Post: #1
Title: توحيد تجمع المهنيين وعودة الشيوعي لقوى الحرية والتغيير
Author: عبدالعظيم عثمان
Date: 10-01-2021, 08:56 PM
Parent: #0
07:56 PM October, 01 2021 سودانيز اون لاين
عبدالعظيم عثمان-
مكتبتى
رابط مختصر
ضرورة عاجلة ومطلوبة لمواجهة مؤامرات العساكر والفلول
اي خلاف يتأجل
أي ملامة تترحل
اي شئ يتأخر
ويتقدم تحالف ثوري قوي لحماية الإنتقال
|
Post: #2
Title: Re: توحيد تجمع المهنيين وعودة الشيوعي لقوى ال
Author: عبدالعظيم عثمان
Date: 10-01-2021, 09:06 PM
Parent: #1
مهما كان الخلاف مع المجلس المركزي للحرية والتغيير
هم الآن يخوضون حرباً شرسة في مواجهة العساكر
حماية للإنتقال وحماية للحكم المدني الذي تحاول مجموعات
العسكر العبث به
من وجهة نظري توحيد قوى الثورة في الوقت الراهن فرض عين
ولا مجال للمزايدة والتلاوم
الثورة يتهددها خطر عظيم
|
Post: #3
Title: Re: توحيد تجمع المهنيين وعودة الشيوعي لقوى ال
Author: محمد البشرى الخضر
Date: 10-01-2021, 09:09 PM
Parent: #2
ح تقدموا شنو يا عظمة انتو في التجمع الاتحادي و بقية المجلس المركزي او ما عرف بالاحزاب الاربعة المسيطرة للناس ديل؟
كل الناس بتتكلم عن سيطرة احزاب على المجلس و على الحكومة, لو عايزين الناس يجوكم قدموا تنازلات حقيقية
لو حرفا حركة بكرة دي ممكن تقلبوا بيها الطاولة على العسكر
|
Post: #4
Title: Re: توحيد تجمع المهنيين وعودة الشيوعي لقوى ال
Author: عبدالعظيم عثمان
Date: 10-01-2021, 09:27 PM
Parent: #3
سلامات ود البشرى
طبعا سيطرة التجمع الاتحادي والبعث والمؤتمر السوداني
على الحكومة دا كلام غير سليم
الحكومة دي التجمع الاتحادي عنده فيها وزير واحد هو وزير الاتصالات
وزير الاعلام تجمع اتحادي لكن رشحه تجمع المهنيين
المؤتمر السوداني عنده وزيرين سلك وابراهيم الشيخ
البعث عنه عنده يوسف الضي
وين السيطرة ؟
حركة مناوي القال تم إقصائه
عنده حاكم اقليم ووزير المعادن
العدل والمساواة عندهم وزيرين
وين سيطرة الاربعة المزعومة دي ؟
|
Post: #5
Title: Re: توحيد تجمع المهنيين وعودة الشيوعي لقوى ال
Author: Nasr
Date: 10-02-2021, 07:13 AM
Parent: #4
بعد ما ضيعتوا الفترة الإنتقالية مماحكات ومشاحنات بين الإخوة الاعداء
راجعين تفتشوا في الحلفاء؟؟؟؟
برضو ما ضاعت حاجة
الكل محتاج للكل لنستطيع معا مواجهة وهزيمة الجيش وحلفاءه الكيزان الفاسدين
|
Post: #6
Title: Re: توحيد تجمع المهنيين وعودة الشيوعي لقوى ال
Author: عبدالعظيم عثمان
Date: 10-02-2021, 08:04 AM
Parent: #5
يا نصر من البداية الخيارات كانت صعبة للغاية
مافي خيار كويس وحوله إجماع ولم يؤخذ به
الشراكة مع العسكر لم يكن منها مفر
ولم يكن هناك اي خيار آخر يحفظ دم السودانين غير هذه الشراكة
مافي زول متفاجئ من مؤامرات العساكر ومحاولتهم للإلتفاف حول
الثورة ومطالب الثوار
المهم الآن ان و موقف يجمع الثوار لمواجهة مخططات الفلول
