Post: #1
Title: لاعب صغير في سنو، كل البنات حابنو
Author: أبوبكر عباس
Date: 11-20-2021, 03:00 PM
Parent: #0
02:00 PM November, 20 2021 سودانيز اون لاين
أبوبكر عباس-الإمارات
مكتبتى
رابط مختصر
بوست مهدي لعماد عبد الله:
حكى لي المناضل أيمن الدش ونحن قاعدين قدام بيتم في شارع Summit بغرينسبورو،
إنو القطر المذيع الكروي بمدني وهو راكب العربية في نهاية التمانينات وبعلن عن مباراة أهلي إتحاد كان بقول:
يقود الاتحاد اللاعب المشاكس كابتن حداثة ويضيف عنو:
لاعب صغير في سنو كل البنات حابنو
|
Post: #2
Title: Re: لاعب صغير في سنو، كل البنات حابنو
Author: أبوبكر عباس
Date: 11-20-2021, 03:56 PM
Parent: #1
مبدع كان في كرة السلة والطائرة ولم يكن يهتم بكرة القدم كثيرً وإن كان يجيدها بمهارة عالية،
قال لي مشينا الخرطوم نمثل مدني في كرة الطائرة ونزلنا في فندق المعسكرات وكانوا نازلين معانا ناس منتخب الناشئين المثل السودان في ايطاليا،
وواصل؛
أنا طبعاً بحب المشاكل زي عيوني، اشتبكت مع ابراهومة وخالد أحمد المصطفى وعملنا شكلة محترمة وحسيت انو الناس ديل بعاينوا لي بتقليل كونو هم في منتخب البلد بتاع كرة القدم
وأنا حي الله لاعب منتخب مدينة بتاع كرة طائرة
قلت ليهو بزمبغة هي ذاتها بتاعت بنات
فكاني بكيس صعود قدامو
وحلف بأنو الكرة الطائرة دي أرقى رياضة عرفها الإنسان للآن وقال لي؛
يا حيوان عاين لأجسام لعيبة كرة الطائرة بنات ورجال شوف القوام والرشاقة دي كيف؟!!
|
Post: #3
Title: Re: لاعب صغير في سنو، كل البنات حابنو
Author: اخلاص عبدالرحمن المشرف
Date: 11-20-2021, 07:20 PM
Parent: #2
واصل يا بكور
|
Post: #4
Title: Re: لاعب صغير في سنو، كل البنات حابنو
Author: أبوبكر عباس
Date: 11-23-2021, 02:01 PM
Parent: #3
ما دام دي يا ها سياستكم؛
أحسن لي أرجع أكتب ونستي الفكرية العميقة.
في نفس السنة ديك وهو كان ضمن أشبال الإتحاد تم تصعيده للفريق الأول،
وأصبح نجم الموسم وشارك مع الإتحاد أفريقياً
والقطر مبسوط منو ويغني في شوارع مدني نغمة صارت أغنية:
حداثة
لاعب صغير في سنو
كل البنات حابينو
|
Post: #5
Title: Re: لاعب صغير في سنو، كل البنات حابنو
Author: أبوبكر عباس
Date: 11-23-2021, 02:33 PM
Parent: #4
في السنة ديك مجالس المدينة كلها ما عندها غير حداثة نجم المباراة،
حداثة شاكل فلان
حداثة سبّ الحكم
حداثة، حداثة، ....
العشاء والمشاوي والكوارع مع حداثة في البيت
كل اللعيبة القدام في بيت ناس حداثة
القعدات
الفنانين يعشقوا حداثة
موش دائماً العكس
اللعيبة يعشقوا الفنانيين؟
السودان كلو بعشق الفنان محمود حودة
ومحمود صديقه الأول بالسودان حداثة
ممكن تكون عندو حفلة بالقضارف
بعد الحفلة يقول للبعام والرعيّة
النوم مع حداثة بمدني
محبّة عجيبة بينهم الاتنين
محمود بتمرده العنيف على الدنيا وعلى نفسو
شيخه في الدنيا حداثه
وقدام حداثه فوق للصداقة علاقة شيخ بحوار
|
Post: #6
Title: Re: لاعب صغير في سنو، كل البنات حابنو
Author: أبوبكر عباس
Date: 11-23-2021, 02:42 PM
Parent: #5
شالو ناس الهلال
ضجة عجيبة
الجرايد ما عندها كلام غير حداثة
اللعيبة يعملوا معاهم لقاء
يقول ليهو لاعب لا تحبه؟
حداثة
لاعب تعمد اصابتك؟
حداثة
لاعب قصد يطلعك من المباراة؟
حداثة
الطيب عبد الله، أبو حراز وعبد المجيد
ما عندهم شغلة غير حداثة عمل وحداثة فعل
خصم من راتب حداثة لأنه أثناء التمرين طلع برّة النادي وطلع في التربيزة بتاعت بتاع الخضار وقعد ياكل في التبش بالشطة!!
