ثلاثة قصص قصيرة من تأليفي في غاية الإبداع

الأولى/
مدد جمهوري؛
تحكي عن لقاء بين شيخ الجمهوريين غوث الزمان الأستاذ سعيد الطيب شاطر ونبي الله الخدر

التانية/
عن الشيخ العليش بلسان غوث الزمان الأستاذ سعيد شايب

التالتة/
هومليس
ودي سعيد شايب ما فيها

فترقبوا

سعيد الطيب شايب وليس شاطر

في واحد هسّ يجي يقول لي؛
ثلاث قصص وليس ثلاثة قصص

مدد جمهوري:
أي تشابه للأحداث في هذه القصّة مع الواقع هو محض صدفة

كتب الأستاذ محمود محمد طه في زنزانته قبل الإعدام في ورقة صغيرة وصية للجمهوريين قال فيها؛
فليصل بالناس فرادى شيخ سعيد
في هذه اللحظة طرق عابر باب بيت سعيد شايب ببيان مدني جنب طاحونة الدي

عادة شيخ سعيد في بيته بالبيان بكون لابس الجلابية وتحتها سروال طويل وفنلّة حمالات
ويخدم ضيوفه الجمهوريين وغيرهم من المحبين الختمية وأصدقاء الفكرة بنفسه وبكون حايم بين الحوش والصالون وجوّة البيت،
لما الباب دقّ؛ ختّ الصينية الشايلها في سرير في الحوش ومشى يفتح الباب

طبعاً بتكون مفتكرين الزول الدقّ الباب جايب الورقة الكتبها محمود بالزنزانة في تلك اللحظة بكوبر جايبها مدني
أبداً ما جايب ورقة ولا حاجة
ولو خيال الكتابة ساهل كدا؛ منتصر دا بكرة ممكن يقول داير يكتب قصّة

ترحيب حار بالمستنير أبو بكر عباس.

سميح الزي ؟

معليش بكتب من الهاتف وبلا نضارات
تايبوز كتيرة

سأعود وأعيد

نقيف هنا ونبدأ القصّة التانية:
الشيخ العليش ونادي الشعلة بدباغة مدني؛
حكى لي صديقي الجمهوري المتهافت عبد الله عثمان عن دكتور عبد الله علي إبراهيم عن غوث الزمان الأستاذ سعيد الطيب شاطر؛
الشيخ العليش حضر زمن الكاشف وكان يعالج الناس بمحاية مكتوب في ورقتها:
حجبوهو عن عيني إلا من قلبي لا
ما قدروا حجبوهو
وبعدين شخيط طويل وبعده
صلى الله عليه وسلم
والعصر بركب حماره يتراوح عبر الدباغة لمفازة أبحراز شرق مدني
وكان حالف ما ينوم يوم في مدني

يوم جاء العصر ماري بحمارو شاقي ميدان الشعلة بالدباغة،
جات كورة طاشة ضربت الحمار في بطنو، الحمار قنت
التفت الشيخ للاعبين وقال ليهم:
الشعلة لا تتعلى لا تتدلى
ظلت الشعلة بالدرجة الثانية سنين عددا بعد وفاة الشيخ
تقرب تطلع الأولى لناس الأهلي والإتحاد ونيل شدو؛
في آخر مبارة تنهزم
تقرب تهبط لدوري السنترليق؛
يلحقها الشيخ العليش بضربة جزاء في آخر دقيقة

بعض عقلاء الدباغة ناس شيخ الجيلي صلاح قالوا ما في حل غير نراضي الشيخ العليش في مرقدو بأبي حراز
شالوا الخرفان وساقوا معاهم عصام محمد نور يختم الغنا بحجبوهو
أكرموا الحيران غاية الكرم وعصام صاحبي ما قصر
وجوا راجعين مدني
في نفس السنة طلعت الأولى

وت الحسن ود ضبعة ليك وحشة ياخ

بمناسبة يصلي بالناس شيخ سعيد
كان حكايا وأنت مثله (مثلا من المشكاة والنبراس: اختلاف مقدار)

قال
مشيت لفراش بتاع جماعة من أهلنا الرطانة .... ناس طيبين شديد ياخ

وقفنا للصلاة .... كبيرهم مقعد جالس على عنقريب

صاح: يسلي بالناس شيه سأييد

اعتذرت لرجل وضيء كدا اني بصلي جالس بسبب الغضروف وقدمته للصلاة

الراجل في عنقريبو لاحظ اني ما اتقدمت

هنف تاني بصوت أعلى: ياك. قلنا يسلي شيه سأييد

رد عليه صاحبنا: قلنا شيه سأييدأعتذر .... ديناااااك!!!

