بلاغ ملتهب وحااار جدا لرئيس السودان (الاتنين ) ووزير الداخلية ووزير العدل ... .... ...

02:50 PM September, 01 2021

سودانيز اون لاين
توفيق عيسى مكي-
مكتبتى
رابط مختصر

][/url]

ده إيصال استلام جواز من العلاقات البينية من يوم 29 شهر 6
قدمنا ل 5 جوازات في خلال أسبوعين استلمناهم كلهم ما عدا هذا الجواز
اليوم تم تسليم كل الجوازات خلال الفترة السابقة وفرجت مشكلة الجوازات
لكن هذا الجواز معلق لا أحد يعرف مصيره وهو مستوفي كل الشروط وفي الطباعة
من فترة طويلة

حابي أذكر ببوست ترخيص عربيتي الإجراء المفروض يتم وقتها في
يوم واحد واستغرق شهرين الله فقط نجدني عندما أخطأ مدير مجمع بحري
وحولني لمحكمة الدروشاب ليتم فيها تغريمي ودفع مبالغ طائلة عشان العربية
ورثة ونحن كنا مصرين تترخص كورثة إلا أن القاضي تفهم الوضع بعد أن شرحت
له كل الملابسات والمساومات فارجعني لمدير المجمع بكلمة واحدة خطاها على أوراقي
المكتملة أن يتم ترخيص هذه العربة اليوم والا يتم ترخيصها غدا بمباني المحكمة
وقد قال لي ربنا وضع دائما أشخاص لنصرة المغلوبين على أمرهم وإني لناصرك بالحق
وهو ما حدث فعلا خلال ساعة زمن تم ترخيص العربة
وهاهو البوست الذي تابع إجراءات الترخيص
https://sudaneseonline.com/board/500/msg/1551699436.html
معاناة السود في السودان
ده كان آخر أيام الإنقاذ وهي تلفظ أنفاسها
اليوم في جواز زوجتي هذا تعرضت فيه لأشياء لا يصدقها عقل
تستحق وقفة كبيرة وبلاغ كبير عسى أن ينصلح حالنا
والمسألة ليست شخصية ولكن عندما نمني النفس بأن تلك العهود المظلمة قد أنطون
ونجد ما هو أفظع منها مؤكد نطرح الموضوع أولا لمناقشته ثم نسرد تفاصيل
يشيب من فظاعتها الولدان

بلاغي للسيدان رؤساء السودان والوزراء المختصين
نحن عانينا في عهد الإنقاذ لكثير من المضايقات مثل هذا
العطلة بفعل فاعل مريض أو جهة أمنية
هل سيستمر حالنا كذلك لا أقول بنفس الوتيرة لكن بطريقة أفظع ؟

اليوم كالعادة ذهبت لمتابعة الاستلام في البينية
أمس وعدوني بالإستلام
جميعهم من مداومتي لشهرين يوميا يعرفوني
ويعرفون سبب سفري وابني المصاب بالقلب ومتعاطفين معي
عند حضوري فاجأوني بأن جميع الجوازات القديمة تمت طباعتها
وللتاكد نذهب معك للسجلات أي الجهة البتسلم الجوازات الجاهزة
ذهبوا معي واستأذنوا الناس بأني حالة طارئة
في السجلات المسؤولة فحصت الجواز وردت رد واحد
هل عندك زول في الشرطة
سكته
ده حلك
خلي يمشي يتدخل ليتم طباعة جوازك
غير كده الله أعلم ينطبع قريب
ده البقدر اقولوا ليك

ساسرد بالتفصيل كل ما جرى خلال الشهور المضت من كلام
مدير البينية مرورا بالبملابسات التي جعلت كثير من الموظفين
يتعاطفون مع حالة هذا الجواز الما معروف مكانه وين والمامعروف
منه العطله وليي
كذلك لا أنسى سرد رد المسؤل من الفحص كل يوم وهي فرصة أن بجد
شخص أمامه يفصله زجاج ويستعرض بأعلى صوته ليعلم الناس من هو
تاني ما تجي كل يوم القاك في وشي وتاني ما بفحص ليك وجوازك ده المكن
ما دخله وما أظن زاتو يدخله

