يا ترباس يا اخى في المجتمعات الحديثة مثل مجتمع عاصمة السودان الناس بستعينو بالمشاهير امثالك عشان ينورو عامة الناس بضرورة اتباع الارشادات الطبية لمحاربة الوباء و انت ما شايف غير العداد بتاعك وقف!. الصراحة بالغت و فت البلاغة. ثانيا العمل فيك كدا ليس حمدوك او الديمقراطية او الحرية, بل هو الكورونا. ثالثا, بحكم عمرك, انت معرض اللخطر اكثر من الجيل الخامس الانت عايز تغنى ليهم و هم يهججو. ايوى هم بياكلوها و بقومو لكن انت اقل فرصة للقيام من الداء (لا سمح الله) لو اصابك. فـ رجل, خلى عقلك يناسب عمرك و اعمل (الحسنة الوحيدة) بعد العمر ده.
________________ قبل ما اسمع صوتك بتغنى, سمعت بمقولة مولانا كشك, قالو سمعك بتغنى (البعبدا وين) فقال (ترباس, تربس الله عقله).
Post: #2 Title: Re: يا ترباس, شهيتك فاتحة للغنا لغاية ما تشرب � Author: Asim Ali Date: 01-28-2021, 09:31 PM Parent: #1
سلامات محجوب غايتو لحظا بيجيينى احساس انو مدفوع ليهو وجزء من حمله الفلول الاعلاميه الحاليه زول بيشكى من الال هنا وماشى الامارات الامارات يعنى ارخص ؟ بل صرف يستهلك رصيدك البتبكى عليهو بشكل اسرع والعداد فى وسط السودانيين المغتربين عددهم ضئيل جدا بالنسبه للسودانحتى لو حسبنا باقى دول الخليج تتحرك فيها وتكالبف حركتك مقابل العائد اللهم الا اذا كنت هندك استثمارات هناك ويبقى دموعك دموع تماسيح موضوع كورونا السودان يمكن اخف حالا من الدول عربيه بشكل عام من ناحيه الاصابات وكمها خلال الموجه التانيه يعنى برضو فى قيد فى بشكلاو باخر فى موضوع الحفلات والعداد عايتو بس طلعت شتت انتباه الناس وشغلتهم بدموعك عن مشاكلهم والسودانيين مايصدقو يلقو شمار غايتو امشى الامارات عليك يسهل وعلينا يمهل
Post: #3 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 01-28-2021, 09:47 PM Parent: #1
Quote: فقال (ترباس, تربس الله عقله)
يبدو ان دعاء الشيخ مستجاب عارف يا محجوب .. الذي لايعرف كمال ابراهيم سليمان حيقول نفس كلامك .. الكرونا والتجمعات اولا هو عارف تماما ان السبب ليس حمدوك او الحكومة انما الكرونا وهو ليس بهذا الغباء ابداً هو واعي وسليط اللسان وكي حصيف ويعرف كيف يتكلم ومتى يتكلم وما يقول اشتهر بالتعليقات الخطيرة وبانه (فاتية) وبقول كلام ممكن يصير (مثل) واذا في وقت حنجيب ليكم بعض المواقف الكنا فيها حضور ... المهم كلام ترباس في القناة المذكورة ليست محض صدفة وشىء عرضي ، لانه يستحيل (ينتحر) فنيا على الاقل وعلى الهواء وعلى مسمع ومرأى الملايين ، وهو احرص فنان (بجامل) الشعراء والملحنين ويرسل لهم تحاياه(بحييه من هنا) وعيدياته (بقول ليهو كل سنة وانت طيب) معقول زول غنى (يا روحي انصفني) ومولود ومتربي في امدرمان بتفوت عليهو ردود الافعال دي ؟ معقول كمال ابراهيم سليمان (جعان) ؟! ومالاقي ياكل ومفلس ؟ طيب اذا كان هو وصل الحال دا .. اومال ابوعبيدة حسن يعمل شنو ؟ الكلام دا (متفق عليه) وجهات معينة (لقنته) الكلام دا تلقيناً .. واظن الهدف من كلام ترباس لا يخفى على احد
