"نعم للشرق مظالم".. سئمنا من هذه الإسطوانة المشروخة.

02:24 PM October, 04 2021

سودانيز اون لاين
Abureesh-أمريكا
مكتبتى
رابط مختصر

عشان ما يجى واحد ناطى.. المقصود بالجلابة فى هذا البوست هم الطبقة الحاكمة فى الخرطوم والتى ورثت القصر الجمهورى من الإنجليز. إنتهى التعريف.

الجلابة لم يعترفوا بمشكلة الجنوب إلا بعد أن رفع الجنيوبيون السلاح.. ولم يعترفوا بمظالم دارفور إلا بعد أن رفع الدارفوريون السلاح.. حتى أن البشير قال لا يناقش إلا
من يرفع السلاح.. وحكام اليوم من العسكر يقولون ان المدنيين ما عندهم سلاح إذاً لا وزن لهم.. هذه هى عقلية الجلابة.. وقبلها لم يفاوضوا الشرق إلا بعد أن رفعت جبهة
الشرق السلاح، فأدخلوا قادتها القصر الجمهورى وخلقوا صندوق الشرق.. هل كان الجلابة محتاجون لكل هذه المأسى لو فتحوا شفخانات بمضادات حيوية لعلاج السل فى الشرق
ولو فتحوا مدارس فى قرى الوديان والجبال؟ ولو وفروا فرص العيش الكريم ودعم أساليب الرعى والزراعة الحديثة وتدريبهم عليها؟ وكل ذلك بتكلفة أقل من تكاليف الحرب
المادية (البشرية لا تقدر بثمن).. بل أقل من مبالغ صندوق إعمار الشرق.. ولماذا صندوق تموله دولة أجنبية؟ أليس للشرق حق فى الميزانية العامة؟ ألم تأتى معظم الميزانية من الشرق؟
يصرفوا الميزانية فى مؤسساتهم فى الخرطوم وما حولها ثم يشحتوا دول الخليج للشرق!! ترك وأبناء البجا لم يقتلوا أحدا.. الذين قتلوا الشعب فى دارفور الان الجلابة أتوا بهم للحكم وأعطوهم الوزارات
ترك لم يصب الخبز فى النيل، والكيزان الذى خربوا الإقتصاد الان الحكومة الجلابية أتت بهم وتتفاوض معهم. ترك كان يحذر الحكومة أسابيع قبل خطوته هذه فلماذا سكتت الحكومة طول هذه المدة؟
ألا تعلم الحكومة نتائج قبل الميناء وإغلاق الطريق؟
الشارع سوف يفتح غداً، والميناء سوف تفتح.. وهذه قرصة أضان الجلابة لأن الجولة القادمة بدون حل المشلكة ستكون ماحقة.
إنسان الشرق يموت بالمئات من أمراض السل وغيرها ويعيشون فى الجهل فلا مدارس لهم مثل بقية الأقاليم. ويعيشون فى الفقر المدقع، والجلابة يشغلونهم عتالة فى الميناء ثم ينهبون عائدات الميناء، وهذا
على طول عقود الإستقلال. عبر 65 سنة لا يرحمونهم بحقنة مضاد حيوى لعلاج السل.. الأدوية مافى أساساً، والان الجلابة يصرخون لأن ترك (أخر) وصول الدواء لأقليم الجلابة.
هل تعلمون كم مات بالسل والملاريا فى الشرق منذ الإستقلال. قرار الناظر ترك خطأ حين تكون جالسا فى الصالون وتتصفح الواتساب. ولكن بالنسبة لأهل الشرق تعبير صارخ عن معاناتهم وظلمهم عبر التأريخ.
لا تفقهون أثر المظالم المتراكم.. كيزان شنو وزفت شنو.. هذه كلها مظاهر للمشكلة.

سلام ابوالريش
فعلا نسمع هذه النغمة دائما:
نعم للجنوب مظالم
نعم للغرب مظالم
نعم الهامش مظالم
نعم للشرق مظالم
و لكـــــــــــــــــــــــــــــن طويلة....

في اول اختبار لموضوع (المظالم), جاء في اتفاق جوبا, دفع مبلغ كم كدا ما عارف من الحكومة السودانية و كان اول رد فعل ان طالب البعض بالانفصال.

إنت يا أبو الريش في زول عاقل مغالطك في وجود المشاكل الموروثة دي
؟
في زول مغالطك في مشروعية المطالبة ـ بتصحيح الإختلال دا؟
وأما الثورة دي من دون الثورات والإنتفاضات قامت وفي توقيت واحد في
كل ـ مدن وقري الوطن ليه؟
ياأخي بوجود ترك إياكانت أجندته وبعدم وجوده المشكلة قائمة
والضرر مس ويمس كل ـ مكونات الشرق وليس فقط المجلس الأعلي لنظارات البجاوليس فقط ـ من شملهم مسار الشرق في جوبا

Quote: إنت يا أبو الريش في زول عاقل مغالطك في وجود المشاكل الموروثة دي

كمال عباس
ما فى زول مغالطنى..بالعكس والعنوان يشهد على ذلك. لا اريد تكرار ما قلته
اى سؤال تانى اتفضل.

Quote: فعلا نسمع هذه النغمة دائما: نعم للجنوب مظالم نعم للغرب مظالم نعم الهامش مظالم نعم للشرق مظالم

وكأن الشمال العريض والوسط في جنة النعيم ...
يالهبيب ... عندكم الناس تموت بي رصاص اخوانم ...
وعندنا الناس بتموت بي قرصة عقرب مصلها غير
متوفر حتى في عاصمة الولايات ...
إتفاقية جوبا هي أس مشاكل الشرق والشمال والوسط
لأنو من مثل هذه الأقاليم في جوبا كانو ديكور ساي
وقبضو ثمن تمثيلهم ...
أمبارح رفض رئيس الجبهة الثورية وعضو مجلس
السيادة رفضا قاطعا المساس باتفاقية جوبا وخصوصا
(التفكير) في إلغاء مسارات الشرق والشمال والوسط
واعتبرها اخلال بالاتفاقية ... هم ناس الجبهة الثورية
ديل نفذو ليهم مطالب دارفور خلاس يعني وبقو يفتشو
لي زيادة مشاكل الأقاليم التانية ...!!!

