***** اللجنة العليا لمُعجبي مُلاح الرِجلة ... *****

08:19 AM December, 29 2020

سودانيز اون لاين
ABUHUSSEIN-السعودية الرياض
مكتبتى
رابط مختصر

أقيفو صف بالله ....

حبيبنا أبوحسين ..
اصعب أنواع الطبيخ ( الرجلة ) لا بد من الحرص على الكميات
أقل خطأ يفشل الطبيخ
كان ايام الداخليات في المدرسة الوسطى يوم الرجلة والفاصوليا أجمل الايام
آه زمن الخير ..
مودتي ..

حبيبنا أستاذ علي
أهلاً و سهلاً بيك كأول الحضور في حضرة ملاح الرجلة
أكيد بنتكلم عن الرجلة المظبوطة المدنكلة التي لا يُعلى عليها ....
حليل زمن الداخليات الكان فيها ما لذ و طاب
رغم إني ما سكنتها لكن سمعت عنها كل خير

تحياتي يا راجل يا طيب

حبيبنا أبوحسين .. اثرت فينا الجمال
يا أبوحسين الحبيب .. الرجلة دي ضمن تراث الترابلة
وبهذه المناسبة سوف أوضح شيءعن الرجلة قليلاً
عندنا في السواقي نبات بإسم ( كلانج) نفس الرجلة ولكن هي رجلة برية
وتنمو كنبات طفيلي نفس مواصفات الرجلة ولكن الساق باللون الاحمر
وفي نفس الدائرة تجد ( كلانج) بالساق الأخضر وهو ( الرجلة ) أهلنا يعرفوا
الرجلة من سنوات طويلة جداً ..
كلانج ( بالساق الاحمر) فقط للحيوانات وليس للناس
كلانج ( بالساق الاخضر) صالح للأكل ويطبخ منه ما يسمى بالنوبية ( كوداد)
هذه النبتة غنية جداً بالمياه .. أحيانا كان غذاء للبهائم ولكن بنسبة قليلة جداً
لان الكثرة منها تعمل تخمة للبهيمة

معليش ابوحسين .. قلنا نعمل تأصيل للرجلة تراثياً

بس اوع يكون اللجنة حا ينبسق منها عدة لجان يا ابو حسين ,,,
بالمناسبة دي معزوم عندنا غداء بي رجله ,,, بس جيب معاك الخبز والكسرة والتحلية وتكون صينية بسبوسة هههههههههه يا حليل زمن صوانيك يا حبيب والله اشتقنا ليها ..
وسجلني معاكم في القائمة يا حبيب ,,
قلنا نمر ونسلم .

تحياتي : ياسر العيلفون ....

Quote: حبيبنا أبوحسين .. اثرت فينا الجمال يا أبوحسين الحبيب .. الرجلة دي ضمن تراث الترابلة وبهذه المناسبة سوف أوضح شيءعن الرجلة قليلاً عندنا في السواقي نبات بإسم ( كلانج) نفس الرجلة ولكن هي رجلة برية وتنمو كنبات طفيلي نفس مواصفات الرجلة ولكن الساق باللون الاحمر وفي نفس الدائرة تجد ( كلانج) بالساق الأخضر وهو ( الرجلة ) أهلنا يعرفوا الرجلة من سنوات طويلة جداً .. كلانج ( بالساق الاحمر) فقط للحيوانات وليس للناس كلانج ( بالساق الاخضر) صالح للأكل ويطبخ منه ما يسمى بالنوبية ( كوداد) هذه النبتة غنية جداً بالمياه .. أحيانا كان غذاء للبهائم ولكن بنسبة قليلة جداً لان الكثرة منها تعمل تخمة للبهيمة معليش ابوحسين .. قلنا نعمل تأصيل للرجلة تراثياً

حبيبنا أستاذ علي
ياخي البوست للجميع و كل من يحب ملاح الرجلة له الحق في المشاركة و الدلو بدلوه تأصيلاً و حباً في ملاح الرجلة
و دائماً مداخلاتك مثمرة و مدنكلة زي ملاح الرجلة
أخد راحتك يا حبيب

تحياتي يا راجل يا طيب

Quote: بس اوع يكون اللجنة حا ينبسق منها عدة لجان يا ابو حسين ,,, بالمناسبة دي معزوم عندنا غداء بي رجله ,,, بس جيب معاك الخبز والكسرة والتحلية وتكون صينية بسبوسة هههههههههه يا حليل زمن صوانيك يا حبيب والله اشتقنا ليها .. وسجلني معاكم في القائمة يا حبيب ,, قلنا نمر ونسلم . تحياتي : ياسر العيلفون ....