Quote: الكلام دا (متفق عليه) وجهات معينة (لقنته) الكلام دا تلقيناً .. واظن الهدف من كلام ترباس لا يخفى على احد
الحبيب محجوب والحبايب ضيوف البوست تحياتي
سمعت حديثه على الهواء بقناة الهلال وطوالي جاء ببالي بيت المتنبي على قدر أهل العزم تأتي العزائم وتأتـي على قـدر الكـرام المكارم وتعظم في عين الصغير صغـارها وتصغر في عيـن العظيـم العظائم
Post: #6 Title: Re: يا ترباس, شهيتك فاتحة للغنا لغاية ما تشرب � Author: Abdelrahim Mohmed Salih Date: 01-29-2021, 00:14 AM Parent: #5
ترباس مغنى جيد لكن لا علاقه له ب الفن وبتعليقاته الاخيره احرز 10/0 فى مرماه يا محجوب توعيه المجتمع دى صعبه لانه إحتمال ما يكون مقتنع ب وجود الكروونا او ب خطورتها
Post: #7 Title: Re: يا ترباس, شهيتك فاتحة للغنا لغاية ما تشرب � Author: دفع الله ود الأصيل Date: 01-29-2021, 07:32 AM Parent: #6
Quote: اشتهر بالتعليقات الخطيرة وبانه (فاتية) وبقول كلام ممكن يصير (مثل) واذا في وقت حنجيب ليكم بعض المواقف الكنا فيها حضور
موسيقارنا Ahmed Yassin ياخي يجازي محنك و يكلبش لي بنيات إبليسك. تعرف بعبارة(فاتية) الأوسكاراية دي ، أنت لخصت هذا الدعي العامل فيها ألمعي؛ بما لم بفتِ به أبو نواس في بنت الحان( الخمر ) و الإمام مالك حايم في قاع المدينة. البني آدم دا ما ليه شبيه إلا بس الجخس التاني المدوعل داك الاسمو حسين خوخلي ، سواء شكلاً من حيث العمامة الطويلة 4.5 متر و الجضوم و الدفرنشات المثيرة؛ و مضموناً بإطلاق الفقاقيع الإعلامية الخطيرة. ● مرة العلق دا بلسانو الزفر، اندرع في قريبي ابن البادية عمل شبكة لرب السما لامن فرزوهم بفحص الحامض النووي (DNA) أعوذ بالله ياخي. ▪ آخر تخريمة : خلاس يابوحميد عفيناك من وعثاء السفر لعش الدبابير ؛ و هداك عتلناه جبناه ليك فوق توصيل لحد عتبة بيتك (هوم دليفري).
الاخوة عاصم احمد ياسين عبدالرحيم ود الاصيل و الاخت اميرة شكرا لمروركم الكريم و نتمنى للفنان الكبير اقامة سعيدة في اى بلد يختاره. و قبل ما يسافر, اتمنى يعمل دعاية للكسرة و يشجع الناس للعودة للجذور لانو بصراحة دوامة الخبز دى بقت عقبة علي حساب اشياء اخرى يمكن ان تقدم البلد الي الامام.
Post: #9 Title: Re: يا ترباس, شهيتك فاتحة للغنا لغاية ما تشرب � Author: دفع الله ود الأصيل Date: 01-29-2021, 02:43 PM Parent: #8
معليش أخوي المحجوب يا هادئ يا رزين،آسف جدن و سامحني ما حييناك بدايتن . كانت شايلاني الحمية حمية الوطنية المهدرة بفعل فلول أمثال هؤلاء الأُجَراء. ممن لا يرعَون فينا إلَّن و لا ذمةً. كل همهم في النقاطة و عداد المنشار طالع نازل. ياخي دا بغني في"يا مرضعاني بالشطر اليمين و مو جايب خبر الله يسلمك.
