أهلي اتحاد مدني

أھلي إتحاد ببدایة التمانینات:
القطر لقب (ألمع مذیع كروي بمدني) حايم بعربیتو في أحیاء مدني، القطر دا عندو صوت جھور وممیز، وبنطق الكلمات حرف حرف، والكلمة یقسمھا لیك زي المرارة.
نحن ماشین على الدافوري، وقف عربیتو وبدأ یعلن لمبارأة بكرة بین الاھلي والإتحاد، المبارأة أصلا كل مدني عارفاھا بكرة، حتى بالإمارة أمي وأنا مارق علي الدافوري قالت لي:
بابكر، ما تنسى بكرة بعد الكورة تغشى أبظریفة تجیب العیش الناشف للخرفان الفوق حوش الدیوان.
أھا القطر بدأ إذاعتھ ویقطع في الكلمات:
الأ ھل ي سيد الأتيام یتحد ى الات حاد،
مش ینا وجي نا وكان أھلیییییینا أرجنتینا
والرومان یقبل التحدي إتحادنا
قوة، تلاتة حلقات
في السدر من جوووووووا
یقوووود الأھلي؛
صخرة الدّفاع، عمید لاعبي السودان، البلدوز كابتن سنطة
یقود الإتحاد:
(ضروري وانتو بتقروا في الكلام دا تقررھو بطریقة كلام القطر البقطع فيهو الكلمات)
الأباتشي المقاتل، جبل الدفاع؛ الفاتح رینقو
وسط الإتحاد: مھندس الكرة السودانیة، الدولي لاعب النصر الإماراتي، العائد؛ الفاضل سانتو
وسط الأھلي: ساحر الكرة، صاحب اللمسة الأنیقة؛ طارق جوني
حمد والدیبة، حاجة عجیبة
في الھجوم: الغزال الشارد؛ عثمان الله جابو المروحة الذھبیة، الشفت؛ كابتن جكن
الراس الماسیة؛ صلاح بمبان (الزمن داك كورة البنبان ما اتلعبت، لكن بس كدا)
في الدفاع: صمام الأمان؛ الجار
یمین، اللاعب الشرس، الفك المفترس؛ فتح الرحمن
یسار: الغشاش؛ مصباح
كدا عارفم بقوا اتناشر، لكن ما في مشكلة. ولو ما خائفھا تبقى شینة كنت أضفت ود فریقنا الفنان الأنیق كابتن علیوة.

باللیل لاقیت محمد مارنقوز جنب دكان حامد، قلت لیھو: قالوا ناس الأھلي جابوا لیھم فكي من سنار جاء مدني راكب لیھو تمساح، وھداك بركنو في نادي الجزیرة والتمساح بلعب مع الكدایس قال لي: من سنار؟!
نحنا جبنا لینا فكي من مایرنو أدیناھو شاي باللبن شرب الشاي وخلى اللبن في كبایتو!

* بعد المباراة دي بأیام، البرازیل لعبت بتیمھا الصاقعة داك في كاس العالم بأسبانیا تاني یوم ناس مدني كانوا بناقشوا : ھل البرازیل سرقت طریقة لعب أھلي مدني؟!!
وسقراط بقلد بابكر سانتو.