كيف الحال اخانا ابو الريش

بغض النظر عن جوهر المشكلة

عندي سؤال محير

الناظر القائد ومتزعم الشي الحاصل الان في شرق السودان

ليه ما عمل التمرد او الثورة بتاعته دي ايام الإنقاذ؟

غايتو الا بس تكون مشكلة الشرق دي بدت بعد الثورة

وطوال فترة الإنقاذ الشرق كان زي سويسرا

مهما كانت معاناة شرق السودان الكلنا عارفنها

لما يقودها الان زول كان في قلب التنظيم الحكم البلد ٣٠ سنة
وما احتج مجرد احتجاج وقتها، ويجي بعد الثورة ويعمل فيها تشي جيفارا
عشان هو وتنظيمه بقو خارج السلطة وفقدو فردوسهم

اكيد ثورته حتفقد مصداقيتها تماما

وتكون ثورة حق اريد بها باطل

ولا شنو

عارف يا أخانا ابا ذر..
لو مكان مرشوش بالجاز وجاء واحد اشعل فيه عود
كبريت.. ما حتقول الزول دا اتجاهه شنو او ليه اشعل العود الان بالذات.
يا اسمه البكاء على اللبن المسكوب.. الذي كان يصب الجاز
هم حكام الخرطوم من 1956..
لو ما فى جاز لو ما فى حطب فإن العود او ترك لا مفعول له.
ولا يمكن ان تقنع ناس الشرق بان ترك كوز..كوز واللا جك ما يفهموا ليك الكلام دا

ماذا تعرف عن "الهامش" في شمال السودان؟؟ماذا تعرف عن "الهامش" في شمال السودان؟؟

كلامك سليم ومنطقي يا أبو الريش
عن توصيف منطق المسببات الخلقت الوضع الحاصل الآن

بس انت اكيد عارف ذكاء الكيزان الشرير وبراعتهم في استخدام واستغلال واستعمال اي مشكلة لصالح تنظيمهم وفائدة مصالحهمالشخصية والفردية
واحسن وأفضل مثال هو استغلالهم للدين في تطويع أهلنا البسطاء في كل السودان
وتركيعهم عشان هم يسرقو ويقتلو ويدمرو كل البلد

وزي ما الترابي خلق مشكلة دارفور باستغلال مظالم أهلها نكاية في النص التاني من تنظيمهم
فما اظن تفوت عليهم استغلال مشاكل الشرق ومعاناة اهله عشان مكاسبهم الدنيوية ومصالح تنظيمهم

واي عاقل حيكون واهم وساذج لو افتكر انهم خلاص استسلمو وسلمو امرهم

وصراحة دي لعبوها ب حرفنة شديدة جدا
اقصد تقديمهم الآن تحديدا الناظر ترك واستغلال مشكلة أهلنا المساكين في الشرق

نكاية في الثورة

وابلغ دليل علي كدا هو تحالفهم الآن مع عساكر البشير في المجلس السيادي

عشان كده انا لسه مصر اقول انه الشي البعمل فيه ممثلهم وسط اهل الشرق، هو

ثورة حق اريد بها باطل

وباطل شرير وقبيح جدا كمان

......
اى سؤال تانى اتفضل
..........

أيوة طالما هناك إتفاق في العلل والمشاكل الموروثة والمتراكمة دي
.. وبعد خطوة ضرورة الإعتراف بوجودها وحلها
يبقي السؤال هل يمكن حل هذا الموروث و التركة بضربة لازب وبشكل فوري
ـ في ظل هشاشة هذا الوضع وشح الموارد وجفاف الميزانية بسبب النهب
والتخبط ؛؟
كيف يتم الحل تدرجا أم أخنق فطس؟
وفي ظل تداخل الأجندة السياسية وتسلق بعضا ممن تسببو في الأزمة تاريخا وحاضرا في ظل تداخل هذا مع المطالب المشروعة لأهل الشرق كيف
يتم وضع فواصل وقطع الطريق أمام إستغلال القضية والتكسب الحزب من ورائها ؟

Quote: ألم تأتى معظم الميزانية من الشرق؟

سلام ابو ريش ليك و لي ضيوفك
إذا إعتبرنا (معظم) بمعنى اكثر من ٥٠% هذا يعني ان بقية اقاليم السودان مجتمعة تأتي منها اقل من ٥٠% من الميزانية ....
ما زودتها يا ابو ريش ...... ؟؟؟؟

Quote: وكأن الشمال العريض والوسط في جنة النعيم ...

نعم كل السودان مشاكل و عدم تنمية و ده بشمل الشمال و الوسط و كردفان بس لم الناس يقولو تعالو نقعد نحلها و نؤسس دولة تقولو لا.
نقول ليكم نخبة الخرطوم ما بشوفو السودان خارج جدار العاصمة المثلثة, الواحد فيكم بشيل شنطة الحديد حقتو بجي بسكن في الخرطوم و بقول انا خلاص من سكان الخرطوم محل الكهربة و طيارة الرئيس.
و تعملو فيها مقددين السماء.
توفيق يديكم بالجنبة الفيها الحديدة يا ناس الضهارى, تقومو تشتمو صافينار.


_______
الخلاصة: تعالو اقعدو مع الناس و اسسو بلد, بعدها البناء هين.
الخرطوم بتبقى زى واشنطون دى سى.

Quote: الواحد فيكم بشيل شنطة الحديد حقتو بجي بسكن في الخرطوم و بقول انا خلاص من سكان الخرطوم محل الكهربة و طيارة الرئيس.

هوي ترا يا الهبيب والله انتو جيتو معانا محل الألمي ما تزوغوا مننا وتلصقوها في دار صباح وحبل القيطان مربعات أب سعد عماراتكم تسوي 👋🏾👋🏾😂

Quote: مربعات أب سعد عماراتكم تسوي

سلام منتصر
ديل ما برجعو دارفور الا اذا الواحد اخذ منصب كبير علي وزن اصحاب الجوازات الاجنبية و عودتهم الي الخرطوم.

موضوع البوست عن الطبقة الحاكمة فى المركز.. لا تحرفوا البوست من فضلكم. ما فى عنصرية.. البعض يقفز للعنصرية عشان الإثارة والآكشن
الاقاليم كلها متخلفة واللا ما متخلفة لكنهم ما متحركين.. وأى عمل جماعى اثبت فشله
المظلوم يعرف يعمل شنو .. لا نفكر بعقولهم ولا نتبنى اولوياتها.

.
كل من يتمترس خلف القبلية أو الجهوية شرقأ شمالا أوغربأ لحل مشكلته خارج إطار عموم مشاكل السودان عليه أعأدة النظر

وما تجربة جنوب السودان ببعيد

غرب السودان ليست بكتلة واحدة ولا شرق السودان كما يعتقد البعض

نخدم خط الكيزان بدرأية أو بدون

السودان في مفترق الطرق و هذه هي اللحظات التي تطلب وحدة الخطاب والصف لتفويت الفرصة لكل مندس

سلام أبو الريش.
هذه مداخلة نقدية لي عن طريقة تفكير الطبقة الحاكمة المركزية..بمختلف خلفياتها السياسية والإثنية.
في بوست لمحمد حيدر المشرف..في الصفحة الأولى :


الفكر الطليعي المتقدم دا يا محمد ..طبقة الأفندية والنخب الحاكمة، نخب ما بعد الإستقلال.
لم تأخذ منه سوى القشور والشعارات..التي لن ولم تؤسس دولة بالطبع.