Post: #10 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 01-29-2021, 03:12 PM Parent: #9
ديفو ود البادية
Quote: ▪ آخر تخريمة : خلاس يابوحميد عفيناك من وعثاء السفر لعش الدبابير ؛ و هداك عتلناه جبناه ليك فوق توصيل لحد عتبة بيتك (هوم دليفري).
ياخي الله يبسطك ويفرحك .. ضحكت لامن استغفرت ياخي تشجيعك دا حيخليني اعتل مواقف وقصص تاريخية جميلة ومبهجة خاصة قصص الجابري وزيدان وكابلي وابواللمين واللستة طويلة من العازفين والجمهور والعرسان واصحاب الحفلات والفنان الكبير القال للعريس في حفلة في كوبر بعد ان انهى العريس حفلته بنفسه (يا ولدي انا داير اغني ياخ) ورفض العريس وكان طويلا وسمينا
بعد ظهور فيديو الشيّة ظهر تسجيل دقّة نميري ليهو يمين الله قالوا الزين كوف راقد فى السلاح الطبّى نميري اتصل عليهو قوم يا الشليق كمال ترباس رد على التلفون نميري قالو قال ليهو المعاى منو قال ليهو كلّى بس خت سماعة التلفون و جاهو شلاليت و بنى و كفوف و الكتير من ام دلدوم و زولك وقع و اتدردق فوق السلّم هسّى فى داعى يفتح عليهو طاقة زى دى كان ما قليل عقل
Post: #14 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 01-29-2021, 10:17 PM Parent: #13
جٍلٍي
Quote: كان ما قليل عقل
فرعون وقلة عقله دا سمع اضاني قال (انا زي المرسيدس280) والوقت داك كانت بتجيب ستة بيوت
Post: #15 Title: Re: يا ترباس, شهيتك فاتحة للغنا لغاية ما تشرب � Author: دفع الله ود الأصيل Date: 01-30-2021, 04:49 AM Parent: #14
يا محجوب، ديل ما ناس حارة. و (طرباش ) دا بالزات زعيم عام حزب البهجة القومي {الأصل} ما تسمع لعلعة "ياخوان البنات الجري دا ما حقي .. حقى المشنقة و المدفع أب سكلي . ● عمومن، خليك مع صاحبي ود ياسين دا كنز مدفون ؛ حيمتعك بنوادر أهل الفن و بلاويهم و بيوت كلاويهم. كمان في برنامج في الBBC لو مسكو مع ناهد نجار حيبدع و يتألق بالجد.
Post: #16 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 01-30-2021, 10:22 AM Parent: #15
ترباس الشايفنه مركب ليهو (دٍش) فوق راسه زي ماقال طولو(تزعة) امتار اديكم لمحة بسيطة بس .. والله ليس للتشفي ولا لشماتة ولا اشانة سمعة او لاي غرض اخر بس عشان العمله رجع الذكريات وتخلينا نعرف طبيعة البنى ادم دا ايام رحلته لامريكا وعمل حفلات في واشنطون ووو .. في ناس كتار ارسله معاه (امانات) (دولارات) وطبعا هو فنان مشهور و(شبعان) والناس كلها بتعرفه وبى كدة زول مضمون وفي مطار الخرطوم لا حيتفتش ولا حيعمل (دكلاريشن) دا ترباس يعني البشير الا ربع وحلف انه حيسلم كل زول هناك في السودان الامانة في ايده يد بيد (دي ذمة) وتم تسليمه المبالغ المحترمة ولستة بالعناوين وارقام التلفونات (الثابتة) طبعا من التسعينات يعلم الله لغاية اللحظة دي مافي اسم في اللستة استلم ولا رقم من التلفونات المكتوبة في اللستة دق هو اصلا الجوع دا كيفن؟ يعني ما بس رغيف
Quote: من التسعينات يعلم الله لغاية اللحظة دي مافي اسم في اللستة استلم
لا كان كدى ليهو حق يبكى
Post: #18 Title: Re: يا ترباس, شهيتك فاتحة للغنا لغاية ما تشرب � Author: دفع الله ود الأصيل Date: 01-30-2021, 04:58 PM Parent: #17
▪لا كمان كان كدي عاد ننبه ناس ود البشرى و سمعة في دبي يحذروا أبصلعة أينما طَلَعَ. و كان للمستنير مفتح ما عليه خوف.
