Post: #1
Title: فوضى الاسعار والاستيراد
Author: عبدالحفيظ ابوسن
Date: 02-16-2021, 07:26 PM
06:26 PM February, 16 2021 سودانيز اون لاين
عبدالحفيظ ابوسن-no where
مكتبتى
رابط مختصر
مشيت اليوم اشتري الحديدة الصغيرة البجرو بيها السوستة لشنطة
هي شنطة يد بتي الجامعية
الحديدة الصغيرة المابتتجاوز واحد سم . قال لي بي 150 ج
طيب يا شيخنا الشنطة دى تمنها الف ج فيها 3 سست بي 450 ج
طيب السستة بي كم اصلو ؟
لومكم علي ولا اشتغل بي شغلة
مشيت لعمنا بابكر ابوصقعو من قدامى تجار كوستي لقيتها بي 20 ج
|
Post: #2
Title: Re: فوضى الاسعار والاستيراد
Author: عبدالحفيظ ابوسن
Date: 02-16-2021, 07:32 PM
Parent: #1
تباين مريع جدا في الاسعار
من ابسط الاشياء لاعقدها
الدواء الكان سعرو واحد اومتقارب في جميع الصيدليات
بحكي لي صيدلي جاهو زول لدواء . وما كان عندو
قال لي الزول سألني وسعرو كم قلت ليهو انتهي مننا بي 400
قال لي الزول جاني راجع بعد مدة وشايلو وسألني
هل دة ياهو قلتو ليهو نعم
قال لي ب 2800 ج
قلت ليهو امشي الصيدلية الفلانية ارخص ولقاهو فعلا ب 400 ج
|
Post: #3
Title: Re: فوضى الاسعار والاستيراد
Author: عبدالحفيظ ابوسن
Date: 02-16-2021, 07:54 PM
Parent: #2
فوضى اسعار
وفوضى استيراد
قلم الرصاص ب50 ج مبلغ زهيد لكن الولد ممكن يكملو بدون يكتب بيهو . يبرى فيهو ويتكسر وممكن البراية تتكسر هي زاتا عادى
مصاريف غير منظورة تأكل دخل الاسر
لايمر يوم او يومين والا تحرق لمبة بي 400 ج . والله جربت اللمبة عند التاجر مشيت البيت ربطتها ابت تولع
مع العلم انو هيئة المواصفات والمقايس بتلف الدكاكين وبتدفع التجار الاف الجنيهات . رسوم تفتيش والامر لا يعدو جباية
كل نفايات الصناعات تدخل السودان دون رقيب او حسيب
مصاريف يومية تشكل صرف مبالغ فيهو للاسر
لا احد يحاسب او يسأل
ملحوظة
اعاد السيد وزير المالية ضريبة رسوم الانتاج المحلية معناتو زيادة السلع فوق زيادتها
يعني زيادة قطعة الصابونة المصنعة محليا ورطل الزيت وغيرو
|
Post: #4
Title: Re: فوضى الاسعار والاستيراد
Author: عبدالحفيظ ابوسن
Date: 02-16-2021, 07:58 PM
Parent: #3
يعني المواطن ضهرو مكشوف
يتركب من الحكومة
من التجار
من اي زول ولا مؤسسة بتقدم ليهو خدمة
|
Post: #5
Title: Re: فوضى الاسعار والاستيراد
Author: عبدالحفيظ ابوسن
Date: 02-16-2021, 08:05 PM
Parent: #4
نفس سياسة الانقاذ
شغلونا في معايشنا
|
Post: #6
Title: Re: فوضى الاسعار والاستيراد
Author: علي عبدالوهاب عثمان
Date: 02-16-2021, 08:09 PM
Parent: #4
الحبيب أبوسن .. تحياتي
حريص ان أقرأ بوستاتك لأنك تعكس لنا واقع الداخل
كان الله في عون الوطن
ما عارف يا أبوسن ليه نحن كده ؟ حتى في الاغتراب في أي
خدمة مع بعضنا نجدها مكلفة جداً عكس مع الجنسيات الاخرى
الموضوع عايز بحث عن شخصيتنا ولماذا نحن هكذا ؟
شكرا كثير على عكس الصورة
|
Post: #7
Title: Re: فوضى الاسعار والاستيراد
Author: عبدالحفيظ ابوسن
Date: 02-16-2021, 08:44 PM
Parent: #6
يا علي الرغيف المدعوم ب 5 ج والتجاري ب20 ج
المدعوم ماتعرفو مصنوع من شنو ؟
لا تعرفو دقيق منتهي الصلاحية ولا ضارباهو مطرة ولا مخلوط بي تراب ولا قش مطحون تعافو زاتك
الحكومة تخلت عن خدمة المواطن وعملتو بقرة حلوب . هي تحلب وغيرها يحلب
وماعندو حقوق عندها
فوضى
|
Post: #8
Title: Re: فوضى الاسعار والاستيراد
Author: علي عبدالوهاب عثمان
Date: 02-16-2021, 08:51 PM
Parent: #7
الحبيب أبوسن
أهم حاجة جودة الحياة
وصلاحية المواد الغذائية
لا رقابة على السلع
سندان الازمة ومطرقة عدم الجودة
الله يكون في العون
تحياتي ابوسن
|
Post: #9
Title: Re: فوضى الاسعار والاستيراد
Author: Asim Ali
Date: 02-17-2021, 08:17 AM
Parent: #8
سلام عليكم
فوضى الاسعار بقت مشكله .اقل شى لو دخلتسوق الخضار اضطر اخد جوله سؤال عن الاسعار (ويندو شوبنق) على السريع قبل ما اشترى بسبب فروقات الاسعار غير المنطقيه يعنى الطماطم فى مكان تلقى الكيلو ب100 جنيه وفى مكان تلقى الكيلو (طماطم اقل جوده فى الحجم واكير ليونه ب 150 جنيه ) ةدا فى ايام وفره الطماطم .
