أصدر والي الخرطوم قرار بفرض حظر التجول في مدينة أبودليق ابتداءا من عصر اليوم إلي صباح الأحد ومن ثم يوميا من الأحد الي الخميس من ٤ عصرا الي ٧ صباحا ... قرار والي الخرطوم أشار بأن الحظر حفاظا على السلم والأمن الاجتماعيين في منطقة أبودليق .. تدخل القوات المسلحة ممثلة في المنطقة العسكرية المركزية التي قامت بإلغاء أي تصديقات او قرارات بشأن نظارة الكواهلة بمنطقة أبودليق ... مدينة أبودليق هي عاصمة قبيلة البطاحين ....
Post: #2 Title: Re: هل ما يدور في مدينة أبودليق هو إرتدادات مس Author: Salah Zubeir Date: 11-19-2020, 06:33 PM Parent: #1
مصدر الخبر قناة الخرطوم الشريط الأخباري ال بالأحمر
Post: #3 Title: Re: هل ما يدور في مدينة أبودليق هو إرتدادات مس Author: نعمات عماد Date: 11-19-2020, 06:34 PM Parent: #1
سلام عليكم هل للبطاحين و الكواهلة حركات مسلحة؟ شكلك أتخصصت في الحركات القبلية المسلحة😁
Post: #4 Title: Re: هل ما يدور في مدينة أبودليق هو إرتدادات مس Author: Salah Zubeir Date: 11-19-2020, 06:53 PM Parent: #3
Quote: شكلك أتخصصت
لغاية هنا كويسين يا دوك ... بكره تعالي قولي صلاح بقي عضو ولا رئيس حركة قبلية مسلحة ... عقار امبارح في النيل الأزرق ادانا وصية فشنك ... قال الداير يتمرد اول شي يأمن رقبتو ويمشي يدسا حتى يعلن تمرده ... وهو ما عارف الدس عند الدواس عندنا عيب كبير ...
Post: #5 Title: Re: هل ما يدور في مدينة أبودليق هو إرتدادات مس Author: صديق مهدى على Date: 11-19-2020, 07:05 PM Parent: #4
صلاح الزبير كلامك كتير الظاهر عليك من ناس البشير بس اوعاك للنعرات تثير السودان لسع بخير كان عندك قدح قدمه لحركات التهويد والتنصير عليك اعادة التفكير ياود الزبير
Post: #6 Title: Re: هل ما يدور في مدينة أبودليق هو إرتدادات مس Author: Salah Zubeir Date: 11-19-2020, 07:05 PM Parent: #4
الكيزان جهزو الملعب للجهوية والقبلية ... وجاءت إتفاقية جوبا ومساراتها وخلطت الحابل بالنابل ... ديل هسي الكواهله .. بكره الحسانيه في عدة مناطق ...
Post: #7 Title: Re: هل ما يدور في مدينة أبودليق هو إرتدادات مس Author: محمد البشرى الخضر Date: 11-19-2020, 07:09 PM Parent: #6
Quote: سباب حظر التجول في أبودليق بشرق النيل*: ___ ١. قبل حوالي عام أعلنت قيادة قبيلة الكواهلة الدلقياب عزمهم إنشاء نظارة لهم في أبودليق. ٢. في بداية هذا العام اعلنت نظارة البطاحين ومقرها أبو دليق علي الفكرة وأعتبرتها خطوة فيها عدم إحترام وتقدير للبطاحين الذين إستضافوا الكواهلة وصعدت الأمر بإعلان مقاطعة إجتماعية وتجارية للكواهلة الدليقاب وهددت بتطليق جماعي وفوري للمتزوجين بين القبيلتين. ٣. تدخلت عدت وساطات وهدأت الأمور قليلا خلال العشرة شهور الماضية بعد أن أصدر والي الخرطوم السابق قرار يمنع إنشاء إدارات أهلية جديدة. ٤. تصاعدت الأحداث مؤخرا بعد إعلان الدليقاب مرة أخري عن إحتفال السبت القادم لتنصيب ناظر عليهم . ٥. بدأت كلا القبيلتين في الحشد والتعبئة ليوم التنصيب المعلن. ٦. أعلن الدليقاب مشاركة حميدتي في الإحتفال إلا أن مكتبه بمجلس السيادة اليوم نفي ذلك. ٧. اليوم أصدر والي الخرطوم حظر تجول لمنع الإحتكاك الوشيك.