المستعمر بذل جهده في صناعة طبقة ( متأفندة متعلمة) تقود البلاد ..
ولكنه إعترف عند الجلاء ..من أنه لم يفلح سوى في صناعة طبقة من (الإنقليز السود)..
ويا ليتهم حتى نجحوا في أن يكونوا إنقليز سود .

أرى أن تناولك في البوست كان سطحي نوعا ما ..حتى أعادك بريمة ومحجوب للتراك الصحيح..
ألا وهو أنه يجب تشخيص جذور الأزمة..قبل عوارضها..

فطبقة الأفندية..ذوي الياقات البيضاء (المثقفاتية) ..كما تفضلت ووصفتهم..وهو وصف دقيق .

هذه الطبقة مشكلتها كانت ولا زالت ( تستبطن الإستعلاء) في محاولتها تشخيص وتشريح مواقفها
في الأحداث ومسبباتها وتفاعلاتها..في الوطن العريض.
وتحتكر الحقيقة..ولا تقبل سوى بوجهة نظرها أو زواية نظرها المحدودة..
تجاه مكونات وجهات الوطن .

وأي وجهة نظر أخرى أو زاوية مختلفة للنظر إلى الأمور ومسبباتها ونتائجها..
يتم دمغها بالجهل والتخلف..بل وكرت التخوين الجاهز.

كان متوقعا جدا أن تحدث كل أزمات الوطن بهذا الشكل..
ثم تتمظهر تجلياتها في كل محاولة تغيير يقوم بها الشعب ..
وبالتالي تفشل محاولات التغيير ومن ثم نعود إلى مربع واحد .

ليس لأن العيب هو في جهة دون الأخرى فقط .
بل لأن العيب هو في التشخيص ممن ( يمسكون القلم) وبالتالي مصرين
على إمتلاك الحقيقة.
ويرفضون بإصرار (أعمى) أي حقيقة غيرها..
لأن الأمر متعلق بالإمتيازات.. وشعورهم اليقيني بحقهم
الحصري في الوصاية على الشعب..والإمساك برسن قياد هذا الشعب البهيمة في نظرهم ..
هذا الشعب الذي يجهلون
عنه الكثير جدا ..كما بدا ويبدو دوما .

لذلك في ظل هذه الفوضى العارمة ..التي تتعلق باستبطان الإمتلاك
الحصري للحقيقة..وحقوق (الإفتاء) بأن ما يصلح للوطن والمواطن هو
تسليم أمره وقياده..بل مناطقه الجهوية ومقدراته لهذه الطبقة (الإنقليزية السوداء)..
فقط لأنها تجيد الحديث والتنظير باللغة المقعرة والإنشاء..
واللغات الأجنبية ..
وتدعي إمتلاكها لأفكار طليعية متقدمة ..رغم أنها فشلت ولا زالت تفشل في كل محكات الوطن ..
حتى عندما نسلمها قيادنا وقياد أمرنا..وثوراتنا ونضالات شهدائنا..

فنجدها قد عادت ..هي الأخرى..(لحواضنها التقليدية، وكذلك الفكرية الصماء)..في تجاهل تام
لخصوصية وتفرد هذا الوطن بإنسانه وثقافاته المتعددة..و(حريته) في محاولة مقاربة
وحل مشاكله ذات الخصوصية تحت ظل فيسفساء هذا الوطن ..
ومن ثم محاولات الإصرار في صب مكوناته في قالب واحد و(حاضنة) واحدة..
سياسية ومركزية..يعتبر الخروج عليها في كل الحكومات بإختلاف إيدلوجياتها وعسكريتها
أو مدنيتها..
يعتبر الخروج عليها (تمرد) على (الدولة) ..
وطالما أن الدولة في نظر الحكام هي ( أمنا الغولة)..
وطالما أن من يستلمون زمام الدولة ..لا يعرفون قيم الديمقراطية
والحرية وحقوق المواطنة والوحدة في التنوع ..إلخ..من هذه
القيم التي يتشدقون بها ..
فكان لابد ومن الحتمي أن تتجلى كل مظاهر الدولة الفاشل٤ة..
وكان لابد أن تتمرد كل مكونات الوطن بصورة أو بأخرى..و(في
كل عهود تاريخنا الحديث والمعاصر)..على شكل الدولة ذات( الحاضنة المقدسة)
الواحدة والوحيدة..
وأن تعود مكونات الوطن وتلوذ بمكوناتها الجهوية..و(بحواضنها القبلية )
وتتمرد ضد ( أمنا الغولة).. التي ترتدي ياقات بيضاء إستعمارية..
إضافة إلى أنها ياقات قشرية وجوفاء..تتدعي حداثة فكرية
وذكاء سياسي وخبرة في حكم دولة قارة..
ولكنها تعطي نفسها حق ردع مطالبة المواطن بحقه في إختيار طريقة حكم وطنه..أو جهته
أو المطالبة بحريته الحقيقية وعدالة حقيقية وديمقراطية حقيقية..وليست مجرد شعارات تتاجر بها الحكومات
المركزية الشمولية حتى تلك التي تتدثر بالثورية.
والتي لها حيل عديدة في قهر المواطن بحجة (فرض هيبة الدولة)..!!

في تماهي تااام..بين مفهوم ( الدولة)..وبين الحكومات الشمولية(باختلاف أيدولوجياتها أو حواضنها ).

ولذلك صار من الطبيعي أن يسود الجنون ..
وتعلو النعرات العصبية..في مقابل نعرات عصبية..
وتجاهل في مقابل تجاهل..
وعناد مقابل عناد ..
واستحقار وتعالي مقابل استحقار وتعالي..
وعدم رغبة في التفهم في مقابل عدم رغبة في التفهم ..
واتهامات مقابل اتهامات متبادلة..

ومن ثم لعلعة رصاص..في مقابل لعلعة رصاص..
وثقافة تمجيد القوة ..في مقابل ثقافة تمجيد القوة ..
وخطاب أرعن ..في مقابل خطاب أرعن ..
وسطحية وعبط..في مقابل سطحية وعبط..

ونتيجة لذلك، لن يجد (الجميع) ملاذا يلوذون به سوى..(بنياتهم الثقافية والاجتماعية).

