Post: #5 Title: Re: صحي البرهان كان عاوز يكفت خالد سلك ؟؟ Author: Elhadi Date: 09-18-2021, 05:55 PM Parent: #4
أنا بسأل عن واقعة يجري تداولها في السوشيال ميديا بخصوص البرهان وسلك
دون وجود أي توضيحات من الحكومة لي منو قال شنو
يعني خالد سلك الخلاهو يصطدم بالبرهان شنو أساساً ؟؟
Post: #6 Title: Re: صحي البرهان كان عاوز يكفت خالد سلك ؟؟ Author: صديق مهدى على Date: 09-18-2021, 06:08 PM Parent: #5
ببساطة لان البرهان كوز معفن
Post: #7 Title: Re: صحي البرهان كان عاوز يكفت خالد سلك ؟؟ Author: Arif Nashed Date: 09-18-2021, 06:12 PM Parent: #6
التفاصيل الكاملة للمشادة الكلامية بين البرهان ووزير شؤون مجلس الوزراء
18 سبتمبر، 2021 علمت (السوداني) أن اجتماع المجلس الأعلى للسلام، شهد مشادة كلامية بين رئيس مجلس السيادة الفريف أول عبد الفتاح البرهان؛ ووزير شؤون مجلس الوزراء خالد عمر يوسف، بسبب اعتراض الوزير على طريقة إدارة الاجتماع، الذي يناقش قضية الشرق، حيث تباينت وجهات النظر حول التعامل مع القضية المطروحة. وطرح وزير شؤون مجلس الوزراء خالد عمر، رؤية للتعامل مع القضية تشمل إعلاء الحل السياسي الشامل، والموافقة على منبر تفاوضي منفصل يستكمل مسار الشرق؛ ليشمل جميع الأطراف ويعالج القضايا التي طرحها معارضو المسار، مع التأكيد على الحق في التعبير السلمي الملتزم بالقانون وضرورة تجنب قطع الطرقات المؤدي لخنق البلاد، داعياً لمنع ذلك بطرق غير عنيفة. وقالت مصادر (السوداني)، إن المشادة الكلامية بين رئيس مجلس السيادة ووزير شؤون مجلس الوزراء، كانت بسبب اعتراض الوزير على طريقة إدارة الاجتماع، حيث طلب من البرهان عدم توجيه الاجتماع في اتجاه محدد يتوافق مع رغبته. وشدد خالد، على أن المجلس للتداول ولا تمييز لرأي على الرأي، وهو الأمر الذي قاد لمشادة كلامية بينهما. وأوضحت المصادر، أن المشادة انتهت لحظياً، وواصل الاجتماع انعقاده – أمس الأول – بجميع أعضائه، حيث تدخّل أعضاء الاجتماع لتهدئة البرهان وخالد. وأكدت مصادر (السوداني) أن المكون العسكري طالب بتفويض للقوات النظامية، من أجل حماية منسوبيها من الملاحقات، لتقوم بمهامها في حسم الانفلات الأمني الذي يحدث بالبلاد، الشيء الذي رفضه المكون المدني، حيث شددوا على ضرورة عدم المساس بحق المواطنين في التظاهر السلمي، وأكدوا بأن القوانين تكفل للأجهزة الأمنية كافة الصلاحيات في أداء واجبها في حسم كافة التفلتات الأمنية والمخاطر التي تتعرّض لها البلاد. السوداني
Post: #9 Title: Re: صحي البرهان كان عاوز يكفت خالد سلك ؟؟ Author: كمال عباس Date: 09-18-2021, 06:35 PM Parent: #7
لا املك اجابة لسؤالك
بس البرهان المتورط في المجزرة لايملك شجاعة او قدرة علي مصادمة سلك الكحيان دا!