يوم جاء يستلم الراتب المحاسب قال ليهو عليك خصم بسبب التبش بالشطة برّة النادي؛
طلع للمحاسب في التربيزة وقال ليهو لو وئيسك جاء هنا خيرني بين التبش والهلال؟
بختار التبش
طلع القروش بلا خصم بلا كلام فارغ
|
Post: #7
Title: Re: لاعب صغير في سنو، كل البنات حابنو
Author: أبوبكر عباس
Date: 11-23-2021, 03:00 PM
Parent: #6
قال لي جاني محمود يوم في البيت زي تلاتة صباحاً،
صحاني وقال لي داير لقيمات
قلت ليهو ما بصحي ليك أمي لكن أرح
ركبنا العربية مشينا الميناء البري
لقينا عشوشة يا دوب بتهب في الكانون
ظبط لينا لقيمات عجيب
قلت ليهو لازم تظبط الشاي واللقيمات وفي حضرتها أشهر لاعب وأشهر فنان
قال سيب دجلك وأسمع القصّة من القصّة دي لسّ في الدرب؛
ونحن راجعين بشارع التلفزيون والناس يادوب خلصت الصلاة
لقينا عمك كبير سايق عجلة ماشي عكسنا
محمود قال أرجع بالعربية أرجع
وقفنا عمك ومحمود طلع من جيبه رزمة قروش كبيرة جداً سلمها لعمك
قلت لمحمود عندك غير القروش دي
قال لي لا
عمك شال العجلة قلب اتجاهها ورجع ورانا في نفس الاتجاه
أنا طوالي قمت ركبت عربيتي ولم أسأله بقية القصة وخرجت من شارع summit ووليت وجهي شطر الريف الكارولايني سارح مع غنم إبليس
|
Post: #8
Title: Re: لاعب صغير في سنو، كل البنات حابنو
Author: أبوبكر عباس
Date: 11-23-2021, 03:15 PM
Parent: #7
بالمناسبة وعشان تعرفوا ملكاتي الابداعية،
الكلام دا بكتب فيهو مباشرة من رأس المفكر للكي بورد
وأنا جالس في العربية قدام ستاربكس بتل غراوند ولسّ ما كملت كباية قهوتي
بعد رجعت قريت المداخلات تأكدت انو أنا زول مبدع
المداخلات الجاية بعد كم يوم عن فترة لعبه بالبحرين وبورتسودان،
وتدريب فريق كريمة وعلاقته المجنونة مع الفنان محمد المصري
وحفظه لشعر محمد أحمد الحبيب
|
Post: #9
Title: Re: لاعب صغير في سنو، كل البنات حابنو
Author: أبوبكر عباس
Date: 11-23-2021, 03:17 PM
Parent: #8
محمد النصري طبعاً
----
الواحد لو كان بكتب مع ناس مثقفين
ما كان عمل التصحيحات دي
لكن تقول شنو؟
منتدى بكري دا لامي هردبيس كتير لازم نفهمو
|
Post: #10
Title: Re: لاعب صغير في سنو، كل البنات حابنو
Author: Ahmed Yassin
Date: 11-23-2021, 03:42 PM
Parent: #9
معناتا محمود غنا ليهو:
جاهل صغير مغرور في احلام صباه
قاسى ومنيع مابزول لكن دابو سال
جاهل صغير مغرور
خلى الهلال فى حجور.. متقلب نجوم لافح حزار لايجور
|
Post: #11
Title: Re: لاعب صغير في سنو، كل البنات حابنو
Author: أبوبكر عباس
Date: 11-24-2021, 12:08 PM
Parent: #10
فيك الخير والله يا أحمد يس
بجيب ليك خبر الأغنية دي.
معقول بوست كتابة بهذا الألق احتفى بها الآلاف خارج المنبر خلال الأربعة وعشرين ساعة الماضية،
وتم تبادل المكلامات التلفونية عبر القارات حولها، ما تلقى غير مداخلة وحيدة من صديقي أحمد يس؟!!!
فعلاً لا كرامة لنبي في قومه
سوف أعاقبكم بعدم فتح المنبر لمدة ثلاثة شهور
|
Post: #12
Title: Re: لاعب صغير في سنو، كل البنات حابنو
Author: Osama Siddig
Date: 11-24-2021, 12:46 PM
Parent: #11
تحياتي أبو بكر
ما هو السر في أن من يكون مبدعا في الكرة الطائرة يكون مبدعا أيضا في كرة القدم؟
سامي عز الدين عليه رحمة الله كان في منتخب الكرة الطائرة بمدرسة الأمير أيام الدورة المدرسية ، ثم السنة التي تليها كان حارسا للمرمي و بعدها انطلق الي النجومية لاعبا لكرة القدم.
درست بمدرسة مدني الثانوية و كان زميلنا محمد عزالدين الشقيق الأكبر لسامي، محمد كان أكثر موهبة و حرفنة من سامي إلا أنه تعرض لكسر في القدم أبعده من الملاعب مبكرا.
|
Post: #13
Title: Re: لاعب صغير في سنو، كل البنات حابنو
Author: أبوبكر عباس
Date: 11-24-2021, 01:06 PM
Parent: #12
الكرة الطائرة يا اسامة، هي أم الرياضات،
تحتاج لرشاقة ومرونة شديدة في الجسم، وحضور توقع في كسر من الثانية.