كبر بعد دينك هذه وصلينا

عقّب استاذ سعيد

الغريبة قرأ قرآن طالع من مكان طيب بشكل!!!!

أنثرووووووا


ينصر دينك!!!!

طبعاً أسهل حاجة في الدنيا دي انك تشتغل أديب
مرات القصّة في زمنكم بتاخد مني دقائق
ولو الكي بورد بكتب بصوت الكلام الدارجي الممزوج بالفصحى ورب المجرات ما تاخد من نص دقيقة.

القصّة التالتة:
هومليس homeless
حكت لي صديقة زراعية بعد أن تركنا شمبات،
قالت لي؛
مرّة في ميدان كلية الزراعة السمح داك، جبنا زيدان إبراهيم في حفل غنائي،
في نص الحفلة طلبنا منو يغني لينا أغنية؛ في الليلة ديك
أبو الزيك قعد في طرف المسرح وحلف للطلبة بحنيّة شديدة؛
والله العظيم
والله العظيم
يا جماعة، ما بقدر أغنيها
غنيتها الشهر الفات مرتين
عليكم الله، خلوني
في بت في الصف الأول قعدت تبكي

يتبع هومليس:
كغير العادة وقد تكون معرفتي بأمريكا ضعيفة؛ الأيام دي المشردين كتيرين جنس كترة،
المهم وأنا طالع من قهوة ستاربكس شارع بتل غراوند لاقيت خواجة أبيض آري هومليس،
قال لي جيب خمسة دولار
داير أقول ليهو ما عندي فكّة، لكن تذكرت انو آري؛
أديتو عشرين دولار

دخل جاب ليهو قهوة وغشى دكان التباكو جاب سجاير ومشى الركن محل خاتي بقحتو وكرتونتو تحت شجرة جاب ليهو آلة
ملفوفة بعناية، كنا زمان بنشتريها من الطبالي، لكن دي أصلية، أظن اسمها الهارمونيكا
وجا بعد جنبي
شال شفطة من القهوة ونفس من السجارة وختاهن في الواطة
شال الهارمونيكا وعزف لي لحن
شفت فيهو كل حزن الدنيا وهاشم ميرغني
وقعدة زيدان في طرف المسرح
بعد خلص
ولع سجارة تانية
ديك ماتت في واطاتها
عرفت نفسي تورطت ورطة شديدة
وجني في الدنيا الحزن
قلت ليهو بالعربي عسى لا يفهمني:
متين آخر مرّة عزفت اللحن دا؟
وقف علي حيلو
وختّ راسو في بطني
وعمتني
وجعّر بصوت عالي

زمان قبل كم وعشرين سنة حاولت أحرج علي وعمي عوض عباس؛
أنت يا علي بتجي من الخرطوم في الويكند وقبل تمشي تسلم على أبوك بتغشى شيخ سعيد شايب تقعد معاهم
وبالليل تجي لأبوك؟
قال لي: يا زول، سعيد شايب دا أنا عندي فيهو عقيدة
عندك معاي تاني كلام؟
ما كان معانا زول تالت
كان قال لي:
بهت الذي كفر
وأنا بقرأ هنا والناس تحاول تزنق دكتور ياسر الشريف
ردّ نفس ردّ ودعمي
ولو المنصوري كان موجود كان أضاف لعقيدة دكتور ياسر وعلي العوض؛
انو محمود نبي ورسول
في زول عندو عندنا حاجة
ولو موضوع موضوع عقل شنو كدا ظاهر الخف

صلى الله عليه وسلم

المستنير انواره اخذه بدون سلوك .
وصلي الله عليه وسلم

نحكي ليك يا مستنير واحدة من سيد الشغل ذاتو ممكن تعمل ليها هوليوود فيتشرز وتقدل بيها

تحكي الأستاذة أحسان عشيري*
يوم ركبت مع الأستاذ محمود محمد طه قدام

لاحظت انو ركب محل الشمس

أديتو شنطتي قلت يتغتى بيها

قال لي والله ياهو تختوني في الشمس وتشيلوني شنطتكم😄😄😄

/_/_
الأستاذة أحسان عثمان عشيري من كبار "رجالات" التعليم بودمدني

تسكن ايضا ما بين طاحونة الدي ومليح الزي

القصص في غاية الإبداع يا بكور

مرحب بيك

والهدية قصيدة الشيخ المكاشفي متوسلا بالشيخ الجيلي ، أبو الهُمَّال وأبو الكُمَّال.



