د. القراي والمناهج: سكينة كمبال بلهجة الشايقية عن جعير الشيخ

07:36 AM January, 17 2021

سودانيز اون لاين
عبدالله عثمان-
مكتبتى
رابط مختصر

سكينة كمبال عن جعير محمد الأمين سماعين

خجيجي قاعدي تبكي وتقحقح . ولدها جاها مهجوم قالها:امي مالك ؟نعل مافي شي قعد يوجعك؟قالتلو يا يابا انا شديدي ماعندي شي عيللي شوفتلي شيخ في الخرابا التليفزيون بي دقنوا يسكت يبكي والناس يبكوا معاهو قوت يبقى القيامي جاي تقوم. اسع جايي امشي لي عاشة اديها جدادتها الرايحي منها الجات حضنت عندي وفقست في توكلي وانا نكرتها عليها لامن السواسيو كبرن . وكمان ضبحتلي فروجة منهن وهي اتغدت معاي بيها الشهر الفات. يا حومد إيحمد وليدي بيبقى فوقي ظنب؟
أيي يومة وظنب كبير خلاس. خجيجي صدت قعدت فوق العنقريب ترجف وقعدت تبكي وتتمخت. نان يا وليدي هي عاشة مو أكلت معاي! نان يا يومة انت قوتيلا دي فروجتك؟ لع . خلاس عليك ظنب. عيللي تمشي تقيريلها وتستسمحيها وتوديلا جدادتا وفراريجها. نان بتسامحني؟باقي عاشة دي ما عد تدور الكضب شي. يومة:عاشة اختك وبتسامحك. لكن كدي كلميني بالشيخ الكان بيبكي دا. والله يا ويليدي شيخا كان بيتنبر كدي ويكورك ، أنا بس قوت جاء يكضم ضوومة. ويبكي وينووح. والناس بي وراء يبكوا . يبقالي كان ينضم في نضم المدارس.
يا أمي دا شيخ كضاب ساكت . عليك الله انت شوفتيلو دموع؟ والله يا ويليدي قدامي الضيق ، ما شوفتلو فريد ديميعة . أها يا امي أنا ما قوتلك كضاب ساكت؟
يا ويليدي نان كان بيسوي في رقبتو قعد يبكي ليه؟ فيشان فلس وعدم الملين بعد البشير غار .
عليك النبي شوف الراجل الماب يخجل دا؟أسع مصوبن جلابيتو وساويلو عيمي قدر التوب فوق ريويسو ويتنخج فوقنا بالكضب فيحال القروش ؟ بلا هجمني وقطع قلبي ، قوت بس القيامي جايي تقوم!
إكان كدي ولاب اودي الجدادي لي عاشة وانت لا تجيبلها سيري شيء . هي عاشة اختي النقل القعد تنقلوا مني شيويي؟
الراجل شكيتو على اللا نام لا أكل الطعام وجعلي راسي بالهجيمي لامن جاء يتفقش نصين . أصلون أبان دقون ديل بلا الكضب والهنكرة ما عندهون شيء. ياكلوا فوق التلاتين سنة عيلي الأرضة ، وما شبعوا ؟ أريتون ما يشبعوا . شاحدي ربي يسويلون لجام يسكتون بيهو ضوومة. خربوا الدين وعذبوا الناس .
كدي يا ويلدي مدلي حوقتي دي الاسف إكان راسي دا يسكت.

سكينة كمبال.

سلام يا عبدالله وشكرا

والتحية لسكينة كمبال .. كانت تكتب في سودانيز باسم "ست البنات"، ولديها مكتبة عامرة فيها. هذا البوست من هناك:

جاية أرسم البسمات على وشياتكم آ السمحين !جاية أرسم البسمات على وشياتكم آ السمحين !

Quote: فى واحدة شايقية مشت زيارة لجارتها , وقاعدة معاها من صباح الرحمن موية يا كافى البلا ما ناولتها ليها , وكت جات تمشى ست البيت قالت ليها : هسع تمشى بى صمة خشمك مننا ؟؟؟ الضيفة مغيوزة منها قالت ليها : أها تعالى كسريهو !!! **** صاحبات عجائز مسافرات زمن القطر بيمشى بى شندى , وهن متربيات مع بعض من صغار , والقطر عطل فى شندى , قاموا ناس شندى استضافوا الركاب كلهم , والمرأتين ديل استضافتهم أسرة واحدة , واحدة فيهم مشت المطبخ وشافت الغداء طبيخ قرع وهم جيعانات لكن صاحبتها ماب تأكل القرع من ولدوها , فجاتها حسرانة كلمتها قالت ليها يا خيتى الغداء قرع وانتى ماب تأكليه !!! التانية ردت عليها : هى , بقيت آكلو ... ست البنات .

المنبر عندما كانت فيه تماضر شيخ الدين ورقية وراق ورجاء العباسي وعاشة بت فاطنة وست البنات

أها يا ناس رقية وراق وعشة بت فاطنة , وكلكم انا يانى دى !!!!أها يا ناس رقية وراق وعشة بت فاطنة , وكلكم انا يانى دى !!!!

Quote: أشتاق لكم جميعآ وأمانة الغربة ما حارة وتبكى العين وينزف قلبى يوم أذكركم آ السمحين حنينى يزيد وكت أطرا الحنان زينيين ولمتنا وكسحنا الكان فى شارع النيل وأكل البوش فى مطعم سونا أتارى البوش يكون زى العسل والتين وكت تتمدى لى صحنو أيدين سمحين ويبقى النوم قرير للعين ونشوف العافية بى عينينا ونسرح فى اتحاد كتاب وصحفيين ونتلاقى وبشائر خيرنا تضوى جبين وما فكرنا فى الهجعة وفى يوم نومنا مديونين وراحة البال فى شوفتك يمةتملأ العين وقولة يابا تطمنا وتملا الدنيا حب وسرور دحين اسع اتفرقنا لا قلناها كلمة يابا لا أماتنا شبعن شوف ولا فارق قلوبنا الخوف وبطراكم وبتوجع على أيامنا ديك فجر صبانا ماب يرجع حكاياتنا الملت لجوفنا ماب تكمل ملاقاتكم بقت آمال أمانى عمرنا ما صحت وما اتحقق عشمنا الكان وما اتحقق عشمنا الكان ست البنات .