اقرب موعد لتجديد جوازك في السفارة بالرياض 4 شهور

07:39 PM May, 26 2021

سودانيز اون لاين
Gafar Bashir-Saudi Arabia
مكتبتى
رابط مختصر

لو ما مصدق جرب تحجز موعد
موقع السفارة

جربت أمس فعلاً أقرب مواعيد نهاية سبتمبر .... !!!!!!!!!!!!!!!!!!!!1

الله المستعان
ما تعرف تلقاها من كورونا ولا من حكومة الثورة

جربت جدة برضو أقرب موعد 19 سبتمبر
شكلو في حاجة

حتى التسليم في الورقة عند التصوير يكتب لك
الاستلام بعد ٣٠ يوم وفي موقعهم تاكد من جاهزية
الجواز للاستلام بعد ٦ اسابيع
والسفارة زحمة وغير مهئيا والموظفين كانهم زعلانين
من المراجعين والعشوائية سيدة الموقف مع تقدم
التكنولوجيا ولازم يصوروك ويبصموك في كل زيارة
تجديد وكان سيرفراتهم تمسح البيانات بعد اتمام اخر
مراجعة ليك

الحبيب جعفر تحياتي
المنصورة وزيرة الخارجية تعتذر
ولكن هل الاعتذار يكون مقبول من الجوازات في السعودية
ما قصرت ولكن لا جدوى لذلك
اهم شيء الجواز خارج الوطن .. بدون جواز لا تسوى شيء

Quote: بدت وزيرة الخارجية د. مريم الصادق، أسفها على تضرر السودانيين المقيمين بالسعودية من تأخر استخراج أوراقهم الثبوتية بقنصلية جدة، موضحة أن ذلك يعود إلى عمليات الصيانة ونقل المعلومات في المخدم الرئيسي لشبكة الجوازات والرقم الوطني في السودان التي تقوم بها وزارة الداخلية. وقالت الوزيرة في منشور لها اليوم اطلعت عليه (السوداني)، ظليتُ اتابع طيلة الفترة السابقة شكوى المواطنين السودانين بالخارج، والعمل على تحسين أوضاع السفارات والقنصليات منذ ان توليت حزمة وزارة الخارجية. وفي هذا الإطار إطّلعتُ على رسالاتكم حول معوقات تصاحب اجراءات الاوراق الثبوتية بالقنصلية العامة للسودان في جدة. وأضافت: على الفور تمت اتصالات بين وكيل الوزارة وبين قنصليتنا في جدة التي أوضحت ان ذلك حدث بسبب عمليات الصيانة ونقل المعلومات في المخدم الرئيسي لشبكة الجوازات والرقم الوطني في السودان التي تقوم بها وزارة الداخلية، مما اوقف خدمة استخراج الجوازات والرقم الوطني في كل بعثاتنا بالخارج التي يوجد بها مكاتب جوازات، وقد أصدرت القنصلية بيان بذلك عممته على الجاليات في المنطقة الغربية ووضعته في موقعها الإلكتروني. كما أنها ارسلت رسائل نصية للمواطنين الكرام الذين لديهم حجوزات مسبقة عبر آلية الحجز الإلكتروني خلال الأيام التي انقطعت فيها شبكة الخدمة من مصدرها في الخرطوم، اخطرتهم فيها بعدم تكبد مشاق الحضور حتى تصلهم رسالة نصية جديدة بإعادة جدولة مواعيدهم بالقنصلية بعد عودة شبكة المعلومات للعمل. وعبرت “مريم” عن أسف الوزارة لما حدث واعتذارها لكل من تضرر، واعدة ببذل جهد متزايد حتى تتم اجراءات الاوراق الثبوتية بسهولة ويسر وزمن ملائم.

Quote: بسبب عمليات الصيانة ونقل المعلومات في المخدم الرئيسي لشبكة الجوازات والرقم الوطني

الحمد لله الما فرطنا في قنابيرنا بعد الثورة
الواحد شوية كدة وكان مع الانفعال الثوري داك كان ممكن يجدعهم
لو تعلمون ما لقنابيرنا من فائدة لجالدتمونا عليها بالسيوف

انتوا مغتربين غبيرة إندمسوا قالوا ليكم الشبكة واقعة ولا طاشة هسي أبوحسين ده كان متلقي حجج تلقاه جوازه صالح لي سنة ٢٠٣٠

تخيلوا أن الزملاء اليمنيين بالرغم من ظروفهم الكربة يستلمون الجواز في خلال أربعة ايام فقط .

كنت أعتقد أنهم يطبعون الجوازات هنا في الرياض ولكن الدهشة أنها تطبع في صنعاء .

=================================================

حقيقة لمست جهود كبيرة لموظفي السفارة هنا في الرياض بالرغم من الازدحام الشديدة
والطلبات الكثيرة ، ومسألة التأخير ليست من السفارة ، المشكلة في المطبعة التي تطبع
لكل ولايات السودان ويبدو أن كفاءتها متدنية ....

