سلك_مرق

سلك_مرق


09-24-2021, 03:20 AM


  » http://sudaneseonline.com/cgi-bin/sdb/2bb.cgi?seq=msg&board=510&msg=1632450017&rn=0


Post: #1
Title: سلك_مرق
Author: محمد البشرى الخضر
Date: 09-24-2021, 03:20 AM

02:20 AM September, 24 2021

سودانيز اون لاين
محمد البشرى الخضر-العين-الإمارات
مكتبتى
رابط مختصر



والحالة ما (تكلها).


Post: #2
Title: Re: سلك_مرق
Author: Arif Nashed
Date: 09-24-2021, 03:57 AM
Parent: #1

اللقاء الذي اجري معه في برنامج بلا حدود
كانت ردوده واضحة وقوية دا حالتو ما دنكل ليهو دقار تيمس
ده الزول البمثل الثورة.

Post: #3
Title: Re: سلك_مرق
Author: عبدالحفيظ ابوسن
Date: 09-24-2021, 06:28 AM
Parent: #2

نداء ودالفكى
تصريحات سلك
خطاب حمدوك الاخير
نقلة نوعية في الخطاب الثوري
قدام

Post: #4
Title: Re: سلك_مرق
Author: Ahmed Yassin
Date: 09-24-2021, 06:47 AM
Parent: #3

الله يمرقنا من العسكر
يكفى انهم حكموا( 55 ) سنة منذ الاستقلال..
ودي النتيجة

Post: #5
Title: Re: سلك_مرق
Author: Biraima M Adam
Date: 09-24-2021, 07:19 AM
Parent: #4

الناظر ترك غضبان مما يحصل لأهله، أطردوا سلك والسنهوري من التشكيلة .. وضموا المجلس الأعلي لنظارات البجا في مسار جديد للحكومة.كدي تكون المشكلة أتحلت ..

لكن بوجود سلك والسنهوري سوف تدور حرب في شرق السودان.

بريمة

Post: #6
Title: Re: سلك_مرق
Author: Gafar Bashir
Date: 09-24-2021, 07:59 AM
Parent: #5

Quote: كدي تكون المشكلة أتحلت ..


يا بريمة انت بتقرا من وين ،،، اظنو من نفس كتاب ترك
خالد قال حل الشرق سياسي والبرهان قال عسكري ،،، ترك رايو شنو
مع انو القوي الامنية هي اللي قاعدة تحمي مسيرات ترك وتامنها ،،،، ده زاتو انت رايك فيهو شنو الفيديوهات حايمة عربات العسكر بتاعتالبرهان بتامن الطريق لمتاريس وجماعة ترك
اها ولجنة التفكيك رايك يعملو ليهم شنو

Post: #7
Title: Re: سلك_مرق
Author: بدر الدين الأمير
Date: 09-24-2021, 08:21 AM
Parent: #6

لا فرق بين ترك وبريمة بلل

كلاهما من شبيه

Post: #8
Title: Re: سلك_مرق
Author: اخلاص عبدالرحمن المشرف
Date: 09-24-2021, 09:28 AM
Parent: #7

كان قالو سمين قول امين يا بريمة

اسع جنس حشود ( لو خضت البحر دي ) بريمة عندو😹

Post: #9
Title: Re: سلك_مرق
Author: محمد البشرى الخضر
Date: 09-24-2021, 10:40 AM
Parent: #8

Quote: علي عثمان المبارك الامين

لماذا تغير موقف البرهان خلال 24 ساعة فقط ؟؟
الرفض الشعبي الواسع العنيف لخطابي البرهان وحميدتي قلب المعادلة !!
الاجماع الدولي السريع جدا والحاسم من قوى كبرى لرفض الانقلاب فاجا البرهان !!!
حمدوك المستفيد الاول من هذه الازمة المفتعلة فقد طرح كل مطالبه في خطابه للشعب تجاه المكون العسكري !!!
تصريح الفريق عبدالفتاح البرهان رئيس المجلس السيادي عند لقائه بمسؤول الماني كبير اليوم كان غريبا الذي قال فيه بانه يدعم الفترة الانتقالية وفق مقتضيات الشراكة التي اقرتها الوثيقة الدستورية مؤكدا دور القوات المسلحة في دعم الفترة الانتقالية وحمايتها !!
وسبحان الله لم يمضي على خطابه الانقلابي 24 ساعة الذي هاج وماج فيه واتهم المدنيين والسياسيين بالفشل والاخفاق وحملهم كل اوزار الفترة الانتقالية وكأنهم لم يكونوا شركاء ومسؤولون في هذه الشراكة التي استمرت لعامين مع الشق المدني.
الراي العام كان ينتظر بفارغ الصبر حديثا عن الانقلاب والانقلابيين الذين خرجت اخبار مقتضبة من قيادة الجيش عن المحاولة ..فجاء البرهان يرغي ويزبد ضد المدنيين والسياسيين ويفرض وصاية على الثورة التي اتت به الى كراسي الحكم.
وزاد الطين بلة الخطاب الاخر من نائبه حميدتي وكأن الاثنان متفقين على الاساءة للمدنيين !!
وجاءت المفاجأة من ردة الفعل من الشارع السياسي ومن كافة القيادات السياسية والمدنية رافضة للانقلاب ورافضة بقوة ادعاء الوصاية على الثورة..
وصدق خالد يوسف سلك عندما قال ان هؤلاء الجنرالات يقرأون من نفس الكتاب القديم الذي الغت مفعوله ثورة ديسمبر المجيدة وان الشارع مستعد للمواجهة .. وكانت اقوى رسالة وجهت مباشرة للبرهان ومن يسير في ركبه..
واعتقد ان البرهان وحميدتي لم يتوقعان هذا الاجماع الدولي في رفض اي انقلاب او استخدام القوة لتغيير النظام الانتقالي المدني !!
مجلس الامن بالاجماع رفض وكان امرا مذهلا الاتحاد الاوروبي والاتحاد الافريقي ..وامريكا عبر وزارة الخارجية وسفيرهم في الخرطوم ثم الكونجرس الامريكي الذي ارسل رسالة واضحة لا لبس فيها.. رفض مطلق لاي تغيير يقوم به القوات المسلحة او انصار نظام المخلوع الكيزان واضاف الكونجرس رفضه لقضية لاستغلال قضية الشرق لتقويض الحكومة الانتقالية .. بل حذر بان اي تغيير بالقوة سيعرض العلاقات السودانية الامريكية للخطر !!
الرسالة كانت واضحة خلال ساعات تكلم المجتمع الدولي بلغة واضحة رفض كامل لاي انقلاب عسكري وقد يعرض الفاعلين الى عقوبات لاقبل لهم بها.
ثم جاءت زيارة رئيس بعثة يونيتامس ممثل الامم المتحدة في السودان لحمدوك ليبلغه بان المجتمع الدولى وعلى رأسه مجلس الامن يؤيد الحكومة الانتقالية ويرفض الانقلاب العسكري عليها .. ليخرج حمدوك من اللقاء مطمئنا من ان اللعبة انتهت وان لامجال لمغامر عسكري ان يستلم السلطة هكذا بليل !!
اما الشارع السياسي فقد كان يتململ من العقبات ومحاولات الافشال التي يضعها المكون العسكري امام الحكومة الانتقالية وينتظر اي لحظة لرد الصاع للمجموعة العسكرية.. وجاءت الخطابات الانقلابية امرا مستفزا للثوار والثورة ولم يحسن البرهان وحميدتي اختيار التوقيت او اللغة التي خاطبا بها المدنيين !!
وكان الكاسب الاكبر من هذه المعمة المفتعلة من المكون العسكري هو رئيس الوزراء عبدالله حمدوك فقد اوصل رسالته للمكون العسكري مباشرة.. وهي انه لابد من اعادة هيكلة الاجهزة العسكرية والامنية وايضا اعادة الشركات العسكرية والامنية لصالح الدولة .. وضروة تكملة مؤسسات الدولة التشريعي ومجلس القضاء والمؤسات العدلية الاخرى.
والامر الاهم الذي طرحه حمدوك مباشرة هو مناقشة امر الشراكة والخلل الذي يعتريها.
كل هذه التطورات ادت البرهان الى التراجع السريع جدا ..وتجربة المخلوع وحصاره والعقوبات التي شلت يده لاتزال في الشاشة والكل يعرفها..
وعجبا قال البرهان انه يؤكد الالتزام بالعمل على انجاح الفترة الانتقالية وفق قرارات الوثيقة الدستورية التي الغاها قبل 24 ساعة عندما اعلن الوصاية على الدولة وهم وحدهم من يقرر في مستقبل الدولة !!
لقد لعق البرهان السم وحنى رأسه للعاصفة فهل هو صادق في كلامة ام انه يريد ان تمر العاصفة ليستمر مسلسل التامر على الحكومة الانتقالية وعلى الثورة ؟؟؟