أهلاً بيك أخونا ياسر
لا ما عندنا لجان بتنبسق و لا شي ....
لجنة و حلة طوالي ....
شكراً على العزومة و إن كانت مشروطة بشروط ليست تعجيزية ....
يا سيدي البسبوسة و الباسطة و كل التحليات موجودة و البيت بيتك تشرف في أي وقت ....

تحياتي يا غالي

اهم شي في ملاح الرجلة ما تكون لي عدس بي رز
تاني الرجلة والقرع بعد تعملهم دايرات كسرة وموية وشطة وبصل وتعجنهم
واهم شي لو ما شبعت ما تحاول تعجن واحدة جديدة

حاج العوض المغترب في الرياض ...
يا حليلك إتا من زمن الناس بتعمل حله للغدا ...
يابا هن ٣ تمرات بدل شاي الصباح قبل صلاة الضهر
تخش في الملطم بتاع البوش الشيرنق بتاعو ١٠٠ جنيه
والوجبه التانيه غدا وعشا بعد صلاة المغرب وغالبا
طماطم وبصل اخدر مرات بي مويه وكسرة ومرات
تكون بي دكوه ورغيف إذا وجد المال أو توفر في
المخبز ... سمعتا بي (معيشة" ضنكا) ... دي معيشة
غالبية الأهل في هذا البلد ...
كدي النشوف تكلفة حلة الرجله دي كم :-
بصل ١٠٠ جنيه من ٥ لي ٧ حبات بصل متوسط الحجم.
زيت بي ١٠٠ جنيه ياداب يحرم البصل ...
لحم كيلو إلا ربع ٧٥٠ جنيه (الحله لحم) ...
رجله ٣٠٠ جنيه ٣ ربط ...
شمار اخدر ١٠٠ جنيه عدد ٢ ربطه ...
عدس نص كيلو بي ١٠٠ جنيه ...
علبة صلصه بي ٢٠٠ جنيه
توم بي ١٠٠ جنيه ...
قرفه وفلفل اسود و ملح وشطه قول ١٠٠ جنيه.
المجموع = ١٨٥٠ + النار (غاز او كهربا او فحم او حطب)
قول ١٥٠ جنيه يبقى التكلفة ٢٠٠٠ جنيه ...
يعني لو عملتا ١٠ حلل فقط في الشهر بالميت داير ٢٠ مليون ...

يا حاج إنتا بترص الرجله والمدام بتحش ولا بترص وتحش براك؟؟؟
😛😛😛😛😛

Quote: اهم شي في ملاح الرجلة ما تكون لي عدس بي رز تاني الرجلة والقرع بعد تعملهم دايرات كسرة وموية وشطة وبصل وتعجنهم واهم شي لو ما شبعت ما تحاول تعجن واحدة جديدة

الناس مزاجات يا عربي كوستي انت ...
العدس هو الاصل و الرز دخيل علي حلة الرجلة لكن برضو حلو و ليه معجبينو ...
اهم شي مع صحن ملاح الرجلة يكون جنبو طوالي صحن الشطة و الملح بالليمون ....
و العيش الحااااااار ....

اي حاجة تانية ترف ساكت 😂😂

والعيش الحار ده يجيبوهو من وين!!؟؟؟؟
الازمة انتهت ولا شنو!!؟؟

سلام ابوحسين وضيوفو
الرجله من الوجبات المحببه لكن للاسف الايام دى تمشى السوق كان ما قالو ليك دى رجله ماتصدق .ساقها رقيق (زمان كنت بحب اشيل كم وواحده اخرت صفقها واكل السيقان وبستمتع بمذاقها جدا)

Quote: اصعب أنواع الطبيخ ( الرجلة ) لا بد من الحرص على الكميات أقل خطأ يفشل الطبيخ

عمنا الحبيب على
ماعارف غايتو لكن باقى لى طبيخ البامبى وطبيخ القرع اصعب منهم

الذ طبيخ استمتع بى عملو قبل الاكل .......واطبخو بالفحم والكانون لحدى هسه

السلام عليكم ابو حسين والرجلاب


ياتو رجله بتقصد

لكن بيني وبينك الاتنيين رهيبات انا غايتو الا خشمي يوجعني في الاولي وخلاص بس

تحياتي لي سيد البوست والضيوف الكرام..
انا من المولهين بيها لكن القاوت منعني منها بسبب العدس..ام الاولاد بقت تعملها لي
بالرز لكنها ما حلوة..انا من انصار عجنها بالمويه والملح والشطة الحمرا الله الله..