ولسان حال الجميع..مدنييهم كان أو عسكرييهم أو متعسكريهم..
( اللي تعرفوا..أحسن من الما تعرفوش ).

تذكرت راديو RTLM
وانا اتابع زوايا النظر لمشكله الشرق
مبروك ل ترك ضمن إستمرار وبعث سياسى جديد
وتحيا القبيله ومجدها القديم.....

Quote: عشان ما يجى واحد ناطى.. المقصود بالجلابة فى هذا البوست هم الطبقة الحاكمة فى الخرطوم والتى ورثت القصر الجمهورى من الإنجليز. إنتهى التعريف.

المصطلح أو التسمية مرتبطة بالشمال- علينا تسمية الاشياء بمسمياتها.
بالرغم من معاناة الشمال شأنه شأن السودان ككل - إلا أن اسهم الإدانه دائمآ يتم توجيهها إليه وإلى إسنانه البسيط.

Quote: إنسان الشرق يموت بالمئات من أمراض السل وغيرها ويعيشون فى الجهل فلا مدارس لهم مثل بقية الأقاليم. ويعيشون فى الفقر المدقع، والجلابة يشغلونهم عتالة فى الميناء ثم ينهبون عائدات الميناء، وهذا على طول عقود الإستقلال. عبر 65 سنة لا يرحمونهم بحقنة مضاد حيوى لعلاج السل.. الأدوية مافى أساساً، والان الجلابة يصرخون لأن ترك (أخر) وصول الدواء لأقليم الجلابة. هل تعلمون كم مات بالسل والملاريا فى الشرق منذ الإستقلال

وأنت هل تعلم عدد الذين ماتوا ويموتون من شمال السودان بسبب السرطان والملاريا والحمى النزفية.
هل تعلم الذين يموتون لعدم وجود مصل مضاد للعقارب؟؟
هل تعلم عدد الأطفال الذين يموتون (غرقآ) في سبيل الوصول إلى مدارسهم؟؟

Quote: موضوع البوست عن الطبقة الحاكمة فى المركز.. لا تحرفوا البوست من فضلكم. ما فى عنصرية.. البعض يقفز للعنصرية عشان الإثارة والآكشن

كان عليك ألا تورد لفظ (الجلابة) - لأنها عبارة مرتبطة بالعقل الباطن لكل سوداني وهي تسير إلى شمال السودان.

العنصرية التي تطلب عدم الإشارة إليها - أنت من قمت بإيرادها عبر لفظ الجلابة- وهل كان الجلابة فقط هم الذين يحكمون
في الخرطوم ؟؟
أين بقية ممثلي الأقاليم في كل الحكومات السابقة؟؟

العنصرية التي تشير إليها هي التي كفلت لفئة محددة أن تستأثر بالمشهد والمنصب والسلطة.

ربما أعود

Quote: وأنت هل تعلم عدد الذين ماتوا ويموتون من شمال

طيب تحركوا طالبوا أقفلوا الشمال.. ما فى زول ماسك يد زول. واللا عاوزين الناس تغرق مع بعض.

Quote: المصطلح أو التسمية مرتبطة بالشمال- علينا تسمية الاشياء بمسمياتها.

التسمية مرتبطة بالشمال، بما فيه شرق السودان.. أى أضان حمراء وجيلابية وعمة دا جلابى.. عند الجنوبيين كلنا جلابة. بعدين لو فى بداية البوست
تم تعريف الكلمة وقبل البوست زاته فتانى مافى معنى لإلباسه معانى أخرى.

Quote: .. عند الجنوبيين كلنا جلابة.

الجنوبيين دخلهم شنو هنا؟؟
مافي جنوبي جاء وكتب هنا عن الجلابة!!
إنت عايز تنظر في تسمية معروفة على إمتداد التاريخ.

Quote: بعدين لو فى بداية البوست تم تعريف الكلمة وقبل البوست زاته فتانى مافى معنى لإلباسه معانى أخرى.

زي ما انت بتكتب نحن برضو عندنا فهم للقراية- ولا إنت عايز تفرض فهمك على القارئ.

كسرة: خليك واضح وقول إنك تؤيد (ترك) في قفل طريق بورتسودان.

Quote: الجنوبيين دخلهم شنو هنا؟؟

الجنوبيون هم الذين اخترعوا عبارة جلابة.. لأن السودانيين من الشمال كانوت تجار ويجلبوا البضايع.. لذلك أى سودانى لونه فاتح أو لابس جلايبة وعمة عندهم جلابى.. ما يعرفوا دا شايقى واللا دا بجاوى.
راجع تأريخ الكلمة دى نشأت متين ووين.

Quote: إنت عايز تنظر في تسمية معروفة على إمتداد التاريخ.

أنت بس أكتب بوست جديد وقول انك أنت فى هذا البوست تقصد الدراويش بكلمة جلابة.. ولن أعترض عليك وسوف أفهما فى الإطار الذى وضعتها أنت فيه.

Quote: خليك واضح وقول إنك تؤيد (ترك) في قفل طريق بورتسودان.

وأكتب شنو تانى؟ بس انت قول لى الكلام المفروض أقوله عشان اقراه وأوقع عليه!!!!!

Quote: طيب تحركوا طالبوا أقفلوا الشمال.. ما فى زول ماسك يد زول. واللا عاوزين الناس تغرق مع بعض.

سلام أبوالريش والله يقفلوا معبر أرقين الجيش يكتلهم جت ، مليارات شركات الجيش كلها من تصدير المنتجات السودانية لمصر لحسابهم , تقفيل الشرق ما ضاربهم فيه حجر دغش لكن
كدي اهبش The military–industrial complex ما شفت الكباشي لمن مشى لترك لا سأل من ادوية لا غذاء بس البهمهم ( قطر الجنوب الشايل المحبوب) البترول

Quote: طيب تحركوا طالبوا أقفلوا الشمال.. ما فى زول ماسك يد زول. واللا عاوزين الناس تغرق مع بعض

ابناء الشمال ما بقفلوا الطرق القومية التي تغذي كل البلد بالسلع الضرورية

وحتى الاهوج برطم لما حاول لقى الردع والرد الحاسم من ابناء الشمال المدنيين

من يخنق البلد بقفل الطرق ويزيد من معاناة المواطنين هذا شخص لا يملك من الوطنية ولا مثقال ذرة بل هو متآمر على البلد وشعبه

بالذات لو كانت مطالبه اقالة الحكومة وحل لجنة التفكيك واستلام العسكر للسلطة

هذه ليست مطالب اقليم هذه مطالب حزب وقد تبناها الناظر ترك وانتم من وراه في غيه تعمهون

