Post: #1
Title: عجلة سِتّاتِي .. و لطفي العجلاتي ..
Author: يحي قباني
Date: 07-20-2021, 09:10 PM
08:10 PM July, 20 2021 سودانيز اون لاين
يحي قباني-فى الدنيا العجيبة
مكتبتى
رابط مختصر
طبعا في ناس جايه هنا عشان نكتة العجلة الستاتي .. لكن ده ما موضوعنا ..
و لا لطفي العجلاتي و لا حتى الخواجة سكتلس موضوعنا لكن داير استفز ناس اتبرا بس ..ههههه
قصتي يا ساده يا أكارم .. انو عندي عجله .. كسبتها مره في شغل .. و كنت معجب بيها ايما اعجاب ..
ثقافتي في العجلات لم تتعدى عجلتي الرالي زمان ..
شكل الرالي كان جميل لانها عجلات جات بعد عجلة المراسلات السوداء القديمة في دواوين الحكومة .. عمودين و سرج .. و دينامو راكب بي حرفنه .. و كانت الرالي ذات الوان ازرق و احمر ..
و لم نكن و قتها نعرف هناك عجلات ستاتي .. و في زمنا ما كان البنات بتركب عجلات ..
الى ان رحلوا بجانبنا اسره لهم بنية آية في الجمال .. و في يوم و نحن في ميدان الكوره في الحله اتت (سايقه) دراجتها حوالينا .. و كان حدثا فريدا ..
و فهمنا الزمن داك انو في حاجه اسمها عجلة ستاتي عمودها مايل .. لتسهيل ركوب البنّوت للعجله ..
ثم وقفت ثقافتي العجلاتية منذ ذلك الزمن ..
و حتى في كندا عبر السنين كانت عندي عجلات لي و للاولاد تشبه عجلتي الرالي .. و نشتريها من اي محل عادي ..
الشاهد .. او كما اسلفت .. فزت بالعجله اياها و شعرت انها مختلفه و ذات قيمة .. فكنت حريص على ركوبها و تلميعها .. الى ان ركنتها لمدة 3 سنوات كسلاّ مني ..
و في سنة 2020 الكبيسة من كل المناحي .. قررت اخراجها و استخدامها في شهور الكرونا التعيسة ..
و تفلسفت و تفلقصت و قررت اخذها لمحل من محلات بيع و صيانة الدراجات الهوائية ..
و للعلم .. محلات الدراجات كانت من اهم و ازحم المحلات ايام الباندمك .. لعدم شغلة الناس فالكل قرر ان يشتري عجله ..
ذهبت مره فوجدت الدخول ممنوع .. و ان الموظف يأتيك للخارج و يسألك من سبب زيارتك ..
و كان معظم الناس في الطابور يرغب في شراء عجله .. و كان هناك شح كبير .. و واضح جليا انهم هواه و هي المره الاولى التي يبحثون فيها عن عجله ..
فشعرت بأهميتي لأنني احمل عجلتي في سيارتي و انا هنا لعمل (تيون أب) .. ولد ده ..
أتى دوري .. و خرج الموظف و سألني ما غرض الزياره ..
فقلت عمل صيانه عامة ..
فقال لي نحن مزحومين جدا و الصيانه ستأخذ حوالي اسبوع و التكلفة المبدأيه 150 دولار .. و اردف ما هو موديل دراجتك ..؟
ارتبكت و قلت هي في سيارتي ..
فاتى معي ممتعضا .. و فتحت السيارة .. و رأيت نظرة في غاية القرف منه و قال لي ..
نحن هنا لا نصين الدراجات المشتراه من المحلات امثال وول مارت و غيره ..
فقط دراجات ذات مستوى عالي من الجوده .. و انا آسف .. تكلفة الصيانة لا تسوى ان تصرفها عليها ..