● يلا من هنا ندلف راجعين لحسين خوجلي، إذ صنعت منه محض سطوة همباتة الإنعاظ نصفَ طفلٍ معجزةٍ!!
● حيث درج على طرح أسئلةٍ عويصةٍ على نفسه، و على الآخرين ، و على دايناميكا منطق الأشياء و ثوابت الطبيعة، في مغبة بحثه العبثي عن كبدٍ للحقيقة و للإمساك بأهدابٍ للحكمة ضالة المؤمن ، و التي تحفز العقل و تثير الجدل.
● فالسؤال عبر القرون ، ظل هو المفتاح السحري لدى عباقرة أزمانهم لفك طلاسم الغموض حول عالمنا الخرِف و نواميس هذا الكون الفسيح.
● من جوف الغموض انبثق سؤال جاليلو عن بيضاوية كوكبنا المختطف،ةو ألف ديكارت كوميديا أرضية سوداء ، و إمعاناُ فيه أودع دافنشي في رحم جيوكنداه شفرةً غامضةً لتلكم الموناليزا بنظراتها الساهمة الشرودة؛ و من حضارة الإغريق سبقهم سقراط و إفلاطون و أرسطو ، ثم تلاهم جان بولسارتر و تلميذته سيمون دي بفوار ، و جاء إيميل زولا و البير كامو، عمَّ يتساءلون عن نبأ الوجود. وأسسؤ لنهج صيد المعارف و سبر الحِكَم.
●بهذا الفهم والتوجُّه، جاء حسين خوجلي متسائلاً، و هو محكر في قناته بجلبابٍ تركوازيٍّ صارخٍ و عباءةٍ فصفوريةٍ صاخبةٍ ومعتمراً عمامته اللافتة، أكبر من صحن ساتيلايت؛ يعني قبة و نحتا فكي لكن ما مفترس ؛ تراهو زي مرفعين الفُقَرا بتاع زيدان قال:" بدي لكن ما بعضي". ●طبعن حسين النسخة الثانية الأشد (ليونة و رخاوةً) لكمال ترباس، فالاثنان شبهبنا و اتلاقينا، دا الرماد و دا قدحو. إن في بشاعة المظهر أو ميوعة المخبر، فطرباشكان من طلائع من طبَّل و شبَّل لدبابات طغمة الإنغاظ و هم يتسورون محراب قصر الشعب لهمبتة السلطة تحت جنح الظلام في ليلة السطو علي ثاني ديمغراطية وُئدَت و هي لا تزال في مهدها.
● فإن كان و لا بد للأزمة العاصفة بالبلاد حالياً من مناقبَ برُغم تداعيات مثالبها الخطيرة، فهي أن ألقمت كل كلبٍ عوى حجراً حتى صار الحصى بمثقال دينار. فدفعت هذا الخوجلي لكف نتانة جُشائه عنا، و لطالما ظل ردحاً من الزمان بمارس عادته السرية السيئة علناً ب"أنني أردح إذن، فأنا حيٌّ أُرزق" و يدندن بالمديح و يقرع الصفيح و يدق الطبول و يطلق لبان البخور و يطيل الثرثرة في فارغةٍ و مقدودةٍ ، ليتراقص (بالفركة) ور ورا تحميساً لرب بيتٍ كانز للدف ضارباً و شيمته و بطانة سوئه الرقص و كذلك استجداءً لعطفنا الجياش ،بغباء و إدعاء لامتلاك نواصي الحقائق المطلقة!!