منقول
Post: #8 Title: Re: هل ما يدور في مدينة أبودليق هو إرتدادات مس Author: Salah Zubeir Date: 11-19-2020, 07:10 PM Parent: #6
Quote: الظاهر عليك من ناس البشير
صديق دي شتيمة تستحق نوصلا لي سيدك ربنا يديهو الصحة والعافية ... ياخي البشير الكيزان الجد جد اتبرو منو ...
Post: #9 Title: Re: هل ما يدور في مدينة أبودليق هو إرتدادات مس Author: Asim Ali Date: 11-19-2020, 07:15 PM Parent: #8
المنطقه دى مش حصل فيها استقبال لحميدتى السنه الماضيه ؟
Post: #10 Title: Re: هل ما يدور في مدينة أبودليق هو إرتدادات مس Author: عمر التاج Date: 11-19-2020, 07:15 PM Parent: #8
ارتدادات ممكن .. لكن نتائج ، وقتها ما جاء.. والله مايجيبه .. المشكلة يا ود البشرى يمعت انها لها جذور بين كبرى قبائل البطانة
Post: #11 Title: Re: هل ما يدور في مدينة أبودليق هو إرتدادات مس Author: نعمات عماد Date: 11-19-2020, 07:33 PM Parent: #10
Quote: بكره تعالي قولي صلاح بقي عضو ولا رئيس حركة قبلية مسلحة ..
ما ظنيت الشوايقة يتمردوا، علا إتا ما مضمون😀
Post: #12 Title: Re: هل ما يدور في مدينة أبودليق هو إرتدادات مس Author: Salah Zubeir Date: 11-19-2020, 07:41 PM Parent: #10
الهبيب محجوب دا أظنو قبل أكتر من سنة ختاها واضحه وضوح الشمس منذ زمن الاختيار للمجلس السيادي ... قال أحزاب وحركات ومحاصصات في السودان دا بتزيد الطين بله ... قال السودان كلو زول فيهو داير يشوف انو ممثل في أجهزة الدولة السيادية والتنفيذية ... إلخ ... قال مجلس السيادة دا يتكون من ٧ أشخاص يمثلون كافة أقاليم السودان وينطبق ذلك على الجهاز التنفيذي والتشريعي ... قبل سنة من الآن كنتا بشوف كلام محجوب موغل في الجهوية والقبلية ... اليوم بتو على قناعة أولا بي بعد نظر الهبيب محجوب وثانيا لا أري أي حل آخر للوعسه النحنا فيها دي غير الإعتراف بي دواء الجهوية مادام اصلا الناس متفقة على الفدرالية ...
Post: #13 Title: Re: هل ما يدور في مدينة أبودليق هو إرتدادات مس Author: Salah Zubeir Date: 11-19-2020, 08:10 PM Parent: #12
Quote: المنطقه دى مش حصل فيها استقبال لحميدتى السنه الماضيه ؟
عاصم يا حبيب تحياتي ... سعالك دا نظام دردقه ولا شرك يعني ... أنا شخصيا لا علم لي بي استقبالات حميدتي الأسبوع الفات فما بالك قبل سنة ... على اية حال هات ما عندك إذا متوفر شيء وشكرا على المرور ...
Post: #14 Title: Re: هل ما يدور في مدينة أبودليق هو إرتدادات مس Author: Salah Zubeir Date: 11-19-2020, 08:26 PM Parent: #13
ود البشرى شكرا على المعلومات المنقوله من الواتساب ... اهو .. مرات الواتساب مفيد وأظن العبره في الإختيار ..
