ترجيديا اومليت (اوبريت) الكلب الحار

07:50 PM October, 18 2021

سودانيز اون لاين
Mahjob Abdalla-
مكتبتى
رابط مختصر

ترجيديا اومليت (اوبريت) الكلب الحار
منايا اومليت البيض صفار
و معاها محاشى الكلب الحار
ليل و نهار, عشا و فطار
سنبك, تكتك او كل السبل مسفار
بيك يا متوسط او اطلسى المعبار
مشتهيك يا الكلب الحار
رئيس بلدى قدمك انجاز و حير شعبنا المحتار
مزتك ما زى مزة كندهار
او شيتها بالجمار
لا فيها عضم لا فيها بهار
لا فيها طعم و لا طعم الدار
بيك وزنى زاد قنطار
اسمك شين و رسمك ما بندار
بس الحلم غدار
خلى شبابنا يخلى كندهار
و يعبر بحار
عشان الكلب الحار

Quote: عارفا يا دوك .. دا الفرق بينك وبين معظم المناضلين البكتبو هنا والقاعدين في منافيهم يفطرو صباحا اومليت وهوت دوق ويتغدو الساعة اتناشر بعدة خيارات كل واحد فيهم يتفوق على التاني ويتعشو واحدين قبل المغرب وتانيين يكونو في البار وقبل الساعة ٨ كلهم يكونو اتعشو ... فيهم من يفتح سودانيزاونلاين ويديها شتمتين تلاته للجيش والبرهان وحميدتي ويمشي يتغطى بي لحافو تحت التكييف المركزي ويغطس في النوم والمزيكا شغالا من كل الفتحات وفيهم من ينوم ويصحى بدري ويديها كوزين تلاته كراهية للجيش والبرهان وحميدتي ... الفهم الفي عنوانك دا ما أظن يخطر في بال أيا منهم ... كويس أن تفهم أخيرا وتصرح أحسن من إنك تكون فاهم وتركب موجة الكراهية للجيش وقيادته ... البلد منذ ٢٠١٩ يحيط بها خطر التقسيم ويكاد كل من عايش في الخرطوم يحس بذلك ... الكلام دا موجود ومفروش في شوارع الخرطوم وما محتاج لي مسخفين المنافي لإثباته .

Quote: In cuisine, an omelette or omelet is a dish made from beaten eggs, fried with butter or oil in a frying pan. It is quite common for the omelette to be folded around fillings such as chives, vegetables, mushrooms, meat, cheese, or some combination of the above.

هههه لكن معقول ي الهبيب تقدم لينا
البرك فاست خالى تيم هورتنز؟
تيم هورتنز لا يعلا عليها لا تقول لى ستاربكس
ولا فلاجر ولا غيرو..
عالم مترفة 🤣🤣
غايتو

شكشوكة

Quote: Shakshouka (Arabic: شكشوكة‎, also spelled shakshuka or chakchouka) is a Maghrebi dish of eggs poached in a sauce of tomatoes, olive oil, peppers, onion and garlic, commonly spiced with cumin, paprika and cayenne pepper. According to Joan Nathan, shakshouka originated in Ottoman North Africa in the mid-16th century after tomatoes were introduced to the region by Hernan Cortés as part of the Columbian exchange

Quote: هههه لكن معقول ي الهبيب تقدم لينا البرك فاست خالى تيم هورتنز؟ تيم هورتنز لا يعلا عليها لا تقول لى ستاربكس ولا فلاجر ولا غيرو.. عالم مترفةهههه لكن معقول ي الهبيب تقدم لينا البرك فاست خالى تيم هورتنز؟ تيم هورتنز لا يعلا عليها لا تقول لى ستاربكس ولا فلاجر ولا غيرو.. عالم مترفة

سلام الهبيب ابارو
تعرف مستقر في هذه البلاد 25 سنة و لم اكن اعرف ان الـ اومليت هو الببض بالطوة.
لما قريت المقتبس الفوق ده, مشيت العم قوقل و جاب لي الصورة اياها الفوق دى.
ليه بعض الاصحاب من الداخل بتفترضو انو ناس الخارج البفطرو بيض بالطوة لا يحق لهم الحديث عن شئون السودان؟

طبق البيض بى كم ، ولا الكلام ممنوع..
تراكا ي الهبيب تفجخ فيهو مع الفول وما جايب خبر🙈
الاسم هالة ، بعرة فى رهاب ، شكرا قووقل.

🍳🌭
قالو سمح القول في خشم سيدو...
التحية له و لكم أخ محجوب و لضيفك الكريم.