Quote: حاج العوض المغترب في الرياض ... يا حليلك إتا من زمن الناس بتعمل حله للغدا ... يابا هن ٣ تمرات بدل شاي الصباح قبل صلاة الضهر تخش في الملطم بتاع البوش الشيرنق بتاعو ١٠٠ جنيه والوجبه التانيه غدا وعشا بعد صلاة المغرب وغالبا طماطم وبصل اخدر مرات بي مويه وكسرة ومرات تكون بي دكوه ورغيف إذا وجد المال أو توفر في المخبز ... سمعتا بي (معيشة" ضنكا) ... دي معيشة غالبية الأهل في هذا البلد ... كدي النشوف تكلفة حلة الرجله دي كم :- بصل ١٠٠ جنيه من ٥ لي ٧ حبات بصل متوسط الحجم. زيت بي ١٠٠ جنيه ياداب يحرم البصل ... لحم كيلو إلا ربع ٧٥٠ جنيه (الحله لحم) ... رجله ٣٠٠ جنيه ٣ ربط ... شمار اخدر ١٠٠ جنيه عدد ٢ ربطه ... عدس نص كيلو بي ١٠٠ جنيه ... علبة صلصه بي ٢٠٠ جنيه توم بي ١٠٠ جنيه ... قرفه وفلفل اسود و ملح وشطه قول ١٠٠ جنيه. المجموع = ١٨٥٠ + النار (غاز او كهربا او فحم او حطب) قول ١٥٠ جنيه يبقى التكلفة ٢٠٠٠ جنيه ... يعني لو عملتا ١٠ حلل فقط في الشهر بالميت داير ٢٠ مليون ... يا حاج إنتا بترص الرجله والمدام بتحش ولا بترص وتحش براك؟؟؟ 😛😛😛😛😛

البسمع كلامك الاشتر دا يقول حلة الملاح اصبحت من الاشياء المهددة بالإنقراض ...
انت قعدت في السودان و قعدت تتجرس ... !!!!
الناس عايشة رغم كل شي
و ما قادر افهم الدخل كلامي عن ملاح الرجلة بي هترشتك دي شنو ؟؟؟؟
ظروف و ان شاء الله ينصلح حال البلد ...

تصدّق عندى واحد صاحبي بعد الحلّة طبطت
قامت وقعت انكشحت
هسى ده يعملو فيهو شنو

يا ابو حسين : الرجلة تظبط بى :

- البصل الاحمر
- رشة عدس
- لحم ضان
- شطة بالدكوة

وبعد داك اقعد وغنّى قومى بينا يا الحَلّة .

بالله دا بوست ليك في الظروف دي! يا كوز يا فقر

Quote: السلام عليكم ابو حسين والرجلاب ياتو رجله بتقصد لكن بيني وبينك الاتنيين رهيبات انا غايتو الا خشمي يوجعني في الاولي وخلاص بس

ههههههههههه...كنت مدبرس يا عباس بقيت اضحك
براي زي المجنون.

لعناية ابا حسين :الرجلة بالكسرة و فيها سلطة فيها طماطم بصل ليمون شطة
خضراء و حمراء و كلو يتلخبط مع بعض.

بايتة ولا صاحية

عزالدين محمد عثمان غيرت عنوان البوست يا اخوي بقى كدا

Quote: زغبير حارس مرمى الهلال والسودان السابق في

Quote: عزالدين محمد عثمان غيرت عنوان البوست يا اخوي بقى كدا

ابدا والله لم اقصد ولكنه منبر بكري افتح اي بوست
عشان اقرأ ولا اتداخل يجيني عنوان زغبير ده
في زملاء قبلي احتجوا على نفس الموضوع لدى بكري ولكن لم يتم
الاصلاح..
اعتذر بشدة على ذلك واتمنى ان لا يتغير مرة اخى..
ولك مودتي

برضو اتغير يا عزالدين ....
و المشكلة من عندك لغاية بكره بحاول اشرح ليك بالصور علشان تفهم الحاصل شنو ....

