تاجر ينتزع مولد مستشفي

04:47 PM November, 30 2020

سودانيز اون لاين
عبدالحفيظ ابوسن-no where
مكتبتى
رابط مختصر

حكمت محكمة كوستي صباح اليوم لاحد تجار المدينة بتعويضه مولد كهرباء مستشفي كوستي وذلك نظير استحقاقات مالية من قبل التاجر علي وزارة الصحة التي عجزت عن دفع المبالغ المالية.. بعد ان قام التاجر بصيانة عربات وزارة الصحة

وتم تنفيذ الحكم ظهر اليوم وقام التاجر باستلام المولد من داخل المستشفي وسط دهشة وحيرة من قبل الناس

يقول العالمين بالامر
ان التاجر بمدينة ربك
سبق له ان استولي علي مولد مستشفي ربك
المبالغ المطلوبة منذ عهد الانقاذ
وكثير من الحديث حول اصل هذه الديون وكيفية تراكمها تزدحم به مواقع الولاية
وايضا طريقة تعامل الوزيرة معها

التاجر ده ما عنده رحمة ولا شفقة على المرضى داخل المستشفى لمن الكهرباء تقطع...
..وكيف يقبل قرار القاضي ....ومفروض كان يتبرع بالمولد للمستشفى ويكسب اجر..
...وبعدين القاضي ذاته مضر.....يعني ما لقى الا المولد الكهربائي.....مش كان يديه عربية من عربات المستشفى المليانة في حوش المستشفى..

جاء في الأثـر برواية عن الرسول صلى الله عليـه وسلم :

رحم الله امرئ سمحاً إذا باع، وإذا شرى، وإذا قضي وإذا إقتضى..


اللهم كملنا واتم لنا بمكارم الاخلاق..

Quote: .ومفروض كان يتبرع بالمولد للمستشفى ويكسب اجر

سلام يا إمتثال
تبرع ومفروض ما بتلمن مع بعض.
التبرع بجي طواعية من غير أي فرض من أي جهة.

الرجل لم يخطئ طالما أخذ حقه بحكم محكمة
لا نستطيع محاكمته أخلاقياً على تصرفه لأننا لا نعلم ما إذا كان مستطيعاً ليتبرع أم لا.
فلنفترض مثلاً أنه مديون، فهل يحق له التبرع بمال الدائنين.

Quote: حكمت محكمة كوستي صباح اليوم لاحد تجار المدينة بتعويضه مولد كهرباء مستشفي كوستي وذلك نظير استحقاقات مالية من قبل التاجر علي وزارة الصحة التي عجزت عن دفع المبالغ المالية.. بعد ان قام التاجر بصيانة عربات وزارة الصحة

يا شباب إنتو ركزوا على الخبر.. هو ما باع ليهم المولد ورجعه عشان ما دفعوا.. هو عمل صيانة لعرباتهم.. فكيف المحكمة تحكم له بالمولد؟.. حتى لو كان باع لهم المولد
فإن المحكمة ممكن تحكم ليه بعنبر فى المستشفى إن شاء الله يفتحه دكان، لكن المولد عليه ارواح ناس، ولو مات شخص فى عملية فإن المحكمة مسؤولة..

ولو المحكمة تعتمد حكم قرقوش فكان عليها الحكم على إدارة المستشفى بصيانة عربات التاجر. أبلد محكمة فى التأريخ. دا لو ما كانت متأمرة مع التاجر ومحاميه، وهذه صارت كثيرة ومتكررة هذه الأيام.

مرحبا امتثال
عشان لايترك الامر للتقدير العاطفي او غيرو صنعت القوانين والضوابط
ياتو قانون البخلي مدير عام وزارة يفرض في مؤسسة هامة بتقديراتو الشخصية الممكن يكون هو مستفيد شخصي منها

مرحبا حيدر
بالطبع من يتمسك بأخلاق الدين هو الاعلي سلوكا
المستغرب ليه وزارة الصحة ما كان تديهو مولد الوزارة بدل المستشفي

Quote: المستغرب ليه وزارة الصحة ما كان تديهو مولد الوزارة بدل المستشفي

أي نعم والله،

وحق ليك أن تستغرب ونستغرب معاك من هذا الحُكم القضائي الغريب!