هناك طرق كثيرة للاحتجاج ولاجبار الحكومات بالنظر لمشاكل المناطق التي تعاني من اي مشاكل والسودان كله الان يعاني وانتم تعلمون

على كل حال الشرق هو رئة السودان التي يتنفس بها ولا تنازل عنه ابداً مهما كانت الاثمان

نعم لحلحلة مشاكله بالطرق الواعية والسياسية زيو زي بقية الاقاليم وليس بخنق البلاد والعباد ولي الذراع

ان كانت الحكومة مدت حبال الصبر لتصرفات وهرطقات هذا الناظر الجاهل فان للصبر حدود وبالتأكيد سيكون هناك تصرف لعودة عمل الميناء وفتح الطرق

ما يفعله ترك وتصفقون له انتم لا يمت لمصالح الشرق باي صلة لان ما يفعله جريمة بحق شعب كامل وبلد كاملة

Quote: موضوع البوست عن الطبقة الحاكمة فى المركز

عفوا أ . ابو الريش
بذات الفهم
لا فرق بين الطبقة الحاكمة في الخرطوم والعمدة ترك كنموذج لطبقة حكام الاقاليم او المهمشين
ملخص الحكي
ترك ليس هو الحصان الرابح في هكذا سباق
الاصح ترك ليس مؤهلا للعب هذا الدور
بعيدا عن ذلك
شاهدت الاستاذ احمد موسى بالامس متحدثا باسم الشرق فتعجبت

Quote: إنك تؤيد (ترك) في قفل طريق بورتسودان

حبيبنا الشيخ سيداحمد .. مودتي ياجميل
مع التحية للحبيب أبريش
ما عارف مرات الواحد يؤيد الاهل أو القبيلة
والحاجة دي تكون في اللاوعي .. أو قل تعاطف
مثلا تلقى أخوك وعمك وخالك والاخوات والاخوان
ما تقدر تبعد عنهم .. بس كثيرين يخبوا هذا الاحساس
في العلن ..

أنا ما فقيه في الدين لأن زمان مقرر الدين ذاتو كان مختصر
قيل أن الانصار رغم مستوى المعيشة المرتفعة في المدينة المنورة
ورغم أنهم ذاقوا المرارة في مكة كانوا مشتاقين لمكة كأهل وديار
أول مرة اتكلم في الدين ( يمكن يكون كلامي ما 100% ولكن نوع من التبرير)

خاصة للناس الذي قضوا حياتهم في مناطقهم .. ناس المدن طبعاً ما شاء الله لهم ولاء لكل
الوطن بدون قبيلة أو جهة ومتصالحين مع ذاتهم .. ويندمجوا في أي مجتمع

أنا لاحظت في شبابنا من تربوا في البلد ليست لديهم النظرة الكاملة تجاه الوطن
كما المولودين في العاصمة ملاحظ حكاية دي في ( القروبات ) مع أنهم ابناء عم وخال ..

تحياتي الحبيب ابريش .. وتحياتي للحبيب الشيخ سيداحمد ..

أنا كتبت المداخلة دي عشان نلقى حل لهذا الموضوع .. سودانيز فيه إثراء تنوع جميل ..

حياك الله استاذنا الجليل (علي عبدالوهاب)

Quote: ما عارف مرات الواحد يؤيد الاهل أو القبيلة والحاجة دي تكون في اللاوعي .. أو قل تعاطف

صحيح يا أستاذنا- شعور الإنتماء لمجموعة أو منطقة بيفرض على
الواحد الوقوف مع المجموعه- لكن لازم الواحد يبرز وجهة نظره الصحيحة
حتى للمجموعة التي ينتمي إليها - الرأي عبارة عن مسؤولية يا أستاذنا.

نحن في الشمال لازلنا نعاني - الحكومات التي حكمت من الخرطوم لم تقدم لنا
شيئآ- وبالرغم من ذلك لازال الكثيرين يعتقدون أن الشمال يتمتع بإمتيازات
عن غيره من الأقاليم- بالله عليك وانت طالع من (أم بده) ومتحرك نحو الشمال
شفت الصحاري الفاضية دي قدر شنو ؟؟ ياخي شمال السودان كلو ساكن على النيل
مافي اي شيء يبعد عن النيل مسافة عشرة كيلو متر - طيب وين التنمية ووين الرفاهية.
وبعد المعاناة الكبيرة دي يجيك واحد يقول ليك الجلابة والجلابة.

ابوالريش يحاول ان يفرض على القارئ رؤيته في تفسير ما يكتب وهذا خطأ .

شوف هنا حبيبنا (هيثم غالي) كتب شنو :

Quote: ابناء الشمال ما بقفلوا الطرق القومية التي تغذي كل البلد بالسلع الضرورية وحتى الاهوج برطم لما حاول لقى الردع والرد الحاسم من ابناء الشمال المدنيين من يخنق البلد بقفل الطرق ويزيد من معاناة المواطنين هذا شخص لا يملك من الوطنية ولا مثقال ذرة بل هو متآمر على البلد وشعبه بالذات لو كانت مطالبه اقالة الحكومة وحل لجنة التفكيك واستلام العسكر للسلطة هذه ليست مطالب اقليم هذه مطالب حزب وقد تبناها الناظر ترك وانتم من وراه في غيه تعمهون

وشوف هنا اخونا Al Sunda كتب شنو:

Quote: بذات الفهم لا فرق بين الطبقة الحاكمة في الخرطوم والعمدة ترك كنموذج لطبقة حكام الاقاليم او المهمشين ملخص الحكي ترك ليس هو الحصان الرابح في هكذا سباق الاصح ترك ليس مؤهلا للعب هذا الدور

الإقتباسين الإثنين يبينوا انو كل واحد عندو تفسير للكتابة- لكن الإثنين منطلقين من فهم رافض
للفظ كلمة الجلابة والمرتبطة في عقل الناس بالشمال.

سئمنا من تحميل وزر الفشل إلى شمال السودان وحده دون غيره وإختزال المشهد في أشخاص
تنتمي إلى الشمال (فقط) من حيث القبيلة والعرق.