Quote: لكن النتائج ، وقتها ما جاء.. والله مايجيبه .. المشكلة يا ود البشرى يمعت انها لها جذور بين كبرى قبائل البطانة
يمعت دي شنو يا عمر ... تحياتي عمر ... والله يكضب الشينه ... وعليكم السلام دكتوره نعمات ... قرية أبوي تبعد ٢٥ كيلو جنوب المتمه عاصمة الجعليين ... ومع ذلك دمي يتكون من ٧٥% شايقي ولا زلت جعلي... شفتي التعايش السلمي والنسيج الاجتماعي في أسمى معانيه كيف ...
Post: #15 Title: Re: هل ما يدور في مدينة أبودليق هو إرتدادات مس Author: Asim Ali Date: 11-19-2020, 08:57 PM Parent: #13
سلام عليكم صلاح الزبير ماقصدت الا اذكر اناس رغم انى لما سالت مامتذكر وين فى شرق النيل لانو مره مشى فى عمق شرق النيل ومره اعتقد كان جهه الحاج يوسف المهم دا الفيديو بتاع مخاطبنو ليهم مفقرون بنفة مشاركتو فى الاحتفا المزمع قيامو وسبب المشكله
Post: #16 Title: Re: هل ما يدور في مدينة أبودليق هو إرتدادات مس Author: قسم الفضيل مضوي محمد Date: 11-19-2020, 09:21 PM Parent: #15
. شكلو السودان محتاج ليه لكم مليون سنة ضوئية عشان يلتحق بركب الامم المتقدمة . و كلما تقدم الزمن ثبت انه الحيز المكاني المسمى السودان يحتوي على شعوب متنافرة تضمر الكراهية لبعضها وكل شعب أو قبيلة ما راضية بالأخرى ...
Post: #17 Title: Re: هل ما يدور في مدينة أبودليق هو إرتدادات مس Author: Asim Ali Date: 11-19-2020, 09:35 PM Parent: #16
Quote: . شكلو السودان محتاج ليه لكم مليون سنة ضوئية عشان يلتحق بركب الامم المتقدمة . و كلما تقدم الزمن ثبت انه الحيز المكاني المسمى السودان يحتوي على شعوب متنافرة تضمر الكراهية لبعضها وكل شعب أو قبيلة ما راضية بالأخرى
الخيارات محدوده واغالبها غير مبشر الا خيار واحد هو القبول بالاخر والتعايش السلمى لكن عير كدا مافى الاالتناحر والصراع والكراهيه والحروب والغريبه انو ممكن تلقى اغلبهم بشيل كراهيتو بشرد بيها بعد تولع فى ارضو ووسط اهلو ويكون لسه يقطر كراهيه للاخر وعدم تقبل مافى حل غير الناس ببعض غير كدا الا يقولو للارض اقيفى عايزين انزل نفتتش كوكب تانى نعيش فيهو برانا
Post: #18 Title: Re: هل ما يدور في مدينة أبودليق هو إرتدادات مس Author: Asim Ali Date: 11-19-2020, 11:06 PM Parent: #17
صور متداوله منسوبه لمظهر من مظاهر الاحداث
@KhalidSelik ------ أنباء عن وساطة يقودها الشيخ/ الطيب الجد بأبو دليق لحقن الدماء بين البطاحين و الكواهلة.
Post: #20 Title: Re: هل ما يدور في مدينة أبودليق هو إرتدادات مس Author: Salah Zubeir Date: 11-20-2020, 07:19 AM Parent: #18
Quote: هيييع .. تذكرت الخليفة تور شين .. خليفة المهدي .. يقع فوقكم رقع زي ما حصل زمان .. دق البطاحين والكواهلة في المنطقة دق العيش .. وعلق حرامية الجمال في المشانق في السوق.