اذا الناس قعدوا يتلاموا وعاوزين يعملوا حفلات شواء لبعض
فسوف يضيع ما تبقى من الثورة
نقطة اخيرة : المجلس المركزي للحرية والتغيير اذا كان عاوز يحافظ
على مكاسبه في السلطة هل كان سيخوض هذه المعركة مع العسكر ؟
الموضوع هو لجم العسكر ومنعهم من الانفراد بالسلطة خلال الفترة الانتقالية
دا موقف جديد عاوز شغل من كل قوى الثورة
|
Post: #7
Title: Re: توحيد تجمع المهنيين وعودة الشيوعي لقوى ال
Author: اخلاص عبدالرحمن المشرف
Date: 10-02-2021, 08:15 AM
Parent: #6
برنامجكم ال علي ضوئه مقدم دعوتك هو شنو؟
ولا محاصصات تاني
|
Post: #8
Title: Re: توحيد تجمع المهنيين وعودة الشيوعي لقوى ال
Author: علاء سيداحمد
Date: 10-02-2021, 10:06 AM
Parent: #7
تحياتى يا عظمة
كتبت فى بوست مجاور :
Quote: تقدير الموقف مسؤولية الجميع
نعم بالظبط وياريت توحيد شقي تجمع المهنيين وعودة الشيوعي الى الحاضنة ق ح ت - و هل يستبينون النصح قبل ضحى الغد ؟. |
لابد من العودة الى منصة التأسيس باتفاق الحد الادنى وترك الصراعات جانباً فى الوقت الراهن .
|
Post: #9
Title: Re: توحيد تجمع المهنيين وعودة الشيوعي لقوى ال
Author: عبدالمنعم الطيب حسن
Date: 10-02-2021, 11:56 AM
Parent: #8
لا يا شيخ!!!
والله ضحكتني،
الحزب اصلا مع اسقاط الحكومة..
كدي اولا اعلنوا فض الشراكة مع العسكر
واستقالة الحكومة...
واعتذروا للشعب السوداني
والثوار واسر الشهداء عن مراهقتكم السياسية
يا صغار...
بعدين الحزب الشيوعي غادر قحت
باختياره، عالجوا اسباب مغادرته اولا..
ولن يعود الحزب ل قحت المتهالكة اصلا..
تحالف جديد يبحث في مدنية الدولة تماما
وباقي شعارات الثورة،
الحزب مع الشعب ومع الشارع
انزلوا للشارع والتحموا بالشعب تجدونه هناك..
تحياتي...
|
Post: #10
Title: Re: توحيد تجمع المهنيين وعودة الشيوعي لقوى ال
Author: نعمات عماد
Date: 10-02-2021, 12:12 PM
Parent: #9
سلام
ليه المتآمرون على الثورة أكثر إتفاقاً و مرونة من مكونات الحاضنة الأولى التي كانت على
وفاق قبل توقيع الوثيقة الدستورية؟
إذا كان قيس سعيد قد سحب البساط من تحت أقدام كيزان النهضة/تونس، فإن كيزان
السودان يقلدونه لسحب البساط من تحت أقدام الحكومة المدنية.
|
Post: #11
Title: Re: توحيد تجمع المهنيين وعودة الشيوعي لقوى ال
Author: اخلاص عبدالرحمن المشرف
Date: 10-02-2021, 01:04 PM
Parent: #10
معقول كشة ودكتور بابكر
استشهدوا عشان يجونا
ارجوزات قاعة الصداقة؟!!!!!!
|
Post: #12
Title: Re: توحيد تجمع المهنيين وعودة الشيوعي لقوى ال
Author: علاء سيداحمد
Date: 10-02-2021, 01:58 PM
Quote: بعدين الحزب الشيوعي غادر قحت
باختياره، عالجوا اسباب مغادرته اولا..
ولن يعود الحزب ل قحت المتهالكة اصلا..
تحالف جديد يبحث في مدنية الدولة تماما |
سلام يا منعم
عشان مدنية الدولة وعشان الحاجات تبقى كويسة
قالوا امشى مع الكضاب لغاية خشم الباب
والوضع الآن ليس كما كان بالامس تحالف ثلاثة اربعة احزاب فقط .