يقولوا ليك بريكفاست ، تجيبى فى حشاوى
الكلب الحار..
سلامات ي دكتورة .. حكمة الله الاحيانا
وعشنا زمن قووقل وطفرات البشير
و التوم بيان المتفن ومطر حصحاص حميدتى 🙈

اقسم بالله انا ذاتي ما عرفتو الا من بوستيك ده
الكلب الحار شايفو فو سيركل K بس ما قاعد امش عليهو
يقوم يعضينا كمان

Quote: حكمة الله الاحيانا وعشنا زمن قووقل وطفرات البشير و التوم بيان المتفن ومطر حصحاص حميدتى

الحمدلله.
قوقل،ما شاء الله عليه،قال لا وجود للكلب الحار
في صحن الإفطار الإنجليزي ولا الآيريش !
و لكن يوجد صوصج و بيكون و بينز و اومليت.
سلام جلالدونا.

Quote: قالو سمح القول في خشم سيدو...

سلام دكتورة نعمات
ترى انا مشيت سرقت من بوستيك او زى ما الفزورة بتقول "دخل القش و ما قال كش".

المهم لما قريت انو ناس جوازات بصحو ياكلو اومليت, قلت تارى جيل السنابك مغشوشين يحكاية حاجة اسمها اومليت و احنا قاعدين هنا و ما سامعين, بقى الواجب انو نكلم الجيل الراكب راسو اولا انو الاومليت القالو صديقى اللدود ياها ذاتها جنى جداد.
اما النوع الثانى, فالنصيحة ما في زول قاعد يأكلها. مرات في الصيف الجاليات بتعمل رحلات باربيكيو في الحدائق و بجيبو للاطفال يتسلو بيها. اما معظمنا بكون تركيزنا علي كنداهار (نسخة مصغرة).

Quote: طبق البيض بى كم ، ولا الكلام ممنوع.

سلام ابارو,من دخل دار بكرى ابوبكر فهو امن, اذا لك الامان الكامل و ابقى معانا.
النصيحة طبق البيض (دستتين) عندنا بحوالي 6 دولارات, ياهو اكل مساكين و هذه وجبتى المفضلة في الفطور مع الافوكاتو. و ما بفتح سودانيز الا بعد ما اتناول الفطور, بس الكلب الحار ما عندو بيهو شغلة.

Quote: اقسم بالله انا ذاتي ما عرفتو الا من بوستيك ده

يا جلال
سلامات و عافية.
مصدقك بدون حليفة. غايتو لو سألت كل السودانيين العايشين ما حتلقى زول عارف الاسم.

مرة رسلت لشقيقتى في البلد ترسل "كول", قامت جهزت معاه لالوب و نبق و قضيم و قرقدان و كركدى و ادتهم لواحد من الشباب الصغار هناك عشان يوصلو امدرمان. الولد شال كل الحاجات و حلف دينو و ايمانو ما بشيل كول.
بسببو تأخرت الشحنه 3 شهور حتى.

___________
الواحد يوم يكتب بمزاج في سودانيز تأكد اكلت عصيدة اليوم داك.

Quote: و لكن يوجد صوصج و بيكون و بينز و اومليت.

سلام دكتورة نعمات
نعم, اظن في اوربا عندهم صوصج. ما عارف الامريكان اى شئ عندهم (خالف تذكر), زى كرة القدم و سوكر.

الدش الاخر الاسمو ما بتقال ده, مرة اسمع في الراديو و اظن في 2018 او 2019, قالو هذه الكلمة دخلت في اوكسفورد ديكشنراى لاول مرة و هى في الاصل كلمة اوكرانية و تعنى نفس الطبخة (البيض بالطماطم)لو في زول عندو رابط لمعجم اوكسفور حتلقو الكلمة و شرحها و اصلها.

__________
قربت اتصل اغالط بتاع الراديو.

Quote: اومليت هو الببض بالطوة.

ههههههههههه
قريت القصيدة وانا ...
إتخذنا الآفاق رحاب
وأتخذنا الأنجم صحاب
شربنا كاسات الهنا
دور منهن
و دور مننا ...
ياخي البيض دا المكون المدني في الأوملت ...
واضح لا إنتا لا جلال ما دخلتو فندق ٥ نجوم
وبيتو فيهو وقمتو الصباح للفطور ...
الأوملت في هذه الفنادق عندو (منصة) مستقلة ...
هناك العشرات من مكونات الأوملت ... ههههه
المكون العسكري ومكون حركات الكفاح بنجيها
باكر إن الله هون وانجمينا من عكة الأيام الأخيرة
دي ... بعدين واضح الأوملت مش كل الحكاية ...
في الضمنا ساعة تجي تقفلا بتقول :- ورق ...
مو كدي؟ ... وبعد ترجع البصر كرتين يا قفلتها
يا واصلت لعب ... يلا ... أرح ... أنا زاتي عندي
باقي كلام ما قتو من يوم كتبتا المداخلة دي
وواقف لي في ظوري ...

