Post: #1
Title: بيان إلى الشعب السوداني المخدوع ....
Author: Dr Salah Al Bander
Date: 10-13-2021, 08:01 PM
Parent: #0
07:01 PM October, 13 2021 سودانيز اون لاين
Dr Salah Al Bander-Cambridge, UK
مكتبتى
رابط مختصر
[19:16, 13/10/2021] Dr Salah Al Bander:
إلى جماهير الشعب السوداني المخدوع ..
المسروقة انتفاضاته في أكتوبر 64 وأبريل 85 وحتى هبة ديسمبر 2018 المجيدة …
وإلى المشير عبد الوهاب البرهان …
وإلى الحاكم النحرير لدارفور القائد مني أركو مكاوي …
والى المشير حميرتي، قائد الدم السريع …
وإلى روح أمدرمان شاعر "أنا أمدرمان .. أنا السودان" ابوعزة ..
إلى المرحوم الحبيب عبدالله محمد زين …
انحنا ناس أمدرمان ذااااتتتنااا بعد كدة حا نقفل كبري النيل الابيض وكبري الفتيحاب ...
وكبري شمبات وكبري الحلفايا من ناس الخرطوم وبحري
لانه انحنا مهمشين والحكومة ما شغالة بينا
.. قبة المهدي وحوش الخليفة ..
نادي الخريحين..
عبدالله خليل .. واسماعيل الازهري ..
والشنقيطي امبراطور الماسونية …
والصادق المهدي .. وجعفر النميري وسوار الدهب ..
وعبدالخالق محجوب ..
وفاطنة السمحة بت أحمد ابراهيم …
وكمان الصادق حفيد المهدي ..
خالد ابو الروس...وهاشم صديق بتاع الملحمة ..
واول كابتن لاكبر فريق فى السودان…
وسفير بدرجة وزير كمااان الرائع دكتور علي قاقرين وكابتن الفريق القومى..
والفنان الذري ابراهيم عوض.. وفناني المفضل الجابرى..
وميرغني المامون واحمد حسن جمعة …
وخلفاء الختمية عثمان عليليبة ويوسف الحسن (أبو العايلة)..
وأساطين حقيبة الفن ..
ورموزهم من سيد عبد العزيز..
وسيف الدسوقى..
وابراهيم الرشيد.. والطاهر..
وعلى محمود التنقارى والعبادى وابوصلاح ابراهيم..
وووو..
واهم شىء تعريف الاذاعة بقول هن..اااااااااا امدرمان ... اذاعة جمهورية السودان..
وأشطر محامي في تاريخ السودان عبدالحليم الطاهر أحمد عبدالله
وشيوخ الرأسمالية السودانية من محمد أحمد البرير وإلى عثمان صالح ...
ورموز أعمال الخير والإحسان ودعم المجتمع وعلى رأسهم أبوزيد البلك ...
وهذا قليل من كثير ...
تااااااني ... عندنا اكبر سوق جملة للملبوسات والاحذية والبطاطين والملايات والستائر (سوق ليبيا)،
واكبر سوق جملة للكريمات والمواد التموينية وزريبة العيش والمحاصيل واجمالي الخردوات ...
والتوابل والتحف والاناتيك (سوق امدرمان) …
واكبر سوق للابقار والخراف وللحوم الحية والنية (سوق قندهار) و (سوق ابوزيد) …
اكبر اراضي زراعية ومحميات انتاج الخضر والفواكه (غرب امدرمان)
....
استاد الهلال واستاد المريخ واستاد الموردة
... ومع مقر الاذاعة والتلفزيون والمسرح ...
ودار فلاح واتحاد فن الغناء الشعبي واتحاد المهن الموسيقية ودار الفنانين ...
عشة الفلاتية ولي عند حنان بلوبلو …
... تور الجر واسماعيل خورشيد ويس عبدالقادر وعوض صديق .. وكمان صديق احمد حمدون اعظم مقريء للقرآن !
وعندنا أكبر متلقي حجج وزعمطة وأكرم خلق الله شوقي بدري السويدي …
.. وحتى الدايات ومستشفي التجاني الماحي ..
وسجن امدرمان وسجن الهدى ....
ومقابر حمدالنيل واحمد شرفي والبكري ..
قصر الشباب والاطفال ...
والاحفاد وجهجهة العباد …
والاسلامية والنصر التقنية والتقانة والاهلية والامام الهادي ...
والكلية الحربية والمطبعة العسكرية والسلاح الطبي وسلاح الموسيقي ..
وسلاح المهندسين وسلام الطيران كمااان ..
النيل الابيض ونهر النيل ..
و …
و …
و …
وبعد دة كللو ما عندنا مطار !! …
وما عندنا حي اسمو المنشية ولا قاردن سيتي ولا المعمورة ولا الطائف..
