Quote: هههههههههههه شاعرنا الجميل أبو ذر أنور دفع الله دا كان بيكتب معانا هنا زكان بإسم أنوركينج.
سلام حافظ ..
انور كنج قصته تانية خاااالس .. :) كان داير يبقى رئيس جمهورية و جيتو قطعتوها ليو في راسو .. :)
تحياتي ابا ذر ..
انور عبد الرحمن زول فنان و مرهف ..
Post: #5 Title: Re: عقد الجلاد Author: يحي قباني Date: 06-14-2021, 00:00 AM Parent: #4
هاك يا ابا ذر اتنين من قناتي :
يا شبيه البدرِ- عقد الجلاد و الشاعر العباسي أبوبكر الخالدي
بين الخليفه و أمونة بت حاج احمد عقد الجلاد و القدال :
Post: #6 Title: Re: عقد الجلاد Author: Ahmed Yassin Date: 06-14-2021, 02:00 AM Parent: #5
حبيبنا انور عبدالرحمن علي المهل من نواحي "شكيرة" الى شينخوا.. نواحي المحكمة الجنائية بالاراضي المنخفضة تعرف يا ابوذر.. ان كلامك دا حقيقي ..وييثبته اداء الاسماء الذكرتهم ل( امونة ) ذلك الاداء السحري الذي لم ولن يتكرر خاصة صوت منال بدرالدين ( سوبرانو) وهي تردد : انت في خوفك تكاتل رفة الطير والحفيف انت فى شوفك تخاتل عينة الجلب الخريف انت فى اللالوبة مصلبة البنيات النسيمات الهفيف انت فى اللالوبة مشنقة الوليدات ناس نجومى محبس النفس الرهيف.
Post: #7 Title: Re: عقد الجلاد Author: أبوذر بابكر Date: 06-14-2021, 04:41 AM Parent: #3
تحياتي يا حافظ
صاح كلامك فعلا
تشابهت علينا الانوار
أنور عبد الرحمن فعلا صديقنا هنا في سودانيزاونلاين
بكتب باسم أنور ابو غيداء
معليش ل اللخبطة
Post: #8 Title: Re: عقد الجلاد Author: أبوذر بابكر Date: 06-14-2021, 04:45 AM Parent: #2
يا سلامين وتلاتة عليك انت يا ابو حميد
هنا الأصالة والإبداع الحقيقي
اكيد ما بنغمط الحضور الجميل ل حبيبنا حمزة سليمان الزول المبدع الحقيقي
وبرضو عمر بانقا
بس ما استمرو كتير طبعا مع المجموعة
وانا قصدت الفورم والحضور الانطبع بالاستمرارية في دواخل الناس
Post: #9 Title: Re: عقد الجلاد Author: أبوذر بابكر Date: 06-14-2021, 04:47 AM Parent: #1
معليش يا حبان
اسف والله واعتذر ل حبيبنا أنور علي خلط الأسماء
اظن أنور حاليا في هولندا
تحية ومحبة تصلك يا أبا الغيداء
Post: #10 Title: Re: عقد الجلاد Author: أحمد محمد عمر Date: 06-14-2021, 06:44 AM Parent: #9
حمزة سليمان ملحن وموزع لا يشق له غبار صوت الاستحالة ، بطن الحوت ، فارس الحوبة، شين ودشن، صرخة، ود باب السنط، وغيرها من الأعمال الخالدة لكن كفنان مؤدي يستلم مكان عوض الله أكيد تعبان عمر بانقا ممكن أخته في مقارنة مع مجاهد عمر لكن المسافة بينه وبين البقية بما فيهم شمت بعيدة شديد رغم كثرة الأدوار الكان بياخدها شريف شرحبيل مواطن صالح
الرسالة التانية من عقد الجلاد برغم غزارة انتاجها وثباتها لفترة زمنية أكتر من غيرها إلا إنها افتقدت للصوت النسائي والنكهة الحلوة بتاعة بساطة موسيقى العقد واعتمادها على الملكات الصوتية لأفرادها أكتر من الآلات
كل الرسائل التالية للفرقة من زمن الخير وشبكة ولحدي الما بنعرف فيهم زول هسة ديل مجرد محاولات لإبقاء الفرقة حية داخل غرفة العناية المكثفة بانتظار إعلان موتها السريري
__________ أكيد طبعاً دي آراء شخصية وما ظنيت الغناء بخضع لي استاندرد معين وعادي البشوفه قاعد ساي ممكن غيري يشوفه أبو الفن
Post: #11 Title: Re: عقد الجلاد Author: Abdullah Idrees Date: 06-14-2021, 10:10 AM Parent: #10
اعتقد عقد الجلاد فقدت انور و عوض الله اكتر من اي حاجة لكن كسبو شريف شرحبيل انور وعوض الله ، مع اختلاف الاصوات ، الاداء الصولو بتاعهم عالي جدا ، عكس عمر بانقا و حمزه سليمان . شريف ممتاز جدا في اداء الايقاعات السريعة عكس انور و عوض الله . منال صوتا جميل جدا لكن اعتقد ممكن تغني افضل ، احيانا بحس بيها ما بتبذل مجهود كفاية ما بتجود الاداء ، الاداء بتاعا انسيابي زيادة .