Post: #10
Title: Re: سلك_مرق
Author: حمد إبراهيم محمد
Date: 09-24-2021, 10:52 AM
Parent: #8


سلام ود ابشرى - الاخوان ...

ا امل ان نبتعد عن انتشاء "السفة" واعلاء (المواجهة) استعداء وشتيمة الجيش والقوات النظامية والامنية - حتى لا يصيبنا ما اصاب
اخوان لنا في اليمن - سوريا - ليبيا - ودول جوار اخرى ...

مواطنينا في شرق السودان لهم قضية من حقهم ممارسة كل السل لحلها كما الشمال والوسط لهم قضايا يرفعون المشاعل لحلها قبل

يتمثلوا بمواطنيهم في اقاليم اخرى ... فيشتعل الوطن بايدي شعبه ، ونتفرق ايدي سبأ ...

الجري وراء خصومات قحت والمحاصصات الحزبية الضيقة ووراثة الكرسي المتحرك..

ترك زعيم يدافع عن حق مهضوم - ينبغي ان نستمع له ونتفهم قضية مواطنين لنا عانوا وصبروا كثيرا .. :

بدلا ان نصفق لاحد ابلغ في حديث انشائي يدقدق مشاعرنا ولا يحل مشكلة:

هذه رؤية زعماء الشرق:
















Post: #11
Title: Re: سلك_مرق
Author: محمد البشرى الخضر
Date: 09-24-2021, 11:05 AM
Parent: #10

رايك شنو في رؤية "زعماء الشرق" دي :


Post: #12
Title: Re: سلك_مرق
Author: نعمات عماد
Date: 09-24-2021, 11:33 AM
Parent: #11


سلام يا باش و ضيوفك

إذا لم يتفق البجا و البني عامر فأن الشرق لن يستقر حتى لو أنفصل.
المشكلة بين المكونين يجب حلها برعاية جادة و محايدة من شقي
الحكومة، بداية من تجميد إتفاقية السلام و إنتهاء بصندوق إعمار
الشرق. التشاحن في الفيديوهات هو نذر الحرب القادمة.



Post: #13
Title: Re: سلك_مرق
Author: اخلاص عبدالرحمن المشرف
Date: 09-24-2021, 11:39 AM
Parent: #12

اثني علي ما قالته الحبيبة دكتورة نعمات
ومحاولة بعض المتنفذين في الحرية
والتغيير الانحياز لاحد الاطراف هو
ما صعد القضية، الاخت الحبيبة امنة مختار
زميلة المنبر كانت قد أشارت لهذا.


Post: #14
Title: Re: سلك_مرق
Author: نعمات عماد
Date: 09-24-2021, 11:55 AM
Parent: #13



الحبيبة د. إخلاص تسلمي. زي ما تفضلتي الزميلة آمنة مضمون
مداخلاتها و بوستاتها شبيه بحديث نُظار البجا.
و أكيد جزء من الحل هو تجميد المؤتمر الوطني و محاسبة ايلا
زي ما ذكرتي في مداخلة سابقة.

Post: #16
Title: Re: سلك_مرق
Author: طلحة عبدالله
Date: 09-24-2021, 12:19 PM
Parent: #14

Quote:
امل ان نبتعد عن انتشاء "السفة" واعلاء (المواجهة) استعداء وشتيمة الجيش والقوات النظامية والامنية - حتى لا يصيبنا ما اصاب
اخوان لنا في اليمن - سوريا - ليبيا - ودول جوار اخرى ...

يخطب قادة ومسؤولو ومنسوبو النظام البائد طوال تلاتة
عقود من الزمان بجميع المنابر وفي كل أركان السودان
الأربعة ولا يتورعون عن الاستعانة بأردأ قواميس
مفردات الفتنة والاستفزاز ضد مكونات الشعب السوداني
بل والعالم الخارجي .. امريكا روسيا دنا عذابها الخ
الحسوا كوعكم وكنتوا شحادين، وما عرفتو الهوت دوغ
ورراك عاك عوك الويل الثبور اضرب اقتل اكسح امسح الخ الخ
كل ذلك ولم نسمع من يدعو للإبتعاد عن الانشاء والاستفزاز
حتى لا يصيبنا ما أصاب سوريا واليمن وخلافو
بل على العكس كانت تقابله الهتافات المؤيدة والمتناغمة .
حاجة غريبة شديدة ياخ.

Post: #15
Title: Re: سلك_مرق
Author: Mahjob Abdalla
Date: 09-24-2021, 12:06 PM
Parent: #13

Quote: رايك شنو في رؤية "زعماء الشرق" دي

بخصوص الفيديو تحت العنوان ده, افتكر انو ذو علاقة بموضوع الحواكير و التسلسل الهرمى في سلم الادارة الاهلية.
ناس البندر فس شخصية خالد سلك و كثيرون, صعب يفهموهو و لذلك مشكلة الشرق مثل مشاكل بقية السودان ستتفاقم.

من الاسلوب الذى تحدث به الشاب, يبدو لي الموضوع مرتبط بخازوق المؤتمر الذى قام بأنشاء نظارات لعموديات كانت تحت مظلة نظارات اخرى.
فالحديث عن الارض كملكية استنفاع يختلف عن الارض كوحدة ادارية (حاكورة او ديار). نعم القبيلة المعينة ممكن كانت موجودة في ذات المكان منذ 1000 سنة او 50 سنة لا يفرق و لكن حسب العرف, كانو مثلا عمودية تحت نظارة معينة و فجأة سلمتهم الانقاذ وثيقة انشاء نظارة و الاستقلال من تحت مظلة النظارة القائمة بارضها.
ليست هناك مشكلة بين البنى و الهدندوة و المطلوب من الحكومات و القائمين علي امر السودان في كل الازمان الا يفتو في اشياء لا يعرفون اصل المشكلة فيها و يا حبذا لو استعانو بمتخصصين لشرح اى قبل الافتاء و اخذ جانب طرف دون الاخر.