مشاكل الشرق حتتحل لم يتقدم لقضايا الشرق شبابها من الثوار والقوى الواعية المستنيرة يكونوا فعلا هم الممثلين والناطقين باسم قضايا انسان الشرق
ديل هم الحيحلو مشاكل الشرق ةمشاكل السودان موش "ناظر" لايرى ابعد من قدميه ومطية لكل من هب ودب من الفلول

مهمة مثقفي الشرق جسيمة وعسيرة
والحل يبدا من بينهم اولا عندما يتقدمو هم للمشهد ويكونوا اصحاب الصوت الاعلى وسط الشرق والممثلين الحقيقين لقضايا الشرق

دي هى المعركة الاولى

يا الشيخ معليش لكن انت تسعى لحرف البوست عن مساره وهدفه.. أرضكم صحراء أزرعوها ياخ.. الحكومة منعتكم أو ما ساعدتكم احتجوا. ما سمعت الإحتجاج السلمى حاربوها.. من مات دون ماله فهو شهيد.
يعنى عاوز الشرق يشوفكم المثل الأعلى ويحتذى بكم فى عدم الإنتفاض لنيل حقوقه بعد أن تغير العالم ووسائل الإتصالاات سهلت ربطهم ببعضهم وتوحيد كلمتهم. ؟؟ أنا مافى مقام أقدم لكم نصائح.. لكن أعملوا
قروبات واتساب وأجمعوا قروش عمروا بيها الصحراء.. اعملوا أى شئ.. وما كان لى أقول لك دا لولا انك عرضت مشاكل منطقتكم. دا ما شغلى.

Quote: يا الشيخ معليش لكن انت تسعى لحرف البوست عن مساره وهدفه.. أرضكم صحراء أزرعوها ياخ.. الحكومة منعتكم أو ما ساعدتكم احتجوا. ما سمعت الإحتجاج السلمى حاربوها.. من مات دون ماله فهو شهيد.

معقول يا ابوالريش ده منطقك العايز تناقش بيهو ؟؟

للعلم فقط الشمال أهله (ترابلة) يعني الزراعة هي المهنة الرئيسية.
يبقى قصة انو الناس تزرع دي حاجة طبيعية.

Quote: يعنى عاوز الشرق يشوفكم المثل الأعلى ويحتذى بكم فى عدم الإنتفاض لنيل حقوقه بعد أن تغير العالم ووسائل الإتصالاات سهلت ربطهم ببعضهم وتوحيد كلمتهم. ؟؟

إطلاقآ ليس هذا هو المقصود.
نحن لا نملي رؤيتنا على أحد- ولكن البوست اشار إلى عبارة مرتبطة بالشمال- لفظ الجلابة مرتبط في عقل الناس
بشمال السودان- ورجاء لا تحصر العبارة في جنوب السودان فقط - حتى غرب السودان يقول العبارة ويعني بها
شمال السودان- لا تحاول أن تصف رفضي للعبارة بتغيير مسار البوست - كان يمكنك أن تقول الفئة الحاكمة في
الخرطوم دون العبارة التي تعنينا في الشمال.
على الناس أن تنظر إلى الشمال بمنظور مختلف - الإقليم الوحيد المتماسك إجتماعيآ ولم ينجر أهله للقتال فيما بينهم.
يمكن أن يكون مفهوم الدولة مبنيآ على هذا الإقليم لإشاعة روح التسامح والتعايش بين مكونات قبلية مختلفة.

مع التحية.

Quote: ابناء الشمال ما بقفلوا الطرق القومية التي تغذي كل البلد بالسلع الضرورية

استاذ هيثم غالى
طبعا المقتبس ده فيهو "انا" و "نحن" و الـ "نحن" في تقديرى اسوأ من الـ "انا".
و برطم ممكن بكرة تانى يعيد الكرة و يقفل الطريق و الافندية في الشمال ما في ايدهم شئ غير العودة الى الحكومة للقيام بواجبها تجاه مواطنين سودانيين و النظر في مطالبهم او اللجوء للعنف ضدهم و هو مرفوض و كذلك الـ vigilante مرفوض.

اى احتجاج بدون استخدام العنف فهو وسيلة ديمقراطية و جائز. في مراحل التجارب الديمقراطية القليلة التى مرت بها السودان يمكن ان يستخدم البعض ممن لا يؤمنون بالديمقراطية هامش الديمقراطية ذاتها لتحقيق اهدافهم مثلما ما حدث من الجبهة الاسلامية التى استخدمت هامش الديمقراطية الثالثة لتهيئة المناخ لانقلابهم المشئوم.
ما بين هذا و ذاك, ممكن يكونو في ناس حقا عندهم قضية عايزين يعرضوها و قد يكون ترك منهم, و لونظرتو لاتفاقية جوبا, بنلقى فيها ثغرات كثيرة و تقريبا من اول يوم اتضحت فيها معالم الاتفاقية, اختنا امنة مختار تحدثت هنا كثيرا ضدها , في هذا السياق ممكن نقول كلنا ما قدرنا نسمع لصوت العقلاء حتى انفلت العقد الي غيرهم.

اذا التركيز يجب ان يكون في كيفية السير الى الامام و علاج ما يمكن علاجة و ليس بالاصرار باسلوب الـ deflection from the real issue

عندنا هنا في كندا قبل عامين 2019, قام السكان الاصليين كما يسمونهم هنا (الهنود الحمر بالسودانى) بقفل خطوط السكك الحديدية لمدة شهر تقريبا احتجاجا علي محاولة الحكومة تمرير خط انابيب غاز من منطقة تابعة اداريا لهم (بزعامة زعيم قبيلة). الحكومة لم تقل له متمرد او شيوعى, بل جلست معاهم حتى تم حل المشكلة.
بالمناسبة, السكك الحديدية خط حيوى جدا و لذلك قرصو الحكومة في يدها البتوجعها.

Quote: للعلم فقط الشمال أهله (ترابلة) يعني الزراعة هي المهنة الرئيسية. يبقى قصة انو الناس تزرع دي حاجة طبيعية.

يا الشيخ حيرتنا.. وأنا أيش درانى بالشمالية أكتر من أهلها؟ كنت فقط أرد على كلامك أدناه:

Quote: بالله عليك وانت طالع من (أم بده) ومتحرك نحو الشمال شفت الصحاري الفاضية دي قدر شنو ؟؟ ياخي شمال السودان كلو ساكن على النيل مافي اي شيء يبعد عن النيل مسافة عشرة كيلو متر

تناقض غريب

ده كلامك يا ابوالريش

Quote: أرضكم صحراء أزرعوها ياخ..

وهذا ردي عليك

Quote: للعلم فقط الشمال أهله (ترابلة) يعني الزراعة هي المهنة الرئيسية. يبقى قصة انو الناس تزرع دي حاجة طبيعية

يبقى كيف بترد على كلامي في مداخلة لاحقة وانت تكتب هذه المداخلة:

Quote: يا الشيخ حيرتنا.. وأنا أيش درانى بالشمالية أكتر من أهلها؟ كنت فقط أرد على كلامك أدناه:

Quote: تناقض غريب

انت شايف انو زيادة الرقعة الزراعية المفترض تمتد من النيل فيها تناقض؟؟

ابوالريش- عبارة (الجلابة) مرتبطة بالشمال.
ما معنى كلمة (أدروب) في العامية السودانية؟؟ هل تعني (الأقباط ) أم تعني فئة أخرى؟؟

Quote: أرضكم صحراء أزرعوها ياخ.