يا بريمه ... الكلام المستفز يرد عليهو بنفس الأسلوب ... مافي مشكلة يا بريمة هسع سوولكم تور شين ولا تور سمح وتعالوا ارقعو ودقو الرقعتوهم ودقيتوهم قبل كدا ... ولومك علي الدور دا الناس يخلصو الحساب القديم والجديد وخليفتكم عردتو لي ام دبيكرات ما بتكفيهو ... الناس حدهم معاهو عد الغنم ... بعدين اوع يكون مصدق السلام حا يجيبوهو بتاعين الجبهة الثورية ديل ... ياخي بتبالغ ... (الكفاح) المسلح متين بقي يسوي جضيمات وجعيبات ... ما لاحظتا الحكاية دي في القيادات ...
Post: #21 Title: Re: هل ما يدور في مدينة أبودليق هو إرتدادات مس Author: Biraima M Adam Date: 11-20-2020, 07:42 AM Parent: #20
Quote: يا بريمه ... الكلام المستفز يرد عليهو بنفس الأسلوب ... مافي مشكلة يا بريمة هسع سوولكم تور شين ولا تور سمح وتعالوا ارقعو ودقو الرقعتوهم ودقيتوهم قبل كدا ... ولومك علي الدور دا الناس يخلصو الحساب القديم والجديد وخليفتكم عردتو لي ام دبيكرات ما بتكفيهو ... الناس حدهم معاهو عد الغنم ... بعدين اوع يكون مصدق السلام حا يجيبوهو بتاعين الجبهة الثورية ديل ... ياخي بتبالغ ... (الكفاح) المسلح متين بقي يسوي جضيمات وجعيبات ... ما لاحظتا الحكاية دي في القيادات ...
ههههاي! .. يا ول أبا، النفيخ عمره ما ينفع .. حسي تور شين الصغير .. صال وجال في جوبا وجاب ليكم السلام.
أنتم ناس عزيزين ومكرمين في بلدكم .. وصقريتكم عجاجها واقف تجيب الضهبان .. تخلوا الناس يلقوا فوقكم فرصة ..!
أنضبطوا يا ول أبا .. يا ح نجوا غرابة غبش شينين .. ونملوكم سياط رقع .. !
بريمة
Post: #22 Title: Re: هل ما يدور في مدينة أبودليق هو إرتدادات مس Author: Biraima M Adam Date: 11-20-2020, 07:54 AM Parent: #21
القائد منى مناوي
القائد حميدتي
الرجال تحت الشوك .. شايف أنحنا مرقنا من فيافي الأرض .. وجيناكم الأن نضاف في الخراتيم .. أوعاكم تغيب عنكم هذه الصور .. نحن براعص* غاب ..
كلم الناس هناك .. قول ليهم أستهدوا بالله .. وإلا العصا لمن عصي .. --------------- * البرعص .. الأسد، النمر، الذئب .. وكل زي ناب .. البقارة يسمونه البرعص.
بريمة
Post: #23 Title: Re: هل ما يدور في مدينة أبودليق هو إرتدادات مس Author: Salah Zubeir Date: 11-20-2020, 09:10 AM Parent: #22
Quote: أنضبطوا يا ول أبا .. يا ح نجوا غرابة غبش شينين .. ونملوكم سياط رقع .. !
Quote: أوعاكم تغيب عنكم هذه الصور .. نحن براعص* غاب ..
كلم الناس هناك .. قول ليهم أستهدوا بالله .. وإلا العصا لمن عصي
هههههه مافي شك الكلام الزي دا بيسرع في حل مشكلة الشعوب السودانية سلما أم حربا ... والسلام يا سيد بريمه ما حا يحصل ... وحا نظل نلف وندور في الفاضي ما لم نصل لحلول لي زي كلامك الفي البوست دا وانا عارف وإنتا عارف انو لسع عندك الكتير الما قتو ... وياريت كلامك دا يصدر من قيادات حقيقية غرباوية قاعده جوا السودان دا وكلهم يحملون نفس ما تقول بس تنقصهم شداعتك الاسفيريه دي ... أهو في النهاية إنتا واحد مقفول في غرفة في ولاية امريكية خايف ومرتعش من كوفيد١٩ .... بعدين ماتنغش السودان دا فيهو ٤٠ مليون برعص ممكن يبقوا شينين برضك ...
