عرفت اليوم من هذا الموقف عظمة المدنية.

04:16 PM January, 09 2021

سودانيز اون لاين
بلدى يا حبوب-kahrtoum
مكتبتى
رابط مختصر

الوقت الساعه الخامسة عصرا المكان فرن عيش وناس واقفين كلن يحمل همومه في توفير الخبز الاسمر فيهم من يريد أن يطعم بيته والبعض يبحث عن اكبر عدد من الخبز لزوم طلب الفول ابو مترين ( ٢٠٠) جنيه وكمان صحن الكوارع ابو ٤ حبال (٤٠٠) جنيه وفي معيته العيشه الزيادة للزبون ب ١٥ جنيه وتبقى الجزء الأخير من منصة المخبز وديل سماسرة يعتمدون على الأطفال والصبيه والنساء والرجال وهم الباحثين عن عمولة شراء الخبز للسماسر ه
والصف يتحرك كقاطرة حرامي المحطة لو تتزكرون مهمتها تجميع عربات القطار واكيد طابور العيش يتداخل ايضا
في الفرن حساب عربات الصواني عليك بعدها حتى لا تقع في البحر الميت وهو ساعة تخمير الخبز صيفا ولا ننسى فوارق الوقت شتاء
وعظمة المدنية تمثلت في، وقوف عربة دورية الشرطه ولحظتها الجميع تسمرت عيناه في حركة. الكاكي والبعض بدأ. يزأر استعدادا لمجابهة الكجر
وما كان من رجل الشرطه الا ان تحدث بانكسار حين وجد الجميع يستهجن تقدمه للأمام. قال
( انتو عندكم صف للقوات النظامية)
لم يرد احد ولكن أجابت المدنية
لا اذهب فغندكم مجموعة أفران مصر الخاصة بالعسكر
فعلا يا سلام على المدنية
مدنياووووو

اخر صف وقفت فيهو
ايام قفلة الكورونا في السعودية
بعد الساعة ١٢ بكون في حظر مافي غير الشرطة حايمين
محدد سوبرماركت واحد مغطي منطقة كبيرة
الزحمة لمن تدفع في الكاشير
عشرة خمستاشر وفيها تباعد ومتزايدة
جاء عسكري سعودي .. وقف في نهاية الصف
خلال دقيقة كان طلع لانو اي زول في الصف
كان بيرجع وراء العسكري
برضو مدنية

سلام عليكم
حصل وين دا ؟
حسب معايشتى
لجنه الخدمات والتغيير طلعت كرو بقت زى عدمها وديل الواحد بيجى بالرسمى ومش فى الصف وانما يدخل بالب الخلفى (مه واحده برا الخدمه ولابسملكى لكن لبس فوقو بالطو الجهه النظاميه زجا عشان يمارس التجاوز)
المدنيه فى الحته دى لسه ماحسمت الفوضى وتجاوز باسم الزى الرسمى فى حين لاتوجد رقابه والسوق الاسود شغال فى المدعوم (خبز وبنزين وغاز)
صاحب القصه دى احتمال حلم زى مابقولو حلم الجعان عيش
وحلم الثائر مدنيه
.
خلونا ساكتين عشان ماتجو من خلف شاشات موبايلاتكم وحواسيبكم تتهمونا صراحه او لمحا بعدم الانتماء للثوره
الثوره اتسرقت وانتهى العزاء بانتهاء مراسم قيام مجلس الشركاء