الناس دخلت الكورة من العصر، مسطبة الإتحاد الناحیة الغربیة، بقعدو فیھا أولاد بانت، أتذكرھم كأنو امبارح: أستاذ عز الدین مؤسسة، أستاذ الفیزیاء بالثانویات، وأخوھو عادل صفیحة، الیوم داك قدام بیتم أبوھو كان موقف اللوري بتاعو وشاحن فیھو صفائح، أول ما جاء داخل كوركو لیھو: صفیحة اللقب للیلة ماشي علیھو بالرغم من أنو بقى محامي كبیر جدا.
زرقان من اولاد الكوارتة لمان سمع الناس بقولوا لیھو صفیحة صفیحة، وقف علي حیلو مستعجبا:
صفیحة؟!
حمامة أنا!
بھناك اولاد مارینقوز وعزالدین مریسة النیلاوي الإتحادي المتخفي، نزار الصاروخ ونادر أخوھو اولاد الجرارة ودیل عرب من شمال كردفان وحتة في الجزیرة اسمھا عبود، ساكنین جیرانا، عمرنا ما شفنا باب دیوانم مقفول، والدیوان ملان لحفات، وصواني الغدا أصلھن ما بقیفن، منھم النابغة حمد حماد صاحب أحمد التجاني صاحب دينا خالد.
المھم كل اولاد بانت موجودین، وعبشین أخوي قاعد في كنبة الإحتیاطي بتاعت الأھلي (الحقیقة عبشین وقع للاھلي بعد داك بسنتین تلاتة، لكن نظام أجیب سیرتو وكدا) أولاد العشیر والدباغة، بقیادة جیركي، ومن ربنا خلق الكورة في الدنیا دي ما بكون جا مشجع سلیط وسریع البدیھة زیو، قاعد جنبو ود أبرونجة، وشطة، بتاع التذاكر یمر قدامن؛ ینبذو یا حرامي یا أبصلعة، ناس موسیقى البولیس ما بخلوا لیھم جنبا یقعدو علیھا، وتعلیقاتم بتصل المدربین والحكام وناس الإسعاف، ما بخلوا زول ما یھبشوھو
الإستاد إمتلأ حتى فاض تشعبطا في الكشافات، مشجعي الأھلي الما جوا لابسین جلالیب بیضا، حرصوا إن القمصان تكون بیضا ومكویة، الكشافات غیروا لمباتھا من اللمبات الصفر الغبشاء دیك لبیضاء تخلب الابصار، كان في رزاز خفیف، لمان الھجمة تكون للاتحاد كنت بتابع إنكسار الأضواء في حبیبات المطر. سید سلیم مدرب الإتحاد ولابس لیھو فنلة صفراء من غیر خطوط سوداء كبقیة اللعیبة،
حكم الوسط؛ بابكر شنكل، حلبي وجيه وأنيق وصلعتو مع الأضواء الجدیدة حاجة تفرح.
مدرب الأھلي عبد الصمد.
أول من نزل الملعب كان الفاضل سانتو، وكل واحد من لعبیة الإتحاد شایل لیھو كورة صفرا بأسود، إنتشروا في المیدان وشاتوا الكور للجمھور ھدیة جیركي قال: بكون ناس النصر أدوھو قندران كور في التكریم!
الأھلي نزل لابسین فنایلم الزبرا، ویتقدمھم كابتن سنطةّ، الدیبة من یومو حریف، لمان شاف ناس الإتحاد وزعوا الكفارا، لقط لیھو زھور من أطراف الملعب، وطافوا شتتوھا للجمھور بالمدرجات!!

بدت الكورة، عشرة دقائق الإتحاد ما لمس الكورة طق طرق، طقطق طرق، طق طرق طقطق طرق.
كورة من طارق جوني بالمقاس لجكن في الناحیة الجنوبیة الغربیة الجمھور كلو یكورك لجكن الفنان والصغیر الحجم بأن یمروح باك الإتحاد كبیر الحجم والإنفعال؛
مروحو مروحو یا جكن سوي لیھو المروحة یا جكن وتسمع واي وواك من المدرجات وجكن یمروح ویدوخ لیك في الباك الجھامة ومع كل مروحة الباك زبدو یزید وسید سلیم یسب للباك وللأھلي.

جكن یستلم كورة تانیة بخط التماس الجنوبي الغربي، جنب كنبة إحتیاطي الإتحاد وسید سلیم، الباك المنفعل یجي طائر بسرعة شدیدة جدا وینزلق في الأرض عشان یكش جكن؟؟ بكل خفة، جكن یقفز والباك یدخل تحت كنبة الأحتیاطي (الزمن داك كنب ساكت ما في كراسي)بتاعت فریقو وجنب المدرب سید سلیم، وطوالي أبو السید ختا یدو في كتف الباك الطایح ومزبد وعاصرو لتحت، وعیونو متابعة الكورة، لمان الكورة لمست الشباك؛
قبل للباك وقال لیھو: لو جا ...، ما بترجع المیدان، روق باقي الموسم دا، معانا ھنا في الكنبة دي!!
بعد المباراة خلصت بھزیمة الإتحاد واحد صفر، الباك قال لأبي السید: ليه بتسب لي الدین یا كوتش:
أبو السید رد لیھو: أنا یا ولدي سبیت لیك دین؟! إتّا قدر ولدي أسب لیك دین؟! إلتفت لناس الإحتیاطي وسألم: أخوكم دا حصل سبیت لیھو دین؟ كلھم لولوحوا راسم یمین شمال.