Post: #24 Title: Re: هل ما يدور في مدينة أبودليق هو إرتدادات مس Author: Biraima M Adam Date: 11-20-2020, 01:47 PM Parent: #23
Quote: بعدين ماتنغش السودان دا فيهو ٤٠ مليون برعص ممكن يبقوا شينين برضك ...
ول أبا صلاح، وقت الباردة الناس تعرف تعرض .. وتطير صقرية فوق وتقع .. لكن يوم الحارة .. تظهر معادن الرجال .. أنتم معدن غير مجرّب .. حسي لو سخناكم ممكن تطلعوا "سبيدر*" ساكت .. يعنى الصقرية تطلع عرضة والسلام .. نحن جربونا .. وجربونا .. لقونا دهب مجمّر ..
وصيتي ما تهملوها .. نحن بقينا ملوك .. وإن الملوك إذا دخلوا قرية أفسدوها .. وجعلوا أعزة أهلها أذلة .. وكذلك يفعلون .. خلوا الكواهلة يسووا النظارة .. وتعاونوا علي البر والتقوي ..
ولو بقيتم علي الأثم والفجور القديم .. نحن الغرابة بنجيكم نمعطم معط .. ما نخلوا ليكم ريشة .. أسمعوا الكلام دا كويس وأرعوا .. --------------------------------------- * سبيدر بلهجة البقارة .. تعنى سبيكة مخلوطة بشي أخر ..
بريمة
Post: #25 Title: Re: هل ما يدور في مدينة أبودليق هو إرتدادات مس Author: Salah Zubeir Date: 11-20-2020, 03:04 PM Parent: #24
شوفو الهجايص البيعمل فيها الزول دا ... اعمل حسابك كوفيد١٩ قالو بدخل بي شق الشباك قوم اتنفض وقفلم بي الدلاقين .... شكلك اتفرجتا في فيلم اكشن هندي قريب دا ... الواقع هنا غير ...
Quote: نحن بقينا ملوك .. وإن الملوك إذا دخلوا قرية أفسدوها .. وجعلوا أعزة أهلها أذلة .. وكذلك يفعلون ..
Quote: أنضبطوا يا ول أبا .. يا ح نجوا غرابة غبش شينين .. ونملوكم سياط رقع .. !
Quote: الرجال تحت الشوك .. شايف أنحنا مرقنا من فيافي الأرض .. وجيناكم الأن نضاف في الخراتيم .. أوعاكم تغيب عنكم هذه الصور .. نحن براعص* غاب ..
Quote: كلم الناس هناك .. قول ليهم أستهدوا بالله .. وإلا العصا لمن عصي ..
Quote: ولو بقيتم علي الأثم والفجور القديم .. نحن الغرابة بنجيكم نمعطكم معط .. ما نخلوا ليكم ريشة .. أسمعوا الكلام دا كويس وأرعوا ..
Post: #26 Title: Re: هل ما يدور في مدينة أبودليق هو إرتدادات مس Author: محمد البشرى الخضر Date: 11-20-2020, 04:56 PM Parent: #25
الحمد لله المشكلة اتحلت
Quote: شبه اتحلت وخرج الكواهله من رحم الحقيقه واثبتوا ان من دعي لاقامة نظارة الكواهله ف ارض البطاحين من خارج المنطقه وهم نعرة علي القبيله ولايمكن تبديل جيرة وخوة البطاحين باقامة مملكه ناهيك عن نظارة ....
Post: #27 Title: Re: هل ما يدور في مدينة أبودليق هو إرتدادات مس Author: Biraima M Adam Date: 11-20-2020, 06:48 PM Parent: #26
ول أبا صلاح
والله العظيم كل القصة محاول أحفظ البوست فوق .. دي مشكلة سودانية .. وليس لأهل أبو دليق .. أها يا ول أبا .. العفو والعافية ..
أنت لسع ما فهمتني أنا بفكر كيف .. لما أكون عايز المشكلة في ال"فوكس" ..