لانو صمت بعض أطراف المكون المدني. علي المجزرة. والمماطلة والتطويل في ملفها يخدم حميدتي والبرهان. وقد يكون صمام أمان مؤقت -لعدم محاكمتهم وفضح دورهم - - بسبب المجزرة برهان قبل بالأغلبية المدنية في السيادي -وبسببها ابتدر التطبيع مع اسرائيل -وبسببها بصم علي مبادي العلمانية مع الحلو خلاصتي المساومة والضغط بدماء الشهداء لابتزاز العسكر يعني ان القضية. أصبحت ورقة ضغط لا قضية مبدئية لايجب التنازل عنها او المساومة بها ومن ناحية اخري - ياتي. كل هذا مع محاولة الفلول وبعض النظار لاستمالة العسكر ناحيتهم لضرب المكون المدني ولايهمهم ان قام العسكر بتكرار المجزرة. عشرات المرات ضد الثوار ان ارتضو التحالف مع باشبوزق تركيا
لذا اعتقد ان سيناريو عوض الجاز ومبارك الفاضل مستبعد
Post: #11 Title: Re: صحي البرهان كان عاوز يكفت خالد سلك ؟؟ Author: Elhadi Date: 09-18-2021, 06:47 PM
طبعاً ما بتفق معاك يا كمال
ما بسبب المجزرة.. ولكن بسبب صمود الشارع الأسطوري بعد تنفيذ المجزرة وتتريس السودان كلو
والإضراب الشامل الذي تلاها، وموكب ٣٠ يونيو غير المسبوق في تاريخ السودان
وفوق ده وده بسبب الضغوط الدولية
الشارع والمجتمع الدولي هو من فرض علي الطرفين المسارعة لعقد الاتفاق قبل خروج الامور من بين أيديهم!
Post: #8 Title: Re: صحي البرهان كان عاوز يكفت خالد سلك ؟؟ Author: Elhadi Date: 09-18-2021, 06:33 PM Parent: #6
Quote: ببساطة لان البرهان كوز معفن
بتفق معاك
لكن أها الكوز المعفن ده موش برضو رئيس الجماعة ديل كلهم ؟؟
والكوز المعفن ده موش برضو انتو الجبتو رئيس ؟؟ ولا شنو ؟؟
الواحد مرات قاعد يحاول يفهم البلد دي ماشة كيف ما بقدر لي كم التناقضات والمفارقات المريعة والفاضحة الموجودة في قناعات المجتمع السياسي السوداني
من وين كوز معفن ومن وين هو الرئيس والشريك، ومن وين عاوزين تفككوا الكيزان ؟؟ من تحت يعني؟؟
وبما إنو لجنة التفكيك دي تابعة لمجلس السيادة الرئيسو كوز معفن، والرئيس المناوب للجنة عضو في مجلس السيادة ومرؤوس من البرهان فالكوز المعفن ده زاتو بالضرورة عندو يد علي اللجنة المفروض تفكك الكيزان المعفنين
الله يكون في عونكم يا صديق
والله بالجد انا مرات ما عارف انتو عايشين كيف مع حالة التناقض و الإنكار الموجودة عندكم دي
نسأل الله السلامة بس !
Post: #10 Title: Re: صحي البرهان كان عاوز يكفت خالد سلك ؟؟ Author: Elhadi Date: 09-18-2021, 06:43 PM Parent: #8
وأسي انت يا صديق كان يوم حصل ورشحوك لي منصب دستوري
حا تمشي تحلف القسم قدام الكوز المعفن ده زاتو !!