Post: #17
Title: Re: سلك_مرق
Author: نعمات عماد
Date: 09-24-2021, 12:32 PM
Parent: #15

شكراً أ. طلحة
و يا سيد حمد،
نحن أصابنا بسبب الإنقاذ أسوأ مما أصاب سوريا و اليمن،
الآف ماتوا و تشردوا بسبب حرب الكيزان على الجنوب و دارفور
ج كردفان و النيل الأزرق و انتهت بتقسيم السودان إلى دولتين.
دا غير شهداء التعذيب في المعتقلات و تشريد المواطنين بي اللا
صالح العام و تدمير المؤسسات و المشاريع الكبرى و دفع الشباب
للهجرة الغير شرعية ليبتلعهم البحر و كثير كثير كثير مما يعلمه الجميع

Post: #18
Title: Re: سلك_مرق
Author: حمد إبراهيم محمد
Date: 09-24-2021, 02:38 PM
Parent: #17




حبيبنا ابو توتو - الاخوة والاخوات – سلام ...
* اتفق مع الاخوات – د. نعمات – د. اخلاص والاستاذة آمنة .. لكن وفي ظني ان اخطر عمل لتحقيق اطماع الاعداء ان تلجأ قحت لالاعيب سياسية غير محسوبة العواقب مثل دق اسفين بين قبائل الشرق.. عندها الشرق سيشتعل فاعداء السودان في محيطه وغيرهم التربصين بامنه وخلخلته؛ من اجل حل مشاكلهم الداخلية كثر .
* لا اتفق مع الاخ طلحة في اللجو لتدوير سلبياتنا...
+++
الشرق عامة – قضيته واضحة وموضحة للبعيد والقريب؛ تنفيذ مخرجات مؤتمر سنكات وان لا تبتثر القضية بمسار شرق في اتفاقية جوبا التي نفحت اقليم دارفور وجنوب كردفان والنيل الازرق حكم السودان؛ حبا ورهبة من بندقية وعيون الحركات المسلحة، وصاحبنا الحلو قام وقلع ب(كاودا) مستظلا بعلم دولة جنوب سودان مستضيفا حمدوك ..!
واظن ان عبد الواحد سيرفع علمو على قمم جبال مرة ..!
ما قصرت وزارة المالية في الانفاق على (5) خمسة جيوش مسلحة .. الباقي شنو للمواطنين، الوزير صرح انه ما فضل للوزارة الا ان تلجأ ل(جيب المواطن) ! لو فضل "حتروب" من نيران – الكهرباء العطشانة - السوق المولع – كمان نحمل على ظهورنا الانهر ومياهها الرقراقة ويبتنا العطش – بعد ان فقدنا الامل في الحصول على الدواء

الباهظ نرجع الوصفة للدكتور – ثم نزيد صفوف العيش، صف المواطنين امام "عرايش" دهاقنة الاعشاب للتداوي المستحيل – وتجبر رسوم المدارس الخاصة وفقدنا للاجلاس في المدارس الحكومية زادت من الفاقد التربوي، وسيبك من الانفلات الامني فالواحد منا صار يفتح جيوبه قبل ان تشهر جماعة (9 - طويلة) سكاكينهم وسواطيرهم الباهظة الثمن...!

(ودقي يا مزيقة)

++++


Post: #19
Title: Re: سلك_مرق
Author: Biraima M Adam
Date: 09-24-2021, 02:58 PM
Parent: #18

محجوب
أولاد المدن ديل عاملين فيها أبو عرام .. هم عملوا شنو منذ مؤتمر الخرجيين وناس الحقيبة الذين فركشوا السودان إلي أشتات ثقافية.
كلامك التقول فيه دا، هو الحل، لكن التقطع ضراعي لو هم يرسوا عشان يفهموك أنت بتقول في شنو.
سايقين الشرق لنفس الحتة الساقوا لها جنوب كردفان ودارفور ... تقسيم الناس إلي أثنيات متناحرة وهم يتفرجوا ويعتبروا أنفسهم نجحوا !!

أطردوا سلك والسنهوري من التشكيلة ..




الناظر ترك .. قال "وقفة سلك في القيادة .. أولاد ورنيش وقفوا أحسن منه" .. هييييع الكلس .. ترك مرق .. سلك خازوق.

-------------------------
أولاد الورنيش ووييي.

بريمة

Post: #20
Title: Re: سلك_مرق
Author: نعمات عماد
Date: 09-25-2021, 06:48 AM
Parent: #19


شكراً أ. محجوب
زاوية مهمة لفهم مشكلة الشرق و لوضع رؤية متكاملة للحل تحفظ حق
كل ألمكونات في الحياة اللائقة الكريمة و العدالة في توزيع الثروة ومشاريع
تنمية الشرق. السودان يحتاج لأبنائه العقلاء الحكماء أمثالك لحقن دماء
أبنائه و رفع الظلم عنهم و الحفاظ على وحدة ما تبقى من البلاد.

Quote: بخصوص الفيديو تحت العنوان ده, افتكر انو ذو علاقة بموضوع الحواكير و التسلسل الهرمى في سلم الادارة الاهلية.
ناس البندر فس شخصية خالد سلك و كثيرون, صعب يفهموهو و لذلك مشكلة الشرق مثل مشاكل بقية السودان ستتفاقم.

من الاسلوب الذى تحدث به الشاب, يبدو لي الموضوع مرتبط بخازوق المؤتمر الذى قام بأنشاء نظارات لعموديات كانت تحت مظلة نظارات اخرى.
فالحديث عن الارض كملكية استنفاع يختلف عن الارض كوحدة ادارية (حاكورة او ديار). نعم القبيلة المعينة ممكن كانت موجودة في ذات المكان منذ 1000 سنة او 50 سنة لا يفرق و لكن حسب العرف, كانو مثلا عمودية تحت نظارة معينة و فجأة سلمتهم الانقاذ وثيقة انشاء نظارة و الاستقلال من تحت مظلة النظارة القائمة بارضها.
ليست هناك مشكلة بين البنى و الهدندوة و المطلوب من الحكومات و القائمين علي امر السودان في كل الازمان الا يفتو في اشياء لا يعرفون اصل المشكلة فيها و يا حبذا لو استعانو بمتخصصين لشرح اى قبل الافتاء و اخذ جانب طرف دون الاخر.

Post: #21
Title: Re: سلك_مرق
Author: Motawakil Ali
Date: 09-25-2021, 07:39 AM
Parent: #1

لماذا لجأ ترك إلى تسييس مطالب الشرق المشروعة؟
لماذا أعلن عداءه للحكومة المدنية وانحيازه للعسكر؟
هو بذلك يضر بقضية أهله و يشكل عائقا للتحول الديمقراطي في البلد
و يثير الكثير من الشبهات حول حركته

Post: #22
Title: Re: سلك_مرق
Author: محمد البشرى الخضر
Date: 09-25-2021, 10:14 AM
Parent: #21

هععععع جعفر حسن_ مرق :)


Post: #23
Title: Re: سلك_مرق
Author: Biraima M Adam
Date: 09-27-2021, 02:22 AM
Parent: #22


Quote: أطردوا سلك والسنهوري من التشكيلة ..
البشوفوه بالعين ما بضووا له بنار ..

كلامنا مشي وجاء ..!

بريمة

Post: #24
Title: Re: سلك_مرق
Author: Haytham Ghaly
Date: 09-27-2021, 05:00 AM
Parent: #23

Quote: أطردوا سلك والسنهوري من التشكيلة ..


نطرد سلك والسنهوري عشان خاطر الارقوز دا هههههههه


في زمتك في زعيم قبيلة عندو مشكلة في منطقتو يقول انا مطالبي اقالة الحكومة !!!!!

دا اثبت انو زول هايف ساي واداة رخيصة يستخدمها الكيزان


وانت فرحااان ههههههههههههه

Post: #25
Title: Re: سلك_مرق
Author: منتصر عبد الباسط
Date: 09-27-2021, 06:53 AM
Parent: #24

Quote: خالد قال حل الشرق سياسي والبرهان قال عسكري ،،، ترك رايو شنو
هل فعلا البرهان قال سيحل مشكلة الشرق عسكريا؟!
بعدين الشفت خالد سلك الكتل الشباب في ميادين للقيادة عشان
يضع مؤخرته في كراسي السلطة ليسترخي ويضع سفته متكئا
منتشيا !
ما هي حلوله السياسية والتي قام بها هو ورفاقه
وما هو دورهم في توعية القواعد بالشرق والغرب ؟!
وجود مؤيدي سلك الكم مية نفر ديل فقط داخل الخرطوم
والبقية في الولايات قليلون لا أثر لهم
ولا حركة وهؤلاء وأولائك
لا أثر لهم سوى الهتاف وطرق الطبول

Post: #26
Title: Re: سلك_مرق
Author: Haytham Ghaly
Date: 09-27-2021, 07:13 AM
Parent: #25

Quote: بعدين الشفت خالد سلك الكتل الشباب في ميادين للقيادة عشان
يضع مؤخرته في كراسي السلطة ليسترخي ويضع سفته متكئا
منتشيا !


