عمر التاج زعلان وحردان وطلق المنبر بسبب مخاشنة القحاته

05:11 AM May, 25 2021

سودانيز اون لاين
زهير عثمان حمد-السودان الخرطوم
مكتبتى
رابط مختصر

والله بالجد عمر التاج زعلان شديد وغضبان منا وخاصة ودالامير وقبه
ومنكم كمان ومن كل ال قحت وشركاءهم
ليه كدا انه صاحب راي وشاغل في المنظومةالاعلامية ضد قحت
ومصارع نزيه بيننا وعندو اللعبة الحلوة والانتقاد الغير معقول والمعقول
الحرية لنا ولسوانا
ارجع يا رجل واترك الزعل ديل هم كدا وانت عارف ارجع وخلي حركات القلوب الرقيقة والمعلقة بالمباديء الانكشارية

وانت مش حتنتشروا أسمع ما تطلق بس أحرد أسبوع أمشي بيتكم وبنردك مني ليك بوست ( أبوالزوز مردود في مسمها) يا كافي البلا حردت من عريبي RBG رجعت تاني يوم إنطبق عليك المثل سجم الطلقوها وكايسة الرجوع . 😂 ما تزعل وكان زعلت ما تزعل شديد

سلام عليكم
همر التاج من الاقلام اللى واحد بدخل بوستاتها ويقرا ليها ضمن قليل من الشخصيات فى المنبر وممن يعطى قيمه نوعيه للمنبر
اما مجموعه شكرا حمدوك فهم بعيد عن واقع الحدث السياسى على الارض وزى ديك المسلميه وبصلتهم ( الهبوط الناعم واشياء اخرى) بيحمروا فيها

قطر عجيب

Quote: ليه كدا انه صاحب راي وشاغل في المنظومةالاعلامية ضد قحت

قلت لي ..ليك وحشة والله يا ابوالزوز..

Quote: وخلي حركات القلوب الرقيقة والمعلقة بالمباديء الانكشارية

أول ما خطر ببالي وانا بقرأ الرقة مع المعلقة والانكشارية في سطر واحد هي الشعيرية..
وتحديداً في كورية ...


المهم هو مشى متين ! زي الشفتو قبل شوية ؛)

انت يا حيدر الزين يا بوعمه خلي عمر التاج في حالو
شعيريه لا زبادي في كرويه
بس ارفع اياديكم الغير رحيمه عنه
وسوف يعود
ضد جيش الاحمر والبرتقالي والجندر وناس سيدوا
ظرفاء باريس والدوحة ومنتريال وباقي العواصم الجميلة
ايها الصديق ارجع و احرق دمهم وارفع راية البتاع حقكم داك
وقول يراق منها الدم ولا حاجة كدا ماعارف هي شنو

لا ياخ عمر التاج و اي زميل ما في سبب يخليه يحرد البورد عشان مخشنة الآخرين له، البورد ما حق زول، و الناس حقوقها متساوية فيه، البخاشنك عندك خيارين يا تتجاهله وتحتسب أو تكيل ليه من نفس بضاعته و انتهينا لكن تسيب ليه البورد!! لا لا ما بتبقى.

والله ودو ده لو الواحد لقى فيه طريقة مخاشنة ما بياباها

فوت اوفر العشر الاواخر كان احتسبتك، لكن اسي الله اعلم
ولا ارجى عشر ذي الحجة😀

ما اظن عمر يزعل من الراي المخالفو.
يكون مشغول بس.
لكن من الواضح انو زول رأيو واضح وبينتقد بي فهم.

#شكرآ عمروك.

يا عمر التاج ارجع عشان خاطرنا ترجع

عمر دة شافع صغير ولا قاصر عشان تقعدوا ترسلوا فيه كدة
عمر ارجع عمر فوت عمر تعال
أصصصصلك يا عمر ما تسمع كلامهم
انت كمان بمشوك الرجال؟!!
تعمل تغيير باسويرد وتغمض وتدوس حروف عشوائية في الكيبورد وتضغط انتر
دة اسمه انتحار الباسويرد
لكن بيني وبينك زول فارس زيك كدي بفتح بوست عديييييل كدة اسمه (يا بكري امسك يوزرك عليك) هيييععع آ الجعلي
أيوة أجدع ليه الباسويرد في العلن كدة وليك علي أنا أول واحد أدخل أثني على طلبك بسحب العضوية

يا احمد مالك بتولع النيران وشغل المديده الحاره
عمر اختفى بصمة خشمو
فى ناس الواحد لما يتعصر ويحرد يجى يعمل بوست حرد عشان الناس تحنسو وحصلت كم مره
فقدو زهير ودى حاجه حميده انك تفقد زول نشط فى المنبر
حتى لو خالفك اخلاق الفرسان والروح الرياضيه تفرض انو الناس تفقدو وتسال عنو
ياريت يكون حردان ومايكون عيان ولاحاجه على الاقل الحرد بيبرد لكن كورونا الحايمه تخلينا نقلق ونفقد الناس

عمر عليـك الله ترجع .. على الأقل اجبر بخاطر زهير واحمد محمد عمر 2010 و2013 ..




