(م) من أظرف ناس الشربَه، وهو مرجع وخبير استراتيجي في أنواعها بدءا بالكوجومورو بتاعنا والطَج (شربوت سد النهضه)، مرورا بالجِن وال Screaming eagle، وأكيد من الأسماء النتائج معروفة والتحليق مضمون.. تجده يترنم: (فشارب الخمر يصحو بعد سكرته وشارب الحب طول العمر سكران) سأله صديق مشترك: -إنت لازم تشرب كل يوم؟ - أبدا، أنا ما بشرب إلا لامن أكون زهجان، وما حصل ما كنت زهجان.. - طيب ياخ يوم جرِّب تشرب حليب دافي ونوم! - جرَّبت وجاني أبكبَّاس.
حكى أنه ذات جمعه كان (داكِّي) الصلاه زاتا راقد في سريرو متوسِّد وثيرو بسبب هانقوفر من فعاليات هلا بالخميس يُبحلق في اللاشئ، وفي غفلة رقيبو إذا بكائن قبيح مرعب يخرج من جدار الغرفة ويتجه نحوه مباشرة واثق الخطوة يمشي ملكا وتااااخ رصعو كف ثم عاد في هدوء واختفى في الجدار. ألعبوا تاني..
أقسَم أن الكَفتو جان لا في كارتون توم وجيري ولا الأفلام الهندية التي ينقلك (الكف) فيها إلى كوكب نوبيرو.. كومار ياخ..
هرب بملابس النوم إلي الشارع.. نصحه الرفاق بالإعتزال لأن ما حكاه مجرد أخيلة وأوهام كأوهام سندوتشات الطحنية بالعودة إلى الحكم. شكرا للشهداء الذين يأكل الجميع على موائدهم اليوم ويتواطأ البعض على خيانة دمائهم الطاهرة..
أقسم صاحبنا بأنه كان (واعيا) وأن آثار الصفعة قائمة على جضومو، إعتزل صاحبنا المشعشعة ردحا من الزمن وأصبح من المداومين على الجمعة وخطبتها حتى لو كان إمامها الشرد تركيا. قال تاب، لكنها كانت كتوبة العاشقين بسقط اللوى أو أوزون، المستهبلين بتاعين الLaw of Attraction و(أنا لا أخون حبيبتي لكنني مخلِص لكل النساء) وما الذي يعيب إنسانا في ولاء القلب للأحباب؟ فالعشق غلاب والهوى شلاّب، صدق مظفر النواب: كلنا قد تاب يوما ثم ألفى نفسه قد تاب عما تاب.
الذين يومنون فقط بما ترى أعينهم المجردة مساكين ساااي، فهم يُنكرون أشياء كُثر حولهم رغم أنها توسوس في صدورهم وتلحقهم أمات طه، وبالطبع لعين الإنسان العادي مجال رؤية محدود، فهي ترى الضوء الذي تنحصر أطوال موجاته بين (400 – 720 نانومتر) وتلك التي أقصر أو أطول من ذلك لايمكن لعين البشر أن تراها، باستثناء أصحاب الجلاء البصري أو من عنتهم حبوباتنا بقولهن (البشوف القلب يا ولدي) أو تلك الروسيه (ناتاشا ديمكينا) التي ترى حتى الجواك والحمدلله ماجات السودان.