حالياً بالنسبة لي هي الرياضة الوحيدة الممكن أقعد في التلفزيون أحضر ليها مباراة كاملة.
|
Post: #14
Title: Re: لاعب صغير في سنو، كل البنات حابنو
Author: اخلاص عبدالرحمن المشرف
Date: 11-24-2021, 07:01 PM
كتبت ثلاثة مداخلات بس كلهم
ما عجبوني ، لاوزت
ما مكن اخرب البوست
جاهل صغير في سنو
كل البنات حابينو
|
Post: #15
Title: Re: لاعب صغير في سنو، كل البنات حابنو
Author: اخلاص عبدالرحمن المشرف
Date: 11-24-2021, 07:01 PM
كتبت ثلاثة مداخلات بس كلهم
ما عجبوني ، لاوزت
ما مكن اخرب البوست
جاهل صغير في سنو
كل البنات حابينو
|
Post: #16
Title: Re: لاعب صغير في سنو، كل البنات حابنو
Author: أبوبكر عباس
Date: 12-05-2021, 01:25 AM
Parent: #15
طبعاً المحبة البيني وإخلاص المشرف؛
عزال كتار بكونوا حاسدننا عليها
|
Post: #17
Title: Re: لاعب صغير في سنو، كل البنات حابنو
Author: طارق ابراهيم ابوالفضل
Date: 12-05-2021, 06:17 PM
Parent: #16
يا سلام ايام الكرة الطائرة
اذكر ذات مرة و انا كنت العب في نادي الحاج يوسف للكرة الطائر
دعانا صديقنا واللاعب معنا في النادي علاء الدين خضر وكان يدرس الطب في جامعة الجزيرة
للعب مباراة في مدني و قد نسق لهذه المباراة مع مجموعة من عشاق الكرة الطائرة بمدني
وقد لفت نظري براعة هذا اللاعب واجادته للعب بما يضاهي عتاولة الكرة الطائرة في ذلك
الزمان حافظ و جقاوة من المجد و محمدطه من اتحاد الديوم وغيرهم لا تسعفني الذاكرة بذكرهم
وفعلا عند سؤالي عنه قالوا انه حداثة فعلا انه يجيدها افضل من كرة القدم بكثير
تحياتي لكم ابو بكر فعلا مبدع في السرد واصل و نحن متابعييين
|
Post: #18
Title: Re: لاعب صغير في سنو، كل البنات حابنو
Author: أبوبكر عباس
Date: 12-05-2021, 07:35 PM
Parent: #17
شكراً يا طريق على المرور ودعم الأدباء بالاطراء المستحق.
خلّص مع الهلال العقد الأول وإدارة الهلال بقيادة طه وعبد المجيد ما دايرين يجددو ليهو، لأنو مرق من آخر معسكر بدون إذن مكتوب.
تدخل العود الطيب عبد الله وكان يرى في حداثة موهبة فريدة ويحبه جداً، ورسل ليهو نفرين جابوا حداثه من مدني وعمل غداء جمع فيهو ناس طه وحداثه،
قال لي ضربنا الضلع، والحَمَام مرصوص في سيخة طويلة، غداء كان يستحق قبلو عرقي كارب،
المهم بعد التحلية والجبنات؛ الطيب عبد الله زول مباشر، قال لي؛
ما لك طلعت من المعسكر بدون إذن؟
قلت ليهو ديل كضابين، أنا كتبت إذن خروج.
زعلوا زعل شديد من وصفهم بالكضب،
قام الطيب سأل حداثه سؤال مباغت:
انت يا إبني بطلت السكر؟
الجماعة الرسلوهم مدني ردوا بصوت واحد:
أيوة يا ريس بطلو
نطّ حداثه قال ليهو كضابين، أمس دي كنت سكران
إتلفت عليهو وقال ليهو بنديك اتنين مليون عشان تعيد التسجيل، موافق؟
قال ليهو لا داير تلاتة
طلع الشيك كتب لي عربون بخمسمائة والباقي اتنين ونص يوم التسجيل.
رجعت مدني لقيت ناس الشبيبة بورتسودان قالوا دايرين يسجلوني
قلت ليهم عاد انتو بتقدروا على قروش حداثه؟
قلت ليهم الهلال دفع أربعة بتقدروا؟
قالوا ليهو بندفع خمسة.
شلت قروش الهلال ووقعت للشبيبة.
ناس الهلال من الزعل رسلوا جماعة حرقوا لي عربيتي بمدني.
لاقاني الطيب عبد الله بعد زمن في إستوب، نزل القزاز وعاين لي بعيونو الكبار وقال لي؛ الخمسمية قصاد العربية
كدا حبايب.
------
لو قدرت برجع أكتب عن فترة البحرين، بورتسودان، وكريمة وعلاقتو مع محمد النصري وشغفه بشعر محمد أحمد الحبيب
وأقول كما قال شاعر عابرة:
نحنا غلبنا نوفي جمايلك وبرضو غلبنا معاك نتماشى))
|
|