هوية مختلطة

01:10 PM May, 10 2021 سودانيز اون لاين
Tagelsir Elmelik-فرجينيا الولايات المتحدة
مكتبتى
رابط مختصر

من النادر جداً، أن تلتقي بأمريكي، يسألك
إنت من وين؟
هذه دولة مهاجرين، وقد يكون هذا الامريكي نفسه، الجيل الثاني لأبوين من اوكرانيا، اومن كا زاخستان.
(بالمناسبة، اكتر الشعوب المغرمة بهذا السؤال الاتراك... ) أول سؤال يبتدرونك به
مملكت اركاداش؟
تقول سودان، طوالي يعمل عارف اااااا سودانستان، أو عراقستان أو اي استان كان.
ومن مزايا الأمريكيون، الموجبة، انهم لا يعلقون علي (الاكسنت)، بالسخرية أو عدمها، مهما غلظ نطقك، ومهما ارتكبت من بهدلة في حق اللغة الانجليزية، ينتظرون في صبر، حتي تفرغ من شرتمة اللغة، نوطايم اظ واظ، وارطباطاطي يا قول الوسيلة ، فيهنئونك في تهذيب شديد
Oh your English is pretty good 😌
وكان ان التقيت ب (تشارلي)، وهو شاب ابيض فارع، يشبه صبحي ( الاسم العربي لشخصية الوطواط السرية)، وعلي غير العادة، سالني وير ار يو فروم، يور انقليش از فانتاستيك!
فقلت سودان
فرد علي ... اووووو ريالات!
فقلت له ببراءة، ودون ان انتبه لمقصده، ده كان زمان، الريال والشلن اب خمسة والطراده والتعريفة والمليم...
ووددت الاسترسال لكي اجد فرقة اشتم بها سنسفيل الكيزان، ولكنه وبرغم صبر الامريكان علي مكاره الوافدين، قاطعني وناولني رقم هاتفه، وابتسم في وجهي ابتسامة عريضة، وقال لي كفايه لغاية هنا، ما تدِش. ثم دعاني للغداء. فاكلت في لهف، السوشي والشي موشي، ثم توادعنا علي امل اللقاء.
تمددت صحوبيتي وتشارلي، حتي اذن لي بالفسحة في (نيبرهودات) البيض، والتي لا يتاح دخولها لملون، الا اذا كان ساعي بريد ولا سواق شاحنة الفيديكس، او اليوبي اس. ثم التقيت بزوجته (غلوريا)، فعطرتني وامطرتني بابتساماتها، واكرموني غاية في الكرم، وقالت لي شيل أختي دي دعاية، حتي تعجبت وفاضت ادمعي.
حتى اتى يوم الفصل، وكنا جلوسا في حديقة منزله، مره مره نقوم نرمي كور باسكت في ( الهوب)، ونضحك مثل طفلين معاً، وعدونا .... الي اخر اغنية الست.
ثم انه طلب مني ان ندخل الي غرفة مكتبه في البيت، فدخلت، ويالها من غرفة مكتب، بها كرسي مثل كرسي ( ابنعوف)، الذي تولي حكم السودان لمدة ساع الا ربع، فيا حليلو، يستفيد منها باذن الله في السي ڤي، لقدام، إنشا الله وزير أشغال في بوركينا فاسو.
اجلس، فجلست. تمنظرت فرأيت فوق الحوائط، صور مبروزة باناقة، لطائرات هليكوبتر، من كل الانواع والموديلات والصناعات، اجاب علي حيرتي، طبعا ياتاج الملوك، انا ولعلك لاتعلم ، ميكانيكي هليكوبترات، متقاعد، ثم سرد لي، وانا اتململ، واكاد اتميز من انعدام الصبر، سيرته الذاتية، وسيرة الاباتشي والكوماتسي، فلما عيل صبري (تعاطيت).
المهم
تنهد ونظر الي في رجـــــــــــــــــــــــــــــــــــــاء وتوسل.. شوف ياملك، اليومين دي، قاعدة الظهران الجوية، عايزين ميكانيكية هليكوبترات...
اتسعت حدقة عيني، فسالت في دهشة:
وانا علاقتي شنو بالموضوع ده؟
اجابني وهو يهرش راسه في حيرة:
انت مش سعودي؟
سعودي وين، انا بني كجة من السودان؟
لا ياخ امال شنو اسمك كراون وكينغ وسووودي؟
لا ياخ ما سوودي،سوداااااني وخليك سوداني!
يعني إنت ما من خميس مشيط؟؟
لا والله سامع بيها سمع
.....
طلع طبنجة من الدرج وقال، والشرر يطاير من عينيه
قوووم علي حيلك تباً لك
اطلع بره من بيتي ده
قمت جاري جري و( غلوريا) بوراي
الرسول تقعد القراصة حاااارة مرقت!