عينو خير وانضموا الى ركب التحالف الجديد .
|
Post: #13
Title: Re: توحيد تجمع المهنيين وعودة الشيوعي لقوى ال
Author: عبدالمنعم الطيب حسن
Date: 10-02-2021, 02:32 PM
Parent: #12
Quote:
سلام يا منعم
عشان مدنية الدولة وعشان الحاجات تبقى كويسة
قالوا امشى مع الكضاب لغاية خشم الباب
والوضع الآن ليس كما كان بالامس تحالف ثلاثة اربعة احزاب فقط .
عينو خير وانضموا الى ركب التحالف الجديد |
هلا علاء،
ننضم تاني للوهم ديل،
ياخ سمعة دا كان بكتب في اليوم الواحد عشرة بوستات،
الايامات ديك، كلها ضد الحزب وتجمع المهنيين
وقوى الثورة الحية،
عصابة الاربعة، هم السبب مع الكيزان وحمدوك في وصول البلاد
لهذا النفق المظلم..
الحل في الشارع.. يمشوا هنالك لو ما زال لهم شعب هناك..
ياخ ما تقدر تصدق بمدى السعادة، عندما تحرك الحزب واصدقاءه
في الشارع ومشوا لحكومة ولاية الخرطوم
وادوهوا خريطة طريق لادارة الولاية
ونزول الوالي ومساعديه للشارع..
الشعب يعرف مين قلبو عليه
ومن قلبو على الوزارة والوظيفة والتكسب..
..
الحزب طرح رؤية متكاملة لانقاذ فترة الانتقال
لن نرجع للوراء
وعموما الموضوع اكيد مطروح على مستوى لجان التنسيق
المرة دي نحن لن نتنازل عن حق الشعب كامل مكمل.
..
ودا رايى الخاص طبعا.
|
Post: #14
Title: Re: توحيد تجمع المهنيين وعودة الشيوعي لقوى ال
Author: Mahjob Abdalla
Date: 10-02-2021, 03:10 PM
Parent: #13
Quote: من البداية الخيارات كانت صعبة للغاية
مافي خيار كويس وحوله إجماع ولم يؤخذ به
الشراكة مع العسكر لم يكن منها مفر
ولم يكن هناك اي خيار آخر يحفظ دم السودانين غير هذه الشراكة |
و هل الان بقت في مفرات و خيارات اخرى غير الشراكة؟
هذا هو البكاء علي اللبن المسكوب.
|
Post: #15
Title: Re: توحيد تجمع المهنيين وعودة الشيوعي لقوى ال
Author: كمال عباس
Date: 10-02-2021, 03:15 PM
Parent: #13
والله الحكاية حلها ابسط من بسيط
شوف النواقص والسلبيات في وثائق وفِي الممارسة. العملية لقوي الحرية والتغيير وحكومتها وبرضو ادرسو أسباب ابتعاد الحزب الشيوعية والجفوة مابين القوي الثورية والحكومة
علاجو السلبيات والنواقص وأحسمو العسكر في حدود أقلية عسكرية في مجلس سيادة شرفي ورمزي
عندها. لن تكونو بحاجة لإشراك الحزب الشيوعي ومنحه مقاعد - سيدعمكم بلا انتظار لمقابل حزبي
وستجدونه. في الواجهة فيما يجيده ويخبره :مصارعة العسكر والفلول
|
Post: #16
Title: Re: توحيد تجمع المهنيين وعودة الشيوعي لقوى ال
Author: نصر الدين عشر
Date: 10-02-2021, 04:03 PM
Parent: #15
اسمعوا القالو حمد ...