دليلك شنو على الاتهام الخطير دا يا منتصر؟؟

Post: #27
Title: Re: سلك_مرق
Author: طلحة عبدالله
Date: 09-27-2021, 08:06 AM
Parent: #26

Quote:
خالد سلك الكتل الشباب في ميادين للقيادة عشان
يضع مؤخرته
دليلك يا زول لأنو دا اتهام خطير جدا
خت دليلك هنا وبكرة دي أنا (طلحة عبدالله ) بفتح فيهو
بلاغ وبلاحقو ..
ثم
يضع (مؤخرته) كيف يعنى ؟؟
يضعها براها كدا وباقي جسمو يكون معلق
في الهواء ساي ؟؟ كان احسن من المفردة
دي تقول يقعد يجلس يتحكر يتوهط ان شاء الله
حتى يستولي .. لا علاقة لمؤخرات الناس بالسياسة
والخصومات الشخصية يا أخونا في الدنيا .

Post: #28
Title: Re: سلك_مرق
Author: Hassan Farah
Date: 09-27-2021, 09:36 AM
Parent: #1



Quote: أطردوا سلك والسنهوري من التشكيلة ..
البشوفوه بالعين ما بضووا له بنار ..

كلامنا مشي وجاء ..!
--------------------------------------------------------------------
الحمد لله الجات منك
انت فرقك شنو من ترك؟ داك على الاقل اشجع منك كوزنتو ماداسيها
ربما لجهله
اما انت بحكم مستواك التعليمى ومعرفتك التامة سلكت درب آخر فى تأييد نظام الكيزان بس برضك كويز مصقر

Post: #29
Title: Re: سلك_مرق
Author: Abdelrahim Mohmed Salih
Date: 09-27-2021, 09:43 AM
Parent: #28

الناظر الغير حكيم ترك يسترزق ب مشاكل الشرق بتنسيق مع الشق العسكرى
اما لشق المدنى نقول لهم من يهن يسهل الهوان عليه لاسياسه ولا رؤيه واضحه يتلاعب بهم العسكر والفلول

Post: #30
Title: Re: سلك_مرق
Author: محمد أبوالعزائم أبوالريش
Date: 09-27-2021, 10:18 AM
Parent: #29

Quote: دا اثبت انو زول هايف ساي واداة رخيصة يستخدمها الكيزان


وانت فرحااان ههههههههههههه

طبعاً فرحان يا هيثم
إنت براك جبت الإجابة: (أداة رخيصة يستخدمها الكيزان) ....

Post: #31
Title: Re: سلك_مرق
Author: محمد البشرى الخضر
Date: 09-27-2021, 11:11 AM
Parent: #30



Quote: ما دعمنا خالد سلك ، ود الفكي أو وجدي عشان احزابهم كبيرة أو صغيرة .. وللا الوزن عندنا بحجم الحزب .. دعمناهم عشان الأنتقال للحكم المدني ما أكتر ومن وعينا على مناهضة الكيزان لقيناهم جنبنا مع ناس أمجد فريد وسيد الطيب وراشد ورضوان داؤود ود.اسعد وعييييك مئات بل آلاف غيرهم ..ايام مفاوضات الوثيقة الدستورية كنا واقفين قنا مع عمنا صديق يوسف والمرحوم الأمام ود.أبراهيم الأميين .. وهسه لو الشيوعي في الرصة كنا وقفنا معاهو ضد العساكر
..
الحرية والتغيير عايزة اصلاح ماعونها لازم يستوعب الحركات ,مع اهلنا في الشرق والبطانة والشمال بكافة مكوناتهم بشرط الأيمان بأجندة الانتقال والبعد عن الإحتماء في العسكر .. ومنطق الحجم والاوزان هسه منطق جدلي عقيم ، مافي زول عندو بيانات بالأحجام .و دي نخليها للأنتخابات كلها باقي ليها سنتين
..
العسكر ما عندهم حق يتكلمو عن توافق المكون المدني .. أي دعوة زي دي بتكون ملوثة وحا تجيب مكون مدني مهادن ويخرب الأنتقال .. ده لو ما بقوا لينا زي ناس مسار وعبود جابر للبشير و طبلوا للبرهان وحميدتي وعملوا ليهم دستور وجابوهم على راسنا
...
بندعم لجنة تفكيك التمكين بسبب اساسي حاليا هو رعب دولة الإقتصاد الموازي منها(الوراقة ، تجار العملة ، المهربين ، السماسرة) ، لأنو الدولة دي بعد الكيزان كاست حاضنة وأحتمت في المليشات والحركات والعسكر .. ودي بالنسبة لينا أكبر مهدد للأنتقال لأنها بتسرق الموارد
..
دعم لجنة التمكين ما شيك على بياض ، اي متسلط ودكتاتور في طور التكوين واي زول بأخدها مطية عشان يرهب الناس أو يحقق مطامع خاصة ما بنخليهو
مؤمنين بأنو ما كل الناس المعانا وصوتهم عالي ديل على قلب رجل واحد فيهم الصالح والطالح .. ياهو فيسنا ده بندق الصفائح لاي فاسد .. وهسه المتسلط بتاع المريديان ما بنخليهو حتى لو نكر القالو للعساكر أول أمس بس نفضى ليهو
...
لجنة أستئناف تفكيك التمكين ضرورة هذا الأسبوع تتشكل .. ينبغي أن تكون فقط من قانونيين وقضاة بدون اي واجهة سياسية .. لأنو حق الكيزان زاتو مفروض يكون مكفول لو حقهم صاح .. بس محاولة أستهداف اللجنة الحالية لأنو مافي لجنة استئناف ده كلام اساسو ما صاح ياجبريل ما من أختصاصها تشكيل لجنة أستئناف وأنت عارف كده أقعدوا في الواطة وجيبو الأستئناف
...
مفوضية الفساد جهة مهنية أهم شرط فيها تكون حيادية وتبعد من اي شبهات أو مواقف سياسية .. ناس كتار شايفين إنو الزيّنا مفروض نشتغل فيها .لكن عينتنا دي صاحب مواقف سياسية معروفة وواضحة ما يصلح لأنو ما حيادي وبلوث المفوضية ويخلق فيها بلبلة سياسية .. ومفوضية الفساد دي تبل أو ما تبل حمدوك ومكتبو و القحاتة والحركات والعسكر والبوليس والجنجويد وحتى النظار والعمد ..
...
مواصلين وقدامنا الصباح

Post: #32
Title: Re: سلك_مرق
Author: محمد البشرى الخضر
Date: 09-27-2021, 12:20 PM
Parent: #31

Quote: اقلبوها لو بتقدروا ؟!!!