والشكر موصول لأخينا إبراهيم عبد النبي لكتابة النص مصححا في صالون الجمهوريين:

مرحب الجيلي
مرحب الجيلي،
يا وليّ الله، القائدَ الخيل،
إلى الحضرَة..

*********
من يرُومْ نَيْلِ،
*يعنَى لي آلاء
سيّدِي الجيلِي..
********
فيضُهُ كالسيل،
ينقذَك من هُول،
ورْطــة، لآآآ الميلِ..
********
أجُرْ بِيهُ الذيلِ،
أفْتخِرْ بيهو،
وافرَ الكيلِ..
********
آخرَ الليْلِ،
أنظرُو ألاقِيه،
أوائلَ الخيْلِ..
********
دا الفخِيم أصْلُو،
منهُ لي المخْتار، النّبي، وصلُو،
ربّه رام خصْلُو،
فوق مريدُو النار،
حاشا لمْ تصْلُو..
********
ما انْكتبْ اسْمُو، فوق كفن،
نُقِلَت النّار من جسْمو،
قال له لمْ تأكل!
وافِر القِسم، عند موْلاه،
طاهِرَ الرّسمُ..
********
من نشأ ورِعا،
ما انتهك حرمة، ناهجَ الشرعا،
طيّب الفرْعا،
بابَ اللهِ دوَام، الأسْتاذ قارِعا..
********
رامِقَنْ طرفُو، باطنَ الملكوت،
دائرَنْ صرفُو،
دا اليقيم الليل، جُوفَهُ يسُرْفُو،
بي شراب الذّوقْ!
الأمـّـة بتْعرْفُو..
********
بالخوفِ والطّمع،
لِيمَ اللهِ دوام! صاغي لِي السّمَعُ،
بي أوامرِ الله،
فائقَ اللّمعُ، البرُوق يحَكَنْ،
وقدةَ الشمْع..
********
دا الذباب ما دارْ،
فوق العَلِي جسمُو،
بالحفْظ، والمقدارْ..
لي الضعيف *يحَجَى،
في الدنِيّة،
وفي الآخرة، تلك، يُسَرْ..
********
كمْ، وكمْ، هو يطُوف،
البلادْ، والبِيدْ،
ناظـــرَ المكفُوف..
باعُه طايل،
لي أب سعيّة، وصوف،
في البِحار، وبِرارْ،
واليصيح ملهوف..
********
المنشئها *مضْبِي،
راجي حضرتْكم،
يلقَى داهُو طُبِي،
اسْقوهو من خمْرنْ،
الجلود تحْوِي،
والكريم بيهُ يقول:
أنا ليكَ كَفِي..
********
دي الصّلاة الشّاملة،
علي النبي المعصُوم، وآله متكامله،
بيها مكاشفي يفوز،
وزرَه العمَلا، بيّضُو يا مولاي،
بالعفو، أملا!!
********

*يعنَى: يقصد أو يتوجه إلى.
*يحَجَى: يقي ويحمي ويمنع.
*مضْبِي: تعبان ومنهك غاية الإنهاك من شدة المرض. ومنها في عاميتنا، ضباه: أنهكه وأرهقه.. وفي الفصحى: ضبا: لحا وأتعب وأضنى، حتى غيّر اللون.

إبراهيم عبدالنبي

ما بتقدر عارفك 😁

يا مولانا حافظ، مشتاقين

دكتورة إخلاص والله، ليك وحشة

بدي بكري أبوبكر اسبوعين
لو ما وقف ود البشرى، أو حدد مداخلاته، أو منعه من التقاطع معي؛ بعاقبكم بالاختفاء لمدة سنة مرّة أخرى
وعلى نفسها جنت منو ديك.