عليه، فالجن موجود وحااااايم لكننا لا نره من حيث يرانا، يقول بعضهم أنه شكل من أشكال الطاقة سيصل العلم لمعرفته يوما ورؤيته بأجهزة معينة، ولعل ثقافتنا الشعبية تحتشد بالكثير حول الجن لا سيما محاولات إخراجه ممَن تلبَّسهم وسكنهم، ولو بالإيجار، وتلك طقوس يمارسها البشر منذ بدء الخليقه. قيل يمكن طرد الجن والشياطين والأرواح الشريرة بالقرآن أو الإنجيل أو ثورة ديسمبريه، وهناك حركات يمارسها بعض الدجاجلة تتضمن الجَلد، أُخرج يا عدو الله، أو ما تفعله بعض الشعوب زي لمّات الزار عندنا، دستور يا اسياد، ولا أنسى أني وجمع من صبية الحي تسللنا ذات نهار إلى بيت (زار) فشاهدنا من نوافذ الصالة أشياء ما ظننا أن تحدث، النسوان ديل (يا الله هووووي بجيك وتسألني)، سيجارة الروثمان دخاخينا مُشترك نيالا مغادرا بابنوسه، ما كنت أظن أن امرأة يمكنها أن تشفط في رشفه واحدة فتيل كورفوازير (السِوسيو) اسكيتو in one go. (أشهد ألا امرأة إلا أنت).. بعضهن أعددن لرقصة الخواجة عدتها، لابسه فستان أحمر جكسا في خط ٦ وبرنيطه سوداء مع كأس بيسراها وانطلق البخور الخاص باستدعاء الخواجه، يا عواطف (إسكزيوزمي) ممكن تناوليني من الجوني ووكر دا، ثم أغنيه بلغة سنسكريتيه وتويست وجيرك وشي بالرقبه ودلاليك ودهجي ورهجي وياعيوني غاب انسانك ثم غيبوبة مصطنعة، رشة مويه للإفاقة، ثم بدأت المغنيات يا عيني ويييين تلقي المنام أحبابك جَفوني. بعد إعادة ترتيب الأوضاع طواااالي قَلَبَن البوني إم، دادي كول تليها لوليه وميكانيكا الأكتاف Eskista. نِمر الكِندو زاتو قرررب ياكلنا نحن المندهشين نتراوح بين فانتازيا وواقع غريب فأصبحنا، كما في ال4DX ، بعض من مسرح اللامعقول. تأتيك من بعيد ضحكة ستيريو بصوت عذب لشابتين (مَصدرو الزهرة في نواحي سهيل).
ثم أطلَّت سيدة النساء..wow..
حضرت بعد الهاف تايم تتهادى يتقدمها صدر مدرع بالحلي أنشد له أديب الدايخ:
يعلو ويهبط في غَنَجٍ ورجرجةٍ.. كهودج العيسِ في مشي وفي خَبَبِ الله أكبر. No woman no cry.
كانت سبقتها إلى الحفل سميره الخطيره فتلاقت قمم يا مرحى، قالَدَن بعض، global warming، إيطاليا X إنجلترا، وجلسن شوف يا حلاتن فُزَّر في ناصِلاتِن.. كانت ملهمة الشعراء والأدباء وسُمّار الحي والغاوين، مجال نفوذها وسطوة حُسنها يمتدا بمدى رادار المطار، إنتخبوها (سِتَّهُن) في اقتراع سري للشباب وأنها (البرنجي) وفقا لإجماع شيوخ الحي السكوتي ومعهم إمامهم محمد وِلد بكاي.. ما بتاع القراي.. جاءت تلبية لدعوة كريمة من جارتها ست الزار، صَدَر بعدها بيان مشترك وتوقيع بروتكول ثقافي برعاية شمهروش شخصيا.
قبل سنوات حكيت لصديقي السياسي التفكيكي (أ.ع) عن تلك (الحادثة) فتنحنح وحمد الله وأثنى عليه وقال: تعرف يا محمد، كُتار في بلدنا دي في حالة (زار) مستدام، ولوليه ظلت تدير دواخلنا وتصرفاتنا منذ عهد الكًكر والطاقية ام قرينات حكاما ومحكومين، فجُل أفراحنا وأتراحنا وسلوكياتنا (ظار) وهستره، تطرف في كل جوانب حيواتنا وبسخاء. حميمية سلامنا خِبّيت ولِبّيع يجيب الديسك، حفلاتنا كواريك وأفراحنا جَلِد وبُطان، حرررررم وعلي الطلاق بالكيلو، ننووووم ونتحاوم بين الضَلَله وستات الشاي وعايزين كهرباء ومكيفات وصواني عامره وبنزين وعرس وصالات و show وقطيعه بالكولا وأبوخاش حمدوك، نمتدح الناس ونلعن ميتينم زاتو بالفي والمافي، نجعُر بصدق لذِكرِ الحبيب المصطفى وبدموع كذوب في المنابر للوحة دافنشي في كتاب مدرسي، ندوخ في حلقات الذكر ونسكر لط لامن يرجعونا البيت بعجلة الرغيف، أعظم منظري العالم، سياسه ودافنه وكوره، الوزاره (قافله) مشوا ل (فاتحه)، نخسر ٩/ صفر والتحكيم فااااشل. أما بيوت العزاء والأزياء فالنساء محننات والثكلي ضارب وبالجنبه كدا: لكن يا ناديه ماااا تقولي لي، توبِك إشششش ... وفجأة ينتقل الإرسال إلى FM نحيب يحنِّن وعويل تنماث له قلوب ستالين والخمير الحمر متخطيا بكا الخنساء ب ١٠٠ ديسيبل.