جيتا جيت يا ابوصلاح
او برضو جيدا جيد.

Quote: واضح لا إنتا لا جلال ما دخلتو فندق ٥ نجوم وبيتو فيهو وقمتو الصباح للفطور ...

حدى مع الفنادق في كندا, موتل في زيارات سياحية لمدن اخرى مثل مونتريال و اتاوا. فيها تنوم و بس و تصحى الصباح تمشى تداقش وجباتك في الخلا.

عشان كدا نحنا ناس غلبانين و لما نلقى فرقا ياهو ارتباطنا بالسودان عن طريق سودانيز و غيرها من مواقع التواصل الاجتماعى.
تلقى الواحد جاى من الشغل تعبان و بجرى علي الكمبيوتر قبل ما ينوم عشان يقول كلمة او رأى ظنا قد نساهم في تدحرج عجلة الوطن الي الامام.
نعم البلد ما ماشة لقدام لاننا نستخدم الطاقة السالبة اكثر من الطاقة الايجابية و لذلك منذ 65 سنة و الدحرجة حاصلة الي الخلف.

الجنى جداد ياها ذاتها كان عملوها في هوتل 5 نجوم او سموها اومليت.
احمد الشاعر قال: يصنع الصانعون وردا و لكن وردة الروض لا تضارع شكلا.
بالله عليك في اوجه مقارنة بين سوق كندهار و عربات الهوت دوق اللافة عندنا في الصيف هنا. ما فى طبعا.

الكلام دا اتكتب وين يا هبيب و الكتبو منو؟

أي كومبيناشن من ديل مع البيض المخفوق ممكن
يكون ليك (قراصة) الأومليت ... بعدين شوف عيني
وأنا براي مارستا ... اكل الأومليت بالشوكة والسكين ...
ما ضروري الخبز ...
عينا بارده يا الهبيب ... ٣٨ سنة طاشين بي بره
وعارفين البير وغطاها ومعادلتها التالية :-
حقيقة يمكن إثباتها بكل سهولة وهي ... (معظم)
الشعب السوداني بياكل ليعيش لي بكرة .. ولو ما
اكل .. بعد بكرة تدقشو ليك ملاريا معاها تايفويد ...
وعادي ممكن يتلحس وعادي وحقيقي يقولو ليك
كملت .. أو يومو تما ... استغفر الله العظيم ...
في الوقت الفيهو مناضلي المنافي متوردي الخدود
ومتوردي (حاجات تانية حامياني) ومعاهم كل
شعوب العالم عندهم الأكل متعه من متع الحياة ...
متعة الإختيار ومتعة الطبخ ومن بعدها متعة الأكل ...

Quote: الكلام دا اتكتب وين يا هبيب و الكتبو منو؟

الشمشره أعيت من يداويها ... 😃😃😃
بوست الإبادة لصاحبه بكري ... سوري د. نعمات ...

سلام ود البشرى
ياهو الرابط جاك من اخوى الكاشف لكن ما بقول ليك الكاتبو منو :)
يلا بعد ده قول لينا رأيك.

Quote: في الوقت الفيهو مناضلي المنافي متوردي الخدود ومتوردي (حاجات تانية حامياني) ومعاهم كل شعوب العالم عندهم الأكل متعه من متع الحياة ... متعة الإختيار ومتعة الطبخ ومن بعدها متعة الأكل ...

صباح الخير ابوصلاح
تعرف انا افترعت البوست عشان نؤسس لحوارات عميقة ف يا خى ركز شوية.

__________
كلمة حوارات عميقة دى لطشتها من بوست لاخونا النصرى, قال هو و منصور المفتاح عندهم حوارات عميقة علي شاكلة منو الاسمح و كدا.

Quote: يلا بعد ده قول لينا رأيك.

هههههه الله يسامحه احرجني صاحبي
ما بقدر الخو على الملأ, لكن بصرف ليه جـ...ـك في الواتساب تنفعه في سدره :)

ما شاء الله الهبيب ... صاحي بدري ...
صبحك حاضر ... يظهر عليك ود فكي عبدالله ...
كويس إنتا مسكتا في الأومليت ...
بي هناك مولانا نعمات ومولانا حافظ ماسكين
في الراح من صنعها ومن شربها ...
وكلكم خليتو (الفهم) العميق في مجمل المداخلة ...
وجاكين وهاربين للأمام من واقع الخرطوم اليوم
في نهاية الأسبوع الثالث من اكتوبر ...