حمد الشيوعي
|
Post: #17
Title: Re: توحيد تجمع المهنيين وعودة الشيوعي لقوى ال
Author: Gafar Bashir
Date: 10-02-2021, 04:13 PM
Parent: #15
Quote:
راجعين تفتشوا في الحلفاء؟؟؟؟ |
لا ده ما تفتيش عن الحلفاء
ظه فرز للكيمان بس
عشان يتلم البيض كله في سلة واحدة
|
Post: #18
Title: Re: توحيد تجمع المهنيين وعودة الشيوعي لقوى ال
Author: Elhadi
Date: 10-02-2021, 04:38 PM
Parent: #17
الحزب الشيوعي وتجمع المهنيين يناديان بإسقاط الشراكة..
هل البقية قادرين على الإلتزام بهذا الهدف ؟
أول حاجة عليكم الاعتراف بإنو ما حدث في ١١ أبريل لم يكن سوى محض إنقلاب عسكري
وما جرى بعدها لم يكن سوى تأمر واختطاف لثورة الشعب السوداني التي مهرها الشباب والشابات بالدماء
الحزب الشيوعي لو كان داير السلطة فقد كانت في متناول يديه 😀
لكنه خرج عندما أدرك فخ الإنقلاب العسكري
مافي وحدة ولا هم يحزنون على أساس الشراكة مع بقايا نظام البشير ولجنته الأمنية
|
Post: #19
Title: Re: توحيد تجمع المهنيين وعودة الشيوعي لقوى ال
Author: Elhadi
Date: 10-02-2021, 04:46 PM
Parent: #18
أما انتو قادرين على الإلتزام بهذا الهدف
أو خليكم في لهاثكم خلف البرهان وحميدتي
|
Post: #20
Title: Re: توحيد تجمع المهنيين وعودة الشيوعي لقوى ال
Author: Nasr
Date: 10-02-2021, 04:59 PM
Parent: #17
قال عبد العظيم
Quote: يا نصر من البداية الخيارات كانت صعبة للغاية
مافي خيار كويس وحوله إجماع ولم يؤخذ به |
دي ما السياسة، دايما الخيارات صعبة
دا ما موضوعنا
بنتكلم عن سلوكم السياسي وفهمكم للخلافات والتحالفات
أفتعلتم مشاكل ما ليها سبب ولا أساس مع حلفاءكم كان شيوعيين ولا جمهوريين ولا غيرهم
إتناقشنا هنا كتير
بدوتم وكأن السلطة قد أسكرتكم
كنتم مرات كتيرة مستعدين تتحالفوا مع الكيزان ضد حلفاءكم من قوي الثورة
سريع سريع دخلتم في منافسات ونسيتم من هو العدو الحقيقي
لسه بتذكر موقفكم في حكاية القراي وكيف أنكم تحالفتم مع الكيزان لإقصاءه
وحاجة قريبة من حصلت في الحملة علي دكتور أكرم لمن كان وزير الصحة
المهم
ما في مشكلة
عاينو كويس لسلوككم في الفترة الماضية
إنتقدو وخلو عتدكم شجاعة للإعتراف بالأخطاء
والمرة دي حاولو تشوفوا الصورة الكبيرة (الغابة) مش الأشجار
قولوا لبابكر فيصل يبقي مرن شوية
وكان قدرتوا توحدوا الإتحاديين بتكونوا مشيتوا خطوة كبيرة للأمام
|
Post: #21
Title: Re: توحيد تجمع المهنيين وعودة الشيوعي لقوى الج
Author: كمال عباس
Date: 10-02-2021, 05:18 PM
Parent: #20
ناس العدل والمساواة حكايتهم مع الثمار والفواكه. حكاية
من غزوة الموز. ايّام خليل ابراهيم لي غزوة البلح بقاعة الصداقة اليوم
|
Post: #22
Title: Re: توحيد تجمع المهنيين وعودة الشيوعي لقوى ال
Author: Nasser Amin
Date: 10-02-2021, 06:26 PM
Parent: #21
سلام عظمة و ضيوفه
ارجو أن يعود الحزب الشيوعي و بقية
مكونات الثورة الحقيقيين للمكون الاصلي
و افشال مؤامرة العسكر و معهم الفلول
و الباحثين عن المناصب و المكاسب ولاعقي
بوت العسكر.
شاهدت في قناة السودان برنامج يضم جعفر حسن
الناطق باسم قوى الحرية و التغيير
و احمد حسين من حزب الامة القومي
و هيثم من الاتحادي الموحد.