من كم يوم اعتدت اتناول بندول بشكل منتظم بسبب بعض الالام اشتريت من محل فى الحى شريط (4 حبات) ب20 جنيه بعدها بايام ومن دكان خال صاحب المحل الاول وعلى بعد لايزيد عن 50 متر من المحل الاول طلبت شريط بندول اديتو 50 رجع غشره جنيه واجربه مماثله فى صيدليه ... الخ وهكدا الحال .
الواحد بقى يضغط اعصابو مايعمل شكله بسبب الفوضى والاستغلال واصبح افضل تترك شىء قد تكون محتاج ليهو حتى لاتتعرض للاستغلال من تاجر جشع
|
Post: #10
Title: Re: فوضى الاسعار والاستيراد
Author: عبدالحفيظ ابوسن
Date: 02-17-2021, 08:52 AM
Parent: #9
صدقت يا عاصم
للاسف الصيدليات بقت دكاكين قطاعى للدواء .
والدواء بيستورد ويتباع زيو زي اي سلعة
عندى ملاريا اخدت حبوب كوارتيم .. تتراوح اسعارها بين 300 و 500 ج انت وشطارتك وصبرك علي التفتيش . في المستشفي مجانا ولازم تفحص عندهم . وممكن يقول ليك انتهت بتجى بعد اسبوع
المهم بعد الحبوب الملاريا موجودة . الدكتور كتب لي حقن زيتية
مافي خالص لكن قالوا في حقن بوكو .. ليه بوكو لانها خاشة بدون جمارك وبدون موافقة وزارة الصحة وبدون معرفة المنشأة
اها وكويسة
لا والله تاخدها علي ضمانتك الشخصية
|
Post: #11
Title: Re: فوضى الاسعار والاستيراد
Author: عبدالحفيظ ابوسن
Date: 02-17-2021, 08:57 AM
Parent: #10
الرغيف مامعروف سعرو كم ولا وزنو
ممكن في فرن ب 20 وواحد ب 15 وواحد 8 عيشات بي مية ج
مافي زول ممكن تسألو او تستفسر من المسؤولين
الغاز حصة التموين للاحياء وبجى من الولاية اي حي سعرو براهو مابين 500ج لي 900 لي 900 ج
وبرضو المواصلات . التعرفة كم ما تعرفها
ولو عرفتها زاتو حتعمل شنو
مافي جهة رقابية
|
Post: #12
Title: Re: فوضى الاسعار والاستيراد
Author: Asim Ali
Date: 02-17-2021, 05:40 PM
Parent: #11
Quote:
الرغيف مامعروف سعرو كم ولا وزنو
|
عندنا فى افران مدعوم شغاله بالكيلو وعشان يتلاعبو ما بنجضو العيش كويس ويكون تقيل بسبب اللبه تكون عجين عديل مرات. لكن وين الرقابه ووشرحو بالنسبه للرغيفه ام 5 جنيه بتشم النار شمومه وتطلع نيه برضو .
|
Post: #13
Title: Re: فوضى الاسعار والاستيراد
Author: علي عبدالوهاب عثمان
Date: 02-17-2021, 05:56 PM
Parent: #12
| Quote: وعشان يتلاعبو ما بنجضو العيش كويس ويكون تقيل بسبب اللبه تكون عجين عديل مرات. |
الحبيب عاصم مع التحية للحبيب أبوسن
شكرا عاصم على العبارة فوق
معقول نحن وصلنا هذه الدرجة من فقدان الضمير
الرقابة لا يمكن تغطي كل شيء
جزء كبير يتحمله الجانب الانساني والضمير
يا جماعة ما زلت أكرر نحن اغرب ناس في الدنيا
سلوكنا يستحق دراسة عميقة
لماذا نكون في أعلى درجات والمثالية هنا في الخليج
وسلوك معاكس في الوطن
الخبز نص استواء عشان الوزن ( لم يحدث هذا إلا عندنا)
تحياتي الاحباب عاصم وأبوسن .. دائما انتظر بوستاتكم
لآنكم لا تجاملون وتنقلوا لنا صورة صادقة
|
|