بعض نسائنا جعلن من (بيت البكا) زارا يجمعن فيه كل أحزانهن قديمها وحديثها مستصحبات فشل مركزي ضرب مجمل نواحي حياتنا مع استدعاء أمانِ خُلَّب تبخرت وأحلاما سحقتها مجنزرات الزمن اللئيم وعشق خديج تبدد لغياب الحاضنة بعدما بذل طرفاه وعودا كوعد عرقوب ثم غادر أحدهما باللوفتهانزا تاركا الآخر للتونسية.
تمرحل الزار فصرنا نبكي لأحداث جسام كفشل الأمة المزمن ومفارقة الأوطان ولأسباب دون ذلك، حتى أصبح مجرد الإستماع لأغنية أو ألم في الكتف مدعاة للبكاء بحُرقة، القطرة التي أترعت الكأس، نشيج أوفرتايم ونخجي وهنهنات هوادة.
مع الملء الثاني لكأس النهضة بفودكا الروس يلزمنا زار جديد لنغني: لوليه إنتِ ما صعبه أنا بحب كايرو وأديس أبابا.
-
(ما مر ذِكرُكِ إلا وابتسمت له ... "فأنتِ" العيد والباقون أيام)
Post: #2 Title: Re: أدركوا صديقي ود المرتضى قبل أن (يودّر و يو� Author: يحي قباني Date: 07-17-2021, 12:56 PM Parent: #1
هسّي .. دي .. كتابة زول نصيح ؟
Post: #3 Title: Re: أدركوا صديقي ود المرتضى قبل أن (يودّر و يو� Author: يحي قباني Date: 07-17-2021, 12:59 PM Parent: #2
او كما قال الشاعر:
اتبكموا الناس الفصاح ..
المجنون نصِح .. و جنّو النصاح ..
Post: #4 Title: Re: أدركوا صديقي ود المرتضى قبل أن (يودّر و يو� Author: يحي قباني Date: 07-17-2021, 01:00 PM Parent: #3
يا اهل المنبر :
غايتوا انا كان حصل لي شي ..
اشهدوا سببي الزول الاسمه محمد المرتضى حامد ده ..
Post: #5 Title: Re: أدركوا صديقي ود المرتضى قبل أن (يودّر و يو� Author: Osman Musa Date: 07-17-2021, 01:21 PM Parent: #4
يا أخ قباني ياخ نعمل شنو؟ ناس ود المرتضى و أحمد القرشي ديل مجانين. والبلاد العايشين فيها بلاد ساحرة وشاعرة. وهم بالمناسبة من الكتابين الظرفاء في السودان والجزيرة . ظرافة اصحابك ديل يا قباني اجبرت العملاق بادي يقعد معاهم شهرين يغني ويضحك ليل نهار . .. ليك ولهم التحية وعيد مبارك
Post: #6 Title: Re: أدركوا صديقي ود المرتضى قبل أن (يودّر و يو� Author: علي عبدالوهاب عثمان Date: 07-17-2021, 01:27 PM Parent: #5
الحبيب قباني .. يا سلام يا جميل أينما ما حللت تجلب الجمال والابداع روعة .. المزيد من حديث الاخوانيات لأديبنا الرائع المرتضى ..