ذكرتني القطر ياخ
والايام الندية

مره يوم جمعة ساعة الفطور

كنا قاعدين في دكان خلف الله "عنكاص"
انا وأمير يونس وبدر ابو العاص
جبنا الفول من عبد الصمد في سوق بانت
وقعدنا ناكل
القطر جا حايم بالعربية وبعلن في مبارة النيل وفريق يا من كوستي

لما بقى قريب مننا كوركنا ليهو

اتفضل الفطور يا قطر

ولا اشتغل بينا والعربية تمشى الهوينا كما يمشي الوجي الوحل
مدردقة برسالة

لما بقى في لفة الجامع قريب بيت ناس عبد العظيم الباشا

نسمعو ليك بالمكرفون

شك رن شك رن سبق نا كم



يا داب كان اتذكر العزومة
لي هسه الجماعة ماسكنها

يا سلام يا أبو بكر

ذكرتنا أيام عظمة الكورة في مدني الجميلة.
درست في مدرسة مدني الثانوية و كنتا ساكن مع عمتي في المزاد ، كبتن سنطة الله يرحمو طبعا من أولاد المزاد ، الغريبة برغم ضخامة جسمو و قوتو في الميدان بس هو شخص وديع جدا و قلبو أبيض شديد.

درسو معانا في مدني الثانوية اتنين من أحرف الناس، محمد عزالدين الشقيق الأكبر لسامي عزالدين (في رأيي كان أحرف من سامي) و الزول التاني هو سليم طه سليم ود أخو سيد سليم. محمد عزالدين الأبعدو من الملاعب إنو اتعرض لكسر في الرجل.

كانت أيام جميلة في مدني الجميلة، مدني و فول أبوظريفة، مدني حلواني جروبي ، مدني مكتبة الفجر بتاعة عمك محمد سيد أحمد ، مدني ود الفتلي ، مدني حيدر قطامة و مدني تمباك عبد الحق ، باختصار مدني الجميلة في كل حاجة....

الحبيب أبوبكر .. تحياتي ياجميل
سرد جميل ورائع سيناريو فيلم جاهز .. صور بالحروف
رائع جدا

أرجوك اتفرغ شوية لهذا النوع من الكتابة

واصل يا جميل
ومعك شاعرنا الجميل أباذر
والحبيب اسامة

عادل عبشين أخوي يا أبا ذر، كان استوبر الأهلي، قال لي مشينا بورتسودان لعبنا دورة الأهلي، اتحاد، حي العرب وهلال الثغر، لدعم بناء نادي حي العرب أو الهلال.
سقنا معانا القطر وكان قبل المباريات بحوم في أحياء بورتسودان بالعربية يدعو للمباريات بصوته الجهور المقطع،
قال لي حضور الجماهير كان ما عادي بسبب إعلام القطر دا.

قال لي مرّة مشى مع ناس الأهلي لمباراة بالجزيرة وقام البص انقلب،
الناس طلعت من البص المقلوب إلا القطر
في واحد من الناس الطلعت من البص قاعد يكورك للناس:
القطر جوّة البص
القطر جوّة البص
لموا فيهو ناس الحلة البنقذوا في الناس كفتوهو قايلنو فكّت منو

Quote: نحنا جبنا لینا فكي من مایرنو أدیناھو شاي باللبن شرب الشاي وخلى اللبن في كبایتو!

كنت ماشي كويس يا ابكرونا جيت فكيت آخر استنارتك فى المقتبس اعلاه .
صحي يا بابكر تمساح فكي سنار كان بيلعب مع الكدايس ولّ مع الاورال .

https://top4top.io/
أفضل جيل لعب لاهلي مدني أوائل الثمانينات

تضم الصورة دون ترتيب حمد والديبة حاجة عجيبة وسنطة
وانور ساتي وجكن وعبد العظيم الجار وفتح الرحمن وخلف
الله وصلاح الامين (بمبان) وغيرهم من الافذاذ.

بجيك ياراجع يامستنير بالمزيد من الصور والمعلومات
عن عملاقي مدني (الاهلي والاتحاد) ونجومهما.

بكور احلف انت فنان
شرب الشاي وخلا اللبن في كبايتو
لما وصلت هنا اتكيفت زي ال شربت
انا الشاي باللبن .