وما عندنا شارع المشتل ولا شارع 117 ..
وما عندنا بيوت وشقق وفلل بتتأجر بالدولار عشان مافي اجانب بسكنوا امدرمان ..
وما عندنا رئاسة بنك ...
حتي بنك امدرمان الوطني رئاستو في الخرطوم !! ..
وما عندنا الانفال ولا العمارات سنتر لا التسامح ...
وما عندنا مول الواحة ولا سيتي بلازا ...
وما عندنا شواية ولا فرع لي اولاد امدرمان في امدرمان ..
وما عندنا مطاحن سيقا ولا عندنا كابو ...
وما عندنا سفارة ولا قنصلية سااكت في امدرمان ..
وما عندنا نادي الماني ولا نادي وطني ولا نادي امريكي ..
ولا حمامات سباحة ... أو ميادين لعب الغولف ...
وما عندنا كورنثيا ولا السلام روتانا ..
وما عندنا شارع الستين .. ما عندنا برج البركة ولا برج اتصالات ولا ابراج مكة ...
وما عندنا مجمع النصر ولا مجمع الرواد السكني ...
... والما عندنا كتيييير والله !! 😭😭
... عشان كدة انحنا حاسين بانو لدينا مطالب مشروعة ومفروض الحكومة تستجيب لي مطالبنا دي …
ولانو جميع محليات امدرمان محليات يا ايرادية وقاعدة ترفد وزارة المالية بالموارد والاموال وداعمين خزينة الدولة..
لكن مواطن امدرمان مهمش وحقوقو ضايعة
😭😭😭😭😭😭😭😭
... عليه فاننا نطالب الحكومة الانتقامية بالالتفات الي مطالبنا المشروعة ..
والالتزام بقواعد ومباديء العدالة الانتقائية والا فاننا سنقوم بالتصعيد ...
...
#الشارع_بس
عن أهالي امدرمان
الكماندر أركانحرب خلا صلاح ود عباس بندر
وود هدى بت سلمان غندور
القاحط العام
الحركة الشعبية لتحرير عموم أمدرمان …
حي العرب 5/2
صادر في 13 أكتوبر 2021
|
Post: #2
Title: Re: بيان إلى الشعب السوداني المخدوع ....
Author: ABUHUSSEIN
Date: 10-13-2021, 08:13 PM
Parent: #1
اثني
عادل حسين دواش ....
|
Post: #3
Title: Re: بيان إلى الشعب السوداني المخدوع ....
Author: Biraima M Adam
Date: 10-13-2021, 11:01 PM
Parent: #2
البحر أصلاً ما بتملي ودوماً يقول هل من مزيد؟!
قطط سمان .. أمرقوا في الحراية لو ما الشمس سيحتكم!
دكتور خليل غزاكم ليه .. لأنكم مكمن الفساد .. تأكلوا بهناك في الخرطوم وتقشوم خشومكم وتأتي إلي أم درمان عاملين شيوخ وقبب ..
الله يمهل ولا يهمل .. ليكم يوماً أسودا.
بريمة
|
Post: #4
Title: Re: بيان إلى الشعب السوداني المخدوع ....
Author: adil amin
Date: 10-14-2021, 05:13 AM
Parent: #3
الشعب السوداني ما مخدوع ولكن مفروضين عليه الرجرجة بتاعين المركز ديل بي الانقلابات والمشاريع المصرية
ودخل انتخابات من زمن الانجليز 1954 ولحدي زمن الحركة الشعبية 2010
وام درمان بتاعتك دي سبب بلاوي السودان انسان المركز Homo Centralist القايل لحدي هسة مصر ام الدنيا ومشاريعا فصل الخطاب
وعملنا للدنيا فحص دي ان ايه طلعت مصر ما امها
لورجعنا الاقاليم ونقلنا العاصمة كوستي في يناير 2022 ورفعنا علم الاستقلال في كل بيوت السودان
بتنتهي اللوثة بتاعة الانقلابات وبرجع سودان العصر الذهبي ما قبل الاستحمار المصري الخليجي
مشكلة السودان الخمسة ديل بس
الشيوعي
البعثي
الناصري
الكوز
السلفي \
ووعي جمهورية العاصمة المثلثة ومثلث الحمدي وادمان الفشل
ترجع الاقاليم الخمسة باسس جديدة وكل عاصمة اقاليم يكون فيها
مطار دولي حقيقي
جامعة حقيقية مكتملة \ و معاهد في كل المدن الثانوية في الاقليم
مستشفي متكامل ومراكز علاجية في كل المدن الثانوية
والموارد في الاقاليم تطعم مليار نفس مش 40 مليون معطلنها العاطلين عن المواهب في المركز الما شايفين افق ابعد من مصر ودول الخليج الغبية
يا بتاع البحرين
مبدئيا تاني زول بجي يتكدس في الخرطوم مافي والخرطوم ذاتا بتفضا نخليها لي حميدتي وجبريل وصلاح البندر وسنهوري وصديق يوسف
|
Post: #5
Title: Re: بيان إلى الشعب السوداني المخدوع ....