فسألته و كم اسعار الدراجات التي تتحدث عنها .. مبديا رغبتي للخوض في ذلك العالم .. خاصة و انا في كل يوم ارى اشخاص في الشارع في زي كامل لركزب الدراجات .. فقط اجسامهم لا تسبه اجسامنا ..
فرأيت النظرة تلك .. مرة أخرى و قال:
لا نحمل شي على اي حال فهناك شح .. و هم عائدا الى المحل و قال لي في لفتة سريعه .. اسعارهم تتراوح من 10 الى 20 الف دولار قد تصل الى 100 الف دولار ..
قفلت (ضهرية) سيارتي بعد ان نظرت الى دراجتي .. و سرحت في عجلتي الرالي القديمة .. التى حينما ركبتها .. احدثت ضجة في حلتنا .. خاصة حينما (فكيت) رفرها الخلفي لزوم المنظره ..
|
Post: #2
Title: Re: عجلة سِتّاتِي .. و لطفي العجلاتي ..
Author: muntasir
Date: 07-20-2021, 09:22 PM
Parent: #1
بتعرف عوض كوج في الشهداء بيتهم فاتح علي التُرب
|
Post: #3
Title: Re: عجلة سِتّاتِي .. و لطفي العجلاتي ..
Author: يحي قباني
Date: 07-20-2021, 09:42 PM
Parent: #2
| Quote: بتعرف عوض كوج في الشهداء بيتهم فاتح علي التُرب |
شارع الدكاتره نادي الخريجين ..
احنا كنا بنشتري من ناس حسن صالح خدر ..
اولاده اصحابنا .. محمود و الباقين نسيتهم ..
انت عجلتك كانت فليبس شكلها .. و لا كنت بتأجر من صديق العجلاتي
|
Post: #4
Title: Re: عجلة سِتّاتِي .. و لطفي العجلاتي ..
Author: muntasir
Date: 07-20-2021, 10:02 PM
Parent: #3
لا انا كنت برجوازي ما سعيت لي عجلة
|
Post: #5
Title: Re: عجلة سِتّاتِي .. و لطفي العجلاتي ..
Author: ABUHUSSEIN
Date: 07-20-2021, 10:20 PM
Parent: #4
| Quote: احنا كنا بنشتري من ناس حسن صالح خدر .. |
دا كان في شارع الموردة غرب الجامع الكبير بين باتا و الطوخي .. ؟؟؟؟
|
Post: #6
Title: Re: عجلة سِتّاتِي .. و لطفي العجلاتي ..
Author: محمد المرتضى حامد
Date: 07-20-2021, 11:27 PM
Parent: #3
| Quote: احنا كنا بنشتري من ناس حسن صالح خدر |
سليمان صالح خضر
|
Post: #7
Title: Re: عجلة سِتّاتِي .. و لطفي العجلاتي ..
Author: ABUHUSSEIN
Date: 07-20-2021, 11:38 PM
Parent: #6
دا صاحبك العجوز دا ... 🤣
شفت وصف اخوك كيف ؟؟؟
بس قوقل ماب ... 🤣🤣🤣
|
Post: #8
Title: Re: عجلة سِتّاتِي .. و لطفي العجلاتي ..
Author: يحي قباني
Date: 07-21-2021, 05:27 AM
Parent: #7
حسن صالح خضر دكان العجلات كان في السوق العربي جنوب الجامع الكبير في الخرطوم ..
كانو ساكنين في الخرطوم اتنين في السوق .. فوق لي بار اسكرابيه ..
|
Post: #9
Title: Re: عجلة سِتّاتِي .. و لطفي العجلاتي ..
Author: يحي قباني
Date: 07-21-2021, 05:44 AM
Parent: #8
| Quote: دا كان في شارع الموردة غرب الجامع الكبير بين باتا و الطوخي .. ؟؟؟؟ |
انت قايلني قدرك ..؟
قال باتا قال .. باتا دي شنو كمان ؟
|
Post: #10
Title: Re: عجلة سِتّاتِي .. و لطفي العجلاتي ..