هشام عباس

الصراخ والعويل لا يفيد ... اقلبوها ان استطعتم .
كمية الاستفراغ الذى يمارسه قادة المكون العسكري هذه الايام امر لا يدعو للاستغراب فكلما اقتربنا من نهاية المرحلة الانتقالية كلما شعروا ان اجلهم قد دنا وماهى الا فرفرة مذبوح .
طوال الثلاث اعوام الماضية كنا نطالب الثوار بالحكمة والتعقل والاهم الصبر .
لاننا نرى مصلحة الوطن فوق كل اعتبار قلنا انه يجب الصبر حتى على حقوق الشهداء وتحملنا ما تحملنا من سب وشتم .
ان تخسر نقاط فى صالحك او فى صالح ثورتك من اجل ان يبقى الوطن سليما وتحافظ على تماسكه اهم من مواجهة قد ننزلق فيها ونخسر الوطن وحينها لا كسبنا ثورة ولا استعدنا حقوق .
ومهم جدا فى كل صراع سياسي ان تقيم طبيعة ونوايا خصمك ,, وطبيعة ونوايا المكون العسكري لا يجهلها عاقل ومن كان يجهل على الاقل فهم منذ جريمة فض الاعتصام .
لذلك كنا ندرك ان هذه الشراكة بكل ما فيها من عوار امر واقع ولابد منها للحفاظ على ما تبقى ..
وكنا ننبه ان من يزايدون على حقوق الشهداء ومن يزايدون على هذه الشراكة غير مستوعبين لخطورة الوضع والى هذه اللحظة اكرر نفس القول .
عندما تفهم طبيعة ونوايا خصمك مهم جدا ان تجرده من السلاح الوحيد الذى يملكه والملعب الوحيد الذى يفهمه وهى لعبة المواجهة والاسلم ان تجره الى ملعبك وسلاحك الذى بيدك وهى لعبة الوقت .
طوال الفترة السابقة حاولوا وتآمروا لجرنا الى مواجهة الخاسر منها الوطن وفشلوا
بينما نجحنا فى جرهم الى لعبة الوقت ونجحنا
الان كل مشكلتهم ان الوقت اصبح سلاحا قاتلا فى مواجهتهم ولا مفر من ان ينفذوا كل اتفاقات الشراكة التى شهد عليها العالم اجمع وحينها قد فقدوا كل شئ .
لذلك كل هذه المسرحيات والفرفرة ما هى الا محاولات لجرنا الى ملعبهم ووقوع مواجهة مع الشارع وخلق اسباب ومبررات تستدعي انهاء وضع قائم وخلق وضع جديد بمبررات جديدة واضافة وقت جديد يضمن لهم سنوات اخرى .
وعلينا ايضا تفويت هذه الفرصة وعدم منحهم مبررات ذلك ...
لن نقع فى هذا الفخ ..
نفذوا تعهدات الشراكة كما تم الاتفاق عليها او ان كنتم تستطيعون قوموا بانقلابكم لنرى من الخاسر .
اتمنى ان يكون بعض صغار العقول من كانوا يصفون حمدوك بالضعف قد فهموا الموقف جيدا وعرفوا ان الحكمة ليست ضعف والسياسة ليست عباطة ولا فرد عضلات انما كياسة وقراءة للواقع بشكل سليم .
واتمنى من ممثلي الجانب المدني ان يتعلموا من حمدوك ولا ينجروا الى طفولية تصريحات حميدتي والبرهان ..دعوهم يستفرغوا وتمسكوا بلعبة الوقت .
الوقت يخنقهم فلا تعطوهم نفس للمواجهة

هشام عباس

Post: #33
Title: Re: سلك_مرق
Author: AMNA MUKHTAR
Date: 09-27-2021, 04:17 PM
Parent: #1

الأعزاء حمد ونعمات وإخلاص ومحجوب وبريمة ومنتصر ..
سلام جاكم .
أما البقية فهم معذورين..فقط إختلطت عليهم الأمور فجأة ما بين أحزاب قحت المركزية وبين ثورة الشعب التي بدأت في مدن الأقاليم وفيافيه..
فصارت قحت بالنسبة لهم هي الثورة والثورة هي قحت ..في شمولية جديدة ولكن بنكهة ثورية هههه
فصاروا لسه يعزون النفس بالأمل ..ويغالطون جوارحهم الجزعة..زي الفنان الذي يقول ( أغالط نفسي في الميعاد وأقول يمكن أنا الما جيت )..فهؤلاء تمت برمجتهم على سياسة القطيع..وبالتالي إنعدم عندهم الحس النقدي ..فبعضهم لا يزال يصر مبررا للفشل الذي توضح منذ البداية ..وبعضهم تحول إلى آلة جداد قحتي ..بالضبط بنفس طريقة الجداد الكيزاني ..وبعضهم يقول ليك آي في فشل في كذا وكذا ولكن برضه لسه عنده أمل في تحالف قحت بشقيها وشقوقها..رغم أن معظم الشعب النور الأحمر عنده ولع ..وحس بالفشل والخطر الماثل ..
ومهزلة( صراع الضرات عسكر ومدنيين..ومدنيين فيما بينهم المعرسهم نفس المحور الواحد ) بقت ما بتهم الشعب كثيرا ..وأنا جوه السودان وشايفة الإحباط وعدم المبالاة بعيني وكل حواسي..للأسف.

أما بخصوص تعليقك يا محجوب على الفيديو الجابو ود البشرى الشايف الحاصل في الشرق دا زي لعبة كورة هلال/مريخ ..ومكايدات منبرية وظووووط..وشنو ما عارفة برضك معذور ..
فأمثاله من تربوا ونشأوا في كنف الكفيل ..يعرفوا شنو عن السودان وشعوبه..دا إذا كان القاعدين في المركز أو جهة أخرى من جهات السودان يجهلون عن باقي الجهات كل شئ ؟
وهذه بالطبع هي أزمة السودان في كل العصور ..ونتيجة لمناهج التعليم السطحية التي وضعتها نخب ما بعد الاستعمار..بل ومعظمها هي نفسها مناهج الاستعمار ..وكمان زادتها الإنقاذ بلة على طينتها..

الشخص المتبجح كذبا المتحدث في الفيديو هو (علي أكد) كادر مؤتمر وطني سابق ..وشقيق الوزيرة الكوزة سمية أكد ( سمية سفنجات) ..والنصيحة سموها بهذه التسمية ظلما وكيدا ..فقد كانت قدمها مصابة في الصورة الشهيرة.

أما علي أكد دا زي ما قلت كوز وأسرته كلهم كيزان وكذلك ناظر قبيلته وعمدها ومعظم القبيلة..وهم أول من أدخل السلفية والوهابية إلى شرق السودان الإنتماءات قبائله معظمها مؤتمر بجا علماني وختمية وأنصار ..لذلك ضربتهم الإنقاذ بالإريتريين.
ووالد المدعو علي أكد جاء لاجئا إلى ولاية كسلا أيام حربهم واشتغل معلما في معسكرات اللاجئين، وقبيلته أصلا جنستها الإنقاذ كما جنست كل قبائل إريتريا المسلمة التي رفض إسياس عودتها من معسكرات اللجوء في السودان ..وبعضهم هرب من دكتاتورية إسياس وقومه المسيحيين ضد المسلمين.. وبعضهم من الجهاديين الإريتريين الذين طردهم إسياس ورحبت بهم الإنقاذ بالطبع ليخوضوا معها حروبها ضد مؤتمر البجا والتجمع الوطني الديمقراطي أيام الكفاح المسلح في الجبهة الشرقية.

وعلي أكد من بيت نظارة النابتاب الإريترية وعاصمة نظارتهم أصلا في دقا شمال مدينة أغوردات الإريترية..وشعب النظارة إسمه التقري في إريتريا والخاسا في السودان .
ومسمى بني عامر بن نابت هذا كان ينطبق على بيت النظارة فقط..وليس شعب النظارة كما صار مؤخرا بعد هجرة معظم القبيلة إلى السودان وتجنيسها.
فالناظر دقلل نفسه والده لجأ إلى كسلا وكان وكيلا للدقلل الأصلي في إريتريا..فأسكنه الختمية في بيت لهم في مدينة كسلا .
أما تواجد القبيلة الحالي في ريفي كسلا وجنوب توكر وباقي ولايات الشرق والسودان ..فهو في معظمه مستحدث..للأسباب التي ذكرتها فوق .