ولكن أخي عبدالحفيظ، وليك التحايا، هل الحكم ابتدائي؟ أم استئنافي؟

غايتو الحمد لله بدت تظهر معادن الشعب السوداني عند الشدايد ،، قبل يومين تلاته اتحاد الفنانين بعترض علي اغلاق الصالات ومنع الفلات وسبقو بالاحتجاج اصحاب الصالات

جشع ،، طمع ،، تخلف ،،، جهل

وحيث ما تكونو يول عليكم

فعلا حافظ
لا مجال للحكم الاخلاقي ابدا
هو ألتجأ للقانون واستفاد منو .
المحاسبة لمدير عام الوزارة السمح بالصفقة او الاتفاق دة
والوالي ووزيرة الصحة أكيد عندهم علم بالقضية دى وما كانت سرية

كان يدوه عربات .... ( بس ما عربات اسعاف أو تحصين أو وبائيات )

عدم مسئولية من القاضي ومن الولاية، كونو يشتكي ويعوضوه دي ما فيها حاجة
لكن نتيجة الحكم ما يتضرروا منها ناس أبرياء وين روح القانون؟ ، دي منشأة عامة بيتعالجوا فيها الناس
يشوفو ليهو اي مصيبة تانية يدوهو حقوقو.

يمكن عندهم مولدين وما فارقة معاهم

يا ابوالريش
بل
مولدين
مولد مستشفي ربك
ومولد مستشفي كوستي
وعربية اسعاف
شوية كدة كان قلع المستشفي كلو

مرحب ابوجودة
ما أظن في حكم نهائي . أي حكم قابل للاستئناف قبل انقضاء مدة محددة

ابدا معاوية في تقديري
في ناس اصلا تجار كوارث وحروب .
ومغيرين وعقوقين وعديمين انسانية
باقي الشعب المقهور يحتاج للوعى كثيرا من الوعي

Quote: فعلا حافظ لا مجال للحكم الاخلاقي ابدا هو ألتجأ للقانون واستفاد منو . المحاسبة لمدير عام الوزارة السمح بالصفقة او الاتفاق دة والوالي ووزيرة الصحة أكيد عندهم علم بالقضية دى وما كانت سرية

بالضبط كدا يا أبو سن
الناس جات صبت غضبها على صاحب الحق وعلي القاضي
مع إنو ألف باء تاء ثاء المعاملات المدنية بتقول إنو العقد شريعة المتعاقدين ولا يمكن تغييره إلا بموافقة أطرافه.
القاضي حدوده هي إلزام الطرفين بتنفيذ العقد بعد تبين صحته وخلوه من الموانع
ولا يمكن للقاضي إجتراح بدائل غير المنصوص عليها في العقد إلا بموافقة الطرفين.
يعني القاضي لا يمكن يكون حكم بالمولد ما لم توافق على ذلك إدارة المستشفى وبعد قبول الدائن بالمولد لتسوية الدين.
وحتى بعد حكم المحكمة وقبل التنفيذ المستشفى كان ممكن تلتزم بالعقد بدفع الإستحقاقات المالية وتحتفظ بالمولد.

يبقى كل المسؤولية المترتبة على نزع المولد من المستشفى بتقع على الجهات الحكومية من مدير المستشفى وإلى وزيرة الصحة الإتحادية

والله يا معاوية ابتلينا بقيادات نسأل الله السلامة

والله يا معاوية ابتلينا بقيادات نسأل الله السلامة

امتثال

Quote: التاجر ده ما عنده رحمة ولا شفقة على المرضى داخل المستشفى لمن الكهرباء تقطع... ..وكيف يقبل قرار القاضي ....ومفروض كان يتبرع بالمولد للمستشفى ويكسب اجر.. ...وبعدين القاضي ذاته مضر.....يعني ما لقى الا المولد الكهربائي.....مش كان يديه عربية من عربات المستشفى المليانة في حوش المستشفى..

التاجر وعرفنا عنو ماعندو علاقة بالانسانية
طيب بالنسبة لي وراق والي الولاية
ومدير الصحة "سارة "
جوز الهنا دا ما قادر يحل مشكلة مولد كيف ح يقدروا يحولو مشكلة ولاية باكملها
على فكرة المولد عبارة عن ثمن عربية مدير الصحة