أمسح لي أخوك في نافوخه ..
ود البشري جاب النجيضة .. أنا ماشي بعد دا ..
بريمة
Post: #28 Title: Re: هل ما يدور في مدينة أبودليق هو إرتدادات مس Author: Salah Zubeir Date: 11-20-2020, 08:55 PM Parent: #27
Quote: أها يا ول أبا .. العفو والعافية ..
يعافينا ويعفو عنا الله بس يا بريمه ...
Quote: والله العظيم كل القصة محاول أحفظ البوست فوق
ول ابا ... طبعا بي حليفتك دي أنا لازم اصدقك ... لكن بالتأكيد انا إمكن نجحت في جرك لي حقل ألغام من الصعب جدا تنفد منو وسوف تكنى بالمزيد من الكنى السالبة ... كان ممكن تكتفي بالمداخلة الأولى وردي عليها وتعمل رايح .. لكن قفلت الكرونا حاره ... شكرا للمشاركه المثمره ... ود البشرى دي المناظر ... الفيلم حا يبدأ قريبا ...
Post: #29 Title: Re: هل ما يدور في مدينة أبودليق هو إرتدادات مس Author: Mahjob Abdalla Date: 11-20-2020, 09:52 PM Parent: #28
Quote: عزمهم إنشاء نظارة لهم في أبودليق
دى الشفرة اللي دايما اوضح للناس الفرق بين الارض (لمن يستثمرها) و الحاكورة (السلطة) و بنحاول نوضح ما فيش حد برفض لاى زول يجى يسكن في اى مكان في العالم (ليس في السودان فقط) و لكن الرفض دائما يأتى عندما يحاول احدهم تأسيس دويلة او سلطة داخل سلطة. هذا هو ما كان يحدث في دارفور و قبل عامين او ثلاث في شرق السودان و السبب ان القائمين السودان لا يفهمون الفرق و حاولو انشاء نظارات (حواكير) لمجموعات اتت حديثا داخل السلطات التقليدية الموجودة من زمن بعيد.
و لذلك طالما الفكرة موجودة و الناس فاهمها بالمقلوب, قد تتكرر مثل هذه الحوادث.
Post: #30 Title: Re: هل ما يدور في مدينة أبودليق هو إرتدادات مس Author: محمد البشرى الخضر Date: 11-20-2020, 10:03 PM Parent: #29
سلامات يا الهبيب طيب و الحل شنو! الناس الاستوطنت و اتولدت و عاشت عمرها كله في مكان ولا تعرف لا وطنا غيره ما ممكن يظلوا طيلة حياتهم في وضع الضيف او اللاجئ او النازح المؤقت! حاليا نفس المشكلة في الجزيرة برضو مع سكان الكنابي! لابد من صيغة قانونية بل ودستورية تحكم الأمر حسب المبادئ العامة للدستور
Post: #31 Title: Re: هل ما يدور في مدينة أبودليق هو إرتدادات مس Author: Mahjob Abdalla Date: 11-21-2020, 02:33 AM Parent: #30
Quote: طيب و الحل شنو! الناس الاستوطنت و اتولدت و عاشت عمرها كله في مكان ولا تعرف لا وطنا غيره ما ممكن يظلوا طيلة حياتهم في وضع الضيف او اللاجئ او النازح المؤقت! حاليا نفس المشكلة في الجزيرة برضو مع سكان الكنابي! لابد من صيغة قانونية بل ودستورية تحكم الأمر حسب المبادئ العامة للدستور
سلام ود البشرى الحل بكون من حلول الدولة الحديثة. توفير الخدمات الاساسية, امتلاك اراضى سكنية او زراعية بالشراء او بالتراضى مع اصحاب السلطة الاهلية التقليديين و لكن لا لابتداع سلطة تقليدية فوق سلطة تقليدية اصلا ماشية نحو الاندثار. الدولة في فيها محكمة و فيها شرطة و فيها وزارة مالية, فلماذا نعيد انتاج سلطة هى اصلا تشريفية في وجود دولة حديثة!