ذهب د. ابراهيم الامين و د. عادل المفتى لقاعة الصداقة
باعتبار أن ما بحدث هو اصلاح للحرية و التغيير وتببن لهم
انه اجتماع للفلول و مؤامرة للمكون العسكري فانسحبا
و معهم الاتحادي الموحد.
في حلقة قبل قليل ذكر د. عادل خلف الله من حزب البعث
انهم رصدوا اجتماعا البارحة في الموردة حضرته قادة المجلس
السيادي من العسكريين مع مكونات المتآمرين.
و تم ارجاء التحاق مبارك الفاضل و اشراقة وو (احزاب فكة البشير)
و عدم ظهور البرهان اليوم في محفل الفلول في قاعة الصداقة.
دا الوقت البتتوحد فيهو القوى الثورية و الا الثمن غالي
بعدين مكنة (ما قلنا ليكم) لن تفيد اللائم و لا الملوم.
|
Post: #23
Title: Re: توحيد تجمع المهنيين وعودة الشيوعي لقوى ال
Author: عبدالعظيم عثمان
Date: 10-02-2021, 08:38 PM
Parent: #22
تحياتي لكل الزملاء المتداخلين
موضوع الملاومة وما قلنا ليكم وما كلمناكم
دا خطاب غير مفيد وضرره اكبر من مؤامرات الفلول
اذا كانت مجموعة المجلس المركزي للحرية والتغيير تريد المحافظة على
مكاسبها لما خرج محمد الفكي مواجهاً عساكر السيادي
ولما خرج خالد سلك مواجهاً العسكر
ولما تصدت لجنة التفكيك للإنقلاب وتحويل دارها لمركز عمليات
عشان كدا خطاب المزايدة على المجلس المركزي او تسميات الفلول المنتشرة
له بمجموعة الاربعة .. للأسف دا خطاب يمهد للإنقلاب
الموقف الآن هو تجميع الفلول والعسكر لكل قواهم للإنقضاض على الفترة الانتقالية
هل من الحكمة أن تتباعد قوى الثورة من بعضها البعض في الوقت الذي يتجمع
فيه الفلول لضرب ثورة ديسمبر ؟
في غاضبين يرغبون في فترة انتقالية بدون عسكر وبدون وثيقة دستورية
إذا سألتهم كيف السبيل لذلك ما عندهم إجابة ؟
إجبار العساكر على تنفيذ الوثيقة الدستورية الحالية هو الذي يفيد
اي محاولة لنسف الوثيقة الدستورية يعيد الثورة للفترة بين أبريل -أغسطس 2019
عندما كان المجلس العسكري حاكماً للبلاد
فض الشراكة ونسف الوثيقة الدستورية ليس خياراً يفيد البلد الآن
الخيار الوحيد أمام قوى الثورة والقوى المدنية هو تشكيل جبهة موحدة
تحاصر العسكر لتنفيذ الوثيقة الدستورية وتحقيق العدالة وقطع الطريق على الإنقلاب
|
Post: #24
Title: Re: توحيد تجمع المهنيين وعودة الشيوعي لقوى ال
Author: Elhadi
Date: 10-02-2021, 09:21 PM
Parent: #23
حقو يا عبد العظيم قبلي ما تجي تقدم اقتراحات هنا
كان تمشي تشوف رئيس حزبك بيقول في شنو
Quote:
*من ناحية أخرى ، فإن المدنية تستبطن بعدا خارجيا قد يراه البعض أقل أهمية من بعدها الجوهري ولكنه ضروري ، ويتمثل في ألا يكون رأس الدولة *عسكريا عاملا "يعتمر قبعة"* أو *رجل دين بحكم موقعه "يرتدي عمامة"* ، بل يكون شخصا مدنيا ، وهذا بالضرورة لا يعني إستبعاد هؤلاء إذا تخلوا عن مواقعهم في الجيش أو المؤسسة الدينية ، ونذكر في هذا الإطار مثال الرئيس الأميركي دوايت أيزنهاور ، والرئيس الفرنسي شارل ديغول وغيرها من الأمثلة ..