تحياتي يا جميل
Post: #7 Title: Re: أدركوا صديقي ود المرتضى قبل أن (يودّر و يو� Author: علي عبدالوهاب عثمان Date: 07-17-2021, 01:54 PM Parent: #6
الحبيب قباني .. تحياتي خليك في هذا العالم الجميل كلما أرى أو اسمع أغاني زمان الجميلة وقبل شوية ابراهيم عوض في قناة امدرمان الساعة 3:51 بتوقيت السعودية (السبت) في اغنية غاية الآمال وبالاناقة الزمان ( فيونكا حمراء ) وبدلة وتسريحة
تحياتي الحبيب قباني ..اسمك مرتبط بالابداع
Post: #8 Title: Re: أدركوا صديقي ود المرتضى قبل أن (يودّر و يو� Author: ABUHUSSEIN Date: 07-17-2021, 02:44 PM Parent: #7
اسي عليك دينك بتاع الطشمة منو ... ؟؟؟ صاحب ابو اكرم و ل ابو اكرم زاتو ... ؟؟؟ دي كتابة زول طاشم ٢٤ ساعة ... كمان كنجومورو و جن و فودكا .... انا غايتو كان سألوني بقول الزول دا ساكن ليه في بار .... آمنت بالله
Post: #9 Title: Re: أدركوا صديقي ود المرتضى قبل أن (يودّر و يو� Author: محمد المرتضى حامد Date: 07-17-2021, 08:22 PM Parent: #8
عزيزنا قباني. ياخي تعازينا في الزميل عادل عبدالرحمن جعله المولى في عليين مع المقربين.. - عارف يا هندسه، الموضوع دا حكيت عنه قبل فتره مع بعض شباب العائله، طبعا ظنوا أني أبالغ في العرض والتصوير رغم أني (خففت) وسنسرت الكثير ، الناس ديل مستحيل يصدقوا تلك الحكايات بسهوله أو بالأحرى يستوعبوا تلك الأحداث. كنت أحكي لهم، وهم جميعهم أبناء وبنات أخواتي وأبنائي، عن السودان ونحن في السبعينيات والثمانينيات وكيف كانت الحياة والأشياء وأستشهد بصور خاصه ومما تبقى لي وأخرى من النت. بعضهم حزن كثيرا لما آل إليه الحال وآخرين حزنوا كثيرا للعكس بأننا كيف كنا نعيش بدون نت وكومبيوترات وهواتف نقاله ومولات وما شابه.. بيستغربوا أن نسافر من الخرطوم بقطار أو لواري وربما نبقى في الطريق ٧ أيام قبل أن يعيد عمال الدريسه الفلنكات والخط الحديدي الذي أزالته السيول.. بيستغربوا أنه في بعض مناطق السودان كانت النسوة يأتين الأسواق بدون ملابس سوى (قرقاب) وما كان ذلك يلفت انتباه أحد لأنه أمر عادي. يا عزيزي أنت من الذين سافروا وشافوا لكن للأسف في ناس في سننا لم يعرفوا ماهية الحياة في أقاصي السودان .. لي عوده إن شاء الله..
- أبوحسين سلامات.. كل سنه وانت طيب.. كتيرين فاكرني بتاع شربه وكمان سيجاره، خليهم كدا..هههه .
Post: #10 Title: Re: أدركوا صديقي ود المرتضى قبل أن (يودّر و يو� Author: ABUHUSSEIN Date: 07-17-2021, 09:17 PM Parent: #9
Quote: أبوحسين سلامات.. كل سنه وانت طيب.. كتيرين فاكرني بتاع شربه وكمان سيجاره، خليهم كدا..هههه .
و عليكم السلام ابو اكرم و كل سنة و انت و كل احبابك طيبين غايتو الكتيرين ديل بعد بوستك دا صعب يقتنعو ليك ... على قولك خليهم كدا ... 🤣🤣🤣🤣
Post: #11 Title: Re: أدركوا صديقي ود المرتضى قبل أن (يودّر و يو� Author: محمد المرتضى حامد Date: 07-17-2021, 10:07 PM Parent: #10
Quote:
يا أخ قباني ياخ نعمل شنو؟ ناس ود المرتضى و أحمد القرشي ديل مجانين. والبلاد العايشين فيها بلاد ساحرة وشاعرة. وهم بالمناسبة من الكتابين الظرفاء في السودان والجزيرة . ظرافة اصحابك ديل يا قباني اجبرت العملاق بادي يقعد معاهم شهرين يغني ويضحك ليل نهار . .. ليك ولهم التحية وعيد مبارك
٤ شهور يا عثمان.. أخونا د أحمد القرشي دعاه لزيارة مسقط وقال ليهو يا شيخ طه تعال وعمل اللازم .. لم يتوقع أن يزيد على الأسبوعين، بعدما انتهت مدة الزياره (رسميا ٣ شهور) مددها له قرشي لشهر إضافي.. لكن يا عثمان صاحبك د أحمد طراوه كان وقتها معنا بمسقط وكان هنا عماليق في الفن والأدب والثقافه واللطف والكرم والأريحيه وكل منهم يريد بادي ولو لليلة.. كان التجمع عندي ثم التنقل وكان نادي الجالية بهجة خالصة فأقام حفلات حتى تحت المطر وتكون من المحظوظين لو وجدت مقعدا فكثير من الحاضرين وقوف. ياخ لامن كان يغني عيونك علّمن عيني بكا الخنسا ما تفرز دموعك من حبات المطر وأما في (زمني الخاين) تحس بالخنجر في ضهرك جووووه..