زمان مشكلتي في ترخيص عربيتي قلتو واصريت عليه للنهاية
انا صاحب حق ما بخاف في حقي ده إلا من الخلقني
نفس الفهم والرصة زاتها بتتكرر اليوم
فيا رؤساء السودان الاتنين عندكم حل لي ؟؟؟
ولا نعتبر الكيزان كانوا أفضل
حتى في الإهمال (والفساد ده)
ورونا عشان على أساس رد فعلكم نعرف نحن كناس من عامة
الناس أمرنا بيهمكم
وما بدفع جنيه أحمر فوق حق الجواز لو اتاخر 10 سنة وافقد أولادي كلهم
ولا داير واسطة من زول دفعتي اليوم كلهم لواءات

السيد وزير الداخلية
سلام
بجيك راجع

السيد وزير العدل
هل تعلم أن العدل أساس الملك
هل العدل مقصور على جهات وناس معينة
ولا السودانيين بدون فرز
ولا انت بعد كلامي ده شايف اني ما اتظلمت
أو ربما ترى اني ظالم ؟؟؟

إحباط ......
الواحد في حياته ما شعر بيه
ولا أيام الكيزان وقت كانو بيعزبوا فيني من جميع أجهزتهم الأمنية
وانا الخصصت عشرة سنين من عمري لعمل خالص طاهر لبلدي
دفعت فيه مليارات كتيرة بالقديم
ده الجزاء من أهل بلدنا لينا الكيزان كان جزائهم معروف
نشوفكم انتو
ومنتظرين .....

وانا لحاجات كتيرة ما اتكلمت بالكلام كلو
أتمنى ما احتاج لذلك

اليوم بعد 45 يوم مداومة في العلاقات البينية ما قدرت امشي اتابع
القصة الوهم دي (جابت لي المرض من القهر )
ملاريا تقيلة وحمى حتى الوقفة غالباني
ياريت لو في زول يمشي يسأل عني ويفيدني

في أي بلد في العالم أي مناشدة للحكومة في أي منبر إعلامي تجد اهتمام
إلا في بلدنا السودان ده
ما يشتغلوا بيك الشغلة
لكن لو كانت المناشدة أو البلاغ المرفوع من قونة أو زول فارغ جاهل في غفلة
من زمنا الأغبر ده لقى ليه كوم قروش صدفة (ومؤكد نهيبة بالحرام في بلد الفساد المستوطن ده )
تجد الاهتمام من رأس الدولة لاصغر مسؤول
الزيينا ديل من الغلابة لينا الله بس
نحن بقدرة قادر بقينا مواطنين درجة رابعة
قلت لمدير الجوازات ابني مصاب بالقلب وموديه للعلاج
لأنه هنا قالوا لي في مستشفى أحمد قاسم أي تدخل خطر جدا
الأفضل مكان لديه إمكانيات مكتملة لا مجال لأي نقص أو خطأ
المهم الله داير كده
نكون في بلد لا تحترم الإنسان
وتشعر باللزة بعزاب مواطنيها من عوام الناس
عوام الناس ديل هم في الأصل اسياد البلد قبل
احتلالها من حفنة مرتزقة
اردأ ما انجبتهم البشرية

حا نبدأ الاسبوع الدشريون في انتظار الفرج ونستلم الجواز الفضل لينا
مع أنه من شدة احباطنا فاقدين أي أمل
زمان في زمن الإنقاذ متعودين على الحاجات دي
بفعل فاعل حاقد حاسد
نفس الأساليب لسه موجودة

كالعادة مافي جديد
مدير العلاقات البينية يظهر مغلوب على أمره وما عنده سلطة وما بيقدر يعمل شئ
قبل شوية كنت معاه
كلامه
انا الحالات الطارئة جدا كل يوم بوديها بكشف لمصنع
هم بمزاجهم بطبعوا من كشفي كم جواز
وأهو انت كل ما تجيني بكتبك في كشف الحالات الطارئة
عسى ولعل بالغلط يطبعوا حوازك (بالمعنى)
طبعا دي المرة الدشريون اتكتب في كشف المدير

انا معسكر من شهر ونص في البينية
وده الخلا ناس تسليم الجوازات حافظني وحافظين الاسم اجي الصباح من بعيد
يطمموا بطني ..... والله ما جا

الشئ المتأكد منه جازما التأخير ده بفعل فاعل مقصود
وده الخلاني أكتب
مافي منطق بيخلي 5 جوازات تدخل في يوم واحد
4 تطلع في خلال 15 يوم وواحد يتأخر شهرين ونص ولا حتى في أمل يطلع قريب
وسطت من ملازم لفريق
وكله من غير نتيجة
في حاجة غريبة في شئ ما طبيعي