وبالتالي هم ليس لديهم حاكورة أو أرض نظارة في شرق السودان مطلقا.. لا هم ولا الحباب ولا باقي قبائل إريتريا المجنسة التي ليست لها حتى حدود أو تداخل مع السودان .
مثلا في فيديو والي القضارف الشهير الذي تمت إقالته بعد إنكشاف كوزنته..فقد فوجئنا نحن بمسمى القبيلة ..عكسكم إنتو الذين فوجئتم فقط بكوزنة والي القضارف وقبيلته.
ففي الفيديو إسم القبيلة ( الأساورتا) ولدهشتنا هذه القبيلة لم نكن نسمع بها في شرق السودان مطلقا!!
وعندما تقصينا من خريطة وقبائل إريتريا كما صرنا نفعل كثيرا مؤخرا بعد الهجمة الضارية وإدعاء تاريخنا وأرضنا ههههه
وجدنا أن قبيلة الأساورتا دي تنتمي إلى قومية إسمها الساهو..وهي إحدى قوميات إريتريا حسب التصنيف الإريتري للقوميات ، ولو نظرتم لخريطة قوميات إريتريا ستجدون موقع هذه القومية في مرتفعات إريتريا المتاخمة للحبشة وعلى ناحية جيبوتي، وبالتالي هذه القبيلة ليست لها علاقة بالبني عامر (النابتاب) وشعب قبيلتهم التقري (الخاسا)..ولا تجمعهم حتى لغة واحدة .
ولكن كل قبائل إريتريا المسلمة نالت في عهد الإنقاذ فرصة التجنيس تحت مظلة قبيلة البني عامر ..التي لها في شرق السودان نصف محلية فقط على حدود الأفهرين بين السودان وإريتريا.

وهذا مثال فقط كما ذكرت ، فتقريبا إريتريا خلت من الأغلبية المسلمة التي تركت أراضيها لقومية إسياس أفورقي التقرنجا المسيحيين..ولم يصمد هناك مع المسيحيين على ما يبدو سوى البجا الحدارب..فالبجا لو لاحظتم لا يتركون أرضهم التاريخية مهما كان.

أما عن علي أكد الذي يقف متبجحا في مدينة كسلا معقل قبيلة الحلنقة البجاوية التي هي جزء من نظارات المجلس الأعلى لنظارات البجا والعموديات المستقلة.. فهو ليس إستثناء في الكذب والادعاء البقح لأراضي وتاريخ الآخرين..فقد صار هذا ديدن كل شبابهم وصغارهم الذين تم تضليلهم كما يبدو من قبل جيل الأباء الذين صاروا (مرطبين) بعد تمويل الإنقاذ ومنظمات اللجوء وبنوك ومنظمات الكيزان والوهابيين ..الذين كانوا يعانون في إريتريا من النظام الإقطاعي السائد في المحيط الحبشي ..والذي يسمى (شماقلي، تقري) والذي يعني بلغتهم السادة والأرقاء.
حسب( القاموس الحبشي) وحسب البحث في قوقل عن معنى المصطلح..هذا النظام الذي تمارسه نظارة بني عامر بن نابت (النابتاب) في إريتريا على شعب نظارتها التقري.
الأمر الذي جعل هؤلاء الأباء الذين تجنسوا وذاقوا الحرية في السودان..أن يحاولوا أن يصنعوا لأبنائهم تاريخ جديد عبر إنتحال أرض وتاريخ من إستضافوهم وضموهم تحت جناحهم..فالبجا كل سكان شرق السودان يعرف ترحابهم بمن يستجير بهم ..بل يحاربوا معه كما فعل البجا وحاربوا ضد الحبشة مع الثوار الإريتريين..وعانوا بسببهم من هجمات الدرك الحبشي التي كانت تطارد المعارضة الإريترية في الحدود السودانية.

لا أنسى أن أذكر أن هذا العلي أكد نفسه كان قد قام بسب شعب نظارته التقري ووصفهم بأنهم (سب حبش وسب حباب ) ويعني بذلك عبيد حبش وحباب ..
وهذا في لايف متداول له .

والغريبة أن علي أكد كما إرتدى السديري في الفيديو أعلاه هو ومن معه وخلع الفانلات الملونة التي يرتديها الإريتريين والتي يتصور بها في معظم لايفاته الكلها نبز وعجرفة وإساءات للبجا والشعب نظارته..
كذلك فقد خلع أيام الثورة ثوب الكوزنة..وارتدى زي الثائر أيام الثورة ..
وأذكر أنه قد تم طرده من ندوة للجان مقاومة بورتسودان بعد الثورة مباشرة ..نسبة لأنه معروف بالكوزنة وإنه كان من المجاهدين.

أما قبيلة الحباب التي ذكرها علي أكد ..فهي مثلها مثل نظارة بني عامر من النظارات المستحدثة في شرق السودان ..
فالحباب حتى اليوم نظارتهم وناظرهم( كنتباي) موجودة في مقر نظارتهم في نقفة في إريتريا.
ولكن محمد طاهر إيلا الله لا كسبه ..منحهم نظارة بدون أرض في هذه الألفية.
وناظرهم مثله مثل ناظر البني عامر ..كانوا وكلاء للنظار الأصليين في إريتريا..ثم تم منحهم نظارات في السودان ( عمد بدون أطيان)..

ولقد صرنا نسميهم بني سلبطة مؤخرا..لأنهم صاروا يدعون علاقات وهمية لهم مع عديد من قبائل البجا والقبائل السودانية الأخرى..حين أن لغتهم التقري تختلف تماما عن لغة البجا البداويت.

أود أن أشير إلى أننا في الشرق بكل مكوناتنا لم يكن بيننا مشاكل قبلية كنا لاحظتم.
وهنالك أعراف عريقة مشددة تحفظ بين القبائل وكل مكونات الشرق من باقي السودانيين تحترمها.
ولكن كان هؤلاء المجنسين أول من خرقوا ( القلد) وهو إتفاق الهدنة بينهم وبين النوبة..وكان هذا أمرا مستفزا جدا بالنسبة لمكونات شرق السودان بمختلف أصولها!!

Post: #34
Title: Re: سلك_مرق
Author: AMNA MUKHTAR
Date: 09-27-2021, 04:51 PM
Parent: #1

وبالمناسبة يا نعمات ..إنطلت أكذوبة المجنسين الإريتريين على الجداد القحاتي ..بأن ترق خايف من فتح ملف صندق إعمار الشرق..وكذلك يطالبون بكل بقاحة ..بمطلبنا القديم والمتجدد بضرورة فتح ملف إعمار الشرق..هذا الصندوق الذي ياما إعتصمنا في سبيله مع مسرحي قوات مؤتمر البجا في ولايات الشرق الثلاث..

والمضحك في الموضوع سببين :
أن البني عامر ومجنسيهم لا علاقة لهم بصندوق إعمار الشرق الذي هو نتيجة نضالات مؤتمر البجا في الكفاح السلمي والمسلح في الجبهة الشرقية..
والذي أكلته الإنقاذ كالعادة ..فالصندوق مسؤول عنه مصطفى عثمان إسماعيل ومديره أبو عبيدة الدج ..
ولم ينال منه شرق السودان سوى الفتات.

وكل الناس عارفة كدا بس بتتغابى.

والسبب المضحك التاني أن ليس للناظر ترق والإدارة الأهلية علاقة بهذا الصندوق ..
وترق تحدى لجنة (التطمين وكتائب حنين ) أن تبدأ به هو ..لأنه واثق من نفسه ..فهو ليس لديه قصر في كافوري أو حتى مدن الشرق .

وغضبه كان من لجنة التمكين لأنها أول ما بدأت أزالت مهن نساء ورجال بجا نالوا وظائف هزيلة إما نتيجة لإتفاقية الشرق..أو بسبب مؤهلاتهم فقط .

موسى محمد أحمد رغم نضاله في الكفاح المسلح يعاب عليه جلوسه في قصر غردون كمساعد لبشة.
وكذلك آمنة ضرار البني عامراوية التي رغم أنها كانت في مؤتمر البجا ..إنشقت فجأة وهي ومن معها من التقري أثناء المفاوضات مع الإنقاذ في إريتريا..وطالبوا بفصلهم من منبر البجا بمنبر منفصل بإسم( جبهة التقري)!!
وهؤلاء لم يطلقوا طلقة واحدة في الكفاح المسلح.
بل استخدموا مؤتمر البجا كسلم يوصلهم إلى طاولة المفاوضات فقط.