*بابكر فيصل بابكر*
*رئيس المكتب التنفيذي*
*التجمع الإتحادي* |
قلت لي دوايت أيزنهاور وشارل ديغول ؟؟ 😀
المقاربة ما عندكم لكن…
|
Post: #25
Title: Re: توحيد تجمع المهنيين وعودة الشيوعي لقوى ال
Author: Elhadi
Date: 10-02-2021, 09:38 PM
Parent: #24
وبتتبع مقاربة بابكر فيصل بابكر أو أياً كان رئيس ما يسمى بالتجمع الاتحادي :
الحاول عقد مقاربة عجيبة جداً بين داويت أيزنهاور وشارل ديغول مع مجرمين وكتالين كتلاء أمثال عبد الفتاح البرهان
على كده حميدتي ده حا يطلع نابليون بونابرت ولا شنو 😷
|
Post: #26
Title: Re: توحيد تجمع المهنيين وعودة الشيوعي لقوى ال
Author: Arif Nashed
Date: 10-02-2021, 09:43 PM
Parent: #25
| Quote: على كده حميدتي ده حا يطلع نابليون بونابرت ولا شنو 😷 |
😅😅😅😅
|
Post: #27
Title: Re: توحيد تجمع المهنيين وعودة الشيوعي لقوى ال
Author: AMNA MUKHTAR
Date: 10-03-2021, 05:24 AM
Parent: #1
ههههههههه
غايتو عليك جنس عبط يا عظمة ..
أنت حقا خير مثال للطبقة الحاكمة حاليا.
عنظزة فارغة !!
....
الشعب الإنتو شايفنه غير راشد دا ..خلاص تخطاكم ورجع إلى قواعده الثورية سالما
من أطماعكم ومراهقتكم السياسية.
الحزب الشيوعي..وتجمع المهنيين عادوا إلى أحضان الشعب سيدكم والجابكم..
فما الذي يجعلهم يضيعوا فرصتهم التاريخية بأن تسجل مواقفهم هذه بأحرف من نور ..
ويعودوا مرة أخرى إلى (طبقة) المتردية والنطيحة وما أكل السبع؟!
فالشوارع لا تخون ..يا خونة .
.....
أعمل حسابك د.أكرم ما يكون بيقرا بوست الجرسة دا 😂
كان أحسن وزير صحة سوداني على الإطلاق..
أيام الحمى النزفية في البحر الأحمر وجهنا له نداء عبر الوسائط..
فجانا جاري طوالي ..وقعد في الأرياف في الواطة مشاركا في علاج المواطنين بنفسه.
تقوموا بصراعاتكم السياسية وغيرتكم العبيطة..تطفشوه مننا في عز جائحة كوفيد19..
هسه منو وزير وللا وزراء الصحة الجو بعده ؟
شخصيا ما متذكرة ليهم إسم ..ومافي زول عارف هم بيعملوا شنو أصلا .
ستصرخووون..
قول وااااي 😂
|
Post: #29
Title: Re: توحيد تجمع المهنيين وعودة الشيوعي لقوى ال
Author: محمد البشرى الخضر
Date: 10-03-2021, 06:20 AM
Parent: #27
Quote: موضوع الملاومة وما قلنا ليكم وما كلمناكم
دا خطاب غير مفيد وضرره اكبر من مؤامرات الفلول |
ما حيخلوه يا عظمة دي طبيعة السوداني السياسي والمثقف و الجاهل كله كدا شغال بمبدأ عجبني للمارقوت.