في الحالة دي مافي حل غير الإعلام يستفسر لي
لاني ركن من أركان الإعلام السوداني
والسؤال بلاغ موجه لرئيس السودان
لمن بيده السلطة
البرهان أو حمدوك
لمتين نحن نعاني من الأفعال الصبيانية دي
في زمن الكيزان شبعنا منها
وحكينا كتير
هل مكتوب علينا نظل في المعاناة دي
أو هل لسه ما سقطت والكيزان لسه بعزبوا فينا

ما لو الموضوع ما كان مقصود وبفعل فاعل
مؤكد كان وصلني رد
شوفوا الناس القرت الموضوع هنا أو في الفيس أو في منابرنا المنتشرة في السوشال ميديا

اللهم إني مغلوب فانتصر
وحسبي الله ونعم الوكيل فيكم

كدي نفكر بصوت عالي ونضع كل الخيارات في السبب بتاع العطلة ده
أكون يارب المقصود الشفافية المؤسسة أو قناتها خصوصا التصريحات
بسعيها تبث على نايل سات قريبا
اصلوا السودان محتل من أعداء له كثيرين تجمعت مصالحهم لهلاكه وناجحين
حتى الآن في مساعيهم
أو كونوا تصرح انك تعمل ثورة اقتصادية كفيل يغطسوا حجرك

واحدة من الحاجات الكانت جايبة لي الهواء مع الكيزان التفكير بالنهضة
العامة الشاملة البتخلي أي سوداني يستفيد منها
مثلا ...
لما قدمت طرح تمليك سيارات لأغلب الناس دون تكاليف تذكر
زي كل بلاد الدنيا وعرضت عرض 85 نقابة وافقت عليه ببساطة
هو السيارة اليوزد كار في كل مكان لا تتعدى الف أو ألفين دولار ووقتها
الجمارك للسيارة في حدود 4~7 على أعلى تقدير وبمشاركة النقابات وإدارة
الجمارك يتم التقسيط بتطلع السيارة الببيعها البنك بالأقساط ب 36 لمدة 5 سنوات
بحوالي 12 باقساط سنة ونصف وان يتم توجيه التمويل بتاع البنوك وقتها البالغ 67% في
المرابحات السريعة في السيارات العالي المخاطرة لبناء السودان بمشاريع كبيرة بتمويلات
طويلة الأجل الأكثر ربحية التى صنعت البنوك الكبيرة
فكانت النتيجة الحرب والقصد والمحاربة والخروج من السودان والتشريد واللجوء من بعد عزاب السجون

ما لازم يكون في سبب
مستحيل البيحصل ده
احتمال برضو من النقد الصريح للقحاتة وطريقة ادارتهم العشوائية للبلد
الكيزان واليسار ديكتاتورين لأبعد الحدود ومغرورين وقليلين أدب
أقل كلمة صاح هبشتهم يختوك في البلاك ليست
أها وبعد كده تظهر ليك العكوسات محل ما تقبل
نفس الحسد والحقد
الفكرة ما طلعت منهم يحاربوها ويحاربوا سيدها
انا ظاهر لي هنا في المنبر ده برغم المتابعة الكبيرة واضح التصنيف شنو
كذلك في عموم السوشال ميديا برغم بقوة رسائلنا التصحيحية التوعوية
قاعدة تصل وقاعدة تعمل مفعولها

الكيزان زمان برغم العداوة كانوا بيضعوا الف حساب للإعلام
يكفي اكتب يااااا سيدي الرئيس أو بوستات ياااا أمير للمؤمنين الشهيرة
فورا بيكون في رد فعل أو اكشن يزيل الشكوى
ديل عينهم قوية قوة جد
أو إحتمال طاشين شبكة
ما فارق معاهم شئ

بالمناسبة البوست ده بعد فشلت كل محاولات المعارف والاهل من الشرطة
ونحن ماشين إلى ثلاثة شهور
وانا زول في الحتة دي بالي طويل جدا
والبوست ده ما حا يتقفل إلا بحالتين
يجي رد مباشر من رأس الدولة سواء البرهان أو حمدوك عشان هم في نظري واحد بعين بصيرة جدا
أو استلم هذا الجواز باعتذار
غير كده يظل مفتوح
لو ما هنا
في كل السوشال ميديا

كالعادة مافي جديد اليوم
لكن كنا نتجازب أطراف الحديث مع بعض المعلقين مثلنا
سمعنا العجب والله
ما بحب كلام الناس الما ليه دليل
لكن مؤكد مهما حصل كالعادة ما بدفع جنيه رشوة لو حصل لولدي المريض مهما حصل
عشان كله من الله
وفي الحالات دي صعب الزول يغلط في حق الله