اعلان رغبه فى الزواج

02:22 PM December, 05 2020

سودانيز اون لاين
Asim Ali-
مكتبتى
رابط مختصر

فى صفحه على الفيس اسمها بفتش لى شغل ...عندى شغل) نشر شاب وطالب جامعى اعلان طلب زواج

Quote: السَلآْم عَلْيُكّمٌ وٍرٍحَمُةّ الله وٍبُرٍكآتُهْ انا طالب جامعي بدرسة هندسة كهرباء العمر20 اريد الحلال ما عندي شروط عن العمر او الحالة الاجتماعية (بكر .مطلقة. ارملة) شرطي انو تكون قادرة تصرف نفسها لحدي ما اخلص الدراسة وتكون من الخرطوم او الجزيرة # الجادة وعايزة الحلال ممكن تجيني في الخاص♥

اعلان عرض الزواج من نوع مختلف ذكرنى يوست يحكى عن طلب زواج غريب ورد فى المنبر قبل اسابيع

عمرو 20 سنة وداير يتزوج بهذه الطريقة ؟
وقال ما بفرق معاهو لا عمر لا غيرو
غايتو يا عاصم اخير السكات بس

يعني حايبقى هو الزوجة وهي الزوج الى ان يخلص دراسة ولا الفهم شنو؟
غايتو شباب الزمن ده الفيهم اتعرفت

طرح واضح جدا..
ده زول ممكون ساي عرس شنو😁😁😁

عاصم
تحياتي
يا جماعة الطرح بتاع الراجل وااااااضح
و الواضح ما فاضح
و اهم كلمة في الموضوع دا كله
"حلال"
و تنكح المرأة لاربع
و الراجل عايز ينستر يا اهلنا
دي فيها حاجة يا ابوسن
و النوع الطالبو الراجل دا رااااااااااااااقد

Quote: و النوع الطالبو الراجل دا رااااااااااااااقد

ازيك صديقي عماد
ليك وحشة وغياب
وشكرا لحفظك حقوق هذا الشاب
والوقوف في صف الباحثين عن الزواج
بس ماقلت لي : راقد بوين؟

يا عمدة ما قلت شي
لكن هو متين شم صناحو زاتو
والزواج دة ما ممارسة جنس فقط وتفريغ شهوة
الزواج ليس نزوة
بل امر الزواج مختلف ومسؤوليات وواجبات مختلفة
وفيهو ولادة واطفال وتربية
زولنا دة مفكر في امر واحد بس مافي غيرو
كأنه يبحث عن ولا مافي داعي

سلام عليكم جميعا
موضوع زواج العانس و المقتدره ماديا وبعض الباحثات عن الامان رغم القدره الماديه (ضل راجل ولا ضل حيطه) ظاهره موجوده فى المجتمع لكن ماوجدت حقهها من التناول فى الصحافه المشغوله اما بالصراع السياسى او بالفن الهابط والكوره.
من جهه تانيه الشباب طوال سنوات طوال مضغوط بين التعليم او بين السعى لجمع المال لاجل الاسره او لاجل احلامو وشايفين من يموت عطش فى الصحراء بحثا عن الخروج من البلد ومن يموت غرقا فى سمبك وشباب سقط فى فخ المخدرات وطريق اللامبالاه ...... الخ
حتى الازواج المسئولين عن اسر البعض من صعوبه الحياه اصبح يهرب من الاسره حتى من طلاق للزوجه وتركها ترزح بمسئوليه تربيه الابناء والصرف عليهم.
زى الشاب دا ربما حاول يكون عقلانى(لو حاولنا نشوف الموضوع من زاويه شوفو وشف الطرف التانى الممكن يرتبط بيهو) وحاول يستفيد من ظاهره حاصله واستخدم الوسائط واحد ماكمل قرايه وداير يكمل قرايه عشان مستقبل افضل وعرضو عباره عن تلاقى مصالح وتكامل اختياجات متبادله ورغم انو ماوضع موضوع تصرف عليهو واضح لكن موجود بين السطور .
الشريحه البخاطبها الشاب موجوده فى المجتمع ومن فئات مختلفه المتعلمه والاميه صاحبه مهنه ودرجه رفيعه الى صاحبه عمل حر ودخل جيد فى حدود الستر
حتى البنات بدت تظهر حالات زى دى بين تنشن على زول وتكون صريحه انها دايره الستره ومواصله حياتها واحيانا تطفح القصه على الوسائط فى شكل هزار فى القروبات او فى تغريدات

فى السودان الحاله الاقتصاديه خلقت نماذج كتيره للزواج كقضيه من قضايا الشباب لم تجد حظها من النقاش وطرح الحلول بل تعقدت بتعقيد الاوضاع داخل اللسودان
من اخر تقليعات الزواج (زواج بوكو) عقد بمهر رمزى وتتخارجو
طبعا ماذا بعد العقد ؟
سكن ومعيشه ....الخ دى فى انتظار صحافتنا تصحى وتتقصى التجارب دى وتورينا وصلت وين ؟؟