Author: يحي قباني
Date: 07-21-2021, 05:54 AM
Parent: #9
| Quote: لا انا كنت برجوازي ما سعيت لي عجلة |
و لا (سعيت) ليك (رادي) ..
من اين اتى هؤلاء؟
|
Post: #11
Title: Re: عجلة سِتّاتِي .. و لطفي العجلاتي ..
Author: أبوذر بابكر
Date: 07-21-2021, 06:36 AM
Parent: #8
ايوا صاح
جنب محلات العامل
فعلا في الصف الجنوب الجامع الكبير
لكن في الجزء الغربي منو
يعني لو انت واقف قصاد الجامع ومتجه شمالا
الصف الفيهو المحلات الجنوب الحامع مباشرة هي حلواني حمدتو ومحل عمر مرحوم الحلاق
في الزاوية الشرقية قهوة الزيبق وفي الزاوية الغربية مكتبة النهضة السودانية
اما محل عجلات ناس حسن صالح خضر كان في الصف البكون علي يدك الشمال
قصاد موقف بصات الديوم الشرقية قبل ما يحولوها ويجيبو بدلها بصات البراري
نفس الصف فيهو محلات المغربي
دي البرندات البكون فيها ناس "الملوص" نص النهار لما المحلات تقفل للغدا
|
Post: #12
Title: Re: عجلة سِتّاتِي .. و لطفي العجلاتي ..
Author: muntasir
Date: 07-21-2021, 06:46 AM
Parent: #11
قبة ده عجلته من الطيب خوجلي
|
Post: #13
Title: Re: عجلة سِتّاتِي .. و لطفي العجلاتي ..
Author: النذير بيرو
Date: 07-21-2021, 09:26 AM
Parent: #1
سلام يحي والجميع
وكل سنة وانتو طيبين
كنا في كوستي الجميلة ونحن علي أعتاب المتوسطة
نحلم بعجلة فليبس من دكان ابوكبشين
اشهر دكاكين العجلات في كوستي
تفوح منه رائحة المطاط واللساتك
ورقعة العجلة والسلسيون.
الرالي كانت حلما بعيد المنال الاللبرجوازية
نذهب بها صباحا الأهلية المتوسطة يزاحمنا في الشارع
عمال السكة الحديد ،كان من الأشياء الجميلة يوجد موقف للعجلات
داخل المدرسة والويل لمن يركن دراجته في غير مكانها
في المساء ونحن راجعين من المزاكرة
نتحاشي شارع المرور إن لم تكن انوار العجلة
مضاءة وتخيل العقاب أن يقوم عسكري المرور
بإفراغ اطارات العجلة من الهواء وتسحبها
راجلا الي المنزل.....
اي زمن هذا الجميل اللذي كنا فيه....
تدخر النقود لشراء مزيدا من الاكسسوارات
بوري ...شريط كهرباء...صورة بروسلي...
والباقي ندخره للفيلم الهندي...
كومار،،، الحسناء انيتا،،،،شاشي كابور
وضي القبيلة اميتا باتشان،،،ووزير الداخلية
كومار ابوشلخة،،،
شعار الفيلم دوما القتل عمدا والسداد بالدم
لا توجد في الافلام الهندية مدنية الديمقراطية
الغلبة فيها للحق وانتصار المظلوم...
أجرة باركن العجلة في السينما خمسة قروش
تخيل...
سلامات.......
|
Post: #14
Title: Re: عجلة سِتّاتِي .. و لطفي العجلاتي ..
Author: عبداللطيف حسن علي
Date: 07-21-2021, 10:47 AM
Parent: #13
في ام درمان الطيب خوجلي والدكاكين الصغيرة في الاحياء
في السوق العربي حتي الان موجود جنوب الجامع الكبير
كلمة عجلاتي في ام درمان مرتبطة بمعني سالب اعمل حسابك ياقبة
|
Post: #15
Title: Re: عجلة سِتّاتِي .. و لطفي العجلاتي ..