لا لا وعلى ايه تاعب بكري، براي بوقف التقاطع واكتفي بقرايتك، اي طلبات تانية! اي "زميل" تاني او او "فكرة" اخرى اوقف التقاطع و التعليق عليها حاضرين😀

البعجبني فيك انك كوز راقي يؤمن بحرية الكتابة
مختلف عنهم

يا عبد الله،

كونو الحلفاوين بسبوا الدين في الصلاة دي جديدة علي
وتستاهل بوست من بوستاتك بتاعت "التهافت" على قول شاعرنا

الاسلام برسالته الأولى لا يصلح لانسان القرن العشرين/ سب الدين عند الحلفاويين

يا دكتور ياسر والله، مشتاقين
سعدت جداً بردك على ود الزبير بخصوص عقيدتك في الأستاذ
هكذا يكون الوضوح
وزي ما بقولوا الكيزان
الرد
الرد
كباري وسد

ازيك يا بكري

يمين بالله ليك وبغيابك وحشة وشوق

طاحونة الدي

انت عارف انا يمكن لي سنين عددا عيوني ما دمعت

فجأة وعلى حين غرة
لقيت "طاحونة الدي"

طوالي استدعت فيني اشجان وذكريات مقيمة في اعمق تلافيف الروح

ذات المكان والله كان ال Assembly point
اليومي حقنا في "اخر البيوت"
طبعا التيرمنولوجي بتاع اخر البيوت دا ما بعرفوه الا ناس مدني

والمعني لغير المدنياب هو، نهاية اليوم الدراسي

جات في الخاطر طوالي
وشوش بدر ابو العاص وخالد إدريس وطارق عبيد مدني وعلوي
ومره مره بكون معانا عبد الله محجوب ومحمد صلاح نقرية وعبد الرحمن النو "الدحيم" وزروق الناير

وفي الغشوات ساي ناس العشير
طارق يوسف العوض مع بكري بشير جمعة

والموئل والملتقى كان

ضل طاحونة الدي

غايتو الله يسامحك

الحمار قنت
المشهد لقطة بانورامية 30 درجة بكور في الحتة ممكن
نقول ذكرنا ب كارل دراير مخرج ( جان دارك )

طبعاً يا أبا ذر وأحمد يس،
الكتابة دي كلها من الونسات مع عبد الله عثمان
وعبد الله عثمان ودكتور أحمد الحسين ديل في الواقع من الناس الذين لا تملهم أبداً وهم أصحاب نكتة وونستم خفيفة بشكل لا يمكن تصوره.

الجمهوريين يطلقون على نبيهم الجميل أستاذ سعيد شايب
يطلقون عليه لقب سميح الزي الساكن جمب طاحونة الدي

في نهاية التسعينات كانت مدني بالنسبة لهم زي قم عند الشيعة
وأذكر كن أداوم على زيارتهم بالبيان ولمان جيت أسافر الخليج
محي الدين عبد الستار قال لي؛
ما تسافر تفوت مدني
مدني دي مدينة روحانية
حليل محمد مسكين وفضل الله محمد
قول لي يا حبيبي شن أعمل معاكا
ولّ أسيبها مدني وأجي أسكن حداكا
قول لي يا حبيبي أنا حيران معاكا

نتم ليكم قصّة سميح الزي يا دكتور ياسر

أستاذ سعيد مشى فتح الباب
الزول الدقّ الباب قال لسعيد داير لي جلابية
شيخ سعيد طوالي طلع الجلابية أداها ليهو والزول مشى
في اللحظة شقيق سعيد وهو أكبر منه
جاء طالع من جوّة البيت لحوش الصالون
لقى سعيد بالفنلّة الداخلية والسروال
إنخلع وكورك في سعيد:
دا شنو يا زول، البيت ملان ضيوف؟
سعيد قال ليهو: الزول الدقّ الباب قال داير جلابية
أخوهو بزهج قال ليهو؛ طيب ما تمشي الدولاب تديهو جلابية
سعيد؛ يمكن لو دخلت البيت ورجعت ألقاهو مشى

الجمهوريين السمعوا الحوار دا من جوّة الصالون قاموا جارين جري للشارع
يفتشوا عن سيدنا الخدر في زقاقات البيان
لكن هيهات

محي الدين عبد الستار

الكائن الجميل دا وين حاليا يا بكري ؟

هو ومحجوب عثمان "الضب"