Author: علي عبدالوهاب عثمان
Date: 10-14-2021, 08:09 AM
Parent: #4
| Quote: المشير عبد الوهاب البرهان |
الحبيب بندر تحياتي
من قوقل الاسم ( عبدالفتاح عبدالرحمن البرهان
تحياتي
|
Post: #6
Title: Re: بيان إلى الشعب السوداني المخدوع ....
Author: Dr Salah Al Bander
Date: 10-14-2021, 08:25 AM
Parent: #5
أنا أم درمان انا السودان انا الدور البزيد بلدى انا البرعاك سلام وامان يا ولدى انا امدرمان سليلت السيل قسمت الليل وبنت صباح انا الولدونى بالتهليل وهلت فوقى غابه رماح انا ال فى الشاطئ الغربى سقوط غردون مها الحربى ام انا درمان انا امدرمان انا الواحة ويج البسقى والعطشان بروقى تضوى الواحة وتهدى السارب الضهبان وردو وشدو فوق الناس ونادو بقيت الاجناس وبالتخدير بقيت مقياس وبالتخدير بقيت ميزان ام انا درمان انا امدرمان نصرت الدين وكنت فدايه لى الاسلام وروحو حولى ناس صادقين فداهم فى حياتى غرام وزالو المبداء والفكرى وقلدو اعظم الذكرى ودخلو المدرسه الكبرى ونالو شهادة الايمان ام انا درمان انا امدرمان سقانى النيل رحيق العزه من كأسه انا البى مجدو كنت دليل واية وحده لى ناسه
|
Post: #7
Title: Re: بيان إلى الشعب السوداني المخدوع ....
Author: Dr Salah Al Bander
Date: 10-15-2021, 11:51 PM
Parent: #6
أنا أم درمان ...انا السودان
|
Post: #8
Title: Re: بيان إلى الشعب السوداني المخدوع ....
Author: Dr Salah Al Bander
Date: 10-18-2021, 03:37 AM
حركة تحرير امدرمان معادلة جديدة في السودان!
|
Post: #9
Title: Re: بيان إلى الشعب السوداني المخدوع ....
Author: عمر عيسى محمد أحمد
Date: 10-18-2021, 06:48 AM
Parent: #8
الأخ الفاضل / Dr Salah Al Bander والإخوة المتداخلين
لكم خالص التحيات يا ابن أم در ) ،، والشكر لكم نيابة عن أبناء تلك المدينة الزاهية التي لا تفارق أذهان أبناءها ،، ولكن هنالك مسميات ومواقع تاريخية هامة تنفرد بها مدينة ( أم درمان ) دون غيرها من مدن العاصمة المثلثة ،، فمثلاَ نحن عندنا في أم در حي يسمى حي ( كرور !! ) ،، وكلمة ( الكرور ) في لغة أهل السودان تعني قمة التدني في المستوى الاجتماعي ،، ورغم ذلك فإن أبناء أم درمان لم يستنكروا يوماَ ويتأففوا من ذلك الاسم ( كرور ) ،، في لغة الشعب السوداني ،، وغيرنا من أهل المدن السودانية الأخرى قد لا يقبلون مثل ذلك الاسم المعيب ،، وحتى إذا قبل بمثل ذلك الاسم فهو لا يملك الشجاعة في مواجهة الحقيقة واستخدام ذلك الاسم في تنقلاته اليومية ،، أما نحن في أم درمان فلا يستطيع أحد أن يعيبنا فيما نريد !!! ،،، وكذلك نحن عندنا في أم درمان مواقع تاريخية وثورية لا يملكها الآخرون غيرنا ،، مثل ( موقع كرري ) ،، ومثل ( خور عمر ) ،، الذي قد أنطلق منه العديد والعديد من الإنقلابات العسكرية ،، : حيث يتغنى المتغنون : ( من كرري !! تررم تررم !!! ،، من خور عمر تررم تررم !! ،، وأسرار ذلك الخور التاريخي يعرفها جيداَ أمثال الأخ الثائر ( أحمد سعد عمر ) يرحمه الله ،، وهو بطل من أبطال ( أم در ) كالمهدي والخليفة وخلافهما ،،
وفي الختام لكم خالص التحيات
|
Post: #10
Title: Re: بيان إلى الشعب السوداني المخدوع ....
Author: Dr Salah Al Bander
Date: 10-25-2021, 02:23 AM
Parent: #9
أكيد …
ولكنها تبقى امدر مدينة مقدسة …
|
|