رحم الله الشيخ طه الجميل.. بادي ظاهره كونية لن تتكرر.. كثيرا ما حاولت أن أكتب عن ذلك الإنسان الإنسان وفشلت.
Post: #12 Title: Re: أدركوا صديقي ود المرتضى قبل أن (يودّر و يو� Author: ABUHUSSEIN Date: 07-17-2021, 10:31 PM Parent: #11
Quote: شيخ طه
آمنت بالله ............ قبل ما تكتب مداخلتك دي بي دقايق كنا بنتونس و جبنا سيرة بادي الله يرحمه هل تصدق واحد من الجماعة ذكرو بي اسمو ( شيخ طه) و كم واحد ما كانو عارفين انو بادي دا ما اسمو الحقيقي
Post: #14 Title: Re: أدركوا صديقي ود المرتضى قبل أن (يودّر و يو� Author: محمد المرتضى حامد Date: 07-17-2021, 10:45 PM Parent: #11
Quote: الحبيب قباني .. يا سلام يا جميل أينما ما حللت تجلب الجمال والابداع روعة .. المزيد من حديث الاخوانيات لأديبنا الرائع المرتضى ..
تحياتي يا جميل
جبار الكسور وهبه.. كل لحظه أي لمحه وإنت طيب.. إنت قايل الكلام الشايفو سمح دا من عندي أنا؟ والذي سمك السماء بلا عمد أنا لم أفعل سوى النقل.. أخوك عاش في السودان بين حدودنا مع تشاد وحدودنا مع أحبابنا الأحباش والشمال والوسط ، هم أهل السماحه والجمال ، مشوار التبون وبابنوسه والمجلد وأبيي دا بيعلمك حاجات عجيبه ، أهلنا في بورتسودان وأروما ودرديب شئ آخر، مش ودباره بيغني لو عز الصبر صابر؟ ديل ناس الشرق. ووالله في عز حرب أهليه مريعه في منطقة (لا داع لذكرها) بين الدينكا وإحدى قبائل البقاره شهدت كل صفات السودانيين ، عنف وشجاعه ورجوله و(ركوب راس) وشهامة وكرم وتسامح وإخاء لدى الطرفين السودان دا غريب ومتفرد . دوري في ما أكتب فقط النقل ، وبصدق، الكتابه عن التجربه ، سيما عند مضاهاتها بما جربناه لاحقا في القارات الست عن الشعوب الأخرى، ربما يكون مصدر الإستحسان لكن، وبكل صدق، الجمال عند من نقلت عنهم وأنا لست سوى كاميرا..
- عارف، قباني دا مره زارني في بيتي في كندا وقال لي تعال دايرك بره .. ركبت معه سيارته الفارهة، سمعني تسجيل للطير المهاجر وقتها كان عند بضعة أشخاص وقد بُذل لاحقا في النت (قبل عشر سنوات تقريبا من الآن) بعنوان (تسجيل خرافي لأغنية الطير المهاجر) .. أسمعني المقدمه بس.. بعدما غادرني عرفت أنني لست الوحيد الذي يقبع في هذا البلد جسدا وحسب، وأنني لازم في أقرب فرصه لازم أمشي أمدر وقد كان.. مشكلتنا و (زارنا) أننا يمكن أن نعيش كهاردوير في بلدان تموت من بردها الحيتان كما قال الطيب صالح لكن يبقى السوفتير سوداني حتى الممات. مودتي المغربله يا شيخنا عبدالوهاب. .