Post: #15 Title: Re: عقد الجلاد Author: Ahmed Yassin Date: 06-14-2021, 03:00 PM Parent: #11
عثمان النو او العازف المغني .. باص جيتار ولحن تقريباً(95%) من اعمال عقدالجلاد .. طبعا هو زول فنان مافي شك وليهو الدور الابرز في نجاح الفرقة او المجموعة طبعا هناك 2أورغن وباص جيتار وعود وايقاع .. وفي وصلات بتموها (تررررا ترترررا ) ( تورررورورورو) و(تيتتاارارار) (بببببا )وواضحة سيطرة عثمان النو على مقاليد الفرقة والدور البقوم بيهو خلفها هو تقريبا كأنه يقف امام الفرقة. من تجلياته توزيع عجيب لمدحة (المبشرات النبوية) للشيخ حياتي لفرقة السمندل. وروعة (مسدار أبو السر لليانكي) للقدال ربنا يشفيه و(الطمبارة والغناي) و (أمونة) و(البحر) و(عذرا حبيبي) لفاروق جويدة و(عيناك لي سقيا). ومع هذا النجاح .. كان هناك فشل غريب لعثمان النو مع محمود عبدالعزيز في البوم (مرت الايام)وفيه اغنيات مثل(صدقني ما بقدر اعيد) و(الشوق والريد) و(جاني طيفو طائف) صراحة كان أداء محمود في الالبوم اقل من المتوسط بكثير
توليفة الأصوات كانت عامل مهم في سبك وخلق أداء المجموعة الاصلية وتوفر ليهم كل الطبقات المطلوبة من تينور وباص وسوبرانو بالصوت النسائي عند منال بدر الدين عشان كده كان متاح ليهم يوظفو كل الأصوات ودا شي برضو بدي الملحن براح جيد جدا لصياغة ووضع اللحن
حمزة سليمان انسان فنان حد ثمالة الإبداع هو وعمر بانقا حرمنا منهم البعاد والغربة وقطع شك الغربة عن البلد مهما كانت بتخنق العطاء والابداع
حسب قناعتي الشخصية انه الغناء والتطريب الأساس فيه الصوت الجميل والطروب بعد كدا بجي احساس المغني وروحه وبنتكامل اللوحة طبعا لو بقت فيها دراسة وفهم اكاديمي
سعدنا والله وكنا محظوظين، انا وثلة من الصحاب الطيبين اننا عشنا وعايشنا بدايات تفتح ورود الإبداع عند عثمان النو، الاستطالت لاحقا وبقت دوحة وريفة اسمها عقد الجلاد
وعند الفاتح حسين، البقت السمندل السمندل أجمل الشموس السطعت وضوت في الوطن والناس
في المرحلة الثانوية، ونحن في أولى وكل المجموعة دي في تالتة كنا نحن نباريهم زي الحيران المجاذيب، ضمتنا جمعية الثقافة والفنون في المدرسة، برعاية استاذنا عبد الله عبيد، والفنان الجميل، سعادة الصول محمد قسم الله مليجي، ابو الملاليج المبدعين كلهم، فايز وعصام وشريف وحاتم وبقية إخوانهم
مليجي الكبير فيولينست بارع واستاذ موسيقى مجيد
كنا نحن، شلة الصحاب، بدر ابو العاص ومحمد حسين كسلا وعادل القوس وعبد الحي الشفيع
نمش في الامسيات عشان نكون حضور في بروفات فرقة "الفرندز"
ودي اول فرقة ضمت عثمان النو والفاتح حسين وفايز مليجي وكان معاهم عازف جيتار اسمه وداعة
وفي السنة البعدها انتظم العقد الفريد في معهد الموسيقى
في مرحلة المعهد ومع بدايات فكرة مشروع موسيقي فني يكون مؤسس على العلم الأكاديمي صحبة الموهبة ظهرت ميول الفاتح ومجموعة صغيرة ورغبتهم في تكوين مجموعة موسيقية تعنى بالموسيقى البحتة والفكرة انطلقت من مبدأ عدم وجود اوركسترا قائمة في المقام الأول على أداء موسيقى بحتة، ومن ناحية تانية برضو، تأكيد الانحياز للموسيقى كفن إبداعي قائم بذاته بعيدا عن الأداء الصوتي الغنائي
وكانت السمندل
في الجهة التانية كانت رؤية عثمان النو تتمحور في تأسيس مجموعة مؤدية مع التركيز علي الانتقائية في اختيار النصوص بنوعية معينة من أجل توصيل رسائل متنوعة الموضوع من خلال النصوص
المجموعتين بالتاكيد قامت على رؤى جميلة وواعية، والمجموعتين حققو غاية القصد والمراد
كل المحبة للسمندل وعقد الجلاد
وشكرا لكل من ساهم في خلق الجمال وتشييد الوعي السمعي فينا