Quote: البسمع كلامك الاشتر دا يقول حلة الملاح اصبحت من الاشياء المهددة بالإنقراض ... انت قعدت في السودان و قعدت تتجرس ... !!!! الناس عايشة رغم كل شي و ما قادر افهم الدخل كلامي عن ملاح الرجلة بي هترشتك دي شنو ؟؟؟؟

بلاهي شايف كلامي أشتر ...
في السودان الآن الثقافة بتاعت التشهي دي الناس خلتا
لأسباب كتيره خوفا وحرجا وعشان ما يدوك بونيه ...
لسع ما وصلنا محطة الجرسه ... بالعكس مستمتع عل الاخر ...
رسالة الهترشه واضحا ... داير أقول ليك بطل حندكا ...
هسع يعني زعلان ونقنع من الإجابة على سؤالي ولا ككيف ...

انا الاول في الصف والله زكرتنا بالايام الخوالي كمان لو معاها الكداد

في السودان بنسمع ان الرجلة فيها كمية كبيرة من الحديد..
والامريكان بيقولوا الحديد في الدم بيقوي المناعة ضد الكرونا...
بس السؤال الاول : هل الرجلة دي موجودة في السيوبر ماركت
في امريكا..والاسم شنو بالانجليزي!!
السؤال الثاني:: شايفاكم صعبتو طبخ الرجلة صعوبة شديدة وكأن الوحيد
البيقدر يطبخ الرجلة هو طباخ قصر الاليزيه الفرنسي، وهو امهر طباخ في العالم
وصاحب اعلى مرتب حكومي في العالم.. فهل فعلا طبيخ الرجلة بالصعوبة دي!؟؟
ولا انتو بتبالغو حبتين عشان بتحبو الرجلة!!!!

ناس بيتنا كلهم ما بحبوا الرجلة للأسف
وحينما أشتريها من السوق المدام {{ ترزعها }} بعيد وترميها وكأن الرجلة مصابة ب كوفيد 19
نحن 3 فقط من ناس البيت الذين يحبون الرجلة بشراهة
اللي هو انا
وعندنا عصفورتين اسمهم كوكتيل ضكر ونتاية متزوجين طبعا ولكن سنة كاملة لم تبيض الأنثى
وسبحان الله بعد أن كنت اضع لهم بقايا الرجلة
كانوا ياكلونها بشراهة
وحينما تشرق الشمس ولا صفقة ما نلقاها
وبعد ذلك بدات الأنثى تبيض
والله قلت لي ناس البيت ما عرفت دي رجلة وللا { عشبة بن علي اليمني } ؟؟؟؟
الطريف بعد حادثة البيض دي نسوان كتااار من اللايء كن يصمن معنا رمضان 30 يوم
بدأن ياكلن الرجلة لزوم اعادة التبويض !!!!!
قال سن اليأس قال !!!
ياخ عالم العصافير هذا لايقل خبثاً عن عالم المتزوجين
فقد أتت عصفورة دخيلة انثى وكانت تغازل الذكر الذي كان يتحاوم في القفص
بينما الزوجة المسكينة كانت ترقد في البيض
قوم اتعاور يا ابوحراز عشان تقبض الأنثى
وعمك الضكر بدل يكون معه واحدة تكون معه اثنين !!!
وحينما حاولت خداعها بالدخول للقفص
فجأة غدر بنا الذكر وتسلل وخرج وطار مع الأنثى الدخيلة
وضحكتني المدام كثيرا وقالت لي { لو فيهو خير ح يرجع }
علي بالطلاق لسه مارجع
والانثى الحاضنة لم تكن تعلم بهذه الدراما العجيبة والتي دارت ما بين زوجها الخائن والعصفورة { الشلابة }
وحينما خرجت لم تجد ابو القدح ورفضت حتى اليوم ان تحضن بيضها
لأنهم كانوا يتناوبون في حضن البيض
المشكلة بقت ما بتاكل الرجلة !!!!!
قال لو فيهو خير ح يرجع قال

قالت الحكماء: والعاقل لا يأكل رجله
سلام أبوحسين وتحايا ....

.