Quote: ازيك صديقي عماد ليك وحشة وغياب وشكرا لحفظك حقوق هذا الشاب والوقوف في صف الباحثين عن الزواج بس ماقلت لي : راقد بوين؟

يا ود التاج
خالص التحايا
انت عايز مثنى و ثلاث و رباع؟
ههههه

نعلكم قايلينو داير يعرس جد جد !
دة داير الخاص مو العرس

كلمة واحدة بتفضح الشاب المراهق دا
وهي كلمة ما عندو مشكلة في العمر
يعني لو عمرها 70 وقادرة مادياً على إعالة نفسها
ما عندو مشكلة يجي يقضي الدايرو ويروح
بعدين الزواج دا شراكة ما زي شراء اي سلعة وما فرقت لو طلعت مغشوشة
أنا لو عاوزة إشتري عربية بيوديها للميكانيكي
يأكد لي صلاحيتها لي
ما بالك بشراكة عمر وأبناء وأسر
لو كتب إنه عاوز الزواج وما عندو إمكانية مادية لأنه طالب
كان ممكن يدي القراء صورة أفضل
ويبدا التعارف لأنه دا الخطوة الأولى وبتتكشف فيه
حاجات أهم لبناء أسرة مستقرة أكثر من أهمية المال
أهم شيء التوافق والتناسب في معظم الحاجات

Quote: نعلكم قايلينو داير يعرس جد جد ! دة داير الخاص مو العرس

يا احمد
الزول الكايس شعل الخاص دا فى قروبات فى الفيس مكان الحاجات دى والزول الدايرها صريح وواضح كان ولد كان بت

Quote: الشريحه البخاطبها الشاب موجوده فى المجتمع ومن فئات مختلفه المتعلمه والاميه صاحبه مهنه ودرجه رفيعه الى صاحبه عمل حر ودخل جيد فى حدود الستر حتى البنات بدت تظهر حالات زى دى بين تنشن على زول وتكون صريحه انها دايره الستره ومواصله حياتها واحيانا تطفح القصه على الوسائط فى شكل هزار فى القروبات او فى تغريدات

اها يا ود التاج
جاتك في قبولك
عاصم جابا ليك على بلاط
شد حيلك ساااااي

سلام و محبة

لكن هو متين شم صناحو زاتو

تم تغير القانون البلجيكي في منح الجنسين
الحق في ممارسة الجنس من سن ١٤ بدلا
من ١٦...قال عشرين و متين شم صباحو
اصحا يا عرس...معقول ا ناس لمتين تسبحو
عكس التيار...
اكتر مقطع عاجبني في الغنا السوداني هو
ما جن حبوباتي في اخر الصفوف اتبلمن

عاصم و ضيوفك سلام
سواق وعارض نفسه في السوق

عليه بالصوم فإنه له وجاء ، الزول ده ياسر الحركة الشعبية شمال

يا عمر لم اتوقع ان تفوت سخريتي علي من هم مثلك
شفعنا مع العولمة بشمو صناحهم من 12 سنة
ولا يفوتك عليك ان الوضع الاسري عندو دور في سن المراهقة
زمان بقولو اولاد الجزارين ببلغو بدري
وبرضو الاولاد العندهم معرفة بالثقافة الجنسية
عموما
ما اظن يجيك شاب في العشرين يطلب يد بتك وتديهو

زول واضح عاوز الزواج من أجل
اعفاف نفسه
وين المشكلة
هناك من يرغبن في مثل
هذا الشاب
وهن يتكفلن بالنفقة وكلهن رضا
اذا حصل قبولا وايجاب بين الطرفين
فلا داعي لشفقة النساء على المرأة
ولا خوف على الشاب
انتم/ن بس قولوا خير

الأخ أحمد
ما هو ما براه
الشباب/الشابات الما متزوجين
من عمر 14 لحدي 40
كلهم لهم/لهن نفس الرغبات
فليه الدين والمجتمع عمل شروط وتقاليد
بعضها جيد وبعضها غير الجيد لمسألة الزواج
مش عشان يعلي من شانها وما تصبح حاجة هينة ولعبة
ممكن لو عنده مشكلة عدم قدرة على ضبط شهواته
يبحث عن علاجها مع المختصين
أهو الأخ منتصر ردد ليه حديث الرسول عن فايدة الصوم
الناس لما تتشدد في مسألة الزواج دا كله تحرز من الطلاق
ومستقبل أطفال قد يتدمر والسبب كان شهوة ما ضبطها العقل
وكاسوا ليها للحل السريع
أنا مع تسهيل الشروط المادية للزواج لأقصى حد
لكن ضد أي تساهل مع الشروط المؤهلة لبناء حياة زوجية آمنة