ثم بعد ذلك أسسوا حزب التواصل من التقري فقط ..ويقصدون به التواصل بين تقري السودان وإريتريا.

المؤلم في الموضوع أن المجنسين الإريتريين الذين إشتروا مسار بإسم الشرق في منبر جوبا..قامت إتفاقية جوبا من ضمن ما منحتهم..منحتهم أيضا حق فتح صندوق إعمار الشرق ليكونوا أوصياء عليه !!!
حين أنهم هم من كانوا يحاربون البجا كجهاديين في صف الإنقاذ 😅

الصندوق دا ياريت البجا كان أكلوه.

Post: #35
Title: Re: سلك_مرق
Author: AMNA MUKHTAR
Date: 09-27-2021, 05:37 PM
Parent: #1

وين لجنة التطمين وكتائب حنين من ملف بيع وشراء مسار بإسم الشرق في منبر جوبا ..
إريتريين إتشاكلوا في المسار ..وواحد دفع قروش سارقها من بنك السودان ودفر رفاقته..

ومناوي يقول كدا بالمفتشي..في فيديو شهير !!
كر علي شرق السودان الذي أصبح يشتري ويبيع فيه هؤلاء مع قادة الجبهة الصورية المرتشين..
كيف يأتمن شعب الثورة على وطنه وثرواته..حين يصرح حكامه بأنهم ياخدون كومشنات ورشاوى سياسية..

وتقولوا البجا وسكان الشرق ليه مصرين يقفلوا الشرق في وجه مسار العملاء دا !!


هكذا بكل بساطة يا مناوي يا رمة ؟!

بالمناسبة، حكومة قحت دي مخترقة تماما من قبل المجنسين الذين كانوا لغاية الأمس كيزان .
منهم مدير أكبر مؤسسة قومية للإعلام ..صحفي رياضي تخيلوا ..
وكذلك لا ننسى إعلام الثورة ..منعم سليمان بيجو وبعض المذيعين ومراسلي القنوات السودانية والأجنبي والصحفيين ..كل هؤلاء أهلتهم الإنقاذ في مركز قناة الجزيرة الإعلامي .

Post: #36
Title: Re: سلك_مرق
Author: محمد البشرى الخضر
Date: 09-27-2021, 06:19 PM
Parent: #35

Quote: وكتائب حنين
كنت عايز ارد على كلامك لكن لما وصلت لما في الاقتباس ولقيتك مصرة تتبرعي بجهلك قلت ما في داعي لانو مافيش فايدة
لكن ضحكتيني في ذكرك لكوزنة المتحدث في الفيديو و كونه مؤتمر و طوني, كويس طلما شفتي القشة دي اكيد ما غاب عنك العود في عين مرشح المؤتمر الوطني للمجلس الوطني الناظر ترك المرق :)

Post: #39
Title: Re: سلك_مرق
Author: بشير أحمد
Date: 09-27-2021, 07:35 PM
Parent: #36

بالله معلقة آمنة مختار دي كلها ...ما لقيت فيها حاجة غير دي يامحمد؟

Post: #37
Title: Re: سلك_مرق
Author: منتصر عبد الباسط
Date: 09-27-2021, 07:24 PM
Parent: #35

Quote: دليلك شنو على الاتهام الخطير دا يا منتصر؟؟
لو علمت بحقيقة التهمة ستعرف أن الجميع
يملكون الدليل
الذي حرض شباب و مراهقين وصبيان عزل على
البقاء في اعتصام مهدد بالمجزرة ليس تصريحا
ولكن الشواهد كانت كثيرة على أن تلك المجزرة واردة
الحدوث
تحريض شباب ومراهقين علي إغلاق الشوارع
في ذلك المكان وتعطيل المرور لشهور وما يحدث
من حوادث قتل واقتتال متفرقة وفي أيام
كانت الحاجة فيها لضبط الحركة بدلا من توفير
الصيد للمجرمين !

Post: #38
Title: Re: سلك_مرق
Author: منتصر عبد الباسط
Date: 09-27-2021, 07:33 PM
Parent: #37

يحرضو الشباب والمراهقين علي السهر على حراسة
التروس ويمشيو يبيتو في بيوتهم!
ثم يأتو ليبيعوا ويشتروا بدمائهم!

Post: #40
Title: Re: سلك_مرق
Author: ABDALLAH ABDALLAH
Date: 09-27-2021, 08:07 PM
Parent: #38

Quote: بعدين الشفت خالد سلك الكتل الشباب في ميادين للقيادة عشان
يضع مؤخرته في كراسي السلطة ليسترخي

الأخ منتصر
ما هو تفسيرك للفجور فى الخصومه إن لم يكن بخلاف ما لا يرضى
من القول ؟

Post: #41
Title: Re: سلك_مرق
Author: محمد البشرى الخضر
Date: 09-28-2021, 04:58 AM
Parent: #40

يا بشة مرة في قناة طيبة جابو مداخلة مع زميل البورد د. صديق محمد عثمان احد الاسلاميين الشعبيين العقلاء القلائل القالوا كلمة الحق و خرجوا مع الترابي
المهم الراجل كان بقدم مقد موضوعي لاداء الحكومة الانتقالية و لجنة التفكيك واثار نقاط منطقية و حقيقة لا احد يستطيع الجدال حولها بيني وبينك دخلني في ذاك الموضوع الحرج وانا بيني وبين نفسي اقر بصدق حديثه وقوة منطقة
إلى ان اتى الطاهر توم على ذكر موضوع شركة زبيدة! للاسف قال الدكتور ان الشركة مسماة على اسم والدة صلاح مناع!
أمممك!! الدكتور اتاريه بغرف زيو وزي اطرش من الواتساب و يحاجج بما يغرف!
سقط من نظري طوالي رغم قوة ما ذكر من حجج!
اها ... قس على ذلك

بالجمبة كدا انت رايك شنو في قصة كتائب حنين دي!
و بالجمبة التانية.. شعورك شنو و الكل يتعاير بالانتماء للمؤتمر الوطني! كأنكم جزام أو جرب أو عوارة ابتدائي و العياذ بالله

Post: #42
Title: Re: سلك_مرق
Author: طلحة عبدالله
Date: 09-28-2021, 06:08 AM
Parent: #41

Quote: عوارة ابتدائي
تقصد العوارة البتقوم
في الركبة زمن المدرسة ؟؟
كان ياها لا أملك إلا أن أقول ليك
يخس على ذاكرتك اللامة زي الحاجات دي .

Post: #43
Title: Re: سلك_مرق
Author: محمد البشرى الخضر
Date: 09-28-2021, 08:54 AM
Parent: #42

لا يا تنظير ياخ!
العوارة الواحدة دي! البتنابزوا بيها الناس ويمرقوها لي بعض وكدا!

Post: #44
Title: Re: سلك_مرق
Author: منتصر عبد الباسط
Date: 09-28-2021, 10:18 AM
Parent: #43

يا عبد الله عبد الله
هي خصومة في أربعين مليون نفس آدمية وفي وطن
كبير وليس خصومة شخصية ‘إنما الفجور يكون
في الخصومة الشخصية فأنا لا تربطني بهم أدنى
صلة شخصية

Post: #45
Title: Re: سلك_مرق
Author: طلحة عبدالله
Date: 09-28-2021, 11:33 AM
Parent: #44

Quote:
هي خصومة في أربعين مليون نفس آدمية وفي وطن
كبير وليس خصومة شخصية
يا منتصر ياخ ال 40 مليون نفس ديل
اكيد ما بوافقوا ليك على التوصيفات الإيحائية من عينة
(موخرتو) والذي منو .
مؤخرتو ؟؟؟؟؟؟؟؟؟؟؟؟
مبالغة

Post: #46
Title: Re: سلك_مرق
Author: بشير أحمد
Date: 09-28-2021, 11:35 AM
Parent: #44

منو القال ليك الانتماء للمؤتمر الوطني حاجة كعبة....