نعم قلت ليك كدا يا الشيخ.. ودا كلامك أنا ما زدت فيه.. أقرأ كلامك تانى.

الشيخ كتب:

Quote: بالله عليك وانت طالع من (أم بده) ومتحرك نحو الشمال شفت الصحاري الفاضية دي قدر شنو ؟؟

يعنى صحاريكم قاحلة من ام بدة لحد الدبة.

كتب أبو الريش
.......

أنا مافى مقام أقدم لكم نصائح.. لكن أعملوا
قروبات واتساب وأجمعوا قروش عمروا بيها الصحراء.. اعملوا أى شئ.. وما كان لى أقول لك دا لولا انك عرضت مشاكل منطقتكم. دا ما شغلى.
.......
" صحرات" شنو ياأبو الريش؟
يغشك الشيخ سيد أحمد ويلعب ليك دور الضحية ..
إي نعم صحيح المركز لم يقدم للشمال شئ يذكر
ولكن
تقصد بالصحراء الشريط النيلي ـ الزراعي ـيعتمد أهله علي الزراعة لا علي
الرعي الصحراوي

-- علي هذا الشريط قامت أعظم الحضارات جنوب الصحراء الكبري
- نبتة والمصورات وكبوشية والممالك المسيحية
دا تاريخيا
حاضرا إنت أظنك طولت من السودان يا أبو الريش
اليوم تجد أضعاف الأراضي المروية من النيل تروي بالري الجوفي "المتر"
في مساحة كبيرة وشاسعة فاقت الأراضي الزراعية المورثة
- من أين تم تمويل هذه المشاريع الأهلية ـ من التعدين الأهلي
الشباب نفضو حياة الخمول والكسل ـ وشقو الصخر والصحاري حتي حدود ليبيا ومصروتشاد ـ بحثا عن الذهب ثم عادوا ليعمرو مناطقهم ويرتفعو بمستوي
معيشة أهلهم ـ بناء سكني جديد ـ نمط حياة جديد ولكن مردود الذهب
لم يذهب للحياة الإستهلاكية وإنما ذهب أكثره للتوسع الزراعي
- سد مروي؟ أضر المنطقة أكثر مما نفعها ـ ويذهب خيره وطاقته لبقية الوطن
فالمنطقة عرفت التوليد الكهربائي قبل السد بعشرات السنين ـ محطات ضخمة تبرعت بها المانيا
ـ المنطقة تنتج فولها وقمحها وذرتها بالإضافة للبلح طبعا ـ وفواكهها وخضرواتها ـ وتكتفي ذاتيا
من الإغنام والماشية ـ
ولاتعتمد علي منفذ خارجي واحد =ميناء بورتسودان وإنما وسعت منافذ تجارتها
شمالا عبر أرقين وليبيا ـ تصديرا وإستيرادا
أها دا كلو بجهد ذاتي وبلا دعم حكومي ـ عرق وسواعد الشباب وشق الصخر
والتنقيب في الفيافي وإصلاح الأرض لتنتج زرعا وقمحا وخضرة
المنطقة اليوم إجتذبت جعليين وميرفاب وكبابيش وفوروإثيوبيين جاءوا ليثتمرو ويزعوا
وعاد بعض أبناء المنطقة من المدن والغريب كل هذا المزيج الرائع يعيش في
تجانس ـ وسلام ـ لابنادق ولاسيوف أو حراب ولاتجييش قبلي الخلافات تحسم
عبر القانون ـشرطة وقضاء
........... أها المنطقة برضها مظلومة حكوميا بس لم يلجأ الناس لحمل السلاح
وقطع الطرق ولم يقعوا فرائس للإستغلال السياسي
ـ
أعرف وطنك يا أبوالريش ـ أقصد جدد معرفتك به ..

الحكومة وعدت وأخلفت ـ وعدت بشق ترعة من بحيرة السد تمتد لحدي حلفا
ولم تمول ولم تساهم في دعم وتمويل الري الجوفي ولا في إصطلاح الأراضو ـ ولا في حركة النقل والترحيل
ولا المساهمة في مكافحة الافات الزراعية ولا بناء مصدات تحمي
الناس من الفيضان

يا كمال عباس - ابوالريش أورد لفظ الجلابة.
وهو سبب إعتراضي لأنه مرتبط في الذاكرة بالشمال.

هيثم غالي و السندا ابرزوا وجهة نظر تنطلق من نفص فهم الرفض.

ابوالريش شايف انو قطع الطرق وإغلاق مداخل المدن هو الحل للمشاكل!!

بعدين يا كمال ماتغششوا بالله - طالما هو متبني وجهة نظر غريبة بالصورة دي.

بالمناسبة يا ابوالريش نحن في الشمال الحكومات المتعاقبة لم تقدم لنا شيء- ابدآ.
من ما قمنا شفنا اهلنا اياديهم في ايادي بعض الكل يساهم بما يستطيع لأجل توفير
لقمة عيش كريمة - بالرغم من بساطتها -لكن ما اجملها- وزي ما قال ليك (هيثم غالي)
نحن لا بنقفل ولا بنمنع- مش خوف - لكن لأنو فهمنا انو السودان كلو متضرر من الحكومات
التي حكمت.

Quote: .. أها المنطقة برضها مظلومة حكوميا بس لم يلجأ الناس لحمل السلاح وقطع الطرق ولم يقعوا فرائس للإستغلال السياسي

الكلام ده بمجرد من تطلع من (الجيلي) وانت داخل على (الميجا و جبل جاري) لغاية ماتوصل
(حلفا التاريخ)- وكذلك ضفة النيل الأخرى .

إتخيلو لو النيل ينبع من جهات الناظر ترك كان عمل شنو؟
ولو كهربة السودان منبعها أو ممرها جهات ترك كان عمل شنو؟
ولو طرق تصدير الإبل والماشية من غرب السودان لي مصر تمر عبره كان عمل شنو ؟
ولو المواني والنيلية والبرية ـ من وإلي مصر تمر عبر طين ترك كان عمل إيه؟

Quote: ابوالريش شايف انو قطع الطرق وإغلاق مداخل المدن هو الحل للمشاكل!!