Author: عبداللطيف حسن علي
Date: 07-21-2021, 10:49 AM
Parent: #14
اي زول ماكان عندو عجلة الخشب ام تلاتة لساتك ، وميزان
في شكل حرف تي T دا ما من امدرمان
|
Post: #16
Title: Re: عجلة سِتّاتِي .. و لطفي العجلاتي ..
Author: muntasir
Date: 07-21-2021, 11:06 AM
Parent: #15
عبداللطيف انت قصدك السكوتر ، عمك قبة من زمن الترتار
|
Post: #17
Title: Re: عجلة سِتّاتِي .. و لطفي العجلاتي ..
Author: عبداللطيف حسن علي
Date: 07-21-2021, 11:28 AM
Parent: #16
| Quote: عبداللطيف انت قصدك السكوتر ، عمك قبة من زمن الترتار |
بس ياهو ، يا داموس قبة شنو البعرف الترتار
هو زقاق المنفلة ماحضروا ولا الركشة العاملة زي التكتك بتاعة الغاز
يحي دا لسه صغير خالس
|
Post: #18
Title: Re: عجلة سِتّاتِي .. و لطفي العجلاتي ..
Author: Abdelrahim Mohmed Salih
Date: 07-21-2021, 12:30 PM
Parent: #17
التحيه للعجلات وكل العجلاتيه فى البوست
امتلاك العجله تلك آله البرجوازيه:) كان حلم صبا....انكربت فى إجازه المتوسطه زمان تقريبا كل الاجازه شغل شديد حتى تحصلت عليها كا اجمل ما تكون المركبات زرقاء(صاروخ) تسر الرفاق والناظرين
يا عبداللطيف العجله الخشبيه امو٣ عجلات خشبيه وميزان قياده يصنعها النجار ليتعلم الاطفال المشى...تا تا ..تا...تا
إذا دى المقصوده ما ظنيت مافى بيت فى السودان ما كانت فيو....لكن لو قاصد سكوتر منتصر دى ما شفتها إلا فى بلاد الخواجات نحن عابرى الخرطوم مرورا ب المطار:)
حاليا فى بلاد الخواجات العجله رفيق دائم وحتى الولد الصغير اردفه معاى فى مقعد مخصص له به كل مستلزمات الامان من حزام وخوذه راس وبجانبه اخوانه كل زول فى عجله ليتحرك كنفوى صغير تجاه الداون تاون
|
Post: #19
Title: Re: عجلة سِتّاتِي .. و لطفي العجلاتي ..
Author: Mahjob Abdalla
Date: 07-21-2021, 12:46 PM
Parent: #18
| Quote: لا نحمل شي على اي حال فهناك شح .. و هم عائدا الى المحل و قال لي في لفتة سريعه .. اسعارهم تتراوح من 10 الى 20 الف دولار قد تصل الى 100 الف دولار .. |
تصدق يا باشمهندس,
انا برضو مشيت للمحل في دنداس + جلن ارين (Trek Store), ادونى نفس الاجابة دى.
الطريفة, كنت عندى الـ Trek Bicycle اشتريتو used قبل كم سنة, الولد قاعد يسوقها يمشى بيها المدرسة و نسى ما قفلها, اتسرقت منو.
قلت تارى انا كنت عندى بايك بـ 10 الف و ما جايب خبر.
|
Post: #20
Title: Re: عجلة سِتّاتِي .. و لطفي العجلاتي ..
Author: عبداللطيف حسن علي
Date: 07-21-2021, 12:56 PM
Parent: #19
| Quote: يا عبداللطيف العجله الخشبيه امو٣ عجلات خشبيه وميزان قياده يصنعها النجار ليتعلم الاطفال المشى...تا تا ..تا...تا |
اقصد دي يا عبدالرحيم ، اقدم عجلة شفتها وسقتها قدامي واتكسرت بعد يومين
|
Post: #21
Title: Re: عجلة سِتّاتِي .. و لطفي العجلاتي ..
