسب الرحلة، ولو محظوظ الطائرة تكون شبه فاضية
وهذه تحصل كثيرا جدا.. أما لو لقيت جارك نحيف تحمد الله وتديها ركعتين فى سرك. أنا دائما أحجز isle أى المقعد الطرفى على الممر، لأنه فى حالة الجار فى الوسط يكون سمين
أستطيع تعويض الأرض المحتلة من فضاء الممر, طبعا الرحلة كلها عبارة عن افلام ووجبات وبين الوجبات فى اكلات قزقزة خفيفة وقهوة.. الإماراتية فيها واى فاى ومرات أنزل
مداخلة فى المنبر من على 30 الف الى 40 الف قدم فى الجو. الوافاى مجانى لوقت محدود بعدين تدفع.
يا هندسة كفاية كدا وشكرا على السؤال.

شكرا خضر وابو الريش لاثراء البوست بأدب الرحلات،،،وانا كنت متخيلة ان السفر للصين من اي منطقة في العالم
بيحتاج لي اكثر من ٣٠ ساعة للوصول اليها ...لانه ١٤ ساعة دي نحن اتعودنا عليها للسفر
للسودان وبنشوفها كانها ٤ ساعات فقط،،،
اما بالنسبة للجنسية واكتسابها عن طريق مكان الميلاد او اللجوء السياسي، فعندما جاء ترامب ( طرمبة) للرئاسة
اصدر قرار تنفيذي بوقف منح الجنسية لهؤلاء الذين يولدون في الاراضي الامريكية من اب وام ليست لهما اقامة دائمة
ولكن بايدن جاء والغى كل القرارات التنفيذية التي اصدرها ترامب العنصري...

بسمات

زي ما قال لك أبو الريش. قانون خلع الجنسية في حالة ثبوت تهمة الإرهاب في أمريكا موجود، وأصحاب الإقامة الدائمة أي جريمة جنائية ير تكبونها قد تكلفهم إلغاء تلك المِيزة وترحيلهم لبلادهم الأصلية بعد قضاء مدّة العقوبة المحددة.

شكرا دينق للمرور والتعليق
اساسا اي زول بيرتكب جريمة ارهاب ما بيستاهل الجتسية في دولة في العالم
لكن القانون البريطاني بينص على سحب الجتسية من اي شخص بدون ابداء الاسباب
ولا يحق للشخص المنزوع منه الجنسية الاستئناف...
لكن في امريكا ما بيسحبوا منك الجنسية بدون سبب..لازم المحكمة تحاكمك وتوريك
السبب...يعني بقانون....والقانون يسري على الجميع...

وقد كتبت جريدة الغارديان البريطانية الواسعة الانتشار مقالا افتتاحيا عبرت من خلاله رفضها
القاطع لبند في مشروع القانون ينص على عدم السماح لاي شخص تنزع منه الجنسية بالاستئناف
امام المحاكم وقالت بان هذا الاجراء ظالم وقاسي وانه يجب على نواب البرلمان ان يخجلوا من انفسهم
قبل اعتماد وتمرير هذا المشروع ...واضافت الجريدة بانه قرار سلطوي وغير عادل.

وتنصب الكثير من الانتقادات لهذا القرار على كونه يحرم اي شخص يحمل الجنسية البريطانية من حق معرفة
التهم الموجهة اليه ومعرفة سبب سحب الحنسية منه وايضا الحق في الرد على هذه التهم والطعن في قرار
وزارة الداخلية..

ومن بين التفاصيل المثيرة للجدل في هذا القانون المجحف تضمينه رفض طلب لجوء اي شخص
يصل الى الاراضي البريطانية بطرق غير قانونيو ،مع تجريم اي شخص يحاول مساعدة المهاجرين او انقاذهم
من الغرق في البحر....... ""

(منقول)...
بالله ده كلام ده....يعني يخلوا المهاجرين يغرقوا ويموتوا غرقا حتى لا يصلوا للاراضي البريطانية المقدسة..
طيب ما تنقذوهم من الغرق ورجعوهم للمكان الجو منه ....بدل يموتوا غرقا....