Quote: "ياخوان البنات الجري دا ما حقي .. حقى المشنقة و المدفع أب سكلي .
تعرف يا ود الاصيل, اول ما سمعتو بتكلم و صوتو فيهو نبرة بكاء, طوالى جالت في خاطرى هذه الاغنية كمقارنة بين ترباس صاحب العمة الكبيرة و الاغنية الحماسية و بين ترباس صوت ترباس الذى يبدو باكيا في التسجيل.
Post: #22 Title: Re: يا ترباس, شهيتك فاتحة للغنا لغاية ما تشرب � Author: Mahjob Abdalla Date: 01-31-2021, 02:09 AM Parent: #21
و كمان سريع طلعو توب سموهو "دموع ترباس - عينى ما تبكى" و السعر 150 الف جنيه سودانى.
Post: #23 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 01-31-2021, 09:26 AM Parent: #22
كفاك ما تبكي يا عيوني ** خلاص ما تبكي يا عيوني منو نهلتي وشربتي ** سابك و ما حصل سبتي دي اغنية من اغنياته وفي اغنية (القمري في صباحك) غنى وقال لو قال ليك بسرقو وبمشي بعيد و ينجع * يسكن جم حبيبو وما منظور دة يرجع بحلف ليك بربي و قوتك عيشة عيشة ارجع ليك جناحك كامل ريشة ريشة
Post: #24 Title: Re: يا ترباس, شهيتك فاتحة للغنا لغاية ما تشرب � Author: دفع الله ود الأصيل Date: 01-31-2021, 11:06 PM Parent: #23
لا، و كمان قالليك: " حليلم أخوان البنات العلمو الجبل الثبات" بالله جبل وين البدنقر لجنس المِرَع ديل عشان يعلموه ثبات ؛ غايتو (جبل عامر) ما ظنيت ؛ علا يكون جبل الرجَّاف داك الما بنشاف.
Post: #25 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 02-01-2021, 10:23 PM Parent: #24
ترباس طبعا كان بارع جدا في عمل ترابيس الابواب حسب عمله بالنجارة بدأ صبي نجار وكان المعلم صاحب الورشة شديد في التعامل مع صبية المحل وكان الجميع يهابونه واولهم كمال ابراهيم سليمان الذي اشتهر بلقب (ترباس) وفي البداية كان الاسم لايعجب كمال ولكنه سكت على مضض خوفا من بطش المعلم من حي القلعة انتقل مع الاسرة الى كسلا وهناك عاش ردحا من الزمن نجي لامدرمان في عام (1964) انشأ : محمداحمد عوض وبادي محمدالطيب- الكحلاوي- عوض الكريم عبدالله اسسوا اتحاد فن الغناء(الشعبي) والتسمية اطلقها محمد احمد عوض وبعدها باربعة سنوات يعني في (1968) تم انشاء دار فلاح للغناء الشعبي وترباس انطلق من هنا
Post: #26 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 02-01-2021, 10:38 PM Parent: #25
نعمل مقارنة بين نقيضين تماما في كل شىء في الحجم والشكل واسلوب الحياة وفي الغناء حتى في اللبس بين زيدان وترباس ترباس اذا لم يستلم العداد كاملا ما كان بوافق يغني او يحي أي حفل وطبعا كانت اسعاره فلكية واذا سالوه كانت اجابته واضحة (عن لبسه واكسسواراته) وان مظهره ساي مكلف في واحد كان حالف ما يعرس الا ترباس يغني ليهو في الحفلة وعلي العليهو كان مفلس ترباس رفض رفضا باتا انه مش يغني ليهو (بى شارع بيت العرس ما بجي) .. والامر طال العريس مصر على رايه ودخل اجاويد .. وبقى يوميا يجي الدار وترباس يزوغ منه اذا عرف بوجوده كان (يكبر اللفة) وفي الاخير زهجوا منو واتفقوا انه يمشوا معاه لى ترباس في البيت .. وبعد تحانيس ومجابدات وافق على مضض انه يغني ليهو كم اغنية كدة بس .. وبعد ما قاموا متوجهين نحو الباب ترباس قال للعريس اسمع .. بدون (ياريت) زيدان كان يغني كثير جدا مجانا ويدفع من جيبه للعازفين. واذا كان في عربون مدفوع يغني طوال الليل في الحفلة وبى خبرته وانسانيته يعرف ان اهل الحفلة (ناس الله) فكان يقوم بارجاع العربون..
