مبارك الفاضل شايفو الايام دي مركب مكنة ترس كتب سيد الطيب

11:33 PM October, 14 2021

سودانيز اون لاين
Abdulhaleem Osman-Sudan
مكتبتى
رابط مختصر

كتب سيد الطيب

في ناس في بلدنا دي شغلتهم انهم يكونوا حاكمين ما مهم الحكومة تكون مدنية منتخبة، انتقالية مشتركة ، عسكرية منقلبة.
ابزر الشخصيات دي هي مبارك الفاضل شايفو الايام دي مركب مكنة ترس
ومستعد يبقى اي حاجة لو ما شفتو ليه حاجة
مبارك الفاضل ظل يجمع بين اكثر من وزراة حيث شغل منصب وزير الصناعة 1986-1988
وزير الاقتصاد ووزير التجارة الخارجية ووزير التعدين 1988-1989
وزير الداخلية 1989
مساعد رئيس الجمهورية 2002-2004
نائب رئيس الوزراء ووزير استثمار 2017
يعتبر مبارك الفاضل مقايس ريختر للسقوط فعندما اندعلت ثورة ديسمبر 2018 المجيدة وشاف الكيزان بطلعوا في الروح اعلن فض الشراكة مع المؤتمر الوطني وقال ليهم معاكم سلامة انا من الليلة دي مع الثوار وساب ناس ابو قردة وعبود جابر وحسن طرحة يهتفوا مع المخلوع.
ذهب الى اعتصام القيادة العامة ولكن هذا الجيل لم يقبله واخرجه من ساحة الاعتصام ولم يسمحوا له يمخاطبتهم.
الصورة القاعد فيها البرهان مضبلن دي كانت عقب مجزرة فض أعتصام القيادة العامة واعتصامات الاقاليم عقب انقلاب 03/يونيو/2019 وقتها كانت جميع الابواب قد اغقلت في وجههم وفشل انقلابهم وبعد ايام قليلة من المجزرة امتدت يد مبارك الفاضل للبرهان في الخرطوم ويد مناوي لحميدتي في تشاد حتى قبل الوساطة الافريقية.
يشغل مبارك الفاضل هذه الايام مهنة ثائر وترس في ميناء بورتسودان مدعيا التضامن مع قضية أهلنا في الشرق الذين لم ينتبه لهم طوال 40 عام قضاها متنقلا في المناصب العليا بالدولة ووزاراتها.
هذه القضية العادلة اذا وجدت على رأس قيادتها اصحاب نظرة لاخرجوا مبارك الفاضل كما اخرجه الثوار من ساحة الاعتصام.
عندما كان مبارك الفاضل مساعدا للرئيس المخلوع وسأل عوض الجاز عن اموال البترول اين تذهب رد عليه الجاز "بنتشري بيها الزيك ديل"
مبارك الفاضل تنطبق عليه حكاية وزير تربية تم تعيينه في ولاية بعد واحدة من الإتفاقيات السلام الكتيرة العملوها الكيزان مع الحركات
بعد سنة إتفقو مع حركة تانية وقالوا ليه حاننزلك نائب وزير لكن نفس المخصصات، بعد فترة تاني قالوا ليه حا نعينك وكيل بنفس المخصصات.. بعد فترة قالوا ليه حا نعينك مدير عام بنفس المخصصات..
قال ليهم طالما نفس المخصصات أنا معاكم لحدي ألفة في رابعة..
هسه مبارك الفاضل دا وراكم يا توسعوها وتجيبوا ان شاء الله ألفة في سنة رابعة يا حا يبقى ترس وحا يبقى لستك وما بعيد يبقى دعم سريع المهم ما بعرف يقعد الا في كرسي السلطة تحت شعار أُريد حلاً ولن يتوانى في الهتاف سير سير يا عبدالوهاب نحن جنودك للانقلاب سير سير يا حميدتي نحن فداك للكرسي.

منقول