يا ابوالزوز وانت لكن وضعك كيف ؟!

يا حيدرا الأيام دي أختى أبوالزوز قبيل شفت ليه مداخلة حفظ الله ورعاك الله والله كان لى مخفوق الأرز يزوروا فيه عديل والله يكشحك بي فاتحة ولا يخبتك بي سبحة إلا يزوزو بيك أكعب من شيخ جقود

يا منتصر سبحة شنو وممارسة الجاهلية الاولي انا بس الصباح كنت فاطر وقاعد كويس في الشغل يعني الزول ما يكون واعي ابدا
والله انتو بتظلم الانسانيين الزينا كدا وبعدين دا ما كويس في حقي حسي متقدم لعروس تخرب علي والله جد وتعمل سمعه والبت من جيل الفيس بوك والحركات العصرية دي مالك علي
يامنتصر انا بالجد زول طيبان وكويس ياهو السم دا بكون مجنون وميت المشاعر احيانا
الجماعة ما زعلانين مني خلاص تعايسوا مع عمايلي
الي اللقاء

Quote: انا بالجد زول طيبان وكويس ياهو السم

وأنا أشهد على الحقيقة دي حسب
تحليلي لشخصيتك طيبان وبسيط وعلى نياتك
لكن بس (السم) دا هريتنا بيهو
هري .. كلامك كتير خخخخخخخ
...................
عمر التاج أنت مشيت بالجد واللا شنو ؟

انت يا طلحة عندك شنو هنا مالك في عمر التاج ما برجع ما برد عليك
امشي نوم عليك الله خلاص

Quote: انت يا طلحة عندك شنو هنا مالك في عمر التاج ما برجع ما برد عليك امشي نوم عليك الله خلاص

سمح

عاطر التحايا لجميع الزملاء والزميلات..
وتحية أرق وأجمل للرجل الاصيل الجميل أبو الزوز
ووالله وتالله لو لم نجد من هذا المنبر غير نقاء وحسن تعامل أمثال زهير لاكتفينا
رجل لم ألتق به من قبل ولم اتواصل معه لا هاتفيا ولا واتساب ولا فيسبوك ولم يجمعني به غير هذا المنبر
ولا يجمعني معه حتى حزب أو توجه فكري معين .. ولكن أشهد الله من خلال ما اقرا له انه رجل أصيل
ولمجرد ذكره لي خلال هذا البوست اشعر بالفخر والاعزاز..
غير اني أود تصحيح معلومة بسيطة ..
انا مازعلان ولا حردان ، ولا عندي مشكلة مع مخاشنة أي زميل في المنبر ..
وبعتبر المخاشنة والاستفزاز والاستهداف الشخصي والفكري ضريبة الكتابة في اي منبر..
ولا تزيدني غير اصرار للسير في طريقي الذي اخترته منذ طفولتي واعلم انه ملئ بالأشواك ،
غير اني اناقش في المنبر بلا هدف استراتيجي، و اقاتل من غير ضغينة ..
القحاتة وكل أحزاب اليسار ماعندي معاهم اي ضغينة أو حرب ،
هي مجرد آراء ونقد لمواقف سرعان ماتنتهي بإصلاح طريقة حكمهم أو زوال سلطتهم
وأنا على يقين انهم سيقفون في صفي يوما ما، وينتقدون السلطة ومساوئها -قاتلها الله-
وسيجدون ان الخصومة بيننا انتهت تلقائيا من غير أحقاد أو مراجعات شخصية..
تماما كما حدث للكيزان من قبلهم.
وسيجدون ان الهم الذي يجب أن يجمعنا جميعا هو الوطن
وان الضرورة تقتضي ان يسهم الجميع في بنائه، والا فلن يبلغ تمامه أبدا
وان اجتمعت أمريكا وإسرائيل وصندوق النقد على أن ينفعوا السودان..
فلن ينفعوه الا بشئ قد اجتمع عليه الشعب السوداني واقتنع به .