كانو زي ال Q and U

ما بتفارقو

أنا طبعاً زول جدي العباس عم النبي وجدي القريب عمدة غرب شندي الحسن ضبعة،
يعني من الصعب اتكيف لي من زول
إلا يكون مختلف حتى أصاحبو
أها عبد الله عثمان دا صاحبي
ولو حصل في الامارات ضرب لي عندو برنامج
طوالي بخلي العندي وبمشي ليهو
هو طبعاً ممكن يمارس علي خيانات
يعني ترتيبي في لستة أصدقاءه بعد كل الجمهوريين
والحقيقية علاقة الجمهوريين مع بعض ومع رسولهم محمود والنبي سعيد شايب حاج
تشبه اسطورة العلاقة بين المسيح وحيرانه
محبة عجيبة
والله، يا أخوانا، محمود دا ما بعيد يكون المسيح البتحلم بيهو البشرية
الغريبة كلما أفكر في علاقات اجتماعية مثالية للبشرية بيخطر في بالي علاقة المسيح مع حيرانه وبتجي في راسي صورتهم من فيلم عذابات السيد المسيح
وتجي معاها علاقات الجمهوريين ومحبتهم لبعض
بتاعت الصحابة مع الرسول فيها شوية غلظة
خاصة لمان واحد من الصحابة يقول الرسول؛
دعني أضرب عنقه يا رسول الله

و الله العظيم يا سحلي أنا سعيد سعادة لا توصف بعودتك الميمونة رغم انو لي سنيييييين من المنبر
مع العلم انو ما عندي أي فكرة عن حكاية في غاية الإبداع القال عليها حبيبنا دكتور ياسر الشريف

يا مستنير انت رقم وغد في هذا المنبر فأرجو ان لا تعاقب الأعضاء بهكذا غياب طويييييل

تباً لك و لهؤلاء و اؤلائك أينما حللتم:)



وين اللِكّة العنقاد الجميل حاتم ابراهيم و حليفه الزول بتاع الكشتينة الفي لندن:)

غوث الزمان ( مره واحده )

اللهم لا نسألك رد القضاء و لكن نسألك اللطف فيه

أستاذنا كمال عباس كمان جابت ليها ظلاميه إنت غوث الزمان الجد جد بتعرفه منو و عارف ترتيب القطبية كيف و له كلام ساكت

اكثر حاجه عاجباني فيك إنك بتحب الختمية و المراغنة

الزبير الختمي

د. أبوبكر عباس
فعلاً غاية الإبداع من المرحوم سعيد شايب غفر الله له و جعل مثواه الجنة.
قصة الآري الهومليس جميلة و فيها لمحة صغيرة عن رؤيتك للآخر المختلف.

سلام يا حبيبنا أنور تاج السر

الإبداع في البوست ذاتو

نديكم لمحة من لمحات الأستاذ سعيد في مقطع من إخراج مصطفى الجيلي.

سلام للمستجير وغيره
حمدلله ع السلامة يا طيب
أنا غايتو النفاق الاجتماعي البحصل في المنبر دا ما شايلو
وبصراحة بعمل حساسية
هسة وين القصص الحلوة والابداع في هترشة شبعان (الشربوت )
دي .. ؟؟
أنا احرجت عمي وشكيت لأبوى وصينية الغداء نسوها في السرير
والشعلة مدني مربوطة ...
هسة اتا فرقك شنو من تلاتة أرباع ناس المنبر الشغالين وناسة ديل ؟؟
أرحمنا وقبل ذلك أرحم نفسك ما تعمل لينا غاغا الله يغفر لك.
مع كل الاحترام والتقدير

اووووووووووووو سيدنا ابوبكر بن عباس

المستنير المختفي

ازي الحال ياخ والله فتشت عليك لامن فتر

يا زول انت حاظرني وللا شنو هههههههههههه


عوداً حميداً مستطاب وثم وين اراضيك

يا سحلي والله، مشتاقين لهترشاتك انت وصاحبك مظعون.
لسّ قاعد في بلاد الصُفر؟

ترحيب حـــــــــــــار أحرّ من حرارة لمبتو للمستنير ابوبكر عباس
والبركة فيكم فى اخوكم يا مستنير .