مؤتمر وطني وافتخر....وغير متلون بالدرب العديل وبنقد عين اتخن تخين...



ردك الاخير بعتبره إفلاس منك ...ومعلقة آمنة مختار والسرد التاريخي الفيها لقضية الشرق...خلتك قاعد ساي

Post: #47
Title: Re: سلك_مرق
Author: محمد البشرى الخضر
Date: 09-28-2021, 11:41 AM
Parent: #46

Quote: منو القال ليك الانتماء للمؤتمر الوطني حاجة كعبة....
ودي عايزة كلام كمان, قالوها 40 مليون ونيف و اهو قدامك الطرفين كل واحد بشتم ويعاير التاني بانه كان منتمي للمؤتمر الوطني!
انت افتخر بي راحتك الكلام ما عنك, كلامي عن انو البتفتخر بيه دا عار عند الناس و بتشاتمو بيه
ما عارف الافلاس شنو القصدته اذا قصدك عوارة الابتدائي فهي ما ليها علاقة بردي على آمنة, هي بيني وبينك وتنظير
أما ردها الخلاني قاعد ساي, أوكي اذا شايف كدا بي راحتك هو انت قلت بتفتخر بانتماءك للمؤتمر الوطني تاني شنو بعد دا! هل تفتكر رايك او تقييمك للامور يعول عليه او يؤخذ به!

Post: #48
Title: Re: سلك_مرق
Author: HAIDER ALZAIN
Date: 09-28-2021, 12:21 PM
Parent: #47



عزيزي القارئ المتابع مرقة خالد سلك ..نديك زيت هذا المقطع :

Quote: أما عن علي أكد الذي يقف متبجحا في مدينة كسلا معقل قبيلة الحلنقة البجاوية التي هي جزء من نظارات المجلس الأعلى لنظارات البجا والعموديات المستقلة.. فهو ليس إستثناء في الكذب والادعاء البقح لأراضي وتاريخ الآخرين..فقد صار هذا ديدن كل شبابهم وصغارهم الذين تم تضليلهم كما يبدو من قبل جيل الأباء الذين صاروا (مرطبين) بعد تمويل الإنقاذ ومنظمات اللجوء وبنوك ومنظمات الكيزان والوهابيين ..الذين كانوا يعانون في إريتريا من النظام الإقطاعي السائد في المحيط الحبشي ..والذي يسمى (شماقلي، تقري) والذي يعني بلغتهم السادة والأرقاء.
حسب( القاموس الحبشي) وحسب البحث في قوقل عن معنى المصطلح..هذا النظام الذي تمارسه نظارة بني عامر بن نابت (النابتاب) في إريتريا على شعب نظارتها التقري.
الأمر الذي جعل هؤلاء الأباء الذين تجنسوا وذاقوا الحرية في السودان..أن يحاولوا أن يصنعوا لأبنائهم تاريخ جديد عبر إنتحال أرض وتاريخ من إستضافوهم وضموهم تحت جناحهم..فالبجا كل سكان شرق السودان يعرف ترحابهم بمن يستجير بهم ..بل يحاربوا معه كما فعل البجا وحاربوا ضد الحبشة مع الثوار الإريتريين..وعانوا بسببهم من هجمات الدرك الحبشي التي كانت تطارد المعارضة الإريترية في الحدود السودانية.


هذا بمعنى لا تولوا ابناء السفلة اموركم..
والزيت هنا انه البني عامر والخاسا الحايمين في الشرق ديل مجرد عبيد وولاد عبيد كيف عاوزين تساوهم بالاسياد واولاد الاسياد..!

دا معني ورجغة التلاتة صفحات دي ..:)

Post: #49
Title: Re: سلك_مرق
Author: محمد البشرى الخضر
Date: 10-09-2021, 01:37 PM
Parent: #48

جاني مزاج ارفع البوست دا بدون مناسبة

Post: #50
Title: Re: سلك_مرق
Author: أيمن نواى على
Date: 10-09-2021, 02:46 PM
Parent: #49

ود البشرى
جاني مزاج ارفع البوست دا بدون مناسبة
..............................

هو فى حاجة ساكت .. لله يا محسنيين .. الله يدينا و يديك
كرامة مقبولة .. نردها لكم فى المسرات و الليالى الطيبات
اولا نشكر ضيوفك الكرام .❤️. و صاحب الدار😍😍😍 وصاحب صاحب الدار 😍منهم الاخيار و ينجينا من الاشرار 👿👿
و الشكر موصول لك لى إتاحة الفرصة لندلوا بدلونا .. و نوجة سهام من كنانتنا لنصيب كبد الحقيقة التى لا يزيق عنها إلا هالك
وبعد
أما عن سلك المغطى بيهو فهو عريان .. كما حدث فى القيادة العامة .. أن كان يعلم بها قبل ما حدث هو مشارك فى الجريمة .. و إن كان لا يعلم لا يصلح قائدا لمرقة جداد الكترونى .. دعك من يكون مرق للثوار .. سلك لا يصلح إلا أن يكون منصوبا على أعمدة الكهرباء .. إذا لمسته يصيبك التيار أما أن تفقد الوعى تصبح مقفل نافع الما نافع ناقل للتيار بدون وعى أو تكون من النادمين .. أو تكون حرضا من الهالكين و تنقل الى احمد شرفى .. وجودة ضرر للثوار و نفع للآخرين
لا نقول ودعا بل إلى اللقاء فى جولة أخرى .. التدافع و الحراك سنة يسن لها الرماح ..بالقلم أو السيف فهو اصدق انباء من الكتب .. وفى حده الحد بين الجد و اللعب .. بيض الصفائح لا سود الصحائف فى متونهن جلاء الشك و الريب .. ترك مرق

Post: #51
Title: Re: سلك_مرق
Author: Hassan Farah
Date: 10-09-2021, 05:56 PM
Parent: #1

منو القال ليك الانتماء للمؤتمر الوطني حاجة كعبة....

مؤتمر وطني وافتخر....وغير متلون بالدرب العديل وبنقد عين اتخن تخين...



ردك الاخير بعتبره إفلاس منك ...ومعلقة آمنة مختار والسرد التاريخي الفيها لقضية الشرق...خلتك قاعد ساي
-------------------------------------------------------------------------------------------
بشير احمد اعضاء مؤتمركم اللاوطنى كلهم او معظمهم حرامية سرقوا المال العام ما هو ردك على لك؟

Post: #52
Title: Re: سلك_مرق
Author: AMNA MUKHTAR
Date: 10-11-2021, 00:13 AM
Parent: #1

بعد أن قام تلفزيون السودان بإفساح المجال للمتردية والنطيحة وما أكل السبع ..من الأبواق والعملاء الذين يجهلون أي شئ عما حدث ويحدث في شرق السودان الآن ..
وقاموا بنشر التجهيل والعبط والسطحية ونادوا بالحلول العنترية..التي لم تفعل شيئا سوى أن زادت الطين بلة.
.....

هاهو مدير التلفزيون الآن يحاول إنقاذ ما يمكن إنقاذه..
وطبعا لو لم تصل الأزمة إلى مرحلة خنق الدولة كلها..لما أبهوا لها..
كالعاااادة..يا سعادة !!

لم أتمكن من مشاركة الحوار ، فشيرت بوست د.ياسر الشريف على الرابط أدناه:
https://sudaneseonline.com/board/510/msg/%d8%ad%d9%84%d9%82%d8%a9-%d9%85%d8%aa%d9%85%d9%8a%d8%b2%d8%a9-%d9%85%d9%86-%d8%a8%d8%b1%d9%86%d8%a7...9%86-1633857351.html

Post: #53
Title: Re: سلك_مرق
Author: Nasser Amin
Date: 10-11-2021, 00:29 AM
Parent: #52

طيب Up