Quote: أمريكا وإسرائيل وصندوق النقد .

والكنغرس الأمريكي
ومزارع العنب
وسكك حديد بلغاريا
والدانوب ..
كلها قد دنا عذابها وإن لاقيتها على ضرابها.
عليك دينك قوم لف .
..................
عمر التاج أرجع مكان كنت لابد ياخ بلا حلقمة معاك.. خخخخ

Quote: قطر عجيب

للحقيقة فأنا أكتب من غير املاءات من أحد أو جهة
ولا استفيد من كتاباتي هنا ، لا ماديا ولا معنويا ، ولا حتى سياسيا
والكتابة لا تخلق لي غير الاعباء والخصومة ..
ويوم ان افكر في تلقي عائدا ماديا أو فكريا او موقعا سياسيا
من جهة ما نتيجة كتاباتي هنا ،
فعندها سأعلن ذلك وافتخر به واعتبره ثمنا لتواجدي هنا
أما وان الكتابة تستنزف الوقت والجهد، فإن الحقيقة واضحة وضوح الشمس
والوضع العام الذي نكتب فيه رسالتنا اصبح مكشوفا للجميع ، الا من به لوثة تحزب تغطي عليه شمس الحقيقية
وعليه ..
فقد أعلنت من قبل نيتي اعتزال المنبر لأسباب شخصية
فتدخل المدعو دينق وكتب نفس الجملة التي اقتبستها من أحدهم فوق ..
وكان ذلك الرد الغبي هو ما دفعني للعودة والكتابة من جديد ..
واليوم يعود صبي دينق ليكتب نفس رد دينق .. ولعله منه وعلى منهاجه حتى يبعثهما الله معا
والمرء يبعث يوم القيامة مع من أحب واتبع
ولعل ذلك الرد يكون دافعا لي للعودة يوما ما ..
لأكتب في هذا المنبر من غير مواربة أو مجاملة
وتكون بوستاتي صاعقة فوق راس كل من لم يرعو
وليسموني كوزا أو شيطانا أو جنا احمر ..
المهم ان ارد سفه السفهاء بقدر سفاهتهم

..
..
عموما .. لست غاضبا ولست حاردا
ولكنها بعض الظروف الخاصة أو قل الموسمية
وسأكون متابعا من بعد ، اعلق والداخل متى ما وجدت ذلك ممكنا ..
وشكرا مقدما ومؤخرا لكل من كتب خيرا في حقي ..
ثم تبا ..

يعني في النهاية طلعت أنا الرجعتو ليكم هيييييع


__________
غايتو من خلال ردك بتاع املاءات واستفادة مادية وبتاع يبدو لي إنك ما سمعت بالمثل المقتبسو دة قبل كدة

Quote: والكنغرس الأمريكي ومزارع العنب وسكك حديد بلغاريا والدانوب ..

عموما انت ياطلحة من وجهة نظري زول كويس
بس مشكلتك انك متسرع وسطحي ، وافقك محدود جدا لدرجة أنه
ما بيسمح لك باستيعاب ما نكتبه على العموم في مداخلة واحدة
لذلك اعتدت على اقتطاع جزء من كلامي كل مرة وحصر فهمك عليها فقط ومحاولة خلق رد عاجز عليها..
وردك على مداخلتي الفوق خير مثال لذلك..
انا عندما ذكرت أمريكا وإسرائيل وصندوق النقد ، ما كتبتها من جهة نظر اخوانية (دنا عذابها) كما ابتهجت انت
ولكن ذكرتها من باب ان مشكلة الشعب السوداني الان وقبل عشرين سنة، كلها من امريكا
و عبر ربيتها إسرائيل والإمارات التي تدير البلد نحو الهاوية الان ..
والضائقة التي يعيشها الشعب السوداني سببها الاتباع الأعمى لسياسات صندوق النقد الدولي،
والحوامة بالقرعة بين دول العالم
ولو التفتت الحكومة للشعب وموارد البلد لمدة ستة أشهر فقط
وعملت على دعم مصادر الانتاج و بناء مؤسسات خدمة ودولة قوية
لما احتاجت لامريكا وإسرائيل، ولا قروض صندوق النقد الدولي ..
وبالله ماتناقشني في الموضوع ده تاني لأنك مابتكون فهمت حاجة،
ولاني مافاضي ارد لك تاني.