Post: #27 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 02-01-2021, 10:57 PM Parent: #26
يحسب لى ترباس انه ادخل ايقاع جديد اسمه (الكراتش) وعمله ميزان لاغنيته (طبيعة الدنيا) زي الموج .. مثلما الراحل الفنان الكبير حمدالريح لحن (مريا) لصلاح احمد ابراهيم على ايقاع عجيب (مشية الثعلب) .. يا مريااااا .. (تك .. تك تك تك)
Post: #28 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 02-01-2021, 11:07 PM Parent: #27
في مهرجان البحر الاحمر ايام ايلا كان والي .. كانت ليلة ترباس وكان متفق انه يختم الحفلة ب (انت المهم) ولكن اتى اليه من يخبره بان (ايلا) طلب ان تغنى في بداية الحفل لانه يحب هذه الاغنية وقد كان ..وقام ترباس بتحية الوالي ايلا بتحية خاصة وطويلة دون حتى ان يذكر الجمهور وبدأ يغني (انت المهم) و(الاس جميع ما تهمني) ويتبسم ويؤشر على الوالي الذي طرب ايما طرب وحمل عصاه عاليا دون ان يتوكأ عليها وقام يبشر على ترباس وبعدها لم يرجع الى كرسيه وغادر الحفل وقامت ممثلة تدعى سميرة بارسال ورقة فيها صوت لوم الى ترباس .. على تجاهله للحضور والجمهور بهذه الصورة السافرة فاستشاط غضبا .. ووصفها باوصاف عجيبة وانه هي منو ؟ والزيها ما بتجي لى ترباس ولو (السيل شالها) وانها كومبارس بس . وبهدل الممثلة بهدلة وندمها على الورقة الكتبتها باسلوب طيب
Post: #29 Title: Re: يا ترباس, شهيتك فاتحة للغنا لغاية ما تشرب � Author: Mahjob Abdalla Date: 02-02-2021, 01:44 AM Parent: #28
Quote: بالله جبل وين البدنقر لجنس المِرَع ديل عشان يعلموه ثبات ؛ غايتو (جبل عامر) ما ظنيت
ود الاصيل جبل عامر دهب مجمر و لهب محمر يخت رجلو يقوم مفزر يلحقو امدلدوم من نميرى يقول تنمر يقع في السلالم بردلب يرقد مكسر
Post: #30 Title: Re: يا ترباس, شهيتك فاتحة للغنا لغاية ما تشرب � Author: Mahjob Abdalla Date: 02-02-2021, 01:47 AM Parent: #25
Quote: طبعا كان بارع جدا في عمل ترابيس الابواب حسب عمله بالنجارة بدأ صبي نجار وكان المعلم صاحب الورشة شديد في التعامل مع صبية المحل وكان الجميع يهابونه واولهم كمال ابراهيم سليمان الذي اشتهر بلقب (ترباس)
احمد ياسين دى معلومة جديدة و مهمة. دائما في خاطرى سؤال عن اصل اللقب ده. تارى بتاع نجارة.