لكن سؤالي ليك تاني بعيده, انتو قدمتو أو ح تقدموا شنو! ما تتوقع الناس تطلع تواجه الانقلاب المحسن بس عشان يستمر الحال كما هو عليه و تظل الاحزاب الحالية مسيطرة على القرار في المركزي و بالتالي الحكومة
حتى النسب الطلعت امس لما تلقى المؤتمر السوداني ماخد قريب 8 بالمائة و الاتحادي الهو فصيل من عشرات الفصائل الاتحادية ماخد نفس النشبة وكذلك البعث الواحد من تلاتة احزاب بعث في الساحة وكلها عضويتها بسيطة جدا برضو ماخد نفس النسبة فهذا امر غير مقبول
لازم تقدموا تتنازلات حقيقية في سبيل عودة الناس للوحدة تنازلات تصل حد الاستقالة والقبول بدعوات الطرف الآخر سواء للاصلاح او عقد مؤتمر تأسيسي أو اي صيغة يمكن التوافق حولها في النهاية العدو واحد و الهدف واحد و حتى الحرية و التغيير الثانية مكوناتها الرئيسة نظريا مع الثورة ومبادئها و ما دفعها لاحضان العسكر الا الوضع الحالي.
|
Post: #28
Title: Re: توحيد تجمع المهنيين وعودة الشيوعي لقوى ال
Author: AMNA MUKHTAR
Date: 10-03-2021, 06:12 AM
Parent: #1
Quote: اذا كانت مجموعة المجلس المركزي للحرية والتغيير تريد المحافظة على
مكاسبها لما خرج محمد الفكي مواجهاً عساكر السيادي
ولما خرج خالد سلك مواجهاً العسكر
ولما تصدت لجنة التفكيك للإنقلاب وتحويل دارها لمركز عمليات
عشان كدا خطاب المزايدة على المجلس المركزي او تسميات الفلول المنتشرة
له بمجموعة الاربعة .. للأسف دا خطاب يمهد للإنقلاب |
ديل بس تسرعوا وكبوا الجرسة خوفا على كراسيهم وسلطتهم..
فالحرامي في رأسه ريشة 😂
حين إنه المشهد كان بيقول إنه ما حدث كان خلافات داخل المؤسسة العسكرية بينهم وبين بعض..
لكن ناس( هبوا ) و( هجم النمر ) بتسرعهم وشلاقتهم..والتصريحات النارية التي قوبلت بتصريحات نارية متبادلة..
فجروا غضبة الشارع التي كانت مكتومة عليهم جميعا ..
وبذلك عجلوا بإنقلاب أبيض عليهم من قبل الجيش بالحاضنة نمبر 2 🤣
وهسه الموضوع إنشكح..وما بتلم تاني..
إنكسر المرق وإتشتت الشراكة الهشة.
والحمد لله..الشلاقة غير محسوبة العواقب ..
كانت تدبيرا إلهيا.. أعادت الشارع لإستئناف ثورته لكنس كل الوسخ .
|
Post: #30
Title: Re: توحيد تجمع المهنيين وعودة الشيوعي لقوى ال
Author: عبدالعظيم عثمان
Date: 10-03-2021, 07:09 AM
Parent: #28
ود البشرى سلامات
موضوع التنازلات .. لازم كل اطراف التحالف تتواضع على موقف
يحفظ الفترة ويحصنها من التهديد
مثلاً التجمع الاتحادي عنده وزير واحد وعضو مجلس سيادة
البعث عنده وزير واحد وعضو مجلس سيادة
المؤتمر السوداني وزيرين ولا حصة له في مجلس السيادة
الهجوم على المجموعة انها مسيطرة غير صحيح
الاعلان السياسي الاخير في 9 سبتمبر 2021 في قاعة الصداقة
حسم جدل توحيد الحرية والتغيير بعودة حزب الامة والجبهة الثورية (عدا مناوي وجبريل )
الحرية والتغيير الآن اكثر قوة من اي وقت مضى بعد توقيع الوثيقة الدستورية
المعركة الآن مع قيادات المؤسسة العسكرية لذا يجب على الكتلة المدنية أن تتوحد
انا مع اي صيغة توافق تقوي جبهة القوى الثورية المدنية
ما حدث بالامس في قاعة الصداقة هو امتداد لسلسلة التآمر على الفترة الانتقالية