Quote: مشكلتك انك متسرع وسطحي ، وافقك محدود جدا

يا النبي يا الرسول!!
نعله الافقه محدود جدا دا تنظير صاحبي!!
لا لا لا انت كمان ما تبالغ يا ود التاح

اخي عمر التاج
لك كل الامتنان علي ردك الراقي علينا وانشالله سوف نلتقي في سواح الدنيا وبينا الاخاء الذي يجمع المسلمين
متعك ربي بالعافية وكن بخير
وخلي العنف بالله
مع صادق ودي

قدر ما الواحد يجي لافي بمنبركم هذا العامر بالورجغة يلقى بوست تحانيس أو وداع لعمر التـاج .. وفي نفس اللحظة تلقى الناكرها قاعد و يكتب ويورجغ ويفند ويبطبط..!

ذكرني المدعو المستنيـر رحمه الله..


ابوالزوز .. عرفناك بتهرف وتغرف الأخبار من طرف أي حلة بلا تمييز.. بقيت كمان تغرف طلاق الناس ساي..
أها ابو نكيــرة جاء ونكر الحردة أيش رأيك؟!

Quote: نعله الافقه محدود جدا دا تنظير صاحبي!! ­

ومال أنت قايل شنو يا جرجرة ؟؟
اتا قايلنا ساهلين واللا ساهلين؟
واللا ساهلين يعنى ؟؟
خخخخخخخخ
كتبت في بوست الشيخ بتاع أولاد حمدوك ردا على سيد البوست عن
صاحبي وزبوني المحبب عمر التاج

Quote: عمر التاج ما عندو أي عيب على المستوى الشخصي زول حبوب بالنسبة لي لكن هنا في البورد متلقي حجج وبتاع لف ودوران و اطلاقات ساي واستتناجات خيالية وفوق دا كلو شغال محاكمة نوايا ولو أنت خالفت رأيو بقول ليك مطبل أو بتاع حمدوك وكمان عندو استدلالات غالبا بتكون ضدو الخ الخ الخ .. يعنى باختصار بطلق الرصاص على رجليهو

فجاء عمروف الكلس ليكتب

Quote: عموما انت ياطلحة من وجهة نظري زول كويس بس مشكلتك انك متسرع وسطحي ، وافقك محدود جدا لدرجة أنه ما بيسمح لك باستيعاب ما نكتبه على العموم في مداخلة واحدة

كونك تقول لي الكلام القلتو ليك سابقا
ما شايف كدا عصرت علي يا عمروف ؟
طيب ياخ جيبو باللفة بما أنو افقك (واسع) ههههههه
بعدين ياخ كلامك أفهمو كيف اذا أنت بتقول:

Quote: نلتقي في الأيام الخوالي ­

و

Quote: في خضم ردي أو تعبيري ­

دا غير الاخطاء الاملائية البتغير معنى الكلمة تماما ؟
بس وريني كلام زي دا أجيب ليهو أفق واسع من وين ؟؟
والله دا إلا يكون أفقي عرض السما والواطة خخخخخ
...................
يا عمروف يا دكتور أنا شايف خليك في الرحاية وعاملني
حسب سطحيتي وبلاش تدخل في الغريق..
عشان ما أجيك ب (أبو رفاس )

ثم ياخ

Quote: ما كتبتها من جهة نظر اخوانية

هسة أنا قلت ليك كتبتها من وجهة نظر جهة أخوانية ؟
واللا نظام الفي قلبو حرقص ؟ خخخخخخ
..................
.يا عمر بصراحة الكتابة عايزا ليها زول (مجيد )
من (مجاميعو) اسمعا من أخوك احسن خخخخخخخخخ

يا عمر التاج يا صاحب
في الحقيقة أنت قلت
( أدخرك للأيام الخوالي)
و( في خضم تعبيري)
و عايز تمدح زكريا قلت ليهو
( أنت في سفوح الجبال )
أها بالله عليك دينك استوعب كلام زي دا كيف ؟؟
ياهو كلامك في الأمتار البتكتبا دي كلها
أجيب للعواسة دي أفق من وين يعنى
عشان تجي تلومني على عدم استيعابي ليها؟؟؟؟
قليل من الرأفة والصبر علينا يا خليل لأنو
استيعاب تعبيراتك دي محتاج من قرنين
لى تلاتة على الاقل.
خخخخخخخخ
...............
أنا حزين يا عمروف ياخ
حزين بجد .. الخ الخ الخ