يا زبير، خلينا نقعد ليك التسلسل حسب قلوبنا؛
غوث الزمان كان سيدي الحسن، وبالمناسبة سيدي الحسن نزل في ضيافة جدنا بشير ود ضبعة بالجوير غرب شندي سنين طويلة،
الناس بدت تجي تصلي معاهو في البيت، قدام البيت كانت في شجرة مضيقة المحل، قام جدنا قال لأولادو جيبو الفرار أقطعوها،
أول ما الفاس ضربها؛
الشجرة كاك كوركت وقالت لسيدي الحسن؛
حلفتك بجدك شفيع الناس كان تقطعني
سيدي الحسن قال ليها: زحي بأمر الله
الشجرة زحت
وبقت دواء للناس!!
وتزوج من الضباع، وجاب بنت تزوجها السيد المحجوب والمحجوب جاب بت تزوجها السيد علي الميرغني ولكنه لم ينجب منها وأفترقوا،
ومشى تزوج أم ناس محمد عثمان الميرغني.
جاء راجع الجوير عشان يرجعها، لكنها رفضت وقالت ما بتبقى ضرّة لبت عمها
العنقريب البات فيهو السيد علي الميرغني في عودته للجوير لليوم محتفظين بيهو للبركة
أها يا زبير،
بعد سيدي الحسن الغوثية مشت للسيد علي الميرغني ودا سبب المحبة بين الختمية والجمهوريين.
من السيد علي مشت للمكاشفي سيد القوم أبو عمر
من المكاشفي جات للأستاذ محمود ومنه للأستاذ سعيد شايب.
طبعاً دايرني أوريك ليها الان هي وين؟

شكراً يا دكتورة نعمات على وصف القصص بأنها قصص مبدعة.
الإحساس بالكتابة المبدعة فن وقسمة.

يا هيثم، سبب ابداعي في الحياة أنني لا أبقى في دائرة إجتماعية لفترة طويلة
وكل يوم أنا في شأن
أنصحك بتغير رقم الهاتف سنوياً
لتظل حيّاً

شكر يا علاء، على الترحيب والتعازي

غايتو الزنديق الضلالي ده بعد يتصوف حيكون من أنجح الصوفية لأنه حيونسهم بي كضب ما أنزل الله به من سلطان وإحتمال يبكي بي عين واحدة

مرحب دكتور ياسر و افتقدت نقاشاتنا سابقاً عن الشؤون الاقليمية و الدولية

المستنير مبدع مافي كلام بس أنا قبل ما أقرأ المحتوي حبيت أرحب بيهو علي طريقتي

لك و له التحايا و الود

و الله يا بكور كانت لنا أيام بس دوام الحال من المحال

أنا لسه في نواحي حلقة النار الجهنمية و جاء عليها كمان موضوع البانديميك المميت ده

طلب خاص يا حبيب، عليك الله وريني سر الحسن ضبعة ده لانو لسه ما وقع لي

السيد ابوبكر والمستنير بشهاده المنبريين
تعجبنى الكتابه المختزله نصا وماهله خيالا فيتحرك القارئ فى براح خاص به يضيف ما يشاء ويترك مايشاء وكل ذلك فى رمشه عين او اقل...
ما الذى يمنعك اعلان جمهوريتك وانت تتمايل شوقا وطربا مع مليح الزى
هل تحمل الشئ ونقيضه ...عقل يقظ وصوفيه موروثه تنازع المرء نفسه

مرّة يا عبد الرحيم، اتصلنا بدكتور محمد محمود استاذ الأديان بجامعة بلندن،
قلنا ليهو صحي يا دكتور، انت كنت جمهوري؟
قال لينا: دي كانت آخر محاولة عشان أبقى معاكم في الدين دا

Quote: عد سيدي الحسن الغوثية مشت للسيد علي الميرغني ودا سبب المحبة بين الختمية والجمهوريين.

عن النور الذي رآءه السيدان محمد عثمان الختم في الحجاز والسيد عثمان دان فوديو في بلاد التكرون وهو يستعلن في بارا عند اورقية بت جلاب

الأستاذ قال ما معناه الناس ظنوا انو النور دا نور السيد الحسن لكن في الحقيقة هو نور السيد علي

تأكيدا لذلك يقول الخلفاء أن السيد الحسن كان عندما "يتواجد" يقول حديثا لا يفهمونه (في وقته) عن شوقه لحفيده السيد علي

