مرتبي لا يكفيني واستعين بشقيقي في الخارج واطالبه بالمزيد :)

06:40 PM September, 24 2021

سودانيز اون لاين
Elhadi-
مكتبتى
رابط مختصر

اللمبي الجديد 😷

الدعم السريع يتلقى رواتبه من وزارة المالية 😎

نطالب ود الفكي بالإعلان عن مرتبه ومخصصاته لمقارنتها بما يحصل عليه بقية موظفي الحكومة من رواتب

طبعاً ود الفكي ساكن علي حساب الحكومة في بيت منتزع من ذوي الإعاقة (ده كان لسة ما رحل زي ما وعد الناس يعني)

اللمبي خاشي في دور عمر بن الخطاب

طيب رجع البيت أول عشان يكون في شوية اتساق

مدير الشركة السودانية للموارد المعدنية وهو موظف دولة

صرح في لقاء تلفزيوني علناً أن راتبه يبلغ ٢٥٠٠ دولار (ألفين وخمسمائة دولار)

فهل راتب محمد الفكي عضو مجلس السيادة أقل من راتب أردول الدولاري؟؟

وبالنسبة لحميدتي الذي من المفروض أنه يتقاضى نفس الراتب والمخصصات

برضو ما بتكفيهو ولا كيف ؟؟ بي نفس المنطق يعني

الواحد لمن يكون في منصب دستوري رفيع

المقروض يقول كلام مسئول وأي كلمة تطلع منو مفروض تكون محسوبة ومضبوطة

موش يطلع يهرتل للناس بأي كلام والسلام زي الشفع

هل راتب عضو مجلس السيادة أقل من راتب الوزير ؟؟

وهل مرتبات الوزراء ديل كلهم ما بتكفيهم ؟

لأنو لو محمد الفكي عاوز الناس تصدقوا بمنطقو ده معناها البلد دي قاعدة أم فكو ساكت!

أطالب بنشر مرتبات ومخصصات أعضاء مجلس السيادة

لأنو إذا طلع كلام ود الفكي ده صاح

فده خطر على الأمن القومي زاتو

ده لو فضل فيها أمن قومي يعني 😀

لاقاقني يا الهادي مقال في الواتساب طوالي جيت في بالي, اهديك اياه:

Quote: سندعم مدنية الدولة وانتقالها الديمقراطي، ولو ضد أهلنا وأصدقائنا دون مجاملات ودون أن ندفن رؤوسنا في الرمال" كتب الصديق محمد خالد دوشكا بالواضح: لما تلقا بعض الناس بتحكي ببساطة عن عربات آل دقلو الفخمة العاملة زحمة في كافوري الليلة، وعرسهم الأسطوري القفلوا ليه شارع رئيسي في بحري.. وأمس القريبة دي مدبلجين صورة الشهيد عبد العظيم مع خالد عمر وهو نازل من عربية حكومية، راكبها أصغر سمسار في الكرين (نظام هو القتلو وللا شنو ما تعرف) .. بتكتشف انو مشكلتنا أكبر بكتير من ترِك قال وقفل .. وفلان سوا عمل. مشكلتنا في عقلية وسلوك قطاع مننا، بعضه كان او لا زال جزء من الثورة وهتف بشعاراتها الواضحة وآمن بيها.. قطاع محتاج يتواجه بشجاعة ودون مجاملات ويتقال ليهو في عينو: دا تضليل وتحامل. قطاع حوّل سؤال الثورة المباشر والساهل: (من قتل الشهداء وأين الطريق للمدنية) وبصورة سحرية، لسؤال غامض ومطاط: (من باع دماء الشهداء) ..وأخذ يقدّم في إجابات على هواه، بأسماء مدنيين ما بيفرزوا علبة الغاز في الكلاش من الدبشك، خليك من يسفكوا دم. قطاع مسخّرِ نفسه للسخرية ونشر الإستياء والتخوين تجاه شق واحد من الحكومة الإنتقالية، اتّضح لينا في احداث وتلميحات الأمس واليوم وبوضوح: أنّه شق صُنِع ليفشَل.. وتمت محاربته على مراحل وعلى نار هادئة تطبُخ وتمهّد للوضع الراهن. وأنه، وبما لا يدع مجال للشك، واجه تعطيل متعمّد ومنظّم وحثيث جداً، يمهّد للانقضاض على حلم الثوار ومطالبهم في وقتٍ معلوم. قطاع مساهِم، ربما بوعي أو دون وعي، في شحذ الإستياء تجاه المشوار المدني وممثليه بعلّاتهم ومحاسنهم.. لا ينتقدهم كما يفعل الجميع ، بل يغتالهم ويكفّرهم ويخوّنهم ويتّهمهم بالعمالة ويطالب بعزلهم وسجنهم. قطاع ينظر للشق المدني بمجهر دقيق لا تفلت منه شاردة ولا واردة، وللشق العسكري بالطوالة والتغاضي وحسن الظن، حتي ولو طبّع مع الشيطان.. قطاع تباكى على أخطاء بعضهم، ويتغاضى عن الجرائم التي لا تغتفر لبعضهم. قطاع يسأل عن الوضع الاقتصادي ببساطة، ولا يسأل عن أسس الإقتصاد، عن دور الأمن الاقتصادي! عن تهريب ثروات الشعب بالمعابر والمطارات جهاراً نهاراً!!.. لدرجة أن لا يتصدى له إلا بمجهود محدود لشباب اقلاء، امثال ود البورت وشرفاء شرطة المعابر. قطاع يسأل بشغف وبُعد نظر وحسرة مؤثرة عن معاش الناس، ولا يرى من يخنق الناس، تجار العملة والوقود والتسعة الطويلة والسماسرة والمحتكرين والمضاربين، الذين يسرحون ويمرحون في كنف دولة القانون، وينهشون في لحم الاقتصاد ورزق الناس وأمنهم على مرأى من الشق العسكري الذي استحوذ بالوثيقة على كل الأجهزة الأمنية. قطاع يمهّد عمداً، او ربما أسوأ: سهواً، لقطع الطريق. ولكن هيهات. و #الفورة_مليون. سندعم مدنية الدولة وانتقالها الديمقراطي، ولو ضد أهلنا وأصدقاءنا.. دون مجاملات ودون أن ندفن رؤوسنا في الرمال.