محمد البشرى مشكلتك التانية انك دائما بتنظر للجزء الفارغ من صاحبك تنظير
انا كتبت عنه في البداية انه زول كويس، وانت ماشفت الا ما بعد الاستثناء !
الحاجة الثالثة انت مصاحب لي ناس طلحة وحيدر والاسموشنو داك ..
ومافضل ليك الا تصاحب سفيه الدوحة ..
اسه شوف صاحبك طلحة ده ماشاف من مداخلتي الثانية غير كلمة أمريكا وإسرائيل..
ومشى طوالي ربطها بكلام الكيزان بتاع أمريكا روسيا قد دنا عذابها ..
ثم يجي ويقول لي انا ما وديت كلامك للاخوان المسلمين .. شفت الزمزغة دي؟
أمريكا وإسرائيل والإمارات انا ما قلت اقيفوا ضدها أو عادوها ،
لكن قلت ما تعلقوا كل امالكم عليها ...
وما معقول كمان رؤساء البلد ال١٤ وثالثهم حمدوك كل يوم في بلد ..
البرهان وحميدتي ما فضل لهم الا يعملوا إقامة في الإمارات
وحمدوك ما فضل له الا يبقى السودان ولاية أمريكية، ووزير ماليتها صندوق النقد..
وهو لو رجل اقتصادي صحيح يفترض يفهم ان روشة البنك الدولي ما ممكن تطبق على بلد كالسودان قبل أن تدعم مصادر الانتاج وترفع متوسط دخل الفرد ..
ما ممكن تطلق الاسعار العالمية على مواطن متوسط دخله اقل من حق وجبة الفول في شهر !
ما ممكن تطبق روشة التحرير بالكامل في بلد تنعدم فيه أدوات الصحة والتعليم واغنياؤه أما حرامية أو سماسرة.
ما ممكن تفرض منتجات بلدك على مواطنك بالسعر العالمي عشان تحقق أرباح تمول بيها حكومتك ..
الكلام ده لا بيصح اقتصاديا ولا سياسيا ولا اخلاقيا..
والدول البتشجعك على الكلام ده ابدا مافي اجندتها انها تساعدك لوجه الله
ولو كانت بتمنح هذه الفروض والقروض والسياسات من أجل رفاهية الشعوب الأخرى..
فإن العالم ملئ بالشعوب الكسيحة والفقيرة التي سبقتنا في سلم التطبيع والانبطاح لصندوق النقد الدولي ..
الأمر ومافيه انه ماحك جلد بلدك غير أبنائه..
وانت الان بسياساتك بتعمل على تشريد أبناء الوطن وتدمير بنياته التحتية
ولكن ضعاف النفوس والافق لايرون من كل هذا المشروع المفضوح غير التطبيل الأعمى والنظرة السلبية للكيزان .
..
..
عزيزي زهير ،
العنف لا يولد الا العنف
والخشونة ليس لنا دواء لها غير الخشونة المضادة
انا لست مسيحا مثلك انظر بشفقة للصعاليق
ولكني ارد لهم الصاع عشرا، ثم ادعو لهم بالهداية

ومشكلتي الاولى شنو؟

عمر التاج
لك التحية و بعظمة الرب يسوع المسيح انا لست مسيحا بينكم ولكنها هي اخلاق اهلنا الطيبين دوما هكذا جبلنا علي الطوية السمحة و الود والادب حتي في الغضب الصارخ و اختلاف الراي الخلاف الحادة عليهم ان يعوا ذلك
وانك حتي لو كنت عنيف معهم لا تخدم غير ثقافة الاختلاف والكراهية
علينا هنا ونحن لا نمثل انفسنا فقط انما نمثل اهلنا وبيوت قامت علي العلم والايمان
ودون ذلك خراب لا يعمر نفس ولا دنيا نعيشها من الاعمار والعبادة وخلافة الله في الارض
واترك طلحة انه في هذه الايام يريد ان يستمتع بوقته حقا او قل قتلا للوقت
وفي نهاية الامر هو اخ لا يغيب عن العين له من الخير فيما اعتقد الكثير ولكن تسوق الدنيا لمرامي بعيدة
جلها سراب وتسلية عسي ربي يجعله من الذكرين الله كثير ويمنحه العافية ولكي يسجال ويصبر
علي نصب السجال والفاظ الطعان وسخف السخفاء
دنيا لا يملكها من يملكها سادتها الفقراء
انت الغني بالعلم والتجارب الانسانية اسفه هذا فارغ الكلام وسقيم الافعال
واكتب ما يعن عليك كما قال الصديق ود الاصيل
ونلتقي في الحوش لعبا وفوضي وفرحا وبهجة ونحرق دم ما يظنون انهم ساداتنا الاكابر وهم في الحقيقة اكثر خواء
من كيس بلاسيتك ماشي مع الهوا
كن بخير عمر بن التاج