Quote: زول واضح عاوز الزواج من أجل اعفاف نفسه

القضيه فى ارض الواقع ابعد من كدا .
تتوقع الشاب دا يتزوج متين بشكل طبيعى حسب الكتالوج الاجتماعى النظرى ؟
بكمل القرايه ولقى شغل وبعدين بلم قروش عشان يجهز للعرس وحسب طلبات العروس -بيت .عربيه . شهر عسل ,تكاليف زواج ممكن تفتح تفتح بيت ......الخ
بعد كم سنه يحصل الكلام دا ؟
التزاكو تجاه اسرتو بعد التخرج ؟ يعنى زول مصر يكمل تعليمو ويكون كطمةح شخصى ليهو وكواجب والتزام اجتماعى واقتصادى تجداه اسرتو
.
.
الشاب دا ماقام بحاجه غريبه لكن اتعامل مع واقع وماكسر تقاليد او ابتدع شى ماموجود فى المجتمع غير انو عبر عن رغبتو فى الوسائط بدل مايستعين بالكتمان فى بحثو
.
حالات مختلفه وواقعيه حاجكى عنها وبعضهم اعرفه بالاسم
- لانسات يملن لقب _(د) قدام اسماههم مهنيا واجتماعيا
- واحده قبلت تتزوج وتكون رقم (3)
-واحده اتقدمت لرجل متزوج واولادو بعضهم طلاب فى كليات مرموقه ىفى نفس المؤسسه البعمل فيها طرفى مثالنا وهو وظيفيا مجرد موظف بسيط ربما بشهاده سودانيه ودخل متواضع .عرضت عليه التزامها بمساعدته فى تربيه ابنائه اذا تم الزواج
-واحده تزوجت بعد تامين الوضع الوظيفى والاجتماعى بحرف (د) وتزوجت قريب لها اقل تعليما منها وعاطل عن العمل وملكته وسيله كسب فشل فى ادارتها واصبح عاله عليها لاحقا
-موقف شخصى :من سنوات وانا مساعد تدريس واغلب عملنا فى المعمل نكاد نكون محبوسين لضغط العمل طوال 9 ساعات داحل مبنى المعامل ووتواصلنا مع ناس المعامل التانيه بين اجتماع لفطور او شراب شاى . زميله تعمل فنيه فى تخصص مخالف لتخصصى حصلت على الماجستير وقدمت السعوديه واخدوها وفجاه ورد اتصال منها مساء يوم تخبرنى فيه انها تم قبولها للعمل بالسعوديه و..و ,و....الخ والخلاصه تدور حول المرافق ووفهمت الموضع انو عرض زواج لاكون مرافق لكن عملت مافاهم واتمنيت ليها التوفيق فى الفرصه الاتيحت ليها وبعد داك استعانت بشيقيقها ليترك عمله ويسافر معاها ولاحقا تزوجت واخر ماعلمت عنها امتلاكها لمنزل فى حى المغتربين
.
نمسك شريحه تانيه محتلفه من نساء فى اعمال خاصه مربحه وبرضو نفس القصه الواحده تلجاء للزواج عشان البيت يكون فيهو راجل (احتمال تكون عندها تجربه قبل كدا فى الزواج وباوللادها لكن بعد يكبرو تبحث عن دفء الزوج دون اعتبار لفرق السن او الامكانات الماديخ طالما هى مقتدره)
.
دى امثله على حالات فى المجتمع وهى غيض من فيض لكن مالقت حقها من النقاش الواقعى بيعدا هم التنظير فى الاعلام والوسائط
لذلك تجد حاله من النفور والرفض عند البعض لكن دا مابنفى انها راس جبل الجليد لواقع لم يجد يغوص اليه

سلام عاصم

في رأي زولك دا غلبتوا القراية ساكت
مش قالوا صاحب بالين كضاب
خليه عليك الله يتخرج من كليته
بعديها لا ينتظر شغل لا يفكر في ماجستير
طوالي يفتش للحلال
في السياسة دا بسموه القفز فوق المراحل

سلام يا عاصم وضيوفه الكرام،
نصيحة لله الزواج في السودان والدول العربية معقد شديد
عواليق نخليها
والغرض الأساسي من الزواج تفريغ الرغبة الجنسية،
والواحد يقعد عمره كله عازب ويكبت رغبته حتى يحوش قروش الزواج و يتقدم
به العمر حتى رغبته الجنسية تقل ثم يتزوج، الفائدة شنو؟!

Quote: سواق وعارض نفسه في السوق

سلامات عارف
المهم يكون عندو رخصه قياده مناسبه