ولا حا تقول ما بحلف ؟؟ :)
ولا حا تحلف بالكضب 😷
Post: #12 Title: Re: صحي البرهان كان عاوز يكفت خالد سلك ؟؟ Author: Elhadi Date: 09-18-2021, 06:51 PM Parent: #10
بعد فض الاعتصام صمود الشارع حيد حتى الآلة العسكرية يا كمال
عشان كده ال خ ولات ديل جروا اتفقوا مع العساكر وقدم الطرفين تنازلات لي بعضهما البعض
سيب وأنا أسيب
Post: #13 Title: Re: صحي البرهان كان عاوز يكفت خالد سلك ؟؟ Author: Elhadi Date: 09-18-2021, 06:58 PM Parent: #12
تتذكروا موقف حزب الأمة الطلع بيان معارض للإضراب بعد فض الاعتصام :) وأتضح في النهاية إنو واقعياً حزب الأمة أضعف من أن يؤثر علي الشارع بي نكلة لكن الصادق المهدي كان لاعب الدور الأساسي والرئيسي من خلف الكواليس في الدفع باتفاق الهبوط الناعم علي الرغم من انعدام تأثيره الحزبي في الشارع الناس دي مالا بتنسى بسرعة كده ؟؟
Post: #14 Title: Re: صحي البرهان كان عاوز يكفت خالد سلك ؟؟ Author: Elhadi Date: 09-18-2021, 07:10 PM Parent: #13
وفي النهاية حزب الأمة لم يحصد من السلطة التي سعى لتأسيسها سوى الهشيم
ولم يجني الصادق المهدي شخصياً سوى قبض الريح !
Post: #15 Title: Re: صحي البرهان كان عاوز يكفت خالد سلك ؟؟ Author: Elhadi Date: 09-18-2021, 07:20 PM Parent: #14
أما بقية الأحزاب التانية فهي إما بالكاد أحزاب ديكورية أو مجرد صناعة أمنية
الصراع كلو كان بين الصادق المهدي والشيوعيين بصورة أساسية
الباقين ديل تمومة جرتق ساكت عشان كده لا غنى لهم عن العسكر في أي وقت من الأوقات،
لأنو الشارع ممكن ينفخهم في لحظة لو تخلوا عن الارتهان للعسكر وهم عارفين كده كويس
Post: #16 Title: Re: صحي البرهان كان عاوز يكفت خالد سلك ؟؟ Author: Elhadi Date: 09-18-2021, 07:24 PM Parent: #15
عشان كده أنا أصلو ما بستغرب لو سمعت إنو خالد سلك قعد يتجارى اليوم كلو بين الخال حميدتي كما وصفه أحد وزراء الحكومة الحالية :)
وعمو برهان لحل مشكلة الشرق أو خلافه
Post: #18 Title: Re: صحي البرهان كان عاوز يكفت خالد سلك ؟؟ Author: Hassan Farah Date: 09-19-2021, 05:43 AM Parent: #8
والكوز المعفن ده موش برضو انتو الجبتو رئيس ؟؟ ولا شنو ؟؟ --------------------------------------------------------------------------- يالهادى اختشى....البرهان جابوهوا ام فرض نفسه كقائد للجيش؟ لماذا دائما تحاول حرف الحقائق التاريخية الثابتة؟
Post: #17 Title: Re: صحي البرهان كان عاوز يكفت خالد سلك ؟؟ Author: طارق محمد الطيب Date: 09-19-2021, 03:31 AM Parent: #1
السلام عليكم ،، ((يكفت)) ؟؟ اعتقد كلمه غير لائقه في حق الوزير
تحياتي
Post: #19 Title: Re: صحي البرهان كان عاوز يكفت خالد سلك ؟؟ Author: محمد أبوالعزائم أبوالريش Date: 09-19-2021, 07:06 AM Parent: #17
Quote: صحي البرهان كان عاوز يكفت خالد سلك ؟؟
(كان عاوز) دي عشان نجاوب عليها مطلوب ندخل في نواياه والا في محاولة تم إحباطها؟
Post: #20 Title: Re: صحي البرهان كان عاوز يكفت خالد سلك ؟؟ Author: حمد إبراهيم محمد Date: 09-19-2021, 10:21 AM Parent: #19
الهادي - الله يهديك ...
فيها شنو يعني كان كفتوو ..؟
ما تاريخنا السياسي ملئ بتاديب وزراء مدارسنا الاولية ...!