يا الشيخ ياخ انت مصر على استعمال فهم الجلابة السائد مع انو شرحت المعنى الذى أقصده.. وهسى كمان تقولنى ما لم أقله.. متين قلت الحل فى قطع الطرق وإغلاق مداخل المدن؟
ياخى ما تنط الشجر القصار.. أكرب شوية وأقرأ الكلام وناقشه فى مستواه.. قلت ليك إغلاق الطرق (وليس قطع الطرق) هو قرصة اضان الحكومة.. ولكن الحل موضوع اخر..
الحل هو إما الشرق يحصل على كل موارده 100% ويدفع ضرائب فقط للحكومة المركزية.. كما تفعل الدول الديمقراطية.. هل تعلم فى أمريكا لو اشتريت بيت أو مزرعة وأكتشفت بترول
أن بئر البترول التى تحفرها هى ملكك.. بالله موش هى دى الشريعة الإسلامية نفسها؟. يطبقها الغربيون.. شركات ولايات الشرق، وفى كل الولايات سواء فى البترول او الذهب او الزراعة
تدفع الضرائب القومية Federal tax وضرائب الولايات.. ما يحدث فى السودان هو نهب أموال الأقاليم ثم عدم إعادتها لهم فى شكل خدمات.. طيب هذا الشرط الأول، الخيار التانى
هو أخر الدواء الكى، إنفصال الشرق عن السودان واستقلاله بموارده، بل زيادة عليها رسوم عبور بضائع (السودان). لا تعتقد الكلام دا بعيد.

الناظر ترك عمدة وخالي أطيان ! حديث الصراحة
يهدد الناظر ترك بفصل شرق السودان هل يملك شرق السودان مقومات دولة؟هل يملك أغلبية ترك تمكنه في حال إقرار تقرير المصير هل يملك أغلبية تقرر فصل الشرق ؟- كرت الميناء ـ سلاح ذو حدين نبدأ بكرت الميناء الميناء هو هو مركز فدرالي ـ أنشأ علي هذا الأساس ـ عوائد الميناءوكما هو العرف جزء يذهب للحكومة الفدرالية وجزء للشرق تقسيم عادل ـ مركز وإقليم ـ طيب أفورقي فصل إرتريا وأخذ الموانئ ـ وبالمناسبة أصبحت شبه خاويةالان ـ وإستحدثت أثيوبيا بدائلها ولم تخنق ـ وتضررت إرترياأها قول يا ترك فصلت وأخذت الميناء ـ حاتتحول المدينة لبيت أشباح والميناءحايشتغل بطاقة متدنية خالص خالص ـصادرات وواردات شرق السودان فقط وراح دخل الميناء وتفشت العطالة وتعطلت التجارة
ثانياهل يملك ترك أغلبية تدعمه في خياره الإنفصالي ؟ تاريخيا الشرق موطن البجا ـ وخصوصا شماله ووسطهزي ما أمدرمان أرض الجموعية وشرق النيل موطن البطاحيين ولكنهم الان أقلية منذ عهد الفونج والحج وتوافد المراغنة أصبح الشرق منطقة جاذبة للغير وبدأ التنوع والتعدد ـ ثم إنشأ ميناء بورتسودان والسكة حديد ذات التوافدوالتعدد القبلي والعرقي ـ ترك لافتته عرقية وقبلية ودعوته الإنفصالية تضر بالشرق قبل غيره لاإعتقد أن البشاريين والبني عامر والأمرار والزبدية والشكرية والهوسا والمنحدرين من مناحي السودان المختلفة سيصوتون للإنفصال ـ وطبعا البجا أيضا لن يتبعواترك في مغامرته الإنتحارية هذه ولكن إنهم تابعوه ـ بأنصارهم وختميتهم وقواهم الحديثة فإن لا ولن يملك أغلبيةتمكنه من الإنفصال
ثالثا لا عتقد أن الشرق ولعوامل طبيعية وإهمالية يملك مقومات وموارد دولةـ الميناء وإيرادته برة المعادلة ـ وقد ينطبق هذا علي أقاليم أخريـ مواردك شنو ؟ وصادراتك إيه؟

بقية السودان كما أثيوبيا ستشوف خيارات أخري في موضوع الميناء لن تقع في رحمة ترك ـ أقفل الميناء أفتح الميناء ـ !

بعدين للناس اللي بتتكلم عن عوائد الميناء ـ رسوم الميناء والخدمات
بتختلف عن الجمارك واللي إشرافها وتحصيلها فدرالي ـ مركزي
ـ عندك نسبة كإقليم في رسوم الميناء والخدمات والأرضيات بس الجمارك دي وضعها مختلف

قبل ان يتحول البوست الى حائط مبكى وبعرض فيه المهمشين فى كل انحاء الجمهوريه الحزينه وادق من الحزينه وصفا الغائبه ...إذا ان مفهوم الوطن القومى لم يستقر بعد ان بدأ مد جذور للنمو لم تكتمل بل وعلى ضعفها اصابتها امراض وآفات لكن ودون خوض فى تفاصيل المشكله لابد من الإشاده بمداخلات رصينه لبعض المعلقين هنا منهم كمال عباس فى مقدرتهم على سلامه الرؤيه ومخاطبه المشكله بمنطق بارد وحاد....
غلاهالعنصريين فى منير بكرى لن تشفع لهم خلفيات فكريه واكاديميه وهم يسقطون فى وحل النازيه الجديده ويحطون من قدر الانسان بعلل الجغرافيه وإستيطان اراضى فى مرحله ما وكأن التاريخ توقف ولايقبل اضافه وامتدادات واصبحت الاصاله وهى من الكلمات المشبوهه مقياس لقيمه الانسان
الورطه الكبرى التستر خلف قيم الديمقراطيه والحريه التى تعتنى ب الانسان دون ربطه ب عرق او لون وتوفر له حقوق وإنتماء وحقوق مواطنه بشروط تراعى سياسه الدوله لكنها تتفق ربما فى معظم البلاد على حصول الافراد المعنين بحقوق التجنس وتبعياتها من ممارسه كافه الحقوق ومن ضمنها الحقوق السياسيه
غلاه العنصريين والديمقراطين وهو جمع فريد فى قلب واحد.... يفرقون بين مواطن اصلى ومواطن تقليد
وشكرا الساده الانجليز وهم يصنعون حدودا وهوامش تساهم فى تعربف معنى الوطن
ولاعزاء للحفاه عابرى الحدود والازمات فى تاريخ بعيد وقديم يعبرون بذات اللغه فى ارض تعرفهم وبعرفونها وبين جبل وسهل تتبدل احوالهم بين اصل وتقليد.....مرحبا ب الدبمقراطيه

الاخ عبد الرحيم محمد صالح

لا أعرف أناقش الغاز.. يا ريت لو مداخلكم الفوق دى كانت أكتر مباشرة وواضحة.