هل تاثرت اسعار الاراضي بعد كل الاستردادات التي تمت؟

10:30 AM September, 12 2021

سودانيز اون لاين
Gafar Bashir-Saudi Arabia
مكتبتى
رابط مختصر

مفروض من الطبيعي بعد كل الاستردادات اللي تمت دي من لجنة التمكين
تنخفض اسعار الاراضي
وبعد كل القطع اللي تم استرداداها يكون في خطة للوزارة المختصة اياا كان اسمها

سلام يا جعفر
امتلاك اراضى فى السودان هدفها الاول المحافظة على المال سوا للمقيمين خارج او داخل السودان وارتفاع الاسعار الغير منطقى له اسباب عديده ليس من بينها ندره الاراضى وقلتها لذلك لا اتوقع إنخفاض الاسعار بعد استرداد مساحات شاسعه من لصوص الإنقاذ
معادله السوق فى السودان يتحكم فيها السماسره وينقاد لها معظم الناس
وهناك من يحدثك عن جوده بوكس 81 وانه الافضل على الإطلاق:)

يا دفعة دا استرداد لصالح المالية و المالية كلامها واضح ما بتصرفوا في المستردات مالم يتاكدوا من خلوها من المشاكل باحكام قضائية
فا شنو.. حلك لغاية ما يستأنفوا الكيزان المبلولين - ودا ما ح يحصل طبعا لانو الاستئناف يتطلب الحضور الشخصي - أو يتولى وزارة المالية وزير بعثي و يعرض الاراضي المستردة للبيع فترخص اسعارها

تحياتى للجميع



لجنة ازالت التمكين صادرت الاراضى من الكيزان وسلمتها الى وزير المالية (وزارة الكيزان) يعنى من والى الكيزان يعنى " و كأنك يابو زيد ( وجدى ومناع) ما غزيت"

جعفر سلام ليك و ضيوفكاتفق مع الاخ عبدالرحيماسعار الاراضي ما اسعار حقيقيةوالاسباب اللي ذكرها عبدالرحيم ومع عوامل اخريهي عرض لمرض اقتصادنا.ودائما ارتفاع اسعار السكن او الارض السكنية ناتج من ازدهار الاقتصاد او انهياره دبي و هونج كونج والخرطوم

تحياتي عبدالرحيم

Quote: له اسباب عديده ليس من بينها ندره الاراضى

ده يعني ضمنيا ان المتحكم في الاراضي واسعار الاراضي لازال موجود في مفاصل الدولة ... سواء كانت جهات حكومية او مراكز قوي او افراد وليهو اليد العليا بعد سنتين وزيادة من الثورة ...
لا نفعت معاهو لجنة تفكيك ولا حكومة مدنية ولا وزير اسكان ولا وزير زراعة ،،، او ان الخطة هي استمرار ابتزاز الموطن السوداني تماما زي ما مارسته الجبهة الاسلامية ...
ما لاقي ليها تفسير تاني ،،، اما الحكومة ما عارفة كيف تفكك المافيا او انها قادرة لكن عاجبها الوضع

Quote: يا دفعة دا استرداد لصالح المالية و المالية كلامها واضح ما بتصرفوا في المستردات مالم يتاكدوا من خلوها من المشاكل باحكام قضائية

طيب يا دفعة بعيدا عن فزلكة ناس الاقتصاد والقانون الما عايزين بتورطوا في مصادرات الكيزان خايفينها بكرة تنقلب
بعدين كل المدة دي من الثورة ،،، لو وزارة الاسكان او وزارة الزراعة او اي من الوزارات المرتبطة طرحت خطط لتمليك اراضي السودان الفاضية دي للناس حسب القطاعات
طبعا فرضا بان المواقع دي كلها مرقوا منها الكيزان الكانوا محتكرين الموضوع وفيها الان ناس وطنيين كان برضو مفروض يكون في تغيير

Quote: ارتفاع اسعار السكن او الارض السكنية ناتج من ازدهار الاقتصاد او انهيارها دبي و هونج كونج والخرطوم

هههههه صعبتها شديد يا صبحي
بس هل دي نظرية فعلا في الاقتصاد ،،، ولا مفروض تكون نظرية بناء علي حالة السودان كدراسة حالة

جعفر بشير إزيك

ياخوي مافي شي بزيد وينقص تاني في السودان ، أشتري ساي لو ناوي :-)

Quote: ياخوي مافي شي بزيد وينقص تاني في السودان ، أشتري ساي لو ناوي :-)

هههههه كيفك يا فيصل اخبارك
ابدا والله ما ناوي خلصت زمان
بس الموضوع مزعلني شديد
عايز القي حاجة ادعم بيها الحكومة المدنية والثورة المدنية ونقول انجزنا حاجة ياخ ،،،

المناظر هي ذاتها الصور نفس المشاهد الشوارع والبيوت والاماكن والمقاعد والذمان ثابت مكانو والرقم اللسة واحد

نحرك الموية الساكنة دي عسي ولعل في زول ما عارف مفروض يعمل شنو

لا و لن.