___________ بذكرنى القصص الكنا نسمعها زمان عن الفنانين و علي ما اعتقد, الراحل عثمان حسين كان ترزى, فعندنا قريبنا بتاع قشرات, عندو لبسة كنقولي جاء بيها من الخرطوم و كان بقشر في الناس انو اللبسة خيطها ليهو الفنان عثمان حسين.
Post: #31 Title: Re: يا ترباس, شهيتك فاتحة للغنا لغاية ما تشرب � Author: Mahjob Abdalla Date: 02-02-2021, 01:49 AM Parent: #30
Quote: وبعد ما قاموا متوجهين نحو الباب ترباس قال للعريس اسمع .. بدون (ياريت)
دى قمة اللا انسانية.
Post: #32 Title: Re: يا ترباس, شهيتك فاتحة للغنا لغاية ما تشرب � Author: Asim Ali Date: 02-02-2021, 08:57 AM Parent: #31
من مايحكى عنو فى بدايات الالفينات قبل 15 //16 سنه بعد موسم موسم البصل فى عرس ولد واحد من تجار المحاصيل وفى عز الحفله برضو بعض الحضور طلبو منو اغنيه قال لى ابو العريس دى بحسابها براهو ..وابو العريس من غير يتلفت طلع 10 مليون حاضره .وزولنا ماقصر غنى طوالى
Post: #33 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 02-02-2021, 09:49 AM Parent: #32
صاح ياعاصم وللمعلومية ترباس اذا طلبته في حفلة بحدد معاك الاغاني الحيغنيها وتفاصيل كتيرة .. في فنانين كتار جدا في حالة الكوارث بمشوا يزوروا المنكوبين زي ماعمل عركي وابواللمين بقيفوا مع الناس معنويا وماديا ..واجتماعيا ، لكن هل في زول سمع انه ترباس دا مشى سجل زيارة حتى لمنكوبي السيول والامطار ؟؟ مع انه قال للمثلة انا ترباس دا السيل ما كان جابك لي ..
Post: #34 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 02-02-2021, 10:03 AM Parent: #33
ايام كان رئيس لاتحاد فن الغناء الشعبي مشى طلع تصريح لبيع (سجائر) كمية كبيرة بالكراتين من الشركة وقال لى (امين المال) عمك عبدالله امشي بيع السجائر دا وسدد للشركة حقها وادينا الارباح. وسلمه الورق اعضاء الاتحاد والادارة لمن سمعوا بالكلام دا الجوطة قامت ، قالوا نحن بنبيع السجائر ونشيل القروش في الاجتماع .. طبعا ترباس خطير .. قال لى عبدالله اديهم الورق وكراتين السجائر خليهم يبيعوا لكن بعد ما يجيبوا ليك (المشترين هنا) .. الجماعة اتراجعوا .. لكن هو قال ليهم انا تاني ماعندي معاكم شغلة لانه انتوا شكيتوا فيني ... انا ترباس .. خليكم عارفين (انا زي الببسي تخجني اطلع ليك بنخرينك)
Post: #35 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 02-02-2021, 10:08 AM Parent: #34
سافر الى نيجيريا ليغني (للشريف) .. وغنى كما لم يغني من قبل.. ولمن رجع واجه انتقادات رهيبة .. زي السمعة السيئة التي لحقت ندى القلعة وانصاف مدني وو وسألوه .. معقول تعمل زي الفنانات الــ(......) ديل وتمشي تغني في نيجيريا وللشريف ؟ّّ كان رده (دي صرفتي)
Post: #36 Title: Re: يا ترباس, شهيتك فاتحة للغنا لغاية ما تشرب � Author: HAIDER ALZAIN Date: 02-02-2021, 10:48 AM Parent: #35
سلامُ عليكم جميعاً ..