Quote: انتوا مغتربين غبيرة إندمسوا

أخير نحن
انتو الشافع بتاعكم ساقوهو بالإسعاف من العناية المكثفة للسفارة عشان يصوروهو
قالوا الشبكة ما بتشتغل في المستشفى



__________
وبعد دة تهبش ليك واحد من المسؤولين عن أنظمة البلد يشبكوك استهداف العلماء الأفادوا البلد وبتاع
أهو دي فوائدهم بنعيشها كل يوم

Quote: انتوا مغتربين غبيرة إندمسوا قالوا ليكم الشبكة واقعة ولا طاشة هسي أبوحسين ده كان متلقي حجج تلقاه جوازه صالح لي سنة ٢٠٣٠

اختاني احسن ليك ....

التحية للاحباب
هل يعلم هؤلاء أن جواز السفر مرتبط بكل تحركات حتى اصغر افراد العائلة
والأهم تجديد الاقامة
تأخير تجديد الاقامة مشكلة كبيرة
لا بد من شئون المغتربين أن وضح للداخلية والخارجية
في الوطن عن ما يترتب على عدم تجديد الاقامة
وتجديد مرتبط بصلاحية جواز السفر

الكلام ده فيه تدمير لمستقبل العائلات ( طلبة وطالبات الجامعات )
الاجازات .. ماذا يفعل شخص لديه عزيز متوفي أو مريض في حالة خطر
يريد أن يسافر ..

الحبيب مكين شئون المغتربين ( ارجوك رجاء خاص عمل تنوير للداخلية والخارجية عن اهمية جواز السفر)

تحياتي الاحباب

قبل يومين قرأت لواحد كاتب منشور في الفيس
بيتهم فيه موظفي القنصلية بانهم شغالين ( تحت الطربيزة)
وقال بوضوح ان الإجراءات لاتحتاج لموعد، وكل المطلوب هو دفع ٢٠٠ ريال لواحد متوفر بالخارج
ليسمح لك بالدخول للقنصلية وإكمال إجراءاتك
وان صح هذا الزعم أو لم يصح ..
وعن تجربة .. فإن قنصلية جدة كانت وما زالت من اوسخ أجهزة الدولة السودانية
وتحتاج لنظافة من فوق لتحت حتى تصبح أداة لخدمة المواطن لا اذلاله ..
ويقيني لو اشتغل فيها خمسة موظفين بجد وإخلاص ووطنيه، لما شكى منها مواطن قط.

عادي مشكلة نقل المعلومات للسيرفر
لان اخر عهدي بناس الرقم الوطني كانوا
ينقلوا البيانات معاهم على اجهزة المحمول
نهاية كل يوم لمباني الداخلية وهذا قبل
ما يقرب من عشرة سنوات، ولا اظن ان
تغيير قد حدث وما زالوا ينقلون البيانات
يدويا لمعالجتها.
يا ترى هل الوضع هكذا الى يومنا هذا

البيانات البنقلوها في 4 شهور دي محتاجة توضيح وشفافية
أول حاجة في كم عتالي شغالين؟ والعتالي الواحد بشيل كم قيقا في اليوم
وهل تم طرح الموضوع في عطاء توريد عتالة؟ ولا تم تحت التربيزة!
حددوا الأربعة شهور دي كيف؟ ضامنين مافي عتالي حتجيه ملاريا خلال الفترة دي؟!
هل في ناس بشيكوا على البضاعة قبل ما تدخل المخزن أقصد السيرفر الجديد؟
موش في احتمال عتالي يقع منه قيقا في الطريق تقوم تتكسر فيه حاجة ينفضوا ويشيلوا يوصلوا زي السليم!

المشكلة سببها الأساسي هو قصر فترة صلاحية الجواز ..
كلو شغل همبتة واحتيال .. زمان كان فترة صلاحية الجواز سنتين .. عشان تراجع الجوازات اجباري وتدفع الضرائب ورسوم قناة السودان ..
ضيق أفق بصورة عجيبة خلاص ..
بالله تجدد بهنا وتدخل ليك في كم مشكلة تلقى الجواز منتهي ..
شنو البمنع انه تكون فترة الصلاحية ١٠ سنوات وليه التجديد في المملكة ب ٥٠٠ ريال وفي السودان بما يعادل ٣٠ ريال ..
.
.
.
ياخ السودان دا مفروض يتشمع بالاحمر لا داخل ولا مارق ..

بخنكم يا ناس السعودية
نحنا خياراتنا مع السفارة معدومة
مرة يوعدوا وألف يخلفوا
الوفود حتجي لكن الميزانية
الكورونا
الوفد في سفارة اليونان وما عارف وين


وحاليا اخر كلام للسفارة ادتنا نصيحة ننزل السودان
الفين يورو تذاكر لتجديد جواز ومعاملة ما بتكلف مية يورو لجميع افراد الاسرة.
يا داك ويا نخش في غرامات ومشاكل
ما عندنا غير نشتكي لي ربنا ونسألوا يقسم لينا بحاكم عاقل ويسمع مقترح قسم الفضيل


تحياتي