Post: #32 Title: Re: هل ما يدور في مدينة أبودليق هو إرتدادات مس Author: محمد البشرى الخضر Date: 11-21-2020, 08:16 AM Parent: #31
Quote: فلماذا نعيد انتاج سلطة هى اصلا تشريفية في وجود دولة حديثة!
دا الكلام الصاح زي ما قلت تحت ظل الدولة الحديثة و دستورها العادل المحترم من الجميع لكن للأسف عهد الانقاذ في سعيها لتفتيت الكجتكع ليسهل السيطرة عليه قوّت من مكانة الادارة الاهلية و النظار و العمد, اهو انت شايف مثلا في الشرق من يقود الفتنة ومن يبدو انه يطفيها! الناظر فلان و الناظر علان
Post: #33 Title: Re: هل ما يدور في مدينة أبودليق هو إرتدادات مس Author: Biraima M Adam Date: 11-21-2020, 01:30 PM Parent: #32
Quote: فلماذا نعيد انتاج سلطة هى اصلا تشريفية في وجود دولة حديثة!
ول أبا محجوب .. أنت اليوم دخل عندي .. موسوعة جنييس للصفوة.
قال سلطة تشريفية ..أنت قايل خزعبلات الخرطوم ديل يؤسسوا دولة .. الدولة السودانية أسستها الزعامات الشعبية.
بريمة
Post: #34 Title: Re: هل ما يدور في مدينة أبودليق هو إرتدادات مس Author: عزالدين عباس الفحل Date: 11-21-2020, 02:38 PM Parent: #33
عاجلا الحمد لله ربي العالمين. تم الصلح بين قبيلتي الكواهلة و البطاحين. في ابو دليق ...
Post: #35 Title: Re: هل ما يدور في مدينة أبودليق هو إرتدادات مس Author: Mahjob Abdalla Date: 11-21-2020, 09:50 PM Parent: #34
Quote: ول أبا محجوب .. أنت اليوم دخل عندي .. موسوعة جنييس للصفوة.
قال سلطة تشريفية ..أنت قايل خزعبلات الخرطوم ديل يؤسسوا دولة .. الدولة السودانية أسستها الزعامات الشعبية.
سلام بريمة الادارة الاهلية فيها نظام هرمى و في اختلاف مسميات لكن الشكل الهرمى في حد ذاتو متشابه. مثلا القرية فيها شيخ و مجموعة قرى بكون عندهم عمدة و مجموعة عمد ممكن بكون شرتايات و في قمة الهرم بكون سلطان او ملك او ناظر لما تجى مجموعة و تستقر في مكان ما, و عدد المجموعة بحيث يكونو قرية صغيرة, عمدة المنطقة ممكن بمنحهم مشيخة (تحت امرة العمدة) و لو توالت وصول مجموعات اخرى من نفس القبيلة و كونو اكثر من قرية, يمكن الناظر او الملك يمنحهم عمودية (تحت امرة نظارته) بحكم عدد قراهم. لغاية هنا ممكن تستقر 100 او ميتين سنة في امن و وئام و تختلط الانساب و يندمج المجتمع بحيث تذوب كل الفواصل و يكون مجتمع واحد. تلاحظ دائما المشاكل بتظهر في السطح لما تحاول المجموعة الجديدة تأسيس نظارة. لانو النظارة هى قمة الهرم, يعنى كأنك عملت تقرير مصير و اسست دولة جديدة فى ارض دولة موجودة. و لذلك بنقول المشكلة ابدا ليست مشكلة ارض في كل الاحداث التى حصلت من هذا النوع و لكن مشكلة تأسيس سلطة جديدة داخل حدود سلطة اهلية موجودة. لو لم يأتى المستعمر الاوربى و قام برسم حدود الدول الحديثة لكانت هذه الادارات الاهلية هى اساس جميع الدول الافريقية. و طبعا كل السلطنات و الممالك الكانت موجودة في افريقيا بتبنى تحالفات علي هذه الاساس و بذلك تصير ممالك او سلطنات.