Post: #13 Title: Re: أدركوا صديقي ود المرتضى قبل أن (يودّر و يو� Author: Ahmed Yassin Date: 07-17-2021, 10:38 PM Parent: #10
والنسيم الحلو يهفو رطبا والندامى يسكبون العنبا يرشفون الكأس حببا حببا ... نقول وهنا الكأس وخمر وانتشاء يانديما عب من كأس الصبا ومضي يمشي الهويني طربا بت أشكو لنجم في الليالي دمعا ولطل فوق زهر كاللآلي جميعا ونديمي عب من كأس الصبا وسقاني ثم عاف الكأس عاف الملعبا وجفاني اكيد ودحامد لايمكن ان يكون نصيح باي حال من الاحوال
Post: #15 Title: Re: أدركوا صديقي ود المرتضى قبل أن (يودّر و يو� Author: محمد المرتضى حامد Date: 07-17-2021, 11:02 PM Parent: #13
Quote: اكيد ودحامد لايمكن ان يكون نصيح باي حال من الاحوال
ههههه.. يا ابوحميد يا فنان.. ياخ بفتش لي في زول يعلمني الساكس.. بمثلما قيل أن الموسيقى لغة الملائكة..سمعت تحت تحت أن الساكس من آلات الفردوس بالذات التينور ..وأكيد فلوت وناي. قت ليك.. بمناسبة قولك إني ما نصيح ، نيتشه قال بنحتاج للجنون أحيانا لأن حياتنا العادية ممله.. الزول دا صادق.. عيدك شربوت وشيه وشاي وشذى..
Post: #16 Title: Re: أدركوا صديقي ود المرتضى قبل أن (يودّر و يو� Author: Ahmed Yassin Date: 07-18-2021, 00:07 AM Parent: #15
ماعندك مشكلة...التينور و( الباريتون ) اصلا اصوات رجالية حاد و. غليظ تواليا التينور دا اسهل من الساكسفون السوبرانو او الالطو( اصوات نسائية ) وبتلقاهو في فرق الجاز ..اما الاغلظ الباريتون بتلقى في الموسيقى العسكرية .حنبدا ب موقع الفم وشكل الشلاليف ما عايز اقول الشفاه ووضع اللسان. وكيف تنفخ وتتحكم في النفس والتنفس...الات النحاس دي شغل رجال تعرف يا ودحامد ... في اسبوعين حابدا معاك الكلارنيت ....
Post: #17 Title: Re: أدركوا صديقي ود المرتضى قبل أن (يودّر و يو� Author: بدر الدين الأمير Date: 07-18-2021, 01:26 AM Parent: #16
تعرف ياقبانى غير علاقة المنبر انا اول واخر مرة اشوف مولانا محمد المرتضى حامد لمن جاء مخصوص من مسقط عشان يحضر مسرحية عرس الزين للفنان محمد السنى وانا كنت الالفا التذاكر خلصت والمسرح فل وانا فى الادارة صعب ومتطرف جانى السنى وحنسنى ياخى مولانا محمد المرتضى جا مخصوص من مسقط عشان يحضر المسرحية ياخى دخلو من باب الممثلين وقد كان دخلت محمد المرتضى من باب الممثلين بس تانى لاشفتو ولا رايته هل سافر بليله داك لمسقط ولا قعد مع اقرباهو ناس كمال سالم وعادل سالم
Post: #18 Title: Re: أدركوا صديقي ود المرتضى قبل أن (يودّر و يو� Author: محمد المرتضى حامد Date: 07-18-2021, 09:59 AM Parent: #17
Quote: تعرف ياقبانى غير علاقة المنبر انا اول واخر مرة اشوف مولانا محمد المرتضى حامد لمن جاء مخصوص من مسقط عشان يحضر مسرحية عرس الزين للفنان محمد السنى وانا كنت الالفا التذاكر خلصت والمسرح فل وانا فى الادارة صعب ومتطرف جانى السنى وحنسنى ياخى مولانا محمد المرتضى جا مخصوص من مسقط عشان يحضر المسرحية ياخى دخلو من باب الممثلين وقد كان دخلت محمد المرتضى من باب الممثلين بس تانى لاشفتو ولا رايته هل سافر بليله داك لمسقط ولا قعد مع اقرباهو ناس كمال سالم وعادل سالم
بدر كل سنه وانت طيب .. محمد اتصل بي مرتين قال لي تجي من مسقط ولا الواق الواق يعني تجي ، عندنا عرض لعرس الزين وفي مفاجآت ستسرك.. كان ويكند ، ركبت الطائره واستقبلني زول عزيز في المطار ومباشرة للمسرح وسني كان بانتظاري خارج المسرح يرتدي عراقي وطاقيه وسروال أبو تكه جاهز للمسرحية. الحقيقه دهشت من عدد السودانيين خارج وداخل المسرح كنت فاكر القصه زي السلطنه. أجلسني في الصف الأمامي وجاء لي بحبايب أونلاين ناس كيكي وخليل ومعتز القريش. المفاجأه كانت ظهور الأصحاب دكين وأميره الشيخ كممثلين. بعد انتهاء العرض دعاني الجميع لعشاء بسوق واقف، إنت كنت معنا ، بعد نصف ساعه توعك سني وكمال سالم طلب الإسعاف وذهبنا جميعا إلى المستشفى وبقينا هناك حتى الخامسه صباحا، بعد أن شوفنا زولك بيشاغل فينا وقال لينا : أصلو ما بموت ليكم شوفوا ليكم شغله تانيه ، أصر دكين أبيت معاهو ، ومضيفي ينتظر اتصال ، مشيت مع دكين وكملنا ونسه حتى شروق الشمس.. اليوم الثاني مشينا لسني في البيت سريع ومن بيته تم الإنتقال مع مضيفي وبالليل رجعت مسقط. ذاكرتك محتاجه شغل يا عزيز.