مدني اعتبرها رمز ثقافة الوسط
اهل مدني مع ناس الكورة لهم طرف يمكن أن تخلق أنجح مسلسل كوميدي في العالم
مما يروى من هذه الطرف
انه وفي أثناء زيارة فريق الهونفيد المجري للسودان في الستينات
وبعد أن انتصر على الهلال بالسبعة
جاء الفريق لمدني ليلعب ضد منتخبها
احد اللعيبة المهرة ( لا داعي لذكر اسمه) والذي تميز بالسرعة الفائقة
طلب منه المدرب أن يلعب جناح مايل للوسط و متأخر شوية
يقال ان اللاعب كان عندما يستلم الكرة ينطلق بأقصى سرعة في الجناح
ثم يجنح للوسط و يرجع بالكرة للخلف
حير الخواجة مدرب الهونفيد والذي طلب من فريقه تهدئة اللعب
ومراقبة هذا اللاعب الخطير حتى يفهموا ماذا يريد أن يفعل بالضبط
وبعد فترة أشار المدرب لفريقه أن العبوا كورتكم البتعرفوها
فهذا الرجل لا يدري ماذا يفعل
وفعلا استقبلت شباك مدني بعد ذلك الأهداف التسعة

Quote: الأباتشي المقاتل، جبل الدفاع؛ الفاتح رینقو وسط الإتحاد: مھندس الكرة السودانیة، الدولي لاعب النصر الإماراتي، العائد؛ الفاضل سانتو وسط الأھلي: ساحر الكرة، صاحب اللمسة الأنیقة؛ طارق جوني حمد والدیبة، حاجة عجیبة

في الضفة الأخرى كان في فضل السيد
وزي ما طارق جوني كان عازف سمفونية وسط الأهلي كان أبوعبيدة رمانة وسط الأتحاد

بس ما عارف شاويش والفاضل جبريل ( رحمهما الله ) وطارق تكل ومرتضى قلة كانوا من الجيل دا ولا لا

تعرف يا بكور ـ إحتمال كبير أكون داخل الكورة دي ـ نادرا أخوي يفوتها ( )

لكن المتاكد منو تب أول أهلي أتحاد للفاضل سانتو بعد العودة من الإمارات كنت في قلب مدرجات الأهلي
والأتحاد أنضرب فيها /4/1 ـ بادر الأتحاد بتسجيل الهدف الأول من صنع سانتو نفسو

أخوي الأكبر كان مشجع أهلاوي متطرف وعضو رابطة مشجعين ـ
كل ما أحقق نتيجة جيدة في الإمتحانات وأنا تلميذ متوسط الجائزة بتاعتي دخول كورة للأهلي (وجه ضاحك)

لو قفلت الأملاء بسوقني لناس مباريات النيل والدفاع والنهضة (وجه ضاحك )

بكور المستنير سلامات
عندي اولاد خالتي في الفترة ديك ،واحد بلعب في
الاتحاد و اسمو عادل أشول و التاني في التضامن
اسمو جادكريم.
عادل دا حريف و كان مربخ ابو العائلة عابز يسجلو
في المريخ و رفض يمشي الخرطوم.
سألت عادل احرف لاعب في الفترة ديك قال لي عادل الربح
بس ما اظن واصل.
ناس سامي عز الدين رحمه الله كانوا ساكنين جيرانهم الحيطة بالحيطة
في الدرجة.

سلام وتحية طيبة أستاذ كمال

متابع

ههههههههههههههههههههههههههههههههه المستنير سيد سليم بحرق تلاتة علب سجاير ومتلهم دين
مرة كبس للبلة وطوالي قاليو تعال هنا اقعد حك صلبك في الكنبة
بس ماعجبني تهميشك لي كاروشا ابو قرن معقولة اكتر وانبل واجمل مشجع اتحادي تنساو
الزول ده من تسمع صوت القرن تتتتتو تو توووووووت بتعرف بدر ترررة شبكا
ذكريات جميلة نبشتا عن مدني اجمل طفولة وصبا عشتا بحياتي
التحية لي ود الجركي صاحب اشهر بوق وسرخةبالاستاد وعندك علي ابجلابية فردتو
التحية لود الساروخ الزول الموسوعة وكل اسرتو
ابواب بيوت مدني كلها مفتوحة للضيوف بعضهم ماعندو زاتو قفل وباب من اساسو
التحية ليك اتا ود قلبا وعلبا
عندي زميلين اتنين دام القصة جابت حشيير اسماء من عندك احمد عبدالغفور واسامة سوركتي ولاد المدراء ساكنين بيوت الحكومة جنبكم في بانت