تشارلي وصولي منافق من سلالة إبن العلقمي
............
سلام يا أريب

يا شاب يا طلحة
طلع كوز

سلام أستاذ تاج السر
كنت متوقعة مداخلة إضافية تورينا فيها
كيف صحيت من النومة على جرس الهاتف
لكن كويس عرفنا إنه الوصولية والإنتهازية ما عندها بلد
زمان الشيخ فرح ودتكتوك قال كل يا كمي قبل فمي

مرحبا صباح

ههههه لا مافي منبه، الواقع اشد غرابة من الاحلام.
شكرا على المتابعة والتعليق هههه
تاج السر

أخونا الفنان الكبير التاج
سلامات
اهلنا الامريكان المهتمين بالكتابة في نورث كارولاينا عينة كتابتك دي
بوصفوها بالشفتنة في الكتابة .
كونك ( بسم الله ) تطفر من العنقريب نص الليل بعد عراك مع ابوالكباس
في حلبة Seminary Rd
في فرجينيا . وتنكر انك ما من سكان شارع بهلول في خميس مشيط .
والشغلة تجيبلها طبنجات وجكة .
دي عين الشفتنة.
ودي عين الخروج عن مسارح الكتابة القديمة .
انت زول صاحب حركة متمردة . بس ما مكوش ليك على
جبل دهب عيار 999 . هههههههه
...
يشهد الله مشتاقين.

عان جاي .
منتظرنك تجي تسويلك ليلية نضم في مركز عبدالكريم ميرغني.
وتاني يوم نسيرك تزور ضريح الطيب صالح وحميد و وردي وعلي المساح
في مدني ومدرسة كاب الجداد .

هل معنى ذلك أنك في السودان؟
كدي تعال بهناك ورينا الحاصل

أولا بالتبادي إنت لابد وين؟
ورمضان كريم واتمناك بخير مع الكوفيد الحايم ده.

تاج السر المليك

سلام و رمضان كريم

كتابه حلوه و كده نقول المنبر كسب قصاص مع رهط قصاصي المنبر

عندك باصات بينيه غايه في الروعه

ما تنقطع كتر من زياراتك


الزبير الختمي

شكرا أخي الزبير على كلماتك الطيبات
وأنا في المنبر من العام 2004 ... في الحدود دي
https://sudaneseonline.com/board/244.html
إستمتع يا صديقي الختمي، ههه كلنا عيال ختمية
تحياتي

الاخ تاج السر

اسف جدا و الله

ياخي لم نستمتع بكتاباتك الحلوه ده علي الرغم من انني مصاقر المنبر ده من 2009 م

تشرفنا بالمعرفة و حباب الختمية محل ما اقبلوا القوها خدره .

تشكر حبيبنا محمد عثمان تاج السر ، رزق السيد محمد سرالختم بابن ولد و اتصل علي والده السيد محمد عثمان الختم و قال ليه جانا ولد و سميناه عليك السيد محمد عثمان فكان رده و كنيناه ب تاج السر .

السيد تاج السر محمد عثمان ضريحه في مدينة سواكن ، اها عند زيارتك السودان طالبنك زيارة سواكن و ما تنسانا من البياض .

الزبير الختمي

هههههههههههه
لا حرج يا صديقي
لكن البياض عليكم انتو أنا سري باتع

يا تاجو أنا لي فترة بفتش في مكتبتك عن
عن قصة نغمة راجل المرة في صلاة الجمعة
انطلقت نغمة الموبايل تشق السكون المطبق راجل المرة حلو حلا
الخ الخ الخ
أو الجلابية بيضا ومكوية
المهم نغمة موبايل في صلاة الجمعة
العنوان شنو في المكتبة ؟؟

راجل المرا في صلاة الجمعة


انا اقوم ارسل ليك كتاب الأحمسة بي دي اف

الله يكرمك يا تاجو
المكتبة ما فيها محتويات كتاب الاحمسة ؟

ماعارف والله بكري ده بمزاجو

تاج السر
وين يادفعة
كتاباتك تاسرني دوما
لي كتابات مثلها لكنها حبيسة الدفاتر
دمت ودامت كتاباتك
بيرو

يا نذير يا دفعة

أطلق اسر الكتابات خلي العالم تستمتع
تحياتي يا صديق