Post: #19 Title: Re: أدركوا صديقي ود المرتضى قبل أن (يودّر و يو� Author: بدر الدين الأمير Date: 07-18-2021, 11:10 AM Parent: #18
محمد ياود المرتضى حامد انا ذاكرتى نضيفة بس قبل مجيئك للدوحة اتصلت بزميل لك فى المهنة وموجود معك فى مسقط ادانى المختصر المفيد وقال لى الزول دا مابقرطع من لحظتها قنعت من خيرا فيك وبقيت من بعيد لبعيد ورى العين
Post: #20 Title: Re: أدركوا صديقي ود المرتضى قبل أن (يودّر و يو� Author: محمد المرتضى حامد Date: 07-18-2021, 12:40 PM Parent: #19
Quote: قال لى الزول دا مابقرطع
يرتشف ياخ.. نحن ناس خمرة هواك يا مي صافيه وجليه.. لكن أعراضا الإنسحابيه أخير منها هانقوفر السلاف.. الزياره الجايه يا عمده، معاك حتى الشربوت بس خلي الهيدروميتر قريب.
Post: #21 Title: Re: أدركوا صديقي ود المرتضى قبل أن (يودّر و يو� Author: Yasir Elsharif Date: 07-18-2021, 01:38 PM Parent: #20
سلام يا يحيى والتحية للكاتب المتفرد محمد المرتضى مع الشكر
والسلام لزوار البوست صناع الفرح
بعد إكمال القراءة وجدتني أردد "يا حنوني وعليك بزيد في جنوني" ..
ياحنوني وعليك بزيد في جنوني الليله حبيب منعت وصالك ضيعت كل ظنوني حجبت عني خيالك وكيف رضيت بجنوني من يوم عشقت دلالك جيوش هواك اضنوني تزيد علي في دلالك وازيد عليك في فنوني من نورك المتوقد يا الاخضر الليموني سحبت موية بصري وعميت علي عيوني
فيلم عرس الزين لمن لم يشاهده وبرضو محمد السني دفع الله مشارك في التمثيل له التحية من هنا:
Post: #22 Title: Re: أدركوا صديقي ود المرتضى قبل أن (يودّر و يو� Author: عبدالمنعم الطيب حسن Date: 07-18-2021, 05:48 PM Parent: #21
محمد المرتضى دا علقيتو ما عقلية سوداني هههههههه
.... هكذا علق صاحبي البحب الخواجات عقب سماعه لخطاب مسجل في شريط للمرحوم نقد وما ان انتهى من سماع التسجيل حتى التفت اليّ قائلا: نقد دا عقليتو ما عقلية سوداني..
Post: #23 Title: Re: أدركوا صديقي ود المرتضى قبل أن (يودّر و يو� Author: محمد المرتضى حامد Date: 07-18-2021, 06:38 PM Parent: #22
الأحباب د. ياسر الشريف وعبدالمنعم الطيب.. كل سنه وانتو سعداء ودام عليكم الهنا والسرور.. يا منعم، عندنا حجر ومنع تجول يبدأ من الساعه ٥ مساء وحتى ٤ صباح اليوم التالي، ودي هينه ، سيكون هنالك حظر شامل كامل أيام العيد اللربعه ، من باكر الساعه ٥ عصرا مافي زول يتاوق في الشارع وحتى صباح السبت.. غايتو موعود بباغة شربوت ..