مهما كان صغيراً او ضعيفاً يظل تهديد يجب التصدي له
هرجلة الامس ما يهمنا فيها هو جبريل ابراهيم ومني اركو مناوي
بإعتبارهم جزء من الجهاز التنفيذي
أبشرك التفاهم مع المجموعة المنشقة من تجمع المهنيين قطع شوطاً بعيداً
وقريب سوف يسمع الشعب السوداني اخبار سارة
المهم الان هو لجم العسكر ومنعهم من خطف الفترة الانتقالية
هذه هي المعركة الرئيسية للقوى الثورية
|
Post: #31
Title: Re: توحيد تجمع المهنيين وعودة الشيوعي لقوى ال
Author: عبدالعظيم عثمان
Date: 10-03-2021, 09:15 AM
Parent: #30
سلامات كمال عباس
مسألة منح المقاعد للشيوعي
دا حقه .. بدليل انه آخر لقاء بين السبوعي ورئيس الوزراء
كان موضوع حماية كوادر الحزب جوة السلطة والخدمة علي طاولة النقاش
الموضوع هنا الموقف في مواجهة العسكر داخل إطار الشراكة والوثيقة الدستورية
بالعودة للتحالف او التنسيق اذا رفض العودة وطبعا دي خياراته
المهم الآن حماية الإنتقال من انقلاب الجنرلات
ودا موضوع مطروح للتفاكر والنقاش
اذا السبوعي يشترط فض الشراكة واسقاط الوثيقة الدستورية
دا نقاش تاني خالص بيجي بي وقته وبي تقديراته وظروفه
لكن الان المعركة هي لجم العسكر في اطار الشراكة واستمرار الوثيقة الدستورية الحاكمة
ودا المطلوب فيه وحدة كل قوى الثورة المدنية
|
Post: #32
Title: Re: توحيد تجمع المهنيين وعودة الشيوعي لقوى ال
Author: Arif Nashed
Date: 10-03-2021, 08:15 PM
Parent: #31
Quote: أعمل حسابك د.أكرم ما يكون بيقرا بوست الجرسة دا 😂
كان أحسن وزير صحة سوداني على الإطلاق..
أيام الحمى النزفية في البحر الأحمر وجهنا له نداء عبر الوسائط..
فجانا جاري طوالي ..وقعد في الأرياف في الواطة مشاركا في علاج المواطنين بنفسه.
تقوموا بصراعاتكم السياسية وغيرتكم العبيطة..تطفشوه مننا في عز جائحة كوفيد19..
هسه منو وزير وللا وزراء الصحة الجو بعده ؟
شخصيا ما متذكرة ليهم إسم ..ومافي زول عارف هم بيعملوا شنو أصلا .
ستصرخووون..
قول وااااي 😂 |
يا سلام عليك يا بت مختار ريحتيني بمداخلتك دي والله صحي.
البلد كانت محتاجة لناس بتعمل زي د.اكرم بصرف النظر عن انتمائه
الله يكفينا شر الابواق .
|
Post: #33
Title: Re: توحيد تجمع المهنيين وعودة الشيوعي لقوى ال
Author: Nasr
Date: 10-03-2021, 09:56 PM
Parent: #32
يا عبد العظيم
Quote: مسألة منح المقاعد للشيوعي
دا حقه .. بدليل انه آخر لقاء بين السبوعي ورئيس الوزراء
كان موضوع حماية كوادر الحزب جوة السلطة والخدمة علي طاولة النقاش |
لا أعتقد أن المقاعد في بال الشيوعيين علي الإطلاق
والإستدلال بتاعك دا فيه
كمية من التدليس
لكن بس فهمت حاجة
أن عقلكم السياسي مشغول شديد
بالمحاصصات والمقاعد
دي عقدة كان ما إتخلصتو منها ما بتمشوا لقدام
زي ما قالوا ليك الناس هنا
شوفوا الشيوعيين غادروا ليه وحاوروهم
وأنا جازم أن الشيوعيين قد أستوعبوا درس
أن خروجهم من قحت وحكومتها هي إضعاف لها
وتقوية للعسكر وحلفاءهم الكيزان
وأن الطريق لإسقاط حكومة الثورة غير معبد ومليان حفر
فلو كل القوي المدنية حريصة علي الديمقراطية
ما في حل غير دعم الحكومة لتتم فترتها في سلام
|
|