Post: #2 Title: Re: احمد شاويش Author: Moawia Mohammed Date: 09-15-2021, 07:04 AM Parent: #1
Post: #3 Title: Re: احمد شاويش Author: Moawia Mohammed Date: 09-15-2021, 07:24 AM Parent: #2
كلمات: محمد نجيب محمد علي بتذكرك.. وكت الكلام يصبح صعب.. والليل يودر في النعاس.. وكت النجم يتلالأ زي عقداً بيضوي عليهو ماس..
أنا في المداين الضايعة ضايع لي زمن.. غريب عيون .. سرحان على الأرض الغريبة وبسأل الشوق عن وطن.. بسأل الناس عن شوارعاً فيها سافرت ومشيت وعن كلاماً داير أقولو.. قلت فيهو وياما غنيتو وبكيت وعن عيونك كيف بتصدح فيها أحلام الأماني كيفن بتصبح لهجة تانية مع الأغاني
والسفر خلاني اشتاق للسفر لو ألقى لي خاطراً سمح كان كلمة واحدة أقولها وتداوي الجرح كان مرة في عينيك أنسي ومرة أقسى ومرة ياخدني النعاس وكت النجم يتلالأ زي عقداً بيضوي عليهو ماس..
تاني الأحمدين في التفرد في العزف علي العود وبرضو في الأداء الما بشبه غيره
احمد ربشه واحمد شاويش
قواسم مشتركة كتيرة بين الاتنين
الموهبة الفياضة في الأداء والصوت المميز والمهارة الخارقة في العود ومعهد الموسيقى والمسرح
احمد شاويش مخلوق عشان يكون فنان ومطرب نوع الصوت المتميز والبخلق مساحات شاسعة من التطريب البخليك تحلق لأقصى سماوات الانتشاء صوت شاويش فيهو كل الأصوات الممكن تطلع من البشر من أقصى الحدة الممكن تقارب السوبرانو، فجأة ممكن ينسرب ويدخل مناطق التينور والالطو وبدون أي مقدمات ممكن تسمع صوت باص كامل الدفء والوقع
شاويش وهو يشدو، بحسسك انه بغني وبطرب في نفسه كل مسام فيه ينضح بالطرق وهو يذوب وينصهر، هو وعيونه وصوته وعوده عشان تتشكل قدامك لوحة زاهية وغنية من الجمال
شكرا يا شاويش علي تجميل حياتنا بيك
Post: #6 Title: Re: احمد شاويش Author: Ahmed Yassin Date: 09-15-2021, 07:05 PM Parent: #5
واحد من دررك يا ابوذر الدفعة الثانية في معهد الموسبقى و المسرح مع وردي وحمد الريح والبقية اخمد شاويش غنى النادر من الحقيبة ويمتلك خاصية فريدة في تلوين وتطويع صوته ذو المرونة العالية كان يتقمص اي صوت وهو يقوم باداء اغنية من اغنياته بصورة مدهشة.... اتذكر كلامه لنا عن الشاعر الكبير مدرس الابتدائي ..محمداحمد سوركتي الغنا ليهو عادي جدا. انت تقسى و .. عيونك كلموني صوت يحملك الى اقصى نوتات الطرب
لو حكيت ما حتصدق يا احمد عن أول مره اسمع واشوف فيها احمد شاويش
الكلام دا حصل بدري وانا في سنة تانية في الثانوي العام
كان ابن عمي يسكن مع اتنين في امتداد ناصر كانو عزابه زي ما بقولو ساكنين مع بعض
ابن عمي وزميله في العمل وتالتهم كان الاستاذ بابكر مرحوم بابكر دا خال الموسيقار البروف الفاتح حسين شقيق والدته
انا كنت في الاجازة مرات كتيرة بمشي اقعد معاهم كم يوم
وصادف في يوم خميس اجتمعت الكواكب عندهم
انس العاقب السر عوض احمد شاويش وزميلهم تاني نسيت اسمه والله
كان عازمهم بابكر مرحوم
وانا كنت معاهم قاعد في هامش الجلسة اسمع واستمتع واذوب طربا والله وانا لسه في العمر الصغير داك
من ضمن الحاجات اللاحظت ليها ولفتت نظري انه شاويش كان بعزف ب اصبعه بس ما كان بستخدم ريشة
الشي دا شداني جدا والله يا احمد وادهشني
وسبحان الله بعد سنين من الكلام دا وانا بحاول اتعلم اعزف العود قررت إني اقلد طريقة عزف شاويش
وقد كان
اتعملت العود في فترة وجيزة جدا وبقيت بعزف بالاصبع بس بدون ريشة
مدد يا سيدنا الشاويش
وبرضو بعد سنين طويلة اتلاقينا
واديتو خمسة نصوص عشان يلحنها
Post: #8 Title: Re: احمد شاويش Author: Ahmed Yassin Date: 09-15-2021, 09:22 PM Parent: #7
بروف انس يا ابوذر؟ يا سلام...ودشيخ العاقب حامد الاسلم على يديه الكريمتين الكثير من الناس ود حجة رابحة المراة العظيمة الكريمة....بت المادح رضوان. وانت صغير .لمن تستمع وتجلس مع الكوكبة دي دا يغني يا ابوذر ان وجدانك مستعد
Post: #10 Title: Re: احمد شاويش Author: Ahmed Yassin Date: 09-17-2021, 03:27 PM Parent: #9
الله يرحمه ويدخله الجنة استاذ صلاح درويش .كان مدرس في مدارس كسلا.. كان عازف ماهر على العود وكان يغني للطلاب ويلحن الاناشيد بالعود وبصاحبهم في الاداء بالعود كان صاحب الحان مبتكرة وصوت شجي . عليه الرحمة والمغفرة... صاحب بروف انس وابراهيم حسين وحركة والتاج مكي والحلنقي وكل الفنانين الكبار بكاه الجميع..