Author: محمد المرتضى حامد
Date: 07-21-2021, 02:43 PM
Parent: #20
| Quote: حسن صالح خضر دكان العجلات كان في السوق العربي جنوب الجامع الكبير في الخرطوم .. |
سليمان صالح خضر كان في المحطه الوسطى امدرمان فاتح شرق جغرافي وأول من باع الفونيكس وال Forever
وأعتقد تحول لاحقا إلى تجارة العطور.
حسن بتاع الخرطوم الجمب البارات ما بعرفو…
نحن لامن وعينا ما لقينا بارات ..
لا أبوستولوس حاجوغلو ولا غيرو..
|
Post: #22
Title: Re: عجلة سِتّاتِي .. و لطفي العجلاتي ..
Author: ABUHUSSEIN
Date: 07-21-2021, 03:52 PM
Parent: #21
Quote: نحن لامن وعينا ما لقينا بارات ..
لا أبوستولوس حاجوغلو ولا غيرو |
🤣🤣🤣🤣🤣🤣🤣🤣🤣🤣🤣
قلت ليك صاحبك عجوز .....
|
Post: #23
Title: Re: عجلة سِتّاتِي .. و لطفي العجلاتي ..
Author: محمد المرتضى حامد
Date: 07-21-2021, 06:46 PM
Parent: #22
| Quote: قلت ليك صاحبك عجوز ..... |
كتبت عن مريه في الفيسبوك قام محمد سني قال لي زمني دا كله قايلك سغير ما كنت فاكرك من زمن كرومه أو واحد من ناس الزمن داك.
مش الحمدلله ما كتبت عن حملة الدفتردار؟
|
Post: #24
Title: Re: عجلة سِتّاتِي .. و لطفي العجلاتي ..
Author: Ahmed Yassin
Date: 07-21-2021, 07:08 PM
Parent: #23
سمعت ان حسن صالح خضر في امدرمان كان يبيع العجلات بالتفسيط
واحسن عجلات دبل كانت عند مقبل اب سبحة ..كان طويلا وضخما ولو اتاخرت دقيقة عن موعد تسليم العجلة
غالبا تكون ساعة ..بى قرشين. الله قال بى قولك
وعوض كوج كان محله ملاصق لنادي الخريجين في شارع غاندي
وفي سوق الموردة كان عمك صديق العجلاتي لكن عجلاته كلها الساتك بتاعتا قديمة وكلها رقع
الغريبة ولا واحد منهم كان عنده ساعة يظبط بيها وقت ومدة الايجار.. كان تقديري
سمعنا ان يحي دا كان لامن يتاخر كم دقيقة كان بياكل عمط عوض كوج حنك
|
Post: #25
Title: Re: عجلة سِتّاتِي .. و لطفي العجلاتي ..
Author: ABUHUSSEIN
Date: 07-21-2021, 08:06 PM
Parent: #24
| Quote: مش الحمدلله ما كتبت عن حملة الدفتردار؟ |
🤣🤣🤣🤣
اكتب يا ابو اكرم بنلقى ليك مخارجة ...
نقول عليك زي بتاع اسبانيا دا و الزمن رجع بيك ٦ سنة لي ورا ... 🤣🤣🤣
|
Post: #26
Title: Re: عجلة سِتّاتِي .. و لطفي العجلاتي ..
Author: يحي قباني
Date: 07-21-2021, 09:04 PM
Parent: #25
| Quote: لا أبوستولوس حاجوغلو ولا غيرو.. |
ابوستولو حاجوغلو ده حق عمك العبد ابادير ما كده ؟
عادل العبِد كان قدامنا في المعمار ..
للشباب ناس ابوحسين و الحلوين الحارجع ليهم واحد واحد ان شاء الله ..
الوصف بالبارات زمان كان اسهل شي ..
و اذا عرف السبب .. بطل العجب ..
|
|