مشكور يا محمد ومقبولة منك الهدية ـ

والإجابة ببساطة يا محمد لأن هؤلاء المدنيين هم الذين يوفرون الغطاء للعسكر

وهم الذين سعوا لشرعنة العسكر وتكريس وجودهم في السلطة وفي العملية السياسية

ودونك محاولاتهم المستميتة والمخزية لتسويق حتى أمثال " حميدتي " بزعم أنه من حمى الثورة ومحاولات تجميل صورته المعروفة لدي كل مواطن

الآن يا دوب جيت شفت جزء من مقابلة المدعو محمد الفكي ( وياريتني ما شفتها )

ياخ انحنا انحدرنا شديد خلاص في مستوى وقدرات القيادات السياسية ..

بالله ده عضو مجلس سيادة ؟؟؟ آمنت بالله

الراجل ما قادر يرتب كلمتين على بعضهم، ومضطرب ومرتبك ومنفعل زيادة عن اللزوم كأنوا في ركن نقاش وليس سياسي محترف ومسئول دستوري في قمة هرم الدولة

ده شنو ده هو ؟؟

يعني انت كتبت البوست و السخرية دي كلها و انت ما حضرت المقابلة؟
ياخي بالغت! انا كنت عايز اقول ليك من كل الكلام القوي و المهم الذكره في المقابلة عن اجتماعات مجلس السيادة و عن ان البرهان مجرد عضو و عن استلام الرئاسة و اهم ما قال بكل وضوح عن ان الجيش ليس وصي على الثورة كما قال البرهان
ومسكت في الكلام الني! اتاريك ما حضرتها حتى وقت كتابة البوست! يا الهادي دي حالة متأخرة من الكراهية غير المبررة! بحجة انهم وفروا الغطاء للعسكر تكرههم أكثر من العسكر زاتهم! ياخي ما معقول
عموما خت في بالك انو كل المدنيين ديل مجرد موظفيم مؤقتين تنتهي فترة عملهم بنهاية الفترة الانتقالية وممنوعين بواسطة الوثيقة الدستورية من الترشح في الانتخابات المقبلة - عدا اعضاء الحركات!
فا شنو باصر ليهم الفتررة الباقية دي و خف عليهم, فهم رضينا ام أبينا هم حاليا الخط الأول في المواجهة لاكمال الفترة الانتقالية بسلام! واهو كان البيان بالعمل فمن تكرههم و تصفهم بالهبوط الناعم الفكي و سلك و فيصل و جعفر بتاع التجمع الاتحادي كانوا او من تصدى وبكل الوضوح المعلن لترهات البرهان و نائبه