Quote: الخرطوم: محاسن أحمد عبدالله وصف الفنان كمال ترباس الشيخ مصطفى عبدالقادر بـ(الشيخ التفاف) وانه غير محترم وقليل أدب وعليه أن يحترم نفسه وذلك بعد الهجوم الذي شنه عليه بسبب لومه للحكومة في محاربتها للفنانين وقطع ارزاقهم. وأوضح ترباس في تصريحه لـ(السوداني):(أمثال هذا الشيخ المدعي يريد أن يكسب جمهور علي حسابي ويتلمع وانا مافاضي ليه، هو مفتكر نفسه أمام جامع في مكة المكرمة؟،مبينا :لو بتفهم انا ما قلت جعان ما لاقي اكل عشان مالاقي قروش بالعكس عندي قروش لكن مالاقي غاز ولا وقود ولا عيش ،والحمد الله قبل أيام اشتريت منزلا بي أربعين مليون في امدرمان قصاد الطابية مامحتاج الحمدلله ربنا يديني عمر اكمل القروش العندي اختتم ترباس تصريحه خليك من ترباس واحترم نفسك يا زول التفاف ويكفي اني انا ترباس انت منو؟ .
Post: #37 Title: Re: يا ترباس, شهيتك فاتحة للغنا لغاية ما تشرب � Author: HAIDER ALZAIN Date: 02-02-2021, 10:50 AM Parent: #36
مع الشكر لي شيخهم ؛) ؛)
Post: #38 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 02-02-2021, 11:32 AM Parent: #37
نجي لى شكلته مع سيف الجامعة لأنه سيف انتقد (عِمة) ترباس وقال بتعيق حركته اثناء الغناء الجماعة كلمو ترباس بالقالو سيف الجامعة ...قام (الفاتية) دا قال ليهم .. انا هسي تعبان وداير انوم لكن الصباح بنجضوا ليكم .. قلتوا لي قال شنو ؟؟؟!! اها الصباح قال: انا ترباس .. متى اضع العمامة تعرفوني انا لو دخلت البنك بدون بطاقة بصرف قروش بى عمتي دي. اها انت طاقيتك دي بتقدر تصرف بيها ؟
Post: #39 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 02-02-2021, 11:45 AM Parent: #38
الشكلة مع سيف الجامعة كان سببها انه سيف عايز يغني اغنية لى ترباس باضافة توزيع جديد والكلام دا قاله لشاعر الاغنية. طبعا ترباس قال .. دا لقاها باردة . وانا جني وجن الضيف البقلب السمكة
Post: #40 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 02-02-2021, 12:04 PM Parent: #39
منع (سميرة دنيا ) من ترديد اغانيه بعد ما عملوا شريط في القاهرة كثنائي .. وعند سؤاله عن رايه في سميرة دنيا قال اذا كان ( سميرة سعيد ) ما عاجبااني تقول لي( سميرة دنيا ) !!! ؟؟ سميرة دنيا !!! دي ما عندها وفاء لزول وكفاية انها ما كانت وفية للهرم الفني صاحب المدرسة الفنية عثمان حسين . وانا وقفتها من انها تغني وتردد اغنياتي.. اها قلت اراقب حفلاتها عشان اتاكد بى نفسي .. لقيت ما عندها حفلات!!
Post: #41 Title: Re: يا ترباس, شهيتك فاتحة للغنا لغاية ما تشرب � Author: Ahmed Yassin Date: 02-02-2021, 12:13 PM Parent: #40
اكيد ترباس بحاول (يقلد) وردي في هجومه على الفنانين في الساحة وعلى طريقة العبارات اللماحة والذكية واشهر مساجلاته وهجومه من كل الجهات كانت على (عبدالوهاب وردي) الذي تلقى الهجمات الكاسحة زي المطر لدرجة المسكين ما عرف يعمل شنو.. وزي ما قال ترباس .. هجومي الناري حيكون على صفحات الجرائد وعبدالوهاب الا يصب موية في الجريدة عشان يعرف يمسكها