في بعض الاماكن حل مالكون جدد محل القدامى
و القدماء اما هاجروا لمصر أو انتقلوا للاماكن الطرفية.

اما اسباب لا و لن ف يطول شرحو

أسعار الأراضي طارت السماء

سلام يا جعفر

Quote: لو وزارة الاسكان او وزارة الزراعة او اي من الوزارات المرتبطة طرحت خطط لتمليك اراضي السودان الفاضية دي للناس

صحي وزارة الإسكان لو وزعت من الأراضي الفاضية بدون ما توصل ليها خدمات سعر الأرض بكون رخيص جداً لإنعدام الطلب عليها لأنها لا تصلح للسكن.
سبب غلاء الأراضي في السودان هو شح الخدمات او بالأصح شح الأراضي التي بها خدمات والفروقات العالية بين جودة الخدمات في المناطق المختلفة.
المشكلة قي تركيز الخدمات في العاصمة وحتى في العاصمة في دائرة ضيقة في وسط العاصمة.
وكلما بعدت عن المركز شحت الخدمات وساءت حتي تنعدم تماماً على بعد بعض كيلومترات من مركز العاصمة بإستثناء بعض المدن القليلة في الأقاليم والتي هي أيضاً لا تقارن بالمركز رغم سوء الخدمات في الكل.

والمشكلة الثانية التوزيع غير العادل للثروات والفساد الذي يوفر أموال كبيرة وسهلة المصدر لفئة نسبياً قليلة جداً من المواطنين تتنافس على المناطق ذات الخدمات الأفضل،
والإقبال على شراء الأراضي لغسيل أموال الفساد.
وبذلك يرتفع الطلب على الأراضي القليلة المعروضة في الأحياء القريبة من المركز.

لهذه الأسباب سعر المتر المربع لقطعة ارض سكنية في أحياء مثل المعمورة الخرطوم حوالي 750 دولار وفي الرياض حوالي 1500 دولار.
بينما سعر المتر المربع في مناطق على بعد فقط 25 كيلومتر من المركز مثل إسكان الثورة قد يكون 1.5 دولار فقط.
خارج العاصمة سوق الأراضي ليس له رواج وأسعار الأراضي السكنية منخفضة جدا (بعض الإعلانات فيها أراضي بسعر المتر المربع نصف دولار فقط).

الأراضي المستردة ورغم أنها كتيرة جداً إذا وضعنا إعتبار ملكيتها السابقة لأفراد قليلين جداً ولكنها أيضاً قليلة العدد بالنسبة لمجموع السكان وإذا ما قورنت بالمتداول في سوق الأراضي.
لذلك لا أتوقع أن يكون لها تأثير على أسعار الأراضي.
كنت أتوقع أن يحدث إنخفاض في أسعار الأراضي بسبب توقف غسيل أموال الفساد.
ولكن يبدو أن المصادر السهلة للأموال مازالت متوفر، الذي تغير أن فئة جديدة من المواطنين تسلمت هذه المصادر.

أقرأ البوست النزلو البعشوم في صفحتو قبلي شوية !

ممكن يديك فكرة عن الحاصل بخلاف العامل الاقتصادي المحض

هل صفحة البعشوم مهكرة؟
كلام عجيب

لا بد من تغيير قانون الايجارات.
دي همبتة
وسرقة لو صحت

أيوا يا الهادي طالما شراء الأراضي مستمر وإرتفاع أسعارها مستمر
فدا ما ممكن تفسيره إلا بان فئة جديدة دخلت سوق الأراضي بأموال ضخمة.
عناصر الدعم السعريع جزء من هذه الفئة ولكن هنالك عناصر أخرى أيضاً.

السوق المصرية اكبر مستفيد مما يحصل
بالتالي اتوقع ان يكون لها يد فيما يحدث
هي والجنجويد .

اشرس هجمة تتعرض لها الدولة السودانية
وفرنسا ماكرون التي ضاقت ذرعاً بالمهاجرين
الافارقة وبالذات من مستعمراتها التي لم تطورها
جعلت السودان مصد ، الاستعمار ملة واحدة