بجاه الحسن ود ضبعة والشدرة المتكية نهدي ليك شي من مناقب السيد الحسن

يا حسن

من تنبؤات السيد الحسن الميرغني:
كان السيد الحسن يمر بمنطقة غير آهلة بالسكان، ومعه خلفاؤه فرأوا ثلاث مناظر عجيبة .. رأوا زيرا بادي النداوة ومنه تظهر حبيبات الماء، فلما دنوا منه وجدوه خاليا وليس به قطرة ماء... ثم رأوا كلبا ينكح غزالة فعجبوا من ذلك ثم مروا بنهر فوجدوا تمساحا وسط الماء وهو فاتح فمه يتلقى الماء من قطرات نازلة من السماء، فعجبوا أشد العجب.
ثم سأل الخلفاء السيد سلطان الأكوان عن ذلك، فقال السيد الجسن: ( أما الزير المندّي من الخارج الخالي من الداخل، فهو إشارة لعالم آخر الزمان يظهر التقوى والصلاح وفي داخله شديد المخالفة لله ، ولا خير فيه ... أما الكلب الذي ينكح غزالة ففي آخر الزمان يتزوج المرء الساقط الحسب والنسب إمرأة شريفة وذلك لاسباب كثيرة منها قلة الرجال ومنها كثرة المال لهذا النوع من البشر... أما التمساح في داخل النهر فهو إشارة لحاكم آخر الزمان يجلس على تل من المال، ومع ذلك يطمع فيما أيدي الناس ويفرض عليهم الضرائب والجمارك وغير ذلك...
واللهم لك الحمد وإليك المشتكى وأنت المستعان ولا حول ولا قوة إلا بالله العلي العظيم ).

* من كتاب إمام العارفين: السيد الحسن الميرغني، لمؤلفه الخليفة محمد حامد السوراوي،
2009، سلسلة الطريقة الختمية.

ذكرني أخي عبدالمنعم البيتي أن السيد الحسن كان يقول:

الله!! الله!! يا علي أفندي


وورد عن مناقبه رضي الله عنه ونفعنا بجاهه العظيم:

كان السيد الحسن ذات يومٍ في قرية الزومة بالشمالية وكان جالساً في راكوبة فسطع نورٌ باهرٌ أمامه فقال له الخلفاء: ما هذا؟ فقال: هذا نورُ إبني السيِّد علي الميرغني، فقالوا: من هو؟ قال ولد لإبني السيَّد محمد عثمان الأقرب يكون له شأنٌ عظيمٌ في الولاية بل إن بركته أدركتنا نحن جدوده، فأستأذنه ود المتعارض في مدح السيِّد علي قبل وجوده، فأذن له فقال:

وقال إبني عليٌّ لاح بارقهُ عن ختم ختمٍ بدا في ذروة القلل
رأى سعادة كل الخلق منه بدت حتى هو الاعظم الموفي على زحل
بالشفع والوتر والإطلاق فيك يكن محمداً سيدي عثمان ذا الدول

وورد أن السيِّد الحسن كان احياناً يتأوه ويتواجد ويقول ((علي لو أدركتهُ لأخذت عليه الطريق)).*

ابكرونا ازيك

يا عبد الله،
كدي وضح لي نسب السيد علي الميرغني لسيدي الحسن

الموضوع دا مرّة هاشم الحسن قال لي فيهو كلام عمل لي لخبطة.

Quote: قال لينا: دي كانت آخر محاولة عشان أبقى معاكم في الدين دا

هههههههههههههه

وفشلت ؟؟

يا أخوانا، والله العظيم، والله العظيم، قصتي بتاعت هومليس دي خطيرة
حنستكم تقروها وتشكروني

أخشى من هوان الأدباء وسط أهلهم

Quote: يا أخوانا، والله العظيم، والله العظيم، قصتي بتاعت هومليس دي خطيرة حنستكم تقروها وتشكروني

الزول دا يا بكور بعد بكيتو دي كان تقولو احكي قصتك

الخواجات ديل دايماً بيشكو من عدم وجود حد يسمعهم

Quote: الزول دا يا بكور بعد بكيتو دي كان تقولو احكي قصتك

ياهيثم ، عكسك تماما !

زمان كنت بحب الفلم البينتهي وفي نفسك شئ من حتي

بكوري دا يمتلك تقنية القصة القصيرة وفق مشروع خاص به

وهو المطلوب في اتجاهات القصة القصيرة المعاصرة

بس عيبو بشكر نفسه (وإن كان بطريقة ممازحة لطيفة)